Aappariinnersi ataavartumik ataasiussuseqaatigilersiuk

’Guutip katititai inuup avissaartissanngilai.’ — MATÎUSE 19:6.

1. Ullumikkut kristumiut akornanni aappariit iluatsittumik ingerlanerannut suut tunngaviuppat?

JEHOVAP innuttaasa akornanni tuusintilippassuit nalerisimaarnartumik akaareqatigiiffiusumillu aappariipput. Ingerlalluarnerli taama ittoq immini pilersimanngilaq. Aappariit kristumiut iluatsittumik ingerlasarput aappariit marluullutik (1) Guutip aappariinnermut isiginninnera ataqqigaangassuk kiisalu (2) najoqqutassiat Guutip oqaasianiittut malillugit inuunissartik ilungersuutigigaangassuk. Guutimi tassaavoq aappariinnermik aaqqissuussisoq, aammalu ’qilammi nunamilu ataataasut tamarmik ateqaatigisaat’. (Evfisumiut 3:14, 15) Jehovap nalunngimmagu aappariittut iluatsittumik ingerlassagaanni suna pisariaqartoq, taassuma unnersuussutaanik maleruaanissaq iluaqutigissavarput. — Jesaja 48:17.

2. Aappariinnermi Biibilip najoqqutassiaanik maleruaannginneq qanoq kinguneqartarpa?

² Akerlianilli Biibilip najoqqutassiaanik maleruaannginneq aappariinnermi ingerlalluannginnermut pissutaasinnaavoq. Paasisimasallit ilaat isumaqarput ullumikkut USA-mi katittartut aggornerisa pingasut ilaat marluk qularnanngitsumik avikkumaartut. Allaat kristumiut ’ulluni ajornartuni makkunani’ tatineqarnermik ajornakusoortunillu atugaqarsinnaasarput. (2 Timûtiuse 3:1) Aningaasatigut suliffimmilu ajornartorsiutit aappariinnik kikkunnilluunniit annikilliuutaasinnaasarput. Aamma kristumiut ilaat aapparmik Biibilip najoqqutassiaanik maleruaalluanngitsumik pakatsissuteqarsimapput. „Jehova asavara,“ nuliaq kristumiu oqaluttuarpoq, „ukiunili 20-ni aappariinnerput ajornartorsiutinik ulikkaarsimavoq. Uiga namminissarsiortuuvoq allannguerusunngilluinnarlunilu. Parnaarussaaqqasutut misigaanga.“ Kristumiut uiusut nuliaasulluunniit ikigisassaanngitsut taama misiginertik oqaatigisimavaat. Sunaana ajoqutaasoq? Aamma suup aappariinneq soqutigisaqanngissusermut nuanniitsumut imaluunniit akerariilluinnarnermut pinaveersimatissinnaavaa?

Aappariinneq ataavartoq

3, 4. (a) Guuti aappariinnermut qanoq najoqqutassiaqarpa? (b) Sooq aappariinnermik ataavartitsineq eqqortuullunilu iluaqutaava?

³ Aappariinneq qanorluunniit atugarissaarfiutigigaluartoq inunnik naammalluinnanngitsunik marlunnik katitigaavoq. (5 Moses 32:5) Taamaattuminguna apustili Paulus oqarsimasoq aappanittut ’uinngup piisigut naalliuuteqassasut’. (1 Korintumiut 7:28) Pissutsit ajornakusoortut ilaat averusernermik avinnermilluunniit kinguneqarsinnaasarput. (Matîuse 19:9; 1 Korintumiut 7:12-15) Amerlanertigulli kristumiut Paulusip unnersuussutaa maleruartarpaat: ’Uillup uini avissanngilaa . . . aamma nuliallup nulii avissanngilaa.’ (1 Korintumiut 7:10, 11) Tassami aappariinneq ataavartussatut pilersitaavoq, soorlumi Jesus Kristus oqarsimasoq: ’Guutip katititai inuup avissaartissanngilai.’ — Matîuse 19:6.

⁴ Aappariinnermi isumaqatigiinngiffiusumi imaluunniit asaqatigiinngiffiusumi parnaarussaaqqasutut misigisumut Jehovap najoqqutassiai sukannersutut ingasattutullu issinnaapput. Taamaanngillalli. Aappariinneq ataavartussaammat aappariit Guutimik mianerinnittut ajornartorsiutitik iliuuseqarfiginiartarpaat, ajornakusoortoqaleraangallu akisussaaffimminnit qimaaniapallattaratik. Angut ukiut 20-t sinnerlugit aappaqarsimasoq ima oqarpoq: „Ajornartorsiutinik naapitaqanngitsoortoqarsinnaanngilaq. Pilluaqatigiittuaannartoqarsinnaanngilaq. Taamaattumik pisussaaffigeqatigiinneq pingaartorujussuuvoq.“ Soorunami aappariit kristumiut pingaarnerpaamik Jehva Guutimut, aappariinnermik pilersitsisumut, pisussaaffeqarput. — Naleqqiuguk Nalunaajaasup oqaasii 5:4.

Qullersaaneq naalatsigitinnerlu

5. Paulus uiusunut nuliaasunullu qanoq siunnersuuteqarpa?

⁵ Taamaattumik ajornartorsiutinik takkuttoqaraangat misiliinissamut, qimaaffissamuunngitsoq, Guutilli oqaasiini unnersuussutinik atorluaaniarnissamut piffissanngortarpoq. Assersuutigalugu, Paulusip oqaasii makku Evfisumiut 5:22-25, 28, 29-miittut eqqarsaatigeriakkit: ’Ilissi arnat, uisi naalassigik soorlu Naalagaq, arnap uini niaqorimmagu, soorluttaaq ilagiit Kristus niaqorigaat; taanna timaata annaassisigaa; soorluli ilagiit Kristus naalakkaat, taamattaaq arnat uitik tamatigut naalassavaat. Ilissi angutit, nuliasi asaniarsigik, soorluttaaq Kristusip ilagiit asagai imminillu tunniulluni taakku pissutigalugit. Taama angutit nuliatik asasariaqarpaat soorlu timitik. Nuliaminik asannittoq imminik asasaraaq. Inummi uinimminik qinngarsuinngisaannarpoq, nerisittarluguli paaqqisarpaa, soorluttaaq Kristusip ilagiit taamaaliortarai.’

6. Kristumiut uiusut silarsuarmi angutinit qanoq allaanerusariaqarpat?

⁶ Angutit uiusutut oqartussaassusertik atornerloqqajaasarsimavaat nuliaminnillu naalakkisartitseqqajaasarsimallutik. (1 Moses 3:16) Paulusilli uiusut kristumiut kajumissaarpai angutinit silamiunit allaaneroqqullugit, nuliamik suninngui tamaasa naakkittaatsumik nakkutigeqqunagit. Angut Jesus Kristus sukanninngisaannarsimavoq naalagaanianngisaannarsimalluniluunniit. Malinnitsini ataqqinnittumik pissuseqarfigisarsimavai, oqarsimallunilu: ’Ornissinga tamassi erloqisusi nanertugaasusilu, qasuersissavassi. Nammaatara ilissinut pisissiuk ilinniarfigalungalu, qanilaarama uummatikkullu makitajuikkama.’ — Matîuse 11:28, 29.

7. Nuliani suliffeqarpat uiata ataqqinninnermik qanoq ersersitsivigisinnaavaa?

⁷ Kristumiut uiusut nuliatik pisattatut qajannarnerusutut pillugit ataqqinnittumik iliorfigiumassavaat. (1 Pîtruse 3:7) Assersuutigalugu, immaqa nuliaasoq suliffeqartariaqarpoq. Uiata tamanna eqqarsaatigisariaqarpaa, sapinngisaminik ikiuunniartarluni. Arnat aviinnartariaqartarnerannut pissutaasut annerit ilaat tassa uiusup meeqqanik angerlarsimaffimmilluunniit sumiginnaavallaarnera. Taamaattumik kristumiut uiusut ilaqutariinnut iluaqutaasumik angerlarsimaffimmi siunertaqartumik ikiuunniartarput.

8. Kristumiup nuliaasup naalatsigitinnera qanoq paasisariaqarpa?

⁸ Nuliaasut kristumiut uiminnit ataqqinnittumik pineqarunik uiminnut naalatsigitinnissaat ajornannginnerussaaq. Naalatsigitinnerli tamanna tassaanngilaq nuanniitsumik inussiaatigitinneq. Guutip arnaq, inussiaatissatuunngitsoq, angummulli „tulluartunngorlugu“ (’illua’tungissanngorlugu’, NV, quppernerup ataani ilanngussaq) naammaatissanngorlugu pinngortissimavaa. (1 Moses 2:18) Malaki 2:14-imi nuliaq tassaanerarneqarpoq angutip ’angerfigisaa’. Aammalu Biibilip nalaani arnat annertungaatsiartumik kiffaanngissuseqarsimapput. „Nuliaalluartoq“ pillugu Biibilimi ima allassimavoq: „Uiata tamatigorluinnaq tatigisarpaa.“ Aap, inoqutigiinnik nerisassarsiuussineq, nakkutiginninneq isumaginninnerlu, narsaatinik pisiniarneq namminerlu niuerniarneq akisussaaffigisinnaavai. — Ussatit 31:10-31.

9. (a) Biibilip nalaani arnat Guutimik mianerinnittut ilumoorlutik naalatsigitinnertik qanoq ersersissimavaat? (b) Ullumikkut kristumiu nuliaasoq naalatsigitittuaannarnissaanut suup ikiorsinnaavaa?

⁹ Nuliap Guutimik mianerinnittup uimi oqartussaassusia akuerisarpaa. Assersuutigalugu Sarap ’Abraham naalattarsimavaa naalakkaminik taallugu’, imaanngitsoq inussiarnisaarniutigiinnarlugu, ilumoorlunili naalatsigitinnini ersersinniarlugu. (1 Pîtruse 3:6; 1 Moses 18:12) Aamma illoqarfik ilorrisimaarnartoq Ur qimallugu uinilu tuperni najugaqalernissaminnut pinaasersimanngilaq. (Eprîarit 11:8, 9) Naalatsigitinnerli ima paasineqassanngilaq nuliaasoq pisariaqaraangat akisussaassusilittut iliorsinnaanngitsoq. Kipineqarneq pillugu Guutip inatsisaa Mosesip maleruanngitsoormagu nuliata Sipporap aalajangersimalluinnarluni iliuuseqarnermigut ajunaarnissaraluaq pinngitsoortissimavaa. (2 Moses 4:24-26) Angummik naammalluinnanngitsumik iluarusutsitsinissaannaq pineqanngilaq. Nuliaasut ’uiminnut naalattussaapput soorlu Naalakkamut’. (Evfisumiut 5:22) Kristumiu nuliaasoq Guutimut attaveqarnini naapertorlugu eqqarsartaaseqaruni uimi kukkunerisa naammalluinnanngissutaasalu minnerusut isumakkeerfigeriaannaanissaannut iluaqutigissavaa, soorlumi aamma uiusoq taamaaliortussaasoq.

Attaveqatigiinneq — aappariinnerup aava inuussutaasoq

10. Aappariinnermi attaveqatigiinneq qanoq pingaaruteqartigaa?

¹⁰ Aappariit avittarnerannut suna pissutit annerpaartarineraat aperineqarami eqqartuussissuserisoq ima akisimavoq: „Uummammiunik aniatitsilluni tatigeqatigiilluni oqaloqatigiissinnaarpiannginneq aammalu ikinngutiginerpaasatut iliorfigeqatigiittannginneq.“ Aap, attaveqatigiinneq, oqaloqatigiinneq, aappariinnerup nukittuup aagaa inuussutaasoq. Biibilimi Ussatit 15:22-mi Ny Verden-nutsigaq naapertorlugu ima allassimavoq: „Tatigeqatigiilluni isumalioqatigiittoqarsimanngikkaangat pilersaarutit iluatsinngitsoortarput.“ Uiusoq nuliaasorlu tassaasariaqarput ’ikinngutigiit tatigeqatigiittut’, asannittumik qanimut ataqatigiillutik. (Ussatit 2:17) Aappariippassuilli attaveqatigiinniarneq, tassa oqaloqatigiinniarneq, ajornakusoortittarpaat, taamaattumillu ajuallassimaarnerit narrassimaarnerillu naggataatigut aserornartumik kamaannersuannguutsittarlugit. Imaluunniit aappariit assiaqummik saattumik inussiarnisaarnertut ittumik assiaqutseqqasarput, misigissutsikkut imminnut ungaseqalutik.

11. Uiusup nuliaasullu akornanni attaveqatigiinneq qanoq ililluni pitsanngorsarneqarsinnaava?

¹¹ Ajornartorsiutinut ilaasorinarpoq angutit arnallu tamarmik immikkut attaveqatiginneriaaseqarnerat. Arnat amerlanersaasa misigissutsit oqaloqatigiissutigerusunnerusarunarpaat, angutilli pissutsit piviusut oqaloqatigiissutigissallugit nuannarinerugunarlugu. Arnat misiginneqataanermik misigissutsinillu ersersitseqqajaanerusarput, angutilli aaqqiissutissamik ujartuinerusarlutik. Attaveqatigiilluarnerli pilersarpoq aappariit tamarmik marluullutik aalajangiusimagaangassuk ’tusarasuarlutik pisarnissartik, oqalukkumaarnertunissartik kamakkumaarnertunissartillu’. (Jâko 1:19) Isissigut toqqarlusi isigisaritsi tusarnaaqqissaartarlusilu. Isumassuerpaluttunik immissinnut apersortaritsi. (Naleqqiuguk 1 Samuel 1:8; Ussatit 20:5.) Aappat ajornartorsiummik saqqummiussaqaraangat aaqqiissutissamik saqqummiiniapallannak tusarnaaqqissaartarit pissutsillu aaqqinnissaat sulissutigalugu. Maniguullusilu qinoqatigiittaritsi, Guutimit unnersuunneqarnissarsi ujartorlugu. — Tussiaat 65:3; Rûmamiut 12:12.

12. Aappariit kristumiut qanoq ilillutik imminnut piffissaqarfiginiarsinnaappat?

¹² Ilaannikkut tatineqarneq ulaperujunnerlu pissutaallutik aappariit oqaloqatigiilluarnissaminnut nukissaalatsillutillu piffissaalatsisarput. Kristumiulli aappariinnertik ataqqinartuutittuaannarumagunikku aserornissaanullu illersorumagunikku imminnut qanittariaqarput. Aappariinnertik sutut akisuutut, nalilerujussuartut, pisariaqarpaat, aammalu tamatumunnga imminnullu piffissamik pisisariaqarlutik. (Naleqqiuguk Kulorsamiut 4:5.) Immaqa ilaannikkut tv qamiinnarlugu oqaloqatigiilluarnissamut piffissarsisoqarsinnaavoq. Tiitoqatigiittarneq kaffisoqatigiittarnerluunniit aappariit misigissutsit ersersillugit oqaloqatigiittuaannarnissaannut iluaqutaasinnaavoq. Taamaalillutik ilaqutariinnut tunngassuteqartut assigiinngitsut siunersiueqatigiissutigisinnaavaat. (Ussatit 13:10) Silatusaarnerussusialu uumitsaffiginerit paatsoorfiginerillu kamaannersuannguutinnginnerini oqaloqatigiissutigisarnissaat ileqquliutissallugu! — Naleqqiutikkit Matîuse 5:23, 24; Evfisumiut 4:26.

13. (a) Ammasuunermik unneqqarissuunermillu Jesus qanoq maligassiuisimava? (b) Aappariit qanoq ilillutik imminnut qaninnerulersinnaappat?

¹³ Angut ataaseq ima nassuerpoq: „Qanorpiaq isumaqarnerma misiginermalu nuliannut oqaluttuarisariaqartuarnissaat artornarteqaara.“ Imminulli ammarnissaq qanimut attaveqatigiilissagaanni pingaaruteqartorujussuuvoq. Jesusip siunissami nuliassaqatigiiminut qanimut attaveqarsimanera malugisariaqartuuvoq. Taanna ima oqarsimavoq: ’Kiffanik taassaarpassi, kiffap naalakkami suliai nalummagit; kisianni ikinngutinnik taavassi, Ataatannit tusakkannik tamanik nalunaarfigigassi.’ (Juánase 15:15) Taamaattumik aappat ikinngutittut isiginiaruk. Aappat misigissutsinnik aniatitsiffigisaruk. Pisariitsumik unneqqarissumillu ’asanninninnik misigititsinissat’ ilungersuutigisaruk. (Taalliat Asanninnilersaarutit 1:2) Ammasumik oqaloqatigiinnissaq immaqa ilaannikkut ittuukujunnarsinnaagaluarpoq, aappariilli marluullutik tamakkiisumik ilungersuuteqarpata aappariinnerat ataavarsinnaassaaq.

Isumaqatigiinngissutinik aaqqiiniarneq

14, 15. Assortuunneq qanoq ililluni pinngitsoortinneqarsinnaava?

¹⁴ Isumaqatigiinngissutigilluinnakkat ilaannikkut takkussinnaasarput. Angerlarsimaffissili ’illunngortariaqanngilaq saqitsaaffiusoq’. (Ussatit 17:1) Meeqqat tusaatillugit misigissutsinut tunngasunik oqqannaveersaartaritsi, aappassilu misigissusii eqqarsaatigisarsigik. Rakel meeraqannginnini aliasuutigalugu meerartaarteqqummat Jakob kamalluni akisimavoq: „Uanga Guutiunerama? Taassumamiuna ilumiussikkumanngikkaatit.“ (1 Moses 30:1, 2) Angerlarsimaffimmi ajornartorsiutinik takkuttoqaraangat immissinnut saassunnasi ajornartorsiut saassuttarsiuk. Marluullusi oqaloqatigiissutigigaangassigik „eqqarsariaqqaarnani oqaaserisat“ imaluunniit aappaq oqalutsillugu pisariaqanngitsumik kipititsisaqattaarnerit pinngitsoorniartarsigik. — Ussatit 12:18.

¹⁵ Immaqa isummatit misigissuseqarfigisorujussuuatit, anissinnaavatilli ’narranngikkaluarlutit, kamanngikkaluarlutit, nillianngikkaluarlutit mitallinngikkaluarlutilluunniit’. (Evfisumiut 4:31) „Ajornartorsiutit oqaloqatigiissutigisarsigik pisarnissitut nipeqarlusi,“ uiusoq ataaseq siunnersuivoq. „Kamappaluttumik nipeqartoqalerpat oqaloqatigiinneq unitsissiuk. Unitsikkallariarlugu aallarteqqissaasi.“ Ussatit 17:14-imi ima pitsaasumik siunnersuuteqarpoq: „Nipangiinnartarit saqitsaattoqalinnginnerani.“ Tamassi eqqissiimereerussi oqaloqatigiinneq aallarteqqissinnaavarsi.

Ilumoorfigeqatigiigitsi

16. Sooq allasiorneq taama ilungersornartigaa?

¹⁶ Eprîarit 13:4-mi ima allassimavoq: ’Nuliariinneq tamani kanngunaakkili, nuliariillu innarfiat minguikkili; uersaasulli arnaanillillu Guutip eqqartuukkumaarpai.’ Arnaaneqarneq, imaluunniit allasiorneq, Guutimut ajortuliorneruvoq. Aamma aappariinnermik aseruisarpoq. (1 Moses 39:9) Aappariinnik siunnersuisartoq ima allassimavoq: „Allasiorneq paasineqaraangami ilaqutariinnik tamanik anorersuartut eqquisarpoq, inoqutigiinnik aseruilluni, tatigeqatiinnermik imminullu ataqqinermik aseruisarluni meeqqanillu ajoqusiisarluni.“ Aamma naartulernermik kinguaassiuutitigullu nappaateqalernermik kinguneqarsinnaavoq.

17. Allasiorusussuseq qanoq ililluni pinngitsoortinneqarsinnaava imaluunniit tunuartinneqarsinnaava?

¹⁷ Silarsuup atoqatigiinnermik isiginnittaasianit atuakkatigut, tv-kkut filmitigullu takutinneqartartumit sunnerneqarlutik inuit ilaat allasiorusulersarput. (Galâsiamiut 6:8) Paasisimasallilli ilaat oqartarput allasiorneq kinguaassiuutitigut atoqatiginnerusussusiinnarmik pissuteqarneq ajortoq, aammali suli ajuutiginassuseqarnermik uppernarsaarusunnermik imaluunniit asaneqarnerusutut misigerusunnermik pissuteqartartoq. (Naleqqiuguk Ussatit 7:18.) Sunaluunniit pissutaagaluarpat kristumiut takorluuinerit kanngunartut suulluunniit tunuartittariaqarpaat. Misigissutsitit ilumoorlutit aappannut oqaloqatigiissutigisakkit. Pisariaqarpat ilagiinni utoqqaanertanik ikiortissarsioritsi. Taamaaliorussi ajortuliornissaq pinngitsoortissinnaavarsi. Ingammillu kristumiut angutaagunik arnanut arnaagunillu angutinut iliorfiginninnerminni mianersortariaqarput. kateriarluni allamut ajuutiginnilluni isigineq Biibilip najoqqutassiaanik unioqqutitsineruvoq. (Job 31:1; Matîuse 5:28) Kristumiut ingammik mianersuutigisariaqarpaat suleqatiminnut misigissutsikkut tunniusimalinnginnissartik. Suleqatinnut inussiarnersumik piviusorsiortumillu attaveqarit.

18. Aappariit kinguaassiuutitigut atoqatigiinniarnikkut ajornartorsiutaannut suut pissutaagajuttarpat, qanorlu aaqqinneqarsinnaappat?

¹⁸ Illersuutaanerpaasoq tassa aappamut asannittumik ammasumillu attaveqarneq. Paasisimasallit ilarpassui oqartarput aappariit kinguaassiuutitigut atoqatigiinniarnikkut ajornartorsiutaat timikkut qanoq issutsikkut pissuteqarnerunatik amerlanertigulli attaveqatigiinniarnikkut amigaateqarnermik pissuteqarnerusartut. Tamakkunuunatigut ajornartorsiutit ikinnerusarput aappariit ammasumik attaveqatigiittarpata aappariittullu pisussaaffitik pinngitsoorani naammassisassaannartut isiginagit asanninnermulli ersersitsissutissatut isigippatigik.a Pissutsit taamatut eqqortumik ingerlappata qanimut ataqatigiinneq aappariinnerup nimianik nukittorsaassaaq. — 1 Korintumiut 7:2-5; 10:24.

19. Suna ’iluarluinnassutsip nimeraa’, aappariinnermullu qanoq sunniuteqarsinnaava?

¹⁹ Ilagiinni kristumiuni ’iluarluinnassutsip nimia’ tassaavoq asanninneq. Asanninneq ineriartortikkunikku aappariit Guutimik mianerinnittut ’kamageqatigiittuaannarsinnaassaapput isumakkeerfigeqatigiittuaannarsinnaassallutillu’. (Kulorsamiut 3:13, 14) Najoqqutassaqartumik asannittup allanut ajunngitsussaq eqqarsaatigisarpaa. (1 Korintumiut 13:4-8) Asanninneq taama ittoq ineriartortissiuk. Aappariinnissi nimianik nukittorsaanissannut iluaqutigissavat. Aappariinnissinni Biibilip najoqqutassiai atorsigik. Taamaaliorussi aappariinnersi ataavartumik ataasiussuseqaatigilissavarsi, Jehovamullu Guutimut nersornaataallunilu ataqqinaataassaaq. (wD 15/7 94)

[Quppernerup ataani ilanngussaq]

Qanoq akissavit?

□ Sooq aappariinneq nimiusariaqarpa ataavartoq?

□ Qullersaaneq naalatsigitinnerlu Biibilimi qanoq najoqqutassaqarpat?

□ Aappariit qanoq ilillutik attaveqatigiinnertik pitsanngorsarsinnaavaat?

□ Isumaqatigiinngissutit aappariit qanoq kristumiorpalaartumik aaqqinniarsinnaavaat?

□ Aappariinnerup nimianik nukittorsaaniarnermi suna iluaqutaassava?

[Qupp. 10-mi assiliartaq]

Nuliani suliffeqartariaqarpat kristumiu uiusoq taassumunnga nanertuutaajumassanngilaq