„Kristusip Guutiussusia“ — Biibilimi qanoq oqaatigineqarpa?

JESUS KRISTUS upperisarsiornikkut inuiannut assut sunniuteqarsimavoq. Inuit millionilippassuit taassumunnga ajoqersugaanerarput. Kinaassusiali inuppassuit assigiinngitsunik isumaqarfigaat.

Jesusip ajoqersuutaanik tapersersuisut ilaat oqartarput Guutip ernerigaa tassaananilu Pinngortitsisoq nammineq. Allat „Kristusip Guutiussusia“ upperaat isumaqarlutillu nammineq Guutiusoq. Oqartarput Jesus piujuaannarsimasoq nunamiikkallaramilu inuinnaasimanngitsoq. Ilumoorpa? Biibilimi qanoq oqaatigineqarpa?

Jesusip inuttut inuunngikkallarami piusimanera

Jesusip inuttut nunami inuunngikkallarami piusimanini uppernarsarsimavaa, ima oqarluni: ’Alla qilammut pavunnassanngilaq, qilammit aqqartoq kisimi, tassa Inuup Ernera qilammiusoq.’ (Juánase 3:13) Aamma oqarsimavoq: ’Uangaana neqissaq uumasoq qilammit aqqartoq; neqissamit tamatumannga nerisoq naassaanngitsumik inuussavoq, neqissarlu tunniussassara tassa uiniga, silamiut inuutissallugit tunniussassara.’ — Juánase 6:51.

Jesusip nunamukanngikkallarami piusimanera oqaasiatigut ersarilluarpoq: ’Abraham pinngunngikkallarmat uanga ippunga.’ (Juánase 8:58) Abraham 2018-imiit 1843-mut u.n.s. inuusimavoq, Jesusilu ukioq 2-miit u.n.s. 33-mut u.n.k. nunami inuusimalluni. Toqunini sioqqutitsiarlugu Jesus ima qinusimavoq: ’Maannalu, Ataataraa, ilinni naalannarsisinnga naalannassutsinnik silarsuaqanngikkallarmat ilinni pigisannik.’ — Juánase 17:5.

Jesusip ajoqersugai aamma taama oqarsimapput. Apustili Johannes ima allassimavoq: ’Pileqqaarneranni Oqaaseq ippoq, oqaaserlu Guutimiippoq, oqaaserlu guutiuvoq. Suut tamarmik taassumuuna pinngorput; taassumuuna pinngitsumik pinngortut ataatsimilluunniit pinngortoqanngillat. . . . Oqaaserlu uininngorpoq akornatsinniilerlunilu, takuarpullu naalannassusia soorlu ernituap ataataminit naalannassuserisaa, saammaannermik sallusuissummillu ilumioqangaartoq.’ (Juánase 1:1, (NV) 3, 14) Aap, ’Oqaaseq uininngorsimavoq’ inuttut Jesus Kristusitut.

Jesusip nunami inuunngikkallarami piusimanera apustilip Paulusip ima allaatigaa: ’Ima isumaqaritsi soorlu Kristus Jesus; Guutip taattua taassuma pigigaluaramiuk Guutisut issutsi paggatigisatut [nammineq pissarinngisamik piniarneq] isumaqartinngilaa, pissutsili iperarpaa kiffap taattua atillugu inuillu assigilerlugit.’ (Filípimiut 2:5-7) Paulusip Jesus taasimavaa ’pinngortitat tamarmik siornatigut erniusoq, taassumuuna suut tamarmik pinngortitaasut’. — Kulorsamiut 1:13-16.

Guutiunngitsoq nunamiissimavoq

Biibilimi ersarissumik takutinneqarpoq Jesus erniunerminit toqunini tikivillugu inuiusimasoq. Johannes allassimanngilaq Oqaaseq uiniliinnarsimasoq. ’Uininngorsimavorli’, imaanngitsoq affaannarmik uiniulluni affaannarmillu Guutiulluni. Jesus ataatsikkut Guutiullunilu inuusimagaluaruni oqaatigineqarsinnaasimanavianngikkaluarpoq ’inngilinit minnerutitaallatsiaraluarsimasoq’. — Eprîarit 2:9; Tussiaat 8:5, 6.

Jesus nunamiitilluni ataatsikkut Guutiullunilu inuusimaguni sooq taava arlaleriaqaluni Jehovamut qinusarsimassava? Paulus ima allassimavoq: ’Taanna uineqarnermini nillingaarluni qullilillunilu qinnutinik kutsiuutinillu aatsigami issumunnga toqumit annaassisigisinnaasaminut, qussalanerminilu tusarneqarami.’ — Eprîarit 5:7.

Peterip oqaasiatigut, Jesus ’uinikkut toqutaagaluarluni anersaakkut uummartitaasimasoq’, erserserpoq Jesus nunamiikkami tassaasimanngitsoq affaannarmik anersaaq affaannarmillu inuk. (1 Pîtruse 3:18) Jesus nunamiikkami tamakkiisumik inuiusimavoq. Taamaakkamimi aatsaat inuit naammalluinnanngitsut ajornartorsiutaat ilisimaarilersinnaalersimavai kingornalu palasiuninngorsinnaasimalluni taakkununnga misiginneqataasoq. Paulus ima allassimavoq: ’Qajannarsutsitsinnimmi naakkinnissinnaanngitsumik palasiuneqanngilagut, kisianni tamatigut uatsitut usserneqartumik, ajorteqarnanili.’ — Eprîarit 4:15.

Jesus, ’Guutip savaaraa silamiut ajortaannik ersuttoq’, ’imminut tunniussimavoq tamarmik utertitaassutissaannik’. (Juánase 1:29; 1 Timûtiuse 2:6) Adamip annaasimasaatorluinnaq ittoq taamaalilluni Jesusip imminut akigaluni utertissinnaasimavaa — inuup naassaanngitsumik inuunera naammalluinnartoq. Guutip naapertuilluassusia piumasaqarmat „inuuneq naleqartinneqassasoq inuunermik“ Jesus pinngitsoorani Adamip aallaqqaammut issimaneratut ittariaqarsimavoq — tassa inuk naammalluinnartoq, tassaanngitsoq ataatsikkut Guutiullunilu inuk. — 5 Moses 19:21; 1 Korintumiut 15:22.

Allassimaffiit ingasattajaartumik nassuiarnagit

Jesusimik ataatsikkut Guutiullunilu inuuneraasut allassimaffiit assigiinngitsut innersuussutigisarpaat „uppernarsaatiginiarlugit“ Jesus tassaasoq kristumiuunerartut ataasiullunilu pingasuusumik upperisaata ilaa Guutitullu illuinnartoq, pissaanermigut, naalannassutsimigut naassaanngissutsimigullu Guuti naligilluinnarlugu. Allassimaffiilli tamakku misissoqqissaaraanni paasinartarpoq „Kristusip Guutiussusianik“ tapersersuisunit allassimasut sipporlugit nassuiarniarneqartartut.

Allassimaffiit ilaanni Guutip oqaluut ’uagut’ atorsimavaa, tamannalu inuit ilaasa Jesusip inuttut inuunngikkallarami (Oqaatsip) Jehovallu naligiilluinnarsimanerannut uppernarsaatitut atorniartarpaat. Guutili oqaluummik tamatuminnga atuimmat imaattariaqanngilaq naligisaminut oqaluttoq. Imaaginnarporli Guutip pinngortitaasa qilammiittut ilaat ataaseq immikkut ittumik inissisimaffeqartitaasoq. Jesus nunamut pinngikkallarami Guutimut qanimut suleqataasimavoq, sulillaqqissorsuutitaasimalluni oqaaseqartartuusimallunilu. — 1 Moses 1:26; 11:7; Ussatit 8:30, 31; Juánase 1:3.

Jesusip kuisinnerani pisimasutigut ersersinneqanngilaq Guuti, Jesus anersaarlu illernartoq tamarmik naligiittut. Jesus inuttut kuisippoq Ataataminut qilammiusumut imminut sassaassimanini takussutissinniarlugu. Oqaatigineqarpoq taamani ’qilak ammarsimasoq’ Guutillu anersaava tuitut illuni Jesusip qulaanut pisimasoq. Jehovap nipaa ’qilammit’ tutsiussimavoq oqartoq: ’Tassa ernera asanartoq nuannarisara.’ — Matîuse 3:13-17.

Jesusip ajoqersukkani inunnik ’Ataatap Ernerullu anersaallu illernartup aqqani’ kuisisarnissaannik peqqugamigit qanoq isumaqarpa? (Matîuse 28:19, 20) Jesus oqanngilaq isumaqarnaniluunniit nammineq, Ataatani anersaarlu illernartoq tamarmik naligiillutik. Kuisittut Jehova Inuunermik Tunisisutut Guutitullu ajugaqanngitsutut, inuunerminnik tunniulluinnarfigisamittut, akueraat. Jesus Messiasitut, inuit uppertut pillugit Guutip utertitsissutissatut pilliisitaatut, akueraat. Aammalu akueraat anersaaq illernartoq tassaasoq Guutip pissaanera iliuuseqartittagaq naalatsigitiffigisariaqagartik. Kuisittulli Jehova, Jesus anersaarlu illernartoq guutiussuseqartutut ataasiullunilu pingasuusutut isiginngilaat.

Jesusimmi tupinnartuliarisimasai taassuma ataatsikkut Guutiullunilu inuuneranut uppernarsaataanngillat? Aap, uppernarsaataanngillat, aammami Moses, Elias, Elisa, apustilit Peter Paulusilu allallu tupinnartuliortarsimapput. (2 Moses 14:15-31; 1 Kunngit 18:18-40; 2 Kunngit 4:17-37; apustilit suliait 9:36-42; 19:11, 12) Jesus taakkunatulli tassaasimavoq inuk Guutip pissaanera ikiortigalugu tupinnartuliortarsimasoq. — Lúkarse 11:14-19.

Esajasip Jesus siulittuutaasumik taasimavaa „Guuti Pissarsuaq“. (Jesaja 9:6) Jesaja 10:21-mi pruffiitip taassuma Jehova aamma taasimavaa ’Guuti pissarsuaq’. Taaguutit taakkua assigiinnerat inuit ilaasa Jesusip Guutiuneranut uppernarsaatiginiartarpaat. Versilli taakku ilaartunnginnissaat sianigisariaqarparput. Oqariaaseq hebriiarisooq „Guuti Pissarsuaq“-mik nutserneqarsimasoq Jehovamuinnaanngitsoq atorneqarsimavoq, oqariaaserli „Guuti ajugaqanngitsoq“ Jehovamuinnaq atorneqarsimalluni. (1 Moses 17:1) Pissarsuuneq ajugaqanngitsuunerlu assigiinngissuteqarluinnarput; ajugaqanngitsormi allamit qaangersimaneqanngilaq.

Jesaja 43:10-mi Jehova ima oqarsimavoq: „Uanga siunikkut Guutimik pinngortoqanngilaq kingunikkullu pinngortussaqarani.“ Oqaatsilli taakkua uppernarsanngilaat Jesus tassaasoq Guuti. Imaapporli Jehova siuleqanngitsoq, taanna sioqqullugu guutimik piusoqarsimanngitsoq, naassaanngitsuummammi. Jehovap kingornatigut guuteqarnavianngilaq, piujuaannassammat Kisimilu Oqartussaasutut qutsinnerpaatut kingoraarneqarnaviarani. Jehovalli allat guutitut taasani pinngortissimavai, Biibilimilu tamanna ersersinneqarpoq, inuit ilaat pillugit ima allassimagami: „Nammineq oqarsimavunga: ’Ilissi guutiuvusi, tamassi Guutip qutsinnerussaartup erneraasi. Taamaattoq inuttut toqussaasi naalagaanerillu ilaattut orlussallusi!’“ (Tussiaat 82:6, 7) Aamma Oqaatsimik taaneqartoq ’guutiusimavoq’, Jehovamit pinngortitaq; Jesusili Guutimut ajugaqanngitsumut naligitillugu eqqaaneqanngisaannarsimavoq.

Jesusip inissisimaffivia

Inuit oqartartut Jehova Guutiullunilu ataatsikkut inuulluni nunamut pisimasoq malugisariaqarpaat Biibilimi nassaassaqanngimmat Jesusip imminut Guutitut isigineranut. Amerlasuutigulli takussutissaqarpoq Jesusip Ataatami ataani inissisimasutut imminut isigineranut. Jesus nunamiikkallarami oqartarsimavoq Guutip ernerigaani, imalu toqqaannartumik oqarsimalluni: ’Ataataq uannit anneruvoq.’ — Juánase 14:28.

Jehovap Jesusillu immikkuussusiat Paulusip ima ersersippaa: ’Uagut ataasiinnaq Guutigaarput, tassa Ataataq, taassumannga suut tamarmik ipput, uagullu taassumunnga illuta. Ataasiinnarlu naalagaraarput, tassa Jesus Kristus, taassumuuna suut tamarmik ipput, uagullu taassumuuna illuta.’ (1 Korintumiut 8:6) Paulus aamma ima oqarsimavoq: ’Ilissi Kristusip pigaasi, Kristusilu Guutip pigaa.’ (1 Korintumiut 3:23) Aap, soorlu kristumiut naalagaata, Jesus Kristusip, pigigai taanna Niaquata, Jehova Guutip, pigaa.

Paulusip tamanna uppernarsarpaa ima allalluni: ’angutip kialuunniit Kristus niaqoraa, arnallu angut niaqoraa, Kristusillu Guuti niaqoraa.’ (1 Korintumiut 11:3) Guutip Kristusillu taamatut attaveqarnerat atajuassaaq, ukiummi tuusintit naalakkersuiffissat naappata Jesusip ’naalagaaffik Guutimut Ataatamut pisissavaa’, taavalu ’erneq nammineq naalatsigitissaaq tamanik imminut naalatsigititsisumut, Guuti tamani tamarsooqqullugu’. — 1 Korintumiut 15:24, 28; sarĸúmersitat 20:6.

Allassimaffiit allat

Jesusip inunngornera pillugu Mattæus ima allassimavoq: ’Tamanna tamarmi taamaalivoq, Jehovap pruffiitikkut oqaaserisaa eqqooqqullugu, [Jesaja 7:14-imi] oqarmat: „Ata, niviarsiaq naartulissavoq ernertaarumaarlunilu, taanna atsissavaat Immanuelimik,“ nutserlugu imaappoq: „Guutip ilagaatigut (NV)“.’ (Matîuse 1:22, 23) Jesusip Immanuel taaguutigilinngilaa, inuttulli inuunermini aqqip isumaa imminut eqquutsissimallugu. Jesusip Messiasitut kinguaassatut Davidillu issiavissaarsuanik kingornussisussatut nunamiissimanera Guutip imminnik ilaginninneranut suliaminnillu tapersersuineranut Jehovap kiffaasa takussutissatut isigaat. — 1 Moses 28:15; 2 Moses 3:11, 12; Josua 1:5, 9; Tussiaat 46:6-8; Jeremia 1:19.

Jesus makissimasoq saaffigiitigalugu apustili Thomas ima nillersimavoq: ’Naalagara Guutiga!’ (Juánase 20:28) Tamanna allallu ’allassimapput uppeqqulluta Jesus taannaasoq Kristus Guutip ernera’. Jesusillu ajoqersukkaminut oqaasia manna Thomasip akerlilersimanngilaa: ’Guutinnut Guutissinnullu pavunnalerpunga.’ (Juánase 20:17, 30, 31) Tassa Thomasip upperisarisimanngilaa Jesus tassaasoq Guuti ajugaqanngitsoq. Immaqa Thomasip Jesus ’Guutiga’-mik taasimavaa ’guutiummat’, naak tassaanngikkaluarluni ’kisimi ilumut Guutiusoq’. (Juánase 1:1; 17:1-3) Imaluunniit immaqa oqarnermigut ’Guutiga’ Thomasip akueraa Jesus tassaasoq Guutip oqaaseqartittagaa aallartitaalu, soorlu Guutip inngilii oqariartortitaalu allat Jehovamik taaneqartarsimasut. — Naleqqiutikkit Mosesimik allakkat siulliit 18:1-5, 22-33; 31:11-13; 32:24-30; Eqqartuussisunik allakkat 2:1-5; 6:11-15; 13:20-22.

Tassa Biibili naapertorlugu Jesus inuttut nunami inuunngikkallarami Oqaatsitut piusimavoq. Nunamiikkamili tassaasimanngilaq Guutiullunilu ataatsikkut inuk. Inuiusimavoq, Adamip aallaqqaammut issimaneratut naammalluinnartuulluni. Makinnermi kingorna Jesus tassaalersimavoq anersaaq toqujuitsoq qutsitsisitaq, tamatigulli Guutip ataani inissisimaffilik. Taamaattumik ’Kristusip Guutiussusianik’ eqqarsaat Biibilimi tapersersorneqanngilaq. (wD 15/1 92)

[Qupp. 31-mi ungalusaq]

Inngilit Jesus pallorfigisaraat?

Eprîarinut agdlagkat 1:6-imi Biibilimi kalaallisuunngortitami atortussaatitaasumi ima allassimavoq: ’Guutip inngiliisa tamarmik [Jesus] pallorfigissavaat.’ Apustilip Paulusip qularnanngitsumik Septuaginta-nutsikkamit Tussiaat 97:7 imaattoq issuarsimavaa: „[Guuti] pallorfigisiuk, inngilii tamassi.“ — C. Thomson.

Oqaaseq griikerisooq proskyneʹō Eprîarinut agdlagkat 1:6-imi ’pallorfigaa’-mik nutserneqarsimasoq Tussiaat 97:7-imi nutsikkami Septuaginta-mi oqaaseq hebriiarisooq sjachahʹ isumaqartoq ’sikiffigaa’, aamma ’pallorfigaa’-mik nutserneqarsimavoq. Sikiffiginninneq inunnik ataqqinninnermik ersersitsissutitut naleqquttuusinnaasarpoq. (1 Moses 23:7; 1 Samuel 24:8; 2 Kunngit 2:15) Imaluunniit Guutimut ilumoortumut guutinulluunniit ilumuunngitsunut pallorfiginninniutitut atorneqarsinnaasarpoq. — 2 Moses 23:24; 24:1; 34:14; 5 Moses 8:19.

Proskyneʹō Jesusimut tutsinneqartoq taavalu kunnginut allanullu ataqqinnippalulluni iliuusiusartoq assigiipput. (Matîuse 2:2, 8; 8:2; 9:18; 15:25; 20:20 naleqqiutikkit Samuelimik allakkat siulliit 25:23, 24-mut; Samuelimik allakkat aappaat 14:4-7-mut; Kunnginik allakkat siulliit 1:16; Kunnginik allakkat aappaat 4:36, 37-mut.) Amerlasuutigut ersarittarpoq Jesus Guutituunngitsoq ataqqineqartartoq kisianni ’Guutip erneratut’ imaluunniit ’Inuup Erneratut’ Messiasiusutut’. — Matîuse 14:32, 33; Lúkarse 24:50-52; Juánase 9:35, 38.

Eprîarinut agdlagkat 1:6-imi erserpoq Jesus Guutip ataani inissisimaffeqartoq. (Filípimiut 2:9-11) Oqaaseq proskyneʹō nutsikkat ilaanni „nersorpaa“-mik (The New English Bible), „ataqqinnilluni sikiffigaa“-mik (Ny Verden-nutsigaq), imaluunniit „seeqqumiarfigaa“-mik (Konstantin-Hansen) nutserneqarsimavoq. „Pallorfigaa“-mik nutserneqarsimanera atorusunneqarneruppat taava isumaa killeqartariaqassaaq, Jesusimi Satanimut ima oqarsimavoq: ’Jehova Guutit pallorfigissavat [proskyneʹō-mik nagguilik] kiffartuullugulu taanna kisiat.’ — Matîuse 4:8-10.

Naak Tussiaat 97:7 Guutip pallorfigineqarnissaanik eqqartuisoq Eprîarinut agdlagkat 1:6-imi Jesusimut atorneqaraluartoq taamaattoq Paulusip ersersissimavaa Jesus makissimasoq tassaasoq Guutip ’naalannassusiata akisunnera qanoq-issusiatalu ersinnera’. (Eprîarit 1:1-3) Taamaattumik „pallorfiginninneq“ inngilit Guutip erneranut tutsitaat annerpaajunngilaq Jehovalu aqqutigalugu aatsaat tutsinneqartussaalluni.