Jehova tunaariuk!

„[Jehova] tunaariuk uummatikkut iluunngarlutit.“ — USSATIT 3:5.

1. Ussatit 3:5 angummut inuusuttumut qanoq sunniuteqarsimappat, qanorlu kinguneqarpat?

„NAALAGAQ TUNAARIUK UUMMATIKKUT ILUUNNGARLUTIT, NAMMINERLU SILAQASSUTSIT TATIGEQINAGU!“ „Oqaatsit taakku Biibilimeersut,“ ajoqersuiartortitaq utoqqasaaq oqaluttuarpoq, „illumi iserfigisimasanni sinilerlugit iikkami nivingasut malugaakka. Ullup tamatuma sinnerani eqqarsaatigaakka. Imminut ima aperivunga: Uanga uummatikkut iluunngarlunga Guuti tunaarisinnaanerpara?“ Taamani 21-nik ukioqarpoq. Maanna 90-inik ukioqarpoq sulilu Australiami Perthimi utoqqaanertatut aalajaalluni kiffartorluni, inuunerlu Jehovamut tatiginnilluinnarsimanini pissutigalugu pisooq kingumut qiviarsinnaavaa. Ukiuni 26-ni ilaatigut Ceylonimi (Sri Lanka), Burmami (Myanmar), Malaysiami, Thailandimi, Indiami Pakistanimilu, siornatigut taamani oqaluussiffigineqarsimanngitsuni, pioneritut kiffartorsimavoq.a

2. Ussatit 3:5-ip qanoq tatiginnissuseqalersittariaqarpaatigut?

² ’Jehova tunaariuk uummatikkut iluunngarlutit’ — oqaatsit taakku Ussatit 3:5-imi allassimasut tamatta killittariaqarpaatigut uummatikkut iluunngarluta inuunerput Jehovamut tunniuteqqullugu, tatigalugu taassuma uppernerput nakussatsissinnaagaa, allaat akornutit qaqqatut ittut saperunnaarsissinnaallugit. (Matîuse 17:20) Maanna Ussatit 3:5 ataqatigisai ilanngullugit misissoriartigu.

Ataatarpalaartumik ilitsersorneqarneq

3. (a) Ussatit kapitalii siulliit qulingiluat qanoq kajumissinarpat? (b) Sooq Ussatit 3:1, 2 misissoqqissaartariaqarparput?

³ Ussatit-ni kapitalit qulingiluat siulliit ilitsersorneqarnermik ataatarpalaartumik ulikkaarput. Tassaapput Jehovap silatuumik unnersuussutai qilammi Guutip ernerisut inuunermik aammalu nunami paratiisiusumi ’Guutip qitornaasa kiffaanngissusiata naalannaataanik’ qilanaarinnittunut tamanut. (Rûmamiut 8:18-21, 23) Tassaniipput unnersuussutit pitsaasut angajoqqaat erniminnik panimminnillu perorsaaniarnerminni atorluarsinnaasaat. Ingammik Ussatit kapitali 3-mi siunnersuutit ajunngeqaat, ima aallartipput: „Ernera, ajoqersuussutikka puigorniaqinagit inassutikkalu uummatinni pigiliullugit!“ Satanip silarsuaanut ajortumut naggatissaq qanilliartortillugu Jehovap oqaaqqissaarutai maleruaqqissaartuarniartigik. Immaqa sivisuumik taamaalioreerputit, aalajaatsulli tamarmik ’ullunik ukiunillu amerlasuunik inuuffissaqarnissamik annerusumillu pilluaateqalernissamik’ — tassa Jehovap aaqqissuussaani nutaami inuunissamik naassaanngitsumik — neriorsorneqarput. — Ussatit 3:1, 2.

4, 5. (a) Attaveqatigiinneq pilluarnartoq suna Juánase 5:19, 20-mi eqqartorneqarpa? (b) 5 Moses 11:18-21-mi kajumissaarut qanoq ililluni ullutsinni atorneqarsinnaava?

⁴ Ataatap ernerullu imminnut attaveqarnerat erlinnartorujussuusinnaavoq. Jehovap tamanna aaqqissorsimavaa. Jesus Kristusip nammineq Jehovamut qanimut attaveqarnini ima oqaatigisimavaa: ’Erneq isumaminik qanoq-iliorsinnaanngilaq, kisianni Ataataq taamaaliortoq takuguniuk; taanna qanoq-ilioraangat ernertaaq taamaalioraraaq. Ataatammi erneq asavaa, qanoq-iliorninilu tamaasa taassumunnga takutittarpai. (Juánase 5:19, 20) Jehovap siunertarisimavaa nammineq nunarsuarmilu ilaqutariissortami akunnerminni taamatut attaveqatigiinneqassasoq, kiisalu aamma ataatat nunamiusut qitornaasalu akornanni.

⁵ Israelitoqqami ilaqutariit tamarmik imminnut tatigeqatigiinnissaannik kajumissaarneqarsimapput. Jehovap ataataasut ima unnersuussimavai: „Oqaatsikka taakku uummatissinni tarnissinnilu aalajangiutissavasi. Assassinnut qilerussigit ilisarnaatitut qaassinniitillugillu eqqaasitsisussatut. Qitornassinnut ilinniartitsissutigisarsigit oqaluuserisarlugillu illussinni issiasaraangassi aqqusinermilu angalaaraangassi, innaraangassi makikkaangassilu. Allassigit illussi matserfiinut illoqarfissilu isertarfiinut, taava ilissi qitornasilu nunami [Jehovap] uppernarsaalluni siuaasassinnut tunniukkumasaani najugaqarumaarpusi qilak nunarsuup qulaani siaarsimajuartillugu.“ (5 Moses 11:18-21) Jehova Guutip, Ajoqersuisorsuatta, oqaasiisa isumassarsiarititaasut angajoqqaat qitornaallu, aammalu ilagiinni kristumiuusuni kiffai tamaasa, taassumunnga qanimut attaveqartissinnaavaat. — Jesaja 30:20, 21.

6. Qanoq ililluta Guutimi inunnilu nuannarisaalersinnaavugut?

⁶ Guutip innuttaanut, utoqqarnut inuusuttunullu, ataatarpalaartumik unnersuussutit silatuut Ussatit 3:3, 4-mi nangipput: „Iperarnaviikkit ajunngissuseq unneqqarissuussuserlu, ujamiliutikkilli qungatsinnut uummatinnullu allallugit! Taava Guutimit inunnillu iluarisaalissaatit taakkunanngalu angutitut silassorissutut isigineqassallutit.“ Jehova Guuti nammineq ilumoortumik tunniusimassuseqarpoq unneqqarissuseqarlunilu tamanit annerpaamik. Soorlu Tussiaat 25:10-mi oqaatigineqartoq: „[Jehovap] aqqutai tamatigut tassaapput ilumuussuseq sallusuissullu“. Jehovatut iliornitsigut pissutsit taakku illersuisinnaassusiallu pingaartittariaqarpavut, ujamittut akisoorujussuartut erligalugit uummatitsinnullu ikkuulluartittariaqarlugit. Taava ima ilungersorluta qinusinnaassaagut: „Nallittuissutsinnik erliguuteqinanga, [Jehova], ilumoorsutsit sallusuissutsillu sernissortigiuassavakka.“ — Tussiaat 40:12.

Tatiginninneq ataavartoq

7. Jehovap tatiginassutsi sutigut ersersissimavaa?

⁷ Tatiginninneq Webster’s Ninth New Collegiate Dictionary-mi tassaanerarneqarpoq „kia suulluunniit pissusianik, piginnaaneranik, nakuussusianik ilumuussusianilluunniit tunaartarinnilluinnarneq“. Jehovap pissusia ajunngissusianut, imaluunniit ilumoortumik tunniusimaneranut, atalluinnarpoq. Neriorsuutiminillu naammassinnissinnaanera qularutiginngilluinnarsinnaavarput, aqqatami angingaartup, Jehovap, nalunaarpaa siunertaminik Naammassinnittartuusoq. (2 Moses 3:14; 6:2-8) Pinngortitsisutut nakuussutsip nukiillu pilerfigaat. (Jesaja 40:26, 29) Ilumoorluinnartuuvoq, ’sallusinnaanngilarlu’. (Epr. 6:18) Taamaattumik tamanna Jehovap, Guutitta, ilumoortut tamarmik pilerfiata, tatiginnitsimi sernissornissaannut siunertamilu angingaartut tamarmik eqquutsinnissaannut ajugaqanngitsup tatigilluinnarnissaanut kajumississutigissavarput. — Tussiaat 91:1, 2; Jesaja 55:8-11.

8, 9. Sooq tatiginassuseq silarsuarmi taama amigaataatigaa, Jehovallu innuttai tamatumunnga akerliusumik qanoq ippat?

⁸ Silarsuarmi ajortunngorsimasumi avatitsinniittumi tatiginassuseq ajoraluartumik amigaataaqaaq. Piumatussuseq peqquserlunnerlu sumi tamaani takussaapput. Atuagassiap World Press Review-ip maaji 1993-imoortup saqqaani ima allassimasoqarpoq: „PEQQUSERLUSSIARTORNERSUAQ — Silarsuarmik Aaqqissuussami Nutaami aningaasat peqquserluutit. Peqquserlunneq Brasiliamiit Tysklandimut, USA-miit Argentinamut, Spaniamiit Perumut, Italiamiit Mexicomut, Vatikanimiit Ruslandimut siaruarsimavoq.“ Silarsuarmik aaqqissuussamik nutaamik taaneqartartoq uumissuinermik, piumatussutsimik tatigisassaanngissutsimillu tunngaveqarami inuiannut atugarliornermik taamaallaat tunniussassaqarpoq.

⁹ Inuiaat politikkikkut aqunneqartut assiginagit Jehovap Nalunaajaasuisa tassaanertik ’inuiaqatigiit Jehovamik Guuteqartut’ pilluaatigeqaat. Taakku kisimik tatiginnillutik oqarsinnaapput: ’Guuti tunaarigatsigu siooranngilagut.’ Pinngitsoqaratik ima nillersinnaapput: „Guutip ikiuineratigut oqaasii unnersiutigaakka. . . . Guuti tunaarigakku ersinngilanga.”— Tussiaat 33:12; 56:5, 12.

10. Kristumiorpassuit inuusuttut aalajaattuaannarnissaminnut suna iluaqutigisimavaat?

¹⁰ Asiap ilaani Nalunaajaasut inuusuttut unatarneqarlutillu parnaarunneqartarsimapput, Jehovamillu tunaarinninnertik iluaqutiginerpaallugu ajortumik pineqarnertik nikallujuillutik atorsimavaat. Nalunaajaasoq inuusuttoq persuttarneqarujussuarsimasoq parnaarussivimmiilluni unnuit ilaanni misigaaq saperluinnalerluni. Inuusuttulli allap tarrup ataani nipaarsaarluni ornippaa isussuffigalugulu: „Nakkaannaqinak; uanga nakkaannarninniilli isumakkut eqqissiveerunnikuuvunga.“ Nalunaajaasup aalajaannissaminik aalajangersimanini taamaalilluni nutarsarpaa. Jehova tatigilluinnarsinnaavarput Satanip assuarnaassutsitsinnik aseruiniarluni ilungersornerinut sunulluunniit qasusuilluta akiuunnissatsinnut ikiorumaaraatigut.— Jeremia 7:3-7; 17:1-8; 38:6-13, 15-17.

11. Jehovamik tatiginninnissatsinnut qanoq ililluta kajumissisinneqarpugut?

¹¹ Inatsisip siulliup ilaa imaappoq: ’Jehova Guutit asassavat uummatikkut iluunngarlutit.’ (Mák. 12:30) Guutip oqaasii eqqarsaatigeqqissaaraangatsigik ajoqersuutit ilumoortut nuanningaartut uummatitsinnut annguttarput Guutimullu, kisimi naalagaasumut Jehovamut, kiffartornitsinni sapinngisarput tamaat iliuuseqarnissatsinnut kajumissisinneqartarpugut. Uummaterput taassumunnga qujamasunnermik ulikkaarpat — ilinniartitsissutigisimasaanut tamanut, uagutsinnut iliuuserisimasaanut tamanut uagutsinnullu iliuuseriumaagaanut qujamasunnermik ulikkaarpat — taassuma annaassinissaa tunaarilluinnalertarparput. — Jesaja 12:2.

12. Kristumiorpassuit qanoq ilillutik ukiorpassuarni Jehovamik tatiginninnermik ersersitsiuarsimappat?

¹² Tunaarinninneq, imaluunniit tatiginninneq, tamanna ukiorpassuarni ineriartortinneqarluni pigineqarsinnaavoq. Jehovamut nalunaajaasoq maniguuttoq ukiut 50-it sinnerlugit Napasuliaq Alapernaarsuiffiup Peqatigiiffiata qullersaqarfiani Brooklynimiittumi 1927-imi apriili aallarnerfigalugu kiffartorsimasoq ima allassimavoq: „Qaammatip matuma naanerani ajunngitsorsiassarsivunga 5 dollarinik, taakkununnga ilaavoq assiliaaraq kusanartoq Ussatit 3:5, 6-imik oqaasertalik . . . Jehova tunaarissallugu pissutissaqarluarpoq, qullersaqarfimmimi kiffartorninni erniinnaq paasisimavara Jehova ’inussiaqartoq aalajaallunilu silatuumik’ nunarsuarmi maani Naalagaaffiup soqutigisaanik tamanik aalajaalluni isumaginnittumik. — Matîuse 24:45-47.“b Kristumiup taassuma uummataa aningaasanut asanninnermuunngitsoq, ’pequummulli nungujuitsumut qilammiittumut’, sammisimavoq. Aamma ullumikkut Napasuliaq Alapernaarsuiffiup Peqatigiiffiata angerlarsimaffiutaani Betelini sumi tamaaniittuni sulisut tuusintilikkuutaat annikitsunnguamik ajunngitsorsisarnissarneq akueralugu inuupput. Ulluinnarni pisariaqartitaminnik Jehovap isumassuinissa tunaartaraat. — Lúkarse 12:29-31, 33, 34.

Jehova tatigiuk

13, 14. (a) Unnersuussutit inersimarpaluttut taamaallaat sumi nassaassaappat? (b) Qinugisaaneq anigussagaanni suna pinngitsoorniartariaqarpa?

¹³ Ataatatta qilammiusup ima oqaappaatigut: „Nammineq silaqassutsit tatigeqinagu.“ (Ussatit 3:5) Silamiut siunnersortaat tarnillu pissusiinik ilisimasaqartortaat Jehovap ilisimassusiatut atsigisumik ilisimasaqalersinnaanngillat. „Siuneqassusia killisissaanngilaq.“ (Tussiaat 147:5) Silamiut ilisimatuuisa nuimasut ilisimassusiat imaluunniit misigissutsivut tammartitsisartut tatiginagit Jehovap, oqaasiisa ilagiinnilu kristumiuni utoqqaanertat unnersuussutaat inersimarpaluttut tatiginiartigik. — Tussiaat 55:23; 1 Korintumiut 2:5.

¹⁴ Inuit ilisimassusiat inuttullu inissisimaffimmik tulluusimaarutiginninneq ullormi misilinneqarfissarsuarmi qanilliartorasuartumi iluaqutigisinnaanavianngilavut. (Jesaja 29:14; 1 Korintumiut 2:14) Sorsunnersuup kingulliup nalaani Japanimi Guutip innuttaanik paarsisut ilaat pikkorissoq kisianni pingaarniartoq nammineq siuneqassutsiminik tatiginnilersimavoq. Tatineqalerami tunussivoq, ilagiinniittullu amerlanersaat malersugaaleramik aamma nakkaannarput. Qatanngut arnaq Japanimiu parnaarussivimmi ipertuumi naakkittaatsumik pineqarnermini sapiilluni nikallujuissimasoq ima oqarpoq: „Inuit aalajaattuaannartut immikkut piginnaanilissuunngillat malugeqqusaartuunatillu. Tamatta pinngitsoqarata Jehova uummaterput tamakkerlugu tatigiuaannartariaqarparput.“c

15. Guutip pissusiata assinga suna Jehovamit iluarisaaniassagutta pingaartorujussuua?

¹⁵ Nammineq siuneqarsuseq pinnagu Jehovamik tatiginnissagaanni maniguunneq pisariaqarpoq. Jehovamik iluarisaajumasunut pissuseq tamanna pingaartorujussuuvoq! Ilami allaat Guuterput, qilammi nunamilu kisimi oqartussaasoq, pinngortitaminut sianissusilinnut attaveqarnermini maniguuttumik pissuseqartarpoq, tamannalu qujamasuutigisariaqarparput. „Taanna pavanersuaq issiavoq samungarsuarli isigaluni! Makitippai nikanartoq pujualanit.“ (Tussiaat 113:6, 7) Naakkinningaartuugami ernermi asasami, Jesus Kristusip, utertitsissutitut pilliutaa tunngavigalugu sanngiissutitsinnik isumakkeerfigisarpaatigut. Ajunngissusianut pisassarinngisaralutsinnut tamatumunnga qujamasuttariaqaqaagut!

16. Qatanngutit angutit ilagiinnik akisussaaffinnik qanoq ilillutik anguniagaqartariaqarpat?

¹⁶ Jesus ilaanni oqarsimavoq: ’Akitsiniartoq nikanarsissavoq, nikanartittorlu akitsissavoq.’ (Matîuse 23:12) Qatanngutit angutit kuisimasut maniguullutik ilagiinni kristumiuni akisussaaffinnik anguniagaqartariaqarput. Nakkutilliisulli suliassatik atorfittut qaffasissutut pinnagit maniguulluni, pingaartitsilluni ilungersorlunilu suliassamik Jesusip suliarisimasaatut ittumik suliaqarnertut isigisariaqarpaat. Jesus ima oqarsimavoq: ’Ataataga manna tikillugu sulimmat uangattaaq sulivunga.’ — Juánase 5:17; 1 Pîtruse 5:2, 3.

17. Tamatta suna eqqaamasariaqarparput, qanorlu iliulissutigisariaqarparput?

¹⁷ Jehovap isaani pujoralaannannguunerput maniguulluta qinorpasillutalu eqqaamajuarniartigu. Nuannaarutissaraarpullu ’Jehovap nallittuinera atammat naassaanngitsumut, iluarsusialu anngutissammat qitornat qitornassaannut’! (Tussiaat 103:14, 17) Pinngitsoqarata Guutip oqaasianik atuaqqissaartartuusariaqarpugut eqiasuitsut. Piffissaq nammineq ilaqutariittullu atuaqqissaarnermut, ilagiinnilu ataatsiminnernut atortagarput piffissap sapaatip-akunnerani atortakkatta pingaarnersaattut tamatta isigisariaqarparput. Taamaalilluta ’Illernartuusumik ilisarsissaagut’, tamannalu „tassaavoq silaqassuseq“. — Ussatit 9:10.

„Sumiikkaluaraangavilluunniit . . .“

18, 19. Ussatit 3:6 inuunitsinni qanoq ililluta atorsinnaavarput, qanorlu kinguneqassava?

¹⁸ Jehova, siuneqassutsip aallaavia, Ussatit 3:6-imi ima uagutsinnut ujartoqquneqarpoq: „Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ Qinusarnikkut Jehovamut qanimut attaveqarneq taassuminnga eqqarsaatiginninnermut ilaavoq. Sumiikkaluaraangattaluunniit pissutsit qanorluunniit ittut atoraluaraangatsigik qinunikkut taassumunnga saaffiginneriaannaavugut. Ulluinnarni sulitilluta, oqaluussiartornissatsinnut piareersartilluta illumiillu illumut Naalagaaffik pillugu oqaluussitilluta qinusinnaajuarpugut Guutip suliarput pilluaqqussagaa. Taamaappat immikkut pisinnaatitaaffik naleqangaartoq nuannaarnerlu pigissavarput, tassa ’Guuti saqeqatigissavarput’, qularutiginagu ’ingerlavissarput nalimmatsissagaa’, soorlu Guutimik mianerinnittunut, Enokimut, Noamut, Israelikkunnullu aalajaatsunut soorlu Josuamut Danielimullu taamaaliorsimasoq. — 1 Moses 5:22; 6:9; 5 Moses 8:6; Josua 22:5; Daniel 6:23; takujuttaaq Jâko 4:8, 10.

¹⁹ Kissaatigisavut Jehovamut nalunaartarutsigik qularutigissanngilarput ’eqqissinerup Guutip piata sianinernit tamanit annerungaartup uummativut eqqarsaativullu sernigissagai Kristus Jesusimi’. (Filípimiut 4:7) Eqqissineq Guutip pia tamanna kiinnatsinni nuannaarpaluttumi takuneqarsinnaappat oqaluussinitsinni naapitatta tusarliussamut soqutiginnilissutigisinnaavaat. (Kulorsamiut 4:5, 6) Aamma tatineqarnernit naapertuilluanngitsuliornernillu ullumikkut silarsuarmi nalinginnaaqisunit eqqorneqarsimasunut qiimmaallaataassaaq, soorlu matuma kinguliani takuneqarsinnaasoq.d

20, 21. (a) Nazistit naalliutsitsinerisa nalaanni Jehovap nalunaajaasuisa assuarnaassusiat allanut qanoq ililluni kajumississutaasimava (b) Jehovap nipaa qanoq aalajangissutigisariaqarparput?

²⁰ Max Liebsterip, juutip Holokaustimi tupinnaannartumik aniguisimasup, Nazistit toqoraasarfiannut ingerlaarsimanini ima oqaluttuaraa: „Qimuttuitsut qamutitaannut allanngortillugit marluuttarissanik ineerarpassuanngortinneqarsimasunut parnaarunneqarpugut. Ineeqqat ilaannut isertitaapiloorama tigusaq eqqissisimarpaseqisunik isilik iserfigaara. Parnaarussaasimavoq Guutip inatsisaanut naalannini pissutigalugu, inuup allap aavanik kuisinissaraluamut taarsiullugu parnaarussaanissaq immaqalu toqutaanissaq qinersimavaa. Tassaana Jehovap Nalunaajaasuisa ilaat. Meeqqaminik arsaarneqarsimavoq, nulialu pillakkatut toqutaasimavoq. Nuliamisut pineqarnissani naatsorsuutigaa. Ulluni 14-ini angalanermi tamatumani qinnutikka akineqarput, toqumummi angalanermi sivisuumi tamatumani inuunermik naassaanngitsumik neriuut nassaaraara.“

²¹ Auschwitzimit (Nazistit tigusanut katersuutsitsiviannit), „løvet inaat“-nik taasaminit, iperagaanermi kingorna kuisippoq Jehovamullu nalunaajaasumik, aamma parnaarussaasimasumik Dachauimilu tigusanut katersuutsitsivimmi naalliutsitaasimasumik ataatalimmik, katippoq. Ataataa taanna tassaniitsilluni tusarlerneqarsimavoq nuliani panitsillu aamma tigusaasimasut. Qanoq misigisimanini oqaluttuaraa: „Isumaaluttorujussuuvunga. Taava ullut ilaanni uffariakaallutik utaqqisut akornanniitillunga tusalerpara Ussatit 3:5, 6 issuarneqartoq . . . akisuavoq soorlumi tassa qilammit tutsiuttoq. Tatitusaarnissannut pisariaqartitarluinnara pivara.“ Tassaana allassimaffik parnaarussat ilaannit issuarneqartoq, pisukkulli tassuunakkut erseqqissarneqarpoq Guutip oqaasii uagutsinnut qanoq sunniisinnaatigisut. (Eprîarit 4:12) Qanortoq ukiumut 1994-imut allassimaffikkut Jehovap nipaa ullumikkut uagutsinnut kimittuumik sunniigili: „[Jehova] tunaariuk uummatikkut iluunngarlutit.“!

[Quppernerup ataani ilanngussat]

Uteqqiissutissat

□ Unnersuussut qanoq ittoq Ussatit-ni saqqummiunneqarpa?

□ Jehovamik tatiginninnerput qanoq iluaqutigissavarput?

□ Jehovamik tunaarinninnitsinnut suna ilaava?

□ Sooq Jehova sumiikkaluaraangattaluunniit eqqarsaatigisariaqarparput?

□ Jehovap qanoq ililluni ingerlavissavut nalimmatsertarpai?

[Qupp. 15-mi assiliartat]

Naalagaaffimmik nutaarsiassaq nuannersoq inunnik unneqqarissumik uummatilinnik kajumissisitsisarpoq