Toqusunut sumik neriuutissaqarpa?
ILAQUTARIIT inuusuttut nuliaasup angajoqqaavi ilagalugit immikkut biilerlutik feriariartorlutik Afrikap kujalliup kangimut sineriaanukarput. Angajoqqaavi siulliullutik ingerlapput. Tassanngaannaq biilip aappaata assakaasuisa ilaat pullaartoorpoq. Aqqusernup sinaa-tungaaniillutik assakaasumik taarsiinialeruttortut biilertumit imersimasumit aporneqarput. Angut utoqqasaaq nulialu toqutaapput. Ningaavat ullualunnguit qaangiummata toquvoq. Nuliata najungasuisa ilaat napipput allatigullu aqqunartiterluni. Meerannguallu qaratsamigut sajuppillannerit pissutigalugit tamarmi nukillaarpoq.
Ilaqutariit taakkua nallinnartut nalaataata alianassusia! Anaanap inuusuttup qatanngutaata, Carolannip, pisimasoq tusaramiuk, aliasunnermit ujaranngortutullusooq ilerpoq. Alianartut tamaattut pigaangata — sumiluunniillu pisarput — ilaqutaasut ikinngutaasullu qimagaasut aliasullutik ima aperigajupput: ’Toqungasut ilumut toqungappat,’ imaluunniit . . .
’Allami inooqqilerpat?’
Uppeqatigiinni tamanngajanni tarnip toqusuissusia ajoqersuutigineqarpoq. Malinnittaasa taamaattumik upperaat toqusut toquinneq ajortut kisianni qilammi, eqqiarfimmi anniarfimmiluunniit inooqqilersartut. Uppeqatigiinni amerlasuuni ajoqersuutigineqarpoq taaneqartumut kingullermut pisimasut naassaanngitsumik anniartitaangaassasut. Kisianni Guutip asannittup pinngortitani ilumut taama anniartinniarnerpai? — 1 Juánase 4:8.
Ilimanarpallaanngilaq, qanorli ililluta qularinngissinnaavarput? Paasissutissat Guutimit isumassarsiarititaasut Bibelimeersut makku eqqarsaatigilluariakkit: „Jehovallu Guutip inuk issumit nunap ilaanit sanavaa sulluarlugulu sorluisigut anersaarnermik uumassutaasumik, inullu tarninngorpoq uumasoq.“ (1 Môrsase 2:7, NV) Allassimava inuk siulleq, Adam, tarnilinngortoq? Naamik, tarninngorpoq, uumasoq. Môrsasip agdlagai sujugdlît issuaaffigalugit Paulusip tamanna uppernarsarpaa: ’Inuk siulleq, Adam, tarninngorpoq uumasoq.’ — 1 Korintumiut 15:45.
Inuup tarnaa toqusinnaava? Pruffiiti Ezekiel allassimavoq: „Tarnit tamaasa uanga pigaakka. Angutaatalu tarnaa erneratalu tarnaa — uanga pigaakka. Tarneq ajortuliortoq toqussaaq.“ (Hesekiel 18:4, 20, NV; Nalunaajaasup oqaasii 9:5, 10) Nalunanngilaq tarneq toquguni ilisimanavianngitsoq taamaattumillu anniarsinnaanani. Piinsip ulluata kingorna inuppassuit tusaatillugit oqalugiaatimini siullermi apustili Peter oqarpoq: „Tarneq kinaluunniit pruffiitimut taassumunnga naalanngitsoq inunnit piiarneqassaaq.“ (apustilit suliait 3:23, NV) Tassa tarneq toqusinnaavoq!
Toqungasut uumaqqissappat?
Bibelip ilumoortuussusianik uppertut tamarmik Jesus toqusimasoq ullullu pingajuanni makititaasimasoq qularinngilaat. (apustilit suliait 10:39, 40) Tamanna qanoq pisinnaaava? Guutip anersaava illernartoq ikiortigalugu.
Jesusip makititaasimanera kisiartaassava? Naamik, soorlumi Paulus ilagiinnut Korinthimiittunut allassimasoq: ’Maannali Kristus toqusunit makissimavoq sinippaartunut naaqqaataalerluni. Toqumi inukkut pinngormat aammattaaq toqusut makiffissaat inukkut pinngorpoq . . . Kristus.’ (1 Korintumiut 15:20-22) Tassa amerlasuut toqusunit makikkumaarput. Jesus aamma oqarsimavoq: ’Tamanna tupigusuutigissanngilarsi, ullut nalliukkumaarmata, taava iliverniittut [iliverni eqqaassutissaasuniittut, NV] tamarmik taassuma nipaa tusarumaarpaat; anillutillu makissapput, ajunngitsuliorsimasut inuunermut pisussaallutik.’ (Juánase 5:28, 29) Tamanna inuit millionillit makinnissaannut uppernarsaataavoq.
Nassuiaaneq tamanna pissutigalugu makinnissamik neriuutigisaq soqutigilerukku immaqa aperiumassaatit: ’Kikkut makititaassappat, qaqugulu?’ Apeqqutit pingaartut tamakku itinerusumik misissoriartigik. (wD 15/10 89)