Ilaquttatit sernigikkit Guutip silarsuassaanut nutaamut isersinnaanissaannut
„[Jehova], illit paaraatsigut, eqqarleriinnut ukununnga naassaanngitsumik sernigaluta.“ — TUSSIAAT 12:8.
1, 2. (a) Ulluni kingullerni tatisiffiusuni ilaqutariit ilaat qanoq ingerlappat? (b) Ilaqutariit kristumiuusut nukittuut suna qularisariaqanngilaat?
„ULLUMI nuannaartorujussuuvunga!“ kristumiu utoqqaanertaq Johnimik atilik taama oqarpoq. Sooq taama nuannaarpalutsigaa? „Ernera 14-inik ukiulik panigalu 12-inik ukiulik kuisipput,“ taama oqaluttuarpoq. Aammali allamik nuannaarnera pissuteqarpoq. „Ernera 17-inik ukiulik panigalu 16-inik ukiulik tamarmik maanna ukiumi ataatsimi ikiorti-pionerioreersimapput,“ nangilluni oqarpoq.
2 Akornatsinni ilaqutariippassuit najoqqutassiat Biibilimeersut atortillugit taama angusaqarluartarput. Ilaalli ajornartorsiuteqartarput. „Tallimanik meeraqarpugut,“ aappariit kristumiuusut taama allassimapput, „artornarnerujartuinnarpullu. Meerarput ataaseq silarsuarmut pisoqqamut tammareersimavoq. Maannakkorpiaq Satanip ingammik inuusuttuarartavut saassutarinnguatsiaqai.“ Aappareeqarporlu sualuttunik ajornartorsiortunik, ilaannikkut avinnermik kingunilinnik. Kisianni ilaqutariit kristumiutut pisstsinik ineriartortitsiniarsarisut ’annikilliornartussaq angisooq’ anigussavaat Guutillu silarsuassaa nutaaq iserfigisinnaassallugu. (sarĸúmersitat 7:14; 2 Pîtruse 3:13) Ilaquttatit aniguisinnaaqqullugit qanoq ilillutit illit ikiorsinnaavigit?
Attaveqatigiinnerup pitsaanerulernissaa
3, 4. (a) Ilaqutariittut inuunermi attaveqatigiinneq qanoq pingaartigaa, sunalu pillugu tamatumunnga atatillugu ajornartorsiuteqartarpa? (b) Uiusut sooq tusarnaarluarsinnaasariaqarpat?
3 Attaveqatigiilluarneq tassaavoq ilaqutariit peqqissut uumassutissaat; amigaataappat aaqqiagiinngeqqajaasoqassaaq. „Siunnersuisoqarsimanngikkaangat pilersaarutit asuliinnartarput,“ Ussatit 15:22-mi taama allassimavoq. Soqutiginartumik, aappariinnermik siunnersuisoq ima nalunaarpoq: „Nuliaasut maalaarutigisartagaat nalinnginnaanerpaaq tassa ’Oqaloqatigineq ajorpaanga,’ aamma ’Tusarnaarneq ajorpaanga’. Taavalu uiusut taakku nuliaasut maalaarutigisaannik oqaluttuukkaangakkit, aamma tusarnaarneq ajorpaannga.“
4 Suut pissutigalugit taama attaveqartigiinnermik amigaateqartoqarpa? Siullermik, angutit arnallu assigiinngillat attaveqatigiinnikkullu assigiinngitsumik periaaseqartarlutik. Ilanngutassiami allassimavoq uiusut ’amerlanertigut toqqaannartunik atoriaannaasunillu oqaloqatigiinnissuteqartartut’, kisianni nuliaasut ’ingammik tusarnaartoq paasinniassusilik kissaatigisaraat’. Aappariinnissinni taamaappat pissutsit pitsaanerulersinniarlugit suliniuteqartalerit. Uiusoq kristumiuusoq tusarnaartutut pitsaanerulissaguni ilungersortariaqarpoq. Jakob ima allassimavoq: ’Inuk kinaluunniit tusarasuarluni pili oqalukkumaarnertullunilu.’ (Jâko 1:19) Nuliavit pisariaqartitaa tassaappat ’nallittoqarneqarnissaq’, taava oqaannissaa, naveernissaa peqqussuteqarfigineqarnissaalu pisariaqanngillat. (1 Pîtruse 3:8) „Silatuuvoq oqalunnerminik ingasaassinaveersaartoq,“ Ussatit 17:27-mi taama allassimavoq.
5. Uiusut qanoq ilillutik misigissutsitik eqqarsaatitillu ersersinnerusinnaavaat?
5 Akerlianilli ’oqaluffissaqartarpoq’, immaqalu misigissutsivit eqqarsaativillu ersersinnerunissaat ilinniartariaqarpat. (Nalunaajaasup oqaasii 3:7) Assersuutigalugu, nuliat naammassisimasaanik pitseriarlutit nersortarpiuk? (Ussatit 31:28) Tapersersortarmatit illumilu suliassanik suliaqartarmat qujamasunnerit takutittarpiuk? (Naleqqiuguk Kulorsamiut 3:15.) Immaqaluunniit ’asanninninnik misigititsinivit’ oqaatiginissaat sungiuttariaqarpat. (Taalliat Asannilersaarutit 1:2) Aallaqqaataani immaqa ajornakusoortissagaluarpat, kisianni nuliavit asanninninnik qularunnaassutiginerussavaa.
6. Nuliaasut qanoq ilillutik ilaqutariinni attaveqatigiinneq pitsaanerulersissinnaavaat?
6 Nuliaasummi kristumiuusut? Nuliaasut ilaat oqarsimavoq uimi nalunngimmagu pingaartikkini, tamatuminnga oqarfigisariaqarnagu. Uiusulli aamma pingaartinneqarneq, kajumissaarneqarneq nersorneqarnerlu iluaqutigisarpaat. (Ussatit 12:8) Tamakkuninnga ersitsinerusariaqaraluarpit? Immaqaluunniit tusarnaarnerunissat eqqarsaatiginerusariaqarpat. Uippit ajornartorsiutini isumakuluutigisanilu ammasumik oqaloqatigiissutiginissaat saperpagu, illit inussiarnerlutit pissuserillutillu ikiorsinnaaviuk oqaloqatigalugu?
7. Suut pissutigalugit aappariit oqqatilersinnaappat, tamannalu qanoq pinngitsoortinneqarsinnaava?
7 Soorunami aappariit ingerlaqatigiilluaraluartut allaat ilaannikkut attaveqatigiinnikkut ajutoorsinnaasarput. Misigissutsit sianissutsimut qalliisinnaapput, eqqissisimasumillu oqaloqatigiinneq oqalorujuunnersuannguussinnaavoq. (Ussatit 15:1) ’Tamatta qassiinik naakkiuttarpugut’; aappariit oqqannerat tassaasariaqanngilaq aappariinnerup naggatissaa. (Jâko 3:2) Aappariinnermili ’nillianerit mitallernerillu’ assuarnarput aserornarlutillu. (Evfisumiut 4:31) Oqaatsit ajuallannartut oqaatigineqaraangata erniinnarluinnaq eqqisseqatigiinniarsarisaritsi. (Matîuse 5:23, 24) Oqalorujuunnerit pinngitsoortissinnaasassavasi tamassi Paulusip oqaasii Evfisumiut 4:26-miittut maleruarussigik: ’Seqineq tarrisinaveersiuk narrutsatsimanissinni.’ Aap, ajornartorsiutit tamaasa suli mikisuutillugit oqaloqatigiissutigisarsigik; misigissutsissi nununeqarsinnaajunnaarnissaannut utaqqeqinasi. Ullut tamaasa minuttiaaluit atorlugit pisimasut oqaloqatigiissutigisarussigik attaveqatigiinnissinnut iluaqutaassaaq paasinerluinerillu pinngitsoortinneqarsinnaapput.
’Jehovap oqaaqqissaarutai’
8. Sooq inuusuttut ilaasa sallusuissut qimakkiartortarpaat?
8 Angajoqqaat ilaasa meeqqatik perorsarpiarnagit alliartortittarpaat. Meeraasa ataatsimiinnerit najuuffigisarpaat oqaluussinermullu ilaannikkut peqataasarlutik, kisianni Guutimut attaveqaleriartorneq ajorput. Qaquguluunniit inuusuttut taakkua ilaasa amerlasuut ’uinimmut pilerinartut isinullu pilerinartut’ pissutigalugit sallusuissut qimakkumaarpaat. (1 Juánase 2:16) Angajoqqaat namminneq Harmagedonimit aniguigunik nakkutilliinngissuserli pissutigalugu meeraat ajunaarpata, ila alianassusissaa!
9, 10. (a) Meeqqat ’Jehovap ileqqoreqqusai oqaaqqissaarutaalu malillugit’ perorsassagaanni suna pisariaqarpa? (b) Sooq meeqqat misigissutsinik ammasumik aniatitsisinnaanissaat pingaartorujussuua?
9 Paulus taamaattumik ima allassimavoq: „Ilissilu ataatat, qitornasi narrutsatseqinasigik, perorsartuarlugilli Jehovap ileqqoreqqusai oqaaqqissaarutaalu malillugit.“ (Evfisumiut 6:4, NV) Taamaaliussaguit nammineq Jehovap najoqqutassiai nalunngilluartariaqarpatit. Aliikkutassarsiorneq, atuaqqissaartarneq, ataatsimiinnernut najuuttarneq oqaluussisarnerlu eqqarsaatigalugit maligassaalluartariaqarputit. Paulusip oqaasiisa aamma takutippaat angajoqqaat (1) meeqqatik nakkutigeqqissaartariaqaraat aamma (2) attaveqarfigilluartariaqaraat. Aatsaat taamaalioruit nalunngissinnaavat qaqugu ’oqaaqqissaartariaqarlugit’.
10 Inuusuttuaqqat pissusissamisoortumik oqartussaaffigineqarpallaarumanngillat. Taamaattorli oqaasiisigut, eqqarsaariaasiisigut, atisaasigut nujalereriaasiisigut ikinngutinillu qinersineratigut silarsuarmit sunnertinnermut ersiutaasut malugeqqissaartariaqarpatit. Ussatit 23:26-mi ataataq silatooq ima oqaaseqarpoq: „Ernera, uummatit uannut tunniuguk.“ Meeqqavit eqqarsaatiminnik misigissutsiminnillu ammasumik oqaloqatigisarpaatsit? Meeqqat isornartorsiorneqarnissaq ersissutiginngikkunikku, atuarfiup avataani sammisassat, peeraqartarneq, ilinniartuuneq imaluunniit Biibilimi sallusuissut pillugit misigissusivitik saqqummersinnerussavaat.
11, 12. (a) Nereqatigiittarnikkut ilaqutariit attaveqatigiinnerat qanoq pitsaanerulersinneqarsinaava? (b) Angajoqqaat naammagittarlutik meeqqaminnik attaveqarfiginninniartarpata qanoq kinguneqarsinnaava?
11 Nunat amerlanersaanni ilaqutariit nereqatigiittarneq ileqqoraat. Taamaattumik neriffinni ilaqutariit tamarmik ineriartornartumik oqaloqatigiinnissaminnut periarfissaqarluartarput. Nunanili amerlasuuni TV-p akornutillu allat ilaqutariit nereqatigiittarnerat akornusertarpaat. Meeqqasili nalunaaquttap-akunnerini arlalippassuarni atuarfimmi tigusaasutut issimapput eqqarsaariaatsimillu silamiorpaluttumit sunnertillutik. Nereqatigiikkaangassi meeqqassi attaveqarfiginissaannut periarfissaqarluartarpusi. „Neriffitsinni ullup ingerlanerani pisimasut oqaloqatigiissutigisarpavut,“ anaanaasoq taama oqarsimavoq. Neriffissalli tassaasariaqanngillat perorsaaffiit nuanniitsut imaluunniit killisiuinerit. Tassaasariaqarput piffissat eqqissisimaarnartut nuannersullu!
12 Meeqqanik ammasumik oqalutsitsisinnaaniarneq unamminiarnartuuvoq taamaaliorninnilu kamagittartorujussuusariaqarputit. Kisianni nuanningaartunik kinguneqarsinnaavoq. „Ernerput 14-inik ukiulik nipaarluulluni nikallungasimavoq,“ anaanaasoq isumakuluttoq taama eqqaamalikkersaarpoq. „Qinusaratta naammagittarattalu maanna ammasumik oqaluttalerpoq!“
Ilaqutariittut atuaqqissaaqatigiinneq ineriartornartoq
13. Meeqqat piaartumik ilinniartinneqartalernerat sooq pingaartorujussuua?
13 ’Jehovap oqaaqqissaarutai’ malissagaanni Guutip oqaasiinik ilinniartitsisariaqarpoq. Timoteusitut meeqqat ’meeraanerminnit’ ajoqersorneqartalersariaqarput. (2 Timûtiuse 3:15) Meeqqat piaartumik ajoqersorneqartaleraangamik atuarfimmi uppernikkut misilinneqarnissaminnut nakussatsinneqartarput — soorlu inuuissiornermik, inuiattut ullorsiornernik imaluunniit upperisarsiornikkut nalliuttorsiornermik misilinneqarnerit. Tamakkununnga piareersarneqarsimanngikkunik meeqqat uppernikkut artorsarsinnaapput. Taamaattumik atuakkat Vagttårnip Peqatigiiffiata meeqqanut naqititai, soorlu Ajoĸersuissorssuaĸ tusarnârparput aamma bîbilimik oĸalugtuautíka iluaqutiginiartakkit.
14. Ilaqutariit qanoq ilillutik akuttunngitsumik aalajangersimasumik atuaqqissaaqatigiissinnaappat, illillu nammineq taamaaliorniarlutit qanoq iliorsimavit?
14 Aamma ilaqutariittut atuaqqissaaqatigiittarneq pingaartinneqartariaqarpoq. Mianersunngikkutta akuttusuumik imaluunniit qasunartumik soqutiginanngitsumillu ingerlasinnaavoq, meeqqanut inersimasunullu misiliinerulluni. Qanoq ilillutit pitsaanerulersissinnaaviuk? Siullermik atuaqqissaaqatigiinnissamut ’piffissaq pisiarisariaqarpat’ TV allalluunniit akornutiginagit. (Evfisumiut 5:15-17, NV) „Akuttunngitsumik aalajangersimasumik atuaqqissaaqatigiittarneq ajornartorsiutigisimavarput,“ ataataasup misiutiginngilaa. „Piffissat assigiinngitsut misilissimavavut, kiisamilu unnukkut kingusinnerulaartukkut uatsinnut piffissaalluartoq nanillugu. Maanna akuttunngitsumik aalajangersimasumik atuaqqissaaqatigiittarpugut.“
15. Ilissi ilaqutariittut atuaqqissaaqatigiinnersi qanoq pisariaqartitassinnut naleqquttunngortissinnaaviuk?
15 Taavalu ilissi ilaqutariittut immikkut pisariaqartitasi eqqarsaatigikkit. Ilaqutariippassuit sapaatip-akunneri tamaasa Napasuliaq Alapernaarsuiffik-mi atuagassanik piareersaqatigiittarneq nuannaarutigisarpaat. Ilaannikkulli ilissi immaqa apeqqutissat immikkut ittut oqaloqatigiissutigisariaqarpasi, soorlu atuarfimmi ajornartorsiutit. Atuagaq Unge spørger — Svar der duer (kalaallisuunngortitaanngitsoq) aamma Napasuliaq Alapernaarsuiffik-mi Iteritsi!-milu ilanngutassiat iluaqutaasarput. „Ernivut isummamikkut iluarsarneqartariaqaraangata, atuakkami Unge spørger — Svar der duer-imi kapitali tamatuminnga imalik sammisarparput,“ ataataasoq taama oqarpoq. Nuliaa ima nangippoq: „Sumulluunniit piareersimaniartarpugut. Aalajangersimasoq piareersarsimagaluarlugu allalli oqaloqatigiissutigineqarnissaa pisariaqarpat, taava nangaanata pisariaqartitsineq malillugu allanngortitsisarpugut.
16. (a) Qanoq ilillutit qularinngisinnaaviuk meeqqavit ilinniakkani paasilluarsimagai? (b) Ilaqutariit atuaqqissaaqatigiinneranni suna pinngitsoortinneqartariaqarpa?
16 Qanoq ilillutit qularinngisinnaaviuk meeqqavit ilinniakkat paasilluarsimagaa? Jesusip, Ajoqersuisorsuup, inuit isumaannik aperisarpai, soorlu: ’Qanoq isumaqarpit?’ (Matîuse 17:25) Taamaaliorlutit meeqqavit ilumut isumaqarnerat paasiniaruk. Meeqqat tamaasa namminneq oqaatsiminnik akinissaannut kajumissaarniakkit. Soorunami ilumoorlutik oqaaseqarneranni ilungersorpallaartumik qisuariaruit, kamallutit imaluunniit tupallutit, kingorna oqarfigeqqissallutit immaqa nangaassuteqalissapput. Taamaattumik eqqissisimaniarit. Ilaqutariittut atuaqqissaaqatigiinneq naveersiffimmut allanngortinnaveeruk. Ineriartornartumik nuannaarfiusariaqarpoq. „Paasigaangakku meeqqama ilaat ajornartorsiuteqartoq, kingusinnerusukkut oqaloqatigisarpara,“ ataataasoq taama oqarpoq. Anaanaasoq ima nangippoq: „Ilaqutariit atuaqqissaaqatigiinneranni naveerneqarnermut naleqqiutissagaanni, meeraq kisimiitillusi oqaloqatigineqaruni peqqusiileqissanani ammanerusumik oqalussaaq.“
17. Ilaqutariittut atuaqqissaaqatigiinneq qanoq ililluni soqutiginartunngortinneqarsinnaava, ilissinnilu suna atorluarsimava?
17 Meeqqanik ilaqutariit atuaqissaaqatigiinnerannut peqataatitsiniarneq unamminiarnartuusinnaavoq, ingammik meeqqat assigiinngitsunik ukiullit pineqaraangata. Meeqqat minnerusut eqqissiveqaratik uniffeeruttarput sivikitsuinnarmillu aallussisinnaallutik. Atuaqqissaaqatigiitsillusi eqqissisimaniaritsi. Meeqqatit sivikitsuinnarmik aallussisinnaappata, taava sivikinnerusumik akulikinnerusumilli atuaqqissaaqatiginiakkit. Angorniorneq aamma iluaqutaasarpoq. ’Siulittaasoq ilungersorluni pigili’. (Rûmamiut 12:8, NV) Tamaasa peqataatikkit. Meeraaqqat assilissat oqaaseqarfigisinnaavaat imaluunniit apeqqutissat nalunanngitsut akisinnaallugit. Inuusuttuaqqat qinnuigineqarsinnaapput aalajangersimasoq misissoqqissaarneroqqullugu imaluunniit sammisat atornissaat erseqqissaatigeqqullugu.
18. Angajoqqaat qanoq ilillutik periarfissat tamaasa atorlugit meeqqatik Guutip oqaasiinik eqqaasittarsinnaavaat, sunillu kinguneqartunik?
18 Anersaakkut ilinniartitsineq sapaatip-akunneranut nalunaaquttap-akunnera ataasiinnaq naammanngilaq. Periarfissat tamaasa atorlugit meeqqatit Guutip oqaasiinik eqqaasittakkit. (5 Moses 6:7) Tusarnaarnissaannut piffissaqartarit. Pisariaqaraangat tuppallersarlugit kajumissaartakkit. (Naleqqiuguk 1 Tásalûníkamiut 2:11.) Misiginneqataallutit naakkinninniarit. (Tussiaat 103:13; Malaki 3:17) Taamaalioruit meeqqavit ’nuannaangaalersissavaatsit’, Guutillu silarsuassaanut nutaamut isersinnaanissaannut sernigissavatit. — Ussatit 29:17.
’Illarfissaqarpoq’
19, 20. (a) Ilaqutariittut inuunermi aliikkutassat qanoq pingaaruteqarpa? (b) Angajoqqaat qanoq ilillutik ilaqutariit aliikkutassat pilersaarusiorsinnaavaat?
19 ’Illarfissaqarpoq . . . qittaserfissaqarlunilu.’ (Nalunaajaasup oqaasii 3:4) Hebriiarit oqaasiat ’illarneq’-mik nutserneqartartoq aamma isumaqarsinnaavoq ’nalliussineq’, ’pinnguarneq’, ’aliikkusersorneq’ imaluunniit allaat ’nuannaarneq’. (2 Samuel 6:21, NV; Job 40:24; Eqqartuussisut 16:25; 2 Moses 32:6, NV; 1 Moses 26:8, NV) Pinnguarneq iluaqutaasinnaavoq meeqqanut inersimasunullu tamanut pingaaruteqarluni. Biibilip nalaani angajoqqaat ilaqutariinnut aliikkutassanik aaqqissuussisarsimapput. (Naleqqiuguk Lúkarse 15:25.) Illittaaq taamaaliortarpit?
20 „Illoqannginnersat tamanut ammasut iluaqutigaavut,“ uiusoq kristumiuusoq taama oqarpoq. „Ilagiinni inuusuttut ilaat qaaqqullugit arsartarpugut asiartarlutalu. Nuannaarluta pitsaasumillu katerisimaaqatigiittarpugut.“ Ataataasoq alla ima oqarpoq: „Ernivut ilagalugit sammisinnaasassat pilersaarusiortarpavut. Nalukkiartarpugut, arsariartarpugut, feeriartarpugut. Aliikkusersuinerli eqqortumik inissiffissaqartariaqarput. Oqimaaqatigiissaarinerup pingaaruteqarnera erseqqissarpara.“ Aliikkutassiat peqqinnartut, soorlu assersuutigalugu katerisimaanerit asimukarnerit, katersugaasivimmukarneq taamaattullu nuannaarutigisarunigit meeqqap nuannaarutit silamiorpaluttut kajungerisariaqassanngilai.
21. Meeqqat silamiorpaluttunik nalliuttorsiunngitsoortarneq amigaatitut isigissanngippassuk angajoqqaat qanoq iliorsinnaappat?
21 Aamma pingaartorujussuuvoq meeqqavit inuuissiorneq kristumiuunngitsunillu nalliuttorsiorneq ajornertik pissutigalugu amigaateqartutut misiginnginnissaat. Pilersaarusiorluaruit ukiup ingerlanerani nuannaarfissat arlalippassuit qilanaarisinnaassavaat. Aamma angajoqqaalluartut nalliuttutiinnaq asanninnerminnik ersersitsisarnissaat naammanngilaq. Soorlu Ataatarput qilammiusoq, ’meeqqatik ajunngitsunik tunisinnaasarpaat’ — qaqugukkulluunniit. — Matîuse 7:11.
Ilaquttavit naassaanngitsumik siunissaat sulissutigiuk
22, 23. (a) Annikilliornartussaq angisooq qanilliartortillugu ilaqutariit Guutimik mianerinnittut suna isumalluarfigaat? (b) Guutip silarsuassamut nutaamut isersinnaaniassallutik qanoq iliorsinnaappat?
22 Tussiaasiortoq ima qinusimavoq: „[Jehova], illit paaraatsigut, eqqarleriinnut ukununnga naassaanngitsumik sernigaluta.“ (Tussiaat 12:8) Satanip tatisinera sualukkiartussaaq — ingammik ilaqutariinnut Jehovamut nalunaajaasuusunut. Taamaattoq tatineqarneq sualukkiartuinnartoq tamanna akiorsinnaavarput. Jehova ikiortigalugu aalajangersimalluinnarlutik ilungersorlutik uiusut, nuliaasut meeqqallu, ilaqutariit — aamma ilissi ilaqutariillusi — annikilliornartussamit angisuumit aniguisinnaassapput.
23 Ilissi uiusut nuliaasullu, aappariinnissinni eqqissineq suleqatigiilluarnerlu anguniarsigik Guutip ilissinnut inissisimaffigititai atorlugit. Ilissi angajoqqaat, meeqqassinnut maligassaalluartuaritsi, ilinniartinneqarnissaannut perorsarneqarnissaannullu pisariaqavissunut piffissaqartarlusi. Oqaloqatigisarsigik. Tusarnaartarsigik. Inuunissaat pineqarpoq! Ilissi meeqqat, angajoqqaasi tusarnaarlugit naalassigik. Jehova ikiortigalugu ingerlalluarussi Guutip silarsuassaani nutaami inuunissaq naassaanngitsoq angusinnaavarsi. (wD 15/10 92)
Eqqaamavigit?
□ Uiusut nuliaasullu qanoq ilillutik attaveqatigiinnertik pitsaanerulersissinnaavaat?
□ Angajoqqaat qanoq ilillutik meeqqat ’Jehovap ileqqoreqqusai oqaaqqissaarutaallu malillugit’ perorsarsinnaavaat? (Evfisumiut 6:4)
□ Ilaqutariittut atuaqqissaaqatigiinneq qanoq ililluni ineriartornartinneqarlunilu soqutiginarnerutinneqarsinnaava?
□ Angajoqqaat qanoq ilillutik ilaqutariit aliikkutassaqarnissaallu pilersaarusiorsinnaavaat?
[Qupp. 18-mi ungalusaq]
Nipilersorneq — sunniineq pissaaneqartoq
Meeqqanik perorsaaneq pillugu atuakkami ima allassimasoqarpoq: „Inuppassuit tutsaanni . . . ernguterujussuarnissamik, kokainimik atornerluinisssamik, hashitornissamik imaluunniit ikiaroornartunik allanik atornerluinissamik kajumissaarisuuguma tupaallatsitserujussuassagaluarpunga. . . . Taamaattorli angajoqqaat meeqqatik aninganik tunisarpaat nuutit immiussallu tamakkuninnga nersuinernik imallit pisiarisinnaaqqullugit.“ (Raising Positive Kids in a Negative World, Zig Ziglar-imit) Assersuutigalugu, USA-mi inuusuttorpassuit erinarsuutit rap-imik taaneqartut atoqatigiinnermik sukumiisumik imaqartut uteqqeqattaartarpaat. Illit meeqqatit ikiortarpigit nipilersornermik qinersinissaanni immikkoortitsisinnaaqqullugit?
[Qupp. 17-mi assiliartaq]
Neriffiit tassaasinnaapput ilaqutariit ataasiussuseqarnerannut attaveqatigiinnerannullu periarfissat nuannersut