„Silarsuarmik aaqqissuussaq nutaaq“ inunnit pilersinneqalerpa?
1. Ukiuni kingullerni naalakkersuinikkut kiffaanngissuseqarnerorusussuseq qanoq ililluni erserpa?
ULLUMIKKUT inuit millionilikkuutaat eqqunngitsumik upperisarsiornermut inussiaataapput, amerlasuullu taamaattuarnissartik kissaatigaat. Tamannalu ilutigalugu amerlanerujartuinnnartut naalakkersuinikkut kiffaanngissuseqarusussusiat sakkortunerujartuinnarpoq. Ukiuni kingullerni Europap kangiani allanilu pisimasut immikkut ittut takutissimavaat inuit kiffaanngissuseqarnerusunik naalakkersuisoqarusukkiartuinnartut. Taamaattumik inuppassuit oqartarput ukiut nutaat kiffaanngissuseqarfissat qanillisut. USA-p præsidentiata taasimavaa „silarsuarmik aaqqissuussaq nutaaq“. Aap, silarsuarmi pisortaasut sumiluunniit oqartarput sorsunneq nillertoq sakkussaliornikkullu qaangerniunneq atorunnaalersut ukiullu eqqissiffiusut inuiannut pilersut. — Naleqqiuguk 1 Tásalûníkamiut 5:3.
2, 3. Pissutsit suut piviusumik kiffaanngissuseq akornusertarpaat?
2 Kisianni inuit ilungersorlutik suliniarnermikkut sakkut ikinnerusut naalakkersueriaatsillu kiffaanngissuseqarnerusut angugaluarunikkik kiffaanngissuseq piviusoq angussagaluarpaat? Naamerluinnaq. Nunani tamani, allaat nunani demokratiskiusunik taaneqartartuni, ajornartorsiutit annilaarnartut pissutigalugit piitsut amerliartuinnarput inuillu millionilippassuit aningaasatigut ajornartorsiorput. FN-ip nalunaarusiaani nalunaarutigineqarpoq naak nakorsaatitigut allatigullu ilisimatuussuseq siuariartoraluartoq silarsuaq tamakkerlugu ullut tamaasa meeqqat agguaqatigiissillugit 40.000-it toqusartut nerisassakilliorneq imaluunniit nappaatit pitsaalineqarsinnaagaluartut pissutigalugit. Tamakkunuuna ilisimatooq ima oqarpoq: „Piitsuussuseq ataavartunngorsimavoq inuiaallu siunissaannik tamatuminnga aarlerinartorsiortitsilluni.“
3 Aammattaaq inuit amerliartuinnartut pinerlunniarnermit peqqarniinnerujartuinnartumit eqqugaasarput. Nunarpassuit ammip qalipaataa, naalakkersuineq upperisarsiornerlu pissutigalugit uumisuinermit avissaartuuffiupput. Nunat ilaanni pissutsit Sakarja 14:13-imi siulittuutigineqarsimasutut ilerput. Tassani allassimavoq inuit ’imminnut saassukkumaartut imminnullu sorsuullutik’. Ikiaroornartunik atornerluineq nappaatillu kinguaassiuutitigut tunillaattartut siammarsimaqaat. Inuit millionilippassuit AIDS-imik tunillatsissimapput, mannalu tikillugu USA-ginnarmi inuit 120.000-it sinnillit toqussutigereersimavaat.
Toqumut ajortimullu inussiaataaneq
4, 5. Ullumikkut qanorluunniit kiffaanngissuseqarsinnaagaluaraanni inuit tamarmik sumut inussiaataappat?
4 Ajornartorsiutilli annertuut tamakku aaqqinneqaraluarpataluunniit inuit kiffaanngissuseq piviusoq angunavianngikkaluarpaat. Suli inussiaataassagaluarput. Qanoq ilillutik? Takorlooriartigu kisermaassilluni naalakkersuisup peqqarniitsup inuit nunarsuarmiittut tamaasa inussiaatigilerai tamaasalu toqullugit. Pissutsit inuiaat tamarmik atugaat taamatorluinnaq ilersimapput inuit siulliit Guutimut pikitsitsimmatali Diaavulullu aqutsineranut naqisimannittumut inussiaalerlutik. — 2 Korintumiut 4:4.
5 Guutip inuit pinngortikkamigit siunertaraa nunami paratiisiusumi naammalluinnartuullutik naassaanngitsumik inuussasut, soorlu ersarilluinnartumik Mosesimik allakkat siulliit, kapitali 1-imi aamma 2-mi ersersinneqartoq. Adamili Guutimut ajortuliormat tamattalu taanna siuaasarigatsigu inunnguutsitsinnit toqumut inussiaalerpugut: ’Inukkut ataasiusukkut [Adamikkut, inuiaat siuaasaqqaavatigut] ajorti silarsuarmut tikiuppoq, taamalu toqup inuit tamakkerlugit tikippai.’ Soorlu Bibelimi allassimasoq ’toqu naalagaavoq’. (Rûmamiut 5:12, 14) Kiffaanngissuserput qanorluunniit atsigigaluarpat tamatta ajortip toqullu ataanni inussiaataavugut.
6. Suna pillugu Tussiaat 90:10-p allanneqarsimaneraniilli inuunerup sivisussusia sivitsortinneqarpiarsimanngila?
6 Aammattaaq inuunerput sivikeqaaq. Allaat iluatsitsinerpaat ukiuni qulikkaani arlaqanngitsuinnarni inuusarput. Iluatsitsinnginnerusullu ukiuni arlaqanngitsuinnarni. Nalunaarusiami nutaami ima allassimavoq: „Ilisimatuut nakorsallu ukiut inuit inuuffigisinnaasaasa nalinginnaasumik amerlassusiat sivitsortissimavaat.“ Taamaappoq Adamip ajortuliorsimanera pissutigalugu inuit kinguaariit naammalluinnanngissuseq toqulu kingornuttarmatigik. Alianartuali tassa, naak ukiut 70-it imaluunniit 80-it angussagaluarlutigik, ukiullu ingerlanerini ilisimasaqarnerujartussagaluarluta inuunermillu nuannaarutiginninnerujartussagaluarluta, timerput nungujartortarpoq naggataatigullu issunngoqqittarluni. — Tussiaat 90:10.
7. Sooq inuit kiffaanngissuseq piviusoq kissaatigisarput pisariaqartitarpullu pilersissinnaanngilaat?
7 Nunami naalakkersueriaatsit arlaata ajortimut toqumullu inussiaataaneq tamanna akornusersinnaanerpaa? Naamerluinnaq! Politikerip kialuunniit, ilisimatuup nakorsalluunniit kialuunniit nappaatit, utoqqalinerup toqullu perloqqussutaanerannit aniguisissinnaanngilaatigut, aammalu toqqissisimanngissuseq, naapertuilluanngissuseq, pinerlunniartarneq, kaanneq piitsuunerlu peersissinnaanngilaat. (Tussiaat 89:49) Qanorluunniit ajunngitsigisunik suliniuteqartigigaluarutta kiffaanngissuseq piviusoq kissaatigisarput pisariaqartitarpullu angusinnaanngilluinnarparput. — Tussiaat 146:3.
Piumasamik iliorsinnaanermik atornerluineq
8, 9. Suna pillugu inuit maannakkut pissutsinik taama alianartigisunik atugaqarpat?
8 Inuiaat taamatut alianartumik atugaqalersimavugut Adamip Evallu piumasamik iliorsinnaanerminnik atornerluisimanerat pissutigalugu. Pîtrusip agdlagai sujugdlît 2:16-imi ima allassimavoq: ’Kiffaanngitsutut kiffaanngissusersilu iluaatsuliornermut patsisiginagu, Guutilli kiffaasut.’ Taamaammat ersarippoq Guutip inuit killeqanngitsumik kiffaanngissuseqarnissaat siunertarinngikkaa. Guutip inatsisaanit naapertuillartunit tamanullu iluaqutaasunit killilerneqartariaqarpoq. Killiliussallu tamakkua iluanni inuit piumasamik qinigassaqarluarsinnaassammata, Guutip naalakkersuinera qunutitsisuunavianngilaq. — 5 Moses 32:4.
9 Siuaasatta siulliit suup eqqortuuneranik suullu eqqunngitsuuneranik namminneq aalajangiinissartik qinersimavaat. Piaaralutik inatsisiminik unioqqutitsimmata Guutip ilisimatungaartumik taakkuninnga annertoqqusiinini unitsippaa. (1 Moses 3:17-19) Taamaalillutik naammalluinnanngitsunngorput, nappaatit toqulu atugarilerlugit. Kiffaanngissutsimut taarsiullugu inuit ajortimut toqumullu inussiaalerput. Aammattaaq nunami pissaanilinnit naammalluinnanngitsunit peqqarniikkajoqisunillu aqunneqalerput. — 5 Moses 32:5.
10. Jehova asannilluni qanoq iliuuseqarsimava?
10 Guutip piffissami killilimmi inuit kiffaanngissutsimik tamarmiusumik tamatuminnga misileraanissaannik akuerigallarpai. Nalunngilaa misileraanerisa kingunerissagaat inuit imminut atanatik aqutsisinnaannginnerata nalornissutigineqarunnaarnera. Piumasamik iliorsinnaaneq eqqortumik atorneqaruni naleqaqimmat, Guutip asanninnermigut inuit piumasamik iliorsinnaassusiiarnissaannut taarsiullugu pisut akuerigallarpai.
’Inuup ingerlavissani nammineq aalajangigassarinngilaa’
11. Oqaluttuarisaanerup qanoq ililluni Bibelip eqqorluinnassusia tapersersorsimavaa?
11 Oqaluttuarisaanerup ersersissimavaa Jeremia, kapitali 10, versini 23-mi 24-milu, allassimasut ilumoortuusut. Tassani ima allassimavoq: „Nalunngilara inuup ingerlavissani nammineq aalajangigassarinngikkaa, angutillu aalajangigassarinngikkai qanoq ingerlanissani alloriartarnissanilu. Misillersitsigut, [Jehova].“ Aammattaaq oqaluttuarisaanerup ersersissimavaa oqaatsit Nalunaajaasup oqaasii 8:9-miittut ilumoortuusut, tassani allassimavoq: „Misissorsimavara seqernup ataani qanoq ittunik pisoqartartoq inuit ilaat inoqatiminnut ajoqutaasumik pissaaneqarpallaaleraangata.“ Ilami ilumuussusia! Inuiaat ajunaarnerpassuit atorsimavaat, inuillu tamarmik toqu ornippaat. Apustili Paulusip pissutsit eqqorluartumik allaaserisimavai, ingammik inuit eqqarsaatigalugit, Rûmamiunut agdlagkat 8:22-mi ima allakkami: ’Ilisimavugut pinngortitat tamarmik suli tamassa anersaameqatigiillutik erloqeqatigiissut.’ Aap, inuit Guutip inatsisaanut atanatik ingerlasimanerat ajunaarnersuusimavoq.
12. Paasissutissiisut ilaasa killeqanngitsumik kiffaanngissuseq qanoq oqaatigaat?
12 Atuakkami Inquisition and Liberty-mi kiffaanngissuseq ima nassuiarneqarpoq: „Namminersorneq immini tassaanngilaq ileqqorissuseq: piginnaassuseqarfiginngikkaanni usorsisimaarutigisinneqarsinnaanngilaq. Tassaassinnaavormi namminisarsioriaaseq iluaatsoq . . . Inuk tassaanngilaq, qanorluunniillu ilungersortigigaluaruni tassaalersinnaanani, pinngortitaq namminersorluinnartoq.“ Kunngissaq Philip Tuluit-nunaanneersoq ilaanni oqarsimavoq: „Kajungerileriataakkanut pilerissutsinullu sunullunniit maleruutiinnarneq ornigeqqajaanarsinnaagaluarpoq, kisianni misilittagaqarnerup takutittarpaa kiffaangissuseq imminut naalakkersinnaanertaqanngitsoq . . . aamma allat eqqarsaatiginagit iliorneq tassaasut inuunerup inuiaqatigiillu pitsaasumik ingerlanerannik aserornissamut sangutitsisartut, pisuussutaat apeqqutaatinnagit.“
Kina ilisimasaqarnerpaava?
13, 14. Kia kisimi inuiaat piviusumik kiffaanngissuseqalersissinnaavai?
13 Kikkut angerlarsimaffiup qanoq aaqqissorneqartariaqarneranik ilisimasaqarnerpaappat — angajoqqaat asannittut, piginnaassusillit misilittagallillu imaluunniit inuusuttuaqqat? Nalunanngilaq. Tamatumunnga assingusumik, inunnik Pinngortitsisoq, Ataatarput qilammiusoq, iluaqutissatsinnik ilisimasaqarnerpaavoq. Nalunngilaa inuit inuiaqatigiit qanoq aaqqissorneqartariaqartut naalakkersorneqartariaqartullu. Nalunngilaa piumasamik iliorsinnaaneq qanoq iluarsarneqartariaqartoq tamanut piviusumik kiffaanngissutsimik kinguneqarsinnaaqqullugu. Guutip Ajugaqanngitsup, Jehovap, kisimi nalunngilaa qanoq ililluni inuiaat inussiaataanerannit qilerussaassallugit tamaasalu piviusumik kiffaanngissuseqalersissallugit. — Jesaja 48:17-19.
14 Oqaatsimini, Rûmamiut 8:21-mi, Jehova kajumissinartumik ima neriorsuivoq: ’Pinngortitattaaq aserujasumut kiffaasut kiffaajunnaarsinneqarumaartut Guutip qitornaasa kiffaanngissusiata naalannaataat pigilerlugu.’ Aap, Guuti neriorsuisimavoq inuit ullumikkut atugaannit alianartunit aniguisikkumaarlugit. Ilanngutassiami tulliuttumi tamanna qanoq ililluni piumaartoq misissussavarput. (wD 1/4 92)
Qanoq akissavit?
(Quppernerit 3-9 uteqqillugit)
□ Sooq inuit taama kiffaanngissuseqarusutsigaat?
□ Oqaluttuarisaanerup ingerlanerani inuit qanoq ilillutik inussiaataasimappat?
□ Suna pillugu Jehovap piumasamik iliorsinnaanerup atornerlunneqarnera manna tikillugu akuerigallarpaa?
□ Kia kisimi inuiaat piviusumik kiffaanngissuseqalersissinnaavai, sooq?
[Qupp. 7-mi assiliartaq]
Ukiut inuup inuuffigisinnaasai Tussiaat 90:10-mi allassimasutut ipput
[Suminngaanneernera]
Courtesy of The British Museum