Sapaatip-akunnera silarsuarmik allanngortitsisoq
’Pilluarli Jehovap aqqani tikiuttoq!’ — MATÎUSE 21:9.
1. Siorna augustimi pisunit kikkut attorneqarsimappat?
„ULLUT PINGASUT ISUMAKKUT AALATERNEQARNARTUT SILARSUARMIK AALASSATSITSISUT.“ Augustimi 1991-imi qulequttat taamatut ittut erseqqissarpaat ullualunnguit ingerlanerinnaanni silarsuaq allanngortilluinnarneqarsinnaasoq. Augustip ullui kingulliit assut pisimasoqarfiusimapput, silarsuaq tamaat eqqarsaatigalugu inuillu eqimattat Jesusip ima oqaatigisai eqqarsaatigalugit: ’Silarsuup inuisa ilaginngilaat.’ Inuit eqimattat taakku ullumikkut Jehovap Nalunaajaasuisut ilisimaneqarput. — Juánase 17:16.
2, 3. (a) Naak sorsuunnissaq aarlerinaraluartoq qanoq ililluni kiffaanngissuseq Zagrebimi pingaarnerutillugu sammineqarpa? (b) Upperluarneq qanoq ililluni Odessami kinguneqarluarpa?
2 Jehovap Nalunaajaasuisa Jugoslaviami ataatsimeersuarnerat inuit nunanit tamalaaneersut peqataaffigisaat pilersaarutit malillugit augustip 16-ianiit 18-ia ilanngullugu ingerlanneqartussaasimavoq. Paasinarsisimavorlu Jehovap innuttaasa ataatsimeersuarnerat tamanna nunami imminnut sorsuuteqqajaasunik inulimmi ataatsimeersuarnerit siullersarigaat. Jehovap nalunaajaasuisa tamaani najugaqartut, kajumissutsiminnik suleqataasut nunami sanilerisaminneersut ilagalugit, qaammatini marlunni Dynamop arsaattarfissua Zagrebimiittoq annertuumik iluarsartuussimavaat nutaarsuartut isikkoqalersillugu. Taamaalillutik ataatsimeersuarnerup qulequtaanut, „Kiffaanngissutsip Guutimeersup ikinngutai“-nut, naleqquttunngortillugu. Inuit nunanit allarpassuarneersut, ilaatigut USA-mit 600-t, ataatsimeersuarnermut najuunnissartik pilersaarusiorsimavaat. Innuttaasut imminnut sorsuutilernissaat aarlerinarsiartuinnarmat kiisa ilaat ima oqartalerput: „Aamma Amerikamiut uniinnarnialissapput.“ Uniinnanngillalli, nunanilu allaneersorpassuit allat assigalugit aggiapput. Inuit 10.000-it takkunnissaat naatsorsuutigineqarsimagaluarpoq, ullormili ataatsimeersuarfiusumi kingullermi inuit 14.684-it arsaattarfissuaq ulikkaarluinnarsimavaat! Tamarmik pilluaqqusaangaarput ’ataatsimiittarfitsik qimannaveeramikku’. — Eprîarit 10:25.
3 Zagrebimi ataatsimeersuarnerup kingorna ullut pingasut ingerlaneranni Sovjetunionimi iluatsinngitsumik naalakkersuisunik uppititseriaraluartoqarpoq. Taamaalinerani kiffaanngissutsip Guutimeersup ikinngutaasa Odessami Ukrainemiittumi ataatsimeersuarnissamut piareersaatit kingulliit suliarileruttorpaat. Ataatsimeersuarnissaq pisinnaassanerpa? Qatanngutit upperlutik arsaattarfissuarmik tamakkiisumik iluarsartuussinertik naammassivaat, ataatsimeersuariallu takkussuuttorsuanngorput. Uppititseriaraluarneq tupinnartuliatut akornuserneqarpoq, augustillu 24-aniit 25-a ilanngullugu nuannersumik ataatsimeersuarneqarpoq inunnit 12.115-init najuuffigineqartumik. Inuit 1943-t kuisipput — najuuttut amerlanerpaagamik 16 procentii! Jehovap Nalunaajaasui ukiorpassuarni assuarnaassutsiminnik attassiinnarsimasut ilagalugit qatanngutitta nutaat angutit arnallu Jehovamik tatiginnilluinnarlutik ataatsimeersuariarsimanertik nuannaarutigeqaat. — Ussatit 3:5, 6.
4. Jehovap Nalunaajaasuisa Europap kangianiittut Jesusip maligassiaa qanoq ilillutik malissimavaat?
4 Ataatsimeersuarnermut peqataasut maligassatta Jesus Kristusip maligassiaanik malinnissimapput. Nalliuttorsuit Jehovap innuttaminut najuuffigeqqusai Jesusip peqataaffiginngitsuunngisaannarsimavai, allaat taamani juutinit toqunneqarniarnermini. Naggammik poorskisiorniarluni Jerusalemiliarnerata nalaani inuit naalaffiup silataaniittut ima apereqattaassimapput: ’Qanoq isumaqarpisi? Nalliussiartussannginnerluni?’ (Juánase 11:56) Takkupporli, taamaalillunilu sapaatip-akunnera inuiaat oqaluttuarisaanerannik allanngortitsilluinnartumik pisoqarfiusoq aallartippoq. Sapaatip-akunnerani tamatumani, juutit qaammatisiutaat naapertorlugit nisanip 8-anit 14-ia ilanngullugu, pisimasut pingaarnersaat sammeriartigik.
Nisanip 8-a
5. Ukiumi 33-mi Nisanip 8-ani Betaniamut aallarami Jesusip suna nalunngilaa?
5 Jesus ajoqersukkanilu Jerikomit Betaniamukarput. Tassani Jesusip ikinngunni Lazarus, siusinnerulaartukkut toqusunit makitissimasani, unnuani arfinilinni unnuiffiginiarpaa. Betania Jerusalemip eqqaaniippoq. Jesusip ajoqersukkani kisimiitillugit ima oqarfigereersimavai: ’Ata, Jerusalemimut majualerpugut, taava inuup ernera pisitaassavoq palasiunernut allakkanillu ilisimasunut, taakkualu toqutassaatissavaat, Guutimillu nalusunut pisissavaat mitaatigitillugu iperartortillugulu [qisummullu naalliutsitsivimmut, NV] kikiattortillugu, ullullu pingajuanni makikkumaarpoq.’ (Matîuse 20:18, 19) Jesusip ilisimalluinnarpaa naalliunnaqisumik misilitsittaqattaarfissani qanillisoq. Annertuumilli misilinneqarfissani tamanna qanilliartortillugu qatanngutini kiffartuunniarlugit sapinngisani tamaat iliuuseqartarpoq. Qanortoq ’Kristus Jesusitut isumaqarta’. — Filípimiut 2:1-5; 1 Juánase 3:16.
Nisanip 9-a
6. Nisanip 9-ani unnukkut Jesusip Judas qanoq oqaluuppaa?
6 Nisanip 9-ani seqernup tarrinnerata kingorna Simonip, siusinnerusukkut pupissuujunnaarsissimasami, angerlarsimaffiani Jesus nerivoq. Tassaniitillugit Lazarusip qatanngutaata, Mariap, uulia tipigissoq akisooq Jesusip niaquanut kuivaa maniguullunilu isigai nutsaminik allarterlugit. Judasip uparuarmagu Jesus oqarpoq: ’Assuareqinagu; tamanna toqqortaraa ullormut ilineqarfissannut.’ Palasiunerit tusaramikku juuterpassuit Betaniamukaasimasut Jesusimullu uppertunngorlutik, pilersaalerput Lazarusilu marluutillugit toqunniarlugit. — Juánase 12:1-7.
7. Nisanip 9-ani ullaakkut Jehovap aqqa qanoq ililluni ataqqinartinneqarpa, Jesusillu suna siulittuutigaa?
7 Ullaaralaannguaq Jesus Jerusalemimukarluni aallarpoq. Inuppassuit parsiarpaat palmip avalequtaanik aalateriffigalugu ima suaartaatigalutik: ’Uusiannaa, pilluarli Jehovap aqqani tikiuttoq, Israelip kunngia!’ Taava Jesusip siulittuut Sakarja 9:9-miittoq eqquutsippaa siutituumik qimusserluni illoqarfimmut iseriartorami. Jerusalemimut qanilliartortilluni illoqarfik qissatigaa siulittuutigalugulu Romamiut kaajallallugu ungaluliorlutik ungujumaaraat piuneerulluinnarumaaraallu — siulittuut ukiut 37-t qaangiummata malugisarialimmik eqquutoq. (Tamanna aammattaaq kristumiuuneraqatigiinnut, Jerusalemitoqqap ajortunngorsimaneratut ittumik malunnaateqartunut, aarlerisaarutaavoq.) Juutilli pisortaasa Jesus imminnut kunngioqqunngilaat, kamallutillu oqarlutik: ’Takuasi tamarsuarmik malikkaat!’ — Juánase 12:13, 19.
Nisanip 10-a
8. Nisanip 10-ani Jesusip qanoq ililluni Jehovamut qinusarfimmut ataqqinningaarnini ersersippaa, taavalu susoqarpa?
8 Jesus naalaffimmukaqqippoq, tassanilu niuertut aningaasanillu taarsiisartut (aggortitsisartut) aappassaanik aniatippai. Niuernermit — ’aningaasanik piumatunermit’ — Jehovamut qinusarfik inangerneqartussaanngilaq! (1 Timûtiuse 6:9, 10) Jesus ungasinngitsukkut toqusussaavoq. Tamanna assersuuppaa naatsiiassamut ikkunneqarlunilu toqusumut, taavali naalersumut iviganngorlunilu karrerpassuarnik inerititaqartumut. Taamatuttaaq Jesusip toqunera inuppassuit taassumunnga uppertut naassaanngitsumik inuulernerannik kinguneqarumaarpoq. Toqunissani eqqissisimanngissutigalugu Jesus qinuvoq Ataatami aqqa naalannarseqqullugu. Qinnutaanut akissutitut Guuti qilammit nipimik nipitoorsuarmik tutsiutsitsivoq najuuttut tamarmik tusaasinnaasaannik: ’Naalannarsisereerpara naalannarsiseqqikkumaarlugulu.’ — Juánase 12:28.
Nisanip 11-a — ulloq pisoqarfioqisoq
9. (a) Nisanip 11-ata aallartilaarnerani Jesusip juutit tunussisimasut assersuutitigut qanoq avoqqaarai? (b) Jesusip assersuusiaa naapertorlugu kikkut immikkut pisinnaatitaaffimmik angeqisumik sumiginnaasimappat?
9 Jesus ajoqersugaalu Betaniamit aallaqqipput, paasinarsissaarlu ulloq tamanna pisoqarfiussaqisoq. Jesus pingasunik assersuusiorpoq, ersersinniarlugu juutit tunussisimasut sooq pillagassaatinneqassasut. Aqqutaani fiigequt toquneq, inuiaat juutit uppinngitsut inerititaqanngitsullu pillagassaatissimanerannut takussutissatut ippassaammat perloqqusimasaa, sanioqquppaat. Naalaffimmi assersuusiorpoq viinnissalerisunik qinngaqqunnartunik naggataatigut naalakkamik erneranik, naatsiivimmik viinnissaqarfiusumik kingornussisussamik, toqutsisunik. Tamanna assersuutaavoq tatiginninnermik Jehovap imminnut ersersissimasaanik juutit sumiginnaanerannut, tamakkiisumillu taamaaliussapput Jesus toqukkunikku. Aammattaaq eqqartorpaa katittorsiorneq kunngimit — Jehovamit — ingerlanneqartoq. Qaaqqusat (juutit) aggerumanngillat. Taamaattumik avataanittut — tassa juutiunngitsut — qaaqquneqarput, ilaasalu qaaqquneqarnertik ilassivaat. Angulli katittorsiummik atisaqanngitsoq silataanut ajattorneqassaaq. Taanna kristumiuuneraqatigiinni oqaasiinnakkut kristumiuunerartunut assersuutaavoq. Jesusip nalaani juuterpassuit qaaqqusaasimapput, ’ikittuinnaalli qinigaapput’ 144.000-inut naqissuserneqartunut qilammilu naalagaaffimmik kingornussisussanut ilaanissaminnut. — Matîuse 22:14; sarĸúmersitat 7:4.
10-12. (a) Sooq Jesusip juutit palasii appisaluuppai, ilumoortuusaarniartullu taakku qanoq sakkortuumik avoqqaarai? (b) Qanoq ililluni naggataatigut juutinut tunussisunut eqqartuussut naammassineqarpa?
10 Juutit upperisarsiornikkut qullersaat ilumoortuusaarniartut Jesusip tigunissaanut periarfissarsiorput, apeqqutaalli peqqusersuut akilluartarpai inuppassuarnullu katersuussimasunut kanngunarsarlugit. Juutit upperisarsiortut tunussisimasut taakku Jesusip toqqortuinani toqqaannartumik avoqqaarai. Juutit taakku nuimasoorusuttuupput, immikkut ittunik atisaqartarlutik, taaguutillu nuimarpaluttut soorlu „rabbi“ aamma „ataataq“ taaguutigiumasaqalugit, soorluttaaq ullumikkut upperisarsiornikkut qullersat taamatorpiaq pisartut. Taamaattumik najoqqutassaq manna Jesusip saqqummiuppaa: ’Akitsiniartormi nikanarsissavoq, nikanartittorlu akitsissavoq.’ — Matîuse 23:12.
11 Upperisarsiornikkut pisortat Jesusip sakkortuumik avoqqaarai. Arfineq-marloriarluni eqqanaartorfigai tassaanerarlugillu siunnersuisut tappiitsut ilumoortuusaarniartullu. Avoqqaarliutiminullu suut pissutaanersut tamatigut oqaatigisarpaa. Upperisarsiornikkut pisortat inuit allat qilammiup naalagaaffianut isernissaannik akornusertarpaat. Ilataaraangamik Gehennamut pisitassarsisarput, tassa qularnanngitsumik ingasaassiniarneq imaluunniit ingasattumik ajortuliarisimani pissutigalugit nungutitaanissamik siunissaqartilersarlugu. ’Sianiitsut tappiitsut!’ Jesus oqarpoq, tassami farisiiarit piumatuussutsiminni naalaffimmi guulti pingaarnerpaatippaat minguitsumik pallorfiginninneq tunulliutillugu. Naapertuilluarneq, naakkinninneq ilumoornerlu tunulliutippaat inatsisini pingaarnerusut sumiginnarlugit akuutissat piumaneqaqisut, myntit, dildit kommenillu, qulinginik akiliisarnermikkut. Ileqqulersuutitut asattarnerisa ilumikkut minguttuussusiat qaqugumulluunniit peernavianngilaat. Aatsaat Jesusip qanittukkut pilliutissaa upperigunikku uummatertik minguiarsinnaavaat. Ilumoortuusaassusiat inatsisaassusiallu qaavannut ’qaqortumik marrartikkamut’ naapertuutinngilaq. — Matîuse 23:13-29.
12 Farisiiarit, ’pruffiitinik toqutsisut qitornaasa’, eqqanaartorfiginissaannut ilumut pissutissaqarluarpoq. Tassaapput pulateriaarsuit aamma pulateriaarsuit piaraat, Gehennamut eqqartuussat. Jesusiinnaanngitsoq aammali taassuma aallartitai toqukkusuppaat. ’Kinguaariinnut taakkununnga’ eqqartuussut naammassineqarumaarpoq. Tamatuma eqquunneratut Jerusalem ukiut 37-t qaangiummata piuneerulluinnarneqarpoq. — Matîuse 23:30-36.
13. Naalaffimmut tunissutit pillugit Jesusip oqaasii qanoq ilillugit uagut nalitsinnut nuutsinneqarsinnaappat?
13 Naalaffimmit aninnginnermini Jesusip uillarneq piitsoq aningaasaaqqanik marlunnik — ’inuutissarsiutissaraluaminik tamanik’ — nakkaatitsivimmut nakkartitsisoq nersualaarpaa. Pisuut piumatuusut annikitsuinnarmillu tunisisut iliornerannut tamanna akerliulluinnarpoq. Uillarneq piitsoq taanna assigalugu ullumikkut Jehovap nalunaajaasui Naalagaaffiup silarsuaq tamakkerlugu sulinera tapersersorniarlugu annertusarniarlugulu piffissamik, nukinnik aningaasanillu atuinissaminnut piumassuseqarput. Taamaalillutik upperisarsiornikkut qullersanit kanngunartuliortuusunit namminneq inuttut pisuunngorumallutik ’nersutaatiminnit’ iluanaarniapiluffiginnittunit allaaneroqaat. — Lúkarse 20:45–21:4.
Nisanip 11-ata qaangiutilernerani
14. Sooq Jesus aliasuppa, ajoqersukkamilu apeqqutaannut qanoq akissuteqarpa?
14 Ualikkut Jesus ajoqersukkaminit qaninnerusaminit ingiaqatigineqarluni illoqarfimmit aallarpoq. Uuliap qaqqaanut pigamik Jesusip Jerusalem inuilu qissatigai imalu oqarluni: ’Matuma kingornagut takussanngilassinga ima oqartinnasi: „Pilluarli Jehovap aqqani tikiuttoq!“’ (Matîuse 23:37-39) Ajoqersugaasa aperaat qaqugu tamanna pissanersoq, akissutiminilu Naalagaaffiup pissaanerani najuunnissaminut Satanillu aaqqissuussaanerata ajortup naggatissaanut nalunaaqqutissat eqqartorpai. — Matîuse 24:1–25:46; Mákorse 13:1-37; Lúkarse 21:5-36.
15. Jesusip nunamiut eqqartuunniarlugit najuunnissaanut suut nalunaaqqutaasussaappat, nalunaaqqutillu tamakku qanoq ilillutik pisimappat?
15 Jehovap qanittukkut naalaffimmut eqqartuussutissaa Jesusip innersuussutigaa, paasitillugulu tamanna pissutsit aaqqissuussaanerata tamarmi naggatissaani siunissami piumaartussanut siumut assersuutaasoq. Sorsunnerit aatsaat taama sakkortutigalutillu amerlatigisut, kiisalu kaannersuit, nunap sajuttarneri, nappaalanersuit, inatsisaanneq tullermillu asannissuseqannginneq najuunneranut ilisarnaataassapput. Tamakku ullumikkut nalitsinni ukiut hundredellit 20-ssaanni, ingammik 1914-imiilli, pisarput.
16, 17. Silarsuarmi pisussat suut Jesusip eqqartorpai, siulittuullu tamanna kristumiut qanoq qisuariarfigisariaqarpaat?
16 Taava naggataatigut ’naalliunnartoq silarsuaqaleqqaarneranit mannalu tikillugu naleqanngisaannartoq kingornalu naleqassanngitsoq’ nalliutissaaq. Naalliunnartoq, imaluunniit annikilliornartoq, tamanna Noap nalaani ulersuaqarneranitulli aseruitigisussaammat, Jesus mianersoqqusivoq iliuutsinik silamiorpaluttunik aallussivallaartuunnginnissatsinnik. ’Taamaattumik eqqumagitsi, naalakkassi tikiuffissaa nalugassiuk.’ Nuannaarutigisinnaavarput Naalagarput ’inussiamik ilumoorlunilu silatuumik’ (NV) ullumikkut najuunnermini mianersoqqussutinik saqqummiussisartussamik anersaakkullu inuussutissanik naammattunik pilersuisussamik toqqaasimammat. — Matîuse 24:21, 42, 45-47.
17 Ukiut hundredellit 20-ssaanni inuuffigisatsinni maani misigisarpavut ’inuiaqatigiit qussalallutillu ernumasut . . . inuit ersinermit inuillu najugaannut piumaartussanik ilimasunnermit tumanngortut’. Jesusili oqarpoq: ’Tamakkuli pilerpata aarloritsi, niaqqusilu makitissigik, [aniguisinneqarfissarsi, NV] qanillimmat.’ Imalu mianersoqqusivoq: ’Mianersoritsili uummatisi putumanermut imerajunnermullu inuunerullu matuma piinik isumakulunnermut nanertorteqqunagit; ullup taassuma tassanngaannaq tikeqinavaasi.’ Aatsaat eqqumagutta ’Inuup ernerata’ najuunnerani taassumannga iluarisaajuarsinnaassaagut. — Lúkarse 21:25-28, 34-36.
18. Niviarsissanik qulinik talentinillu Jesusip assersuusiai sunik ilikkagaqarfigisinnaavavut?
18 Nalitsinni pisussanik eqqartuinerminut torraaqisumut naggasiutitut Jesus pingasunik assersuusiorpoq. Siullermik niviarsissanik qulinik assersuusiamini eqqumanissap pingaaruteqassusia erseqqissarpaa. Taava kiffanik talentinillu assersuusiamini ersersippaa eqiasuinneq qanoq ililluni ’naalakkap tipaatsuffianut isernissamut’ qaaqqusaanermik akissarsissutaasoq. Kristumiut tanitat, tassani siumut assersuutigineqartut, savallu allat assersuusiat taakku assut qiimmassaatigisinnaavaat. — Matîuse 25:1-30.
19, 20. Jesusip savanik savaasanillu assersuusiaani ullumikkut pisoq nuannersoq suna siulittuutigineqarpa?
19 Assersuusiat pingajuanni Jesusip qilammi issiavissaarsuarminut naalannartumut ingereerluni Naalagaaffiup pissaanerani najuunnissaa tikkuarneqarpoq. Piffissaq tamanna inuiaat eqqartuunneqarfigisussaavaat, inuit katersanut marlunnut immikkoortiterneqassallutik, savat assersuutaasut maniguuttut taavalu savaasat assersuutaasut namminissarsiortut. Savat kunngip qatanngutaanik — silarsuup matuma naggatissaani tanitat nunamiittut sinnerinik — tapersersuiniarlutik ilungersorput. Savat taakku inuunermik akissarsitinneqassapput, savaasalli qujasuitsut naassaanngitsumik suujunnaarsinneqassallutik. — Matîuse 25:31-46.
20 Pissutsit aaqqissuussaanerata matuma naggatissaata nalaani maani ’savat allat’ aamma ’kunngip qatanngutai’ nuanningaartumik attaveqatigiipput. Kunngip najuunnerata aallartinnerani tanitat sinneruttut suliamut annerpaamik akisussaasuusimapput, ullumikkulli ’savat allat’ suliniarluartut arlalinnik millionilinngorsimapput — Guutip kiffaasa nunamiittut 99,8 procenteralugit. (Juánase 10:16) Aammattaaq taakku tanitanut ilumoortunut suleqataanerminni taakkunatulli ’kaannermik, imerusunnermik, tamaqannginnermik parnaarussaanermillu’ atugaqarnissaminnut piumassuseqarsimapput.a
Nisanip 12-ia
21. Nisanip 12-ani susoqarpa?
21 Jesusimik toqutaatitsiniarluni perlulioqatigiinneq malunnarsiartulerpoq. Judasip palasiunerit naalaffimmiittut pulaarpai akuersillunilu siilvinik 30-nik akilersilluni Jesus killuutiginiarlugu. Tamannattaaq siulittuutigineqarsimavoq. — Sakarja 11:12.
Nisanip 13-ia
22. Nisanip 13-iani sumut piareersartoqarpa?
22 Jesusip, qularnanngitsumik qinuniarluni eqqarsaqqissaarniarlunilu Betaniamiitilluni, ajoqersukkani Jerusalemimukartippai angut aalajangersimasoq ujartillugu. Angutip taassuma angerlarsimaffiani inimi angisuumi poorskernissaanut piareersarput. (Matîuse 26:17-19) Nisanip 13-iani seqernup tarrinnerani Jesusip ilaaqquffigai nalliuttorsuarlu oqaluttuarisaanermi pingaarnerpaaq pilersillugu. Nisanip 14-iani susoqassavamitaava? Ilanngutassiami tulliuttumi tamanna sammiumaarparput. (wD 1/3 92)
[Quppernerup ataani ilanngussaq]
a Ilanngutassiaq tulliuttoq iluaqutigalugu tanitat sinnimerngisa savallu allat qanittumik attaveqatigiinnerat paasilluarsinnaanerulissavarput.
Apeqqutit uteqqiissutit
□ Jesus qanoq inoroorsaarfigineqarpa, nisanillu 8-ata 10-atalu akornanni qanoq tikilluaqqusaava?
□ Nisanip 11-ani Jesusip qanoq ililluni palasit ilumoortuusaarniartut qulaarpai?
□ Siulittuut annertooq suna Jesusip saqqummiuppaa, ullumikkullu qanoq ililluni eqquuppa?
□ Nisanip 12-ani 13-ianilu pisut qanoq ingerlappat?
[Qupp. 10-mi assiliartaq]
Jesusip uillarneq piitsoq aningaasaaqqanik marlunnik — pigisaminik tamanik — tunissuteqartoq nersualaarpaa