Jesusitut ajoqersuisarpit?

’Oqaatsit tamakku Jesusip naasimammagit, ajoqersuutai inuit annilaarutigaat, naalattariaqartutut ajoqersormatik, allakkanik ilisimasortamissut pinnani.’ — MATÎUSE 7:28, 29.

1. Jesus Galilæami ajoqersuitilluni kikkunnit malinneqarpa, qanorlu qisuariartarpa?

JESUS sumulluunniit pigaluaraangat inuit ussagarfigisarsimavaat. ’Galilæa tamaat Jesusip angalavaa naalagiartarfiini ajoqersuisarluni, iivangkiiliulu naalagaaffimmik oqaluussissutigalugu, inuillu nappaataat tamalaat ajuutaallu tamalaat katsorsartarlugit.’ Iliuusii tusaamaneqarnerujartuinnartillugit ’inuppassuit amerlasuut malilersimavaat Galilæamit Dekapolisimillu Jerusalemimillu Judæamillu Jordanillu ungataanit’. (Matîuse 4:23, 25) ’Inuppassuillu takugamigit nalligingaalerpai, paarinerlugaallutillu isumakkiigaammata savatut paarsisoqanngitsutut.’ Ajoqersuitilluni imminnut misiginneqataassusia tusarnaartaasa malugisarsimavaat; ikiminnut nipaallisaatitut misigisarsimallugu, taamaattumillu Jesus inuttut ornigilertarsimallugu. — Matîuse 9:35, 36.

2. Tupinnartuliaasa saniatigut suna pissutigalugu Jesus ornigarneqartarpa?

² Jesusip inuppassuit tupinnartuliakkut ajorunnaarsittarsimavai, soorlu pupissut, tusilartut, tappiitsut iloqiaasullu. Allaat toqusut makitittarsimavai! Jehovap pissaanerata Jesusikkut sulineranut uppernarsaatissat tamakku ersarissut soorunami inuppassuarnik kajungilersitsisimapput. Tupinnartuliaannaalli inuit ussagassutiginngilaat; aamma anersaakkut ajorunnaarsinneqarneq Jesus ajoqersuigaangat pisartoq inuit ujartortarpaat. Assersuutigalugu qaqqami oqaluusianut tusaamasaasumut qisuariarneq malugisariaqartuuvoq: ’Oqaatsillu tamakku Jesusip naasimammagit, ajoqersuutai inuit annilaarutigaat, naalattariaqartutut ajoqersormatik, allakkanik ilisimasortamissut pinnani.’ (Matîuse 7:28, 29) Inuit ajoqersuisui qanga ajoqersuisuusimasut oqaatsikkut kingornussarsiarititaannik issuaasarnermikkut taakku naalattariaqartutut saqqummiuttarpaat, Jesusilli Guutimit oqartussaaffilerneqarluni ajoqersortarpai: ’Oqalukkaangama ima oqaluttarpunga, soorlu Ataatap oqarfigigaanga.’ — Juánase 12:50.

Ajoqersuinera inuit uummataannut annguttarpoq

3. Jesusip ajoqersueriaasia allakkanik ilisimasut farisiiarillu ajoqersueriaasiannit qanoq allaanerua?

³ Jesusip ajoqersuinera allakkanik ilisimasut farisiiarillu ajoqersuinerannit allaaneruvoq, imaaginnanngitsoq Oqaatsikkut kingornussarsiat artukkersuisut inunneersut pinnagit tusarliussaq ilumoortoq Guutimeersoq saqqummiukkamiuk, aammali ajoqersueriaatsimigut. Allakkanik ilisimasut farisiiarillu makitasuujupput misigittaatsuullutillu; ataqqinarpaluttumik taagorneqarnissartik pingaakujullutik piumasaraat inuinnaallu asissuerpalullutik ’perloqqusanik’ taasarlugit. Jesusili qanilaartuuvoq, saamasuulluni, inussiarnersuulluni, qajassuussisuulluni, ilassiortuulluni misiginneqataasuullunilu. Oqaasii eqqortumik paasinarsisitsiinnaratik killiisarput; uummammeersuupput tusarnaartullu uummataannut annguttarlutik. Tusarliussaa nuannersoq inunnit kajungerineqarpoq, tusarliussaa pissutigalugu ullaannguakkut naalaffimmut ujartarpaat, qimakkumajunnaartarlugu nuannaarlutillu tusarnaartarlugu. Amerlasoorsuullutik ussagarfigisarpaat, ilaallu ima oqarsimapput: ’Inummik taassumatut oqaluttoqanngisaannarpoq.’ — Juánase 7:46-49; Mákorse 12:37; Lúkarse 4:22; 19:48; 21:38.

4. Ingammik suna pissutaalluni Jesusip ajoqersueriaasia nuannarineqarpa?

⁴ Jesusip ajoqersuutaata kajungerineqarneranut assersuuteqartarnera ilaatigut pissutaavoq. Allat isigisartagaat isigisarpai, eqqarsaatigisimanngisaannagaannilli isikkoqalersittarpai. Naasut narsaammi alliartortut, timmissat iniliortut, siaruarterisut, savanik paarsisut savanik tammaraluarsimasunik angerlaassisut, arnat atisanik pisoqqanik ilaartuisut, meeqqat aqqusinerni pinnguartut, aalisartut qassutinik amoorisut — ulluinnarni pisartut kikkut tamarmik takusartagaat Jesusip allarluinnarmik isigalugit saqqumiuttarpai. Guuti taassumalu naalagaaffia pillugit oqaluttuaraangami imaluunniit inuiaqatigiit iluini pissutsinik tikkuaaniaraangami takusinnaasani tamaasa atortarpai.

5. Jesusip suut assersuutitut atortarpai, aamma sooq inunnut maluginiarnartuuppat?

⁵ Ulluinnarni inuit sungiusimasaat Jesusip assersuutitut atortarpai. Sallusuissut pissutsinut nalunnginneqarluartunut atassuserneqaraangami tusarnaartut isumaannut ajornannginnerusumik puiuikkiutitinneqartarpoq. Taamaakkaangat ajoqersuutigisaq tusaaginnarneqarneq ajorpoq; takorlooruminartarpoq eqqaamajuminarnerullunilu. Jesusip assersuusiai tamatigut paasiuminartuusarput; annikitsualuttaqanngillat tusarnaartunik allamut saaqqajaatitsisinnaasunik paatsiveerutitsisinnaasunilluunniit. Assersuutigalugu Samariamiumik naakkinnittumik assersuut eqqarsaatigeriaruk. Tassani tullermik asanninnermik qanoq ililluni ersersitsisarnissaq paasinarsarluarneqarpoq. (Lúkarse 10:29-37) Aammalu ernerit marluk pillugit assersuusiaq, aappaa naatsiivimmut viinnequtilimmut suliartorniarluni oqartoq taamaaliornanili, aappalu suliartorniarnani oqartoq taamaaliorlunili. Isumaa ingerlaannaq paasinarpoq naalannerup qanorpiaq oqaatigisariaqarnera ersarilluni: Suliassiissutigineqartoq naammassineqartariaqartoq. (Matîuse 21:28-31) Jesus ajoqersuigaangat allamut saaqqajaasoqarneq ajorpoq — nillissaajussullugu malinnaarsuataartarput.

Asanninnermut illersuutaagaangat Jesus maleruutiinnartarpoq

6. Ingammik qaqugukkut ingasattajaannginnissaq maleruutianissarlu iluaqutaasarpat?

⁶ Ingasattajaarniannginnermik Biibilimi eqqartuinerit ilaat biibilimi atuaqqissaarummi quppernerup ataani ilanngussaq naapertussagaanni isumaqarput „maleruutianeq“. Ilisimassut Guutimeersoq maleruutiasarpoq qajassuussinerunissamut pissutissaqaraangat. Ingasattajaarniartuussanngilagut, tamatumalu nassatarissavaa ilaannikkut nakkaannartarnissarput. Aamma utoqqaanertat asanninermut illersuutaagaangat tamatuminngalu ajornarunnaarsitsisumik isumataarnermik ersersitsineqaraangat akuersiinnarnissaminnut piumassuseqartariaqarput. (1 Timûtiuse 3:3; Jâko 3:17) Jesus maligassiuilluarsimavoq ajunngitsumik maleruutiassuseqarnermigut, naakkinninneq misiginneqataanerlu pissutissaqartitsigaangata najoqqutassat nalinginnaasut qaangiinnartarlugit.

7. Jesusip inussiarnersuuneranut assersuutinik taasaqarit.

⁷ Jesus ilaanni ima oqarsimavoq: ’Uannik inunnut miserratiginnittoq uangattaaq miserratigiumaarpara Ataatannut qilammiusumut.’ Peterili Jesus pingasoriarlugu miserratigigaluaramiuk ajattugaanngilaq. Qularnanngitsumik qajassuussinerunissamut pissutissat Jesusip eqqarsaatigisimavai. (Matîuse 10:33; Lúkarse 22:54-62) Aamma taamaaliorsimavoq taamani arnap aaqartuarnini pissutigalugu minguttuujusup inuit akornannut pinermigut Mosesip inatsisai unioqqutimmagit. Arnaq Jesusip assuarinngilaa, isumatsassimaneranilli paasinnifigalugu. (Mákorse 1:40-42; 5:25-34; takujuttaaq Lúkarse 5:12, 13.) Jesusip apustilini peqqusimavai Messiasiunerminik allanut oqaluttuarinnissanngitsut, namminerli Sykarimi imiliap eqqaani arnamut Samariamiumut tamatuminnga oqaluttuarluni. (Matîuse 16:20; Juánase 4:25, 26) Tamakkunani tamani asanninneq, naakkinnissuseq misiginneqataassuserlu najoqqutassanik qasukkartitsissutaapput. — Jâko 2:13.

8. Allakkanik ilisimasut farisiiarillu qaqugukkut maleruagassanik qasukkaasarpat, qaqugukkullu taamaaliorneq ajorpat?

⁸ Allakkanik ilisimasut farisiiarillu killissaanngitsut akerlerluinnaanik iliortarsimapput. Namminneq sabbatimi maleruagassiatik unioqqutittarsimavaat nersutaatitik imertikkiartortarlugit; imaluunniit namminneq ernertik imaluunniit namminneq nersutaatertik imiliamut nakkarpat sabbati unioqqutissinnaasarsimavaat qaqitipallannerisigut. Inuinnarnulli taama qasungatiginngillat! Inuinnaat pillugit inassutit, oqimaangaaramik namminnerluunniit attorumanngisatik, qasukkartikkumaneq ajorpaat. (Matîuse 23:4; Lúkarse 14:5) Jesusimut inuit maleruagassanit qeratasuunit pingaarnerupput; farisiiarinulli maleruagassat inunnit pingaarnerupput.

Jesus — ’inassutip ernera’

9, 10. Jesus sumiittoq angajoqqaavisa nassaaraat, Jesusilu apeqqutinik qanoq ittunik apersorpa?

⁹ Inuit ilaasa Jesusip meeraanera Biibilimi eqqartuiffigineqarneroqqugunaraluarpaat. Meeraaneranilli oqaluttuarineqartumernit inuppassuit paasilluinnanngikaluagaannik pingaaruteqartorujussuupput. Tamakku Lúkarse 2:46, 47-mi atuarsinnaavavut: ’Pivorlu ullut pingasut naammata nanivaat naalaffimmi ajoqersuisut akornanni issiasoq, tusarnaarlugilu apersortarai. Tusartaasali tamarmik sianissusiagut akisarnerisigullu tupigingaarpaat.’ Kittelip Theologisches Wörterbuch zum Neuen Testament-iani ersersinneqarpoq oqaaseq griikerisoq ’apersortarlugillu’-mik nutserneqarsimasoq meeqqatut alapernaassutsimuinnaanngitsoq atassuteqartoq. Oqaaseq tamanna atorneqarajuppoq killisiuinermi, paasiniaanermi apeqqarissaarnermiluunniit apersornermut, atorneqartarlunilu ingammik ’farisiiarit saddukiiarillu ussiiniarlutik apeqqutaannut’, Mákorse 10:2-mi 12:18-23-milu eqqartorneqartunut.

¹⁰ Oqaatsinik qinerlerfissiami tassani aamma ima allassimasoqarpoq: „Oqaatsip tamatuma atorneqarnera eqqarsaatigalugu aperisoqarsinnaavoq . . . Lúk. 2:46-mi nukappiaqqap paasisaqarusussusia pineqarnerunani tunngavilersuutai qularunnaarnartut pineqarnerusut. V[ersi] 47 isummamut kingullermut naleqqutissagaluaqaaq.“a J. B. Rotherhamip nutsigaani versi 47 pikkunarsagaaqaaq: „Tusartaasa tamarmik paasisimasaqassusia akissutaalu uissuummissutigisorujussuuaat.“ A. T. Robertsonip Word Pictures in the New Testament-iani oqaatigineqarpoq tupigusuttorujussuunerat isumaqartoq „paatsiveerutaasartut, isaat anillalerlutillusooq“.

11. Maria Josefilu takusaminnut tusakkaminullu qanoq qisuariarpat, oqaatsinillu qinerlerfissiaq qanoq saqqummiussiva?

¹¹ Jesus angajoqqaavisa kiisami nanigamikku tupigusussimaqaat. (Lúkarse 2:48) Robertson oqarpoq oqaatsip griikerisuup nagguia isumaqartoq „ajasoorpoq, uissuummisorujussuuvoq“. Nangilluni oqaatigaa Josefip Mariallu takusatik tusakkatillu ’ajasoorujutigisimagaat’. Tassa Jesus taamanikkut ajoqersuillaqqissunngoreersimavoq. Naalaffimmi pisimasoq tamanna tunngavigalugu Kittelip atuakkiaani oqaatiginiarneqarpoq ’Jesus nukappiaraatillunili akerleriissummik akerlilersortimi naggataatigut nakkaannassutigisariaqagaannik pilersitsisimasoq’.

12. Kingorna Jesusip upperisarsiornikkut siuttunik oqaloqatiginnittarnerini suna malunnaataava?

¹² Aap, allatut ajornartumik nakkaannarsimapput! Ukiorpassuit tamatuma kingorna apeqqutit taama ittut ikiortigalugit Jesusip farisiiarit akissutissaarutsissimavai ’apersoqqinnissamut sapiisertuerutsillugit’. (Matîuse 22:41-46) Aamma saddukiiarit makititaaffissaq pillugu apeqqummut oqaasissaarutsissimavai ’kingorna sumik apersorneq sapilersillugit’. (Lúkarse 20:27-40) Allakkanik ilisimasut iluatsitsinerusimanngillat. Ilaat Jesusimik oqqateqareersorlu allassimavoq ’sapiisersuerussimasoq apersoqqissallugu’. — Mákorse 12:28-34.

13. Naalaffimmi pisimasoq suna pissutaalluni Jesusip inuunerani allanngulerfiua, aamma suna paasilersimagunarpaa?

¹³ Sunamitaava pissutigalugu naalaffimmi pisimasoq Jesusip meeraanerani pisimasuni kisiartaalluni siunissamut atatinneqarsimava? Jesusip inuunerani allanngorfiummat. Aqqaneq-marlunnik ukioqarluni juutit oqartarnerattut ’inassutip ernerilersimavaa’, Inatsisit maleruaqqusaannik tamanik maleruaanissaminut pisussaalerluni. Imminik Josefimillu isumaalutsitsisimanerminik Mariap assuarimmani akissutaata ilimanarsitippaa tupinnartuliakkut inunngorsimanini Messiasitullu siunissaqarnini paasilersimagai. Tamanna erserpoq Guuti Ataatavigalugu ersarissumik oqaasiatigut: ’Sooq ujarpisinga? Nalugassinga Ataatama pii najussagikka?’ Oqaatsit taakkorpiaat Jesusip oqaasiini Biibilimi allanneqarsimasuni siullersaapput, qularnanngilluinnartumillu ersersitsipput nunamukartinnermigut Jehovap siunertaa taamanimiit paasilersimagaa. Taamaattumik pisimasoq tamanna pingaaruteqartorujussuuvoq. — Lúkarse 2:48, 49.

Jesus meeqqanik asannittuuvoq taakkuninngalu paasinnittuulluni

14. Jesusip aqqaneq-marlunnik ukioqarluni naalaffimmiissimaneranik oqaluttuami ingammik suna meeqqanut inuusuttunullu soqutiginarpa?

¹⁴ Pisimasoq tamanna ingammik meeqqat inuusuttullu soqutigisariaqarpaat. Tamatumanimi ersersinneqarpoq Jesus alliartornermini qanoq atuaqqissaartartigisimasoq. ’Inassutip ernerata’ aqqaneq-marlunnik ukiullip taassuma ilisimassusia naalaffimmi ajoqersuisut ajasoorutigisimasorujussuuaat. Taamaakkaluartorli Josefip sannaviani suliuaannarsimavoq, Josef Marialu ’naalalluarlugit’, aammalu ’Guutimi inunnilu nuannarineqarnermigut’ siumukariartorluni. — Lúkarse 2:51, 52.

15. Jesusip nunami kiffartornermini meeqqat inuusuttullu qanoq isumassortarsimavai, tamannalu ullumikkut meeqqanut inuusuttunullu qanoq pingaaruteqarpa?

¹⁵ Jesus nunami kiffartornermini meeqqanik inuusuttunillu assut isumassuisuusimavoq: ’Palasiunerit allakkanillu ilisimasut tupinnartuliai takugamikkik, meeqqallu naalaffimmi torlulammata oqarlutik: „Uusiannaa Davidip ernera,“ uumitsaatigaat oqarlutik: „Uku qanoq oqartut tusarpigit?“ Jesusillu akivai: „Aap; imaattut atuanngisaannarpisigik: Merlertunnguit miluttullu qarninit nersuutissaq piareersarpat?“’ (Matîuse 21:15, 16; Tussiaat 8:3) Ullumikkuttaaq meeqqat inuusuttullu — ilaat allaat inuunerminnik annaasaqarlutik — assuarnaassutsiminnik attassisut nersuutissaminillu piareersaasut taamatulli isumassortigai.

16. (a) Jesusip meeraaraq apustilimi akornannut pissuteriarlugu sumik ilinniartippai? (b) Jesusip inuunermi ilaani pingaartumi qanga allaat meeqqat piffissaqarfigisimavai?

¹⁶ Apustilit kina arlartik annerpaanersoq assortuussutigimmassuk Jesus aqqaneq-marlunnut oqarsimavoq: ’Siulliujumasoqarpat taanna tamanit kingiulliussavoq, tamarmillu kiffarissavaat.’ Taava ’merlertunnguaq tiguaa taakkununnga akunnermiliullugu pakkullugulu oqarfigalugillu: „Merlertunnguit taamaattut ilaannik ilassinnittoqaruni atera pissutigalugu, taassuma uanga ilassivaanga; uannillu ilassinnittup uangaanngitsoq aallartitsisigali ilassivaa.“’ (Mákorse 9:35-37) Allaat naalliutsitaassalluni toqussallunilu naggammik Jerusalemiliarnermini meeqqat piffissaqarfigisimavai. Oqarsimavoq: ’Merlertunnguit uannut qaaginarlit pitsaaleqinasigillu, taamaattut Guutip naalagaaffia pigimmassuk.’ ’Pakkullugillu assamminik patippai [attorpai] pilluaqqullugillu.’ — Mákorse 10:13-16.

17. Sooq Jesus meeqqanut qanippa, meeqqallu Jesus pillugu suna eqqaamasariaqarpaat?

¹⁷ Inersimasut silarsuaanni meeraalluni qanoq ittoq Jesusip nalunngilaa. Inersimasut akornanni inuusimavoq, suleqatigisimallugit, naalatsigitiffigalugit taakkunanngalu asaneqarnermik misigineq nuannersoq nalunagu. Ilissi meeqqat puiussanngilarsi Jesus ikinngutigigassiuk; ilissi pillusi toqusimavoq, taassumalu inassutaanut naalakkussi naassaanngitsumik inuusinnaalerumaarpusi. — Juánase 15:13, 14.

18. Eqqarsaat suna nuannersoq immitsinnut eqqaasitsissutigisassavarput, ingammik tatineqarnitsinni navianartorsiornitsinnilu?

¹⁸ Jesusip peqqussutaatut iliorneq immaqa ilimagisamit ajornannginneruvoq. Ilissi meeqqat inuusuttullu ilisimassavarsi Jesus tamatsinnik, aamma ilissinnik, ikiuinissaminut piareersimajuaannartoq, Matîuse 11:28-30-mimi ima neriorsuivoq: ’Ornissinga tamassi erloqisusi nanertugaasusilu, qasuersissavassi. Nammaatara ilissinnut pisissiuk [imaluunniit, nammaqatigisinga], qanilaarama uummatikkullu makitajuikkama; taava tarnissinnut qasuerfissarsiumaarpusi. Nammaatarami iluaqaaq, nammakkiussaralu oqeqaluni.’ Eqqarsaatigeriassagissi — inuunerup aqqutaatigut ingerlanissinni Jehovamullu kiffartornissinni Jesusip ingerlaqatigaasi nammatassinnillu oqilisaallusi. Tamanna eqqarsaatigissallugu tamatsinnut nuanneqaaq!

19. Jesusip ajoqersueriaasii pillugit apeqqutit suut akuttunngitsumik eqqarsaatigisariaqarpavut?

¹⁹ Jesusip ajoqersueriaasiisa ilamerngi maanna misissoreerlugit imminut aperisinnaavugut taassumatut ajoqersueriaaseqarnerluta. Napparsimasut anersaakkulluunniit kaattut qamuuna naakkigisarpavut, kissaatigaarpullu sapinngisarput tamaat ikiornissaat? Allat Guutip oqaasianik ajoqersuuttarpavut, imaluunniit farisiiarisut iliorluta nammineq isummavut saqqummiuttarpavut? Eqqumaffigisarnerpavut ulluinnarni avatangiisivut, anersaamut tungasunik nassuiaanitsinni, takorlooruminarsaanitsinni, erseqqissaanitsinni paasiuminarsaanitsinnilu atorsinnaasavut? Maleruagassat aalajangersimasut ingasattajaarluta eqqortinniaannarlugit asannittuliorfissaraluavut naakkinnittuliorfissaraluavullu maangaannartittarnerpavut? Meeqqanullu qanoq ittarpugut? Jesusitut iliorluta soqutiginnittumik asannittumik isumassortarnerpavut? Meeqqatit Jesusip nukappiaraagallarami iliortarsimaneratut atuaqqissaartarnissaannik kajumissaartarpigit? Ajortulorsimasut peqqissimisut asannittumik inussiarnerfigiitigalugit aalajaatsumik pissuseqarfigisarpigit, soorlu kukkukuup piaqqani sulummi ataanut katersortarai? — Matîuse 23:37.

20. Eqqarsaat tuppallernartoq nuannersorlu suna Guutip kiffaasut uninngaviginiartariaqarparput?

²⁰ Jesusitut sapinngisatsinnik ajoqersuiniartarutta ilumut ’nammaqatigisinnaassavarput’. — Matîuse 11:28-30.

[Quppernerup ataani ilanngussaq]

Eqqaamaviuk?

□ Sooq inuppassuit Jesus ussagarfigisarsimavaat?

□ Sooq Jesusip ilaannikkut maleruagassat qasukkartissinnaasarpai?

□ Jesusip naalaffimmi ajoqersuisunik apeqqarissaarneratigut suna ilikkarparput?

□ Jesusip meeqqanut pissusiatigut suna ilikkarparput?