Maleruagassaq atortuujuaannartoq — Sunaava?
„TUSAALAARIARIT! Uanga inunnut allanut tunngassut susassarinngilakka. Inuit piumasaminnik iliorsinnaapput. Ajornartorsiorpatami soorunami ikiussavakka.“ Illit taama isumaqarpit? Ajunaarnersuaqaraangat amerlasuut tupaallaatigisaannik inuit inoqatiminnut namminissarsiornatik ikiuiumatusarnerat killeqarneq ajungajappoq. Aatsaalli inuit ajornartoorfianni ikiortassavavut?
Illit ataataaguit anaanaallutilluunniit qularnanngitsumik meeqqatit oqarfigisimavatit pinguaqatitik qinngasaartaqqunagit. Meeraagallaratta amerlanersatta paasereersimavaat oqaaqqissaarut tamanna maleruanngitsooranni kingunerluttartoq. Paasisimavarput itisuumik eqqarsaatersortartup kangiamiuusup Kungfutsip inuunermi najoqqutassiaa una malissallugu silatusaarnerusoq: „Sumik iliorfigineqarumanngisannik allat iliorfigissanngilatit.“ Kisianni eqqarsaatigisimaviuk tamanna maleruagassamik atortuujuaannartumik taaneqartumut naleqqiullugu tassaannaasoq oqaaseqaat suussuseqanngitsoq pikkunaatsorlu?
Maleruagassaq sulissutiginnittoq
Qinerlerfissiami Webster’s New Collegiate Dictionary-mi „maleruagassaq atortuujuaannartoq“ tassaanerarneqarluni „ileqqorissumik ileqqussaq Matîuse 7:12-imi aamma Lúkarse 6:31-mi eqqartorneqartoq oqaatigineqarluni immitsinnut iliuusaaqqusatsinnik allat iliorfigisariaqarivut.“ Ungalusami quppernerup matuma ataaniittumi allassimasut atuarukkit malugissavat qanoq ililluni Matîuse kapitali 7, versi 12-ip nutserneqarnerini assigiinngitsuni maleruagassap nalissaqanngitsup tamatuma malunnaaterpassui ersersinneqartut.
Malugiuk naak maleruagassaq assigiinngitsunik oqaatigineqaraluarluni issuakkani tamani qanoq-iliornissaq kajumissaarutaasoq. Soorlu Jesus tamatuma siunitsiannguagut qaqqami oqaluutsimini oqarsimasoq: „Qinujuaannaritsi, tunineqassaasi taava; ujarlertuaannaritsi, nanisissaasi taava; kasuttortuaannaritsi, mappiunneqassaasi taava. Qinusormi kinaluunniit pisaraaq, ujarlersorlu nanisisaraaq, kasuttortorlu mappiunneqararaaq.“ (Matîuse 7:7, 8, NV) Qinugaanni, ujarleraanni kasuttoraannilu arlaannik iliuuseqartoqartarpoq. ’Taamaattumik,’ Jesus nangippoq, ’inunnut qanorluunniit iliorfigeqqugussi ilississaaq taamatut iliorfigisigik.’ — Matîuse 7:12.
Biibilimi takutinneqarpoq Jesusip aammattaaq ajoqersugaasa maleruagassaq tamanna tapersersoraat. (Rûmamiut 15:2; 1 Pîtruse 3:11; 3 Juánase 11) Ullumikkulli inuit imminnut attaveqarnerata ajoraluartumik ersarissumik takutippaa amerlanersaasa kristumiuunerartuugaluarunik kristumiuunerartuunngikkaluarunilluunniit maleruagassaq atortuujuaannartoq sumiginnaraat. Atorsinnaajunnaaramimi? Pisoqalisimagami? (wD 1/11 89)
[Qupp. 3-mi ungalusaq]
„Suummi tamaasa inuit allanit iliorfigineqarumasasi ilississaaq taakkununnga iliuuserisigik.“ — Kalkarip nutsigaa.
„Inunnut qanorluunnit iliorfigeqqugussi ilississaaq taamatut iliorfigisigik.“ — Biibili qallunaatunngortitaq atortussaatitaq.
„Ilissinnut iliuusaaqqusasi naapertorluinnarlugit allat iliorfigisigik.“ — Schindlerip nutsigaa.
„Allat iliorfigiuartarsigik taakkunannga iliorfigineqarumasarnissitut.“ — Jerusalem-Biibili.
„Inuit allat iliorfigisigik taakkunannga iliorfigineqarumasarluinnassitut.“ — The New Testament in Modern English J. B. Philips-imit.
„Allat ilissinnut pissuseqarnissaannik kissaatigisassitut pissuseqarfigiuaannarsigik.“ — The New Testament C. B. Williams-imit.