Inuit unnersuussutaat iluatsinngitsoorsimappat?

KINA sunik tamanik pinngortitsisuua? Akiguit „Guuti“, taava millionilippassuit isumaqatigalugit Biibilip Guutia, Pinngortitsisoq, upperaat.

Taamaakkaluartoq Guutimut uppertorpassuit upperiuminaatsittarpaat inuiaqatigiit ajornartorsiutaannik Guutip toqqaannartumik aaqqiisssutissanik isumaginninnera. Piviusorsiornerua isumaqassalluni Guuti inuiaat annassutissaannik aaqqissuisimasoq? Amerlasuut isumaqarput taamaanneranut uppernarsaatissaqanngitsoq.

Ukiuni tuusintilikkuutaani inuit assigiinngitsorpassuartigut aaqqiissutissanik ujarlertarsimapput, Guuti eqqarsaatiginagu. Aaqqiissutissamilli nassaarsimappat? Ajornartorsiutilluunniit ajorsigaluttuinnanngillat aaqqikkuminaalliartuinnarlutillu? Ajornartorsiutit annertuut aaqqinniarlugit ullumikkut inuit qanoq iliuuseqarpat?

Immikkut ilisimasalik ima oqarsimavoq: „Nioqqutissiornikkulli allanngorujussuarneqarmat nunat siuarsimanerusut nunap piinik kipisuitsumik tunisassiornerminni atuinerminnilu, nunarsuaq tamakkerlugu ajornartorsiortitsilersimapput, nunat kinguarsimasut ineriartornissaannut ajoqutaasumik.“

Inuit nunarsuarmik aserorteriuarput. Argentinami aviisip Clarin-ip ima allaaseraa: „Ukiut hundredellit matuma affaani kingullermi piumatuuneq, isumaatsuliortarneq soqutigittaatsuliortarnerlu ajunaarnersuarnut pisuusarput inunnut ajoqutaaginnanngitsunik avatangiisinulli aamma ajoqutaasumik, ilaatigut naatsorsorneqarsinnaanngitsumik.“

Piitsuungaarneq inuiaqatigiinnut nutaanut ilaaginnalersimavoq. Allaat nunanik pisuunerusunik taasartakkat piitsoqarfioqaat. Aviisip The Globe and Mail-ip Torontomi, Canadameersup allaatigaa missiliuunneqarsimasoq „Canadamiut pingasorarterutaat tamarmik inuunermi ilaanni piitsuunermik nalaataqassasut.“ Aviisilu nangippoq: „Ilaqutariit avissaartuunnerat piitsuussutsimut pissutaanerpaasunut ilaavoq, ukiunilu kingullerni tamanna ingasatsikkiartuinnartoq.“

Inuiaqatigiit ajorsiartornerannut ersiutit ilagaat ikiaroornartunik atornerluineq. Tamanna qanoq iliuuseqarfigineqarsinnaava? Iliuuseqarfigineqarpiarsinnaagunanngilaq. Ikiaroornartumik atornerluinerup kinguneranik millionillit anersaakkut, isummakkut ileqqussatigullu nakkariartornermik misigisaqartuartarput. Ajornartorsiutaallu ajorsiartuinnarput.

Isumaqarnaraluarpoq ilisimatuut nappaatinik ajugaaffiginnilersut. Ilumoorpoq teknikkikkut atortorissaarnikkut ajornartorsiuterpassuit ajugaaffigineqartartut. Taamaattorli ilisimatusaatitigut iliuutsit mikrobinik ulorianartunik nakorsaatinik akiorneqarsinnaanngitsunik pilersitsisarput.

Inuinnaat naalakkersuisuisa inuit pisinnaatitaaffiinik unioqqutitsinerit annertuut pinngitsoortissinnaanngilaat. Assersuutigalugu inussiaateqannginnissamut inatsiserpassuaqaraluartoq, missiliuunneqarsimavoq inuit hundrede millionit sulisitaasut inussiaatinut sanilliunneqarsinnaallutik.

Sooruna inuit unnersuussutaat iluatsissimanngitsut? Makku eqqarsaatigeriakkit. Unnersuussisut inuinnaapput — inuillu piginaasaat killeqarput. Inuunerminnilu misilittagaat annikitsutut oqaatigineqarsinnaallutik kulturikkut avatangiisitigullu aamma killilersorneqaramik. Taamaattumik ilisimasaat killeqarput. Qanorluunniit siunnersuuteqaraluarunik tamanna ersissaaq. Soorlu apustili Paulus oqartoq, ’tamarmik ajortuliorput Guutimi nersornaammik ajorsarlutik’. — Rûmamiut 3:23.

Ajornartorsiutit inuiaat amerlanersaasa atugaat Guutip unnersuussutaanik sumiginnaanermik toqqaannartumik toqqaannanngitsumilluunniit pissuteqarput. Unnersuussutit ilumoortut sumi nassaarineqarsinnaappat? Ullumikkut Guutip qanoq ililluni unnersuuttarpaatigut? Ilanngutassiami tullermi tamanna akineqassaaq. (wD 15/4 94)