Jehovah tatigiuk siunertaminik naammassinnissasoq
„Iluartut nuna kingornutissavaat najugaqassallutillu tassani naassaanngitsussamut.“ — TUSSIAAT 37:29.
1. Jehovap inuiannut nunarsuarmullu matumunnga suna siunertaraa?
JEHOVAP siuaasavut siulliit, Adam Evalu, naammalluinnartuutillugit pinngortissimavai. Pinngortissimavaalu nunarsuarmi maani naassaanngitsumik inuusussanngorlugit — inassutini maleruarpatigik. (1 Moses 1:26, 27; 2:17) Aammalu paratiiserpalaartunik avatangiisilerlugit inissisimavai. (1 Moses 2:8, 9) Ima oqarfigisimavai: „Kinguaassiorlusi amerliartoritsi nuna tamakkerlugu.“ (1 Moses 1:28) Taamaalillutik kinguaavi nunarsuarmut tamarmut siammassapput, nunarsuarlu manna paratiisinngussaaq inunnik naammalluinnartunik pilluartunillu inulik. Inuiaat aallartinnerat ila nuannersimaq! ’Guutillu pinngortitani tamaasa isigisimavai, ilumullugooq ajunngingaarput.’ — 1 Moses 1:31.
2. Pissutsit inuiaat atugaat eqqarsaatigalugit qanoq aperisoqarsinnaava?
2 Pissutsilli inuit tuusintilikkuutaani atorsimasaat Guutip aallaqqaammulli siunertaanut assingussuteqanngeqaat. Inuiaat naammalluinnassutsimit pilluarnermillu nigorsimaqaat. Silarsuarmi pissutsit ernumanarsisimaqaat, siulittuutigineqartutullu nalitsinni ajorsiartuinnarlutik. (2 Timûtiuse 3:1-5, 13) Taamaammat qanoq ililluta Guutip inuiannut siunertaata qanittukkut piviusunngornissaa qularutiginngissinnaavarput? Pissutsit erloqinartut suli sivisuumik atuukkallassappat?
Sooq ajortumik ingerlalerpat?
3. Sooq inuiaat pikitsitsinerat Jehovap erniinnaq iliuuseqarfigisimanngilaa?
3 Guutip oqaasii isumassarsiarititaasut pillugit eqqorluartumik ilisimasaqartut nalunngilaat sooq Guutip nunarsuarmi pissutsit tamakku ilaginnarallarsimagai. Aamma nalunngilaat qanoq iliuuseqarfigiumaarai. Biibilimi oqaluttuamit paasisimavaat siuaasavut siulliit nammineq piumassutsimik Guutip inuiannut tunniussaanik nuannersumik atornerluisimasut. (Naleqqiuguk 1 Pîtruse 2:16.) Kukkusumik iliorlutik Guutimut attaviitsuunissartik qinersimavaat. (1 Moses, kapitali 2 aamma 3) Pikitsitsinermikkut apeqqutinik annertuunik apeqqusiipput, soorlu: Kisimi Oqartussaasoq inuiannik aqutsisuusariaqarpa? Aqutsinera taakkununnga pitsaanerpaassava? Inuit Guutimit nakkutigineqaratik imminnut aqussinnaassagaluarpat? Apeqqutit tamakku ersarissumik akineqassappata inuiaat ukiuni hundredelikkuutaani imminnut aqunnissaat akuerisariaqarpoq. Inernerisa qularutissaanngitsumik takutissavaat inuiaat Pinngortitsisiminnit avissaaqqallutik iluatsittumik aqussinnaanersut imaluunniit naamik.
4, 5. (a) Inuit Guutimit naalakkersorneqarumannginnerat qanoq kinguneqarsimava? (b) Piffissap suna qularnarunnaarsissimavaa?
4 Adamip Evallu qimammanni Guutip naammalluinnassutsimut atatikkunnaarpai. Guutimit tapersersorneqarunnaaramik nungujartulerput. Naammalluinnartuujunnaarput, utoqqaliartulerlutik naggataatigullu toqullutik. Timikkut kingornuttakkanik inatsit tunngavigalugu siuaasatta siulliit pissutsit nuanniitsut tamakku tamaasa kinguaaminnut, ilaatigut uagutsinnut, kingornutitippaat. (Rûmamiut 5:12) Ukiunimi tuusintilikkuutaani inuiaat imminnut aqunnerat qanoq kinguneqarsimava? Nalunaajaasup oqaasii 8:9-mi Ny Verden-nutsigaq naapertorlugu allassimasutut ajortigisumik kinguneqarsimavoq: ’Inuit inoqatitik ajoqutaasumik oqartussaassuseqarfigisimavaat.’
5 Piffissap ingerlasimasup takutereersimavaa inuiaat Pinngortitsisiminnit avissaarsimallutik iluatsitsisinnaanngitsut. Isumassarsisitaalluni Biibilimik allaqataasoq Jeremias ima oqarsimavoq: „[Jehova], nalunngilara inuup ingerlavissani nammineq aalajangigassarinngikkaa, angutillu aalajangigassarinngikkai qanoq ingerlanissani alloriartarnissanilu.“ — Jeremia 10:23; 5 Moses 32:4, 5; Nalunaajaasup oqaasii 7:29.
Guutip siunertaa allanngorsimanngilaq
6, 7. (a) Ukiuni tuusintilikkuutaani inuiaat oqaluttuarisaanerata ingerlanerani Jehovap siunertaa allanngorsimava? (b) Jehovap siunertaanut aamma suna ilaava?
6 Ukiuni tuusintilikkuutaani inuiaat oqaluttuarisaaneranni ingerlasimasuni — ajussuseqangaarfiullutillu naalliuuterpassuaqarfiusimasuni — Guutip siunertaa allanngorsimava? Guutip oqaasiani allassimavoq: „Ima oqarpoq [Jehova], qilammik pinngortitsisoq, Guutiusoq, nunarsuarmik ilusiliisoq, pilersitsisoq tunngaviliisorlu soqanngitsussanngornagu, kisianni inoqartussanngorlugu pinngortisisoq.“ (Jesaja 45:18) Tassa Guutip nunarsuaq pinngortissimavaa inoqartussanngorlugu, tamannalu suli siunertaraa.
7 Jehovap nunarsuaq inoqartussanngorlugu pinngortiinnanngilaa, aammali siunertaraa paratiisinngussasoq inunnut naammalluinnarlutillu pilluartunut nuannaarutaasoq. Taamaattuminguna Biibilimi siulittuutigineqartoq ’nuna nutaaq’, inuiaqatigiit nutaat, ’iluarsuseqarfiusoq’ atuutilerumaartoq. (2 Pîtruse 3:13) Aamma sarĸúmersitat 21:4-mi oqaluttuunneqarpugut silarsuassami nutaami Guutip ’qulliit tamaasa [inuit] isaannit allarterumaarai, toqulu peqarunnaassasoq, aliasuttoqarunnaarlunilu nilliasoqarunnaarlunilu anniartoqarunnaassasoq’. Taamaattuminguna Jesusip silarsuassaq nutaaq ’paratiisitut’ eqqartorsimagaa. — Lúkarse 23:43.
8. Sooq qularutigissanngilarput Jehovap siunertani naammassiumaaraa?
8 Jehova sapigaqanngitsuullunilu ilisimatoorujussuummat siunertaa kimilluunniit akornuserneqarsinnaanavianngilaq. „Katersaarsuit [Jehovaat] uppernarsaavoq oqarluni: ’Ilumut eqqarsaatikka eqqorlugit pisoqassaaq, pilersaarutikkalu pinngitsoornatik naammassineqassapput.’“ (Jesaja 14:24) Taamaattumik Guuti oqareersimammat nunarsuaq manna paratiisinngortikkumaarlugu naammalluinnartunik inulik, taamatorluinaq pisoqarumaarpoq. Jesus ima oqarsimavoq: ’Pilluarput qanilaartut, nuna pigissagamikku.’ (Matîuse 5:5; naleqqiuguk Tussiaat 37:29.) Neriorsuutip tamatuma eqquunnissaa ilimagisinnaavarput. Inuunitsinni tamanna tunaartarilluinnarsinnaavarput.
Jehovamik tatiginnissimasut
9. Abraham Jehovamik tatiginninnini ersersillugu qanoq iliorsimava?
9 Oqaluttuarisaanerup ingerlanerani inuppassuit Guutimik mianerinnittut inuunerminni Guutip nunarsuaq pillugu siunertai tunaartarilluinnarsimavaat qularutiginnginnamikku siunertani eqquutitikkumaarai. Immaqa ilisimasatik killeqaraluartut Guuti tatigisimavaat taassumalu piumasaa naapertorlugu inuusimallutik. Assersuutigalugu taasinnaavarput Abraham, Jesusip nunarsuarmi inuusimanera 2000-inik sioqqullugu — Biibilip allanneqalernera sioqquterujussuarlugu — inuusimasoq. Jehovap neriorsuutiminik naammassinninnissaa tatigisimavaa. Abraham siuaasani Sem, Noamit ajoqersorneqarsimasoq, aqqutigalugu Pinngortitsisini pillugu ajoqersorneqarsimavoq. Taamaammat Guutip Urimit atugarissaarfiusumit Kaldæamiittumit Kana’animut takornakkaminut ulorianartulimmullu nooqqummani nalunngilaa Jehova tatigisinnaallugu, taamaattumillu aallarluni. (Eprîarit 11:8) Ilaannilu Jehovamit ima oqarfigineqarsimavoq: „Inuiassuanngortikkumaarpakkit.“ — 1 Moses 12:2.
10, 11. Sooq Abrahamip ernituani pilliutigeriaannaasimavaa?
10 Abrahamip Isak ernertaarereeraalu qanoq pisoqarsimava? Jehovap Abraham nalunaarfigaa Isak aqqutigalugu inuiassuanngortikkumaarlugu. (1 Moses 21:12) Taamaattumik Abrahamip uppernera misilinniarlugu ernini Isak Jehovap pilliutigeqqummagu imminut assortortutut isikkoqarsimassaaq. (1 Moses 22:2) Taamaakkaluartoq Jehova tatigalugu Abraham akuersaarpoq, Isakilu pilliutiginiarlugu savini tigullugu. Taamaalisorlu Guutip inngilini aallartippaa Abrahamilu unitsillugu. — 1 Moses 22:9-14.
11 Sooruna taama Abraham naalatsigisimasoq? Eprîarit 11:17-19-imi allassimavoq: ’Uppernikkut Abraham misilinneqarami Isak pilliutigaa, erniutimi pilliutigaa taassuma unnersorfigineqarluartup, oqarfigineqartup ima: „Isakikkut kinguaassannik taasiffigineqassaatit.“ Tassa isumaqarami Guuti toqusunilluunniit makititsineq sapinngitsoq; tassanngami assersuutikkullusooq kingumut pivaa.’ Aamma Rûmamiut 4:20, 21-mi allassimavoq: ’Guutillu unnersuuta [Abrahamip] uppinnginnermit qularnartinngilaa, . . . nakimmatiginngilluinnarpaalu taassuma unnersuunni naammassisinnaagaa.’
12. Abraham uppernerminut qanoq akissarsisinneqarpa?
12 Abraham Isakip asattuunneqarneratiguinnaanngitsoq aamma kinguaami ’inuiassuanngornerisiguinnaanngitsoq aamma allakkut uppernerminut akissarsisinneqarpoq. Guutip ima oqarfigisimavaa: „Illillu kinguaassakkut nunarsuarmi inuiaqatigiit tamarmik pilluaqqunarsissapput, naalakkamma.“ (1 Moses 22:18) Qanoq ilillutik? Guutip qilammi naalagaaffiani kunngissaq Abrahamip kinguaavisigut takkutissaaq. Naalagaaffiup tamatuma Satanip silarsuaa ajortoq suujunnaarsissavaa. (Daniel 2:44; Rûmamiut 16:20; sarĸúmersitat 19:11-21) Naalagaaffiup tamatuma ataani nunarsuaq manna salinneqassaaq tamakkerlunilu paratiisinngortinneqassalluni, inuillu ’inuiannit tamaneersut’ Guutip piumasaanik iliortut peqqilluinnarlutik naassaanngitsumik inuusinnaassapput. (1 Juánase 2:15-17) Naallu naalagaaffik tamanna pillugu annikitsuinnarmik ilisimasaqaraluarluni Abrahamip Guuti tatigisimavaa naalagaaffiullu pilersinneqarnissaa qilanaarisimallugu. — Eprîarit 11:10.
13, 14. Sooq Jobip Guuti tatigisimavaa?
13 Ukiut hundredellit arlallit qaangiuttut, ukiut hundredellit 17-issaata 16-issaatalu akornanni ukiunik naatsorsuisalerfitta siorna, ullumikkut Arabiamik taaguuteqartumi angut Jobimik atilik inuusimavoq. Job „angutaavoq assuarnaatsoq peqqusersuitsorlu, Guutimik mianerinnittuusoq ajortumillu iliuuseqarnaveersaartuusoq“. (Job 1:1) Satanip naalliunnaqisumik nappaateqalersikkaluarmani angut aalajaatsoq taanna misilinneqarnermini ’oqaatsimigulluunniit ajortuliorsimanngilaq’. (Job 2:10) Jobip Guuti tatigisimavaa. Naallu naalliunnerminut pissutaasoq nalugaluarlugu Guuti neriorsuutaalu inuunermini tunaartarisimavai.
14 Jobip nalunngilaa toqugaluaruniluunniit makititaaffissami Guutip makitikkumaaraani. Jehova Guutimut ima oqarami neriugisani ersersissimavaa: „Guuti, toqqorumasinnaagaluarummatoq toqusullu inaanni isertorlunga . . . Qanortoq killilimmik utaqqiffissaqarteriarlunga kingumut eqqaaginga! Toqusoq uummaqqissinnaanerpa? . . . [Taava qaaqqusissasutit, uangalu akissagikkit, nutsigaq pisoqaq].“ (Job 14:13-15) Naalliungaarami toqoqqajaagaluarluni Jobip Jehovap kisimi oqartussaaneranut aalajaannini ima ersersissimavaa: ’Anerningerserlunga assuarnaassusera uannit saqitsissanngilara.’ — Job 27:5, nutsigaq pisoqaq.
15. Davidip Jehovap siunertaanik qularutiginninnginnini qanoq oqaatigisimavaa?
15 Jobip kingorna ukiut hundredellit arfinillit missaat qaangiuttut Jesusillu nunami inuunera ukiunik 1000-inik sioqqullugu angutip inuusimasup Davidip silarsuassamut nutaamut isumalluarfiginninnini ima oqaatigisimavaa: „[Jehovamut] neriuttut nuna kingornutissavaat. Guutiitsoq erniinnaq peeruttussaavoq. . . . Kisianni qanilaartut nuna kingornutissavaat, pilluangaarlutillu inuussapput. Iluartut nuna kingornutissavaat najugaqassallutillu tassani naassaanngitsussamut.“ Taamatut aalajaatsumik neriugisaqarami David ima oqarsimavoq: „Tunaarisaruk [Jehova] . . . [Jehovalu] qiimmattaatigalugu, taassuma tunisarumaarmatit uummativit kissaatigisaanik.“ — Tussiaat 37:3, 4, 9-11, 29.
16. ’Nalunaajaasut eqimasut’ qanoq neriugisaqarpat?
16 Ukiut ingerlanerini angutit arnallu inuusimasut taamatut nunarsuarmi inuunermik naassaanngitsumik neriugisaqarsimapput. Tassaasimapput ’nalunaajaasut eqimasut’ inuunerminni Jehovap neriorsuutaanik tunaartarinnilluinnartut. Itsaq Jehovamut nalunaajaasut ilarpassui uppernertik pissutigalugu anniartinneqarlutillu toqunneqarsimapput, ’iperarneqarsinnaagaluarlutik piumasarsimanngillat ajunnginnerusumik makiffissaqalerumallutik’. Qanoq tassa? Silarsuassami nutaami Guutip ajunnginnerusumut makitillugit inuunermillu naassaanngitsumik siunissaqartillugit akilissavai. — Juánase 5:28, 29; Eprîarit 11:35; 12:1.
Nalunaajaasut kristumiut Guutimik tatiginnittut
17. Ukiuni hundredelinni kristumiut Jehovamik qanoq tatiginnitsigisimappat?
17 Ukiuni hundredelinni siullerni u.n.k. ilagiit kristumiut pilersinneqaqqammersut Naalagaaffik nunarsuarmullu naalakkersuinissaa pillugit paasissutissanik amerlanerusunik Jehovap saqqummersitsivigisimavai. Assersuutigalugu apustili Johannes anersaaminik isumassarsisillugu allatsissimavaa Jesus Kristusimut qilammi naalagaaffiani naalakkersueqataasussat 144.000-iujumaartut. Taakku tassaassapput Guutip kiffai aalajaatsut ’nunamit immikkoortillugit pisiaasut’. (sarĸúmersitat 7:4; 14:1-4) Kristus qilammi peqatigalugu ’kunngiussapput’. (sarĸúmersitat 20:4-6) Ukiuni hundredelinni siullerni kristumiut Jehovap naalagaaffik qilammiittoq nunamilu naalakkersuiffissaa pillugu siunertaminik naammassinninnissaa ima tatigitigisimavaat uppernertik pillugu inuunertik iperariaannaasimallugu. Amerlasuullu taamatut pisimapput.
18. Jehovap nalunaajaasuisa uppeqatitik qangali inuusimasut qanoq assigaat?
18 Ullumikkut Jehovap nalunaajaasui 5 millioningajaat ukiuni hundredelikkuutaani uppeqatitik allat assigalugit Guutimik tatiginnittuupput. Aamma taakku inuunerminni Guutip neriorsuutaanik tunaartarinnittuupput. Inuunertik Jehovamut tunniulluinnarsimavaat Biibililu tamaat uppernermikkut nakussatsissutissatut pigalugu. (2 Timûtiuse 3:14-17) Nalitsinni nalunaajaasut taakku ukiuni hundredelinni siullerni Jesusimik malinnittut ’Guuti inunnit naalattariaqarnerullugu’ nalunaarsimasut maligassiaat malippaat. (apustilit suliait 5:29) Ukiuni hundredelinni makkunani nalunaajaasut kristumiuusut ilarpassui peqqarniitsumik qinugineqartarsimapput. Ilaat uppernertik pillugu allaat toqutaasimapput. Ilaat nappaammik, ajunaarnermik utoqqalinermilluunniit toqquteqarsimapput. Nalunaajaasulli aalajaatsut ukiut ingerlanerini inuusarsimasut assigalugit Guuti tatigisimavaat nalunnginnamikku silarsuassami nutaami makitikkumaaraatik. — Juánase 5:28, 29; apustilit suliait 24:15; sarĸúmersitat 20:12, 13.
19, 20. Biibilimi ulluvut pillugit siulittuutit qanoq ililluta ilisarisinnaavavut?
19 Jehovap nalunaajaasuisa nalunngilaat inuiannit tamaneersuullutik nunarsuaq tamakkerlugu qatanngutigiissuartut ataasiussuseqarnertik qangarsuarli Biibilimi siulittuutigineqareersimasoq. (Jesaja 2:2-4; sarĸúmersitat 7:4, 9-17) Jehovamillu suliaqartinneqarput nunarsuaq tamakkerlugu oqaluussitinneqarlutik inuit unneqqarissumik uummatillit katersorlugit. (Ussatit 18:10; Matîuse 24:14; Rûmamiut 10:13) Tamarmik Jehova tatigilluinnarpaat, nalunagu erniinnaq silarsuassani nutaaq nuanningaartoq atuutilersissagaa. — Naleqqiuguk 1 Korintumiut 15:58; Eprîarit 6:10.
20 Biibilimi siulittuutit takutippaat Satanip silarsuaa 1914-imiilli ukiuni 80-ingajanni ullussamini kingullerniilersimasoq. Silarsuaq tamanna atorunnaalerpoq. (Rûmamiut 16:20; 2 Korintumiut 4:4; 2 Timûtiuse 3:1-5) Taamaattumik Jehovap nalunaajaasui tuppallerput nalunnginnamikku erniinnaq Guutip naalagaaffiata nunarsuarmi pissutsit aaqqilluinnassagai. Silarsuup ajortup maannakkut atuuttup suujunnaarsinneratigut silarsuassamilu nutaap naapertuilluassuseqarfiusup atuutilersinneratigut Guutip pissutsit ajortut ukiuni hundredelikkuutaani nunarsuarmi atuussimasut piiarluinnassavai. — Ussatit 2:21, 22.
21. Naak ullumikkut ajornartorsiortaraluarluta sooq nuannaarsinnaavugut?
21 Taava naassaanngitsussamut Guutip pilluaqqussutinik siornatigut anniaatigisimasatsinnut matussutissaalluartunik kueraaviginermisigut isumassuinerminik ersersitsivigissavaatigut. Silarsuassami nutaami nuannersorpassuarnik misigisaqartassagatta maannakkut ajornartorsiutigisavut puiorluinnassavavut. Iluarusunnaqaaq nalunagu taamanikkussamut Jehovap ’assani ammarumaarai pinngortitallu tamaasa ajunngitsuutiminik qaarsillartillugit’. — Tussiaat 145:16; Jesaja 65:17, 18.
22. Sooq Jehova tatigisariaqarparput?
22 Silarsuassami nutaami inuiaat aalajaatsut Rûmamiut 8:21-p eqquunnera misigissavaat: ’Pinngortitattaaq aserujasumut kiffaasut kiffaajunnaarsinneqarumaarput Guutip qitornaata kiffaanngissusiata naalannaataat pigilerlugu.’ Qinnut Jesusip malitsiminut ilinniartitsissutigisimasaa naammassineqartoq takusinnaassavaat: ’Naalagaaffiit tikiulli; peqqusat qilammisut nunamissaaq pili.’ (Matîuse 6:10) Taamaattumik Jehova tatigilluinnaruk unioqqutitassaanngitsumik ima neriorsuimmat: „Iluartut nuna kingornutissavaat najugaqassallutillu tassani naassaanngitsussamut.“ — Tussiaat 37:29. (wD 15/3 94)
Qanoq akissavit?
□ Inunnut nunarsuarmullu Jehovap suna siunertaraa?
□ Sooq nunarsuarmi pissutsit ajortut Guutip ilaginnarallarsimavai?
□ Inuit aalajaatsut itsaq inuusimasut Jehovamik tatiginninnertik qanoq ilillutik ersersissimavaat?
□ Sooq ullumikkut Guutip kiffaasa Jehova tatigaat?
[Qupp. 16-mi assiliartaq]
Guutip inuit pinngortissimavai nunarsuarmi paratiisiusumi pilluarlutik naassaanngitsumik inuusussatut
[Qupp. 18-mi assiliartaq]
Jehovap toqusunit makititsisinnaassusia Abrahamip tatigisimavaa