Jehova oqaluussissussiuk qasuleqinasilu
’Eqqarsaatiginiarsiuk taanna, ajortuliortut taama atsigisumik assortormanni ilalaaginnartoq, qasuleqqunasi tarnissigullu nikalloqqunasi.’ — EPRÎARIT 12:3.
1, 2. Jesusip toqusunit makissimanerminut uppernarsaataasut qularnaatsut suut ajoqersukkaminut takutippai?
’NAALAGAQ takuara.’ Taamatut uissuumminartumik oqarluni Jesusip makissimaneranik tusagassaq Maria Magdalenep tusarliuppaa. (Juánase 20:18) Tamanna ullunut 40-nut Kristusip ajoqersugaanut, manna tikillugu taassuma toquneranik aliasuutiginnissimaqisunut, pisoqarfioqisunut aallarniutaavoq.
2 Jesusip kissaatigisimavaa uumanini ajoqersukkami minnerpaamilluunniit qularutigissanngikkaat. ’Anniaramilu kingorna uumalluni taakkununnga saqqummersarpoq, amerlasuunik qularnaveeqqutissaqartitsilluni, taakkununnga takutittarami ullut sisamanik qulillit [40-t] naallugit oqalullunilu Guutip naalagaaffiata piinik,’ Lukas taama oqaluttuarpoq. (apustilit suliait 1:3) Ilaanni ’qatanngutinut tallimanik hundredelinnit [500-nit] amerlanerusunut takutippoq’. (1 Korintumiut 15:6) Tamatuma qularutissaagaluit tamaasa peersippai. Jesus uumasimavoq!
3. Jesusip ajoqersugaasa Naalagaaffik pillugu taanna qanoq aperaat, aammalu sooq akissutaa tupaallaatigaat?
3 Taamanikkut Jesusip ajoqersugaasa taamaallaat ’Guutip naalagaaffia’ nunamiittoq, naalagaaffik Israelimut atulerseqqitaq, takorloorsinnaasimavaat. (Lúkarse 19:11; 24:21) Taamaattumik Jesus ima aperaat: ’Naalagaq, taamaalisukkut naalagaaffik Israelikkunnut kingumut iluarsisissaviuk?’ Akissutaa manna tupaallaatigisimassavaat: ’Ilissinnut nalunaariaqanngilaq qaquguluunniit qanoq ilisukkulluunniit pissasoq, Ataatap pissaanermigut aalajangeriigaa; kisianni anersaap illernartup ilissinnut piumaartup pissaanera pigilerumaarparsi, nalunaajaasigiumaarpassilu Jerusalemimi Judæamilu tamarsuarmi Samariamilu nunallu isuanut allaat.’ (apustilit suliait 1:6-8) Suliassaq tamanna ajoqersukkanut imaannaanngitsukasittut isikkoqarsimavoq! Akisussaaffiullu angissusia! Suliassaq tamanna qanoq ilillutik naammassiniarsimavaat? Tamanna erniinnaq tupaallannartumillu akineqassaaq.
Suliassiissut imaannaanngitsoq ilassineqarpoq
4. Piinsip ulluani susoqarsimanera oqaluttuariuk.
4 Lukas ima oqaluttuarpoq: ’Ullorlu piinsi nalliummat tamarmik isumaqatigiillutik katisimapput. Tassanngaannarlu ittuppaluk qilammit pivoq, soorlu anorersuaq pitorartoq, illullu taakkua najugaata ilua tamakkerpaa. Taakkununngalu takutipput oqqat nuungajuttuut innerinnaasullusooq, tamakkualu taakku tamaasa immikkut tuffigaat. Taava tamarmik anersaamik illernartumik ilumioqangaalerput, oqaatsinillu allanertanik oqalulerput, imatut soorlu anersaap oqalutsikkaatik.’ Nipi sakkortungaarmat juuterpassuarnit nalliuttorsuarsioriartorlutik Jerusalemimiittunit uitsatigineqalerpoq. Tupigusuutigilluinnarpaat tusarlugu ’oqaatsisik atorlugit Guutip malunnangaartuliai oqaatigineqartut’. — apustilit suliait 2:1-11.
5. Jesusip siulittuutaa apustilit suliáinik agdlagkat 1:8-miittoq qanoq annertutigisumik taamani eqquutingajalersimava?
5 Pisoq tamanna iluatsillugu Peter qiimasuttumik oqalugiarpoq, uppernarsarlugu ’Jesus Nazaretimiu’, taakkua kikiattortitaat, tassaasoq ’naalagaq’ Davidip oqaatsit uku atorlugit siulittuutigisimasaa: ’Jehova naalakkannut oqartoq: „Talerpimma tungaanut ingikkallaat qinngarsortitit isikkannut tummagassanngortitserlugit.“’ Tusarnaartut tamanna tusarlugu uummatimikkut killitsipput, imalu aperalutik: ’Angutit qatanngutivut ukorsii, qanoq iliussaagut?’ Peterip ima oqarfigai: ’Allamik isumataaritsi, nungullusilu kueqqugitsi Jesus Kristusip aqqagut ajortit isumakkeerneqaatissaannik.’ Tamatuma kingunerisaanik inuit 3000-it kuisipput! (apustilit suliait 2:14-41) Taamaalilluni tusagassaq nuannersoq Jerusalemimi oqaluussissutigineqalereerpoq. Kingorna oqaluussineq Judæamut, taavalu Samariamut, kiisalu ’nunap isuanut allaat’ siaruaappoq. Naalagaaffimmik oqaluussissutiginninneq ima sukkatigisumik siuariarsimavoq allaat Paulus ukiup 60-ip missaani oqarsinnaasimalluni tusagassaq nuannersoq ’pinngortitani tamani qilaap ataaniittuni’ oqaluussissutigineqarsimasoq. — Kulorsamiut 1:23.
Siuariartorneq malersorneqarnerlu
6, 7. (a) Ukiuni hundredelinni siullerni qanoq ililluni siuariartorneq malersuinerlu ataatsikkut pippat? (b) Kristumiut Jerusalemimiittut akornanni suna nukinginnartumik pisariaqartinneqalersimava, qanorlu ililluni naammassineqarsimava?
6 Ukiumi 33-mi piinsip kingunitsiannguagut Jesusip ajoqersugai taassuma oqaasiinik ukuninnga eqqaasinneqarput: ’Kiffaq naalakkaminit annerunngilaq. Uanga qinugigaminnga [malersoraminnga] ilississaaq qinugiumaarpaasi.’ (Juánase 15:20) ’Guutip oqaasiata siuariartornera ajoqersukkallu Jerusalemimi amerlingaarnerat’ juutit siuttuinit kamaatigineqaqaaq. Sallusumik unnerluutigisaalluni ajoqersugaq Stefanus ujaqqanik milloorneqarluni toqunneqarpoq. Taamatut pisoqarnissaa amerlasuunit utaqqiinnarneqarsimannguatsiarpoq, tassami ’ulloq tamanna ilagiit Jerusalemimiittut qinugineqangaalerput, tamarmillu Judæap Samariallu ilaannut siammarput, apustilit kisimik pinnatik’. — apustilit suliait 6:7; 7:58-60; 8:1.
7 Kingorna malersuineq uniimisimagaluarpoq. Sivitsunngitsorli Herodes Agrippa I-p apustili Jakob toqutsippaa. Peter parnaarunneqarpoq, inngilimilli aniguisinneqarluni. Kingorna qatanngutit Jerusalemimiittut pissarliulerput, uppeqatiminnillu allani najugaqartunit pisariaqartitaminnik nassinneqartariaqarsimallutik. (apustilit suliait 9:31; 12:1-11; 1 Korintumiut 16:1-3) Apustili Paulus Jerusalemimi tikeraarsimatillugu taavani upperisarsiornermik ingasaassiniarneq erserpoq inuppassuit ima suaartalermata: ’Taama ittoq inuusussaannginnami nunamit piissaaq.’ (apustilit suliait 22:22) Kristumiut Jerusalemimiittut Judæamiittullu Naalagaaffimmik oqaluussissutiginninnerminni aalajaattuaannassagunik qiimmassarneqarnissaminnik nalunanngitsumik pisariaqartitsipput. Jesusip ajoqersukkani neriorsorsimavai ’anersaap illernartup, Ataatap [Jesusip aqqagut] aallartitassaata’ ikiorumaarai. (Juánase 14:26) Qanorli ililluni Ataatap taamatut ikiussavai tuppallersartariaqarfiannilu tuppallersarlugit? Paasinarsivoq ilaatigut apustili Paulus aqqutigalugu tamanna pisussaasoq.
Paulusip hebræerinut allagai
8. (a) Suna pissutigalugu Paulus hebræerinut allappa? (b) Allagaani immikkoortoq aalajangersimasoq suna maannakkut sukumiinerusumik sammissavarput, aammalu sooq?
8 Ukiup 61-ip missaani Paulus Romami parnaarussaaqqavoq, tusarsimavaali qatanngutini Jerusalemimiittut qanoq ingerlasut. Taamaattumik Jehovap anersaavanit siulersorneqarluni hebræerit allaffigai, allakkanik qatanngutiminut angutinut arnanullu asannittumik isumassuinerminik ersersitsisunik. Paulusip nalunngilaa suna pisariaqartoq Jehovamut uppernerat taassumalu ikiuinissaanik tatiginninnerat nakussatsinneqassappata, taamaalillutik ’nikallujuillutik siunertarititaasumut arpassinnaaqqullugit’ isumalluarlutillu oqarsinnaaqqullugit ima: ’Jehovap ikiormanga ersissanngilanga; inuit susinnaavaannga?’ (Eprîarit 12:1; 13:6) Paulusip hebræerinut allagaasa ilaa tamanna (kapitalit 11-13) maanna sukumiinerusumik sammissavarput. Sooq? Pissutsit kristumiut siulliit atugarisaattut ittut ullumikkut Jehovap Nalunaajaasuisa atormatigik.
9. Apeqqut pingaarutilik ukiuni hundredelinni siullerni kristumiut akisariaqarsimasaat suna ullumikkut kristumiut akisariaqarpaat, aatsaallu qanoq iliorunik aniguisinnaassappat?
9 Ukiuni kinguaariit inuuffigisaanni atukkatsinni inuppassuit Naalagaaffimmik tusarliussamut ilassinnissimapput, Jehovamut tunniulluinnarsimallutik taassumalu nalunaajaasuisut kuisissimallutik. Eqqortumilli pallorfiginninnerup siuariartornera tamanna malersuinermik annertuumik ingiallorneqarsimavoq. Allaat kristumiut ilaasa inuunertik annaasimavaat, soorlu Stefanus, Jakob nalunaajaasullu aalajaatsut ukiuni hundredelinni siullerni inuusimasut allat taama pisimasut. Taamanikkutut ullumikkut manna apeqqutaavoq pingaarutilik: Naalagaaffimmik tusagassamut akerlilersuineq annertusiartuinnaraluartoq kikkut assuarnaassusertik pigiuaannarsinnaassavaat? Kikkullu ’annikilliornartoq angisooq’ asseqanngisaannartoq kinguaariinnut uatsinnut erniinnaq nalliuttussaq anigorsinnaassavaat? (Matîuse 24:21) Akissutissaq imaappoq: ’Uppernikkut ajunngitsumik sorsunnissaminnut’ piareersarsimasut, ’uppernikkut aalajangersimasut’ aniguisinnaassapput. Taakku naggataatigut ima oqarsinnaassapput: ’Uppernerput tassa ajugaassut silarsuarmut ajugaasoq.’ — 1 Timûtiuse 6:12; 1 Pîtruse 5:9; 1 Juánase 5:4.
Maligassat aalajaatsut ilinniarfigikkit
10. (a) Upperneq sunaava? (b) Upperluartut itsaq inuusimasut Guutimit qanoq isigineqarsimappat?
10 Upperneq sunaava? Paulus ima akivoq: ’Upperneq tassa neriugisani nakimassutiginaveerlugit takunngisanilu [piviusullu takussaanngitsut, NV] nalorninarinagit. Taassumuunami siulliit [itsaq angutit, NV] nersorneqarput.’ (Eprîarit 11:1, 2) Nassuiaammut tamatumunnga tapersersuutaasumik Paulusip taava ersersippaa upperneq qanoq malunnarsisarnersoq. Arnat marluk Sarap Rahabillu saniatigut „itsaq angutit“ taakkualu inuunerminni pileruttorfiat eqqartorpai. Nuanningaarami paasillugu ’Guutip nikagisimanngikkai [kanngugisimanngikkaa] Guutiannik taaneqartissalluni’! (Eprîarit 11:16) Uagut uppernerput pillugu Guuti taamatut oqarsinnaanerpa? Uagutsinnik kanngusuutissarsinnginnissaa ullut tamaasa isumagiuartigu.
11. ’Nalunaajaasut taama eqimatigisut avatangiisivut’ ullumikkut qanoq ililluta iluaqutigisinnaavavut?
11 Angutit arnallu aalajaatsut taakku eqqartoreerlugillu Paulus ima allappoq: ’Taamaammat, nalunaajaasut taama eqimatigisut avatangermatigut, uaguttaaq oqilaaqutaasut tamaasa ajortilu uatsinnik ninniortitseqqajaaginnartoq iperartigik, nikallujuerlutalu arpanniarta assoruunnitsinni uatsinnut siunertarititaasumi.’ (Eprîarit 12:1) Nalunaajaasut aalajaatsut maligassaalluartut taakku maanna ilivermi sinipput, uatsinnulli uumasutut ippat? Taakkununnga inuunerannullu tunngasut ima ilisimasaqarfigitigaagit apeqqummut tamatumunnga angersinnaallutit? Tamakkuninnga ilisimasaqarneq tassaavoq aalajangersimasumik akuttunngitsunik Bibelimik atuaqqissaartarnerup aammalu ’nalunaajaasut taama eqimatigisut’ misigisarsimasaannik sapinngisaq tamaat misissueqqissaarnerup pilluaqqussutissartaa. Upperluartut itsaq inuusimasut aalajaallutik maligassiaat peqqissaartumik maleruarutsigik uppernermik amigaateqarnerit suulluunniit anigorsinnaassavavut. Aammalu tamatuma ikiussavaatigut pissutsini qanoq ittuugaluartuniluunniit kisinnata qunusuillutalu sallusuissummik oqaluussissutiginninnissatsinnik. — Rûmamiut 15:4.
Qasuleqinak
12. (a) ’Qasulinnginnissatsinnut tarnitsigullu nikallunnginnissatsinnut’ qanoq ililluni Jesusip maligassiaata ikiorsinnaavaatigut? (b) Nalitsinni qasulersimanngitsunik taasaqarsinnaavit?
12 Jesus tassaavoq uppernerup tungaatigut pitsaanerpaamik maligassiuisimasoq. Paulus ilungersorluni ima kajumissaarivoq: ’Nikallujuerluta arpanniarta assoruunnitsinni uatsinnut siunertarititaasumi, uppernermillu aallarniisoq inerititsisorlu Jesus aarlorfigisigu [isigiuaannartigu]; . . . eqqarsaatiginiarsiuk [peqqissaartumik qimerloorniarsiuk] taanna, ajortuliortut taama atsigisumik assortormanni ilalaaginnartoq, qasuleqqunasi tarnissigullu nikalloqqunasi.’ (Eprîarit 12:1-3) Jesusip maligassiaa qanoq peqqissaartigisumik ’qimerloorsimaviuk’? ’Isigiuaannarpiuk’? (1 Pîtruse 2:21) Satanip kissaatigaa ’qasulissasugut tarnitsigullu nikallussasugut’. Oqaluussisarunnaarnissarput kissaatigaa. Ilaanni upperisarsiortunit silarsuarmilu naalakkersuisunit toqqaannartumik malersorneqartilluta unitsinniartarpaatigut, soorlu ukiuni hundredelinni siullerni taama pisoqartarsimasoq. Siorna Naalagaaffimmik oqaluussissutiginninneq nunani 40-ni killilersorneqarpoq. Tamannali pissutigalugu qatanngutivut qasulerlutik oqaluussiunnaarpat? Naagga! Aalajaallutik sulinerat 1988-imi nunani taakkunani inuit 17.000-init amerlanerusut kuisinnerannik kinguneqarpoq. Tamanna tamatsinnut nunani kiffaanngissuseqangaatsiarfigisatsinni najugaqartunut kajumissaarutitut sakkortuutut isigisariaqarparput! Tusagassamik nuannersumik Naalagaaffimmut tunngasumik oqaluussissutiginninnerput qasulissutiginngisaannartigu!
13. (a) Pissutsit allat nalinginnaanerusut suut oqaluussinitsinni qasulissutigisinnaavavut? (b) ’Tipaatsuutigisaq Jesusimut saqqangiussaq’ suua, uagullu qanoq ililluta nuannaarneq tamatumunnga assingusoq angusinnaavarput?
13 Aammattaarli pissutsit allat nalinginnaanerusut, soorlu isumakkut anniaateqarneq, peqqiilliorneq, ilagisartakkanit tatineqarneq, inoqutigiit iluanni assortorneqarneq, oqaluussiffigisartakkami soqutiginninngippallaarneq pissutigalugu kajumigunnaarneq, imaluunniit pissutsit aaqqissuussaanerata matuma naggatissaata suli nalliutinnginneranik naammagittaalliuutiginninneq, pissutigalugit qasulersinnaavugut. Suna ikiortigalugu Jesusip isumakkut timikkullu anniartitaanini naammagittarluni atorsinnaasimavai? ’Tipaatsuutigisaq imminut saqqangiussaq’ ikiortigalugu. (Eprîarit 12:2) Ataatami aqqanik illersuinermigut taassuma uummataanik nuannaartitsinini, aammalu Messiasikkut naalagaaffiup pilluaqqussutissaanut inunnik allanik peqataalersitsinermigut siunissami nuannaarutigiumaakkani, Jesusip nakooqutigisimavai. (Tussiaat 2:6-8; 40:10, 11; ússatit 27:11) Jesusip nuannaarnera annerusumik ilaarsinnaavarput? Peterip allakkamini siullerni, kapitali 5-imi, versi 9-mi neriorsueqqissaarnera eqqaamasariaqarparput: ’Silarsuarmi qatanngutigisasi taamaaqataannik naalliutsitaasarput.’ Qanoq innitsinnik Jehovap ilisimanninneranik ilisimanninnitta, qatanngutitta silarsuarmi sumi tamaani ittut asanninnerata aammalu Naalagaaffiup aqutsinerani nuannaarutissarpassuatsinnik siumut isiginninnitta — tamakkua tamarmik ikiussavaatigut maanna naggatissap qanillilluinnarnerani uppernikkut Jehovamik kiffartuussinitsinni aammalu oqaluussinitsinni qasulinnginnissatsinnik.
Sooq Jehovap perorsartaraatigut
14. Misilinneqarnivut malersorneqarnivullu qanoq iluaqutaasumik kinguneqarsinnaappat?
14 Taava sooq misilinneqarnerit naalliunnerillu atortariaqarivut Paulusip nassuiarpaa. Siunnersuutigaa tamanna perorsarneqarnertut isigisariaqaripput: ’Erninnguara, Jehovap perorsaanera asiginnarnaveeriuk, nikallornallu pillaraangatit; asasani Jehovap perorsartarmagit.’ (Eprîarit 12:5, 6) Allaat Jesus ’anniartitaanermigut naalannermik ilikkarpoq’. (Eprîarit 5:8) Aammattaaq uagut naalannerup ilinniarnissaa pisariaqartilluinnarparput. Malugiuk perorsarneqarnerput akuerigutsigu qanoq iluaqutaatigisumik kinguneqassasoq: ’Kingorna perorsarneqarneq eqqissinartumik iluarnissamik tassuuna sungiusagaasut pissaannik kingunissaqararaaq,’ Paulus allappoq. Tamanna assorsuaq kajumissinarpoq! — Eprîarit 12:11.
15. Paulusip ’isikkatta narlumuinnaq tummisassarsiornissaannik’ siunnersuutaa qanoq ilillugu maleruarsinnaavarput?
15 ’Jehovap perorsaanera’ taamatut ilassigutsigu, Paulusip siunnersuutaa pitsaasoq maleruarumassavarput: ’Taamaattumik assaat qasusut seeqqullu nukillaartut pissatsissigik, isikkasilu narlumuinnaq tummisassarsiorsigik.’ (Eprîarit 12:12, 13) Ajornanngitsuaqqamik ’aqqusinermit nerukitsumit inuunartumut sammisumit’ nigortinneqarsinnaavugut. (Matîuse 7:14) Ilaanni Peterimut allanullu Antiochiamiittunut tamanna pisimavoq. Sooq? ’Iivangkiiliup ilumoorsusia missiliorlugu assuarnaatsumik saqinnginnamik.’ (Galâsiamiut 2:14) Aammattaaq ullumikkut pingaaruteqartorujussuuvoq Ilinniartitsisorsuatsinnut, Jehova Guutimut, tusarnaartuarnissarput. ’Inussiaq ilumoorlunilu silatooq’ aqqutigalugu uatsinnut ikiuutissiarisaanik pissarsiaqarluartarnissarput isumagisariaqarparput. Tamanna ’isikkatta narlumuinnaq tummisassarsiornissaannut’ qularnaveeqqutaassaaq. — Matîuse 24:45-47, NV; Isaia 30:20, 21.
16. (a) ’Sorlak sungarnitsoq aseruutaasoq’ qanoq ililluni ilagiinni pilersinnaava? (b) Sooq kanngunartuliorneq iluartunik pingaartitsinnginnermut Paulusip atassuserpaa, uagullu qanoq ililluta navianaatilinnut tamakkununnga illersorsinnaavugut?
16 Taava Paulusip mianersoqquaatigut ’Guutip saammaanneranik kingoraasoqaqqunata, sorlammik sungarnitsumik aseruutaasumik amerlasuunik tunillaasumik naalersoqaqqunagu’. (Eprîarit 12:15) Ilagiit iluanni suleriaatsinik naammaginninngitsut isornartorsiuiuartullu tassaasinnaapput ’sorlak sungarnitsoq aseruutaasoq’ siaruapallassinnaasoq ilagiinniittullu allat eqqarsariartaasiannut peqqissumut tunillaasinnaasoq. Sallusuissut pissutaalluni pilluaqqussutisiarisimasarpassuatta eqqarsaatigeqqissaartarnerisigut eqqarsaatipalaat taamaattut akiorniarsinnaavavut. (Tussiaat 40:6) Aammattaaq kanngunartunik ileqqoqaqqajaasarneq, aammalu Esauip iliorsimaneratut iluartunik pingaartitsinnginneq, navianartuupput. (Eprîarit 12:16) Navianaatillit tamakku marluk imminnut Paulusip atassuserpai, imminnut malitsigiissinnaammata. Kristumiu kinaluunniit kissaatinut namminissarsiorpaluttunut tamakkununnga nakkaannarnavianngilaq Peterip oqaasii uku aalajangiukkunigit: ’Diaavulu assortorsiuk uppernikkut aalajangerlusi.’ — 1 Pîtruse 5:9.
„Piviusut takussaanngitsut“
17. Sinajip Qaqqaani pisimasut mianernangaartut ullumikkut pissutsinut kristumiut atugaannut naleqqiutikkit.
17 „Piviusut takussaanngitsut“ uppernitsinnut annertuumik aalajangiisuupput. (Eprîarit 11:1, NV) Tamakkua ilaat Paulusip Eprîarit 12:18-27-mi eqqartorpai. Tassani allaatigai Sinajip Qaqqaani Guutip toqqaannartumik Israelikkunnut oqalunnerani pisimasut mianernangaartut, Mosesilu ima oqartoq: ’Annilaangaarama uulippunga.’ Apustililu ima ilanngussivoq: ’Kisianni tikippasi Zionip qaqqaa, Guutip uumasup illoqarfia, Jerusalem qilammiittoq, inngilillu tuusintilippassuit nalliuttorsioqatigiit.’ Paulus oqaluttuarpoq itsaq Sinajip Qaqqaani Guutip nipaata nuna sajutsissimagaa, maannali Guuti neriorsuisimasoq oqarluni: ’Suli ataasiarlunga nunaannaanngitsoq qilak allaat aalangaartikkumaarpakka.’ Naak oqaatsit tamakku kristumiunut tanitaasunut tunngatitaanerugaluartut aammattaaq ’savanit allanit’ ’amerlangaartunit’ pigiliunneqarsinnaapput. (sarĸúmersitat 7:9) Paasisimaviuk Paulusip oqaasii tamakku qanoq paasisariaqarnersut? Inngilit tituusintilikkuutaat katersuussimasut saavanniippugut. Soorunami aammattaaq Jehovap saavaniippugut. Jesus Kristus taassuma talerpiata-tungaaniippoq. Aap, pissutsinit hebræerisoqqat Sinajip Qaqqaaniittut atorsimasaannit mianernarnerungaartunik atugaqarpugut akisussaaffimmillu taakkua akisussaaffigisimasaannit annerungaartumik akisussaaffeqarluta! Aammattaarlu eqqaamajuk qilak nunalu ajortut maannakkut atuuttut sorsunnissami Harmagedonimi pisussami aalaterneqarunik nunguttussaammata. Piffissaq maannakkorpiaq atuuttoq Guutip oqaasiinik tusaajumanngiffigissallugu naalakkumanngiffigissallugulu aatsaat taama naleqqutinngitsigaaq!
18. Qasulernata Jehova oqaluussissuttuaannassagutsigu suna pisariaqartipparput?
18 Inuiaat oqaluttuarisaaneranni piffissami mianernarnerpaami inuuvugut. Jehovap Nalunaajaasuisut nunap isuanut allaat aallartinneqarsimavugut Guutip naalagaaffianik pilersinneqarsimasumik oqaluussissutiginnikkiartortitaalluta. Tamatumani upperneq aalassatsitassaanngitsoq, upperneq qasulerneq ajortoq, upperneq Jehovamit perorsarneqarnermik ilassinnitsitsisinnaasoq, pisariaqartipparput. Taama ittumik uppersuseqarutta ’qujallutik pisut tamatumuunalu Guutip iluarisaanik kiffartorfiginnittut Guutimik-mianerinnillutik ataqqinnittut’ akornanniissaagut. (Eprîarit 12:28) Aap, qasulernatalu Jehova oqaluussissuttuaannarsinnaassavarput. (wD 15/12 89)
Qanoq akissavit?
□ Sooq Paulusip hebræerinut allagai uagutsinnut iluaqutaappat?
□ Apeqqut pingaarutilik suna ullumikkut kristumiut akisariaqarpaat?
□ Nalunaajaasut aalajaatsut itsaq inuusimasut qanoq ilinniarfigisinnaavavut?
□ Sooq Jehovap asasani perorsartarpai?
□ Qanoq ililluta qasulernata oqaluussiuaannarsinnaavugut?