Imminut naalakkersinnaaneq sooq taama pingaaruteqartigaa?
’Tamannami ilungersuutigingaarlugu uppersutsissigut ileqqorissiartorniaritsi, ileqqorillusilu ilisarsiartorniaritsi, ilisarsillusilu [immissinnut naalakkersinnaagitsi, NV].’ — 2 Pîtruse 1:5, 6.
1. Ukiuni 1800-kkunni kina imminut naalakkersinnaanermik maluginiarnartumik takutitsisimava?
INUIAAT oqaluttuarisaaneranni imminut naalakkersinnaanermik takutitsinerit tupinnarnerpaartaasa ilaat tassaagunarpoq Charles Blondinip 1800-kkut affaasa kingullianni naammassisaa. Allaatigisat ilaat naapertorlugu arlaleriarluni qorlortorsuit Niagaramik taagutillit ikaarsimavai, siullermik 1859-imi allunaasakkut 335 meterinik takissusilikkut qorlortorsuit 50 meterinik qulaallugit siaarneqarsimasukkut pisulluni. Kingorna qorlortorsuit ikaarlugit takutitseqqittarsimavoq allanngorartillugit, sattaaserluni, nissuni puumut ikillugit, qisunnik takisuunik pisuuserluni, trillebøri kaassuarlugu imaluunniit angummik amaasiarluni. Ilaanni 50 meterit nunap qulaani allunaasakkut qisunnik takisuunik pisuuserluni silaannakkut ulikarsimavoq. Blondin taama uppinnaveersaarluartigisinnaagami imminut naalakkersoqqissaarsinnaasariaqarsimassaaq. Tamannalu pissutigalugu tusaamassaaneq pisoorsuunerlu anguai.
2. Pissutsini allani suni timimik aqutsisinnaaneq pisariaqarpa?
2 Ikittuinnaat taanna issuapajaarsinnaavaat, nalunanngitsumilli timimik naalakkersuisinnaaneq pingaaruteqartorujussuuvoq piginnaanerit aalajangersimasut sungiusarniaraanni imaluunniit timersuummik pikkorissarniaraanni. Assersuutigalugu pattallaqqissorsuusimasup Vladimir Horowitziugaluup piginnaassusii nipilersortartup ima oqaatigai: „Tupigilluinnagara tassaavoq imminut aqussinnaalluinnassuseqarpalussusia . . . tupinnaannartumik piumassuseqarluinnarpalussusia.“ Ilanngutassiami Horowitzip inuunera ima allaatigineqarpoq: „Ukiuni 80-ini assaat inuaat aqoqqissaarneqarlutik timmisullusooq.“
3. (a) Nununeq suna artornarnerpaava, qanorlu nassuiarneqarsinnaava? (b) Oqaaseq griikerisooq suna Bibelimi ’illigutsannaveersaarnermik’, ’imminut naalakkersinnaanermik’, nutserneqarsimava?
3 Piginnaassuseq taama ittoq sungiusassagaanni suliniuteqangaartariaqarpoq. Kisianni allatigut imminut aqussinnaaneq, imaluunniit imminut naalakkersinnaaneq, suli pingaarneruvoq imaannaannginnerullunilu. Pissuseq tamanna tassaanerarneqarsimavoq „isummernernut, misigissutsinut kissaatinullu nunusinnaaneq“. Kristumiut Allagaataat Griikerisuut-ni, assersuutigalugu Pîtrusip agdlagaisa áipait 1:6-imi, oqaaseq ’illigutsannaveersaarneq’ imaluunniit imminut naalakkersinnaaneq, ima nassuiarneqarsimavoq: „kissaatinut pilerissutsinullu, ingammik timikkut kajumissutsinut, imminut nangarsinnaaneq.“ Imminut naalakkersinnaaneq allaat tassaanerarneqarsimavoq „inuup naammassisinnaasaasa annerpaartaat“.
Sooq imminut naalakkersinnaaneq taama pingaaruteqartigisoq
4. Imminut naalakkersinnaanermik amigaateqarneq sumik kinguneqarsimava?
4 Imminut naalakkersinnaanermik amigaateqarnerup kinguneri erseqqipput. Ullutsinni ajornartorsiutit amerlanersaasa imminut naalakkersinnaannginneq pissutigaat. Ersarippoq ’ulluni kingullerni ajornartunik nalliuttoqarfiusuni’ inuusugut. Inuit ’nunujuitsuupput’, amerlanertigut piumatussuseq pissutigalugu, taamaattumillu malunnarpoq inuit ’Guuti kajumiginagu nuannaarutinut kajumittut’. (2 Timûtiuse 3:1-5) Tamanna takuneqarsinnaavoq siorna inuit 40.000-it sinnerlugit, ingammik sualuttumik unioqqutitsinernik pissuteqartumik, ilagiit peqatigiinnerannit peersitaasariaqarsimanerannit. Saniatigullu amerlasuut ilungersortumik oqaanneqartariaqarsimapput, amerlanersaat kanngunartuliorneq pissutigalugu, tamatigullu imminnut naalakkersinnaanermik amigaateqarnertik pissutigalugu. Eqqarsariaallannarportaaq ukiorpassuarni utoqqaanertaasimagaluartut ilaasa tamannarpiaq pissutigalugu immikkut pisinnaatitaaffitik tamaasa annaasimammatigik.
5. Imminut naalakkersinnaanerup pingaaruteqassusia sumut assersuunneqarsinnaava?
5 Imminut naalakkersinnaanerup pingaaruteqassusia biilimut assersuussinnaavarput. Assakaasut sisamat motoorimit sunnertillutik biili sukkatsissinnaavaat, unittaatilli assakaasut unitsissinnaavaat. Biilimilli aquttoqanngippat aquut, sukkatsikkiartortaat unittaatillu atorlugit pisariaqaraangat sukkassutsimik killilersuillunilu unitsitsisinnaasumik, ajutuussaaq.
6. (a) Asanninnerup ilisarnaatai suut aamma imminut naalakkersinnaanermut atorneqarsinnaappat? (b) Mianersoqqussut suna eqqaamasariaqarparput?
6 Imminut naalakkersinnaanerup pingaaruteqassusia erseqqissarneqartariaqarpoq. Apustili Paulusip Korintumiunut agdlagkat sujugdlît 13:1-3-mi asanninneq pillugu allassimasai aamma imminut naalakkersinnaanermut atorsinnaapput. Qanorluunniit oqalugiallaqqitsigigaluarutta, imaluunniit atuaqqissaartarnitsigut ilikkagarpassuaqaraluarutta aalajaatsumillu uppersuseqarluta, qanorluunniillu allat ajunngitsuliorfigisartigigaluarutsigik, tamakku tamarmik asuliinnassapput imminut naalakkersinnaassuseqanngikkutta. Paulusip oqaasii eqqaamasariaqarpavut: ’Arpaliuttarfimmi arpattut ilisimanngilisigik tamarmik arpakkaluartut, ajugaasulli pisassaa ataatsip pisaraa? Taama arpagitsi pisaariumallugu. Ajugaaniaqattaattullu nungullutik suut tamaasa taamaatikkallartarpaat.’ (1 Korintumiut 9:24, 25) Paulusip Korintumiunut agdlagkat sujugdlît 10:12-imi mianersoqqussutaata imminut naalakkersinnaanissatsinnut ikiorpaatigut: ’Tamanna pillugu kinaluunniit qeqartuusorisoq mianersorli orloqqunani.’
Mianersoqqussutissat
7. (a) Imminut naalakkersinnaanermik amigaateqarnerup qanoq ililluni inuiaat ajortumeertippai? (b) Imminut naalakkinngitsoornermik assersuutit allat suut Bibelimi allaatigineqarpat?
7 Adam sianissutsimit pinnani misigissutsinilli siulersorneqarami imminut naalakkersinnaasimanngilaq. Tamatuma kingunerisaanik ’ajorti silarsuarmut tikiuppoq ajortikkullu toqu tikiulluni’. (Rûmamiut 5:12) Inuarneq siulleq aamma misigissutsinik nunusinnaannginnermik pissuteqarsimavoq, Jehova Guutimmi Kain ima mianersoqqusimavaa: „Sooq ajuallappit? Sooq kiinarlerpit? . . . ajorti matup killingani qamasar[poq]. . . . illilli taassumunnga naalagaassaatit.“ Kain ajortimut naalagaasimannginnami, qatanngunni Abel toquppaa. (1 Moses 4:6-12) Lotip nuliattaaq imminut naalakkersinnasimanngilaq. Tunumut qiviarnissamik ussernartorsiornini nunusinnaasimanngilaa. Imminut naalakkersinnaannginnini toqqutigaa! — 1 Moses 19:17, 26.
8. Angutit pingasut kikkut misigisimasaat imminut naalakkinngitsoornissamut mianersoqqussutaappat?
8 Jakobip angajulliliaata, Rubenip, angajulliussutsi annaavaa imminut naalakkersinnaanini amigarmat. Ataatami nallavia narrunarsarpaa Jakobip panerfaasa ilaat innaakkamiuk. (1 Moses 35:22; 49:3, 4; 1 Israelikkut kinguaariit oqaluttuarisaanerat 5:1) Israelikkut oqalorujullutik, naammagittaalliorlutik pikitsitsillutillu kipiluttorfigimmanni Mosesip kamannini nunusinnaajunnaaramiuk nunamut neriorsuutigisamut isernissamik immikkut pisinnaatitaaffissaraluani annaavaa. (4 Moses 20:1-13; 5 Moses 32:50-52) Allaat kunngi David aalajaatsoq, ’angut Jehovap uummataata iluarisaa’, ilaanni imminut naalakkinngitsoornini pissutigalugu ajornartorsiortorujussuanngorsimavoq. (1 Samuel 13:14; 2 Samuel 12:7-14) Taakku tamarmik imminut naalakkersinnaannginnerup navianassusianik mianersoqqussutaapput.
Suut nunusariaqartut
9. Allassimaffiit suut eqqarsaatinik misigissutsinillu aqutsisinnaanerup pingaaruteqassusia ersersippaat?
9 Imminut naalakkersinnaaneq pingaartumik tassaavoq eqqarsaatinik misigissutsinillu aqutsisinnaaneq. Bibelimi taakku ’uummammut’ ’tartunullu’ assersuutigineqartarput. Eqqarsaatitsigut uteqqiaffigisavut Jehovamut iluarisaaniarluta ilungersornitsinni iluaqutaasinnaapput imaluunniit akornutaasinnaapput. Ilumoortut, minguitsut ileqquulluartullu eqqarsaatigiuartarnissaannik unnersuussut Bibelimi Filípimiut 4:8-miittoq maleruassagaanni imminut naalakkersinnaaneq pisariaqarpoq. Tussiaasiortoq David tamatumunnga assingusumik oqaaseqarsimavoq qinulluni ima oqarami: „Uummatima eqqarsaatai ilinni iluarinarilit, [Jehova], qaarsora aniguisitsisigalu!“ (Tussiaat 19:15) Inatsisit qulinganni — tullip pigisaanik pileritsaasseqqusinngissutaasumi — eqqarsaatit aqunneqarnissaat piumasarineqarpoq. (2 Moses 20:17) Jesusip erseqqissarsimavaa eqqarsaatitsinnik misigissutsitsinnillu aqutsisinnaanissarput qanoq pingaartigisoq oqarami: ’Pileritsaallugu arnamut isigisup uummammigut arnaanerereerpaa.’ — Matîuse 5:28.
10. Allassimaffiit suut oqaatsikkut imminut naalakkersinnaanerup pisariaqassusia ersersippaat?
10 Imminut naalakkersinnaaneq aamma oqaatsitsinnut, oqalunnitsinnut attuumassuteqarpoq. Allassimaffinni arlalinni oqarput paareqqullugu kajumissaarneqartarpugut. Assersuutigalugu: „Guuti qilammiippoq illillu nunamiipputit, taamaattumik oqaatsisit amerlanaallariaanagit.“ (Nalunaajaasup oqaasii 5:1) „Oqaluppallaaraanni ajortulioqqajaanartaqaaq, silatuujuvoq oqqaminik naalakkiisartoq.“ (Ussatit 10:19) ’Oqaatsinik mikiaasunik qanissinnit anisitseqinasi, kisianni ineriartornissamut pisariaqartumut ajunngitsut oqaaserisigik . . . nillianerillu mitallernerillu tamarmik ilissinnit peerlit iluaatsuliornerillu tamaasa ilanngullugit.’ Nangillunilu Paulus oqarpoq ’kanngunartut oqaatsillu sianiitsorpallattut quiasaarnipalaallu atugassaanngitsut’. — Evfisumiut 4:29, 31; 5:3, 4.
11. Oqqap paariniarnerata qanoq artornartiginera pillugu Jakob qanoq allassimava?
11 Jakobip, Jesusip qatanngutissaata, oqaatsit aqunneqanngitsut assuarai nassuiarlugulu oqqap paarinissaa qanoq artornartigisoq: ’Inuup oqaa mikisunnguugaluarluni oqallortoqaaq; ata, inninnguup orpiit qanoq amerlatigisut ikuallatsittarpai. Aamma oqaq-una inneq, timitta pisataasa oqaq iluaatsorpassualittaraat; taassuma timi iluunngarlugu mingutsittaraa inuunitta ingerlanera ikuallatsillugu, nammineq anniarfimmit [Gehennamit, NV] ikuallatsitaalluni. Pinngortitammi tamalaat, nersutillu timmissallu paarmortullu imarmiullu, inuit qunutittarlugit qunutitaraat. Inoqanngilarli oqqaminik qunutitsisinnaasumik; ajortoq-una qunutitassaanngitsoq toqunartulissuaq. Taassuminngalu [Jehova, Ataataq pilluaqqusarparput, NV] taassuminngalu inuit Guutip assingani pinngortitat perloqqusarpavut. Qanermit ataatsimit pilluaqqusinerillu perloqqusinerillu anisaraat; qatanngutikka, taamaassanngilaq.’ — Jâko 3:5-10.
12, 13. Allassimaffiit suut takutippaat suliatsigut iliuutsitsigullu imminut naalakkersinnaanissatta pingaaruteqarnera?
12 Soorunami iliuutsitsiguttaaq imminut naalakkersinnaasariaqarpugut. Ingammik angutit arnanut arnallu angutinut attaveqarnerminni imminut naalakkersinnaasariaqarput. Kristumiut ima peqqunneqarput: ’Kinguaassiuutitigut kanngunartuliorneq qimarratigisiuk.’ (1 Korintumiut 6:18, New International Version) Uiusoq oqaaqqissaarneqarpoq nuliani ilumoorfigeqqullugu, aamma eqqarsaatikkut. Assersuutigalugu ima kajumissaarneqarpoq: „Imigariniaruk imeq nammineq puilasuliaativit imaa, imeq illit nammineq puilasuutinnit kuuttoq!“ (Ussatit 5:15-20) Isertuarnani oqaatigineqarpoq ’uersaasut arnaanillillu Guutip eqqartuukkumaarai’. (Eprîarit 13:4) Ingammik aappaqanngitsut imminut naalakkersinnaaneq pisariaqartippaat. — Matîuse 19:11, 12; 1 Korintumiut 7:37.
13 Jesusip inoqatsitsinnut attaveqarnitta oqaatigisassartai tamaasa ataatsimut katissimavai ’maleruagassatut atortuujuaannartutut’ ilisimaneqartoq oqaatigigamiuk: ’Taamaattumik inunnut qanorluunniit iliorfigeqqugussi ilississaaq taamatut iliorfigisigik; taamaapput inatsisit pruffiitillu allagaat.’ (Matîuse 7:12) Imminulli naalakkersinnaaneq pisariaqarluinnarpoq naak tatineqaraluarluta, ussernartorsiortinneqaraluarluta namminissarsiornerlu akiugassarigaluarlugu allat uatsinnut iliuusissaattut kissaatigisatsinnit allaanerusumik iliuuseqarfiginaveersaassagutsigik.
14. Nerisassat imigassallu pillugit Bibelimi qanoq unnersuussuteqarpa?
14 Aammattaaq nerisassat imigassallu eqqarsaatigalugit imminut naalakkersinnaasariaqarpugut. Guutip oqaasiani siunnersuut pitsaasoq imaappoq: „Ilaginiaqinagit viinnisorpallaartut, imaluunniit taakku ingasattumik neqitortut.“ (Ussatit 23:20) Ingammik ulluvut eqqarsaatigalugit Jesus ima mianersoqqusisimavoq: ’Mianersoritsili uummatisi putumanermut imerajunnermullu inuunerullu matuma piinik isumakulunnermut nanertorteqqunagit; ullup taassuma tassanngaannaq tikeqinavaasi, nigatut.’ (Lúkarse 21:34, 35) Aap, eqqarsaatitsigut, misigissutsitsigut, oqaatsitsigut suliatsigullu imminut naalakkersinnaasariaqarpugut.
Sooq imminut naalakkersinnaaneq imaannaanngitsuusoq
15. Bibelip qanoq ililluni uparuarpaa Satan piviusuusoq imminullu naalakkersinnaanissatsinnut akornusiiniartoq?
15 Imminut naalakkersinnaaneq imaaliallaannaq ilikkarneqarsinnaanngilaq. Soorlu kristumiut tamarmik nalunngikkaat, pingasunik pingaartunik pissaaneqarpoq imminut naalakkersorniarluta ilungersornitsinnik akerlilersuisunik. Siullermik pingaarnerpaamillu tassaapput Satan Diaavulu taassumalu inngilipilui. Bibelip erseqqissumik takutippaa taakku ilumut piviusuusut. Assersuutigalugu, allassimavoq ’Satanip Judas pulagaa’ Jesusimik killuutiginnikkiartunngitsiarnerani. (Juánase 13:27) Apustili Peterip Ananias aperisimavaa: ’Sooq Satanip uummativit ilua tamakkerpaa, anersaamut illernartumut sallugavit?’ (apustilit suliáinik agdlagkat 5:3) Peterilu mianersoqqusilluni tulluartumik ima oqarpoq: ’Putumatsaalillusilu eqqumagitsi, akerartortersi Diaavulu liivertut uiannisaartutut angalasarmat iisassarsiorluni.’ — 1 Pîtruse 5:8.
16. Sooq kristumiut silarsuaq manna eqqarsaatigalugu imminut naalakkersinnaasariaqarpat?
16 Ilungersorlutik imminut naalakkersinnaaniarnermik saniatigut kristumiut silarsuup matuma Satan Diaavulumit, ’ajortumit, pissaaneqarfigineqarnera’, atugarliuutigisariaqartarpaat. Tamatumunnga atatillugu apustili Johannes ima allassimavoq: ’Silarsuarluunniit silarsuulluunniit pii asaqinasigik. Silarsuarmik asannittoq Ataatap asanninneranik ilumiugisaqanngilaq. Silarsuarmiittummi suut tamarmik, uinimmut pilerinartut isinullu pilerinartut usorsitsaarutillu inuunerup matuma pii, Ataatamit pinngillat, silarsuarmilli pipput. Silarsuarlu pilerinartuilu nungujartorput; Guutilli peqqusaanik naammassinnittoq naassaanngitsumik atassaaq.’ Imminut naalakkersunngikkutta aalajangiusimalluinnarlugulu silarsuarmik asannilernaveersaanngikkutta, tamatuma sunniinerata ajugaaffigissavaatigut, soorlu Paulusip kiffaaqataa Demas ajugaaffigineqarsimasoq. — 1 Juánase 2:15-17; 5:19 NV; 2 Timûtiuse 4:10.
17. Imminut naalakkersinnaanermut tunngatillugu sunik inunnguusaasunik ajornartorsiuteqarpugut?
17 Kristumiutut imminut naalakkersinnaasariaqarpugut timikkut sangiissutsivut naammalluinnanngissutsivullu kingornussaasut ajugaaffigissagutsigik. Miserratigisinnaanngilarput inuit ’inuusunnerminniilli ajortussaq kisiat eqqarsaatigigaat’. (1 Moses 8:21) Daviditut manna akuerisariaqarparput: „Erniugamali ajortimioreerpunga, anaanama ilumiugilerpaanga ajortiliulluni.“ (Tussiaat 51:7) Inoorlaap imminut naalakkersinnaaneq suusoq naluaa. Kissaateqaraangami kissaatigisani pitserlugu qiaannartarpoq. Meeqqanik perorsaaneq pillugu ilanngutassiami ima allassimasoqarpoq: ’Meeqqat inersimasunit allaalluinnartumik eqqarsaariaaseqarput. Meeqqat imminnuinnaq isumagisuupput tunngaveqarluarluni nassuiaanermut sunnertiavallaarnatik, „allat misigisaannik paasinninniarsinnaannginnamik“.’ Aap, „inuusuttuaqqat sianiissusermik pigisaqarput“. Kisianni ’unataat anusinngorsaataasoq’ ikiortigalugu meeqqat paasiartorusaarsinnaavaat maleruagassat aalajangersimasut maleruassallugit namminissarsiornertillu nunussallugu. — Ussatit 22:15.
18. (a) Jesusip oqaasii malillugit periaatsit suut assersuutaasumi uummamiugaavut? (b) Paulusip qanoq takutippaa imminut naalakkersinnaanerup artornassusia miserratiginngikkini?
18 Aap, namminissarsioriataartarnerput inunnguusaasoq pissutigalugu imminut naalakkerniarneq imaannaanngittarpoq. Periataartarneq tamanna uummatitsinni assersuutaasumiippoq, Jesusillu ima oqaatigisimavaa: ’Uummammit pisarmata isumapiluit, toqutsinerlu arnaaneqarnerlu uersaanerlu tillinnerlu nalunaajaatillu sallusut mitalliinerillu.’ (Matîuse 15:19) Taamaattumik Paulus ima allassimavoq: ’Piumasarami ajunngitsoq suliarisarinngilara, kisianni piumanngisara ajortoq suliarisarpara. Piumanngisarali suliarisarakku taava uangaajunnaarsoq ajortili ilunniittoq taamaalioraraaq.’ (Rûmamiut 7:19, 20) Tamannali pillugu ajorsittariaqanngilagut, Paulus arlaanni aamma ima allassimammat: ’Kisianni timiga artorsartippara kiffaasutut ilillugu, allanut oqaluussisartunga nammineq angiluttoqqunanga.’ Taamaaliorsinnaassagaanni imminut naalakkersinnaasariaqarpoq.
19. Sooq Paulus oqarsinnaasimava timini artorsartillugu?
19 Paulus pissutissaqarluarluni oqarsinnaasimavoq timini artorsartillugu, timikkummi pissutsit soorlu aap naqitsinerata sakkortuallaarnera, sianiutilunneq, sinissaaleqineq, niaqorlunneq, nerisat aqajaqqumi uunneqarsinnaanerannik ajornartorsiutit assigisaallu pissutigalugit imminut naalakkersinnaaneq sapernarsinnaavoq. Ilanngutassiami tulliuttumi misissussavarput imminut naalakkersinnaajumalluta pissutsit ikiortissallu suut iluaqutigisinnaagivut. (wD 15/11 91)
Eqqaamavigit?
□ Imminut naalakkersinnaaneq sooq taama pingaaruteqartigaa?
□ Assersuutit suut takutippaat imminut naalakkinngitsoorneq ajoqutaasoq?
□ Suut tungaasigut imminut naalakkersinnaasariaqarpugut?
□ Pissutsit pingasut suut imminut naalakkersinnaanerput artornarsarpaat?
[Qupp. 14-mi assiliartaq]
Nerisassat imigassallu eqqar- saatigalugit kristumiut imminut naalakkersinnaasariaqarput
[Qupp. 15-mi assiliartaq]
Imminut naalakkersinnaanerup ikiussavaatigut oqaatissuaanermik ingalassimanninnissatsinnik
[Qupp. 12-mi suminngaanneernera]
Historical Pictures Service