Guutimit ajoqersorneqarneq anersaapiluit ajoqersuinerinut illua’tungiliullugu
’Ilaat uppernermik tunussiumaarput anersaat tammartitsisut anersaapiluillu najoqqutariniarlugit.’ — 1 Timûtiuse 4:1.
1. Akersuunnerup suup qeqqani kristumiut inuuppat?
TAKORLOORIARUK inuunerit tamaat sorsuffiusumi inuusutit. Qanormitaava ippa eqqarpalussuup qaartartumeereqattarpalussuullu ataani innarluni? Alianaraluartumik nunarsuup ilaani inuit taamatut atugaqarlutik inuupput. Aammali kristumiut anersaakkut ittumik pissutsit taama ittut ataanni inuupput. Sorsunnerup ukiuni 6000-ini ingerlasimasup ullumikkullu aatsaat taama sakkortutigilersimasup qeqqani inuupput. Sorsunneq taama sivisutigisoq tamanna sunaana? Ilumoortup sallullu sorsuunnerat, Guutimit ajoqersorneqarnerup anersaapiluillu ajoqersuinerata sorsuunnerat. Inuiaat oqaluttuarisaaneranni akersuunnerit naakkittaannerpaartaralugulu toqoraaffiunerpaartaattut taassallugu ingasattajaarnerunngilaq — ingammik siuttuisa ilaat ataaseq eqqarsaatigalugu.
2. (a) Apustili Paulus naapertorlugu suut marluk imminnut akerleriippat? (b) ’Uppernermik’ oqarami Paulusip suna pivaa?
2 Apustilip Paulusip akersuunnerup tamatuma immikkoortui marluk Timoteusimut allakkamini eqqaasimavai: ’Anersaarli nassuitsumik oqarpoq, ullussani kingullerni ilaat uppernermik tunussiumaartut anersaat tammartitsisut anersaapiluillu ajoqersuineri najoqqutariniarlugit.’ (1 Timûtiuse 4:1) Malugiuk anersaapiluit ajoqersuineri ingammik ’ullussani kingullerni’ sunniiumaartut. Paulusip nalaaniit isigalugu uagut piffissami taama ittumi inuuvugut. Aamma malugiuk anersaapiluit ajoqersuinerinut suna illua’tungiuliuttuusoq, tassa ’upperneq’. Tassani ’uppernermi’ pineqarpoq Guutimit ajoqersorneqarneq, unnersuussutinik Guutimit isumassarsiarititaasunik Biibilimiittunik tunngaveqartoq. Upperneq taama ittoq inuussutaavoq. Kristumiunik Guutip piumasaanik iliornissamik ilinniartitsivoq. Tassaavoq salllusuissut inuunermut naassaanngitsumut siulersuisoq. — Juánase 3:16; 6:40.
3. (a) Ilumoortup sallullu akornanni akersuunnermi ajorsartut qanoq pissappat? (b) Anersaapiluit ajoqersuinerinut kina tunuliaqutaava?
3 Uppernermik tunussisut tamarmik inuuneq naassaanngitsoq annaassavaat. Taakku tassaapput sorsunnermi ajorsartut. Anersaapiluit ajoqersuinerannut imminut nakkaannartinnerup kingunissaa ila alianarmat! (Matîuse 24:24) Qanoq ililluta inuttut ataasiakkaatut sorsunnermi ajorsarnissarput pinngitsoorsinnaavarput? Sallusumik ajoqersuutit tamakku ’anersaapiluit naalagaannut’, Satan Diaavulumut, tapersersuutaasut, tunuartilluinnarnerisigut. (Matîuse 12:24) Satan ’sallunerit ataatagimmanni’ ajoqersuutai soorunami salluliutaapput. (Juánase 8:44) Eqqarsaatigeriarummi qanoq ittannerutigaluni siuaasavut siulliit tammartissimagai.
Anersaapiluit ajoqersuineri qulaarneqarput
4, 5. Satanip Eva qanoq salluliorfigaa, sallunerlu tamanna sooq taama ajortigaa?
4 Biibilimi Mosesip allagai siulliit 3:1-5-mi pisimasoq eqqartorneqarput. Pulateriaarsuk atorlugu Satanip Eva oqaluffigisimavaa imalu aperalugu: „Ilumununa Guutip naatsiiviup orpiisa arlaannaalluunniit neriffigeqqunngikkaa?“ Apeqqutaa soqutaarpasinngissinnaagaluarpoq, qiviaqqeriassagilli. ’Ilumununa?’ Satan tuppigusuppasippoq, soorlumi ima oqarniartoq: ’Sooq Guuti taamatut oqarsinnaava?’
5 Evap misilittagakeqigami taamaassorilerpaa. Tamatumunnga atatillugu Gutip ajoqersuussutaa nalunngikkaluarpaa, tassa Guutip Adam oqarfigisimagaa orpimmit ajunngitsumik ajortumillu sianinartumit nerigaluarunik toqussasut. (1 Moses 2:16, 17) Satanip apeqqutaata qularnanngitsumik Eva soqutiginnilersippaa, taamaattumik ima oqarmat tusarnaarpaa: „Taava pulateriaarsuup arnaq oqarfigaa: ’Naamik, toqussanngivippusi.’“ Oqaasii ila ingasammata! Jehova, sallusuissutip Guutia, asanninnerup Guutia, Pinngortitsisoq, inunnut meeqqaminut sallunerarlugu pasillerpaa! — Tussiaat 31:5; 1 Juánase 4:16; sarĸúmersitat 4:11.
6. Jehovap ajunngissusia kisimilu oqartussaassusia Satanip qanoq ililuni unammillerpaa?
6 Aammali Satan allanik oqaaseqaqqippoq: „Guutiuna taama oqartoq nalunnginnamiuk neriffigigaluarussiuk isisi uisitaajumaartut Guutisullu ilerumaartusi ajunngitsoq ajortorlu nalujunnaassallugit.“ Satan oqarniarpoq Jehova Guutip — siuaasatsinnik siullernik naammattorsuarnik pissaqartitsisimasup — arlaannik nuannersumik erliguukkai. Guutitut ilernissaat akornuserusukkaa. Aamma taamaaliornermigut imminut qaffassarniarpoq Guutillu inatsisai sumiginnarlugit, oqarluni Guutip inatsisai malillugit inuuneq iluaqutaanngitsoq. Taamaalillunilu Guutip kisimi pinngortitaminut oqartussaanera unammillerpaa, oqarluni Guuti inuit qanoq iliornissaannut killilersuinissaminut pisussaanngitsoq.
7. Anersaapiluit ajoqersuineri qanga tusarneqaqqaarpat, ullumikkullu qanoq ililluni taamaappa?
7 Satanip oqaasii tamakku aallarniutigalugit anersaapiluit ajoqersuutaat tusaaniarneqartalerput. Ajoqersuutit ajortut tamakku ileqqunik guutiitsorpalaartunik siuarsaapput. Edenimi pikitsitsisimanermisut Satan maanna anersaapilunnit pikitsitsiniartunit ilaaqquffigineqarsimavoq, Guutip najoqqutassiornissamut pisussaaneranik unammillertunik. Jehovap kisimi oqartussaanera suli assortorpaa inuillu sunnerniarsaralugit Ataataminnut qilammiusumut naalannginnissaannik. — 1 Juánase 3:8, 10.
8. Adamip Evallu Edenimi suna annaavaat, Jehovalli ilumoornera qanoq uppernarsisimava?
8 Guutimit ajoqersorneqarnerup anersaapiluillu ajoqersuinerisa akornanni akersuunnerup aallaqqaataani tamatumani Adam Evalu kukkusumik qinersipput naassaanngitsumillu inuunissaminnik neriuutertik annaallugu. (1 Moses 3:19) Ukiut ingerlatillugit timitik aseroriartulermata paasiartuinnalerpaat Edenimi kina salluliorsimasoq kinalu eqqortumik oqalussimasoq. Ukiunilli hundredelikkuutaanik timikkut toqunissartik sioqqullugu sallusuissutip salluliuutillu akornanni akersuunnermi ajorsartunut siullersaapput, Pinngortitsisiminnit, inuunerup Pilerfianit, inuunissamut naleqqukkunnaartutut eqqartuunneqaramik. Tassa anersaakkut toqupput. — Tussiaat 36:9; naleqqiuguk Evfisumiut 2:1.
Ullumikkut anersaapiluit ajoqersuineri
9. Ukiut hundredelikkuutaat ingerlaneranni anersaapiluit ajoqersuineri qanoq sunniisimappat?
9 Soorlu sarĸúmersitat-ni oqaluttuarineqartoq apustili Johannes anersaamit isumassarsisitaalluni ’Naalakkap ulluanut’, 1914-mit aallartittumut, pisinneqarsimavoq. (sarĸúmersitat 1:10) Taamanikkut Satan inngilipiluilu qilammit iginneqarsimapput nunarsuup eqqaanut pisinneqarlutik — Pinngortitsisorsuatsinnik akerlilersuisoq ajorsartitaarujussuarluni. Jehovap kiffaanik unnerluutiginnittuarnera qilammi tusarsaajunnaarsimavoq. (sarĸúmersitat 12:10) Edenimi pisimasup kingornali anersaapiluit ajoqersuineri nunarsuarmi qanoq siuariartorsimappat? Ima oqaatigineqarpoq: ’Igitaavorlu kuukkooriaasarsuaq angisooq, pulateriaarsutoqaq Diaavulumik Satanimillu taaneqartoq, inuit najugaanni nunalinnik tamanik tammartitsiniartoq.’ (sarĸúmersitat 12:9) Silarsuaq tamakkerluni Satanip salluliuutaanit sunnerneqarsimavoq! Tupinnanngilaq Satan taaneqarmat ’silap matuma naalagaanik’! — Juánase 12:31; 16.11.
10, 11. Satanip inngilipiluilu ullumikkut sutigut sunniisarpat?
10 Satan qilammit igitaagami ajorsarnini nakkassutigisimavaa? Naamerluinnaq! Aalajangiusimalluinnarpaa Guutimit ajoqersorneqarnermut ajoqersortittunullu akiuuttuarnissani. Qilammit igitaagami Satanip akiuunnini nangippaa: ’Kuukkooriaasarsuullu arnaq kamaatilerpaa aallarlunilu kinguaassaasa amiakkui taakku Guutip inassutaanik maleruaasut Jesusillu nalunaajaataanik piginnittut sorsukkumallugit.’ — sarĸúmersitat 12:17.
11 Guutip kiffaanut sorsunnermini Satanip silarsuaq tamaat sunniiniutiminik ulikkaaqqavaa, inuiaat tamaasa tigummiumallugit. Saqqummersitsivigineqarnermini takorruuilluni Naalakkap ullussaaniinnermini apustilip Johannesip ilaatigut takuai nersutit nujuartat pingasut Satanimut, nunarsuarmi politikkikkut aaqqissuussaanut ullumikkullu silarsuarmi pissaanilittaanut assersuutaasut. Taakkua pingasut qarninit naratsit aniapput. Taakku sumut assersuutaappat? Johannes allappoq: ’Taakkunani anersaapiluit nalunaaqqutiliortut anersaartaraat, aallarpullu inuit najugaata tamarmi kunngiinut sorsunnissamut Guutip ajugaqanngitsup ullussarsuani piumaartumut katersorumallugit.’ (sarĸúmersitat 16:14) Nalunanngeqaaq anersaapiluit ajoqersuineri nunarsuarmi sunniuteqartorujussuusut. Satan inngilipiluilu Guutimit ajoqersorneqarnermut suli akersuupput, taamaaliortuassappullu Jesus Kristusimit, kunngimit Messiasiusumit, pissaanikkut unitsilluinnarneqarnissartik tikillugu. — sarĸúmersitat 20:2.
Anersaapiluit ajoqersuineri suussusersineqartut
12. (a) Anersaapiluit ajoqersuinerinut assortuinissaq sooq ajornanngila? (b) Guutip kiffaanut atatillugu Satanip anguniakkani qanoq ililluni anguniarpai?
12 Inuit Guutimik mianerinnittut anersaapiluit ajoqersuinerinik assortuisinnaappat? Ilaana taamaaliornissaminnut sapinngillat, marlunnik pissuteqartumik. Siullermik Guutimit ajoqersorneqarneq pissaaneqarnerujussuuvoq; aappassaanillu Satanip saassusseriaasii assortorsinnaaniassagatsigik Jehovap qulaarsimavai.. Soorlu apustili Paulus oqarsimasoq ’taassuma isumaliorneri nalunngilavut’. (2 Korintumiut 2:11) Nalunngilarput siunertani angujumallugit Satanip qinuginninneq atortaraa. (2 Timûtiuse 3:12) Sulili ingasanneruvoq Guutimut kiffartortut isumaasigut uummataasigullu sunnerniartarmagit. Eva tammartissimavaa eqqunngitsumillu kissaateqalersissimallugu. Ullumikkuttaaq taamaaliorniarsarivoq. Paulus Korinthimiunut ima allassimavoq: ’Ernumavungali, soorlu pulateriaarsuup peqqusersuulluni Eva salloqittaraa, taamattaaq ilissi eqqarsaatisi aserussasoralugit Kristusimut peqqusersuikkunnaarsillusi.’ (2 Korintumiut 11:3) Inuiaat nalinginnaasumik eqqarsariaasiat qanoq ajortunngortissimagaa eqqarsaatigiinnarsinaavarput.
13. Edenimili pisimasup kingorna Satanip inuiaat qanoq salluliorfigisarsimavai?
13 Satanip Evamut Jehova sallunerarsimavaa oqarsimallunilu inuiaat guutisut ilissagaluartut Guutimut naalanngitsuugunik. Pissutsit ajorluinnartut inuiaat ullumikkut atugaat uppernarsaapput Satan, Jehova pinnani, sallusimasoq. Ullumikkummi inuit guutisut inngivipput! Satanillu salluni siulleq sallunik allanik malitseqartissimavaa. Salluliorsimavoq oqarluni inuit tarneqartut toqusuitsumik. Taamaalilluni allatut ililluni guutisut ilertoqarsinnaanera inuiannut saqqummiussimavaa. Ajoqersuut eqqunngitsoq tamanna tunngavigalugu anniarfimmik ikualasumik ajoqersuut, anersaarsiorneq siuaasanillu pallorfiginninneq pilersissimavai. Salluliuutit tamakku inunnik hundrede millionilikkuutaanik suli inussiaatiginnipput. — 5 Moses 18:9-13.
14, 15. Toqu inuiaallu siunissamut neriuutaat pillugit ilumoortoq sunaava?
14 Jehovap Adamimut oqaasii soorunami ilumoorput. Adam Guutimut ajortuliorami toquvoq. (1 Moses 5:5) Adam kinguaanilu toqugamik tassaalerput tarnit toqungasut, ilisimanngitsut iliuuseqarsinnaanngitsullu. (1 Moses 2:7; Nalunaajaasup oqaasii 9:5, 10; Hesekiel 18:4) Ajortimik Adamimit kingornussinertik pissutigalugu inuiaat tamarmik toqusalerput. (Rûmamiut 5:12) Edenimili Jehovap neriorsuutigaa kinguaassaq Diaavulup suliaanut sorsukkumaartoq takkukkumaartoq. (1 Moses 3:15) Kinguaassaq taanna tassaavoq Jesus Kristus, Guutip nammineq ernitua. Jesus ajorteqarani toqusimavoq, inuuneralu pilliutaasoq inuit toqumit utertinneqarnissaannut akiliutaavoq. Naalallutik Jesusimut uppernerminnik ersersitsisut inuunermik naassaanngitsumik Adamip annaasimasaanik angusinissaminnut periarfissaqarput. — Juánase 3:36; Rûmamiut 6:23; 1 Timûtiuse 2:5, 6.
15 Utertitsissut tamanna tassaanngilaq tarnit toqumit aniguinissaannut eqqarsaat ersarluttoq, tassaavorli inuiannut neriuutissaq piviusoq. Tassaavoq Guutimit ajoqersuut. Ilumoortuuvoq. Aammalu Jehovap asanninneranut ilisimassusianullu takussutissaavoq nuannersoq. (Juánase 3:16) Sallusuissummik tamatuminnga ilinniarsimanerput anersaapiluillu ajoqersuinerinit aniguisitaasimanerput qujamasuutigisariaqangaannginnerparput!
16. Inuit namminneq siuneqarsutsiminnik malinnissimanerat qanoq kinguneqarsimava?
16 Edenip naatsiiviani salluliuutimigut tamatumuunakkut Satanip Adam Evalu kajumissaarpai Guutimut attaviitsuujunnaarnissaannik namminnerlu siuneqarsutsiminnik tunaartarinninnissaannik. Tamatuma ullumikkut kingunipilui takusinnaavavut silarsuarmi maani pinerlunniarnerpassuartigut, aningaasatigut ajornartorsiornikkut, sorsunnertigut annertuumillu assigiinngisitsinikkut. Tupinnanngilaq Biibilimi ima oqaatigineqarmat: ’Ilisimassut silap matuma pia Guutimi sianiissutaavoq.’ (1 Korintumiut 3:19) Taamaakkaluartorli inuit amerlanersaat sianiitsuliorlutik naalliunnissartik piumaneruaat Jehovap ajoqersuineranut tusarnaarnissaminninngarnit. (Tussiaat 14:1-3; 107:17) Kristumiut Guutimit ajoqersorneqartittut nakkarfissaq tamanna ingalassimaniarpaat.
17. Taamaannatik ilisimassusermik taaneqartut suut Satanip siaruartersimavai, qanorlu kinguneqarsimappat?
17 Paulus Timoteusimut ima allassimavoq: ’Timoteusiaa, ilinnut paarititaq paarilluarniaruk ingalanniarlugillu oqaaserujuit iluaallinartut ikkualu ilisarsisunik taanerlugaasut isumaliorneri imminnut assortortut; taakku ilaasa issuarniarpaat uppernerli uniorlugu.’ (1 Timûtiuse 6:20, 21) ’Ilisarsineq’ tamanna aamma tassaavoq anersaapiluit ajoqersuinerisa ilaat. Paulusip nalaani tamanna isumassarsianut tunussisorpalaartunut ilagiinniittut ilaannit ineriartortinneqartunut tunngavoq. (2 Timûtiuse 2:16-18) Kingorna gnostikerit griikerillu isumaliutersuutaat taamaannatik ilisimassummik taaneqartut ilagiinnik ajortunngortitsisimapput. Ullumikkut silarsuarmi Guuteqannginneraaneq, Guuteqarneranik qularneq, pinngoriartuaarsimanermik isumaliutersuut Biibiimillu isornartorsiuiniarneq qutsinnerusoq taamaannatik ilisimassummik taaneqartut tunussisunit iluaqutiginiarneqartarput. Taamaannatik ilisimassummik taaneqartut tamakku kingunipilugisimavaat ileqqussatigut ajortunngorneq, sumi tamaani oqartussaasunut naalakkumannginneq, ataqqinninnginneq namminissarsiussuserlu Satanip aaqqissuussaaneranut ilisarnaataasoq.
Guutimit ajoqersorneqarnermut ataneq
18. Ullumikkut kikkut Guutimit ajoqersorneqarusuppat?
18 Naak Satanip Edenip nalaaniilli nunarsuaq anersaapiluit ajoqersuinerinik ulikkaarsimagaluaraa inoqartuaannarsimavoq Guutimit ajoqersorneqarusuttunik. Guutimit ajoqersorneqarusuttut ullumikkut millionilikkuutaajupput. Taakkununnga ilaapput kristumiut tanitaasut Jesusimik qilammi naalagaaffianik naalakkersueqataalerumaarnissaminnik ersarissumik neriugisaqartut kiisalu ’savat allat’ amerlangaartut Naalagaaffiup tamatuma aqutsinerani nunarsuarmik kingornussisussat. (Matîuse 25:34; Juánase 10:16; sarĸúmersitat 7:3, 9) Ullumikkut taakku nunarsuaq tamakkerlugu peqatigiiffimmut katersorneqarsimapput Esajasip oqaasiinut naapertuuttumik pineqarlutik: „Qitornatit tamarmik uannit, Jehovamit, ajoqersorneqassapput, eqqissisimangaarlutillu inuussapput.“ — Jesaja 54:13.
19. Jehovamit ajoqersorneqarneq sumik ilaqarpa?
19 Jehovamit ajoqersorneqarneq tassaaginnanngilaq ajoqersuutinik eqqortunik ilisimanninneq — naak tamanna pingaaruteqaraluaqisoq. Jehovap ilitsersuuppaatigut qanoq inuunissatsinnik, qanoq ililluta Guutimit ajoqersorneqarnerput inuunitsinni atussagipput. Assersuutigalugu namminissarsiussuseq, kanngunartuliorneq naalagaaffigineqarumanngissuerlu silarsuarmi atugaaqisut ingalanniartarpavut. Paasivarput silarsuarmi pisuussutinik naakkittaatsumik noqqaaniarnerit tassaasut suliat inuussutaanngitsut3. (Jâko 5:1-3) Guutimit ajoqersorneqarneq apustilip Johannesip oqaatigisaa manna puiunngisaannassavarput: ’Silarsuarluunniit silarsuulluunniit pii asaqinasigik. Silarsuarmik asaniittoq Ataatap asanninneranik ilumiugisaqanngilaq.’ — 1 Juánase 2:15.
20, 21. (a) Inuiannik tappiillisitsiniaanermini Satanip suut atorpai? (b) Guutimit ajoqersorneqarnermut attaviginnittut sunik pilluaqqussutisissappat?
20 Anersaapiluit ajoqersuinerisa ajoqersukkaminnut sunniinerat Paulusip Korintumiunut allakkamini ersersippaa: ’Taakkunani uppinngitsut isumaat silap matuma guutiata [Satanip] tappiillisippai, Kristusip tassa Guutip assingata naalannassusianik iivangkiiliup qaamangaarnera taakkununnga qaamaqqunagu.’ (2 Korintumiut 4:4) Aamma kristumiut ilumoortut taamaalillugit Satanip tappiillisikkusuppai. Edenimi Guutip kiffaasa ilaat tammartinniarlugu pulateriaarsuk atorsimavaa. Ullumikkut isiginnaagassiat pinerlunnermik kanngunartuliornermillu imallit atortarpai. Radio, atuagassiat nipilersukkallu atortarpai. Nakkartitsiniaanermini atornerpaasaasa ilagaat kukkusunik ilagisartagaqarneq. (Ussatit 4:14; 28:7; 29:3) Tamakku suussusersinissaat eqqumaffigiuaannaruk — tassaammata anersaapiluit nakkartitsiniutaat ajoqersuinerilu.
21 Eqqaamajuk Satanip Edenimi oqaasii salluliutaammata; Jehovap oqaasii ilumoortuusut uppernarsisimavoq. Taamanimiilli ullumikkumut suli taamaappoq. Satanip sallutuuunera uppernarsaatissaqartuarsimavoq, Guutimillu ajoqersorneqarneq ilumoortuaannarsimavoq. (Rumamiut 3:4) Guutip oqaasii attavigiuaannarutsigik ilumoortup salluliuutillu akornanni akersuunnermi ajugaajuaannassaagut. (2 Korintumiut 10:4, 5) Taamaattumik aalajangiusimalluinnartigu anersaapiluit ajoqersuinerisa tunuartittuarnissaat. Taamaalilluta ilumoortup sallullu akornanni akersuunnerup naggaserneqarnissaata tungaanut nikallujuissinnaassaagut. Ilumoortoq ajugaajumaarpoq. Satan peerutissaq, Guutimillu ajoqersorneqarneq kisimi nunarsuarmi tusarsaalissaaq. — Jesaja 11:9. (wD 1/4 94)
Nassuiarsinnaaviuk?
□ Anersaapiluit ajoqersuineri qanga tusarneqaqqaarpat?
□ Satan inngilipilulu qanoq salluliorsimappat?
□ Ullumikkut Satan sutigut sunniuteqartorujussuua?
□ Anersaapiluit ajoqersuineri siuarsarniarlugit Satan qanoq iliortarpa?
□ Guutimit ajoqersorneqarnermut attaviginnittut qanoq pilluaqqusaassappat?
[Qupp. 8-mi assiliartaq]
Anersaapiluit ajoqersuineri Edenip naatsiiviani tusarneqaqqaarsimapput
[Qupp. 10-mi assiliartaq]
Utertitsissut Naalagaaffillu pillugit Guutip ajoqersuutai inuiannut neriuutissatuaapput