Jehovamut qanittuaannarit
’Qasusuillusi qinugitsi.’ — RÛMAMIUT 12:12.
1. Qinuneq eqqarsaatigalugu Jehovap suna piumasaraa, tamatumunngalu atatillugu apustili Paulusip qanoq kajumissaarpaatigut?
JEHOVA Guutiuvoq kiffaminik neriuuteqartitsisoq. Tassaavoq ’qinnutinik tusartartoq’, taamaattumik neriuutigititaminik angusiniarnerminni ikioqqullutik qinnutaat tusarnaartarpai. (Rûmamiut 15:13; Tussiaat 65:3) Oqaatsini, Bibeli, aqqutigalugu kiffani tamaasa qaqugukkulluunniit imminut saaffiginnittarnissaannik kajumissaarpai. Piareersimaffigiuaannarpai uummammiuinillu tusarnaarumasarluni. ’Qasusuillutik qinusarnissaannik’ aamma ’kipisuitsumik qinusarnissaannik’ kajumissaarpai.a (Rûmamiut 12:12; 1 Tásalûníkamiut 5:17) Jehovap piumasaraa kristumiut tamarmik qinunikkut uummatimikkullu saaffigiuaannartassagaanni ernini asasani, Jesus Kristus, aqqutigalugu. — Juánase 14:6, 13, 14.
2, 3. (a) Sooq Paulusip ’qasusuilluta qinusarnissatsinnik’ kajumissaarpaatigut? (b) Sooq qularinngissinnaavarput qinusarnissarput Guutip kissaatigigaa?
2 Sooq Guutip taamatut kajumissaarpaatigut? Inuunermi tatineqarnerup pisussaaffiillu ima artorsissinnaatigimmatigut allaat qinunissarput puiortillugu. Imaluunniit ima amerlatigisunik ajornartorsiuteqalersinnaagatta allaat neriuutitsinni nuannaarunnaarluta immaqalu qinusarunnaarluta. Tamakkua eqqarsaatigalugit qinunissatsinnik Jehova Guutimullu, uagutsinnik neriuutissiisinnaasumut tuppallersaasinnaasumullu, qanittuararsuanngornissatsinnik kajumissisitsisunik eqqaasinneqartarnissarput pisariaqartipparput.
3 Ajoqersugaq Jakob ima allassimavoq: ’Guutimut palligunniaritsi, taava ilissinnut palligutissavoq.’ (Jâko 4:8) Aap, naak naammalluinnanngitsuugaluartugut Guuti ima qutsitsiginngilaq imaluunniit ungasitsiginngilaq tusarsinnaanata. (apustilit suliáinik agdlagkat 17:27) Aammattaaq suusupaginngilaatigut qanorli innerput soqutigalugu. Tussiaasiortoq ima oqarpoq: „[Jehovap] isaasa sammivigaat iluartut, ikioqqullutik nillianerat siutaasa tusartarpaat.“ (Tussiaat 34:16; 1 Pîtruse 3:12.
4. Jehovap qinnutinut qanoq tusarnaartarnera sumut assersuunneqarsinnaava?
4 Jehovap qinusarnissatsinnik kajumissaarpaatigut. Tamanna inunnut katerisimaartunut issiaqatigiillutillu oqaloqatigiittunut assersuunneqarsinnaavoq. Illittaaq najuupputit namminerlu oqalunngikkaluarlutit oqaaserineqartut tusarnaarlugit. Taavalu ilinnut saaffiginnittoqarpoq, aqqillu taariarlugu oqaluffigilerlutit. Maanna aatsaat iluamik tusarnaarnerulerputit. Taamatut Guutip kiffani sumiluunniit ikkaluartut soqutigiuaannarpai. (2 Israelikkut 16:9; Ussatit 15:3) Oqaatsivut tusarnaartarpai, soqutigaluta sernissorumallutalu. Guutilli aqqa qinunikkut torlorfigigaangatsigu tusarnaarluartarpaatigut oqaaserisavullu maluginiaqqissaarnerulertarlugit. Allaat inuit qinnutaat oqaatsikkut aninneqanngitsut uummatilli isumallu ilorpiaanniittut takusinnaallugillu paasisinnaavai. Guutip neriorsoqqissaarpaatigut ilumoorlutik aterminik torlorfiginnittut imminullu qanilliniartut tamaasa qanilliumaarlugit. — Tussiaat 145:18.
Guutip siunertani naapertorlugu qinnutivut akisarpai
5. (a) ’Qasusuilluta qinusarnissatsinnik’ oqaanneqarnerput qinnutitsinnut tunngasumik sumik ersersitsiva? (b) Guutip qanoq ililluni qinnutit akisarpai?
5 Qasusuilluta qinusarnissatinnik unnersuunneqaratta erserpoq immaqa qinnutitta aalajangersimasut ilaasa akinissaat Jehovap ilaannikkut utaqqisilaartassagaa. Immaqa allaat Guutimit iluarisaanissatsinnik ilumoortumillu tunniusimanermik ersersitsivigineqarnissatsinnik qinusarnivut qatsussinnaavavut, naak allaat misigigaluarluta pisariaqartilluinnarlutigik, akineqarnissarpullu utaqqiuartarlugu. Jehova Guutilli ilungersorluni qinnuigaatigut eqqarsaatinut taamaattunut nakkaannaqqunata qinujuaqqullutali. Pingaartitatsinnik taassumunnga saqqummiussisarnerput ingerlatiinnartariaqarparput, tatigalugu qinnutivut ataqqiumaarai pisariaqartitavivullu matussutissikkumaarai, immaqa ilimagisaraluatsinnit allaanerusumik. Qinnutivut Jehova Guutip qularnanngitsumik siunertani naapertorlugu eqqarsaatigeqqissaartarpai. Assersuutigalugu, qinnutigisatsinnit immaqa allat attorneqassapput. Erneq ataataminut cykelimik qinusoq assersuutigineqarsinnaavoq. Ataataasup nalunngilaa ernini taanna cykelimik pitsikkuniuk, ernini alla aamma piumalissasoq. Immaqa nukarleq cykelitaarnissaminut mikivallaarmat ataataasoq aalajangersinnaavoq angajulleq ingerlaannaq cykelitaartinniarnagu. Taamatuttaaq Ataatarput qilammiusoq aalajangersinnaavoq uagutsinnut inunnullu allanut ajunnginnerpaaq eqqarsaatigalugu, piffissaq siunertanilu eqqarsaatigiitigalugit. — Tussiaat 84:9, 12; naleqqiuguk Habakkuk 2:3.
6. Qinunermut tunngatillugu Jesus qanoq assersuusiorpa, qinunerlu eqqarsaatigalugu qasusuinneq sumik ersersitsiva?
6 Ajoqersukkami ’qasusuillutik qinuttuinnarnissaata’ pisariaqassusia ersersinniarlugu Jesusip assersuusiaa malugisariaqartuuvoq. Uillarnerup pisinnaatitaaffimminik pisinnaatinneqanngilluinnaraluartup eqqartuussisoq orneqattaarlugu kimigiiserfigiuaramiuk naggataatigut pisinnaatitaaffini pivaa. Jesusip oqaatsini ima ilavai: ’Guutilli qinikkani torlorfigisini innarlersinnaveersissannginnerpai (pisinnaatitaaffiinik tunissannginnerpai)?’ (Lúkarse 18:1-7) Qasusuilluta qinusarnitsigut ersertarpoq uppissuseqartugut Jehovamullu tatiginnittugut kiisalu taassumunnga qanimut attaveqarusuttugut, taassuma inerniliinissaa utaqqillugu. — Eprîarit 11:6.
Qanoq ilillutik Jehovamut qanittuaannarsimasut
7. Qanoq ililluta Abel uppissusiatigut malissinnaavarput Jehovamullu qanittuaannarluta?
7 Bibeli Guutip kiffaasa qinnutigisimasarpassuinik imaqarpoq. Tamakku ’allassimapput uatsinnut ilinniutissaallutik nerioqqulluta erinitsannata allakkallu tuppallersaatigalugit’. (Rûmamiut 15:4) Inuit ilaasa qanoq ilillutik Jehovamut qanittuaannarsimanerat qimerloorutsigu neriuuterput nakussatsissinnaavarput. Abelip Guuti akuerineqarsinnaasumik pilliuteqarfigisimavaa, naallu qinuneranik eqqaasaqartoqanngikkaluartoq qularnanngitsumik Jehova pilliutiminik ilassinninnissaanik qinnuigisimassavaa. Eprîarinut agdlagkat 11:4-mi ima allassimavoq: ’Uppernikkut Abelip pilliut Kainip pilliutaanit anneq Guutimut pilliutigaa, taassumuunalu iluartuuneragaalluni.’ Guutip neriorsuutaa Mosesimik allakkat siulliit 3:15-imiittoq Abelip nalunngilaa, uagulli ilisimasatsinnut naleqqiullugit ilisimasai killeqartorujussuusimapput. Ilisimasanili naapertorlugit Abel iliuuseqarsimavoq. Ullumikkuttaaq inoqarpoq Guuti pillugu sallusuissummik soqutiginnileqqammersunik taamaattumillu suli ilisimasaqarpallaanngitsunik. Qinusarpulli ilisimasatillu Abelitut sapinngisamik pitsaanerpaamik atorniarsaralugit. Uppernermikkut iliuuseqarput.
8. Qanoq ililluta qularinngissinnaavarput Abraham Jehovamut qanittuaannarsimasoq, tamannalu apeqqummik sumik pilersitsiva?
8 Guutip kiffaa aalajaatsoq alla tassa Abraham, ’uppertunut tamanut ataataalersimasoq’. (Rûmamiut 4:11) Ullumikkut aatsaat taama uppissusermik nukittuumik pisariaqartitsivugut, Abrahamitullu uppernikkut qinusariaqarluta. Taanna Mosesimik allakkat siulliit 12:8-mi oqaatigineqarpoq ’Jehovamut pilliiviliorsimasoq Jehovalu aqqagut torlorfigalugu’. Guutip aqqa Abrahamip nalunngilaa qinugaangamilu atortarlugu. Ilumoorluni qinujuartarsimavoq ’Jehovap naassaanngitsumik Guutiusup aqqa torlorfigisarlugu’. (1 Moses 13:4; 21:33) Abrahamip uppernikkut Guuti torlorfigisarsimavaa — uppernermigut tusaamasaassutigilikkamigut. (Eprîarit 11:17-19) Qinusarnini iluaqutigalugu Abrahamip Naalagaaffimmik neriuutiminik nuannaarutiginninnini attattuaannarsinnaasimavaa. Uaguttaaq Abrahamitut qasusuilluta qinusarpugut?
9. (a) Sooq Davidip qinnutai ullumikkut Guutip innuttaanut assut iluaqutaappat? (b) Davidip iliortarsimaneratut Jehovamut qanittuaannarumalluta qinusarutta qanoq pisoqassava?
9 Aammattaaq David qasusuilluni qinusarsimanermigut maligassaalluarpoq, tussiaasiaanilu ersersinneqarpoq qinnutip sunik imaqartariaqarnera. Assersuutigalugu, Guutip kiffai eqqortumik iliorlutik qinusinnaapput annaanneqarnissamik aniguisitaanissamilluunniit (Tussiaat 3:8, 9; 60:7), unnersuunneqarnissamik (Tussiaat 25:4, 5), sernissorneqarnissamik (Tussiaat 17:8), ajortinik isumakkeerfigineqarnissamik (Tussiaat 25:7, 11, 18) minguitsumillu uummateqarnissamik (Tussiaat 51:12). David nikallungatilluni ima qinusimavoq: „Kiffat tipaatsutsiguk.“ (Tussiaat 86:4) Uaguttaaq uummatitsigut nuannaarnissamik qinusinnaavugut, nalunnginnatsigu Jehovap kissaatigigaa neriuutitsinni nuannaassasugut. David Jehovamut qanittuaannarsimavoq imalu qinusimalluni: „Ataniarfigaakkit, najummivaangalu talerpippit.“ (Tussiaat 63:9) Uaguttaaq Daviditut Jehovamut qanittuaannarpugut? Taamaappat nikallujuitsissavaatigut.
10. Tussiaasiortoq Asaf ilaanni kukkusumik qanoq eqqarsalersimagaluarpa, naggataatigullu suna paasilerpaa?
10 Jehovamut qanittuaannassagutta ajortut isumakuluuteqarpasigatik pigisanillu pingaartitsingaarlutik inooriaasiatigut sinngaginaveersaartariaqarpavut. Tussiaasiortoq Asaf ilaanni misigisimavoq Jehovamut kiffartorneq iluaqutaanngitsoq, ajortut „isumakuluuteqanngittuaannarlutik“ inuummata. Paasivaali eqqarsaatini tamanna kukkusuusoq ajortullu aqqummi ’quasartumiittut’. Paasivaa Jehovamut qanimut attaveqarnermit pitsaanerusoqanngitsoq, qinnutiminilu Guutimut oqarsimavoq: „Maannali ilinniittuaannarpunga, tasiorparma talerpinnik. Takuat, ilinnik tunussisut nungussapput, . . . Kisianni Guuti qanillugu inuuneq tassa pilluarnartora. Qimarravigaara [Jehova] suliai tamaasa oqaluttuarisinnaaniassagakkit.“ (Tussiaat 73:12, 13, 18, 23, 27, 28) Ajortut neriuuteqanngitsut isumakuluuteqarpasigatik inooriaasiatigut sinngaginissaannut taarsiullugu, Asafitut Jehovamut qanittuaannarniartariaqarpugut.
11. Jehovamut qanittuaannarnermut atatillugu Daniel qanoq maligassiuisimava, qanorlu ililluta tamatumuuna malissinnaavarput?
11 Danielip qasusuilluni qinusarnissani aalajangiusimajuaannarsimavaa, naak qinunerup killilersorneqarnera pissutigalugu løvit inaannut iginneqarnerminik kinguneqarsinnaagaluartoq. Jehovalli „inngilini aallartigu løvet qarni matuai“ Danielilu aniguisillugu. (Daniel 6:7-10, 23, 28) Danielip qasusuilluni qinusarnini pissutigalugu akissarsisinneqangaarpoq. Uaguttaaq qasusuilluta qinusarpugut, ingammik oqaluussinitsinni assortorneqaraangatta?
Jesus — maligassarput
12. (a) Jesus kiffartornermi aallartilaarnerani qinuneq eqqarsaatigalugu qanoq maligassiuiva, tamannalu kristumiunut qanoq iluaqutaasinnaava? (b) Jesusip qinunermut najoqqutassiaa qinunermut tunngasumik sumik ersersitsiva?
12 Nunami kiffartornini aallartikkamiulli Jesusip qinuneq atortoriuarsimavaa. Kuisinnermini qinorpasissumik pissuseqarnera ullumikkut kuisittunut maligassaalluarpoq. (Lúkarse 3:21, 22) Kuisinnerup assersuutaata naammassiniarnerani Guutimut qinulluni ikioqqusoqarsinnaavoq. Aammattaaq Jesusip allat Jehovamut qinunikkut saaffiginninnissaannik ikiortarsimavai. Ilaanni Jesus qinoreermat ajoqersugaasa ilaata oqarfigaa: ’Naalagaq, ajoqersortigut qanoq qinussasugut.’ Taava Jesusip qinunissamut najoqqutassamik taaneqarsinnaasoq saqqummiuppaa, ersersillugu Guutip aqqa siunertaalu pingaarnerpaatinneqartariaqartut. (Lúkarse 11:1-4) Qinnutivut oqimaaqatigiissaartariaqarpavut, ’pingaarnerusut’ qaangiinnarnaveersaartariaqarlutik. (Filípimiut 1:9, 10, NV) Soorunami ilaannikkut qinnutit pisariaqartitarpianut ajornartorsiutigisanullu tunngasinnaapput. Kristumiut Jesusitut iliorlutik arlaannik suliassaminnik naammassinninniarnerminni imaluunniit misilinneqarnerminni navianartorsiornerminnilu nakussatseqqullutik Guuti qinunikkut saaffigisarsinnaavaat. (Matîuse 26:36-44) Nammineq qinnutitsinni inuunitsinnut attuumassuteqartut suulluunniit annerusutigut eqqaasarsinnaavavut.
13. Jesusip qanoq ililluni takutippaa allanut qinnussisarnissaq qanoq pingaaruteqartigisoq, tamannalu qinnutitsinnut iluaqutaasumik qanoq sunniuttarpa?
13 Maligassiamigut pitsaasukkut Jesusip ersersippaa inunnik allanik qinnussinissaq qanoq pingaaruteqartigisoq. Nalunngilaa ajoqersukkani immisut uumissorneqarlutillu malersorneqarumaartut. (Juánase 15:18:-20; 1 Pîtruse 5:9) Taamaattumik Guuti qinnuigaa ’ajortumut sernigeqqullugit’. (Juánase 17:9, 11, 15, 20) Nalunnginnamiullu Peter qanoq misilinneqarumaartoq, ima oqarfigaa: ’Qinnuppakkit uppersutsit soraaqqunagu.’ (Lúkarse 22:32) Aammattaaq pitsaassaaq qatanngutitta qasusuilluta qinnuttarnissaat namminiinnarlu ajornartorsiutta soqutigisattalu eqqarsaatigisannginnissaat! — Filípimiut 2:4; Kulorsamiut 1:9, 10.
14. Qanoq ililluta nalunngilarput Jesus nunami kiffartornini tamaat Jehovamut qanittuaannarsimasoq, qanorlu ililluta tassuuna malissinnaavarput?
14 Jesus kiffartornini tamaat qasusuilluni qinusarsimavoq Jehovamullu qanittuararsuarmik attaveqartuaannarsimalluni. (Eprîarit 5:7-10) apustilit suliáinik agdlagkat 2:25-28-mi apustili Paulusip Tussiaat 16:8 issuaaffigaa allassimaffillu taanna Naalagaq Jesus Kristusimut atorlugu: ’Davidip ima oqaatigimmagu: „Jehova isima saanniitittuinnarpara, talerpimma sanianiimmat aalaqqunanga.“’ Uaguttaaq taamaaliorsinnaavugut. Najoqqulluta Guuti qinnuigisinnaavarput, Jehovamillu tatiginninnerput ersersissinnaavarput taassuma isitta saanniitittuaannarneratigut, eqqarsaatigiuaannarneratigut. (Naleqqiuguk Tussiaat 110:5; Jesaja 41:10, 13.) Tamatuma ajornartorsiuterpassuarnik pinngitsoortissavaatigut, Jehovap ikiussammatigut aalajaakkunnaaqqunata.
15. (a) Ingammik sumut atatillugu qinunikkut qasusuittariaqarpugut? (b) Qujamasunnitsinnut atatillugu suna eqqumaffigisariaqarparput?
15 Puiunngisaannartigulu Jehovap uagutsinnut ajunngitsuliornerinik tamanik qutsaviginissaa, ’saammaanneranik angingaartumik’, ernerminik ajortitsinnik utertitsissutissatut tunniussisimaneranik. (2 Korintumiut 9:14, 15; Mákorse 10:45; Juánase 3:16; Rûmamiut 8:32; 1 Juánase 4:9, 10) Tamatigut ’Naalakkatta Jesus Kristusip aqqani tamaasa Guutimut Ataatamut qujassutigisaannartigik’. (Evfisumiut 5:9, 20; Kulorsamiut 4:2; 1 Tásalûníkamiut 5:18) Qujamasunnitta millinnginnissaa sianigisariaqarparput, namminermi ajornartorsiutitta sammivallaarnerisigut imaluunniit piginngisatta eqqarsaatigivallaarnerisigut tamanna pisinnaammat.
Nanertuutigisatit Jehovamut tunniutikkit
16. Isumakuluuteqaraangatta qanoq iliortariaqarpugut?
16 Qasusuilluta qinusarnerput ilaatigut tunniusimanitsinnik ersersitsivoq. Guutimut qinusarnerput uagutsinnut ajunngitsumik sunniuteqartarpoq, qinnutivullu suli akinngikkai tamanna malugereertarparput. Arlaannik isumakuluuteqarutta unnersuussutip matuma maleruarneratigut Jehovamut qanissinnaavugut: „Nanertuutigisat [Jehovamut] tunniuguk, taava isumagiumaarpaatit.“ (Tussiaat 55:23) Nanertuutigisatta tamaasa — isumakuluutitta pakatsissutittalu, siooragisatta ilaallu ilanngullugit — Guutimut tunniunnerisigut, taassuminngalu tunaartarinnilluinnarnitsigut, isumakkut eqqississaagut, ’eqqissinermik Guutip pianik sianinernit tamanit annerungaartumik’. — Filípimiut 4:4, 7; Tussiaat 68:20; Mákorse 11:24; 1 Pîtruse 5:7.
17. Eqqissineq Guutip pia qanoq ililluta pisinnaavarput?
17 Eqqissineq Guutimeersoq tamanna ingerlaannaq takkuttarpa? Immaqa ingerlaannaq misigikannertarparput, tamatumanili aamma anersaaq illernartumik qinunissaq pillugu Jesusip oqaasii atuupput: „Qinujuaritsi, tunineqassaasi taava; ujarlertuaritsi, nanisissaasi taava; kasuttortuaritsi, mappiunneqassaasi taava.“ (Lúkarse 11:9-13, NV) Isumakuluutivut tamaasa peersinnaassagutsigik anersaaq illernartoq pisariaqartikkatsigu, eqqissinerup Guutip pia nanertuutigisatsinnillu nammanniarnitsinni taassuma ikiuinissaa qinnutigiuartariaqarpavut. Qularutigissanngilarput qasusuilluta qinusarutta isumakkut eqqissineq angussallugu.
18. Pissutsit aalajangersimasut atorneranni qanoq qinunissarput nalornisigigaangatsigu Jehova uagutsinnut qanoq iliortarpa?
18 Sunami qinnutigissallugu nalornigutta? Pissutsit atukkatta paasilluarsimannginnerat pissutigalugu, imaluunniit Jehovamut qanoq oqassalluta nalornissutigigatsigu, qanoq misiginerput ilaannikkut oqaatigiuminaatsittarparput. Taama pisoqartillugu anersaaq illernartoq sinnerluta sassarsinnaavoq. Paulus ima allassimavoq: ’Qinnutigisassatsinnik iluassasunik nalugatta; kisianni anersaap nammineq anersaamisarnernik taassaanngitsunik illersoraraatigut.’ (Rûmamiut 8:26) Qanoq ililluni? Aap, Guutip oqaasii siulittuutinik qinnutinillu isumassarsiarititaasunik pissutsinut atukkatsinnut naleqquttunik imaqarput, oqarsinnaavugullu taakku Jehovap uagutsinnut tunngatikkai. Qinnutiginiagaraluavut oqaasertassaqartinngisavulli akuerisarpai eqquutitittarlugillu.
Qinnutit neriuullu ataavartussat
19. Sooq neriuutip qinunerullu immikkut pisinnaatitaaffigititaat soraanngisaannassava?
19 Ataatatsinnut qilammiusumut naassaanngitsussamut qinusoqartuartassaaq, ingammik silarsuassamik nutaamik pilluaqqussutissartaanillu qujaniutinik. (Jesaja 65:24; sarĸúmersitat 21:5) Neriuutitsinnilu nuannaartuaannarsinnaassaagut, neriuummi arlaatigut naassaanngitsussamut atassaaq. (Naleqqiuguk Korintumiunut agdlagkat sujugdlît 13:13.) Ulloq nunarsuarmut atatillugu qasuersaarfigisani naappat Jehova nutaanik sunik pilersitaqarumaarnersoq takorloorsinnaanngilarput. (1 Moses 2:2, 3) Naassaanngitsussamut innuttaminut asannittumik tupaallaatissaqartitsiuaannassaaq, piumasaanillu iliornermut atatillugu siunissami angingaartunik pisussaqassaaq.
20. Suna aalajangiusimasariaqarparput, sooq?
20 Taamatut pissangartumik neriuuteqarluta, qanortoq tamatta qasusuilluta qinusarnitsigut Jehovamut qanittuaannarta. Qanortoq Ataatarput qilammiusoq uagutsinnut iliuuserisimasaanik tamanik qujaniarfigiunnaanngisaannartigu. Piffissaq nallerpat ilimagisatta piviusunngornerat takullugu nuannaarutigisinnaassavarput — ima annertutigisumik allaat paasinnissinnaassuserput qaangerujussuarlugu, Jehovami ’qinnutigisavut sianigisavullu tamaasa akimungaarlugit iliorsinnaavoq’. (Evfisumiut 3:20) Taamaattumik Jehova Guuterput, ’qinnutinik tusartoq’, naassaanngitsussamut unnersiutigalugulu nersorlugulu qutsavigiuaannartigu! (wD 15/12 91)
[Quppernerup ataani ilanngussaq]
a Oqaatsinik ujarlerfissiami Webster’s New Dictionary of Synonyms-imi kipisuissuseq tamatigungajak tassaanerarneqartarpoq „piginnaassuseq nersornartoq; tamatuma ilagaa ajorsartitaanermik, qularnermik ajornartorsiornermillu nikalluussiumanngissuseq, anguniagaqarnermili imaluunniit pilersaarummik naammassinninniarnermi aalajaalluinnarluni kipisuitsumik ilungersorneq“.
Apeqqutit uteqqiissutissat
□ Sooq qasusuilluta qinusassaagut?
□ Guutip kiffai kristumiussuseq sioqqullugu inuusimasut qinunermik qanoq ilinniarfigaavut?
□ Jesusip maligassiaata qinuneq pillugu qanoq ilinniartippaatigut?
□ Qanoq ililluta nanertuutigisavut tamaasa Jehovamut tunniussinnaavavut, qanorlu kinguneqassava?
[Qupp. 23-mi assiliartaq]
Daniel løvet inaannut iginneqarnissamik sioorasaarneqaraluarluni qasusuilluni qinusarsimavoq