’Oqaluttuarujuit ingalassigit’

BIIBILI inuit oqaluppalaavinik ulikkaarpoq. Tamakku atuassallugit pissanganaannanngillat, aammattaarli ilinniarfissaalluarput. Apustili Paulus Romami ilagiinnut ima allassimavoq: ’Siornagut allassimasut tamarmik allassimapput uatsinnut ilinniutissaallutik nerioqqulluta erinitsannata allakkallu tuppallersaatigalugit.’ — Rûmamiut 15:4.

Paulus nammineq misigisalikkersaartarsimavoq. Paulus Barnabasilu ajoqersuiartortitatut angalanerminnik siullermik naammassinningajalerneranni Biibilimi ima oqaatigineqarput: ’[Antiochiamut Syriamiittumut] pigamik ilagiillu katisimatikkamikkik nalunaarput Guuti ilagalutik qanoq atsigisumik iliorsimasoq, qanorlu uppernermut iserfissaq Guutimik nalusunut mappersimagaa.’ (apustilit suliait 14:27) Qularnanngilluinnarpoq qatanngutit misigisanit tamakkunannga kajumissisinneqarsimassasut.

Oqaluttualli tamakkeratik ineriartornartuupput. Isumassarsisitaalluni Paulusip Timoteus ima mianersoqqusimavaa: ’Oqaluttuarujuit arnaqquassaapalaat ileqqorisartagaat ingalanniakkit.’ (1 Timûtiuse 4:7) Titusimullu allassimavoq kristumiut aalajaatsut ’juutit oqaluttuapalaavi inuillu sallusuissummik tunussisut inassutaat soqutigissanngikkaat’. — Títuse 1:14.

Suunuku oqaluttuarujuit imaluunniit oqaluttuapalaat Paulusip pigai? Oqaatsit taakku marluk nagguigaat oqaaseq griikerisooq my’tos („oqaluttuatoqaq“). The International Standard Bible Encyclopaedia-mi oqaatigineqarpoq oqaaseq tamanna atorneqartartoq „(upperisarsiornikkut) oqaluttualiamut piviusumut attuumassuteqanngitsumut“.

Paulusip nalaani oqaluttualianik tamakkuninnga ulikkaavissimavoq. Tamakkununnga ilaapput allakkat Biibilimut ilaasussaanatik ilanngunneqarsimasut Tobitimik allakkat, Paulusip inuunera ukiunik hundredelinnik marlunnit amerlanerusunik sioqqullugu allanneqarsimagunartut. Allakkani taakkunani oqaluttuarineqarpoq juuteq upperluartoq Tobit, isimigut timmissap anaanik eqqorneqarnermigut tappingersimasoq. Kingorna ernini, Tobias, aallartissimavaa pisassaminik piumasaqariartortillugu. Aqqutaani Tobiasip inngilimit siulersorneqarluni aalisakkap uummataanik, tinguanik sungaanillu pissarsivoq. Taava naapippaa uillarneq naak arfineq-marloriarluni katissimagaluarluni suli atoqateqarsimanngitsoq, uisaavi tamarmik ullormi katiffimminni unnuakkut anersaamit ajortumit toqunneqarsimammata. Inngilimit kajumissaarneqarluni Tobiasip uillarneq katippaa anersaapilullu nigortillugu aalisakkap uummataata tinguatalu ikikkarneratigut. Aalisakkap sungaa ikiortigalugu kingorna Tobiasip ataatani takusaqarsinnaalerseqqippaa.

Oqaluttuaq tamanna nalunanngivissumik ilumuunngilaq. Takorluugaannarpalaarnermi upperisapalaarpalaarnermilu saniatigut kukkulluinnartunik ilaqarpoq. Assersuutigalugu oqaluttuami oqaatigineqarpoq Tobit naggueqatigiit avannarliit pikitsitsinerannik aammalu Israelikkut Ninevemut aallarussaanerannik takunnittuusimasoq, uffa pisimasut taakku Israelip oqaluttuarisaanerani ukiunik 257-inik akunneqartut. Oqaluttuamili oqaatigineqarpoq Tobit 158-inik ukioqarluni toqusimasoq. — Tobit 1:4, 11; 14:11, qallunaatut nutsigaq atortussaatitaasoq 1953-imeersoq.

Oqaluttualiat taama ittut ’oqaatsinut peqqissinartunut’ ilumoortunut Guutillu kiffaanit aalajaatsunit oqaluussissutigineqartunut attuumassuteqanngilluinnarput. (2 Timûtiuse 1:13) Oqaluttuarisaanikkut pisimasuinnut naapertuutinngillat isumaliutersuutaannaallutillu arnanit utoqqarnit guutiitsunit oqaluttuareqqinneqartarsimasut. Kristumiunit ingalassimaneqartariaqarput.

Oqaatsit ilumoornersut misissukkit

Oqaluttualianik tamakkununnga assingusunik ullumikkut ulikkaarpoq. Paulus ima allassimavoq: ’Ajoqersuut peqqissinartoq [inuit] ajorilerumaarpaat . . . siutitillu sallusuissummik tunussisillugit oqaluttuapalaanut saakkumaarput.’ (2 Timûtiuse 4:3, 4) Nunarsuup ilaani oqaluttuat eqqumiitsut siaruarsimaqaat tusarusunneqartaqalutik. Taamaattumik kristumiut silatusaassapput upperisarsiornikkut oqaluttuat ’oqaasertaat misissortarunikkik’ paasiniarlugu Biibilimut naapertuuttuunersut. — Job 12:11.

Oqaluttuat ilarpassui nalunanngitsumik Biibilimik tunngaveqanngillat. Assersuutigalugu nunarsuup ilarujussuani oqaluttuat inuup tarningata toqusuitsuuneragaaneranut tapersersuutaasut tusagaasarnerat nalinginnaavoq. Oqaluttuarineqartarpoq qanoq ililluni inuk toqusimasoq, kingornalu makilluni naalungiarsuttut timeqarluni imaluunniit anersaatut, uumasutut inuttulluunniit allatut allami najugaqartutut.

Guutilli oqaasiani ersersinneqarpoq tarneq toqusuitsuunngitsoq. Tarnit toqusinnaapput. (Hesekiel 18:4, NV) Aammalu Biibilimi oqaatigineqarpoq toqungasut iliverni ilisimanngitsut — eqqarsarsinnaanatik, oqalussinnaanatik qanorluunniit iliuuseqarsinnaanatik. (Nalunaajaasup oqaasii 9:5, 10; Rûmamiut 6:23) Oqaluttuanik ilumuunngitsunik tarnip toqusuitsuunerarneqarneranut tapersersuutaasunik tammartitaasimasut Paulusip oqarneratut Biibilip ’ajoqersuutaanik peqqissinartumik’ tunussisimapput.

Oqaluttuat eqqumiitsut

Oqaluttuat allat ilisiinniarnermut angakkuarniarnermullu tunngapput. Afrikap ilaani serrasartut tamakku oqaatigineqartarput nukinnik annertuunik pigisaqartut imminnut allanilluunniit uumasunngortissinnaasut paarmortut, aapakaanngortissinnaallutik timmianngortissinnaallutilluunniit. Ilisiitsut angakkullu tamakku oqaatigineqartarput silaannakkut timmisinnaasut siunertatik naammassiniarlugit, saqqummersinnaasut ersigunnaaqqissinnaallutillu, iigaq akimorlugu ingerlasinnaallutik suullu nunamut matoorunneqarsimasut takusinnaallugit.

Oqaluttuat taama ittut amerlaqimmata, inuppassuarnillu upperineqarlutik, immaqa ilagiinni kristumiuniittut ilaat sunnertissinnaapput tamakku ilumoorsorilerlugit. Immaqa eqqarsarput naak inuit nalinginnaasut taamaaliorsinnaanngikkaluartut inuit anersaanit anersaapilunnilluunniit nukimmik tunineqarsimasut taamaaliorsinnaasut. Qularnanngitsumik 2 Tásalûníkamiut 2:9, 10-mi allassimasoq uppernarsaatiginiartarpaat: ’[Inatsisaatsup] tikiunnissaa piumaarpoq Satanip sunniineragut nalinginnarnik killinnartulianik nalunaaqqutinillu tupinnartulianillu sallunernik nalinginnarnillu iluaatsulianik salloqittaataasunik, tammartussani taamaalissalluni, tassa ilumoornermut asanninnissaaq annassutissaraluartik ilassinngimmassuk.’

Ilumoorpoq allassimaffiup tamatuma ersersippaa Satan tupinnartunik iliuuseqarsinnaasoq, aammali oqaatigineqarpoq Satan ’tupinnartulianut sallunernullu’ kiisalu ’iluaatsulianut salloqittaataasunut’ tunuliaqutaasoq. Taamaalilluni Biibilimi takutinneqarpoq Satan sallutuujunerpaasoq ’inuit najugaanni nunalinnik tamanik tammartitsiniartoq’. (sarĸúmersitat 12:9) Inunnik oqaluttuanut ilumuunngitsunut uppilersitsiniaallaqqilluinnartuuvoq.

Tamatuma kingunerisaanik allaat inuit anersaarsiornermik ilisiinniarnermillu sammisaqarsimasut nalunaajaataat amerlasuutigut ilumuunngilluinnartarput. Immaqa inuit taamaattut takusimasatik, tusaasimasatik misigisimasatilluunniit ilumuuillutik upperisarpaat, immaqa uffa ilumuik pisimanngikkaluartut. Assersuutigalugu ilaasa qularinngilluinarpaat toqusimasut anersaavi attaveqarfigisimallugit. Kukkuppulli, salloqittagaallutik Satanerpalaartumillu uukapaatitaasimallutik. Biibilimi oqaatigineqarpoq toqusut ’nipangersitat inaannut samunngarsimasut’. — Tussiaat 115:17.

Diaavulup sallutuutut tusaamasaanera eqqarsaatigissagaanni oqaluttuat eqqumiitsut tamakku ilumoortuunissat ilimanaateqanngeqaaq. Oqaluttuat amerlanersaat tassaapput takorluukkat paasissaanngitsut oqaluttuareqattaarneqarnermikkut ingattarsiutigineqaraluttuinnarsimasut.

Oqaluttuat ilumuunngitsut tamakkua siaruarterneqarnerat sallunerit ataataata, Satan Diaavulup, soqutigisaanut siuarsaataavoq. (Juánase 8:44) Oqaluttuat ilumuunngitsut inuit anersaarsiornermik, Jehovamut maajunnartumik, soqutiginninnerannik annerulersitsisarput. (5 Moses 18:10-12) Inunnik ersiualersitsisarput upperisapalaaqartitsiualersarlutillu. Taamaattumik tupinnanngilaq Paulusip kristumiut oqaammagit ’oqaluttuapalaanik’ tusaaniartaqqunagit. — 1 Timûtiuse 1:3, 4.

Anersaapiluit nalunajaataat tunuartikkit

Taavami paasinarsippat oqaluttuat ilumoortut? Ilaannikkut oqaluttuarineqartarput anersaat imaluunniit angakkut Jehovap kisimi oqartussaaneranik akuerinnissimasut nalunaajaasuinillu ilumoorneraasimasut. Oqaluttuat taama ittut kristumiunit ingerlateqqinneqartariaqarpat?

Naagga. Biibilimi oqaluttuarineqarpoq Jesus anersaat minguttuut Guutimut ernerunerarluni suaartarmanni sukannersumik ’inertersimagai nalunaarutigeqqunani’. (Mákorse 3:12) Arnap inuusuttup piumaartussarsiortumik anersaallip ’Guutip qutsinnerussaartup kiffaasut’ ’aqqummillu annassummik’ oqaluussissutiginittutut Barnabasilu tikkuarmatik Paulusip anersaaq niviarsissamit anisissimavaa. (apustilit suliait 16:16-18) Jesusip, Paulusip Biibilimilluunniit allaqataasut ilaata anersaapiluit Guutip siunertaanik kiffaanilluunniit toqqakkanik nalunaajaatiginninnissaannik akuerisimanngilaat.

Aamma eqqaamasariaqarpoq Jesus Kristus nunamut pinngikkallarami anersaat silarsuaanni inuusimasoq. Satan nammineq ilisarisimasimavaa. Taamaakkaluartorli Jesusip ajoqersukkani Satanip suliaanik aliikkusersorlugit oqaluttuuttarsimanngilai, aammalu Diaavulup pisinnaasai pisinnaanngisaalu annikitsualuttaat ilanngullugit oqaluttuarisarsimanagit. Satan inngilipiluilu Jesusip ikinngutigisimanngilai. Taakku ajattugaapput pikitsitsisuullutillu illernartunik uumissuisut Guutimullu akeraasut.

Paasissallugit pisariaqartitavut Biibilip oqaluttuarai. Nassuiarpaa anersaapiluit kikkuusut, qanoq ilillutik inunnik tammartitsiniartartut qanorlu ililluta ingalassimasinnaagivut. Ersersippaa Jehova Jesusilu anersaapilunnit pissaaneqarnerusut. Oqaluttuuppaatigullu ilumoorluta Jehova kiffartuukkutsigu anersaat ajortut ataavartussamik ajoqusersinnaassanngikkaatigut. — Jâko 4:7.

Taamaattumik kristumiut pissutissaqarluarlutik oqaluttuanik ilumuunngitsunik, oqaluttuanik Guutimik akerlilersuisut kisimik iluaqutigisaannik, tunuartitsisarput. Jesusip ’sallusuissut nalunaajaatigisimavaa’; aamma ajoqersugai ullumikkut taamaaliorput. (Juánase 18:37) Silatuumik iliorlutik Biibilip unnersuussutaa Filípimiunut agdlagkat 4:8-miittoq maleruarpaat: ’Ilumoortut suulluunniit . . . eqqarsaatiginiarsigik.’ — Filípimiut 4:8. (wD 1/4 94)

[Qupp. 31-mi assiliartaq]

Kristumiut ilumoortut anersaarsiornerit suulluunniit ingalassimasariaqarpaat