Kristumiussutsip ilumoortup suna ilisarnaatigaa?
ULLUMIKKUT silarsuarmi kristumiuunerartut inunnit upperisarsiornernut allanut ilaasortaanerartunit amerlanerupput. Kristumiuunerartulli taakku imminnut akerleriinnik ajoqersuuteqartarput, ataasiussuseqaratik ilaannilu imminnut toqoraattarlutik. Ersarippoq taakkua ilarpassui tassaanngitsut kristumiut ilumoortut. Jesus oqarsimavoq nalitsinni amerlasuut saaffigissagaanni oqarlutik: ’Naalagaq, Naalagaq.’ Allatut oqaatigalugu kristumiuunerassapput, taamaattorli oqarfigissavai: ’Ilisarinngisaannarpassi; qimassinga, iluaatsuliorumatuususiaa.’ (Matîuse 7:21, 23) Taakkua akornanniikkusunngivippugut! Qanorli ililluta paasisinnaavarput ilumut kristumiuunersugut?
Ilumoortumik kristumiuuniaraanni piumasarisat arlaliupput. Kristumiu ilumoortoq aalajaatsumik uppersuseqartariaqarpoq, ’uppersuseqarnani Guutimut iluaritinneq ajornaqimmat’. (Eprîarit 11:6) Uppersuseq aalajaatsoq tamanna sulianik eqqortunik ilaqartariaqarpoq. Ajoqersugaq Jakob mianersoqqusilluni oqarsimavoq ’upperneq sulianik ilaqanngitsoq toqungasoq’. (Jâko 2:26) Aammattaaq ’inussiap aalajaallunilu silatuup’ oqartussaanera kristumiup akuerisariaqarpaa. (Matîuse 24:45-47) Kristumiussutsilli ilumoortup ilisarnaataa allaavoq.
Ilisarnaat tamanna sunaava? Apustili Paulus Korinthimiunut allakkamini siullerni ima allappoq: ’Inuit inngilillu oqaasiinik oqaluttaraluaruma asannissuseqarnangali, kanngussak sianaartoq avilortunnguarluunniit sianaalasoq taava assigeqqajaqaakka. Pruffiitisullu oqalussinnaagaluarumaluunniit, anngigisallu tamaasa ilisarsissutillu tamaasa ilisimagaluarukkit, uppernerlu tamaat pigigaluarukku qaqqarsuit nutsersinnaagaluarlugit allaat, asannissuseqarnangali, taava suunngeqqajaqaanga. Pikkalu tamaasa tunniukkaluarukkit, timigalu ikikkartikkaluarukku, asannissuseqarnangali, taava iluaqutiginngeqqajaqaara.’ — 1 Korintumiut 13:1-3.
Tassa asanninneq kristumiussutsip ilumoortup ilisarnaatigaa. Uppersuseq, suliat aamma ilagiinnut ilumoortunut ataneq tamarmik pingaaruteqarput, aap, pisariaqarluinnarlutik. Kisianni asannissuseqanngikkaani tamakku tamarmik eqqortumik inissarsisinnaanngillat. Sooq?
Siullerpaamik Guuti pallorfigisarput pissutigalugu. Apustili Johannesip Jehova, kristumiussutsip ilumoortup Guutia, ima allaatigaa: ’Guuti asassutaavoq.’ (1 Juánase 4:8) Jehova Guuti allarpassuarnik pissuseqarpoq, soorlu pissaaneq, naapertuilluassuseq ilisimassuserlu, pingaarnerpaamilli Guutiugami asannittoq, pallorfigisimi qanoq ittuunissaat kissaatiginerpaa? Nalunanngitsumik kissaatigaa malinniassagaanni asanninnerlu ineriartortissallugu. — Matîuse 5:44, 45; 22:37-39.
Eqqortumik pissuteqarneq
Asanninneq pissutigalugu kristumiut Guuti pallorfigisartik assigilersarpaat. Guutimmi pissutigisaanit siulersorneqartarput. Pingaarnerpaamik suna pissutigalugu Jehova Guutip Jesus nunamut aallartissimavaa inuunermik naassaanngitsumik angusisinnaaqqulluta? Asanninneq pissutigalugu. ’Silamiummi Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ (Juánase 3:16) Taamaattumik Guutip piumasaanik iliornitsinnut suna pissutigisariaqarparput? Asanninneq! ’Guutimimmi asanninneq tassaavoq inassutai maleruarutsigik.’ — 1 Juánase 5:3.
Eqqunngitsumik pissuteqarluni Guutimut kiffarniartoqarsinnaava? Aap. Paulusip nalimini sinnganeq ingiarniunnerlu pissutigalugit Guutimut kiffaasut eqqartorsimavai. (Filípimiut 1:15-17) Uagutsinnuttaaq tamanna pisinnaalluarpoq. Silarsuarmi matumani unammeqatigiinneqaqaaq, uagullu tamatumannga sunnertittoorsinnaavugut. Immaqa isumaqalersinnaavugut allanit oqalugiallaqqinnerulluta naqitikkanilluunniit agguaasillaqqinnerulluta, immaqalu immikkut pisinnaatitaaffittut kiffartuutigisavut allat kiffartornerannut naleqqiuttarpavut — tamannalu pingaakujuttunngussutigalugulu sinngatuunngussutigisinnaavarput. Utoqqaanertap akisussaaffini ima kisermaanniartigilersoorsinnaavaa allaat qatanngutip angutip inuusunnerusup piginnaassuseqarluartup siumukarsinnaanissaa akornuserlugu. Nammineq iluanaaruteqarnermit kristumiut pigissaarnerusut ikinngutiginialersinnaavavut pigisakinnerusullu sumiginnarlugit.
Tamakku pisinnaapput naammalluinnartuunnginnatta. Akerlianilli — Jehova assigalugu — pingaartumik asanninnermit siulersorneqarutta taamaaqqajaasarnerit akiorsinnaassavavut. Namminissarsiornerup, pingaarniarnerup imaluunniit imminut angisuutinniarnerup asanninneq nigortissinnaavaat, tamannalu iluaqutiginavianngilarput. — Ussatit 11:2; 1 Korintumiut 13:3.
Silarsuarmi namminissarsiorfiusumi asanninneq
Jesus oqarsimavoq ajoqersukkani ’silamiut ilagissanngikkaat’. (Juánase 17:14) Qanoq ililluta silarsuup sunniiniarnera nakkaannarfiginngitsoorsinnaavarput? Ilaatigut asannittuliortarnikkut. Assersuutigalugu, ullumikkut inuit ’Guuti kajumiginagu nuannaarutinut kajumittuupput’. (2 Timûtiuse 3:4) Johannes taamaattoqarnissaanik mianersoqqulluta ima allassimavoq: ’Silarsuarluunniit silarsuulluunniit pii asaqinasigik. Silarsuarmik asannittoq Ataatap asanninneranik ilumiugisaqanngilaq. Silarsuarmiittummi suut tamarmik, uinimmut pilerinartut isinullu pilerinartut usorsitsaarutillu inuunerup matuma pii, Ataatamit pinngillat, silarsuarmilli pipput.’ — 1 Juánase 2:15, 16.
Kisianni ’uinimmut pilerinartut isinullu pilerinartut’ ajattoruminartuunngillat. Inuit tamakku nuannaraat uiniisa pilerigimmagit. Aammalu Johannesip nalaanut naleqqiutissagaanni nalitsinni nuannaarniutit amerlanerungaarput; taamaattumik taamanikkut tamakkua ajornartorsiutaasimappata, ullumikkuttaaq ajornartorsiutaassaqaat.
Soqutiginarpoq ajunngitsuutit silarsuup ullumikkut neqeroorutigisartagaasa ilarpassui imminni ajortuunngimmata. Illumik angisuumik, biilimik iluarusunnartumik, fjernsynimik stereoanlægimilluunniit pigisaqarneq eqqunngitsuliornerunngilaq. Aammattaaq angalanerit sivisuut soqutiginartullu imaluunniit pissanganartunik ferieqartarneq Bibelip maleruagassaanut unioqqutitsinerunngillat. Johannesilli mianersoqqussutaani suna pingaarnerpaava? Aap, tamakku pingaartippallaarutsigik nunap piinik pingaartitsivallaalerlutalu, namminisarsiulerlutalu anneruniartunngorsinnaavugut. Tamakku tamaasa pissarsiariniarlugit aningaasarsiorniarluni sulinissaq ima annertutigaaq Jehovamut kiffartuussinitsinnik akornusiisinnaalluni. Nuannaarniutillu tamakku piffissamik atuinartorujussuupput, naallu ilaannikkut qasuersaalaartarneq inuummarissinnartaraluartoq piffissarput killeqarpoq, ingammik eqqarsaatigalugu Bibelimik atuaqqissaartarnissaq, uppeqativut ilagalugit ataatsimiittarnissaq Naalagaaffimmillu tusagassap nuannersup oqaluussissutigisarnissaa piffissaqarfigisariaqarlugit. — Tussiaat 1:1-3; Matîuse 24:14; 28:19,20; Eprîarit 10:24, 25.
Ukiuni nunap piinik pingaartitsivallaarfiusuni makkunani ’Guutip naalagaaffianut pingaartitaanerusut piniaqqaarniaraanni’ ’silallu matuma piinik tamakkiisumik atuinnginniaraanni’ aalajangersinnaassuseqartariaqarpoq. (Matîuse 6:33, NV; 1 Korintumiut 7:31, NV) Aalajaatsumik uppersuseqarneq tamatumani iluaqutaassaaq. Pingaartumilli Jehovamik tullitsinnillu ilumoortumik asanninnerup ikiussavaatigut pilerisaarutit, imminni ajortuunngikkaluartut taamaattorli ’kiffartuutigisatta naammassineqarnissaanut’ akornutaasinnaasut, ajugaaffiginissaannut. (2 Timûtiuse 4:5) Asanninneq taama ittoq piginngikkutsigu kiffaartuussinerput qarsupittunngoriaannaavoq.
Ilagiinni asanninneq
Asannittuliornerup pingaaruteqassusia Jesusip erseqqissarpaa ima oqarami: ’Matumannga tamarmik ilisarissavaasi ajoqersugarigissi: asaqatigiikkussi.’ (Juánase 13:35) Sooq utoqqaanertat asanninngikkunikkik piffissaq annertooq atorlugu anersaakkut paarsisutut kristumioqatitik pulaartassavaat? Sooq uppeqatit sanngiissusii — ilaatigut utoqqaanertat sanngiissusii — kamagittarfigineqassappat asanngikkaanni? Asanninneq pissutigalugu kristumiut uppeqatitik ikiortarpaat annikilliortoqartoq tusaraangamikku. (apustilit suliáinik agdlagkat 2:44, 45) Malersugaaneqaleraangat kristumiut sernissoqatigiittarput, aap, allaat allat pillugit toqoriaannaapput. Sooq? Asaqatigiikkamik. — Juánase 15:13.
Ilaannikkut asanninneq annikitsuni ersernerusarpoq. Immaqa kristumiup utoqqaanertaq suliassaqareeqisoq saaffigaa utoqqaanertap isumaa malillugu soqutaarpianngitsumik ajornartorsiuteqarluni. Utoqqaanertaq kamassava? Naamik, isumaqatigiinnermik pilersitsissutiginagu qatanngunni kamagittarfigalugu inussiarnerfigissavaa. Oqaloqatigiissapput, taamaaliorneratalu ikinngutigiinnerat nakussatsissavaa. (Matîuse 5:23, 24; 18:15-17) Imminut ilumoorneraannarnata tamatta Jesusip unnersuussutaa maleruarniartigu akaarinnikkajullutalu pitseriarluta qatanngutivut ’77-eriarluta allaat’ isumakkeerfigisarlugit. (Matîuse 18:21, 22, NV) Tassa kristumiut ilungersorlutik asanninneq atiniarpaat, paasillugu tassaasoq ’ataasiussutsip nimia naammalluinnartoq’. — Kulorsamiut 3:14, NV.
Asaqatigiinnitsinni alliartorniarta
Asanninneq pissutigalugu Jehova kiffartuuttariaqarparput. Asanninneq ikiortigalugu silarsuarmit immikkoorsinnaavugut, ilagiillu tassuuna kristumiuujuarsinnaapput. Oqartussaassusillit allaat allat ilagigaangamikkik inussiarnisaarnissartik saamanissartillu puiorlugu ’kimittuallaalinnginnissaannik’ asanninnerup ikiussavai kimittussutsini millisinngikkaluarlugu, uagullu asanninnerup ikiussavaatigut ’siulersortitsinnut naalannissatsinnut tusartarnissatsinnullu’. — Eprîarit 13:17.
Apustili Peterip ’asaqatigiinnissatsinnut’ kajumissaarpaatigut ’asanninnerup ajorterpassuit matoortarmagit’. (1 Pîtruse 4:8) Qanoq ililluta asanninneq taama ittoq ersersissinnaavarput? Inuk Guuti assilillugu pinngortitaagami inunnguutsiminit asanninnermik piginnaaneqarpoq. Asanninnerli maani eqqartugarput ersersinniarlugu immikkut suliniuteqartariaqarpoq. Tamanna Guutip anersaavata inerititaasa pingaarnerpaartaat. (Galâsiamiut 5:22) Taamaattumik asanninneq ineriartortinniarlugu Guutip anersaavanit sunnerneqartariaqarpugut. Qanoq ililluta taamaaliorsinnaavugut? Bibelimik Jehovap anersaavanit isumassarsiarititaasumik atuaqqissaartarnikkut. (2 Timûtiuse 3:16) Jehovamut qatanngutitsinnullu asanninnitta Jehovap anersaavanit nakussatsinneqarnissaata qinnutigineratigut. Aamma ilagiit kristumiuusut taassuma anersaavata akornuserneqarani sunniuteqarfigisaasa ilagisarnerisigut.
Immitsinnuttaaq misilittariaqarpugut eqqarsaatit iliuutsillu asanninnermik malunnaateqanngitsut naniniarlugit. Puiussanngilarput asanninneq pissusiusoq uummammit allaaveqartoq, ’uummallu tamanit annerusumik tatigisassaanngitsuusoq, katsorsagassaananilu’. (Jeremia 17:9) Naak Jehovap ikiortaraluaraatigut ilaannikkut asanninngitsuliortoortarpugut. Immaqa kristumioqaterput sukannerpallaartumik oqaluffigisoortarparput, immaqaluunniit allap oqaasii ajuallaatigalugit sukariataartoortarpugut. Taamaattumik Daviditut qinusariaqarpugut: „Misissuiffinnga, Guuti, ilisariullu uummatiga, misilinnga, eqqarsaatikka ilisariniakkit. Alapernaasinnga iluaatsut aqqutaannik atuaanersunga, ingerlatinngalu aqqutikkut itsarsuarli ittukkut.“ — Tussiaat 139:23, 24.
Bibelimi allassimavoq: ’Asanninneq soraarnavianngilaq.’ (1 Korintumiut 13:8) Asaqatigiikkutta misilinneqarnivut sapernavianngilavut. Guutip innuttaasa akornanni asanninneq ullumikkut paratiisimut anersaakkut ittumut allissutaaqaaq. Uummatikkut iluunngaarlutik asaqatigiittut kisimik silarsuassami nutaami inuuneq nuannaarutigissavaat. Taamaattumik asanninneq tamanna ersersillugu Jehova malinniaruk taamaalillutillu ataasiussutsip nimiata nakussatsinneqarnissaanut peqataallutit. Asanninneq — kristumiussutsip ilumoortup ilisarnaataa — ineriartortiguk. (wD 1/10 91)