Neriuutip ernumaneq ajugaaffigaa!

QINERLERFISSIAMI Webster’s Ninth New Collegiate Dictionary-mi ernumaneq „neriuutaarulluinnarneq“-tut nassuiarneqarpoq. Taamaattumik ersarippoq ernumaneq ajugaaffiginiaraanni neriuut pisariaqartoq.

Inuk iluatsitsinngitsoq angerlarsimaffeqanngitsorlu neriuutissaqaruni neriuutaarulluinnartutut misigissanngilaq. Allaat isumakkut nappaammit naalliuuteqartut neriuut ikiortigalugu qasusuillutik isumalluarsinnaapput nakuussuseqarsinnaallutillu. Neriuulli tatigisassaasariaqarpoq! Tamanna qanoq paasisariaqarpa?

Neriuutip tunngavia

Sara, ataataanerpaap Abrahamip nulia, eqqarsaatigeriaruk. Taanna 90-ingajannik ukioqarluni suli meeraqanngilaq qangalilu meerartaarnissani isumakkeersimallugu. Taamaattoq uia 99-inik ukioqartoq Jehovap ukiut arlallit tamatuma siorna neriorsuutigisimasani uteqqippaa — Abraham ilumut ’kinguaassaqarumaartoq’. Abrahamip nalunngilaa neriorsuut tamanna tatigisassaasoq. Takorlooriaruk tamatuma eqquunneranik tupinnartuliornikkut Isakimik ernertaarami Sara qanoq nuannaartigisimassasoq! (1 Moses 12:2, 3; 17:1-4, 19; 21:2) Abrahamip Guutimut tatiginninnera asuliinnaasimanngilaq, soorluttaaq apustili Paulusip nassuiaraa: ’Guutip unnersuutaa uppinnginnermit [Abrahamip] qularnartinngilaa, kisianni uppernermigut pissatsippoq Guuti naalannartillugu.’ — Rûmamiut 4:20.

Juutit nalimini kristumiunngorsimasut allaffigalugit Paulusip nassuiarpaa Guutip Jesus aqqutigalugu annannissamik neriorsuutaata tatiginissaanut marlunnik pissutissaqarluartut. Guutip Abrahamimut neriorsuutaa tamatumunngalu atatillugu uppernarsaataa issuarlugit apustili ima nassuiaavoq: ’Inuimmi uppernarsaasarput angeqqiminnik naqqissigisaqarlutik, uppernarsaallu assortuunnernut tamanut naggatigitittarpaat aalajangersaatigalugu. Taamaattumik Guutip unnersuutigisamik kingornussisussat siunnersuummi allanngujuissusianik nalunaarfigilluinnarumagamigit uppernarsaat aappiuppaa, allanngujuitsut marluk Guutip sallutigisinnaanngisai aalajaatsumik tuppalliutigissagatsigik, uagut qimaaffissarsisugut neriugisassaq saqqangiussaq aalajangiullugu.’ (Eprîarit 6:16-18) Aap, Guutip neriorsuutai ilumoorlutillu tatigisassaapput. Jehova ajugaqanngilaq kisimilu nammineq oqaatsimi eqquunnissaat uppernarsaasersinnaallugu.

Neriuut — ’qajannaatsoq aalajaatsorlu’

Taamaattumik Paulus allassimavoq kristumiut neriuutaat ’qajannaatsoq aalajaatsorlu’. (Eprîarit 6:19) Paulusip nalunngilaa neriuutini sumik sorlaqartoq. Ima nassuiaavoq: ’[Neriuut] atavoq umissuup iluanut allaat.’ Tamanna qanoq paasisariaqarpa? Paulusip ersarissumik naalaffittoqaq Jerusalemimiittoq tikkuarpaa. Tassani ineqarpoq Illernarnerpaamik taaneqartumik ininit allanit saagorsuarmit immikkoortinneqartumik. (2 Moses 26:31, 33; Matîuse 27:51) Soorunami naalaffik Jerusalemimiittoq itsarli aserorneqareersimavoq. Taamaammat ullumikkut Illernarnerpaaq sumut assersuutaava?

Qilammut, Guutip issiavissaarsuata inigisaanut, assersuutaavoq! Paulusip tamanna nassuiarpaa oqarami Jesus qilaliarami ’illernartuummut assannik sanasimasumut piviusup tarraanut isinngitsoq, kisianni qilammut isertoq Guutip kiinaata saanut pilluta sassartarumalluni.’ (Eprîarit 9:24) Taamaattumik kristumiut neriuutaat, ernumanermut akiuunermi ikiortigisinnaasarput, inuit naalakkersuisuinik tunngaveqarani aaqqissuussamilli qilammiittumik tunngaveqarpoq. Guutip ivertitaa Jesus Kristus, uagut ajortuliavut pillugit inuunerminik utertitsissutitut pilliutiginnittoq maannakkullu iluaqutissatsinnut Guutimut sassartartoq neriuutissatsinnut tunngaviuvoq. (1 Juánase 2:1, 2) Aamma, soorlu atuagassiami matumani takutinneqartartoq, Jesus tassaavoq Guutip naalagaaffimmini qilammiusumi kunnginngortitaa, 1914-imiilli taamatut atorfeqarsimasoq. Naalagaaffiup qilammeersup tamatuma erniinnaq inuppassuit ernumanerannut pissutaasut peerluinnassavai.

Neriuut — ’tarnitsinnut kisaq’

Jesus aqqutigalugu annannissamik neriuutip tunngaveqarluarneranik allaffigisani qularunnaarsinniarlugit Paulus assersuusiorpoq. ’[Neriuut] tamanna tarnitsinnut pigaarput soorlu kisaq.’ — Eprîarit 6:19.

Paulusitut immakkut angalasartut kitsat nalunngilluarpaat. Kitsat itsaq atorneqarsimasut ullumikkut atortakkatsitut isikkoqarsimapput, saviminermit sanaajugajullutik marlunnik ’tigutsiseqarlutik’ immap naqqanut naatissinnaasunik. Ukiup 58-p u.n.k. missaani Romaliartilluni umiarsuup Paulusip ilaaffigisaata umiunissaa aarleqqutigineqalersimavoq. Umiarsuarli ikkattumut ingerlatillugu umiarsuup inuttai ’aquagut sisamanik kisarput’. Kitsat tamakku ikiortigalugit umiarsuaq anorersuarmit aniguivoq. — apustilit suliáinik agdlagkat 27:29, 39, 40, 44.

Qanoq ilillutit neriuutit kitsatut qajannaatsunngortissinnaaviuk aningaasatigut ajornartorsiutit, timikkut migissutsikkullu nappaatit ’anorersuillu’ allat misigiumaakkatit anigorsinnaajumallugit? Siullermik paasiniaagit Biibilimi neriorsuutit tutsuigineqarsinnaanersut nalorninaalliumallugu. ’Suut tamaasa paasiniaqqissaakkit.’ (1 Tásalûníkamiut 5:21, NV) Assersuutigalugu, Jehovap nalunaajaasuisa tullianik oqaluussiffigippatsit tusarnaariakkit. Najukkanni angalaakulanngippata rigssalianni (ataatsimiittarfianni) naapinniakkit.a Ilannguffiginissaannut pinngitsaalineqarnavianngilatit, kisianni qaquguluunniit sumiluunniillu illit iluarisannik akeqanngitsumik Biibilimik atuaqqissaaqatigineqarnissannik neqeroorfigineqassallutit.

Taamaalillutit atuaqqissaaqateqaruit qulariunnaassavat Guutip ’ujarlersini akilerumaarai’. (Eprîarit 11:6) Paasiumaarpat qanittukkut kunngi Jesus Kristus aqqutigalugu Guutip naalagaaffiata ajortunngorsimaneq naapertuilluanngissuserlu ullumikkut ernumanermut pissutaaqisut tamaasa piissagai. Naalagaaffiup tamatuma ataani nunarsuaq paratiisinngortinneqarumaarpoq, Guutillu asasani inuunermik naassaanngitsumik tunissavai. (Tussiaat 37:29; sarĸúmersitat 21:4) Neriuut nuanningaartoq!

Biibili peqqissaartumik atuariaruk paasiniarlugu neriuut tamanna ilumoortoq. Taavalu Guutimut qanittumik attaveqaleriartorniarit taassumunnga ikinngutaalerlutit soorluttaaq Abraham issimasoq. (Jâko 2:23) Guuti ’qinnutinik tusartartuummat’ isumakuluutigisannik oqaluttuunniaruk. Ilumoorlutit qinnuigisarukku nanertuutigisatit qaangersinnaalissavatit ernumanerillu ajugaaffigalugu. Guutip anersaava allaat ernumaninnut pissutaasut allanngornissaannut periarfissaqalersitsisinnaavoq. — Tussiaat 55:23; 65:3; 1 Juánase 5:14,15.

’Aalajangiussiniarit!’

’Suut tamaasa paasiniaqqissaaqqullugit’ uppeqatini kajumissaaramigit Paulus ima nangippoq: ’Ajunngitsoq aalajangiussiuk.’ (1 Tásalûníkamiut 5:21) Taamaaliorsinnaavugut ilaatigut inuit kristumiutut neriuummik aalajangiussisut ilagisarutsigik. Kunngi Salomon ilisimatooq ima mianersoqqusivoq: „Sianisuunik peqateqartoq ilisimassuseqalersarpoq, silaatsulli ikinngutaa ajortumeertussaasarpoq.“ (Ussatit 13:20) Paqumisunneq imaluunniit imminut nikaginermik misiginerit pissutigalugit ajunngitsumik ilagisartagaqarnissat pinngitsooqinagu. Assersuutigalugu, Jehovap nalunaajaasuisa ilaat siornatigut neriuutissaqaratik inuusimagaluarput. Biibilimilli atuaqqissaartaleramik uppeqatiminnillu nuannersumik ilagisartagaqalerlutik Jehovamut attaveqarnerat nakussatsinneqarpoq tatiginartumillu kitsatut ittumik neriuutissaqalerlutik. Tamatuma ilumut ernumanerat ajugaaffigisinnaavaa? Taamaalluinnarpoq.

Assersuutigalugu Annmarie taaneqarsinnaavoq, taanna uiminit peqqarniitsuliorfigineqartarnini pissutigalugu neriuutaarulluinnarsimavoq. „Aalajangerpunga imminorniarlunga,“ taama oqaluttuarpoq, „kisianni taamaaliortinnanga Guuti qinnuigissallugu aalajangerpunga. Eqqaamavara oqarlunga, ’Sooq ikiorsinnaanngilinga? Taama sivisutigisumik neriuffigisimavakkit, asuliinnarli.’ Qinoreerama eqqarsaatigaara inuuneq siunertaqanngitsoq taamaattumillu toquguma soqutaanngitsoq. Taava matumi kasuttortoqarpoq. Aalajangerpunga ammaanniarnagu neriullunga kinaagaluarnersoq qimaguteqqiinnassasoq.

Kasuttoqqipporli, annilaangalerpungalu. Qullikka allarterpakka kinaanersorlu takuniarlugu, neriullunga erniinnaq peerutissasoq aalajangiusimasara naammassiniassagakku. Kisianni,“ Annmarie nangippoq, „Jehova qujanarsili taama pisoqanngimmat, matumi ammarakku arnat marluk tassaniipput. Paatsiveerukkaluarpunga oqaasiilu iluamik paasinagit. Atuakkamilli inuunerup ilumut siunertaqarneranik nassuiaasumik neqeroorfigaannga. Tamannarpiarlu pisariaqartippara inuunermik soqutigisaqaleqqinnissannut.“ Pulaartut Biibilimik atuaqqissaaqatigisalerpaat. Annmariep Guutimut ikinngutaanissani ilinniarpaa. Taamaalilluni inuunermini siunertaqalerpoq. Maannalu inunnik allanik Guutimik tatiginninnissaannut ikiuisarpoq.

Immaqa ernumajunnaarnissaq neriuutigisimavat tamatumunnga atatillugu pisariaqartut tamaasa paasinngikkaluarlugit. Kisianni ima qinusimaguit: ’Naalagaaffiit tikiulli; peqqusat qilammisut nunamissaaq pili,’ taava Guutip naalagaaffiata, Kristus aqqutigalugu tikiunnissaa, inuit ajunngitsumik uummatillit ernumanerannut pissutaasut tamarmik piiagaanissaannik kingunilik, qinnutigisimavat. (Matîuse 6:10) Nammineq Biibilimik atuaqqissaartaleruit allallu taama neriuutillit akuttunngitsumik ilagisalerlugit Jehovap naalagaaffiata tikiunnissaanik nunarsuullu matuma paratiisinngortinneqarnissaanik neriuuteqarnerit nakussatsinneqassaaq. (1 Timûtiuse 6:12, 19) Neriuut nuanningaartoq tamanna atuagassiap matuma normuini tamani tusarliunneqartarpoq. Neriuut tamanna ilassilluaruk ernumanermut akiuunninni. Ilumut, ’neriuttoq pakatsinavianngilaq’. — Rûmamiut 5:5. (wD 1/7 92)

[Quppernerup ataani ilanngussaq]

[Qupp. 8-mi assiliartaq]

Biibili atuaqqissaarutsigu neriuuteqalissaagut ’tarnitsinnut kitsatut ittumik’.