Tusarsigik anersaap ilagiissoqatigiinnut oqaaserisai
Paasissutissat atuagassiami uani qupperneq 7-20-miittut Jehovap Nalunaajaasuisa ataatsimeersuarneranni „Guutip naapertuilluassusia“-mik qulequtalimmi 1988-imi pisimasumi oqalugiaatit tulleriiaartut „Piffissaq aalajangersagaq qaneqaaq“-mik taaguutillit siullersaanni saqqummiunneqarput.
’Siuteqartup tusarligit anersaap ilagiissoqatigiinnut oqaaserisai.’ — SARKÚMERSITAT 3:22.
1. Oqaatsit sarĸúmersitat-niittut suut ukiuni pilluaaffiusuni makkunani tusagassaappat nuannersut, aammalu „siulittuut“ kiisalu „piffissaq aalajangersagaq“ suuppat?
UKIALUNNGUIT matuma siorna inooqatigiinnerup qanoq pilersimaneranik qanorlu ingerlatitaaneranik ilisimatooq USA-meersoq oqarpoq inuit kiffaanngissuseqarpallaartut pilluarnikippallaarlutilli. Nangilluni oqarpoq: „Inuit paasilersarpaat pilluarnerup qimakkiartuaaraatik. Paasilersarpaat paratiisi imminnut neriorsuutigisimasartik suussuseqanngitsuusoq.“ Tamanna eqqarsaatigalugu sarĸúmersitat 1:3-mi apustili Johannesip oqaasii tusagassaapput nuannersut, tassanimi oqaluttuuppaatigut qanoq ililluta pilluarneq nanisinnaagipput. Ima allappoq, Ny Verden-nutsigaq naapertorlugu: „Pilluarput siulittuutip matuma oqaasiinik atuaasorlu tusaasullu, tamatumanilu allassimasunik maleruaasut, piffissaq aalajangersagaq qaneqimmat.“ „Siulittuut“ pisaa tassaavoq siulittuut sarĸúmersitat-ni allassimasoq. Aammalu „piffissaq aalajangersagaq“ pineqartoq tassaavoq siulittuutip tamatuma eqquuffissaa. Johannesip oqaasii uagutsinnut ullumikkut inuusunut pingaaruteqartorujussuupput.
2. Ukiut hundredellit siulliit naalerneranni Johannesip suna eqqarsaatigisimassavaa?
2 Johannes sarĸúmersitat-nik allannini ukiunik 60-init sinneqartunik sioqqullugu, piinsip ulluani ilagiit kristumiut tanitaasut pilersinneqarneranni najuussimavoq. Maanna, ukiumi 96-imi, ilagiit taakkua 120-nik ilaasortaqarsimagaluartut, nunarsuaq tamakkerlugu peqatigiinngorsimapput. Aammattaarli ajornartorsiutinik pilersoqarsimavoq. Soorlu Jesusip, Paulusip kiisalu Peterip mianersoqqussutigisimagaat, tunussisoqalersimavoq immikkullu upperusiortoqalersimalluni, Johannesillu eqqarsaatigisimassavaa siunissami qanoq pisoqarumaarnersoq. — Matîuse 13:24-30, 36-43; apustilit suliait 20:29, 30; 2 Pîtruse 2:1-3.
3. Takorluukkat Johannesip takusai sarĸúmersitat-nilu allagai sumut qularnaveeqqutaappat?
3 Takorlooriarsiuk qanoq nuannaarsimatigissasoq ima takusaqartinneqarami: „Jesus Kristusikkut saqqummersitat, Guutip taassumunnga tunniussai ungasinngitsukkut piumaartussat kiffaminut takuteqqullugit.“ (sarĸúmersitat 1:1, NV) Takorluukkamigut tulleriiaartutigut Johannesip takuaa Jehovap siunertai naammassineqarumaartut aammalu kristumiut aalajaatsut qasusuissusiat nuanningaartumik akilerneqarumaartoq. Aammattaaq ilagiinnut arfineq-marlunnut Jesusip tusarliussai tiguai; tassaapput tusarliussat Naalagaaffiup naalannassusiani tikiutsinnani Jesusip naggataasumik unnersuussutaanik toqqaannartunik imallit.
Ilagiit arfineq-marluk
4. (a) Kristumiut ilagiissaat aalajaatsut sumik pisussaaffeqarpat? (b) Utoqqaanertat tanitaasut ullorissatut arfineq-marluttut Kristusip assaani talerpillermiittutut takuneqarnerat qanoq paasisariaqarpa?
4 Ilagiit arfineq-marluk kristumiunik tanitaasunik ilaasortallit taakku naneruuserfittut (imaluunniit qullisut) arfineq-marluttut saqqummersinneqarput, taakkunanilu utoqqaanertat tanitaasut ullorissatut arfineq-marluttut Kristusip assaani talerpillermiittutut saqqummersinneqarlutik. (sarĸúmersitat 1:12, 16) Assersuutip takorlooruminartup tamatuma Johannesimut ersersippaa ilagiit kristumiut aalajaatsut qaammaqqusersuisuusariaqartut, silarsuarmi taartumi qullisut ikumasutut illutik. (Matîuse 5:14-16) Utoqqaanertat Jesusip assaani talerpillermiinnerata ersersippaa taassumannga aqunneqarnerat, tassa taassumannga siulersorneqarlutillu oqartussaaffigineqartuusut.
5. Ilagiinnut arfineq-marluusunut tusarliussat Johannesip ulluini kikkunnut tunngatinneqarpat?
5 Jesus Johannesimut ima oqarsimavoq: ’Takusatit mappersakkanut allakkit, ilagiissoqatigiinnullu taakkununnga arfineq-marlunnut aatikkit, Efesusimut Smyrnamullu Pergamumimullu Tyatiramullu Sardesimullu Filadelfiamullu Laodikeamullu.’ (sarĸúmersitat 1:11) Ilagiit pineqartut tassaapput Johannesip nalaani ilagiiusimasut, qularutigissanngilarpullu Johannesip sarĸúmersitat allallugit naammassimmagit ilagiit tamarmik immikkut taakkua assinginik pisimassasut. Aammattaarli Hastingsip atuakkiaani Dictionary of the Bible-imi sarĸúmersitat pillugit qanoq allassimasoqarnera malugeriaruk: „Testamentitaap atuagartaasa allat arlaannaalluunniit ukiut 200-ssaanni taakkunatut taama nalunaajaassutigilluagaatigisimagunanngilaq.“ Tamatuma nalunarunnaarsippaa sarĸúmersitat kristumiunit ilagiinni arfineq-marluusuniittuniinnaanngitsoq aammattaarli siulittuutip oqaasertaanik atuaqqissaarumasunit allarpassuarnit ilisimaneqarlutillu atuarneqarsimassasut. Aap, Jesusip unnersuussutai kristumiunut tanitaasunut tamanut tunngatinneqarput.
6, 7. (a) sarĸúmersitat oqaasertaat pingaarnerusumik qaqugumut tunngappat, aamma, taamaannera qanoq nalunngissinnaavarput? (b) Ullorissat arfineq-marluusut ilagiillu arfineq-marluusut ullumikkut kikkunnut assersuutaappat?
6 Eqqortumilli oqaatigalugu ilagiinnut arfineq-marlunnut tusarliussat taakku aamma annertunerusumik tikkuussipput. sarĸúmersitat 1:10-mi Johannes ima oqarpoq: „Anersaap sunniineratigut isumassarsisitaallunga Naalakkap ullussaani ippunga.“ (NV) Versi tamanna sarĸúmersitat-nik paasissutissat pingaarnersaraat. Tamatuma ersersippaa sarĸúmersitat-ni pingaarnerutillugu sammineqartoq tassaasoq „Naalakkap ullussaa“, Jesusip kunnginngornerani 1914-imi aallartissimasoq. Taamatut paasisariaqarnissaa Jesusip ilagiinnut arfineq-marluusunut tusarliussaanit uppernarsarneqarpoq. Pergamumimut oqaatigisani manna tusarliussamini taakkunani arlaleriarluni eqqaasarpaa: ’Tikillarasuarumaarpakkit.’ (sarĸúmersitat 2:16; 3:3, 11) Ukiup 96-ip kingorna sutigulluunniit Jesus ’tikiutinngilaq’, aatsaalli 1914-imi kunnginngortinneqarami ’tikiulluni’. (apustilit suliait 1:9-11) Taava Malakia 3:1-ip eqquunneratut 1918-imi ’tikiuteqqippoq’, Jehovap naalaffianut tikiukkami Guutip inoqutaanik eqqartuusseqqaarumalluni. (1 Pîtruse 4:17) Ungasinngitsukkut ’tikiuteqqissaaq’ ’Guutimik ilisimasaqanngitsunut Naalakkattalu Jesusip iivangkiiliuanut naalakkumanngitsunut akiniutissaq aggiullugu’. — 2 Tásalûníkamiut 1:7, 8; Matîuse 24:42-44.
7 Tamanna tunngavigalugu paasivarput ilagiit arfineq-marluk taakku 1914-ip kingornagut kristumiut tanitaasut ilagiissaannut tamanut assersuutaasut, aammalu ullorissat arfineq-marluk taakku ilagiinni taakkunani utoqqaanertanut tanitaasunut tamanut assersuutaasut. Utoqqaanertat ’savanut allanut’ ilaasut aammattaaq Jesusip assaani talerpillermi inissisimapput, taassumannga oqartussaaffigineqarlutik. (Juánase 10:16) Aammalu ilagiinnut arfineq-marlunnut unnersuussutit tamakku ullumikkut silarsuarmi Guutip innuttaasa ilagiissortaannut tamanut, aammattaaq kristumiunik nunami inuunissamik neriugisaqartunik ilaasortalinnut, tunngatinneqarput.
8. 1918-imi kristumiussutsimik nassuerutiginnittunik alapernaarsuiartorami pissutsit suut Jesusip takuai?
8 Kristumiussutsimik nassuerutiginnittunik 1918-imi alapernaarsuiartorami Jesusip paasivaa kristumiut tanitaasut nunarsuarmiittut ilungersorlutik oqaatsit siulittuutaasut maleruarniarsarigaat. Taakku 1870-ikkunniilli ukiup 1914-ip pingaaruteqassusianik inunnut ilimasaarisarsimapput. Sorsunnersuup siulliup nalaani kristumiuuneraqatigiinnit naalliutsitaasarsimaqaat, 1918-imilu Vagttårnip Peqatigiiffiata siulersuisuisa ilaat eqqunngitsumik unnerluutigisaallutik parnaarussaammata, sulinerat unittuuikkaluarpoq. Taamanikkulli taakkua misigisaat malunnavissumik sarĸúmersitat-ni siulittuutinut naapertuupput. Jesusip oqaasii ilagiinnut arfineq-marluusunut tunngatinneqartut maleruassallugit aalajangiussisimanerata erseqqissumik nalunarunnaarsippaa silarsuarmi taarsisimasumi taakku kisimik kristumiuusut qaammaqqusersuisuullutik. Ullumikkut sinneruttut taakku tassaapput katersat Johannesitut ittut sarĸúmersitat-ni eqquuttut ilarpassuinik misigisaqarlutillu peqataasut.
Unnersuunneqarlutillu nersualaarneqartut
9, 10. Jesusip oqaasiisa suut eqquunnerat ullumikkut kristumiunut pilluassutaava? Nassuiaruk.
9 sarĸúmersitat 3:8-mi Filadelfiami ilagiinnut Jesus ima oqarpoq: ’Suliatit ilisimavakka. Ata, isertarfik allap matuneq ajugaa saanni matuigaatippara; mikisumimmi pissaaneqarputit oqaaseralu toqqorpat [maleruarpat] ateralu miserratiginngilat.’ Kristumiut Filadelfiamiittut nalunanngitsumik sulilluartuusimapput, maannalu matu imaluunniit periarfissaq taakkununnga ammarneqarpoq.
10 Tamatuma ullumikkut eqquunnera Guutip innuttaasa akornanni nuannaarutaaqaaq. 1918-imi ajornartorsioreernermik kingorna anersaakkut makititaaqqipput, 1919-imilu Jesusip matumik mappiuppai periarfissillugit. Inuiannut tamanut tusagassamik nuannersumik Naalagaaffimmut tunngasumik oqaluussissutiginnilernermikkut matukkut tassuunakkut iserput. Jehovap anersaavanik najorneqarmata suliaat tamanna suulluunniit akornusersinnaasimanngilaa, kristumiullu aalajaatsut taakkua immikkut pisinnaatitaaffigaat Jesusip najuunneranut nalunaaqqutip ilaanik pingaarnerusumik eqquutitsinertik. (Matîuse 24:3, 14) Aalajaallutik oqaluussisarnerata kingunerisaanik 144.000-init sinneruttut qaaqquneqarsimapput taninneqarlutillu, kiisalu ’amerlangaartunut’ ilaasussarpassuit katersorneqarsimapput. (sarĸúmersitat 7:1-3, 9) Sulinerup tamatuma Guutip innuttai nuannaarutississimaqai!
11. Johannesip ulluini immikkut upperusiortut qanoq ilillutik Jehovap peqatigiissortaanik ajortunngortitsiniarsimappat, uagullu ullutsinni qanoq ilillutik taamaaliorniarsarippat?
11 Nuannaarnerannik tamatuminnga arsaarneqarsinnaanerpat? Aap. Assersuutigalugu, Pergamumimi utoqqaanertat, naak qasusuitsuusimagaluarlutik, immikkut upperusiortut Nikolausikkut ajoqersuutaat ilagiinnut isitsaalisinnaasimanngilaat. (sarĸúmersitat 2:15) Immikkut upperusiortut sunniinerujartuinnalersimapput. Taamatuttaaq, ullutsinni kingulliusuni tunussisoqartarpoq Jehovap peqatigiissortaanik ajortunngortitsiniaasunik. Utoqqaanertat ataatsitut taassagaanni taakkuninnga akiuiniarsimapput, ajoraluartumilli ataasiakkaat tammartitaasimapput. Qanortoq uagut nuannaarnitsinnik tunussisunit arsaartinngikkisa!
12. (a) Bileamitut Jesabelitullu sunniiniarneq suua? (b) Bileamip imaluunniit Jesabelip sunniiniarnerannut assingusumik Satanip ullumikkut kristumiut ilagiissaat sunnerniarsimavai?
12 Jesusip Pergamumimi ilagiit ’Bileamip ajoqersuutaanik aalajangiussisunut’ mianersoqquai. (sarĸúmersitat 2:14) Ajoqersuut tamanna suugami? Puilasuitsumi Israelikkut akornanni Bileamip ajortunngortitsiniaasimaneratut iliortunik, Pergamumimi inoqarpoq taavani kristumiut akornanni ajortunngortitsiniaasunik, tassa ’guutipilunnut tunissutinik nerisaqqullugit kanngunartulioqqullugillu’. (4 Môrsase 25:1-5; 31:8) Aammattaaq Tyatirami ilagiit Jesusip ’arnamut Jesabelimut’ mianersoqquai. Arnap taassuma aammattaaq kristumiut ilinniartissimavai ’kanngunartulioqqullugit guutipilunnullu tunissutinik nerisaqqullugit’. (sarĸúmersitat 2:20) Ullumikkut ilagiit kristumiut Bileamip imaluunniit Jesabelip sunniineranut assingusumik Satanip sunnerniarsimavai? Aap, taamaaliorsimavoq, imalu iluatsitsisimatigaaq allaat ukiumut 40.000-ingajaat ilagiinnut ilaasortaajunnaarsitaasariaqartarsimallutik, amerlanerit kanngunartuliorsimanermik peqquteqartumik. Pisimasup ila alianassusia! Angutit Bileamitut periaaseqartut arnallu Jesabelitut periaaseqartut utoqqaanertanut assortuiniartarsimapput ilagiinnilu ajortunngortitsiniaasarsimallutik. Sunniiniapilunnerit taama ittut tamaviaarluta akornuserniarniartigik! — 1 Korintumiut 6:18; 1 Juánase 5:21.
13. (a) Akunnattuuneq, imaluunniit ilatsiinnarneq, Jesusip qanoq maajugitigaa? (b) Suna pissutigalugu kristumiut Laodikeamiittut akunnattuuppat, aamma ullumikkut qanoq iliorsinnaavugut taamatut sanngiissuteqarnaveersaarniarluta?
13 sarĸúmersitat 3:15, 16-imi Jesus ilagiinnut Laodikeamiittunut ima oqarpoq: ’Suliatit ilisimavakka, nilleratillu kissannginnavit. Ilumulli nillerlutilluunniit kissaraluaruit. Taamaattumik akunnattuugavit, nilleratilluunniit kissaratilluunniit, qaninnit oriarumaarpakkit.’ Akunnattuunermik, imaluunniit ilatsiinnarnermik, Jesusip maajuginninneranik tamanna assersuutaasumik eqqartuineruvoq takorlooruminartoq! Ima nangippoq: ’Oqaravit: „Pisuuvunga, pequtituunngorlungalu sunnguamilluunniit ajorsanngilanga.“’ Aap, kristumiut Laodikeamiittut pigisanik pingaartitsivallaartunngorsimapput. Imminnuinnaq nuannarisuupput ilaguutiinnalersimallutillu. Jesusilli ima oqarfigai: ’Naluvutit inukuluusutit naakkinaqisutit, piitsuusutit, tappiitsuusutit, tamaqanngitsutit.’ (sarĸúmersitat 3:17) Jesusip isaanit ’inukuluullutalu, naakkinaqalutalu, piitsuullutalu, tappiitsuullutalu tamaqanngitsuunissarput’ kissaatiginerparput? Soorunami naagga! Taamaattumik tamaviaarluta pigisanik pingaartitsivallaalinnginnissarput ilatsiinnalinnginnissarpullu ilungersuutiginiartigu. — 1 Timûtiuse 6:9-12.
Naggatissamut aalajangerit
14. (a) Ilagiit Smyrnamiittut qanoq misilinneqarsimappat? (b) Taakkua misigisimasaannut assingusunik ullumikkut kikkut sunik misigisimasaqarsimappat?
14 Ilagiit Smyrnamiittut ilatsiinnartuunngillat. Jesus kristumiunut taavaniittunut ima oqarpoq: ’Ilisimavakka annikillisarnerit piitsuussutsillu naak pisuusutit, mitaatigimmatsillu imminnik juutiunerartut taamaannatillu, Satanilli ajoqersuiffigisai tassaasut. Qanoq naalliunnissatit sioorageqinagit. Ata, ilasi Diaavulup parnaarussivimmut pisikkumaarpai usserneqaqqullusi; ullullu qulit annikilliorumaarpusi.’ (sarĸúmersitat 2:8-10) Ullumikkut kristumiut misigisartagaannut tamanna assingulluarpoq. Ullumikkut kristumiut, tanitaasut aamma ’savat allanut’ ilaasortaasut, ’Satanip ajoqersuiffigisaanik’ ullumikkut taaneqarsinnaasunit, tassa kristumiuuneraqatigiinnit, assortorneqartaqaat. Sorsunnersuaq siullermiit ullumikkumut angutit, arnat meeqqallu tuusintilippassuit unatarneqarlutillu, parnaarunneqarlutillu, naalliutsitaallutillu, pinngitsaalisaallutillu atoqatigineqartarlutik toqunneqartarsimapput kristumiutut assuarnaassutsiminnik taamaatitserusunnginnertik pissutigalugu.
15, 16. (a) Kristumiut tanitaasut naak malersugaagaluarlutik qanoq ilillutik pilluarsinnaappat? (b) Akissarsiassat immikkut ittut piumaagassatik suut eqqarsaatigalugit ’savat allattaaq’ pilluarsinnaappat?
15 Misigisat taama ittut pillualersitsisarpat? Misigisat taama ittut imminni pillualersitsineq ajorput. Kisiannili apustilisut illutik kristumiut aalajaatsut misilinneqarnerminni qasusuittarsimasut ilumikkut pilluangaartarput ’Jesusip aqqa pillugu mitaatigineqaqqusaagamik’. (apustilit suliait 5:41) Akeqqaminnillu qanoq iliorfigineqaraluarunilluunniit pilluartuaannartarput nalunnginnamikku piffissaq aalajangersagaq assuarnaassusertik pillugu angingaartumik akissarsisinneqarfissartik qaneqisoq. Jesus nangilluni kristumiunut Smyrnamiittunut ima oqarpoq: ’Toqumut allaat ilumoorit, taava niaqorut inuussutaasoq ilinnut tunniukkumaarpara.’ (sarĸúmersitat 2:10) Sardesimiittunullu ima oqarpoq: ’Ajugaasoq taamatut atisanik qaqortunik atitinneqassaaq, aqqalu mappersakkanit inuunerup piinit piiassanngilara’. — sarĸúmersitat 3:5.
16 Neriorsuutit tamakku soorunami pingaarnerpaamik kristumiunut tanitaasunut tunngatinneqarput, akissarsiassamillu, tassa qilammi inuunermik toqusuitsumik, taakkununnga eqqaasitsisuullutik. Kisiannili aammattaaq ’savanut allanut’ ilaasortaasut oqaatsinit taakkunannga nakussatsinneqartarput. Jehovap taakkuttaaq akilissavai aallussilluarllutillu aalajaappata. Nuanningaartumik siunissaqarput, aap Kristus siuttoralugu Naalagaaffiup aqutsinerani nunarsuarmi paratiisiusumi inuunermik naassaanngitsumik kingornussinissamik. Taamanikkussamut paratiisi, inuit silarsuarmi matumani nanisinnaanngisaat, nanisinnaassavaat.
17. Tusarliussat tamaasa immikkut naagaangamigit Jesusip oqaatsit suut naggasiutigisarpai, aamma, oqaasii tamakku uagutsinnut qanoq pingaaruteqarpat?
17 Ilagiinnut arfineq-marlunnut tusarliussani tamaasa immikkut Jesusip naleqqulluartumik naggaserpai oqarluni: ’Siuteqartup tusarligit anersaap ilagiissoqatigiinnut oqaaserisai.’ (sarĸúmersitat 3:22) Aap, Paarsisuunerup oqaasii tusartariaqarpavut maleruartariaqarlugillu. Minguttuuneq tunussinerlu ingalassimasariaqarpavut, nikallujuissuserpullu attatiinnartariaqarlutigu. Akissarsiassamik pinissatsinnut tamanna aalajangiisuussaaq. Taamaaliornissamullu aalajangernitsinni ingerlaqqilluta sarĸúmersitat atuarutsigik nakussatsissutigissavarput.
Mappersakkat naqissutaat
18. (a) Issiavissaarsuaqarfimmi qilammiittumi Jesus sumik tunineqarpa? (b) Hestersut sarĸúmersitat-ni, kapitali 6-imi, eqqartorneqartut ilaasa pingasut qimunnerat inuiannut ullumikkut inuusunut qanoq sunniuteqarpa?
18 Assersuutitut, kapitali 4-mi 5-imilu Jehovap najugaa issiavissaarsuaqarfiusoq qilammiittoq kusanangaartoq Johannesimut takorroortinneqarpoq. Guutip Savaaraa, Jesus Kristus, tassaniippoq, mappersakkanillu arfineq-marlunnik naqissusersimasunik tunineqarluni. Mappersakkat naqissutaat arfineq-marluusut ilaat arfinillit kapitali 6-imi Jesusip ataasiakkaarlugit mapperpai. Naqissut siulleq mapperneqarmat takuneqarsinnaavoq hestersoq hestip qaqortup qaaniittoq. Taanna niaqorummik tunineqarpoq, aallarporlu ’ajugaalluni ajugaassallunilu’. (sarĸúmersitat 6:2) Tassaavoq Jesus, kunngi niaqorusigaaqqammersoq. Taassuma kunngisut ajugaassamaarluni 1914-imi qimulluni aallarnerani Naalakkap ullua aallartippoq. Naqissutit pingasut tulliuttut mapperneqarnerisigut hestit hestersullu pingasut allat takkupput. Taakku tassaapput isigisat annilaarnartut, inuit imminnut sorsuunnerinut, kaannersuarnut, aammalu nappaalanersuit allallu pissutigalugit toqorarnernut assersuutaasut. Tamakkua uppernarsarpaat Jesusip siulittuutaa annertooq, tassa taassuma qilammi kunngisut najuunnerata ilisarnaatigissagai nunami sorsunnersuit annertuut, kaannersuit, nappaalanersuit, nunap sajuttarneri, ajunaarnersuillu allat. (Matîuse 24:3, 7, 8; Lúkarse 21:10, 11) Pissutsit taamaattut atuutsillugit kristumiut nakuujuaannassagunik Jesusip ilagiinnut arfineq-marlunnut oqaasii naalaaqqissaartariaqarpaat.
19. (a) Kristusip najuunnerani kristumiut tanitaasut aalajaatsut toqoreersimasut sumik akissarsisinneqarpat? (b) Piumaartussat amiilaarnangaartut suut naqissutit arfernata mapperneqarneragut siulittuutigineqarpat, taavalu apeqqut suna apeqqutaalerpa?
19 Naqissutit tallimaat mapperneqarmat anersaat najugaanni takussaanngitsuusuni pisimasoq saqqummersinneqarpoq. Kristumiut tanitat uppernertik pissutigalugu toqutaasimasut tamarmik immikkut atisamik takisuumik qaqortumik tunineqarput. Tassa Kristusip najuutilerneraniilli qilammut makititsineq aallartissimannguatsiarpoq. (1 Tásalûníkamiut 4:14-17; sarĸúmersitat 3:5) Taava naqissutit arfernat mapperneqarpoq, ’nunalu’, tassa Satanip pissutsinik aaqqissuussaa nunamiittoq, sajuttorsuanngorpoq. (2 Korintumiut 4:4) ’Qilak,’ tassa Satanip aqutsineratigut inuit naalakkersuineri, mappersakkatut imusatut atornikutut iginneqalersutut imuneqarpoq. Annilaangaarlutik inuit naalasseriitsut neriuutissaarullutik qaqqanut qaarsunullu nillerput: ’Nakkarfigitigut isertorlutalu issiavissaarsuarmi issiasup kiinaanit Savaaqqallu kamanneranit, kamannerata ullorsua nalliummat; kinalu atasinnaassava?’ — sarĸúmersitat 6:13, 14, 16, 17.
20. Jehovap Savaaqqallu kamannerata ullussarsuani kikkut atasinnaassappat?
20 Aap, kina atasinnaassava? Jesusip apeqqut tamanna akereersimavaa. ’Anersaap ilagiissoqatigiinnut oqaaserisaanik’ tusartut kamannerup ullussarsuani atasinnaassapput. Tamatumunnga uppernarsaataasumik tulliuttuni Johannesip takuai 144.000-init sinneruttut naqissuserneqartut amerlangaartullu inuiannit tamaneersut ’annikilliornartussami angisuumi’ aniguiumaartussat katersorneqartut. (sarĸúmersitat 7:1-3, 14) Maannali piffissanngorpoq mappersakkat imusat naqissutaasa arfineq-aappaata mapperneqarnissaanut takusassallu ilungersornartut Johannesimut, taannalu aqqutigalugu ullumikkut uagutsinnut, takutinneqarnissaannut. Tamakkua ilaat ilanngutassiami tulliuttumi sammineqassapput. (wD 1/4 89)
Eqqaamavigit?
□ Jesus ilagiinnilu utoqqaanertat imminnut qanoq attaveqarpat?
□ Ilagiinni Pergamumimiittuni Tyatiramiittunilu utoqqaanertat sunik ajornartorsiuteqarsimappat, aammalu ullumikkut ilagiit ajornartorsiutinit taakkununnga assingusunit qanoq nalaanneqarsimappat?
□ Ilagiit Laodikeamiittut qanoq annertuumik kukkusimappat, ullumikkullu qanoq iliorluta taamatut kukkunaveersaarsinnaavugut?
□ Ukiuni hundredelinni atukkatsinni kristumiut sunik atugaqartariaqarsimappat, aamma taamaaliornerminni Jesusip neriorsuutaanit sunit ikiorneqarsimappat?
□ Neriuutissaarussimaneq isumatsangaarnerlu inuiaat Harmagedonimi atugassaat uagut qanoq ingalanniarsinnaavavut?
[Qupp. 11-mi assiliartaq]
Kristumiut aalajaatsut pillaavissuarni naalliutsitaangaarsimasut ilaat
[Suminngaanneernera]
DÖW, Wien, Østrig