’Messias nanivarput’!
’[Andreasip] qatanngunni Simon naapeqqaarpaa oqarfigalugulu: Messias [nanivarput, NV] (nutserlugu imaattoq: Kristus).’ — JUÁNASE 1:42.
1. Jesusimut Nazaretimiumut tunngatillugu Johannes Kuisisoq qanoq uppernarsaava, Andreasilu Jesus pillugu qanoq isummerpa?
ANDREASIP angut juutiusoq Jesusimik Nazaretimiumik taaneqartoq sivisuumik qimerlooqqissaarpaa. Kunngitut, ilisimatuutut rabbitulluunniit isikkoqanngilaq. Kunngikkormiorpaluttumik assuuteqanngilaq, qeeqarani, assai kiinaaluunniit qituttumik ameqaratik. Jesus inuusuttuuvoq — 30-t missaanni ukioqarluni — sulisartutut maanninilinnik assaqarluni palersimallunilu. Taamaattumik Andreas tupaallassimassanngilaq sanasuusoq paasigamiuk. Johannesili kuisisoq angut taanna pillugu ima oqarsimavoq: ’Tassa Guutip savaaraa.’ Sulilu tupaallannarnerusumik Johannes ippassaammat oqarsimavoq: ’Nalunaajaassutigaara taannaasoq Guutip ernera.’ Tamanna ilumoorsinnaanerpa? Ulloq taanna Andreasip Jesus oqaluttoq tusarnaangaatsiarpaa. Naluarput Jesus qanoq oqalussimanersoq; nalunngilarpulli oqaasiisa Andreasip inuunera allanngortissimagaat. Tuaviorluni qatanngunni Simon ornippaa oqarfigalugulu: ’Messias nanivarput.’ — Juánase 1:34-42, (NV).
2. Sooq pingaaruteqarpa Jesusip ilumut Messiasiuneranut neriorsuutigisaq uppernarsaatit misissussallugit?
2 Andreas Simonilu (Jesusip Peterimik taasaa) kingorna Jesusimut apustilinngorput. Ukiut marluk sinnerlugit ajoqersugaareerluni Peter Jesusimut ima oqarsimavoq: ’Kristusiuvutit [Messiasiuvutit] Guutip uumasup ernera.’ (Matîuse 16:16) Apustilit ajoqersukkallu aalajaatsut aalajaassusertik naggataatigut uppernarsarpaat allaat toqumut aalajaannermikkut. Ullumikkuttaaq inuit peqqusersuitsut millionilikkuutaat taamatut tunniusimatigipput. Upperneralli uppernarsaatissanik sunik tunngaveqarpa? Uppernarsaatissammi tunngavigalugit upperneq piviusoq uppiassuserlu assigiinngissusersineqarsinnnaapput. (Naleqqiuguk Eprîarit 11:1.) Taamaattumik Jesusip ilumut Messiasiuneranut uppernarsaatissat pingaarnerit pingasut sammeriartigik.
Jesusip nagguii
3. Jesusip siuaasaanut tunngatillugu annikitsualuit suut Mattæusip Lukasillu iivangkiiliulersaarutaanni eqqaaneqarpat?
3 Jesusip nagguii taassuma Messiasiuneranut Kristumiut Allagaataat Griikerisuut-ni uppernarsaatissat siullersaraat. Biibilimi siulittuutigineqarsimavoq Messias kunngip Davidip kinguaavinit pissasoq. (Tussiaat 132:11, 12; Jesaja 11:1, 10) Mathæusip iivangkiiliua ima aallartippoq: ’Jesus Kristusip, Davidip ernerata, Abrahamip ernerata, inunngoranernik allakkat.’ Jesusip ataatarsiamigut siuaasaasa tulleriiaarlugit nakimaalluni allattoqqissaarnerisigut kinguaariinni oqaluttuaq tamanna Mattæusip tapersersorpaa. (Matîuse 1:1-16) Lukasip iivangkiiliumini Jesusip anaanamigut siuaasai Davidikkoorlugit Abrahamikkoorlugillu kingumut Adam tikillugu allattorsimavai. (Lúkarse 3:23-38)a Taamaalillutik iivangkiiliumik allattut uppernarsarpaat Jesus Davidip kingornussisussarigaa, inatsitigut kinguaajuninilu tunngavigalugu.
4, 5. (a) Jesusip nalaani inuusut taassuma Davidimut kinguaajunera assortorsimavaat, tamannalu sooq pingaaruteqarpa? (b) Paasissutissat Biibilip avataaneersut qanoq ilillutik Jesusip nagguii uppernarsarpaat?
4 Jesusip Messiasiuneranut akerliunerpaalluunniit taassuma Davidimut kinguaajunerarneqarnera misiutigisinnaanngilaat. Sooq? Marlunnik pissutissaqarpoq. Siullermik, Jerusalemip aserorneqarnera ukiunik qulikkaanik sioqqulluguli taamaannera saqqummiunneqartuartarsimavoq. (Naleqqiuguk Matîuse 21:9; apustilit suliáinik agdlagkat 4:27; 5:27, 28.) Taamaanneraaneq kukkusuusimagaluarpat Jesusimut akerliusut — akerliusorpassuaqarpormi — ilaasa Jesus salloqittaasuusoq uppernarsarniarlugu inuit allattorsimaffiat misissuinnarsinnaagaluarpaat.b Oqaluttuarisaanermilli allattukkani suniluunniit nassaassaqanngilaq Jesusip kunngimut Davidimut kinguaajuneranut assortuisumik. Nalunanngitsumik tamanna ilumoorluinnartuuvoq. Qularnanngitsumik Mathæusip Lukasillu kinguaariinnik allattukkatik inuit allattorsimaffiannit toqqaannartumik nuussimavaat.
5 Aappassaanik, paasissutissat Biibilip avataaniittut uppernarsarpaat Jesusip siuaasaanik allattukkat ilumoortuusut. Assersuutigalugu, Talmudip, ukiut hundredellit sisamassaanni ajoqersuisup juutiusup, allattukkamini Maria, Jesusip anaanaa, sakkortuumik saassuppaa ’sanasunut atortittartuunerarlugu’; tamannali ilutigalugu nassuerutigalugu ’kunngit ernerinut kunnginullu kinguaajusoq’. Oqaluttuarisaanermik allattartup allap siusinnerusukkut inuusimasup, Hegesippusip, eqqaasaa aamma taaneqarsinnaavoq. Taassuma oqaluttuaraa Romamiut kaasariata Domitianip Davidip kinguaavinik tamanik nungutitsinialernerata nalaani kristumiunik siullernik uumissuisut ilaasa Judasip, Jesusip affarmik qatanngutaata, ernutai ’Davidip eqqarliisut’ nalunaarutigisimagaat. Judas Davidip kinguaavatut ilisimaneqarsimappat, taava aamma Jesus taamatut ilisimaneqarsimassannginnerpa? Soorunami! — Galâsiamiut 1:19; Judas 1.
Messiasimik siulittuutit
6. Allakkat Hebriiarisuut-ni Messias pillugu siulittuutit qassiuppat?
6 Jesusip Messiasiuneranut uppernarsaat alla tassa Allakkat Hebriiarisuut-ni taanna pillugu siulittuuterpassuit eqquussimasut. Siulittuutit Messiasimut tunngasut Allakkat Hebriiarisuut-ni amerlaqaat. Alfred Edersheimip atuakkiamini The Life and Times of Jesus the Messiah-mi naatsorsorsimavai Allakkat Hebriiarisuut-ni immikkoortut 456-it itsaq juutit ajoqersuisuisa Messiasimut tunngatittarsimasaat. Ajoqersuisulli amerlaqisutigut Messias kukkusumik takorloortarsimavaat, taamaattumillu allakkani immikkoortut innersuussutigisarsimasaat Messiasimut tunnganngilluinnarlutik. Taamaattorli siulittuuterpassuaqarpoq Jesusip Messiasiuneranut tikkuussisunik. — Naleqqiuguk sarĸúmersitat 19:10.
7. Siulittuutinik Jesusip nunamiikkallarami eqquutitissimasaanik taasaqarit.
7 Siulittuutigineqarsimasut ilaat makkuupput: Inunngorfia (Mika 5:2; Lúkarse 2:4-11); inunngornerata kingorna meeraaqqanik toqoraanersuaq (Jeremia 31:15; Matîuse 2:16-18); kiisalu siulittuutigineqarsimavoq Egyptenimit qaaqquneqarumaartoq (Hosea 11:1; Matîuse 2:15), inuianni pissaanillit suujunnaarsinniarlugu perlulioqatigiikkumaartut (Tussiaat 2:1, 2; apustilit suliait 4:25-28), aningaasanillu siilvinik 30-nik killuutigineqarumaartoq (Sakarja 11:13; Matîuse 26:15). Aap, allaat qanoq ililluni toqunissaa siulittuutigineqarsimavoq. — Tussiaat 22:17; New World Translation-ip atuaqqissaassutissartaani ilanngussaq takuuk; Juánase 19:18, 23; 20:25, 27.c
Tikiunniissaa siulittuutigineqarsimavoq
8. (a) Siulittuummi sumi Messiasip qaqugorpiaq saqqummernissaa eqqaaneqarpa? (b) Siulittuut tamanna paasisinnaassagutsigu marluk suut ilisimasariaqarpavut?
8 Siulittuut ataasiinnaq sammeriartigu. Daniel 9:25-mi juutit paasitinneqarput Messias qaqugu saqqummissasoq. Ima allassimavoq: „Manna nalujunnaassavat paasillugulu: Jerusalaap iluarnarsarneqarluni kingumut qarmarneqarnissaata peqqussutigineqarneraniit tanitallu naalagaatitaasup tikiuffissaata tungaanut ’sabbatip akunneri’ arfineq-marluusussaapput. ’Sabbatip akunnerisa’ 62-it ingerlaneranni Jerusalaat iluarsarneqarluni qarmaqqinneqassaaq.“ Siulittuut tamanna takoqqaarlugu paasiuminaassinnaavoq. Paasissutissalli marluinnaat paasiniarneqaannarsinnaasut imarai: Aallartiffik piffissarlu aalajangersimasoq. Tamanna assersuunneqarsinnaavoq nunap assinganut erlinnartuutip sumiiffianik paasissutissiisumut: „Qisumernip takissusia 50-eriarlugu puilasuliap illoqannginnersamiittup kangiani.“ Puilasuliap sumiiffia imaluunniit qisumernip takissusia nalugaanni paasissutissaq paasiuminaassaaq. Erlinnartuut nassaariniassagukku taakku marluk paasiniaqqaassannginnerpigit? Danielip siulittuutaa aamma taamaappoq, aallartiffissaa paasiniaannassavarput piffissarlu ingerlasussaq naatsorsorlugu.
9, 10. (a) Sapaatip-akunneri 69-it qanga aallartippat? (b) Sapaatit-akunneri 69-it taakku qanoq sivisussuseqarpat, tamannalu sumit nalunngilarput?
9 Siullermik aallartiffik, ukioq ’Jerusalaap iluarsarneqarluni kingumut qarmarneqarnissaata peqqussutigineqarfia’, paasisariaqarparput. Taava piffissaq tassanngaanniit ingerlasussaq, tassa sapaatit-akunneri 69-it (7 plus 62) naatsorsorsinnaavarput. Taamaaliornissaq ajornanngitsunnguuvoq. Nehemiasip paatsoorneqarsinnaanngitsumik oqaatigaa Jerusalaap qarmarsuisa qarmaqqinneqarnissaanik taamaalillunilu illoqarfittut nappaqqinneqarnissaanik peqqussut „ukiut Artaxerxesip kunngiuffiisa 20-anni“ saqqummiunneqarsimasoq. (Nehemja 2:1, 5, 7, 8) Taamaalilluta aallartiffissarput paasivarput tassaasoq ukioq 455 u.n.s.d
10 Tassaasimassanerpat sapaatit-akunnivii arfineq-marlunnik ullullit 69-it? Naamik, Messiasimi ukiup 455-ip u.n.s. ukiut marluk affarlu sinnilaarlugit kingunitsiannguagut saqqumminngilaq. Biibilimik paasiniaaqqissaartartut amerlanersaasa nutsikkallu amerlaqisut isumaqatigiillutik tassaanerarpaat ’sapaatip-akunnerata ullui ukiunngortitat’. Itsaq juutit ’sapaatip-akunnerata ullui ukiunngortitat’ tassaasut ukiut arfineq-marluk ilisimalluarsimavaat. Ullut arfineq aappassaat tamaasa sabbatisiortarsimapput, taamatuttaarlu ukiut arfineq aappassaat tamaasa sabbatisiorfigisarsimallugu. (2 Moses 20:8-11; 23:10, 11) Tassa ’sapaatip-akunnerata ullui ukiunngortitat’ 69-it imaalissavavut: ukiut 7-it 69-eriarlugit, tassa ukiut 483-it. Taava naggataatigut ukiut 483-it ukiumit 455-imit u.n.s. naatsorsuinnarsinnaalissavavut, taamaalioruttalu ukioq 29 u.n.k. tikissavarput — tassa ukioq Jesusip kuisikkami ma·shiʹach-inngorfia, Messiasinngorfia! — Takuuk Hjælp til forståelse af Bibelen-imi „Halvfjerds uger“, quppernermi 435-miittoq.
11. Danielip siulittuutaanik oqaluttuarisaanermut naapertuuttunngorsarniaannarlugu nassuiaanerarneqarutta qanoq akisinnaavugut?
11 Immaqa inuit ilaat akerliliiumassapput oqarlutik siulittuut oqaluttuarisaanermut naapertuuttunngorsarniaannarlugu nassuiaatissinniarsarigipput. Kisianni sooq Jesusip nalerpiaani Messiasip saqqummernissaa inuit ilimagisimavaat? Oqaluttuarisaanermik allattartut kristumiu Lukas, Romamiut Tacitus Svetonius, juuti Josefus isumaliutersortartorlu juuti Filon tamarmik tamatuma nalaani inuusimapput, uppernarsarsinnaallugulu ilimasunneq assut annertusimasoq. (Lúkarse 3:15) Ullumikkut ilisimatuutut misissuisartut oqarniartarput juutit Romamiunit naqisimaneqarnertik pissutigalugu piffissami tamatumani Messiasip tikiunnissaa erinigalugulu ilimagisimagaat. Soorli taamanikkorpiaq juutit ilimasussimappat, ukiut hundredet arlallit tamatuma siorna griikerinit peqqarniitsumik qinugineqarnerminni ilimasussimanatik? Sooq Tacitus oqarsimassava „siulittuutit eqqumiitsut“ pissutigalugit juutit ilimasulersimasut pissaanilissuit Judeamit saqqummerumaartut ’silarsuarlu tamakkerlugu naalagaassuseqalerumaarlutik’? Abba Hillel Silver atuakkiamini A History of Messianic Speculation in Israel-imi ima nassuerpoq: „Ukiut hundredellit siulliit u.n.k. aggornerisa sisamat aappaata missaani Messiasip saqqummernissaa ilimagineqarsimavoq,“ imaanngitsoq Romamiut qinuginninnerat pissutigalugu, kisianni „ukiunik naatsorsueriaaseq taamanikkut ilisimaneqarluartoq“ ilaatigullu Danielimik allakkanik tunngaveqartoq pissutigalugu.
Qilammit toqqagaq
12. Jehovap qanoq ililluni Jesus Messiasitut toqqarsimavaa?
12 Jesusip Messiasiuneranut uppernarsaatit pingajuat tassaavoq Guutimit toqqagaaneranut takussutissaq. Lúkarse 3:21, 22 naapertussagaanni Jesus kuisinnermi kingorna Jehova Guutip anersaavanit illernartumit, allanit nallernissaqanngitsumik pissaanilimmit illernassusilimmillu, taninneqarpoq. Jehovalu nammineq nipini atorlugu oqarpoq ernini, Jesus, akuerisimallugu. Aammalu pisuni allani marlunni Jehovap qilammit toqqaannartumik Jesus oqaluffigisimavaa taassuminnga akuerinninnini oqaatiginiarlugu: Siullermik Jesusip apustilii pingasut najuutsillugit, aappassaanillu inuppassuit tusaatillugit. (Matîuse 17:1-5; Juánase 12:28, 29) Aammattaaq inngilit nunamut aallartinneqarsimapput Jesusip Messiasiuneranik uppernarsaasussatut. — Lúkarse 2:10, 11.
13, 14. Jehovap qanoq ililluni ersersissimavaa Jesus akuerigini?
13 Jehovap aamma ernini tanitaq akueraa tupinnartuliorsinnaassuseqartinneratigut. Assersuutigalugu, Jesusip oqaluttuarisaanermi pisussat annikitsualuttaat ilanngullugit suli pinnginneranni siulittuutigereersimavai — ilaallumi ullumikkut eqquussorput.e Aammattaaq tupinnartuliortarsimavoq inuppassuit kaattut nerisassillugit napparsimasullu ajorunnaarsillugit. Allaat toqusut makitittarsimavai. Imaluunniit Jesusip tupinnartuliortarsimaneranik oqaluttuat inuit ilaasa oqartarnerattut ajoqersugaanit oqaluttualiaannaappat? Eqqaamassavat Jesusip tupinnartuliorneranik isiginnittorpassuaqarsimammat, allaat tuusintilikkuutaanik. Allaat akeraasa tupinnartuliortarsimanera assortorsinnaasimanngilaat. (Mákorse 6:2; Juánase 11:47) Sooq Jesusip ajoqersugai piumasaannarminnik oqaluttualiortarsimagunik namminneq kukkunitik misiutiginagit eqqartortarsimassavaat? Upperneq namminneq piumasaminnik tunngaviliugartik pissutigiinnarlugu toqunissaminnut piumassuseqartarsimassagamik? Naamik, Jesusip tupinnartuliortarsimaneri oqaluttuarisaanermi pisimasuiupput.
14 Jesusip Messiasiunerata uppernarsaqqinneqarnissaa Guutip isumagisimavaa. Uppernarsaatissat allattorneqarnissaat atuakkamilu oqaluttuarisaanermi nutserneqarnerpaallunilu siammarsimanerpaamut ilanngunneqarnissaat anersaamigut illernartukkut isumagisimavaa.
Sooq juutit Jesus ilassiumasimanngilaat?
15. (a) Jesusip Messiasiuneranut uppernarsaatit qanoq imaqartigippat? (b) Juutit qanoq ilimasuuteqarnertik pissutigalugu Jesus Messiasitut akueriumanngilaat?
15 Uppernarsaatissat pingasut taakku pisimasuinnik hundredelippassuarnik Jesusip Messiasiuneranik tikkuartuisunik ilaqarput. Tamakku naammanngillat? Takorlooriaruk aningaaserivimmi kontotaarniarlutit paasitinneqarputit kinaassutsinnut uppernarsaatit pingasuinnaat naammanngitsut, arlalinnilli hundredelinnik takutitsisariaqartutit. Ingasak, ilaa? Taamaattumik oqartoqarsinnaavoq Biibili Jesusip kinaassusianut sinnilissuarnik uppernarsaatissaqartoq. Soorli Jesusip nunaqqataasa ilarpassuisa taassuma Messiasiuneranut uppernarsaatissarpassuit tamakku akueriumanngilaat? Uppernarsaatissat uppernissamut tunngavissiisarmata, tamatiguunngitsorli uppernermik kinguneqartarlutik. Ajoraluartumik inuppassuit uppererusutaannatik upperisarpaat, allaat ilumoortuunnginnerannut uppernarsaatissarpassuaqarluartorluunniit. Juutit amerlanerit Messiasip qanoq ittorpiaanissaanut namminneq takorluugarpassuaqarsimapput. Piumasimavaat Messias politikkimik suliaqartoq, Romamiut naqisimanninnerannik kipititsisinnaasoq Israelilu Salomonip nalaanisut ittumik pigisatigut alutornassuseqalersillugu. Taamaattumillu qanoq ilillutik sanasup ernikulunngua, taanna Nazaretimiu politikkimik pisuussutinilluunniit pingaartitsisuunngitsoq, ilassiumasinnaavaat? Ingammillu ima eqqarsarsimassapput: Qisummi nappakkami nikanarsagaasumik toqutaasoq taanna qanoq ililluni Messiasiusinnaagami?
16. Sooq Jesusip ajoqersugaasa Messiasimut ilimasuutitik allanngortittariaqarsimavaat?
16 Allaat Jesusip ajoqersugai taassuma toqunerani uissuummeqaat. Naalannassusilimmik makititaanerata kingorna qularnanngitsumik isumaqaraluarput ingerlaannaq ’naalagaaffik Israelikkunnut kingumut iluarsisissagaa’. (apustilit suliait 1:6) Namminnerli neriuutigisaraluamik tamatuma eqquutitinneqannginnera pissutigiinnarlugu Jesus Messiasitut ajattornianngilaat. Naammattunik pissutissaqaramik upperfigaat, taamaattumillu paasinninnerat alliartuaarsimavoq. Paasisinnaanngisatik paasilluarsinnaalerpaat. Paasivaat Messiasip inuttut nunamiinnerata ingerlanerinnaani sivikitsumi taassuminnga siulittuutit tamarmik eqquunnavianngitsut. Siulittuummi ataatsimi eqqaaneqarpoq siutituup piaraanik qimusserluni qanilaarluni tikiukkumaartoq, allamilu oqaatigineqarluni naalannassuseqarluni qilaap nuiaasigut takkukkumaartoq! Qanoq ilillutik taakku tamarmik eqqortuussinnaagamik? Eqqortuusinnaassapput aatsaat tikiuteqqissappat. — Sakarja 9:9; Daniel 7:13.
Sooq Messias toqusariaqarsimasoq
17. Danielip siulittuutaani qanoq ililluni ersersinneqarpa Messias toqusariaqartoq, aamma sooq?
17 Messias pillugu siulittuutini aamma ersarissumik oqaatigineqarpoq Messias toqusariaqassasoq. Assersuutigalugu, Messiasip qaqugu tikiunnissaanik siulittuummi aamma manna siulittuutigineqarpoq: „’Sabbatip akunneri’ 62-it [sapaatit-akunnerisa arfineq-marluk malitsigisaat] taakku qaangiuppata tanitaasoq [Messias] peersitaassaaq inuujunnaarsitaalluni.“ (Daniel 9:26) Oqaaseq hebriiarisooq ka·rathʹ tassani ’peersitaassaaq’-mik nutserneqarsimasoq, Mosesip inatsisaani toqumut pillagaanermut aamma atorneqarpoq. Messias pinngitsoorani toqusariaqarsimavoq. Sooq? Versi 24-mi akissuteqarpoq ’ajortuliorneq soraarsitaaqqullugu pinerluttuliornerlu isumakkeerneqaqqullugu’. Juutit tamarmik ilisimavaat aatsaat pilliuteqarnikkut, uumassulillip toquneratigut, unioqqutitsineq saammaanneqarsinnaasoq. — 3 Moses 17:11; naleqqiuguk Eprîarinut agdlagkat 9:22.
18. (a) Jesaja kapitali 53-imi qanoq ililluni ersersinneqarpa Messias anniarlunilu toqusariaqartoq? (b) Taamaalilluni imminnut assortuussorinartut suut pilerpat?
18 Jesajap allagai, kapitali 53-imi, Messias Jehovap immikkut kiffaatut allat ajortaat matuniarlugit anniarlunilu toqusariaqartutut eqqartorneqarpoq. Versi 5-imi ima allassimavoq: „Kisianniuna ikiligaasoq pinerlunnivut pillugit, sequmisitaavoq ajortuliavut pillugit.“ Messiasip ajortip matoorneqaatissaanik toqusariaqarnera eqqartoreerlugu siulittuummi tassanerpiaq qulaarneqarpoq ’sivisuumik inuujumaartoq, Jehovallu piumasaa taassuma assaatigut naammassineqarumaartoq’. (Versi 10) Imminnut assortuuttuunngillat? Qanoq ililuni Messias uffa toqoreerluni ’sivisuumik inuusinnaassava’? Qanoq ililluni uffa pilliutigineqareerluni ’Jehovap piumasaa taassuma assaatigut naammassineqarsinnaasagami’? Qanoq ililluni toqusinnaava imminut siulittuutit pingaarnerit — naassaanngitsumik kunngiunissani silarsuarmilu tamarmik eqqissinartuullunilu pilluarnartunngortitsinissani — suli eqquutitinnagit? — Jesaja 9:6, 7.
19. Jesusip makinnerata qanoq ililluni Messiasimut siulittuutit imminnut assortuussorinartut aaqqiissutissarsivai?
19 Imminnut assortuuttutut isikkoqartut taakku tupinnartuliakkut malugisarialikkut aaqqiissutissarsisinneqarput: Jesus makititaavoq. Juutit unneqqarissut hundredelikkuutaat pisumut nuanningaartumut tamatumunnga takunnittuupput. (1 Korintumiut 15:6) Apustili Paulus kingorna allassimavoq: ’Taassuma [Jesusip] ajortit pillugit pilliut ataaseq pilliutigigamiuk, Guutip talerpiata tungaani issiattuinnalerpoq utaqqiinnalerlunilu qinngarsortini isikkaminut tummagassanngortinneqarserlugit.’ (Eprîarit 10:10, 12, 13) Aap, Jesus qilammi inuunermut makitinneqartussaasimavoq kunnginngortitaallunilu Ataatami, Jehovap, akeraanut akuliutinnginnermini utaqqigallarluni. Qilammi kunngitut atorfimminit Jesus, Messias, ullumikkut inuit ataasiakkat inuunerannut tamanut sunniuteqarpoq. Qanoq ililluni? Ilanngutassiami tulliuttumi tamanna eqqartussavarput. (wD 1/10 92)
[Quppernerup ataani ilanngussat]
a Lúkarse 3:23-mi allassimammat: ’Josef Elip pigaa,’ isumaqarsimassaaq ningaarigaa, Elimi Mariap ataatagivaa. — Insigt on the Scriptures, atuagaq I, quppernerit 913-17.
b Oqaluttuarisaanermik allattartup juutiusup, Josefusip, nammineq siuaasami allattorsimaffianik misissuinermini erseqqissaatigaa allattukkat taamaattut ukiup 70-ip u.n.k. siornagulli pigineqarsimasut. Allattukkat tamakku qularnanngitsumik Jerusalemip illoqarfia aserorneqarmat aserorneqarsimapput, Messiasiussusermut uppernarsaatitut kingorna atorneqarsinnaasut tamaasa nungullugit.
c Takuuk Hjælp til forståelse af Bibelen, qupperneq 878.
d Griikerit, Babylonimiut Persiamiullu paasissutissaataanni itsarsuarnitsani ukioq Artaxerxesip kunngiuffiatut siullertut ilimagineqartoq, 474 u.n.s., tapersersorneqarpoq. Takuuk Insight on the Scriptures, atuagaq 2, qupperneq 614-16, 900.
e Siulittuutimi ilaanni oqaatigaa nalimini siunissamilu messiasioqqusersunik takkuttoqartarumaartoq. (Matîuse 24:23-26) Ilanngutassiaq siulia takuuk.
Qanoq akissavit?
□ Sooq Jesusip Messiasiuneranut neriorsuutaasoq uppernarsaatissat misissortariaqarpavut?
□ Jesusip nagguiisigut qanoq ililluni erserpa Messiasiusoq?
□ Biibilimi siulittuutit suut Jesusip Messiasiuneranut uppernarsaappat?
□ Sutigut Jehovap uppernarsarsimavaa Jesus tassaasoq Messias?
□ Sooq juutit taama amerlatigisut Jesus Messiasitut akueriumanngilaat, soorlu tamanna pissutissaqanngila?
[Qupp. 14-mi assiliartaq]
Jesusip tupinnartuliarpassui tamarmik taassuma Messiasiuneranut aamma uppernarsaataapput