Ullumikkut siulersuisoqatigiinnik suleqatiginninnerput
’Pigisaminut tamanut paarsisunngortissavaa.’ — Lúkarse 12:44.
1. Naalagaaffimmi sumi Kristus ukiumi 33-mi naalakkersuilerpa, qanorlu ililluni?
KRISTUSIP, ilagiinnut qullersaasup, piinsip ulluani ukiumi 33-mi inussiani tanitaasut kunngiuffigilersimavai. Qanoq ililluni? Anersaaq iluartoq, inngilit aammalu siulersuisoqatigiit takussaasut ikiortigalugit. Apustili Paulus allassimavoq Guutip tanitat ’taartup pissaaneqarfianit aniguisikkai ernermilu asasami naalagaaffianut nuutsillugit’. — Kulorsamiut 1:13-18; apustilit suliáinik agdlagkat 2:33, 42; 15:2; Galâsiamiut 2:1, 2; sarĸúmersitat 22:16.
2. 1914-imi Kristusip naalagaaffia sumut allisinneqarpa?
2 „Inuiaat ullussaat“a naammatsinneranni Jehovap ernermi kunngitut naalagaassusia ilagiit kristumiut avataannut allisippaa. (Lúkarse 21:24) Aap, 1914-imi Guutip „inuiannut“ kunngitut naalaganngortippaa. Inuiannut tamanut naalagaassutsimik tunivaa. — Tussiaat 2:6-8; sarĸúmersitat 11:15.
’Pigisaanut tamanut paarsisunngortitaasoq’
3, 4. (a) Jesusip miininik assersuusiaani inuk pingaartoq kimut assersuutaava? (b) 1918-imi 1919-imilu qanoq pisoqarpa?
3 Tamatumunnga atatillugu angut pingaartoq pillugu Jesusip assersuusiaa misissoriartigu. (Lúkarse 19:11-27) Angut kunngiussutsimik piartorluni nunamut ungasissumut aallannginnermini inussiaminik aningaasanik erniortitassaannik tunisivoq. Angut taanna, Kristusimut assersuutaalluni, uterluni tikikkami ’kiffani taakku aningaasanik tunisani qaaqqoqquai niuerniarnermikkut iluanaarutaat ilisimajumallugit’. (Lúkarse 19:15) Jesus kunngiussutsimik pereermat tamanna qanoq piva?
4 Kunnginngortitaasimasup, Kristusip, 1918-imi naammattoorpai kristumiorpaalunnguit kristumiuuneraqatigiinnit qimatsisimasut Naalakkamillu nunami soqutigisaanik aallussillutik isumaginnittut. 1919-imi innermillusooq akuiareeramigit taakkua oqartussaassusiat Jesusip annertusisippaa. (Malaki 3:1-4; Lúkarse 19:16-19) Taakku ’pigisaminut tamanut paarsisunngortippai’. — Lúkarse 12:42-44.
’Piffissaasukkut inuussutissat’
5, 6. (a) Kristusip illumi pisortaatitaa annertunerusumik sumik suliassinneqarpa? (b) 1914-p kingorna siulittuutit suut eqquuttussaasimappat, inussiaqatigiillu tamatumunnga qanoq peqataasussaasimappat?
5 Kunngitut aqutsisutut Jesus Kristusip „illumi pisortaatitani“ nunarsuarmi annertunerusumik suliassippaa. Kristumiut tanitaasut kunngimut niaqorusikkamut, nunarsuarmi inuiannut tamanut naalagaanissamik piginnaatinneqarsimasumut, Guutimit „aallartitaasussaapput“. (2 Korintumiut 5:20, NV; Daniel 7:14) Pingaarnerpaatillugu ataatsimut suliassaat tassaannaajunnaarpoq Kristusip kiffaanut tanitaasunut ’piffissaasukkut inuussutissanik pilersuinissaq’. (Lúkarse 12:42) Naalagaaffiup 1914-imi pilersinneqarnerata kingorna pisussatut siulittuutaasut eqquutinnissaannut maanna peqataasussanngorput.
6 Tamanna qanoq timitalerneqassava? ’Naalagaaffimmik tusagassamik nuannersumik tamatuminnga’ oqaluussissutiginninneq „nunarsuarmi inuit najugarisaanni tamarsuarmi“ suliarineqassaaq. (Matîuse 24:14) Tamatuma nassatarissavaattaaq Satanip aaqqissuussaaneranut ajortumut tamatuminngalu tapersersuisunut tusarliussanik eqqartuussutaasunik kimittuunik, tusarliussanik „inuiannik aalatitsingaartunik“, oqaluussissutiginninneq. Tamanna ilutigalugu „inuiaat erlinnangaartortaat“, Kristusip ’savaatai allat’, takkussussapput. (Haggaj 2:7, NV; Juánase 10:16) 1935 aallarnerfigalugu ’amerlangaartut’ Jehovap silarsuarmi tamarmi peqatigiissortaanut aggialerput. (sarĸúmersitat 7:9, 10) Tamanna pimmat peqatigiiffiup aaqqissuussaanerata pitsanngoriartuaartinnissaa pisariaqalerpoq. Assersuutitut ujarak atorneqarunnaarluni savimineq atorneqalissaaq, qisummut taarsiullugu kanngussak, saviminermullu taarsiullugu sølvi, kanngussammullu taarsiullugu kuulti. (Jesaja 60:17) Tamakku tamarmik 1919-imiilli Kristusip, Naalagaaffiup nunami soqutigisaanik, tassa ’piminik tamanik’, inussiaminik aalajaatsunik Siulersuisoqatigiinnillu paarsisunngortitsisup, siulersuineratigut piartuaarsimapput.
7. Inussiap annerusumik akisussaaffeqalernera sumik nassataqarpa?
7 Soorunami annerusumik akisussaaffeqalerneq tamanna atuagassiornermik saqqummersitsisarnermillu annertuumik nassataqarsimavoq. Napasuliaq Alapernaarsuiffik aqqutigalugu anersaakkut inuussutissanik piffissaasukkut pilersuisoqartuartariaqarpoq. 1919-imilu atuagassiamut tamatumunnga assingusoq The Golden Age (Den gyldne Tidsalder, ullumikkut Vågn op!-imik taaguuteqartoq), tamanut atuagassatut ’kiffallu’ nakussatsinneqarnissaannut naatsorsuussaasoq saqqummertalerpoq. (Matîuse 24:45) Aammalu ukiut ingerlaneranni atuagarpassuit, atuagassiaararpassuit naqitigaaqqallu amerliartuinnartut naqiterneqartarsimapput.
Pitsaanerulersitsinerit amerlanerusut
8. Aallaqqaataani Siulersuisoqatigiinni ilaasortat sumut aamma ilaasortaappat, tamannalu pillugu Vagttaarnet 1945-mi qanoq allappa?
8 Taamaattumik tupaallannanngilaq naggatissap nalaata aallartilernerani Siulersuisoqatigiinnut ilaasortaasut tassaanerusarmata Vagttårnip Peqatigiiffiata aaqqissuisoqatigiivinut ilaasortat. (Daniel 12:4) Atuagassiami Vagttaarnet-imi oktoberip 15-iani 1945-mi saqqummersumi allaatigisami „Ullutsinni teokratiimik aaqqissuussaaneq“-mik qulequtaqartumi ima allassimasoqarpoq: „Naleqquttuuvoq ajoqersuutinik ilumoortunik Bibelimi saqqummersinneqartunik oqaluussissutiginnittussanngortitaasimasut Naalakkap siulersuisussanngortitaasut, [imaluunniit: Siulersuisoqatigiittut], anersaakkut ilumoortumillu Guutimik pallorfiginnikkusuttunik ataasiussuseqarlutillu ajoqersuutinik ilumoortunik saqqummersitaasunik tamakkuninnga inunnut allanut ingerlatitseqqinnermikkut taassumunnga kiffartorusuttunik tamanik unnersuussisussatut isigineqarmata.“
9. Kingusinnerusukkut Siulersuisoqatigiit kikkullu ataasiusorineqalerpat, sunalu pillugu?
9 Bibelimik atuaqqissaarnermi ikiuutissanik tamakkuninnga saqqummersitsisinnaajumagaanni inatsisitigut piumasarisaqarpoq naammassineqartariaqartunik. Taamaattumik Watch Tower Bible and Tract Society pilersinneqarpoq USA-mi Pennsylvaniami allassimaffissaminut nalunaarsorneqarluni. Ukiuni arlaqartuni Siulersuisoqatigiit ilaasortat tassaasimapput Peqatigiiffimmi tassani siulersuisut, Naalakkap innuttaasa nunarsuaq tamakkerlugu pisariaqartitaannik atugaannillu Bibelimik atuaqqissaarnermi atortussanik naqiterisoqarsinnaaqqullugu pilersinneqarsimasut.
10, 11. Pitsaanerulersitsineq suna 1944-mi pisimava, tamannalu pillugu Vagttaarnet qanoq allappa?
10 Siulersuisunut ilaasortat arfineq-marluk taakku tassaapput kristumiut aalajaatsut, peqatigiiffimmulli inatsisit tunngavigalugit pilersinneqarsimasumut ilaasortaammata isumaqartoqarsinnaavoq Peqatigiiffiup siulersuisuinut qinigaanermikkut Siulersuisoqatigiinnut ilaasortanngorsimasut. Siulersuisut taakku Vagttårnip Peqatigiiffiata ilaasortaanit qinerneqarsimapput, malittarisassallu naapertorlugit ilaasortaasut ilaasortaassusiat taasisinnaassusiallu Peqatigiiffimmut aningaasatigut pinngitsoorani tapersiisarnissamik nassataqartarpoq. Aaqqissuussineq tamanna allanngortittariaqarsimavoq. Tamanna pivoq oktoberip ulluisa aappaanni 1944-mi peqatigiiffiup Pennsylvaniami nalunaarsorneqarsimasup ukiumoortumik ataatsimiinnerani. Peqatigiiffiup malittarisassai allanngortinneqarput ilaasortaanermut aningaasanik tunissuteqartarneq aalajangiisuujunnaarsinneqarluni. Aalajaalluni Jehovamut kiffartorneq tunngavigalugu ilaasortat toqqarneqartalerput. Maanna taakkua ilarpassui qullersaqarfimmi Brooklynimiittumi silarsuarmilu sumi tamaani Peqatigiiffiup immikkoortortaqarfiini piffissartik tamaat atorlugu sulisuupput.
11 Pitsaanerulersitsineq tamanna eqqartorneqarpoq Vagttaarnet-mi oktoberip ulluisa 15-ianni 1945-imi saqqummersumi, allassimammat: „Aningaasat, soorlu suliassamut tapersiinerit, Jehovap Nalunaajaasuinik nunami Siulersuisussanngortitaasunut [Siulersuisoqatigiinnut] kikkut ilaasortaanissaannut aalajangiisuusariaqanngillat. . . . Anersaaq Illernartoq, sunniisinnaassuseq, Jehova Guutimit Kristus Jesus aqqutigalugu aallartinneqartoq, apeqqummut tamatumunnga siulersuisuulluni aalajangiisuusariaqarpoq.“
Siulersuisuunngillat
12. Siulersuisoqatigiit siulersuineratigut pitsaanerulersitsinerit Jehovamit pilluaqquneqarsimanera qanoq takuneqarsinnaava?
12 Tamatuma kingorna ukiuni qulikkaani tulliuttuni sulinerup siuariarujussuarnerata ersersippaa Siulersuisoqatigiinnut maannakkut atuuttunut tunngasunik paasinninnerup allannguutai Jehovamit pilluaqquneqarsimasut. (Ussatit 10:22) Oqaluussisartut silarsuaq tamakkerlugu 1944-mi 130.000-init ikinnerusimagaluartut 1970-imi 1.483.430-nut amerleriarsimapput. Sulili allanik pitsanngorsagassaqarpoq.
13. (a) 1971 tikillugu Siulersuisoqatigiit qanoq aaqqissugaappat? (b) 1972-imi Peqatigiiffiup ukiumoortumik ataatsimeersuarnerani suna pisimava?
13 1971 tikivillugu Siulersuisoqatigiit — eqqortumik oqaatigalugu — suli tassaasimapput Watch Tower Bible and Tract Society of Pennsylvaniap siulersuisunut ilaasortat arfineq-marluusut. Aalajangigassat Peqatigiiffiup immikkoortortaqarfiini silarsuarmi sumi tamaniittuni sulinermut attuumassuteqartut Peqatigiiffiup præsidentiata akisussaafiginerpaavai. 1971-imili oktoberip ulluisa aallaqqaataanni ukiumoortumik ataatsimeersuarnermi Peqatigiiffiup præsidentia taassumalu tullia oqalugiaatinik marlunnik pissutsinik nutaanik atugaqalernermut ersiutaasunik oqalugiarput. Peqatigiiffiup præsidentiata oqalugiaataa taaguuteqarpoq „Iluartoq pissusissavimmisut ilersinneqarpoq“, tulliatalu oqalugiaataa taaguuteqarluni „Siulersuisoqatigiit Peqatigiiffiullu inatsisit tunngavigalugit pilersinneqarsimasup assigiinngissutaat“. Siulersuisoqatigiit peqatigiiffiullu inatsisit tunngavigalugit pilersinneqarsimasup suna assigiinngissutigaat?
14. Peqatigiiffiup inatsisit tunngavigalugit pilersitaasup Siulersuisoqatigiillu suut assigiinngissutigaat?
14 Soorlu taaneqareersoq Peqatigiiffik Pennsylvaniamiittoq arfineq-marluinnarnik ilaasortaqartumik siulersuisoqarpoq. Angutit kristumiut tunniulluinnarsimasut tassani ilaasortassat ukiut pingasut qaangiunneranni Peqatigiiffiup ilaasortaanit, amerlanerpaamik 500-sunit, toqqarneqartarput. Taakkua amerlanersaat kristumiuupput tanitaanngitsut. Inatsisitigullu piumasarisaasut eqqortinnissaat piinnarlugu Peqatigiiffik pilersinneqarsimammat aammalu nunarsuup ilaani aalajangersimasumi inissinneqarsimasumi qullersaqarfeqarluni, kaasarimit imaluunniit naalagaaffimmit atorunnaarsinneqarsinnaavoq. (Mákorse 12:17) Siulersuisoqatigiilli inatsisit tunngaviginagit pilersitaapput. Tassani ilaasortaasut qinersinikkuunngitsoq ilaasortanngortinneqartarput. Jehovap Kristusillu siulersuineratigut anersaaq iluartumit toqqarneqartarput. (Naleqqiuguk apustilit suliáinik agdlagkat 20:28.) Tassa Siulersuisoqatigiinnut ilaasortaasut tassaapput anersaap toqqagai inatsisitigut peqqussutigineqartumik nunarsuup ilaani aalajangersimasumi inissisimaffeqanngitsut.
15. Vagttårnet-mi februarip ulluisa 15-ianni 1972-imi qanoq allassimasoqarpa, ullumikkullu Siulersuisoqatigiit qanoq oqaatigineqarsinnaappat?
15 Eqqortumik paasinninneq tamanna taamaalilluni Vagttaarnet-mi februarip 15-iani 1972-imi saqqummersumi ima oqaatigineqarpoq: „Jehovap nalunaajaasui kristumiuusut qujamasupput, nalunnginnamikku — aammalu erseqqissartuarumagamikku — upperisarsiornikkut peqatigiiffitsik inummit ataasiinnarmit siulersugaanngimmat kisianni siulersuisoqatigiinnit kristumiunik anersaamik-tanitaasunik ilaasortaqartunit siulersugaammat.“ Inussianut tanitanut taakkualu suleqataannut, savanut allanut ilaasunut millionilikkuutaanut, Siulersuisoqatigiiusut taakku nakkutigisassatik annertusiartuinnartillugit naleqqussarneqarlutik iluarsartuunneqartarsimapput.
16. Kristusip nunarsuarmi pigisai 1971-imit qanoq annertusiartuaarsimappat, suullu inussiamut aalajaallunilu silatuumut, Siulersuisoqatigiinnik sinniisoqartumut, suliassiissutigisimavai?
16 Kunngip Jesus Kristusip nunarsuarmi pigisai annertusiartuinnarsimapput. Oqaluussisartut 1971-imi 1.600.000-init ikinnerusimasut 1989-imi 3.700.000-t sinnerlugit amerleriarsimapput. Tamanna Guutip inuttaminut pilluaqqusineranut uppernarsaataavoq angingaartoq. (Jesaja 60:22) Ineriartorneq tamanna tupinnanngitsumik qullersaqarfimmi immikkoortortaqarfiillu allaffeqarfippassuini annertuumik allilerinermik nassataqarsimavoq, sanaartornermilu nassiussuinermilu periaatsit nutaanngorsarneqartariaqarlutik. Nunarsuarmi sumi tamaani ataatsimiittarfinnik ataatsimeersuartarfinnillu sanaartornermik kinguneqarsimavoq. Tamanna ilutigalugu oqaluussinermik, Bibelimik atuaqqissaarnermut atortussiornermik aammalu angerlarsimaffinni Betelini, nunap immikkoortortaqarfiini, ilageeqatigiinni ilagiinnilu nakkutilliisussanik toqqaasarnermik nakkutilliineqartuarsimavoq. Tamakku tamarmik tassaapput Naalagaaffiup soqutigisai Siulersuisoqatigiinnut, ’inussiamut aalajaallunilu silatuumut’ sinniisuusumut, Kristusip suliassiissutigisimasai.
17. Pitsaanerulersitsinerit allat suut 1971-imi, 1974-imi 1976-imilu pippat?
17 Siulersuisoqatigiit ukiuni hundredelinni siullerni Jesusip apustiliinit aqqaneq-marlunniinnaanngitsoq ilaasortaqartalerput. Kipineqarnermik apeqqut oqaloqatigiissutineqarmat Siulersuisoqatigiinnut ilaasortaasut tassaagunarput ’Jerusalemimi apustilit utoqqaanertallu’. (apustilit suliáinik agdlagkat 15:1, 2) Siulersuisoqatigiit maannakkut atuuttut aammattaaq 1971-imi 1974-imilu annertusisinneqarsimapput. Aammalu Siulersuisoqatigiit nakkutilliinerat oqinnerulersinniarlugu januarip aallaqqaataani 1976-imi atuutilersumik ataatsimiititat tallimat aalajangersimasut Siulersuisoqatigiit iluanni pilersinneqarput. Ataatsimiititat tamarmik immikkut suliassani naligiimmik taasisinnaassuseqartunik pingasuniit arfinilinnut ilaasortaqarput. Ataatsimiititat tamarmik immikkut oqaaseqartitaqartarput ukiut tamaasa taarsertartunik. Siulersuisoqatigiinnut ilaasortaasut ataatsimiititamut ataatsimut arlalinnulluunniit ilaasortaasinnaapput. Ataatsimiititat tamarmik immikkut Kristusip nunami pigisaasa immikkoortortaanik aalajangersimasunik sammisaqartarput. Aammattaaq ataatsimiititat arfernannik peqarpoq — tassa Oqaaseqartitat Ataatsimiititaat — tassani ilaasortaasut ukiut tamaasa taarserneqartarput, arlaannillu nukinginnartunik ajornartoortoqalerneranilu taakku isumaginnittuusarput.
Siulersuisoqatigiinnik suleqatiginninneq
18. Siulersuisoqatigiit qanoq sulippat, uagullu nammineq taakkuninnga suleqatiginninnerput qanoq takutissinnaavarput?
18 Siulersuisoqatigiit iluanni ataatsimiititat tamakku assigiinngitsut sapaatip-akunnikkaartumik ataatsimiittarput apeqqutit pingaaruteqartut oqaloqatigiissutiginiarlugit, aalajangigassanik qinunikkut aalajangiisarlutik, aammalu sammisassanik teokratiimut tunngasunik pilersaarusiortarlutik. Apustilit suliáinik agdlagkat kapitali 15-imi eqqartorneqartoq naapertussagaanni apeqqutit pingaaruteqartut aalajangigassaasut siulersuisoqatigiinnit suliarineqartarsimapput. Ullumikkuttaaq taama ippoq. Apeqqutit pingaaruteqartut Siulersuisoqatigiinnit tamanit, sapaatip-akunneranut ataasiarlutik pisariaqaraangallu akulikinnerusumik katersuuttartunit, suliarineqartarput. Siulersuisoqatigiit ilaasortaasa, maannakkut aqqaneq-marluusut, Bibeli qinunerlu aqqutigalugit Jehovamit siulersorneqaqqusarput. Siulersuisoqatigiinnik taakkuninnga uagut nammineq suleqatiginninnitsinnik ersersitsissutigisinnaasarput tassaavoq ullut tamaasa qinunitsinni qatanngutitsinnik taakkuninnga qinnussisarnissarput. — Rûmamiut 12:12.
19. Siulersuisoqatigiit ilitsersuutaat qanoq ilillutik ilagiinnut annguttarpat?
19 Siulersuisoqatigiit aalajangigaat ilitsersuutaallu qanoq ilillutik ilagiinnut annguttarpat? Ukiuni hundredelinni siullerni siulersuisoqatigiit Guutip anersaava ikiortigalugu aalajangeereeraangamik allakkanik unnersuussutaasunik ilagiinnut nassiussuisarput. (apustilit suliáinik agdlagkat 15:22-29) Ullumikkulli naqitigaataasiguunerusoq kristumiut ilagiit nalunaarfigineqartarput.
20. (a) Aaqqissuussaanermik pitsaanerulersitsinerit allat suut 1976-imi pisimappat? (b) Immikkoortortaqarfiit ataatsimiititaasa qanoq ilillutik Siulersuisoqatigiit suleqatigisarpaat?
20 Februarip ulluisa aallaqqaataat 1976 aallarnerfigalugu Peqatigiiffiup immikkoortortaqarfiini tamani ataatsimiititaqalerpoq — immikkoortortaqarfiup ataatsimiititaanik — angutinik Siulersuisoqatigiinnit toqqarneqarsimasunik ilaasortaqartumik. Nunanut immikkortortaqarfiup ataaniittunut Siulersuisoqatigiit sinniisaattut, qatanngutit angutit taakku ilumoortuusariaqarput aalajaallutillu. Tamatuma eqqaasippaatigut angutinik pikkorillutillu, Guutimik mianerinnillutillu tatiginartunik itsaq Israelikkut innuttaannik eqqartuussinermik Mosesimut ikiortaasunik. (2 Moses 18:17-26) Peqatigiiffiup atuagaatai, atuagassiaatai, Naalagaaffimmik Kiffartuuteqarneq, aammalu allakkat nalinginnaasut allakkallu immikkut ittut sumiiffinnut aalajangersimasunut tunngasut aqqutigalugit innersuussutaasartut immikkoortortaqarfiup ataatsimiititaaniittunit maleruarneqartarput ingerlateqqinneqartarlutillu. Nunani ataasiakkaani sulinerup siuariaataanik ajornartorsiutinillu takkussinnaasartunik Siulersuisoqatigiit immikkoortortaqarfinni ataatsimiititanit ilisimatinneqartarput. Nalunaarusiat taama ittut silarsuarmi sumi tamaneersut ikiortigalugit Siulersuisoqatigiinnit aalajangerneqarsinnaasarpoq Peqatigiiffiup atuagassiaataani suut sammineqassanersut.
21. Nakkutilliisut angalasartut qanoq ilillutik toqqarneqartarpat, sunillu suliassaqartarpat?
21 Immikkoortortaqarfinni ataatsimiititat anersaaq iluartumit siulersorneqarlutik qatanngutinik angutinik anersaakkut inerilluarsimasunik ilageeqatigiinni aammalu nunap immikkoortoqarfiini nakkutilliisussanik siunnersuuteqartarput. Toqqaannartumillu Siulersuisoqatigiinnit qatanngutit taakku toqqarneqareerunik nakkutilliisutut angalasartutut kiffartortarput. Qatanngutit ilagiinni ataasiakkaaniittut ilageeqatigiinniittullu anersaakkut nakussatsinniarlugit aammalu Siulersuisoqatigiit unnersuussutaannik timitalimmik maleruaanissaannik ikiorniarlugit qatanngutinit taakkunannga toqqarneqarsimasunit tikeraarneqartarput. (Naleqqiukkit apustilit suliáinik agdlagkat 16:4; Rûmamiut 1:11, 12.) Nakkutilliisut angalasartut nalunaarusianik immikkoortortaqarfimmut attavigisaminnut nassiussisarput. Ilagiinni ataasiakkaani utoqqaanertat ilagalugit anersaaq iluartumit ikiorneqarlutik utoqqaanertatut ilagiinnilu kiffartuuteqartussatut piukkussaminnik Siulersuisoqatigiinnit imaluunniit taakkununnga sinniisuusunit toqqarneqarsinnaasunik siunnersuuteqartarput. — Filípimiut 1:1; Títuse 1:5; naleqqiuguk 1 Timûtiuse 3:1-13; 4:14.
22. (a) Ilagiinni utoqqaanertat qanoq ilillutik Siulersuisoqatigiit suleqatigisarpaat? (b) Jehovap teokratiimik aaqqissuussaaneq tamanna pilluaqqugaa qanoq takuneqarsinnaava?
22 Utoqqaanertallu ilagiinniittut imminnut aammalu savaatinik, anersaaq iluartumit imminnut nakkutigisassanngortinneqarsimasunik, sianiginnittarput. (apustilit suliáinik agdlagkat 20:28) Ilitsersuutinik inussiaq aalajaallunilu silatooq taassumalu Siulersuisoqatigiivi aqqutigalugit Jehovamit Kristusimillu pisartakkaminnik aalajaallutik maleruaaniarsaripput. Soorlu ukiuni hundredelinni siullerni taama pisimasoq Jehovap teokratiimik aaqqissuussaaneq tamanna pilluaqquaa, ’ilagiillu uppernikkut nakussatsinneqartuarput ullullu tamaasa amerliartuinnarlutik’. — apustilit suliáinik agdlagkat 16:5.
23. Qanoq iliornissarput aalajangiusimasariaqarparput?
23 Nuanneqaaq ilisimallugu Jehovap Naalakkallu Jesus Kristusip Siulersuisoqatigiit aqqutigalugit innuttani ikiortuarlugillu tapersersortuarai! (Tussiaat 94:14) Jehovap peqatigiissortaani ilaasortaasutut inuttut ataasiakkaatut isumassuineq tamanna iluaqutigaarput. (Tussiaat 145:14) Guutip aaqqissuussaanik tapersersuinissatsinnik aalajangernitta tamanna nakussatsissutigisariaqarpaa. Aap, Jehovap Nalunaajaasuisa Siulersuisoqatigiivi suleqatigiuaannartigittoq piffissaq ’Jehovamik ilisarsisut ermit immap naqqanik ulitsinerattut nunamik tamakkiiumaarnissaat’ qanilliartortillugu. — Jesaja 11:9. (wD 15/3 90)
Uteqqiinissamut apeqqutit
□ 1919-imi inussiaqatigiit sumik annerusumik akisussaaffeqalerpat?
□ Ukiorpassuarni Siulersuisoqatigiit kikkullu ataasiusorineqarpat?
□ Siulersuisoqatigiinni ilaasortaasussat toqqarneqartarnerat qanoq pitsaaneruleriartuaarsimava?
□ Nunami pigisat suut Kristusip inussiaqatigiinnut Siulersuisoqatigiivinullu suliassiissutigisimavai?
□ Uagut qanoq ililluta Siulersuisoqatigiit suleqatigisinnaavavut?
[Qupp. 16, 17-mi assiliartat]
Vagttårnip Peqatigiiffiata immikkortortaqarfiini 93-iusuni Jehovap Nalunaajaasuisa atuagassiortarnerat oqaluussisarnerallu qullersaqarfimmit Brooklynimit New Yorkimiittumit Suilersuisoqatigiit nakkutigisaraat
Tyskland
Japan
Afrika Kujalleq
Brasilia