Jehovatut isumakkeerfiginnittarpit?
’Inuit tammartarnerinik isumakkeerfigigussigik, Ataatassissaaq qilammiusup isumakkeerfigissavaasi; inuilli tammartarnerinik isumakkeerfiginngikkussigik Ataatassissaaq tammartarnissinnik isumakkeerfigissanngilaasi.’ — MATÎUSE 6:14, 15.
1, 2. Guutip qanoq iliornissaa pisariaqartipparput, sooq?
„[JEHOVA] naakkinnillunilu saammaasuuvoq, kamakkumaarnertulluni nallittuingaarlunilu. Unnerluutiginnittanngilaq soraajuitsumik, kamassimajuaannarnanilu. Iliorfiginngilaatigut ajortuliatta nalissaannik, iluaatsuliatsinnillu akiniaaviginata. Soorlu qilak nunamit qutsinnerungaartoq, taama atsigaaq nallittuinera mianerinnitsiminut. Soorlu kangia kitaanit ungasissoq, taamatut unioqqutitsinivut ungasillisippai uatsinnit. Soorlu ataataasup qitornani nallittortarai, taamatut [Jehovap] nallittortarpai mianerinnitsini. Nalunngilaami qanoq pinngortitaasugut eqqaamavaa pujualaannaasugut.“ — Tussiaat 103:8-14.
2 Ajortillit kinguaaraatigut ajortiliullutalu inunngorsimavugut, naammalluinnanngissutsittalu kingornussaasut ajortip inatsisaasa ataannut pisinniartuartarpaatigut. Taamaattumik pisariaqartilluinnarparput ’pujualaannaanitsinnik’ Guutip eqqaamanninnissaa. Davidip Tussiaat 103-mi Jehovamik allaaserinninnerata kusanartup tamatuma kingorna ukiut 300-t qaangiuttut Biibilimik allaqataasup allap, Mikap, Guuti saammaasuulluni ajortulianik isumakkeerfiginnnittarnera pillugu qutsissisillugu taamatut tusarnertigisumik allaaserisimavaa: „Ilittummi ittumik Guuteqanngilaq, [Jehova]. Illit innuttavit aniguisortaat ajortaannik isumakkeerfigaatit. Kamassimajuaannanngilatit, ilumoortumik asavatsigut. Kingumut nallittussavatsigut unioqqutitsinivullu tullaaralugit. Ajortuliavut tamaasa immap itineranut igissavatit.“ — Mika 7:18, 19.
3. Isumakkeerfiginninnerup suna nassataraa?
3 Oqaaseq Kristumiut Allagaataanni Griikerisuuni ’isumakkeerfigaa’-mik nutserneqarsimasoq isumaqavippoq „ungasissumut aallartippaa“. Malugiuk Davidip Mikallu oqariaatsit nuannersut takorlooruminartullu atorlugit eqqarsaat tamanna saqqummiukkaat. Jehovap isumakkeerfiginninnera angingaartoq paasiniarlugu atorneqarfiisa ilamerngi misissoriartigik. Siullermi ersersinneqarpoq Jehovap inuit qinnuigippanni isummani allanngortissinnaagaa nungutitsinissaraluaminullu taarsiullugu isumakkeerfiginnissinnaalluni.
Moses qinnussivoq — Jehova tusarnaarpoq
4. Massa Jehova pissaanerminik qanoq takutitsisaqattaareeraluartoq Israelikkut nunamut neriorsuutigisamut isernissaminnut qunujuarpat?
4 Jehovap israelikkut Jordanip kuussuanut, nunamut angerlarsimaffissaattut neriorsuutigisimasaminut iserniarlutik ikaagassaannut, isumannaatsumik siulersorpai. Israelikkulli Kana’animiut uffa inuinnaasut qunugigamikkik iserumanngillat. Takoreersimagaluarpaat Jehovap perluit qulit aseruisut ikiortigalugit Egyptenimit aniguisikkaatik, Immakkut Aappalaartukkut qimaaffissioraatik, Egyptenimiut sakkutuui imminnik malersuisut suujunnaarsikkai, taassumunnga immikkut innuttanngussutigisaminnik Qaqqami Sinajimi angerutsimik pilersitsisoq, ullut tamaasa mannanik nerisassaminnik tupinnartuliakkut qilammit nakkaatitsisoq — taamaakkaluartorli Kana’animiut taama qununanngitsigisut qunugiinnarlugit nunamut neriorsuutigisamut iserumanngillat! — 4 Moses 14:1-4.
5. Alapernaarsuiartortitat aalajaatsut marluk qanoq Israelikkunnik qunujunnaarsitsiniaagaluarpat?
5 Mosesip Aronillu inuit qununerat nukillaajummissutigeqaat. Josua Kalebilu, alapernaarsuiartortitat aalajaatsut, Israelikkunnik qunujunnaarsitsiniaraluarput oqarlutik: ’Nuna ajungitsorujussuuvoq, nuna immummik tungusunnitsuummillu kuuttoq. Inui ersigeqinasigit; Jehovap najorpaatigut.’ Inuit qunutuut pikitsitsiumatuullu oqaatsit taakku qiimmaallaatiginngilaat, Josuali Kalebilu toqunniarlugit ujaqqanik milloorniaraluarlugit. — 4 Moses 14:5-10.
6, 7. (a) Israelikkut nunamut neriorsuutigisaminut iserumanngimmata Jehova qanoq aalajangerpa? (b) Sooq Jehovap Israelimik eqqartuussinera Mosesip akerlilerpaa, qanorlu kinguneqarpa?
6 Kamalluni „[Jehova] Mosesimut oqarpoq: ’Inuiaat ukua qanoq sivisutigisumik asiginnassagaminnga? Qanoq sivisutigisumik upperiumassannginnaminnga uffa taama amerlatigisunik nalunaaqutiliorfigisimagitsik? Maanna nappaammik toqoraataasumik nalliutitsiviginiarpakka nungutillugillu. Illilli kinguaassatit inuianngortikkumaarpakka taakkunannga amerlanerusunngortillugit nakuunerusunngortillugillu.’ Moses [Jehovamut] oqarpoq: ’Illit pissaaninnik innuttatit Egyptenimit aniguisippatit; Egyptenimiullu tusarunikku innuttatit qanoq iliorfigigitit Kana’anikkut tamatuminnga oqaluttuutissavaat. . . . Innuttatit uku tamarluinnaasa toqutikkukkit, taava inuiaat ilinnik tusaamannilersimasut oqassapput: „[Jehovap] innuttani inoqajuitsumi toqorarsimagamigit pissutigisimassavaa nunamut uppernarsaalluni neriorsuutigisimasaminut isertinneq ajoramigit.“’“ — 4 Moses 14:11-16.
7 Moses Jehovap aqqa pillugu isumakkeerfigineqarnissamik qinuvoq: „’Nallittuingaarnikkut maanna innuttatit ajortuliaannik isumakkeerfigikkit, soorlu Egyptenimiit maanga aqqutaa tamaat isumakkerfigisarsimagitit.’ Taava [Jehova] oqarpoq: ’Illit oqaatsitit pillugit isumakkeerfigaakka.’“ — 4 Moses 14:19, 20.
Manassep guutipilussiornera Davidillu allasiornera
8. Judap kunngia Manasse qanoq oqaluttuassartaqarpa?
8 Jehovap isumakkeerfiginnikkumatussusia Manassemut, kunngip ajunngitsup Ezekiasip erneranut, isumakkeerfiginninneratigut malunnangaartumik erserpoq. Manasse aqqaneq-marlunnik ukioqarluni Jerusalemimi kunnginngorpoq. Qattunernik pilliisarfiliorpoq, ba’alinut pilliiviliorluni, illernartitanik napasuliorluni, qilaap ulloriarpassuinik guutisiorfiginnilluni, angakkuarninniartarluni, anersaarsiortunik siulittuisartunillu atorfinitsitsilluni, Jehovap naalaffiani qiperukkamik guutipilussiorfiliorluni erninilu qooqqumi Hinnomimi innikkut ingerlatillugit. „[Jehovap] iluarinngisarluinnaanik iliorpoq“ aammalu „Judap Jeruusalaallu inui tammartippai inuiannit [Jehovap] Israelikkut pillugit nungutissimasaanit suli ajornerusumik iliortillugit“. — 2 Israelikkut 33:1-9.
9. Suna pissutigalugu Jehovap Manasse saammaappaa, qanorlu kinguneqarpa?
9 Naggataatigut Jehovap Assyriamiut Judamik saassussitippai. Taakkua Manasse tigusaraat Babyloniliaallugulu. „Annikilliuleramili [Jehova] Guutini qinnuigaa saammaateqqulluni siuaasamilu Guutiannut assut maniguutilerluni, qinnutaalu [Jehovap] tusarpaa. Ilungersorluni qinunera ilassivaa Jerusalaamullu utertillugu taamalu naalagaaffia pigileqqitsillugu.“ (2 Israelikkut 33:11-13) Manassep takornartat guutii, guutipiluit pilliiviillu piiarpai illoqarfiullu avataanut eqqartillugit. Jehovamut pilliivimmi pilliuteqartalerpoq Judakkullu Guutimut ilumoortumut kiffartulersillugit. Maniguunneq, qinnutit allamillu ileqqoqalerneq isumataarnermut naapertuuttunik inerititaqaleraangata Jehovap isumakkeerfiginninnissamut piumassuseqarneranut tamanna takussutissaavoq sakkortooq. — 2 Israelikkut 33:15, 16.
10. Uriasip nulianik ajortuliani qanoq ililluni Davidip toqqortorniarsarigaluarpaa?
10 Kunngip Davidip Uriasip hetikkuusup nulianik allasiorfiginninnera ilisimaneqarluarpoq. Allasiorfigiinnanngilaa, aammali naartulersimanera paasinarsimmat ajortuliani toqqortorniarsuataaraluarlugu. Urias sorsunnermit sulinngiffeqartippaa, isumaqarluni angerlassasoq nulianilu innaallugu. Sakkutooqatinili sorsuttut ataqqillugit Urias taamaaliorumanngilaq. Taava Davidip neriartoqquaa imertillugulu aalakuulersillugu, Uriasili nuliaminik innaassiumanngittuarsinnarpoq. Taamaammat Davidip sakkutuut naalagaat nalunaarfigaa Urias akiuuttunut saarlernut pisissagaa toqutaaniassammat. Taamatullu pisoqarpoq. — 2 Samuel 11:2-25.
11. Qanoq ililluni David allamik isumataarpa, sunali atortariaqarpaa?
11 Jehovap pruffiitini Natan kunngimut Davidimut aallartippaa taassuma ajortuliaa qulaaqqullugu. „Davidip Natan oqarfigaa: ’[Jehovamut] ajortuliorsimavunga!’ Natanip akivaa: ’[Jehovap] ajortuliannik isumakkeerfigaatit, toqutaassanngilatit!’“ (2 Samuel 12:13) Ilerasulluni peqqissimillunilu David Jehovamut oqarpoq: „Massami pilliutit ilassineq ajorpatit, ikikkagassanillu pilliiffiginiaraluarukkit taakku piumassanngilatit. Kisianni anersaaq peqqissimisoq tassa pilliutissaq Guutip iluarisaa, uummat peqqissimisoq artorsaateqangaartorlu itigartittarinngilat, Guuti.“ (Tussiaat 51:18, 19) Davidip uummammit artorsaateqangaartumit qinnutaa Jehovap itigartinngilaa; taamaakkaluartorli David sukannersumik pillarneqarpoq Mosesimik allakkat aappaat 34:6, 7-imi Jehovap oqaasii naapertorlugit, tassa ’pisuusumik pillaanngitsoorneq ajortoq’.
Salomonip qinnutaa Jehovallu akissutaa
12. Naalaffiup atoqqaarfissiornerani Salomon qanoq qinua, qanorlu Jehovap akivaa?
12 Jehovap naalaffia naammassigamiuk Salomon atoqqaarfissiornermi ima qinusimavoq: „Uanga innuttavillu Israelikkut maanga sammilluta ilungersorluta qinunerput tusartaruk; qinnutigisarput qilammi illit najugarisanni tusartaruk, tusaagit isumakkeerfiginnillutillu!“ Jehova ima akisimavoq: „Qilak matusinnaalluarpara siallissaartillugu, pillertallu peqqusinnaavakka nunami naatitat tamaasa nereqqullugit; imaluunniit uanga innuttanni toqoraataasumik nappaalalersitsisinnaavunga. Inuiaalli taakku uannut innuttaalersissimasakka maniguutilerpata qinullutillu, ujarpanngalu ileqqorisatillu ajortut tunullugit allamik isumataarpata, taava qinnutaat qilammi tusarumaarpara. Ajortuliaat tamaasa isumakkeerumaarpakka nunaallu aserorsimagaluartoq pitsanngorteqqillugu.“ — 2 Israelikkut 6:21; 7:13, 14.
13. Hesekiel 33:13-16 naapertorlugu suna tunngavigalugu Jehovap isigaatigut?
13 Jehovap maannakkut qanoq ittuunerput isiginiartarpaa, qanoq ittuusimanerput pinnagu. Hesekiel 33:13-16-imi ima nalunaarpoq: „Iluartoq uanga oqarfigigukku: ’Ilumut inuuginnassaatit,’ taannalu iluarsuserigaluani isumalluutigalugu iluaatsulioruni, taava iluarsuserigaluani iluartuutitaassutigissanngilluinnarpaa, toqussaarli iluaatsuliani pillugu. Uangali guutiitsoq ima oqaluffigigukku: ’Ilumut toqussaatit,’ taannalu ajortuliani iperarlugit uannut saalluni iluartumik naapertuilluartumillu ilioruni, sallunaveerutisiani utertillugu arsaarinnissutinilu taarserlugit, iluaatsuliornanilu inatsisit inuussutaasut ingerlavigigunigit, taava inuuginnassaaq. Ajortuliarigaluami arlaannaannulluunniit pisuutitaassanngilaq. Iluartumik naapertuilluartumillu inuusimagami inuuginnassaaq.“
14. Jehova isumakkeerfiginniinnarani aamma susarpa?
14 Jehova Guutip uagutsinnik isumakkeerfiginnittarnera uagutsinnut isumakkeerfigeqatigiikkaangatta ajornakusoortitatsinnik pitsaanerussuteqarpoq. Guuti isumakkeerfiginniinnartanngilaq — ajortuliaasimasoq puiorluinnartarpaa. Inuit ilaat ima oqarsinnaasarput: ’Isumakkeerfigaakkit, kisianni puiunngisaannassavara.’ Tamatumunnga akerliusumik Jehovap ima neriorsorpaatigut: „Iluanngitsuliaannik isumakkeerfigissagakkit ajortuliaallu eqqaaqqinnagit.“ — Jeremia 31:34.
15. Naakkinninneq Jehovap qanoq isumaqarfigiuaannarsimavaa?
15 Jehova nunarsuarmi pallorfiginnitsiminut ukiuni tuusintilikkuttaani kamaginnittuarsimavoq. Ajortuliaannik ilisimasaannik isumakkeerfigisarsimavai, aammali sianiginagu ajortuliarpassuinik. Naakkinnilluinnarfigisimavai, kamagittarfiglluinnarsimallugit isumakkeerfingaartarsimallugillu. Jesaja 55:7-imi ima allassimasoqarpoq: „Guutiitsup qimalliuk aqqutigisani, iluaatsuliortullu soraarulligit pilersaarutini, saallunilu [Jehovamut], nallittoqqulluni Guutitsinnut, taanna isumakkeerfiginnittuartarmat.“
Kristumiut Allagaataanni Griikerisuuni isumakkeerfiginninneq qanoq eqqartorneqartoq
16. Suup takutippaa Jesus Jehovatulli isumakkeerfiginninnermut isiginnittaaseqartoq?
16 Kristumiut Allagaataanni Griikerisuuni Guutip isumakkeerfiginninneranik assersuutissarpassuit eqqartorneqarput. Guutip isumakkeerfiginnittarnera Jesusip eqqartukulasarsimavaa, paasitillugu isumakkeerfiginninneq eqqarsaatigalugu Guutitut isumaqarluni. Jesus Jehovatut eqqarsartarpoq, Jehovap akisunneratut ippoq pissusiviatigullu assigalugu; Jesusimik takunninnerup Jehovamik takunninneq assigaa. — Juánase 12:45-50; 14:9; Eprîarit 1:3.
17. Jehovap ’isumakkeerfiginnittuartarnera’ Jesusip qanoq assersuusiaraa?
17 Jehovap isumakkeerfiginnittuartarnera Jesusip kunngimik kiffaminik talentinik 10.000-inik (200.000.000 kronit sinnerlugit) imminut akiligassalimmik isumakkeerfiginnittumik assersuusiaatigut takuneqarsinnaavoq. Kiffanili kiffaqatiminik imminut denarinik 100-nik (375 kronit missaanni) akiligassalimmik isumakkeerfiginnikkumanngimmat kunngi kamaqaluni oqarpoq: ’„Taatuuna kiffaq ajortoq, akiligassatit ikku tamarsuisa isumakkeerikka qinnugigamma; illittaaq kiffaqatit naakkigissanngiliuk, soorlu uanga naakkigigikkit?“ Naalagaatalu kamaallugu anniartitsisunut pisippaa akiligassai tamaasa akilerserlugit.’ Assersuusiap isumaa Jesusip naggataatigut nassuiarpaa: ’Taamattaaq Ataatama qilammiusup ilissi pissavaasi, tamassi qatanngutisi uummatissigut isumakkeerfigisarinngikkussigik.’ — Matîuse 18:23-35.
18. Peterip Jesusillu isumakkeerfiginninnermut isiginninneri qanoq assigiinngitsigippat?
18 Jesusip tamanna assersuusiarisimavaa Peterip ornilluni ima aperereeraani: ’Naalagaq, qatanngutiga uannut ajortuliortartillugu qassinik isumakkeerfigisassavara? Arfineq-marlunnik allaat?’ Peter isumaqaraluarpoq taamatut siunnersuuteqarami nersornarluni. Jesusili allakkanik ilisimasutut farisiiarisullu isumaqanngilaq naakkinninnissaq killeqartoq, taamaattumik Peter ima oqarfigaa: ’Oqarfigaakkit, arfineq-marlunnik pinnatit, arfineq-marlunnilli qulillit arfineq-marlullu allaat.’ (Matîuse 18:21, 22, NV) Arfineq-marluk ullormut ataatsimut naammaqqajarnavianngillat, Jesusimi ilaanni ima oqarsimavoq: ’Mianersoritsi. Qatanngutit ajortuliorpat inerteruk, allamillu isumataarpat isumakkeerfiguuk. Ajortuliorfigippatillu ulluinnaq arfineq-marloriarluni, arfineq-marloriarlunilu kingumut ornippatit oqarluni: „Allamik isumataarpunga,“ taava isumakkeerfigisassavat.’ (Lúkarse 17:3, 4) Jehovap isumakkeerfiginnittarnini kisinneq ajorpai — uagullu tamanna nuannaarutigisinnaavarput.
19. Jehovap isumakkeerfigisinnaassappatigut suna pisariaqarpa?
19 Maniguulluta allamik isumataarutta ajortuliarpullu nassuerutigalugu Jehovap ajunngitsumik iliorfigissavaatigut: ’Ajortivut anngiiaatigigutsigik, taanna ilumoorlunilu iluartuuvoq, ajortitsitsinnik isumakkeerfigaluta iluaatsunillu sunik tamanik piiaaffigaluta.’ — 1 Juánase 1:9.
20. Stefanus qanoq kamaginnissimava?
20 Aamma Jesusip ajoqersugaa Stefanus kamaginninnermigut maligassiusimavoq. Perulluliortunit kamassimaqisunit ujaqqanik milloorneqartilluni qinorpasilluni ima suaarsimavoq: ’„Naalagaq, Jesusiaa, anersaara piuk.“ Seeqqummerlunilu nipituumik suaarpoq: „Jehova, ajortuliamik matuminnga aalajangiussiffiginaveerigit.“ Taamalu oqarami sinippaalerpoq.’ — apustilit suliait 7:59, 60.
21. Jesusip Romamiut sakkutuui isumakkeerfigigamigit sooq kamaginnippa?
21 Jesus akaarinninnermik suli nuannernerungaartumik ersersitsisimavoq. Akeraasa tigusaatissimavaat, inatsisinut akerliusumik eqqartuussimallugu, mitaatigisimallugu, qitserarsimallugu, iperartorsimallugu (qularnanngitsumik iperaattamik saarngit aseqqukuinik saviminernilu kapinartulersukkamik) naggataatillugu nalunaaquttap-akunnerpassuini anniarfigisaanut kikiagussimallugu. Romamiut tamakku ilarpassuinut peqataapput; Jesusilli qisummi nappakkami toqujartortilluni Romamiut sakkutuui imminik kikiattuisut Ataataminut ima qinnuppai: ’Ataataq isumakkeerfigikkit suliartik nalummassuk.’ — Lúkarse 23:34.
22. Qaqqami oqaluutsimi unnersuussut suna maleruarniarsarisariaqarparput?
22 Qaqqami oqaluutsimini Jesus ima oqarsimavoq: ’Ilissinnik uumissuisut ajunngitsuliorfigisigik; ilissinnik innarliisut qinuginnittullu qinnussigik.’ Nunami kiffartornermi naggataa tikillugu najoqqutassaq tamanna nammineq maleruarsimavaa. Uagutsinnut uinitta ajortiliusup sanngiissutaanut akiuuttunut tamanna maleruassallugu artornarpallaarpa? Jesusip qinunermut najoqqutassamik saqqummiussinermi kinguninngua ajoqersukkaminut ajoqersuutigisaa manna sapinngisannguatsinnik maleruarniarsariinnartariaqarparput: ’Inuit tammartarnerinik isumakkeerfigigussigik, Ataatassissaaq qilammiusup isumakkeerfigissavaasi; inuilli tammartarnerinik isumakkeerfiginngikkussigik Ataatassissaaq tammartarnissinnik isumakkeerfigissanngilaasi.’ (Matîuse 5:44; 6:14, 15) Jehovap isumakkeerfiginnittarneratut isumakkeerfiginnittarutta, isumakkeerfiginnittassaagut — puiuillutalu.
Eqqaamaviuk?
□ Jehovap ajortivut qanoq pisarpai, sooq?
□ Sooq Manasse kunnginngorteqqinneqarpa?
□ Jehovap isumakkeerfiginneriaasia uagutsinnut inunnut ilaassallugu sukkut unamminiarnartuua?
□ Jesusip kamaginninnera sooq taama iluarinartigaa?
[Qupp. 16-mi assiliartaq]
Natanip ikiuineratigut Davidip paasivaa Guutimit isumakkeerfigineqarnissani pisariaqartillugu