Ukiuni tuusintini naalagaaffik eqqarsaatigalugu aaqqissuussineq
’Kunngioqatigissavaallu ukiut tuusintillit.’ — SARKÚMERSITAT 20:6.
1. Ukiut tuusintinit amerlanerusut qaangiuppata pissutsit qanoq ittut nunami atuutissappat?
QANOQ? Isumaqarpugut siunissami ukiut tuusintit qaangiuppata nunami maani suli inoqassasoq? Aap, taama- torluinnaq isumaqarpugut! Nunarsuarmi maani inuit siulliit assigilluinnarlugit taamanikkussamut inuittaaq tamarmik uummatikkut, isumakkut timikkullu naammalluinnartuussapput. Aap, ukiut tuusintit qaangiuppata inuit, Guuti assilillugu sanaasimasut, taanna assigilersimassavaat. (1 Môrsase 1:26-30) „Edenip naatsiivia“-ni, nunami salinneqarsimasumi nuannaarnerup paratiisiani inunnik tattoqissimanngitsumi, inuuneq tamakkiisumik nuannaarutigisinnaalissavaat. (1 Môrsase 2:15) Tamakku tamarmik Pinngortitsisup nunarsuarmik inuinillu aallaqqaammut siunertarisaanik eqquutitsinerussapput. Inerneq kusanartoq tamanna uppernarsaataassaaq naak akerlilersorneqaraluarluni inuiannut tamanut pilluaqqusinissaminik neriorsuunni asannittoq aalajangiusimagaa.
2. Ukiut nitten hundredet missaata matuma siornagut inuit ilaat qanoq ilillutik inuiaat naammalluinnartut qanoq ittuunissaannik takusaqartinneqarpat?
2 Tamanna Guutip ernermigut naalannarsisitaasimasukkut, ukiut 1900-t matuma siorna ukiuni 33 1/2-ini inuttut naammalluinnartutut nunamiissimasukkut, naalakkersuinerata ukiunik 1000-inik sivisussuseqartup naammassisarissavaa. Jesusip nunamiinnermini pissusia ima eqqaaneqarpoq: ’Oqaaserlu uininngorpoq akornatsinniilerlunilu, takuarpullu naalannassusia soorlu ernituap ataataminit naalannassuserisaa, saammaannermik sallusuissummillu ilumioqangaartoq.“ (Juánase 1:14) Inuiaqatigiit israelikkut inuup naammalluinnartup qanoq ittuussusia Jesus Kristusikkut takusinnaasimavaat. (Lúkarse 3:23, 38) Tassa ukiut 1900-t matuma siorna inuit ilaasa nunami paratiisissami inuup naammalluinnartup qanoq ittuussusissaanik paasinnipajaareersimapput.
3, 4. (a) Jehovap naalakkersuinera, Jesus Kristusimit 144.000-inillu aqunneqartoq, qanoq sivisutigissava? (b) Piffissaq taamatut sivisussuseqartoq qanoq taaneqartarpa, sumullu atatillugu taaguut tamanna atorneqarsimava?
3 Siulittuutigineqarsimavoq Jehovap naalagaaffia, Jesus Kristusimit taassumalu ajoqersugaanit naalannarsisitaasimasunit 144.000-iusunit aqunneqartoq, ukiunik tuusintinik sivisussuseqassasoq. Ukiuni tuusintini naalagaaffik tamanna pillugu apustili Johannes utoqqalilersoq allappoq: ’Issiavissaarsuillu takuakka, taakkununngalu ingipput, eqqartuussinissarlu taakkununnga tunniussaavoq; Jesusillu nalunaajaataa pillugu Guutillu oqaasia pillugu niaquersitaasut tarnaat takuakka, nersummillu assinganilluunniit pallorfiginninngitsut, qaarmikkullu assammikkullu ilisarnaqutsersinngitsut; uummarpullu, Kristusilu kunngioqatigaat ukiut tuusintillit. Toqusoqataat uummanngillat ukiut taakku tuusintillit naammatsitserlugit. Tassa makiffik siulleq. Pilluarlunilu iluarpoq makiffimmi siullermi pissaqartoq; taakkununnga toqup aappa piginnaassuseqanngilaq, kisianni Guutip Kristusillu palasertarissavaat, kunngioqatigissavaallu ukiut tuusintillit.’ — sarĸúmersitat 20:4-6.
4 Piffissamut ukiunik tuusintinik sivisussuseqartumut taaguutigineqarpoq millennium. Ajoqersuummik Bibelimeersumik tamatuminnga akuerinnillutillu siaruarterisut ilaannikkut millennisterinik imaluunniit chiliasterinik taaneqartarsimapput, latinerisut grækerisullu oqaaseq „tuusintit“-nik isumaqartoq naapertorlugu. Soqutiginarportaaq atuakkiaq Allakkanik illernartunik atuaqqissaarutit-mik taaguuteqartoq (Vagttårnip Peqatigiiffianit saqqummersitaasoq, kalaallisuunngortitaanngitsoq) taagorneqaqqaarsimammat Millenniap Qaalernera-nik.
5. Ukiuni tuusintini Kristusip naalgaaffiata ataani Satan inngilipiluilu qanoq pineqassappat?
5 ’Ukiut tuusintillit’ sarĸúmersitat 20:4-mi eqqaaneqartut assersuutaannaanngillat, ukiuiilli tuusintit, nunarsuup seqinermik kaajallaaneri tuusintit, pineqarput. Ukiuni tuusintini taakkunani Satan Diaavulu inngilipiloqaterpassuanilu itinersuarmiissapput, apustilimi Johannes Kristusip ukiuni tuusintini naalagaaffiata eqqaanngitsiarnerani ima allappoq: ’Inngili takuara qilammit aqqartoq, taassuma itinersuarmut matuersaataasoq pigigaa, kalunnersuillu tigumiarigai. Kuukkooriaasarsuarlu tiguaa, taanna pulateriaarsutoqaq, tamassalu Diaavulu Satanilu; qilersorpaalu ukiut tuusintillit qilersugaaqqullugu; itinersuarmullu igippaa matullugulu qulaagullu naqissuserlugu, inuiaqatigiit taassumunnga tammartissaaqqullugit ukiut taakku tuusintillit naammatsitserlugit; taakkua kingornatigut sivikitsumik qilerussaarneqassavoq.’ — sarĸúmersitat 20:1-3.
6. (a) Kristusip ukiuni tuusintini naalakkersuinera katuullit ilaasa qanga naanerarpaat? (b) Tamanna ilumoorsimagaluarpat taava piffissaq sivikitsoq Satanip itinersuarmit iperagaaqqaffissaa maannamut qanoq sivisutigereersimassagaluarpa?
6 Katuullit oqarsimapput Jesus Kristusip ukiuni tuusintini naalagaaffia 1799-imi taamaatissimasoq, taamani Roma franskit sakkutuuinit tiguarneqarmat, paavi naalakkersuisuujunnaarsinneqarluni kingorna toquffigisaminut Frankrigimut tigusatut aallarunneqarmat. Katuullit palaseqatigiivi oqarsimapput taamanikkut Satan inngilipiluilu ’itinersuarmit’ iperagaasimasut ’sivikitsumik’ inuit tammartinniaqqissallugit. (sarĸúmersitat 20:1-3) Taamaassimagaluarpat piffissaq ’sivikitsoq’ tamanna maannamut ukiunik 190-inik sivisussuseqareersimavoq, naanissaanik ilimanartoqarani.
7. Jesus Kristusip ukiuni tuusintini naalakkersuinissaata qaqugu pinissaa Bibelimi qanoq oqaluttuarineqarpa, taamanikkussamullu qanoq pisoqassava?
7 Bibelili naapertussagaanni Jesus Kristusip naalagaaffia ilumoortoq siunissami aatsaat pisussaavoq. Bibelimi siulittuutit eqquunnerisigut paasineqarsinnaavoq tamanna ungasikkunnaartoq. Ukiuni tuusintini naalagaaffiup tamatuma naalakkersuinerani Satan inngilipiluilu itinersuarmut iginneqassapput, Diaavulullu peqatigiissortaanit sunnersimaneqaratik Jesus Kristus kingornusseqatissaalu 144.000-iusut inuiannik tamanik naalakkersuissapput. Ikinngumminik Abrahamimik angerutsimi eqquunnerisaanik Jehovap inuiaat utertitaasimasut naassaanngitsumik pilluaqqussutissaqartissavai — siullermik ’amerlangaartut’ annikilliornartumit aaqqissuussaanermik ajortumik matuminnga nungutitsisumit asseqanngitsumit aniguisut, taavalu toqusimasut milliardilippassuit ’savaaqqap’, Jesus Kristusip, aava tunngavigalugu utertitaasut. (Jâko 2:21-23; sarĸúmersitat 7:1-17; 1 Môrsase 12:3; 22:15-18; Matîuse 24:21, 22) Tamanna pisinnaaqqullugu toqup sinippaartitsineranit itertinneqassapput ilivernillu eqqaassutissaasunit nunami inuunermut makitinneqassallutik. — Juánase 5:28, 29.
Aaqqissugaaneq kristumiuusoq
8. Peqatigiiffik suna atuakkami Pinngortitaq nutaaq-mi eqqartorneqarpa, suliarli suna eqqaaneqanngila?
8 Pilluaqqussutissat piviusunngorluinnarnissaat ukiunik hundredenik arlaqartunik sioqqullugu Guutip siunertaanut atatillugu aaqqissugaaneq nutaaq pilersinneqarpoq imaluunniit atuutilersinneqarpoq. Aaqqissugaaneq tamanna ukiuni hundredelinni siullerni pilersinneqarsimasoq pillugu ima allassimasoqarpoq: ’Kinaluunniit Kristusimiittoq pinngortitaavoq nutaaq.’ ’Kipineqarnerluunniit kipineqannginnerluunniit atunngimmata, kisianni pinngortitaq nutaaq.’ (2 Korintumiut 5:17; Galâsiamiut 6:15) 1904-mi atuakkami Pinngortitaq Nutaaq-mi, tulleriiaartunut Allakkanik Illernartunik atuaqqissaarutit-nut ilaasumi (tamarmik kalaallisuunngortitaanngillat), aaqqissugaaneq tamanna eqqaaneqarpoq. (Atuagaq IV, kapitali 5 taaguuteqartoq „Pinngortitap Nutaap Aaqqissugaanera“.) Guutimilli nalusut ullussaata 1914-imi naanissaanut tunngatillugu taamanikkut paasisimasat killeqarnerat pissutigalugu aaqqissugaanerup tamatuma sorsunnersuup siulliup kingorna suliassaa annertoqisoq atuakkami eqqaaneqanngilaq. — Lúkarse 21:24.
9. Pinngortitap nutaap sinneri qanoq nutaamik sulileqqissinneqarpat?
9 Pinngortitamut nutaamut anersaakkut ittumut ilaasut sinneri sorsunnersuup siulliup 1918-imi naanerani suli inuunerat, 1919-imilu suli nunami uiniullutik inuunerat taakkununnga tupaallaataaqaaq. Pissutsillu naalagaaffiup ukiunik tuusintinik sivisussuseqartup naaneranut ilisarnaataasut aallartinngimmata paasivaat pinngortitamut nutaamut ilaasut sinneruttut qilammi inuunermut makitinneqannginnerminni ukiunilu tuusintini Jesus Kristusimik naalakkersueqateqalinnginnerminni nunami suliassaqarallassasut. Taamaattumik ’sinneruttut’ sulileqqissillugit aaqqissugaaqqinnissaat pisariaqartinneqartorujussuanngorpoq. Paasinarsivoq aalajaatsumik uppersuseqarlutik, suliassaminnillu aallartitsinissaminnut piumassuseqarluarlutik suliassartik sapinngikkaat.
10. Inuit millionilikkuutat aniguillutik pissutsit aaqqissuussaanerannut nutaamut isertussatut ilimagineqartut pillugit apeqqutit suut takkuppat?
10 Aaqqissuussaanerup ajortup matuma naggatissaanit ajunaarfiusussamit inuit ilaat aniguisussaapput Jesus Kristusillu naalakkersuinerata ukiunik tuusintinik sivisussuseqartup ataani nunami inuuinnartussaallutik — sinneruttut tanitaasut taama isumalluaateqarput, ingammik oqalugiaatip „Inuit maannakkut inuusut millionilikkuutaat toqunngisaannassapput“-mik taaguutillip ukiumi sorsuffiusumi 1918-imi Los Angelesimi oqalugiaatigineqarnerata kingorna. Inuit taakku millionilikkuutaat Harmagedonimit aniguisussat aaqqissuussiffigineqassappat? (sarĸúmersitat 16:14-16) Taakkua ’nunassamut nutaamut’ ilaalissallutik naalagaaffimmut ukiunik tuusintinik sivisussuseqartumut eqqunneqannginnerminni ’sinneruttunut’ Naalagaaffik pillugu oqaluusseqataasussaappat? (2 Pîtruse 3:13) Apeqqutit tamakku sorsunnerup kingorna pisutigut akissutissarsineqarsimapput.
11. (a) Savat allat ’sinneruttunik’ savaatitut ataasioqatiginnilersussat suneqartariaqarsimappat? (b) ’Sinneruttut’ savallu allat tamarmik immikkut neriuutissaqarnerat sooq avissaarutaanngila?
11 Guutip innuttai savanik paarsisup eqqortup, Jesus Kristusip, oqaasiinik naleqqulluartumik eqqaasinneqarput: ’Allanik savaateqarpunga inimit matumannga pinngitsunik; taakkuttaaq aggiussassaraakka, nipigalu tusassavaat; imaassappullu: savaatit ataatsit, paarsisorlu ataaseq.’ (Juánase 10:16) Sinneruttut tanitaasut sorsunnersuup kingorna, 1919-imit kingornalu, suliassamik naammassinninniarnissaminnut aaqqissugaasariaqarsimapput. ’Savammi allat’ kingorna ’sinneruttut’ peqatigalugit savaatitut ataasinngortussat? Soorunami taakkuttaaq aaqqissuugaasariaqarsimapput. Taakkua allamik neriugisaqarnerat nunamilu paratiisiusumi inuunissaminnik qilanaaruteqarnerat taakkua sinneruttullu tanitaasut akornanni avissaarutaanngilaq. Tamarmik savanik paarsisoq ataaseq malippaat, aatsaallu sinneruttut tanitaasut Naalagaaffimmi naalannarsisinneqarpata avissaartussaallutik.
12. (a) Inuiaat annaanneqarnissaannit suna pingaaruteqarnerungaarpa? (b) Naalagaaffiup oqaluussisutiginissaa qanga pisariaqalerpa, sooq?
12 Jehovap siunertaasa misinnangaartut ilagaat inuit ajortimit toqumillu aniguisinnissaat, Satanip silarsuarmi naalagaanerata atorunnaarsinnissaa aammalu inuit naalattut iluaqutissaannut Paratiisip nunarsuarmi tamarmi pilerseqqinnissaa. Allamilli qilammut nunamullu pingaarnerungaartoqarpoq. Suna? Jehova Guutip qilammut nunamullu tamarmut kisimi naalagaanerata aalajangiunneqarnissaa aqqatalu angisuup illernarsisinneqarnissaa. 1922-mi Cedar Pointimi Ohiomiittumi ataatsimeersuarnerit Bibelimik atuaqqissaartartut nunanit tamalaaneersut ingerlataasa aappaanni Jehovap naalagaaffiata, Jesus Kristusip, kunngip naalakkersuisup, aqutaata oqaluussissutiginissaanut piffissanngornera erseqqissarneqarpoq. Guutimik nalusut ullussaat 1914-imi naammata Jesusip oqaasiisa siulittuutaasut eqquunnissaannut piffissanngorsimavoq: „Naalagaaffimmik tusagassaq nuannersoq tamanna nunarsuarmi inuit najugarisaanni tamarsuarmi inuiaat tamarmik nalujunnaarutissaannik oqaluussissutigineqassaaq; taavalu naggatissaq nalliutissaaq.“ (Matîuse 24:14, NV) Naalagaaffik Jehovap qilammi nunamilu kisimi naalagaaneranik aalajangiussisussaq aqqanillu illernartumik qutsissisitsisussaq 1914-imi pilersinneqarsimavoq, maannalu Jesus Kristus akeqqami akornanni naalagaavoq. Tamanna tusagassaavoq misinnangaarlunilu nuannersoq Kunngimik naalagaaffianillu tusagassamik ilisimaneqalersitsiniarluni atortussaasinnaasut suut tamaasa atorlugit oqaluussissutigineqartussaq.
13. Naalagaaffimmik oqaluussissutiginninnermut atatillugu Guuti qanoq aqqutissiuussiva, sooq?
13 Jehova tassaavoq qilammi nunamilu Aaqqissuussisoq, Qutsinnerpaaq. Sorsunnersuup siulliup kingorna taassuma isumagaa naggatissap nalliutinnginnerani naalagaaffimminik nunami oqaluussissutiginnilluni suliap aaqqissuulluagaanissaa. Sinneruttunut tanitaasunut ilaasut Guutip piumasaanik naammassinninnissaminnut nunarsuaq tamakkerlugu aaqqissuussamik peqatigiinngortinneqarput. Silarsuarmut oqaluussissutigisariaqarpaat Jehovap qilammi nunamilu kisimi naalagaasussaviunera ataasiaataasumik tamanut aalajangiunneqartariaqartoq, Satanip tamanna apeqqusersimammagu.
Ukiuni tuusintini naalagaaffik sioqqullu Guutip peqatigiissortai
14. (a) Ukiunik naatsorsuisarnitta maannakkut atuuttut aallartinnerata siornagulli peqatigiissortat kikkut Guutip peqatigiissortaani takussaasortaalersimappat? (b) Qanoq ililluni paasinarsisimava David tassaasoq peqatigiissortanik aaqqissuussisartoq maluginiarnartoq?
14 Ukiunik naatsorsuisarnerput maannakkut atuuttoq ukiunik 1500-nik sioqqullugu Jehova Guuti nunami takussaasunik peqatigiissortaqarsimavoq. Ægyptenimit, Bibelip oqaluttuaani naalagaaffissuit siullersaannit, Israel aniguisereeramiuk pruffiiti Moses akunnermiliuttoralugu inuiaat taakku peqatigiissortamisut kattutsippai. Mosesip inatsisaasa atuunnerisa nalaanni Israel Jehovap peqatigiissortaani takussaasortaasimavoq. Peqatigiissortanik aaqqissuussisartoq maluginiarnartoq inuiannit toqqakkanit taakkunaneersoq tassaavoq kunngi paarsisoq David ima allaatigineqartoq: ’Davidillu [Levikkut Jehovap illernartuutaani kiffartortut] immikkoortiterpai [aaqqissuuppai] sinniisoqatigiinngorlugit, Levip erneri Gersjon, Kehat Merarilu immikkoortiterutigalugit.’ ’Immikkoortiterpaalu [palasit] immeraateqatigiissillugit, illernartuut naalagartaqarmat Guutilu naalagartaqarluni Eleazarillu kinguaasa ilaanik Itamarillu kinguaasa ilaanik.’ — 1 nalunaerssûtigdlit 23:3, 6; 24:1, 5.
15. (a) Israelikkut qanoq ittumik Ægypten qimappaat? (b) Kikkuttaaq Ægypten qimanniarlugu aalajangerpat, israelikkunnullu ilaaginnarpat?
15 Davidip nalaa ukiunik hundredelinnik arlaqartunik sioqqullugu Israelikkut Ægypten qimakkamikku aaqqissuussaanngivillutik pinngillat. Aap, aaqqissuussaallutik aallarput, tamannalu takussutissaavoq akunnermiliuttuata Mosesip aallarnissaat aaqqissuulluarsimagaa. Israelikkuunngitsorpassuit ingerlaqataapput, inuiannut Ægyptenip guuterpassuinit annerunini ersersillugu tupinnartuliortaqattaarsimasumik, Jehova Guutimik, guutilinnut ilanngullutik. Naak misilinneqarnerpassuarnik nalaataqartaraluarlutik ’ilaaniartorpassuit’ tamakku Jehovap innuttaanut qinikkanut ilaarusuttut kingunerileraa israelikkut Sinajip puilasuitsuanut mianernangaartumut apuummata suli ingerlaqataapput. (2 Môrsase 12:37-51; 4 Môrsase 11:4) Inuppassuit tamakku qularnanngitsumik Israelikkut Mosesip kingoraartaanit Josuamit siulersorneqarlutik nunamut neriorsuutigisamut isermata ilaapput, tassami allamiunut israelikkut akornanni najugaqavissunut Guuti aalajangersaateqarmat.
16. (a) Inuppassuit taakku israelikkuunngitsut kikkunnut assersuutaappat? (b) Pissutsit aaqqissuussaanerata matuma naggatissaani aniguiumagunik qanoq iliortariaqarpat?
16 Inuppassuit taakku Faraop naalagaaffigisaanit Ægyptenimeersut maani ukiut 20 hundredessaanni ’amerlangaartunut’ assersuutaapput. Taakku anersaakkut israelikkuunngillat paarsisulli eqqortup, Jesus Kristusip, savaataanut allanut ilaasuupput. Taakkua, sinneruttut tanitaasut ilagalugit, Ægyptenimit assersuutaasumit, pissutsit aaqqissuussaanerannit matumannga, Faraomik annermik, Satan Diaavulumik, guuteqartumit, aniguinissartik qilanaareqaat. (Juánase 10:16; 2 Korintumiut 4:4; sarĸúmersitat 7:9) Satanilli silarsuatoqaanik aseruerujussuarnissami aniguisitaassagunik silarsuassamullu neriorsuutigisaasumut Josuamit annermit, Jesus Kristusimit, siulersorneqartumut isissagunik qanoq iliortariaqarpat? (2 Pîtruse 3:13) Jehovap peqatigiissortaasa takussaasup pingaarnersaat, sinneruttut tanitaasut, tapersersortariaqarpaat, peqatigiissortaqarnerullu aaqqissuussaaneranit siulersortittariaqarlutik.
17. Silarsuarmi peqatigiiffiunngitsumi ’amerlangaartunut’ ilaasortaasut qanoq iliorpat, sunalu qilanaaraat?
17 Ingammik 1930-p qiteqqunnerata kingorna ’amerlangaartut’ ’savanut’ aaqqissugaasunut paarsisumit naalannarsisitaasimasumit, kunngi Jesus Kristusimit, siulersorneqartunut eqqussorneqarput. Silarsuarmi, naak peqatigiiffiup Naalagaaffiit Peqatigiit piugaluartoq, peqatigiikkunnaariartuinnartumi amerlangaartunut taakkununnga ilaasortaasut tanitaasunik sinneruttunik uummatimikkut iluunngarlutik tapersersuipput taamaalillutillu Jehovap anersaavata ataasiussuseqalersitsisinnaassusianik takussutissiillutik. Jesus Kristusip ukiuni tuusintini naalakkersuinerata ataani immikkut ittumik kiffartuuteqarnissartik qilanaariitigalugu alajangiusimalluinnarpaat ’sinneruttunik’ peqateqartuaannarnissartik. (wD 1/9 89)
Qanoq akissavit?
□ Jesus Kristusip ukiuni tuusintini naalakkersuinissaata qaqugu pinissa Bibelimi qanoq eqqartorneqarpa, taamanikkussamullu qanoq pisoqassava?
□ Inuiaat annaanneqarnissaannit suna pingaarnerungaarpa?
□ Peqatigiissortat kikkut ukiunik naatsorsuisarnittaa maannakkut atuuttut siornagulli Jehovap peqatigiissortaanut takussaasortaasimappat?
□ Inuppassuarnut israelikkunnut ingiaqataasunut assersuutaasut qanoq ilillutik annassappat naalagaaffimmullu ukiunik tuusintinik sivisussuseqartumut iserlutik?