Naalagaaffimmik neriuutissinni nuannaaritsi!

’Neriugitsi tipaatsullusi; naalliukkaangassi ilalaaritsi.’ — RÛMAMIUT 12:12.

1. Sooq Jehovamut attaveqarnerput nuannaarutissarsiffigisinnaavarput, apustili Paulusillu kristumiut sumik kajumissaarpai?

’GUUTI pilluartoq.’ (1 Timûtiuse 1:11) Jehovamik eqqartuineq eqqorluangaarami! Sooq? Suliai tamarmik taassumunnga pilluaataasumik kinguneqartaramik. Jehova suut ajunngitsut pilluarnartullu tamarmik pilerfigimmassuk, pinngortitai sianissusillit tamarmik taassumunnga attaveqarnerminni pilluarnermik atugaqalersinnaapput. Taamaattumik tulluarpoq apustili Paulusip kristumiut kajumissaarmagit Jehova Guutimik ilisarisimanninnermikkut pisinnaatitaaffimminnik nuannersumik pingaartitsinissaannik, pinngortitanik nuanningaartunik tunissutaanik tamanik qujamasuutiginninnissaannik, aammalu ilumoortumik-tunniusimanermik ersersitsinerinik tipaatsuutiginninnissaannik. Paulus ima allassimavoq: ’Jehovami tipaatsuttuinnaritsi; aammalu oqarpunga tipaatsugitsi.’ — Filípimiut 4:4; Tussiaat 104:31.

2. Neriuut suna assut nuannaarutissarsiffiusarpa, kristumiullu sumik kajumissaarneqarpat?

² Paulusip kajumissaarutaa tamanna kristumiut maleruarpaat? Ilaana! Jesus Kristusip anersaakkut qatanngutaasa Guutip imminnut neriuutigititaa nuanningaartoq nuannaarutigeqaat. (Rûmamiut 8:19-21; Filípimiut 3:20, 21) Aap, nalunngilaat Kristus qilammi naalagaaffiani naalakkersueqatigineratigut inuiaat, inuusut toqungasullu, siunissami neriuutaannik angingaartumik piviusunngortitseqataajumaarlutik. Takorlooriaruk kingornusseqataasutut, kunngioqataallutillu palasioqataasutut, immikkut pisinnaatitaaffimminnik qanoq nuannaarutiginnitsigissasut! (sarĸúmersitat 20:6) Qanoq tipaatsutsigissappat inuiaat aalajaatsut naammalluinnartunngortillugit nunarsuullu paratiisinngorteqqinnissaanik ikiorunikkik! Ilumummi, Guutip kiffaasa tamarmik ’inuuneq naassaanngitsoq Guutip sallusuitsup killeqanngitsumit unnersuutigisaa [neriorsuutigisaa] neriuutigaat’. (Títuse 1:2) Neriuut misinnangaartoq tamanna eqqarsaatigalugu, apustili Paulusip kristumiut tamaasa ima kajumissaarpai: ’Neriugitsi tipaatsullusi.’ — Rûmamiut 12:12.a

Nuannaarneq piviusoq — uummatikkut pissuseq

3, 4. (a) Nuannaarneq sumik ilaqarpa, kristumiullu qaqugukkut nuannaartariaqarpat? (b) Nuannaarneq piviusoq suua, tamatumunngalu suna aalajangiisuua?

³ „Nuannaarneq“ tassaavoq nuannaarnermik misigineq aamma ersersitsineq; tassaanngilaq kipisuitsumik nuannaarujunneq, imaluunniit qiimarujuttuaannarneq. Oqaluutit hebriiarisuut griikerisuullu Bibelimi ’nuannaarnermik’, ’qiimmattarnermik’ aamma ’tipaatsunnermik’ nutserneqarsimasut tamarmik qamuuna ilukkut nuannaarnermik misigineq aamma nuannaarnermik ersersitsineq pivaat. Kristumiut kajumissaarneqarput ’tipaatsuttuaannarnissaminnik’. — 2 Korintumiut 13:11; 1 Tásalûníkamiut 5:16.

⁴ Qanorli ililluni tipaatsuttoqartuaannarsinnaava, nuannaartoqartuaannarsinnaava? Tamanna ajornanngilaq, nuannaarneq piviusoq uummatip pissusiisa ilagimmassuk, qamuuna ilorpiakkut pissusiulluni, anersaakkullu ittuulluni. (5 Moses 28:47; Ussatit 15:13; 17:22) Guutip anersaavata inerititaanut ilaavoq, Paulusillu Guutip anersaavata inerititai taagoramigit asanninnermut tulliutillugu tamanna taasimavaa. (Galâsiamiut 5:22) Qamuuna ilukkut pissusiugami qallikkut ittut, allaat qatanngutit, attaviginagit atasinnaavoq. Guutilli anersaavanut illernartumut atanngitsoorsinnaanngilaq. Sallusuissut Naalagaaffimmillu neriuut pigalugu Jehovallu iluarisaanik iliorluni nalunagu qamuuna ilukkut nalerisimaarnermit nuannaarneq piviusoq pivoq. Taamaattumik, tassaannaanngilaq inuttut pissuseq inunnguuserisarput; ’inuttaamut’, pissutsinut ataatsimoortunut Jesus Kristusip ilisarnaatigisaanut, ilaavoq. — Evfisumiut 4:24; Kulorsamiut 3:10.

5. Qaqugukkut qanorlu ililluni nuannaarneq ersersinnaava?

⁵ Nuannaarneq ilukkut misigissusiuvoq uummammut assersuutaasumut atasoq, ilaannikkulli aamma qallikkut malunniuttartoq. Qanoq ililluni? Assigiinngitsorujussuarnik malunniussinnaavoq, soorlu kiinnap isikkuatigut eqqissisimarpaseqisukkut imaluunniit nuannaangaarami pisseqattaarnikkut. (1 Kunngit 1:40; Lúkarse 1:44; apustilit suliáinik agdlagkat 3:8; 6:15) Tassa ima paasisariaqarpa inuit oqaaseqarpallaartanngitsut imaluunniit qungujulajuaannanngitsut nuannaarnermik pigisaqanngitsut? Naamik! Nuannaarneq piviusoq oqaluttuaannarnikkut, illartuaannarnikkut imaluunniit qungujulajuaannarnikkut ersertanngilaq. Nuannaarneq assigiinngitsorpassuartigut ersertarpoq, pissutsit qanoq innerat apeqqutaasarluni. Rigssalimi ’silaannaap’ ajunngitsuuneranut pissuseq nuannaarnerinnaanngitsoq pissutaasarpoq, qatanngutigiittulli tunniusimaqatigiinneq asaqatigiinnerlu pissutaanerusarlutik.

6. Sooq kristumiut nuannaartuaannarsinnaappat, aamma allaat annikilliortitaagaluarlutik?

⁶ Nuannaarneq kristumiutut pissusitaamut ilaanini pissutigalugu pissusiuvoq ataavarsinnaasoq. Kristumiutut pissusitaarsimagaanni nuannaartuaannarnissaq ajornarunnaartarpoq. Soorunami ilaannikkut arlaannik isumakuluuteqalersinnaasarpugut, imaluunniit immaqa nuanniitsumik nalaanneqartarluta. Taamatulli pisoqaraluaraangat uummatitsigut nuannaarneq pigiuaannarsinnaasarparput. Kristumiut siulliit ilaat inussiaasimapput iluarusutsikkuminnatsunillu naalagaqarsimallutik. Kristumiut taakku nuannaarnermik pigisaqartuaannarsinnaasimappat? Aap, tassami Naalagaaffimmik neriuuteqarput nuannaarnermillu uummatimikkut pigisaqarlutik. — Juánase 15:11; 16:24; 17:13.

7. (a) Naalliunnermi nuannaarneq pillugu Jesus qanoq oqarpa? (b) Annikilliornerni suna ikiortigalugu nikallujuittarpugut, tamatumanilu kina maligassiuilluarnerpaasimava?

⁷ Apustili Paulus ima oqarsimatsiaannarluni: ’Neriugitsi tipaatsullusi,’ ima nangippoq: ’Naalliukkaangassi ilalaaritsi.’ (Rûmamiut 12:12) Jesusittaaq annikilliornermi nuannaarnissaq eqqartorpaa Matîuse 5:11, 12-imi ima oqarami: ’Pilluarpusi uanga pillunga mitaatigippasi qinugalusilu . . . Tipaatsullusi qiimmattaritsi, akissarsiassarsi angeqimmat qilammi.’ Tipaatsunneq qiimmattarnerlu uani eqqaaneqartut tamatigut qallikkut malunniuttariaqanngillat; eqqartorneqartorli tassaavoq qamuuna ilukkut nalerisimaarneq, nalunagu misilinneqarnermi nikallujuikkaanni Jehova Jesus Kristusilu nuannaartillugit. (apustilit suliáinik agdlagkat 5:41) Nuannaarneruna tamanna annikilliornitsinni nikallujuinnissatsinnut ikiortigisaripput. (1 Tásalûníkamiut 1:6) Tamatumuunakkut Jesus Kristus maligassiuilluarnerpaavoq. Soorlu Bibelimi oqaatigineqartoq: ’Tipaatsuutissaq imminut saqqangiussaq pillugu ilalaarluni [napasoq anniartitsivik, NV] atorpaa.’ — Eprîarit 12:2.

Naak ajornartorsioraluarlutit neriuutinni nuannaarit

8. Ajornartorsiutinik sunik kristumiut nalaanneqarsinnaappat, soorlu kristumiut tamanna nuannaarunnaassutigisanngilaat?

⁸ Imaanngilaq Jehovamut kiffaagatta ajornartorsiortanngitsugut. Ilaqutariinni, aningaasatigut peqqissutsikkullu ajornartorsiuteqarsinnaavugut imaluunniit qanigisatsinnik toqusoqarsinnaalluta. Tamakkua aliasutsitsisinnaapput, Naalagaaffimmilli neriuutitsinni nuannaarnissatsinnut, uummatikkut nuannaarnissatsinnut, tunngavissarput peersinnaanngilaat. — 1 Tásalûníkamiut 4:13.

9. Abraham sunik ajornartorsiuteqarsimava, qanorlu ililluta nalunngilarput uummatimigut nuannaarnermik pigisaqarsimasoq?

⁹ Abraham assersuutigeriartigu. Taanna oqitsunik atugaqartuaannartarsimanngilaq. Ilaqutaani ajornartorsiuteqarpoq, panerfani Hagar nulianilu Sara imminnut nuannariippallaanngimmata. Oqqattoqalerpoq. (1 Moses 16:4, 5) Ismaelip Isak quiassuaatigaa qinugalugulu. (1 Moses 21:8, 9; Galâsiamiut 4:29) Piffissap ilaani Abrahamip nulia asangaagaa Sara toquvoq. (1 Moses 23:2) Naak ajornartorsiutit tamakku atoraluarlugit Abrahamip neriuutini, tassa kinguaassap Naalagaaffikkoortup nammineq kinguaamigut saqqummernissaanik kinguaariillu nunarsuarmiittut tamarmik kinguaassakkut taassumuunakkut pilluaqqunarsinissaannik neriuutini, pissutigalugu nuannaarneq pigiuaannarsinnaasimavaa. (1 Moses 22:15-18) Illoqarfiup najugaqarfigisami Urip qimannerata kingorna ukiuni hundredeni Jehovamut kiffartornermini uummammigut nuannaarnermik pigisaqarluni qasusuittuarsimavoq. Taamaattumik ima oqaatigineqarpoq: ’Illoqarfik una tunngavilersugaq, Guutip illuliaa suliarisaa ilimagaa.’ Abraham Messiasikkut naalagaaffimmut takkuttussamut aalajaatsumik uppissuseqarsimammat Naalagaq Jesus, kunngiusussatut Guutimit toqqarneqarsimasoq, taanna pillugu ima oqarsinaassimavoq: ’Abraham ataatarsi nuannaaqaaq ullora takussagamiuk; takuaalumi tipaatsullunilu.’ — Eprîarit 11:10; Juánase 8:56.

10, 11. (a) Kristumiut sumut akiuuttariaqarpat, qanorlu ililluta aniguisinneqarpugut? (b) Uinitsinnut ajortiliusumut akiuunnitsinni ajugaasinnaannginnatta qanoq iliortariaqarpugut?

¹⁰ Uagut inuttut naammalluinnanngitsuugatta uinipput ajortiliusoq akiugassaraarputtaaq, eqqortumillu akiuunniarluni akiuunneq tamanna assut annikilliornartoqarsinnaavoq. Imaanngilarli neriuutissaqanngilluinnartugut. Taamatut akiuunnini pissutigalugu Paulus assut naalliuttarsimavoq, imalu oqarsimavoq: ’Uanga inukuluusunga kia timimit matumannga toqup pianit annaatissavaanga? Guuti qujanarsili Jesus Kristusikkut Naalakkatsigut.’ (Rûmamiut 7:24, 25) Aap, Jesus Kristus utertitsissutitullu taassuma pilliutaa iluaqutigalugit annaanneqarsimavugut. — Rûmamiut 5:19-21.

¹¹ Naammalluinnartumik akiuunnissarput saperatsigu Kristusip utertitsissutitut pilliutaa iluaqutiginiartariaqarparput. Utertitsissut tamanna nuannaarutigisinnaavarput, tassami ilerasuutaarunnissarput ajortitsinnillu isumakkeerfigineqarnissarput tassuuna ajornarunnaarsinneqarput. Eprîarinut agdlagkat 9:14-imi Paulus oqarpoq ’Kristusip aava’ pissaaneqartoq ’tarnitta nalunngissusianik minguersaanissamut suliat inuussutaanngitsut piiarlugit’. Tassa kristumiut imminut pisuutinnermik imaluunniit pillagassaasutut misiginermik ilerasuuteqartariaqanngillat. Tamanna neriuuterpullu nuannaarnermik pigisaqartuaannarnissatsinnut pisooqataalluinnarput. (Tussiaat 103:8-14; Rûmamiut 8:1, 2, 32) Neriuutitta sunik ilaqarnera misissornerugutsigu akiuuttuaannarnissatsinnut kajumississutigissavarput.

Neriuut eqqumaffigiuaannaruk

12. Neriuut suna kristumiut tanitat eqqarsaatigeqqissaarsinnaavaat?

¹² Pingaaruteqarpoq tanitat sinneruttut savallu allat ’annannissamik neriuutiminnik’ eqqumaffiginnittuarnissaat, niaqorornarveeqqutitut illersuutigalugu. (1 Tásalûníkamiut 5:8) Kristumiut tanitaasut eqqarsaatigisarsinnaavaat qilammi, Jehova Guutimut sassartitaaffigisassaminni apustilillu 144.000-illu ilaat allat ukiut hundredelikkaat ingerlaneranni assuarnaassutsiminnik attassiuaannarsimasut ilagalugit Jesus Kristusimik naalannarsisitaasimasumik najugassaminni, toqujuitsuulluni inuunermik angusinissamik immikkut pisinnaatitaaffitsik. Najortigisassat pisuunngornaqisut utaqqivaat.

13. Tanitat sinnerisa nunamiittut neriuutertik qanoq eqqarsaatigisarpaat?

¹³ Tanitat sinnimerngi suli nunami inuusut qilammi neriuutertik qanoq eqqarsaatigisarpaat? 1913-imi kuisissimasup oqaasiinik tamanna eqikkarneqarsinnaavoq: „Neriuuterput qularnaalluinnarpoq, savarpannguanullu ilaasut 144.000-iusut tamarmik takorloorsimanngisaannakkatsitut annertutigisumik neriuutertik eqquutissavaat. Uagut sinneruttunut ilaasugut 1914-imilu inuusugut, tamattalu qilaliartitaanissatsinnik ilimagisaqartugut, neriuutip tamatuma naleqangaassusianik malugisimanninnerput katassimanngilarput. Neriuuterput aatsaat taama piviusorpalutsigisumik misigisimavarput, piviusunngornissaanullu utaqqinerput sivitsoriartortillugu neriuutitsinnik pingaartitsinerput alliartuinnarpoq. Utaqqineq imminut akilersinnaavoq, ukiuni millioniniluunniit utaqqissagaluaraanni. Neriuuterput aatsaat taama erlinnartuutitsigilersimavara, qaquguluunniillu pingaartikkunnaassanngilara. Savarpannguit neriuutaattaaq amerlangaartut ilimagisaminnik sinnattorisimanngisaannakkamittut misinnartigisumik eqquutitsinissaannut qulakkeerutaavoq. Taamaattuminguna manna tikillugu nikallujuissimasugut, nikallujuittuassaagullu Guutip ’neriorsuutiminik akisungaartunik angingaartunillu’ eqquutitsinissaata tungaanut.“ — 2 Pîtruse 1:4; 4 Moses 23:19; Rûmamiut 5:5.

Paratiisimik neriuut nuannaarutissarsiffigisaruk

14. Neriuut suna amerlangaartut eqqumaffigiuartariaqarpaat?

¹⁴ Qiimasulluni uppernermik taama ittumik oqaatiginninnerup amerlangaartunut ilaasut nuannaangaarnissamut pissutissippai. (sarĸúmersitat 7:15, 16) Harmagedonimi aniguinissaminnik neriuutertik eqqumaffigiuartariaqarpaat. Aap, Guutip naalagaaffiata annikilliornartumi angisuumi, nunarsuarmi ajortunik Diaavulumik guuteqartunik piiaaffiusussami, Jehova Guutip kisimi oqartussaaneranik aalajangiussisitsinissaa aqqanillu illernarsisitsinissaa siumut isigiuartariaqarpaat. Annikilliornatumi angisuumi aniguineq assorsuaq nuannaarutaassaaq. — Daniel 2:44; sarĸúmersitat 7:14.

15. (a) Jesus nunamiikkallarami tupinnartuliornikkut sunik ajorunnaarsitsisarsimava, sooq? (b) Harmagedonimi aniguisut suna pisariaqartissavaat, taakkualu toqusunit makititaasunit suna allaassutigaat?

¹⁵ sarĸúmersitat 7:17-imi amerlangaartut ima oqaatigineqarput: ’Savaaqqap . . . paariumaarpai tasiorlugillu imermik puilasunut inuunerup piinut; Guutillu qulliit tamaasa isaannit allarterumaarpai.’ Siulittuut tamanna ullumikkut anersaakkut eqquutilereerpoq, Harmagedonimilu aniguisut eqquutivinnera misigiumaarpaat. Qanoq ilillutik? Aap, Jesus nunamiikkallarami qanoq iliorsimava? Tusiattut innarluutillillu ajorunnaarsittarsimavai, tusilartut siutaat tappiitsullu isaat ammartarsimavai, pupissut, nukillaarnikut ’tamanillu nappaateqartut ajuuteqartullu’ ajorunnaarsittarsimavai. (Matîuse 9:35; 15:30, 31) Tamannarpiaannginnerpa kristumiut ullumikkut pisariaqartitaat? Amerlangaartunut ilaasut silarsuatoqqami ajuutitik innarluutitillu nassarlugit silarsuarmut nutaamut isissapput. Tamakku Savaaqqap qanoq iliuuseqarfigissagai ilimagaarput? Makititaasut pisariaqartitaannit allaanerulluinnartunik Harmagedonimi aniguisut pisariaqartitsissapput. Naak makititaasussat inuttut naammalluinnartutut makititaassanngikkaluarlutik, qularnanngitsumik timimik tamarmiusumik peqqilluinnartumillu timeqarlutik makititaassapput, taamaattumillu tupinnartuliornikkut ajorunnaarsinneqarnissamik pisariaqartitsinaviarnatik. Amerlangaartulli ilarpassui Harmagedonimi aniguinissamik angingaartumik immikkut pisinnaatitaaffimmik pisussat tupinnartuliornikkut ajorunnaarsinneqarnissaq pisariaqartillugulu misigissavaat. Jesusip inunnik ajorunnaarsitsisarsimanera qularnanngitsumik amerlangaartunut qiimmassaatissatut suliaavoq. Amerlangaartunut taakkununnga ilaasut aniguinissartiinnaanngitsoq aammattaarli ajorunnaarsinneqarnissartik qilanaaraat.

16. (a) Harmagedonimi aniguisut qularnanngitsumik qaqugu ajorunnaarsinneqassappat, tamatumalu suut nassatarissavai? (b) Ukiuni tuusinti naalakkersuinermi neriuut suna nuannaarutigisinnaassavarput?

¹⁶ Ingasappallaanngilaq isumaqassaluni aniguisut Harmagedonip kingorna erniinnaartumik, toqungasunik makititsinissaq sioqqullugu, ajorunnaarsinneqassasut. (Jesaja 33:24; 35:5, 6; sarĸúmersitat 21:4; naleqqiuguk Mákorse 5:25-29.) Taamanikkussamut inuit isarussatik, ajaappissatik, issiavitik kaamisartakkat, timimik ilaanut taarsiussat, tusartaatitik assigisaallu atorfissaqartikkunnaassavaat. Tamanna assorsuaq nuannaartitsissaaq! Harmagedonip kingunitsianngua Jesusip taamatut ajorunnaarsitsiortornissaa amerlangaartut nunamut nutaamut tunngaviusussaanerarneqarnerannut naapertuulluarpoq. Nappaatit innarluuteqalersitsisartut nungutinneqassapput, taamaallillutik aniguisut kajumilluarlutik sulinialersinnaassallutik, ukiuni tuusintini naalagaaffiup ataani suliassartik annertooq silarsuatoqqami innarluutigisimasaminnit artukkersorneqaratik qilanaarisinnaassallugu. Aap, Harmagedonip kingorna amerlangaartut ukiut tuusintit naaneranni inuttut naammalluinnassutsimik angusinissaminnik neriuutertik nuannaarutigiuaannarsinnaassavaat. Tamatuminnga angusinissamik neriuutertik ukiut tuusintit naallugit nuannaarutigisinnaassavaat.

17. Paratiisip pilerseqqikkiartuaarneqarnerani nuannaarutissat suut peqataaffigisinnaassavavut?

¹⁷ Nunami inuunissamik neriugisaqaruit Paratiisip pilerseqqinneqarnissaanik nuannaarutiginninnissaq eqqarsaatigisinnaavat. (Lúkarse 23:42, 43) Harmagedonimi aniguisut nunamik saliinermut qularnanngitsumik ikiuutissapput taamaalillutillu toqusunit makittussanut avatangiisinik atoruminartunik makiffissaqartitsissallutik. Ilisisoqartarunnaarluni toqusunit makittunik, ilaatigut asasatsinnik toqusimasunik, tikilluaqqusilluni katerisimaarneqartassaaq. Aammalu angutinik arnanillu itsaq inuusimasunik katerisimaaqateqarnissarput pisuunngornartoq eqqarsaatigisaruk. Kina ingammik oqaloqatigerusussinnaaviuk? Abel, Enok, Noa, Job, Abraham, Sara, Isak, Jakob, Josef, Moses, Josua, Rahab, Debora, Samson, David, Elias, Elisa, Jeremias, Ezekiel, Daniel imaluunniit Johannes Kuisisoq? Siunissami pisussat tamakku nuannersut neriuummuttaaq ilaapput. Taakku oqaloqatigisinnaalissavavut, ilinniarfigisinnaassallugit nunarsuarlu paratiisinngortinniarlugu suleqatigisinnaassallutigik.

18. Nuannaarutissat allat suut eqqarsaatigeqqissaarsinnaavavut?

¹⁸ Takorluukkittaaq nerisassat pitsaasut, imeq silaannarlu minguitsut, Jehovap nunarsuaq pinngortimmagu issimaneratut nunarsuarmi silaannaap naasullu imminnut sunniuteqartarnerat oqimaaqatigiilluinnaleqqippata, pigiligassavut. Naammalluinnassuseqalerneq uninngaannarluni nuannaarutigineqarnavianngilaq, suliniuteqarlunili imaqarluartumillu pilluarnermik nassataqartumik inuusoqassalluni. Takorlooriakkit nunarsuaq tamakkerlugu inuiaqatigiit silarsuarmi pinerluttoqarfiunngitsumi, namminissarsiorfiunngitsumi, sinngasoqarfiunngitsumi assortuuffiunngitsumilu inuusut — qatanngutigiissuit tamarmik anersaap inerititaanik ineriartortitsillutillu inerititaqartut. Siunissaq pissanganartoq! — Galâsiamiut 5:22, 23.

Neriuut inuunermik imaqalersitsisoq

19. (a) Nuannaarneq Rûmamiunut agdlagkat 12:12-imi eqqartorneqartoq qaqugu misigineqarsinnaava? (b) Sooq aalajangiusimasariaqarparput inuunermi artorsaatit neriuutitsinnik matusitinnginnissaat?

¹⁹ Ilimagisat eqquukkaangata neriunneq unittarpoq. Taamaattumik nuannaarneq Rûmamiunut agdlagkat 12:12-imi Paulusip uagutsinnut erserseqqullugu kajumissaarutigisaa maannakkut atuuppoq. (Rûmamiut 8:24) Pilluaqqussutit Guutip naalagaaffiata nassatariumaagassai eqqarsaatigiinnarlugit maannangaaq neriuummi tamatumani nuannaarsinnaavugut. Taamaattumik aalajangerit silarsuarmi ajortunngorsimaqisumi maani atoruminaatsut neriuutinnik angingaartumik matusitissanagit. Qunutitaallutit nakkaannaqinak taamaalillutillu siunissamut neriuutit annaanagu. (Eprîarit 12:3) Kristumiutut aqqummik qimatsinikkut ajornartorsiutitit aaqqinnavianngillat. Eqqaamajuk inuunermi artorsaatit pissutigalugit Guuti kiffartuukkunnaarukku artorsaatit tamakku pigiuaannassagakkit, neriuulli taamalu siunissami pisussanik angingaartunik nuannaarutiginnissinnaaneq pigiunnaassallugit.

20. Naalagaaffimmik neriuummik ilassinnittunut tamanna qanoq sunniuttarpa, sooq?

²⁰ Jehovap innuttai inuunermik nuannaarutiginninnissaminnut pissutissaqarluarput. Neriuutaat nuanningaartoq isumassarsinarlunilu inuunermik naleqarnerulersitsivoq. Neriuutertillu nuannaarnermik nassataqartoq tamanna namminiinnaq piginngilaat. Aap, inunnut allanut oqaluttuarinissaa kissaatigeqaat. (2 Korintumiut 3:12) Taamaattumik Naalagaaffimmik neriuummik ilassinnittut siunissartik ernumagiunnaartarpaat inuillu allat tusagassamik nuannersumik Guutimeersumik oqaluttuullugit qiimmassartarlugit. Tamatuma inuit tusarliussamik ilassinnittut neriuutit inuiannut tunniunneqarsimasut annerpaartaannik neriuuteqalersittarpai — tassa naalagaaffiup nunarsuarmi Paratiisimik atuutilersitseqqinnissaanik neriuummik. Inuillu neriuummik tamatuminnga ilassinnikkumanngikkaluaraangataluunniit neriuummik tamatuminnga peqarnerput pissutigalugu nuannaarnerput attatiinnartarparput. Tusaajumanngitsullu tamakku, uaguunngitsoq, nuanningaartunik pinngitsuugaqassapput. — 2 Korintumiut 4:3, 4.

21. Suna qanilliva, neriuuppullu qanoq isigisariaqarparput?

²¹ Guuti ima neriorsuivoq: ’Ata, suut tamaasa nutaanngortippakka.’ (sarĸúmersitat 21:5) Silarsuassaq nutaaq pissanganartunik ataavartussanillu pilluaqqussutissartalik aanaararsuuvoq. Naleqangaartumik neriuuteqarpugut, qilammi imaluunniit nunami paratiisiusumi inuunissamik. Neriuut tamanna aalajangiusimajuaruk. Ulluni kingullerni annikilliornartuni makkunani aatsaat taama pingaaruteqartigilersimavoq neriuutitta ’tarnitsinnut kitsatut qajannaatsutut aalajaatsutullu’ isiginissaa. Neriuuterput Jehovamut, ’qaarsumut ataavartumut’, kisarsimatikkutsigu maannangaaq ’tipaatsulluta neriunnissatsinnut’ pissutissaqarluarpugut. — Eprîarit 6:19; Jesaja 26:4. (wD 1/1 92)

[Quppernerup ataani ilanngussaq]

Apeqqutit uteqqiissutissat

□ Inuiannut suna neriuutissaava?

□ Nuannaarneq piviusoq suua?

□ Harmagedonimi aniguisut qularnanngitsumik qaqugu ajorunnaarsinneqassappat?

□ Sooq inuunermi artorsaatit neriuutitsinnik matusitissanngilavut?

□ Silarsuassami nutaami suna qilanaaraajuk?

[Qupp. 15-mi assiliartaq]

Ajorunnaarsitsinerit Jesusip suliarisimasaatut ittut misigilerukkit uummatikkut nuannaangaassannginnerpit?

[Qupp. 16-mi assiliartaq]

Naalagaaffimmik nuannaarutiginnittut allat neriuumminnik oqaluttuunnerisigut qiimmassartarpaat