Jehova Guuti siunertalik
„Ilumut eqqarsaatikka eqqorlugit pisoqassaaq, pilersaarutikkalu pinngitsoornatik naammassineqassapput.“ — JESAJA 14:24.
1, 2. Inuuneq inuppassuit qanoq siunertaqarnerartarpaat?
INUIT sumiikkaluartulluunniit ima aperisarput: ’Inuunerup suna siunertaraa?’ Kitaani politikkikkut siuttut ilaat ima oqarsimavoq: „Inuit aatsaat taama amerlatigisut ima aperisarput: ’Kikkuuvugut? Inuunitta suna siunertaraa?’“ Aviisit ilaat inuunerup suna siunertarineraa pillugu inuusuttunik apersuisitsimmat akissutigineqarajuttut makkuusimapput: „Uummatip kissaatigisaatut qanorluunniit iliornissaq.“ „Sapinngisamik tamakkiisumik inuunerup atornissaa.“ „Inuulluarniaannarnissaq.“ „Meeqqiornissaq, pilluarnissaq taavalu toqunissaq.“ Amerlanersaat isumaqarput maannakkut inuunerput taannaannaasoq. Nunarsuarmi inuunerup ingerlaannarsinnaanera eqqaaneqanngilaq.
2 Kungfutsesiortoq ilisimatooq ima oqarsimavoq: „Itinerusumik oqaatigissagaanni inuunerup siunertaa ulluinnarni inuunitsinni nassaassaavoq.“ Inuit tamakku isuma tamanna naapertussagaanni inunngortarneq, ukiuni 70-80-ini inuuniapiloorneq, toquneq puiugaanerlu ingerlaannassapput. Pinngoriartuaarsimaneraanermik tapersersuisoq ima oqarsimavoq: „Immaqa siunertamik itinerusumik maqaasisaqaraluarpugut — soqanngilarli.“ Pinngoriartuaarsimaneraanermik tapersersuisut isumaat naapertussagaanni inuuneq tassaannaavoq akiuunneq sapinnginnerpaat kisimik aniguisarfiat toqulu suut tamarmik naggataat. Isuma tamanna inuunermi neriuutissamik imaqanngilaq.
3, 4. Silarsuarmi pissutsit inuit inuunermik isiginninnerannut qanoq sunniuttarpat?
3 Inuppassuit inuunerup siunertaqarnera qularutigisarpaat inuunermi naalliunnartorpassuit takusaramikkik. Nalitsinni inuit nioqqutissiornikkut ilisimatuussutsikkullu angusaqarluarfigisaanni nunarsuarmi sumi tamaani inuit 1 milliardit missaat perulullutik napparsimapput nerisassakilliorlutilluunniit. Ukiut tamaasa meeqqat millionilikkuutaat tamakkuninnga toqquteqartarput. Aammalu 1900-kkunni makkunani sorsunnerni inuit ukiuni siuliiniittuni 400-ni sorsunnerni toqutaasimasut sisamariaataat toqutaasimapput. Pinerlunniarneq, nakuuserneq, ikiaroornartunik atornerluineq, ilaqutariit avissaartuunnerat, AIDS nappaatillu kinguaassiuutitigut tunillaassuuttut — pissutsit nuanniitsorpassuit tamakku ingasatsikkiartuinnarput. Silarsuarmi siuttut tamakkununnga aaqqiissutissaqartitsinngillat.
4 Pissutsit tamakku eqqarsaatigalugit inuk ataaseq inuppassuit isumaqatigisaannik ima oqarsimavoq: „Inuuneq siunertaqanngilaq. Ajortorpassuit tamakku pisarmata inuuneq siunertaqarsimanavianngilaq.“ Angullu utoqqaq ima oqarsimavoq: „Sooq piunera inuunerma annersaani isumaliutigisimavara. Kiisa maannakkut inuuneq siunertaqarnersoq siunertaqannginnersorluunniit soqutigiunnaarpara.“ Tassa inuit amerlanersaasa nalugamikku sooq Guuti naalliunnartunik ilaginnaagallarsimasoq, silarsuarmi pissutsit ernumatsannartut siunissamut piviusumik neriuutaarussutigisarpaat.
5. Inuunerup siunertaa paatsiveerusimaarnermut silarsuarmi upperisarsiornerit sooq paatsiveerussaaqataappat?
5 Allaat upperisarisornikkut siuttut inuunerup siunertaanik apeqqummut isumaqatigiinnatillu nalornipput. St. Paulip oqaluffissaarsuani Londonimiittumi provstiunerusimasoq, ima oqarsimavoq: „Inuunerup siunertaa ujarlugu inuunera tamaat ilungersorsimavunga. . . . Iluatsitsinangali.“ Palasit ilarpassuisa ajoqersuutigaat inuit ajunngitsut toqugunik qilaliassasut ajortullu toqugunik anniarfimmi ikualasumi naassaanngitsumik anniartinneqassallutik. Isumali tamanna naapertussagaanni inuiaat nunarsuarmi inuunerat naalliunnartuassaaq. Aammalu Guutip inuit qilammi inuulernissaat siunertariguniuk sooq aallaqqaammulli inngilitut pinngortiinnarsimanianngilai, taamaalillunilu inuit naalliuuterpassuarnik atugaqanngitsoortillugit? Taamaattumik nunarsuarmi inuunerup siunertaa pillugu paatsiveerunneq siunertaqarneranilluunniit upperiumanninnginneq nalinginnaasorujussuupput.
Guuti siunertalik
6, 7. Kisimi Oqartussaasoq pillugu Biibilimi qanoq oqaluttuunneqarpugut?
6 Oqaluttuarisaanermili atuakkat siammarsimanerpaartaanni, Biibilimi, oqaluttuunneqarpugut Jehova, qilammi nunamilu kisimi oqartussaasoq, Guutiusoq siunertaqartoq. Ersersinneqarpoq inuiaat nunarsuarmiittut eqarsaatigalugit siunissaq ungasinnerusoq eqqarsaatigalugu, aap allaammi naassaanngitsumik ataavartussamik, siunertaqartoq. Jehovalu arlaannik siunertaqarisaqaraangami pinngitsoornani naammassisarpaa. Soorlumi sialuk inerittussaqalernermik kinguneqartartoq, Guuti oqarsimavoq, „taama ippoq oqaasera qaninnit anisoq: Susaarluni uannut utissanngilaq, kisianni suliareqqusakka suliarissavai naammasseqqusakkalu naammassissallugit“. (Jesaja 55:10, 11) Jehovap pilersaarutini tamaasa ’pinngitsoornani naammassisarpai’. — Jesaja 14:24.
7 Uagut inuit qularutiginngilluinnarsinnaavarput Ajugaqanngitsup neriorsuutini eqquutitikkumaarai, tassami taanna ’sallusuitsuuvoq’. (Títuse 1:2; Eprîarit 6:18) Arlaannik iliuuseqassalluni oqarfigippatigut oqaasii qularnaveeqqutigissavavut ilumut taamaaliorumaarneranut. Oqaraangat naammassereersimasut ittarput. Soorlumi oqarsimasoq: „Eqqaaniarsigit siornagut naammassisakka, uanga Guutiugama, uanga kisima, ilumut Guutiugama, uattut ittoqanngilaq, tassaagama qangarsuarli nalunaarutiginnittoq qanoq pisoqarnissaanik, itsaanilli oqaatiginnittoq suli pinngitsunik. Maanna ima oqarpunga: ’Pilersaarutiga aalajaappoq, piumasakka tamaasa naammassissavakka.’ . . . Oqatsiaannaruma taamaalisissavara, eqqarsatsiaannaruma pilersaarutiga naammassissavara.“ — Jesaja 46:9-11.
8. Ilungersorlutik Guutimik ilisarisimannilerusuttut Guuti nanisinnaavaat?
8 Kiisalu Jehova ’tammarsimasoqaqqqusinngilaq, tamaasali allamik isumataaqqullugit’. (2 Pîtruse 3:9) Taamaattumik kissaatigaa kikkut tamarmik nalujunnaassagaanni. Pruffiiti Asarjamik atilik ima oqarsimavoq: „[Guuti] ujarussinni nanisikkumaarpoq, tunukkussinnili aamma ilissi tunussavaasi.“ (2 Israelikkut 15:1, 2) Taamaattumik ilumoorlutik Guutimik ilisarisimannilerusuttut siunertaanillu paasisaqarusuttut ilungersorlutik ujarunikku nanisinnaavaat.
9, 10. (a) Guutimik ilisarisimannilerusuttut sumik tunineqarsimappat? (b) Guutip oqaasiani ujarlernerput sumut piginnaassuseqalissutigissavarput?
9 Sumulli ujassavaat? Ilumoorlutik imminik ujarlertunut Guutip oqaatsini, Biibili, tunniussimavaa. Anersaani illernartoq, nukik pinngortitsigami atorsimasani, ikiortigalugu angutit aalajaatsut siunertani pillugit paasisariaqakkatsinnik Guutip allatsissimavai. Assersuutigalugu Biibilimi siulittuutit pillugit apustili Peter allassimavoq: ’Inuummi piumasaagut pruffiitip oqaaserisaa pinngisaannarpoq, anersaalli illernartup pisimmatik inuit Guutimit oqalupput.’ (2 Pîtruse 1:21) Taamatuttaaq apustili Paulus ima allassimavoq: „Allakkat tamarmik Guutip sunniineratigut isumassarsiarititaapput iluaqutaallutik ajoqersuutaallutillu inerteqqutaallutik, iluarsiartuutaallutik, iluarnermut perorsaataallutik, inuk Guutip pigisaa piginnaaneqarlualeqqullugu, ajunngitsuliornernut tamanut piareersarluagaaqqullugu.“ — 2 Timûtiuse 3:16, 17, NV; 1 Tásalûníkamiut 2:13.
10 Malugiuk Guutip oqaasiata ilaannakuunngitsumik imaluunniit tamakkiinngitsumik piginnaaneqalersissanngikkaatigut, kisianni piginnaaneqarlualersissinnaagaatigut, tassa tamakkiisumik piginnaaneqalersissinnaagaatigut. Guutip kinaaneranik, qanoq siunertaqarneranik kiffaminullu qanoq piumasaqarneranik tamakkiisumik ilisimasaqartilersinnaavaatigut. Atuakkap Guutimeersup taamatut piginnaaleqalersitsisinnaanera ilimagisariaqarpoq. Eqqorluartumillu Guuti pillugu ilisimasaqalerniarutta tamanna kisiat ujarlerfissaraarput. (Ussatit 2:1-5; Juánase 17:3) Tassunga ujarlerutta ’meerajunnaassaagut, mallisut aalatinneqarunnaassalluta angalatinneqarunnaassalutalu ajoqersuummit nalinginnarmit anorlersumit, inuit immeraattarnerinit qoqassiisullu tammartitsisut peqqusersuunerannit’. (Evfisumiut 4:13, 14) Tussiaasiortup isuma eqqortoq oqaatigisimavaa: „[Guutip oqaasii] naneruaraakka isikkannut, qaammaqqutigalugillu aqqutinni.“ — Tussiaat 119:105.
Saqqummersinneqariartuaartut
11. Jehovap inuiannut siunertani qanoq ililluni saqqummersissimavai?
11 Inuiaat oqaluttuarisaaneranni siusissukkulli Jehovap nunarsuarmik inunnillu tassani najugaqartunik siunertani saqqummersissimavaa. (1 Moses 1:26-30) Siuaasavulli siulliit Guutip kisimi oqartussaaneranik tunussimmata inuiaat anersaakkut taarmiulerput toqusalerlutillu. (Rûmamiut 5:12) Jehovalli nalunngilaa imminut kiffaarusuttunik inoqarumaartoq. Taamaattumik ukiut ingerlaneranni siunertani kiffaminut aalajaatsunut saqqummersikkiartuaarsimavai. Attaveqarfisimasaanut ilaapput Enok (1 Moses 5:24; Jûtarse 14, 15), Noa (1 Moses 6:9, 13), Abraham (1 Moses 12:1-3), aamma Moses (2 Moses 31:18; 34:27, 28). Guutip pruffiitia Amos ima allassimavoq: „[Jehovami] qanoq iliortarinngilaq pilersaarutini kiffaminut pruffiitinut saqqummerseqqaartinnagit.“ — Amos 3:7; Daniel 2:27, 28.
12. Guutip siunertai Jesusip qanoq ililluni qaammarsaatiginerusimavai?
12 Guutip Ernera, Jesus Kristus, Edenimi pikitsitsinermit ukiut 4000-it missingi qaangiuttut nunamiimmat Jehovap siunertaasa annikitsualuttaasa ilarpassui saqqummersinneqarsimapput. Ingammik qilammi Naalagaaffimmik nunarsuarmut naalakkersuisussamik Guutip siunertaa paasinarsisinneqarsimavoq. (Daniel 2:44) Naalagaaffik tamanna Jesusip oqaluussinermini pingaarnerpaatissimavaa. (Matîuse 4:17; 6:10) Taassuma ajoqersugaasalu ajoqersuutigisimavaat Naalagaaffiup tamatuma atuunnerani Guutip nunarsuaq inuilu pillugit aallaqqaammulli siunertai piviusunngortinneqarumaartut. Nunarsuaq paratiisinngortinneqassaaq naammalluinnartunik naassaanngitsumillu inuusussanik inulik. (Tussiaat 37:29; Matîuse 5:5; Lúkarse 23:43; 2 Pîtruse 3:13; sarĸúmersitat 21:4) Kiisalu Jesus ajoqersugaalu Guutip imminnik tupinnartuliortitsisinnaatitsinera ikiortigalugu silarsuassami nutaami tamatumani pisussanik qilanaartuutissiisarsimapput. — Matîuse 10:1, 8; 15:30, 31; Juánase 11:25-44.
13. Guutip inuiannut iliorfiginneriaasia eqqarsaatigalugu ukiumi 33-mi piinsip ulluani qanoq allannguuteqarpa?
13 Ukiumi 33-mi u.n.k. piinsip ulluani, Jesusip toquneranit ullut 50-it qaangiuttut, Guutip anersaava ilagiinnut Kristusimik malinnittunut kuineqarpoq. Taakku Israelikkunnut ilumuunngitsunut taarsiullutik tassaalerput Guutip innuttai toqqakkat. (Matîuse 21:43; 27:51; apustilit suliait 2:1-4) Taamani anersaamik illernartumik kuisineq Guutip aallartitani nutaat aqqutigalugit siunertani pillugit sallusuissutsinik tamanna killigalugu saqqummersitsisalernissaanut uppernarsaataavoq. (Evfisumiut 3:10) Ukiut hundredellit siulliit ingerlaneranni ilagiit kristumiut ilagiit aaqqissuussaasut pilersinneqarput. — 1 Korintumiut 12:27-31; Evfisumiut 4:11, 12.
14. Sallusuissummik ujarlersut ilagiit kristumiut ilumoortut qanoq ilillutik ilisarisinnaavaat?
14 Ullumikkut sallusuissummik ujarlersut ilagiit kristumiut ilumoortut Guutip pissusianik nuimanersaasumik, asanninnermik, ersersitsineratigut ilisarisinnaavaat. (1 Juánase 4:8, 16) Tassami qatanngutigiittut asaqatigiinneq kristumiut ilumoortut ilisarnaatigisussaavaat. Jesus ima oqarsimavoq: ’Matumannga tamarmik ilisarissavaasi ajoqersugarigissi: asaqatigiikkussi.’ ’Inassutiga tassa asaqatigiissasusi, soorlu uanga asagissi.’ (Juánase 13:35; 15:12) Jesusip tusarnaartini aamma ima eqqaasissimavai: ’Inassutikka malikkussigik ikinngutigissavassi.’ (Juánase 15:14) Tassa Guutip kiffai ilumoortut tassaapput asanninnissamik inassummik maleruaasut. Oqaluinnanngillat asaqatigiittussaallutik, tassami ’upperneq sulianik ilaqanngitsoq toqungavoq’. — Jâko 2:26.
Qaammarsaaneq
15. Guutip kiffaasa suna qularutigissanngilaat?
15 Jesus siulittuisimavoq ilagiit kristumiut ilumoortut Guutip siunertai pillugit piffissap ingerlanerani paasisaqarnerujartuinnartinneqassasut. Malinnitsini ima neriorsorsimavai: ’Illersuisup anersaap illernartup, Ataatap atikkut aallartitassaata, taassuma tamanik ajoqersussavaasi.’ (Juánase 14:26) Aamma oqarsimavoq: ’Atalu, ullut tamaasa najorpassi silarsuup naggatissaanut allaat.’ (Matîuse 28:20) Taamaalilluni Guuti siunertaalu pillugit Guutip kiffaasa akornanni ilisimasaqarneq annertusiartuinnarpoq. Aap, „iluartup aqqutaata assigaa ullaap qaammalernera qaammarissiartortoq ulluuneratut qaamatigilerserluni“. — Ussatit 4:18.
16. Guutip siunertaanut tunngatillugu piffissami sumiinnerput anersaakkut qaammarsagaanitta takutippaa?
16 Ullumikkut anersaakkut qaamaneq tamanna aatsaat taama qaamatigilersimavoq, piffissamimi Biibilimi siulittuuterpassuit eqquussorfigisaanni ilaasalu eqquutingajalerfigisaanni inuuvugut. Tamakkua takutippaatigut pissutsit aaqqissuussaanerata ajortup ’ulluini kingullerni’ inuusugut. Piffissaq tamanna taaneqarsimavoq ’pissutsit aaqqissuussaanerata naggatissaanik’; tamannalu Guutip silarsuassaanik nutaamik malitseqartussaavoq. (Timûtiuse 3:1-5, 13; Matîuse 24:3-13) Soorlu Danielip siulittuutigisimagaa Guutip naalagaaffiata qilammiittup „naalagaaffiit taakku [maannakkut atuuttut] tamaasa aserussavai, namminerli soraajuitsumik atassaaq”. — Daniel 2:44.
17, 18. Siulittuutit pingaartut suut ullumikkut eqquussorpat?
17 Siulittuutinut maannakkut eqquuttunut ilaavoq Matîuse kapitali 24 versi 14. Tassani Jesus oqarpoq: ’Naalagaaffimmillu iivangkiiliu tamanna oqaluussissutigineqassavoq inuit najugaanni tamarsuarmi inuiaqatigiit tamarmik nalujunnaarutissaannik; taavalu naggatissaq nalliussavoq.’ Nunarsuaq tamakkerlugu Naalagaaffimmik oqaluussissutiginninneq tamanna Jehovap nalunaajaasuinit millionilikkuutaanit suliarineqarpoq. Ukiullu tamaasa hundrede tuusintilikkuutaat taakkununnga ilanngussortuarput. Tamanna siulittuummut Jesaja 2:2, 3-miittumut naapertuuppoq, tassani allassimagami silarsuup ajortup matuma ’ullussaani kingullerni’ inuit inuiaqatigiinnit assigiinngitsorpassuarneersut Jehovamik pallorfiginninnermut ilumoortumut ornigussorumaartut, Jehovallu ’aqqutigeqqusaminik ajoqersussagai ingerlavigeqqusamigut ingerlasinnaaleqqullugit’.
18 Nutaat tamakku Jesaja 60:8-mi siulittuutigineqartutut Jehovamik pallorfiginninnermut „nuissatut“ katersuupput. Versimi 22-mi ima allassimavoq: „Minnersaat tuusintilinngussaaq nukarlersaallu inuiassuanngussalluni. Uanga tassa [Jehova]; piffissanngorpat pilertortumik tamanna naammassissavara.“ Uppernarsaatissat takutippaat tamatumunnga piffissanngorsimasoq. Nutaallu tatigisinnaavaat Jehovap nalunaajaasuinut attaveqalernertik tassaammat ilagiinnut kristumiunut ilumoortunut attaveqalerneq.
19. Sooq oqarsinnaavugut nutaat Jehovap nalunaajaasuinut ilanngussuuttut ilagiinnut kristumiunut ilaalersimasut?
19 Sooq taama qulanngitsigaluta taama oqarsinnaavugut? Nutaat taakku Jehovap peqatigiissortaaniittut millionilikkuutaat peqatigalugit inuunertik Guutimut tunniulluinnarsimavaat taassumalu piumasaanik iliulersimallutik. Tamatuma nassataraa asanninnissamik peqqussummut maleruaalluni inuuneq. Tamatumunnga uppernarsaataasut ilaat tassa kristumiut taakkua ’panatik assallatserummut savissaliaralugit saffiorsimagamikkik, qalugiusatillu saviliaralugit viinnequtilerissutit, sakkunillu atuinissamut ilinniarunnaarlutik’. (Jesaja 2:4) Jehovap nalunaajaasui sumiikkaluartulluunniit taamaaliorsimapput asanninnermikkut iliuuseqaramik. Tassa imminnut sakkulersorfigeqqinngisaannassapput allanulluunniit sakkulersorfiginneqqinngisaannassallutik. Tamatumuunakkut allanit assigineqanngillat — silarsuarmi upperisarsiortunit allanit assigineqanngillat. (Juánase 13:34, 35; 1 Juánase 3:10-12, 15) Inuiaassutsimik pingaartitsivallaarnermut avissaartuussutaasumut akuliusimanngillat, nunarsuarli tamakkerlugu qatanngutigiissuartut asanninnermik ataqatigiissuteqarlutik, ’iluarluinnassutsip nimianik’ nimerneqarsimallutik. — Kulorsamiut 3:14; Matîuse 23:8; 1 Juánase 4:20, 21.
Amerlanerit nalullugu qinersisarput
20, 21. Sooq inuiaat amerlanerpaartaat anersaakkut taarsiorpat? (2 Korintumiut 4:4; 1 Juánase 5:19)
20 Guutip kiffai anersaakkut qaamanermioqisut nunarsuup inuisa sinneri anersaakkut taarsioraluattuinnarput. Taakkua Jehova siunertaalu ilisimanngilaat. Guutip pruffiitiata tamanna ima siulittuutigisimavaa: „Takuat, matoorsimapput nunarsuaq taartumik, inuiaallu qaasuitsumik.“ (Jesaja 60:2) Taamaappoq inuit ilumoorlutik Guuti pillugu ilinniarusussuseqanngimmata, taassumunngaluunniit iluaritinnissaminnik kissaateqanngimmata. Jesus ima oqarsimavoq: ’Tassaavorlu eqqartuussut, qaamasoq silarsuarmut pimmat, inuillu taartoq qaamasumit asaneruaat suliatik ajormata. Ajortuliortup qaamasoq uumigisarpaa, qaamasumullu piumasarinngilaq suliani nalunarunnaarseqqunagit.’ — Juánase 3:19, 20.
21 Inuit taamaattut Guutip piumasaanik paasinninnissaminnik piviusumik soqutiginninngillat, namminnerli piumasartik salliutillugu inuullutik. Guutip piumasaanik sumiginnaanermikkut imminnut navianartorsiortipput, Guutimmi oqaasiani ima allassimavoq: „Tusaajumanngitsup inatsisinillu maleruaajumanngitsup qinnutaa allaat maajunnartuuvoq.“ (Ussatit 28:9) Namminneq iliuutsimik kinguneri namminneq akisussaaffigissavaat. Apustili Paulus ima allassimavoq: ’Tammaqinasi, Guuti mitaatigeqqunngilaq, inuk siaruartikkani naapertorlugit katersuiumaarmat.’ — Galâsiamiut 6:7.
22. Ullumikkut inuppassuit Guutimik ilisarisimannilerusuttut qanoq iliorpat?
22 Inuppassuaqarporli Guutip piumasaanik paasinnikkusuttunik, ilumoorlutik taassuminnga ujarlersunik taassumunngalu kajungertunik. ’Guutimut pallugunniaritsi, taava ilissinnut palligutissavoq,’ Jâko 4:8-mi allassimavoq. Inuit taamaaliortut Jesusip ima oqaatigisimavai: ’Sallusuissummik ileqqulik qaamasumut pisaraaq suliani saqqummeqqullugit, Guutimi suliarisaammata.’ (Juánase 3:21) Inunnullu qaamasumut pisunut Guutip siunertarisaa nuanneqaaq! Ilanngutassiami tulliuttumi siunissaq nuanningaartoq eqqartorneqassaaq. (wD 15/3 94)
Qanoq akissavit?
□ Inuppassuit inuuneq qanoq siunertaqarnerartarpaat?
□ Jehovap qanoq ililluni saqqummersippaa tassaalluni Guuti siunertalik?
□ Ukiuni hundredelinni siullerni qanoq annertuumik qaammarsaaneqalerpa?
□ Ullumikkut ilagiit kristumiut ilumoortut qanoq ilisarisineqarsinnaappat?