Pionerit pilluaqqussutinik tunisisarlutillu pisarput
„PIONERIUNEQ suliffigissaarnermit naleqarnerungaarpoq. Inuit Jehovamik sallusuissummillu ilinniartinnerannit allamik nalerisimaarnarnerusoqanngilaq.“ Arnap kristumiup pioneriunini — piffissani tamaat atorlugu oqaluussisartuunini — pillugu oqarpoq. Suliffiit allat qassit taama nuannaalersitsisinnaappat?
Pioneriuneq anguniagassaavoq qaffasissoq immikkullu piginnaatitaaffiusoq erlinnartoq. Qanoq ililluni inooriaaseq taamaattoq anguneqarsinnaava? Pioneriunerup pilluaqqussutissartaanik misiginissap tungaanut nikallujuinnissamut suut pisariaqarpat?
Marluk pingaartorujussuupput. Siullermik periarfissagissaarneq. Amerlasuut pioneriunissamut periarfissaqanngillat. Aappassaanik anersaakkut piginnaanerit inuunermillu isiginneriaaseq eqqortut. Soorunami pioneriunissamut periarfissaqaraluarutta periarfissaqanngikkaluaruttaluunniit, tamatta kristumiutut piginnaassutsit ineriartortissinnaavavut.
Sooq ilaat pioneriusut
Pioneritut iluatsitsissagaanni suut piginnaaffigisariaqarpat? Oqaluussisinnaaneq pingaartorujussuuvoq. Pionerit nutaarsiassaq nuannersoq takornartanut saqqummiutissallugu nalunngittariaqarpaat, soqutiginnittunik pulaaqqisinnaasariaqarput angerlarsimaffinnilu Biibilimik atuaqqissaarnermik aqutsisinnaasariaqarlutik. Tamakkununnga piginnaassuseqannginnerup pioneri nikallortissinnaavaa. Allanittaarli pingaartoqarpoq.
Soorlu, pallorfiginninnitsinnut tunngasut tamarmik Jehovamut peqatigiiffianullu attaveqarnertinnut atapput. Pioneriuneq tamakkununnga ilaavoq. Pioneri inuusuttoq Radomik atilik nassuiaavoq: „Inuusuttumut allamik ajunnginnerusoqanngilaq Jehovamik eqqaamanninnissamit sallusuissutillu aqqutaatigut ingerlanissamit.“ Aap, pioneriuneq inuusuttunut Jehovamik asanninnermut tassungalu qaninnermut takutitsissutissaalluarpoq. — Nalunaajaasup oqaasii 12:1.
Ilisimasaqarneq paasinninnerlu aamma pinngitsoorneqarsinnaanngillat. (Filípimiut 1:9-11) Taakkuamiuna anersaakkut inuunerput ingerlakkaat. Anersaakkut imaaruttuussanngikkaanni, nuannaarutissaarutissanngikkaanni qulalissanngikkaannilu nammineerluni atuaqqissaartarneq pinngitsoorneqarsinnaanngilaq. Soorunami ilisimalikkatta eqqarsariaaserpuinnaanngitsoq aammattarli uummaterput killittariaqarpaat. (Ussatit 2:2) Taamaattumik ilisimalikkatta uummaterput killissappassuk atuaqqissartarnitta saniatigut qinuneq eqqarsaatiginneqqissaarnerlu pisariaqartipavut. Taava periarfissaqalerutta pionerinngornissarput kissaatigilissavarput. — Naleqqiuguk Esra 7:10.
Pioneriugaanni aamma imminut pilliutigeriaannaasuusariaqarpoq. Angutip inuusuttup Ronip pionerinngornissaminut suna tamaat pilersaarusiorsimavaa. Aallartinnissaminut periarfissaqalernissani utaqqiinnaarpaa. Suliffik pioneriunermik inuunerullu nuannaarniutaanik ataatsikkut atuinissaminut periarfissiisoq ingammik kissaatigaa. Qatanngummut arnamut inersimalluartumut tamanna eqqaagamiuk akissutaa tupaallaatigeqaa: „Iliuutsit, neriorsuutaanngitsut, Jehovap pilluaqqusarpai.“ Angut inuusuttoq akissaatikinnerulerfigisaminik pioneriusinnaanermut periarfissiisumik suliffittaarpoq. Akissarsiakinnerulluni inuulernissamut Matîuse 6:25-34-p eqqarsaatiginerata ikiorsinnaavaatigut.
Siunnersuutaalluartunut maniguulluni maleruaarusussuseq pionerinngorsinnaanermut iluaqutaassaaq. Kristumiup Hannap inuunermini siusissukkut pionerinngornissani kissaatigilersimavaa. Ilaqutaqaleramili kingusinnerusukkullu niuernermut tunngasunut sammisaqalerami pionerinngunngitsoorpoq. Utoqqaanertat eqqumalluartut siunnersuilluarnerisigut suliffini taamaatillugu pionerinngorpoq. Maannakkut Hannap allanik tunniulluinnarnissaannut ikiuisarnini unittoorsimasunillu ikiuisarnini nuannaarutissarsiffigisaqai.
Sallusuissutip inuunermut sunniutigisimasaanik qujamasuutiginninneq pioneriunermut aamma aallarniutaasinnaavoq. Arnap isumatsarujussuarsimasup aappariittut inuuneranik aserorsimasumik pisimasoq eqqarsaatigisinnaavarput. Guutip oqaasiani sallusuissut ilikkaramiuk malerualerlugulu inuunera allanngorujussuarsimavoq. Sallusuissutip inuunermini sunniinera killissutigalugu aalajangersimavoq qujamasunnerminut takutitsissutigisinnaasani pitsaanerpaaq tassaasoq pionerinngorneq allanillu ikiuineq. Taamaaliorporlu, maannakkullu Biibilimik atuaqqissaaqateqartarneq pilluartunillu ilaqutaqarnermik pilluaqqusaaneq misigaa.
Allat ikiuisinnaapput
Pionerit allanik pionerinngortitsigajupput. Rado, siuliani taaneqareersoq, arfinilinnik ukioqartoq angajoqqaavi pionerinit marlunnit Biibilimik atuaqqissaaqatigineqartalersimapput. Suli ukiukeqaluni piffissartik tamaat oqaluussisartut taakku akulikitsumik oqaluusseqatigisalersimavai. Rado nammineq 17-inik ukioqarluni pionerinngorpoq. Angut inuusuttoq alla, Arno, angerlarsimaffimmi kristumiusumi alliartorsimavoq anersaakkulli sanngiillisimalluni. Kingusinnerusukkut anersaakkut nukittorsalerpoq, maannakkullu oqarpoq: „Pionerinit kaammattorneqarsimaqaanga. Ilagisarsimaqaakka ingammik atuanngiffitsinni ilaannikkullu oqaluussinermut nalunaaquttap-akunneri 60-it atortarsinnaasimavakka. Tamatuma kingorna pionerinngornissaq [qaammammut nalunaaquttap-akunneri 90-it oqaluussinermut atortarlugit] artornanngilaq.“ 1 Korintumiut 7:29-31 silap matuma piinik tamakkiisumik atuinnginnissaq tunngavigalugu eqqarsaqqissaarneq inuusuttunut taamaattunut ikiuutaalluarsimavoq.
Pionerinngorusunneq sorlanilluarnerusinnaavoq angerlarsimaffimmi anersaakkut tunngasut salliutinneqarpata angajoqqaallu meeqqatik piffissaq tamaat atorlugu kiffartuussinermik kajumissaartarpatigit. Philo, angerlarsimaffimmi taamaattumi alliartorsimasoq, oqarpoq: „Amerlasuut siunnersorsimavaannga ilinniarnera ingerlatiinnaqqullugu, silarsuarmi siunissaqarniassagama. Angajoqqaamali silatunerusumik qinersinissannik ikiorsimavaannga. Oqaluttuussimavaannga siunissara isumannaarluarniarukku Jehovamut attaveqarnera ineriartortittariaqariga.“
Arnap inuusuttup Thamarimik atillip pionerinngorsimanerminut angajoqqaami maligassiuilluarnerat ilungersorsimanerilu pissutaanerarpai. Oqarpoq: „Oqarsinnaanngilanga qangarpiaq inuunermut anersaakkut isiginnittaatsimik ineriartortitsilersimallunga, nalunngilarali inunnguuserinagu. Angajoqqaama oqaluussinermut ataatsimmiittarnernullu peqataasarnermut atatillugu ileqquisa, sallusuissummillu asanninnerata, anersaakkut isiginnittaaseqalernissannut ikiorluarsimavaannga.“
Aalajangiinerit
Pionerinngoreernerup kingorna silami tamatumani aalajaattuaannaraanni iluaqutissartai tamakkiisut anguneqarsinnaalissapput. Siunnersuutit atoriaannaat pisariaqartassapput. Assersuutigalugu pionerit ilikkartariaqarpaat angusaqarluarniarluni piffissamik pilersaarusiornissaq. Pingaarnerpaavorli Jehovamut peqatigiissortaanullu attaveqarneq.
Tassunga attuumassuteqarluartuuvoq qinusarneq. „Sallusuissut ilikkarakku, pionerinngorusuttorujussuuvunga,“ Cor oqarpoq. Angutaatali piumasarisimavaa nunalerinermik universitetimi ilinniarnini naamasseqqaassagaa. Kingorna Cor pionerinngorpoq. Taava katippoq, nuliatalu pionerioqatigilerpaa. Nuliani naartulermat, pioneriujunnaarsinnaanini paasivaa. „Jehovamut qinujuarpunga pioneriuninnillu ingerlatitsiinnarusunninnik nittaaffigisarlugu,“ Cor oqarpoq. Naggataatigut Cor suliffittaarpoq pioneriuinnarsinnaanerminut periarfissiisumik.
Timikkut pisariaqartuinnarnik naammaginnissinnaaneq pioneriuinnarnissamut aamma iluaqutaasarpoq. Apustili Paulus allappoq: ’Inuugitsi aningaaserituunasi pigisasi naammagalugit, nammineq oqarmat: iperassanngilakkit qimassanatillu.’ (Eprîarit 13:5) Pigisaminnik naammaginninnertik Harryp Irenellu pioneritut ingerlaannarnissaminnut ikiortigaat. Irene, tappiitsoq, ukiut arfineq pingasut pioneriusimavoq. „Aningaasatigut atukkavut ajornartorsiutitut isiginngisaannarpavut,“ oqarpoq. „Pisariaqanngitsumik aningaasat tungaatigut immitsinnut nammatassinnaveersaartarpugut. Tamatigut pissutsit tamaasa naatsorsuinitsinni eqqarsaatigisarpavut. Naammaannartumik inuuniartuaannarpugut, taamaattorli nuannersuujuaannarpoq pilluaqqussuterpassuaqarlunilu.“
Nuannaarutit pilluaqqussutillu amerlasuut
Ukiut qulingiluat pionerioreernini kingumut qiviarlugu, Thamar oqarpoq: „Jehovamut qanittuararsuanngorsimavunga, soorluli tassa tasiuinnalersimagaanga.“ (Tussiaat 73:23) Aamma misilinneqartarsimavoq. „Naammalluanngissutsikka allallu naammalluanngissutaat ataatsimut ajornartorsiutigisarpakka,“ Thamar nangippoq. „Aammalu qatanngutikka nunap piinik pissarsinarnerusumik qinigaqarsimasut isigileraangakkit, siallersumilu nillertumilu angalaaleraangama inooriaasiat kajungerilersarpara. Inooriaatsikkulli paarlaasseqatiginissaat ummatinni kissaatigisimanngisaannarpara. Sunami alla pioneriunerunngitsoq taama nuannertigaa, anersaakkut nalerisimaarnartigaa taamalu pilluaqqussutissartaqartigaluni?“ Nuannaarutit pilluaqqussutillu taamaattut pingaartingaassavigit?
Pionerit piffissaq annertooq kristumiutut kiffartornermut atortaramikku, ilisimassummik Biibilip sallusuissutaanik amerlasuunik ilinniartitsisinnaapput. Harry Irenelu, siuliini taaneqareersut, oqarput: „Jehovap peqatigiissortaani immikkut piginnaatitaaffigineqarsinnaasut amerlaqaat, soqutiginnilerlaanilli Jehovamut kiffartornissaannut siumukartumik ikiornissaat annerpaartaavoq.“
Pionerip allap ima oqarami oqaatigilluarpaa: „Ussatit 10:22-mi allasimasut eqqortuuneri uppernarsisimavakka: ’Jehovap pilluaqqusinera pisuunngortitsisaraaq, erloqinartumillu ilasarinngilaa.’ (Nutsigaq pisoqaq) Ukiuni Jehovamut kiffartorfigisanni allassimaffiup taassuma ilumoornera misigiuarsimavara.“
Angajoqqaat, meeqqasi pionerinngornissamik kissaateqalernissaat sulissutigaasiuk? Pionerit, allanik taamatut kissaateqalersitsiniartarpisi? Utoqqaanertat, ilagiinni pionerit ikiortarpisigit allanillu pioneriorusussusermik ineriartortitsisarpisi? Qanortoq Jehovap innuttai amerliartuinnartut pilluaqqussutinik taama amerlatigisunik anguniagaqalerlutik pionerinngorlik. (wD 15/1 94)