Nersualaarneqarneq tamatta pisariaqartipparput
ILUMOORLUNI nersualaarinerit, soorlu „Torrallangaarakku!“, „Naammassisat nuanneq!“ imaluunniit „Sapinngisannik iliorputit; tulluusimaarutigeqaatsigit!“, imminut naleqartutut misiginermut allisaataasaqaat, ingammik ataqqisatsinneersuugaangamik. Inuit nersualaarneqaraangamik nuannaartarput pitsaanerusumillu naammassisaqarsinnaalertarlutik. Tassami pissutissaqartumik nersualaarneqarneq isumamut misigissutsinullu pingaartuuvoq, soorlu nerisassat peqqinnartut timip pinngitsoorsinnaanngikkai.
Nersualaarneqarneq oqaatsinik qinerlerfissiat ilaanni tassaanerarneqarpoq „inummik soqutigineqartariaqartutut sammineqartariaqartutullu ilassinninneq“ aamma „immikkut maluginninneq imaluunniit soqutiginninneq“. Tamatumunnga qanimut atavoq ataqqinnittumik iliorfigisaaneq, naleqartutut misigineq. Allanik nersualaarinikkut ersertarpoq taakkuninnga ataqqinninneq pissutissaqartumillu iluarisimaarinninneq.
Nersualaarneqarneq — tunngaviusumik pisariaqartitaq
Nersortariaqarfikkut nersuineq naleqqullunilu eqqortuuvoq. Jesus najoqqutassiuivoq kiffarmik naalagaata pigisaminik paarsisussanngortitaanik assersuusiamini. Pigisami ajunngitsumik nakkutigineqarsimanerat qujamasuutigalugu oqarpoq: ’Qujanaq kiffaasutit ajunngitsoq ilumoortorlu.’ (Matîuse 25:19-23) Taamatulli pingaartitsinermik ersersitsinissaq amerlasuutigut sumiginnarneqartarpoq. Nersualaarneqartannginneq angorniussutsimik suliniarusussutsimillu millisitsisarpoq. Iona tamanna pillugu ima oqarpoq: „Nersualaarneqarneq pisariaqartinneqarnermik, ungagineqarnermik pingaartinneqarnermillu misigilersitsisarpoq . . . Sulerusussuseqalersitsisarpoq. Qaangiinnarneqaruit sapiissuseerutissaatit nikallorlutillu.“ Patrick ima ilaliivoq: „[Nersualaarneqartanngikkaanni] naammassisat pitsaasuuginnartinnissaat ajornakusoortarpoq.“ Taamaattumik pingaartorujussuuvoq qanoq ililluta qaqugukkullu nersualaarisarnissatta ilikkarnissaa. Tamavitta inoqatitsinnit akuerisaanissarput pisariaqartipparput. Tamanna inuttut pisariaqartitaavoq tunngaviusoq.
Oqaatsit nersualaarutit, akisussaaffimmik ilallit, immaqaluunniit allaat tunissummik ilallit, sapinngisamik pitsaanerpaamik iliortuarnissamut kajumississutaasarput. Taamaappoq angajoqqaajugaluaraanni, uiugaluaraanni, nuliaagaluaraanni, meeraagaluaraanni, ilagiinnut ilaasortaagaluaraanni imaluunniit nakkutilliisuugaluaraanni. „Pissutissaqartumik nersualaarneqaraangama,“ Margaret oqarpoq, „pilluarnermik pisariaqartinneqarnermillu misigisarpunga, ajunngitsumik suliniarnissara aalajangiuteqittarpara.“ Andrewip ilalerpaa oqarluni: „[Nersualaarneqaraangama] tulluuttaqaanga, sulilu sakkortunerusumik sulinissannut kajumissisarlunga.“ Nersualaariniaraannili ataqqinninnermillu ersersitsiviginninniaraanni eqqarsarluaqqaarnissaq naliliisinnaassuserlu pitsaasoq pisariaqarput.
Jehovap nersualaarinneriaasia ilaaruk
Allat naleqassusiannik ersersitsisarnikkut maligassaalluarnerpaaq tassa Jehova Guuti. Nersulaarneqartariaqartut nersualaartarpai. Angutit soorlu Abel, Enok Noalu malugisimavai. (1 Moses 4:4; 6:8; Jûtarse 14) Davidip aalajaalluinnarneranik iluarinninnini Jehovap ersersissimavaa. (2 Samuel 7:16) Samuel, pruffiititut ukiorpassuarni Jehovamik nersorinnissimasoq, Guutimit nesorneqarsimavoq, filisterit ajugaaffiginissaannut ikioqqulluni qinnutaa erniinnaartumik akineqarluni. (1 Samuel 7:7-13) Taamatut Guutimit iluarisaaguit tulluussutigissannginnerpiuk?
Qujamasunneq pingaartitsinerlu nersualaarinninnermut qanimut atassuteqarput. Biibilimi kajumissaarneqapugut immitsinnut qujaffigeqatigiittarnissatsinnik iluaqutissatsinnillu iliorfigineqaraangatta qujamasuttarnissatsinnik. (Kulorsamiut 3:15; 1 Tásalûníkamiut 5:18) Tamanna pingaarnerpaamik Jehovamut qujamasunnissatsinnut tunngagaluartoq taamaattoq ulluinnarni inuunermi aamma atortussaavoq. Apustilip Paulusip tamanna pingaartissimavaa. Fiipa ’amerlasuunik ikiuisartoq’ aammalu Priska Akvilalu nammineq allallu pillugit ’navianartorsiungaartut’ nersualaarsimavai. (Rûmamiut 16:1-4) Takorlooriaruk qanoq misigisimassasut taamatut ammasumik qujamasuffigisaagamik. Aamma tamanna Paulusimut iluaqutaavoq, tassami nersualaarigaangami, nersorinnikkaangami qiimmassaarigaangamilu nuannaartarpoq. Aamma uagut Jehova pallorfiginnittaalu qujamasuttut ilaarsinnaavavut nersualaartarialinnik ilumoorluta nersulaarisarnitsigut. — apustilit suliait 20:35.
Ilaqutariinni nersulaarisarneq
„Nersualaalaarneqarneq inuunermik nuannernerulersitsisarpoq,“ Mitchell, uiusoq kristumiunilu utoqqaanertaasoq, taama oqarpoq. „Nersualaarinnitsit, qularnanngitsumik ataavartumik, nuannarisarilertarpat.“ Assersuutigalugu kristumiu uiusoq akisussaaffinnik annertuunik nammagassaqarpoq pingaarutilinnillu aalajangigassaqartarluni ilaqutariit inuulluarnissaannut attuumassuteqartunik. Ilaqutariit anersaakkut, timikkut misigissutsikkullu pisariaqartitaat isumagisassarai. (1 Timûtiuse 5:8) Ilaqutariinni ittuusutut Guutimit pisussaaffini pillugit ilumoortumik nersualaarneqaraangami nuliamilu ’ataqqinnilluinnarnermik’ ersersitsivigisaraangani assut qujamasuttarpoq. — Evfisumiut 5:33.
Puiorneqartariaqanngitsorlu tassa angerlarsimaffimmi ningiuusup suliaa inuppassuarnut takussaanngitsoq. Immaqa ullumikkut suliaq tamanna soqutaanngitsutut isigineqartarpoq, Guutimulli iluarinartuuvoq. (Títuse 2:4, 5) Nutaannguallannartaqaaq uiusoq isumassuisoq nuliaminik nersorinnikkaangat, ingammik pikkoriffigisaani tamani! (Ussatit 31:28) Rowena uini pillugu ima oqarpoq: „Suliakka iluarisimaaraangagit taassumunnga naalatsigitinnissara ataqqinninnissaralu ajornannginnerutittarpara.“
Perorsaasoq Amerikamiu, Christian Bovee, ilaanni ima oqarsimavoq: „Pissutissaqartumik meeqqanik nersualaarineq seqinertut naasunut ippoq.“ Aap, allaat meeraaraq ilaqutariinnut ilaasutut pingaartitaasutut uppernarsaaffigineqartuarnissaminik pisariaqartitsisarpoq. Inuusuttuaraanermi ineriartorfiusumi, misigissutsikkut timikkulu allanngulerfiusumi, inuttut qanoq innermik eqqumaffiginninneq annertusiartortarpoq, nammineernerunissamik akuerineqarnissamillu annertusiartuinnartumik ilalik. Inuusuttuaraanermi ingammik angajoqqaanit asaneqarnissaq paasinnittumillu inuttullu saamasumik pineqarnissaq pisariaqartinneqartaqaaq. Taamatuttaaq angajoqqaat utoqqalisut aataakkullu atorfissaqartinneqartutut asaneqartutullu misigitinneqartarnissartik pisariaqartittarpaat, paasitinneqarlutik ’utoqqalinertik piinnarlugu iginneqaratik’. (Tussiaat 71:9; 3 Moses 19:32; Ussatit 23:22) Nersualaarneqarnissamik pisariaqartitamik eqqortumik matussutissiisarneq ilaqutariinni pilluarnermut iluatsitsinissamullu allisaataasarpoq.
Ilagiinni kristumiuni nersualaarisarneq
Ilagiinni kristumiuniittoqatinik ilumoorluni soqutiginninnermik suliaannillu ilungersornerinillu pingaartitsinermik ersersitsiuartarnermik ineriartortitsinissaq pingaartorujussuuvoq. Kristumioqatit naammassisaannik ilungersornerinillu nersualaarisarnikkut kristumiuni utoqqaanertat siuttuusariaqarput. „Utoqqaanertat paarsisutut pulaartarneranni erniinnaq paasivara oqaatsit nersualaarutaasut qanoq pingaartigisut, kajumissisitsisarlutillu nalerisimaartitsilerlutillu nuannaalersitsisaramik,“ Margaret oqarpoq. „Paasivara nalinginnaasumik nersualaarineqartanngikkaangat suna amigaataasartoq.“ Tamanna pissutissaalluarpoq ilagiinniittunik tamanik inuttut asannittumik soqutiginninnermik ersersitsisarnissamut! Suliaannik pitsaasunik nersulaartakkit. Nersualaariuartarit kajumissaariuartarillu. Ilagiit ilarpassuini angajoqqaaqarpoq kisermaanik meeqqaminnik anersaakkut nalilinnik pigiliutititsiniaasunik. Taakku ingammik nersugassaapput. Ajortortarsiornagit ajunngitsorsiortakkit. Qatanngutitut asanninnerit allanut misigitiguk. Isumassuinerit misigitiguk. Taamaalillutik nakkutilliisut asannittut ilagiinnik ineriartortitsisarput. (2 Korintumiut 10:8) Ilagiinnut ilaasut ataasiakkaat akisisarput imminnut iluaqutissaminnik ilungersorlutik sulisunik tamakkuninnga pissutissaqartumik nersualaarisarnermikkut ataqqinninnermikkullu. — 1 Timûtiuse 5:17; Eprîarit 13:17.
Tamatumanili eqqaamasassarpoq. Nassuerutigisariaqarpoq nersualaarneqarnissamik kissaat sakkortooqujussuusoq. Jesusip nalaani upperisarsiornikkut siuttut inunnit ataqqisaanissartik kisiat eqqarsaatigisimavaat. Jesusip ajoqersukkani tamatumunnga atatillugu isumaannik kukkusumik naqqissimavai. (Mákorse 9:33-37; Lúkarse 20:46) Kristumiut ingasattajaannginnissaq oqimaaqatigiissaarinissarlu pisariaqartippaat. Nersualaarneqarusuttuaannarneq anersaakkut ajunaarutaasinnaavoq. (Jâko 3:14-16) Assersuutigalugu alianassaqaaq utoqqaanertaq pingaarniartunngorpat ataqqineqarnissanilu piumasarilerpagu! — Rûmamiut 12:3.
Apustilip Paulusip Romami kristumioqatini ima oqaaqqissaarsimavai: ’Qatanngutigiissutut asaqatigiigitsi ungagiillusi. Ataqqeqatigiigitsi ingiaqattaallusi.’ (Rûmamiut 12:10) Oqaatsit taakku ingammik kristumiuni utoqqaanertanut, tamatigut Kristusip ilagiinnut qullersaaneranik akuerinnittussanut, sammipput. Taassuma oqartussaassusianut eqqortumut naalatsigitinnertik ersersissavaat Kristusip siulersuineranut anersaaq illernartoq, Biibilimi najoqqutassat ’inussiallu aalajaallunilu silatuup’ siulersuisoqatigiivisigut unnersuussutit atorlugit ingerlataanut maleruunnermikkut. — Matîuse 24:45-47; takuuk sarĸúmersitat 1:16, 20; 2:1.
Taamaattumik utoqqaanertat ataatsimiikkaangamik, Guutillu savaataanik paarsiniarminni Jehovamut siulersoqqullutik qinugaangamik, Biibilimut naapertuuttumik aalajangiiniartassapput. Kristumiutut anneruniajuissutsip, qanilaassutsip maniguussutsillu utoqqaanertaq imminut qaffatsinnaveersaartissavaa, qatanngutiminut naalagaaniartuunaveersaartillugu ataatsimiinnernilu tamakkunani nammineq isummaminik qalliutitsinaveersaartittassallugu. (Matîuse 20:25-27; Kulorsamiut 3:12) Utoqqaanertaqatigiinni siuttuusup utoqqaanertaqatini sapinngisamik siusinaarluni tusarniaavigereeriarlugit ullormut oqaluuserisassanik pilersaarusioreertariaqarpoq utoqqaanertat assigiinngitsut tamarmik oqaluuserisassanik tamanik qinunikkut isumaliutiginneqqissaarsinnaaqqullugit. Utoqqaanertat ataatsimiinneranni utoqqaanertaqatimi isumaat nammineq isummaminut naleqquttunngorsarniarnagit oqaluuserineqartussanut isummaminnik nakimaallutik saqqummiussinissaannut kajumissaartariaqarpai. (1 Timûtiuse 3:13) Utoqqaanertaqataasullu utoqqaanertaqatimik oqaaseriumasaannut tusarnaaqqissaartariaqarput ukiorpassuarnilu kristumiutut kiffartorsimasut misilittagaat tusaaniartariaqarlugit. — 2 Moses 18:21, 22.
Nakkutilliisut nalunngilaat utoqqaanertaqatigiit arlaat kinaluunniit Kristusip atorsinnaagaa iluarsisassamik iluarsiiniarnermi imaluunniit pingaaruteqartumik aalajangiiniarnermi Biibilimi najoqqutassiamik atuinissaanut. Utoqqaanertat tamarmik immikkut ilagiinni anersaakkut tunngasutigut suliniutaat pillugit ilumoortumik nersulaarneqartarpata utoqqaanertaqatigiit akornanni anersaaq ajungitsoq malunnassaaq. — apustilit suliait 15:6-15; Filípimiut 2:19, 20.
Allanik nersulaarisarit nersualaagassaagillu
Nersualaarneqarneq ineriartornarpoq. Kajumissinarpoq nuannaarnartuullunilu. „Immitsinnut inuinnannguatulluunniit isigigaluarutta,“ Mary oqarpoq, „naleqartutut misiginissarput pillugu kajumissaarneqarnissarput pisariaqartipparput.“ Allat ulluinnarni ilungersuutigisartagaat pillugit nersualaartakkit. Taamaaliortaruit inuunertik naleqarnerusutut nuannernerusutullu isigilissavaat. Angajoqqaat, meeqqat, nakkutilliisut ilagiinnilu kristumiuni ilaasut allat, oqaloriaatsissigut iliuutsissigullu nersualaagassanngorsinnaavusi. Inuit eqiasuitsut, annerunianngitsut maniguuttullu Biibilimi iluarinartumik eqqartorneqarput. (Ussatit 11:2; 29:23; Eprîarit 6:1-12) Allat naleqassusiannik pingaartitsininnik naammattorsuarmik ersersitsisarnissat ilinniarniaruk. Suleqatigigaangakkit misigissusii eqqarsaatigisakkit. Apustili Peter ima oqaaqqissaarisimavoq: ’Tamassi isumaqatigiigitsi ilasseqatigiillusilu qatanngutigiiinnillu asannillusi nallittuillusilu qanilaarlusilu.’ (1 Pîtruse 3:8) Tamatumani allanik nersulaarisarnissaq pisariaqarpoq, taamaalilluni tunngaviusumik pisariaqartitaat matussutissillugu.