’Siooraqinasi, savarpannguususi ukorsii’
’Siooraqinasi, savarpannguususi ukorsii, Ataatassi iluarimmagu naalagaaffik ilissinnut tunniukkumallugu.’ — LÚKARSE 12:32.
1. Sumut atatillugu Jesus ima oqarpa: ’Siooraqinasi, savarpannguususi ukorsii’?
’GUUTIP naalagaaffia piniarsiuk [ujartorsiuk].’ (Lúkarse 12:31) Jesusip ajoqersukkani taamatut oqarfigigamigit najoqqutassaq taamanimiilli ulloq manna tikillugu kristumiut eqqarsartaasiannut tunngaviusoq anippaa. Guutip naalagaaffia inuunitsinni sallerpaatittariaqarparput. (Matîuse 6:33) Lukasip allagaani atuarneqarsinnaasutut Jesusip kristumiut eqimattat aalajangersimasut asannittumik qiimmaallannartumillu oqaluuppai: ’Siooraqinasi, savarpannguususi ukorsii, Ataatassi iluarimmagu naalagaaffik ilissinnut tunniukkumallugu.’ (Lúkarse 12:32) Paarsisutut ajunngitsutut Jesusip nalunngilaa ajoqersukkani qanimut attaveqarfigisani annikilliornartunik atugaqartarumaartut. Guutilli naalagaaffia inuunerminni salliutikkunikku sioorassutissaqassanngillat. Jesusip oqaassutaa sukannersumik inatsinerunngilaq, asannittumilli neriorsuineruvoq tatiginnilersitsillunilu sapiissuseqalersitsisussaq.
2. Savarpannguit kikkuuppat, soorlu taakku ingammik immikkut pisinnaatitaaffeqarpat?
2 Jesusip ajoqersukkani oqaluffigai, ’savarpannguanillu’ taavai. Aamma Jehovap ’naalagaaffimmik tuniumaagaanut’ oqaluppoq. Kingusinnerusukkut Jesusimik ilassinnittussarpassuarnut naleqqiullugit taakku amerlanngillat. Aamma erlinnartutut isigineqarput immikkut ittumik siunissalittut qinigaagamik, tassa kunngiusussaagamik. Ataataata, Paarsisup Annerup, Jehovap, savarpannguit qaaqquai Kristusip Messiasitut naalagaaffiani qilammiittumi suleqataanissaannik siunissaqartillugit.
Savarpannguit
3. Takusami kusanangaartumi sumi Jesusip savarpannguit takuai?
3 Taavami kikkuuppat taakku taama nuannerunartigisumik siunissallit? Jesus Kristusip malittai anersaamik illernartumik taninneqartut. (apustilit suliait 2:1-4) Taakku qilammi kukkilattarissamik tigummillutik erinarsortut takullugit apustili Johannes ima allappoq: ’Takunnikkamalu, ata, Savaaraq Sionip qaqqaani qeqartoq, ilagigaalu hundredelinnik sisamanillu qulilinnik sisamanillu tuusintillit, aqqanik Ataataatalu aqqanik qaarmikkut allanneqartut. Tassa-uku arnatigut minguttuutinngitsut, massa niviarsiaannipput; tassa-uku Savaaqqamik sumulluunniit piartoraangat malinnittartut. Taakku inunnit immikkoortillugit Guutimut Savaaqqamullu naaqqaataallutik pisiaapput. Sallunermillu qanermiugisaqartillugit malugineqanngillat, assuarnaatsuugamik.’ — sarĸúmersitat 14:1, 4, 5.
4. Ullumikkut nunarsuarmi savarpannguit qanoq inissisimaffeqarpat?
4 Ukiumi 33-mi piinsip ulluaniit kristumiut tanitaasut anersaakkut kinguaassiarititaasut taakku Kristusip nunarsuarmi aallartitaatut kiffartorsimapput. (2 Korintumiut 5:20) Ullumikkut sinneruttuinnaat inussiaq aalajaallunilu silatuutut kiffartoqatigiipput. (Matîuse 24:45, NV; sarĸúmersitat 12:17) Ingammik 1935-miit ’savanit allanit’, kristumiunit nunarsuarmi inuunissaminnik neriugisaqartunit, millionilikkuutaanit ilaaqquffigineqartalersimapput. Taakku nunarsuaq tamakkerlugu nutaarsiassamik nuannersumik oqaluussissutiginninnermi ikiuupput. — Juánase 10:16.
5. Savarpannguit sinneri qanoq pissuseqarpat, soorlu siooranngissuseqartariaqarpat?
5 Savarpannguit sinneri suli nunarsuarmiittut qanoq pissuseqarpat? ’Naalagaaffimmik aalajaatsumik’ pissarsinissartik qularutiginagu kiffartuutertik illernartoq Guutimik mianerinnillutik ataqqinnillutillu suliaraat. (Eprîarit 12:28) Maniguullutik paasivaat immikkut pisinnaatitaaffimmik nalissaqanngitsumik nuannaarutigiuagassaminnik pissarsisimallutik. Jesusip Naalagaaffik pillugu oqarsimaneratut ’sapanngarissumik ataatsimik akisoorsuarmik’ nassaarsimapput. (Matîuse 13:46) Annikilliornartoq angisooq qanilliartortillugu Guutip tanitai sioorassuteqanngittuarsinnarput. ’Jehovap ullua angeqisoq ersinangaartoq’ nalliuppat silarsuarmiut misigisassaattut ittumik tanitat siunissamut nukillaarnartumik sioorassutissaqassanngillat. (apustilit suliait 2:19-21) Sunami siooragissagaluaramikku?
Ikiliartortut
6, 7. (a) Sooq savarpannguit ullumikkut nunarsuarmiittut taama ikitsigaat? (b) Tamatta immikkut neriugisarput qanoq isigisariaqarparput?
6 Savarpannguit sinneri nunamiittut ukiuni kingullerni ikittunnguanngorsimapput. Tamanna 1994-imi eqqaaniaalluni nalliuttorsiornermit takuneqarsinnaavoq. Jehovap innuttaasa ilagiivini nunarsuaq tamakkerlugu 75.000-it missaanniittuni 8.617-iinnaat sinneruttunut ilaanerminnut takussutissaasumik assersuutinik ilangiisimapput. (Matîuse 26:26-30) Najuuttulli ataatsimut 12.288.917-iusimapput. Kristumiut tanitaasut nalunngilaat taamaattussaasoq. Jehovap savarpannguit aalajangersimasumik amerlassusilersimavai, tassa 144.000-inik, ukiumilu 33-mi piinsip ulluaniit katersulersimallugit. Soorunami kisitsit tamanna anguneqarpat katersuineq unissaaq, uppernarsaatissallu takutippaat immikkut pilluaqqusaasunik taakkuninnga katersuineq 1935-mi unissimasoq. Siulittuutigineqarsimavorli naggatissap nalaani savat allat tassaalerumaartut ’amerlangaartut kisinneqarsinnaanngitsut, inuiaqatigiit immikkullu naggueqatigiissut immikkullu inuiaasut immikkullu oqaasillit tamarmik ilaat’. 1935-miillu amerlangaartut taakku nunami paratiisiusumi naassaanngitsumik inuulernissaminnik neriugisaqartut Jehovamit katersorneqalerput. — sarĸúmersitat 7:9; 14:15, 16; Tussiaat 37:29.
7 Savarpannguanut ilaasut suli nunamiittut ullumikkut ukiumikkut 70-it, 80-it 90-illu angumavaat. Ikittunnguit ukiut 100-t angusimavaat. Qanorluunniit ukioqaraluarunik nalunngilaat qilammut makititaanermikkut Jesus Kristus naalagaaffiani naalannartumi naalakkersueqatigilerumaaritsik. Amerlangaartunut ilaasut kunngimut Kristusimut nunarsuarmi naalattaassapput. Jehovap asasiminut pissamaartitai tamatta nuannaarutiginiartigik. Sumik neriuuteqassanerluta nammineq aalajangigassarinngilarput. Jehovap aalajangigassaraa. Immikkooqatigiit marluk taakku tamarmik immikkut siunissamik nuanningaartumik neriugisartik tipaatsuutigisinnaavaat, qilammi naalagaaffimmiugaluarpat imaluunniit nunarsuarmi paratiisiusumi Naalagaaffiup ataaniugaluarpat. — Juánase 6:44, 65; Evfisumiut 1:17, 18.
8. 144.000-inik naqissusersuineq qanoq ingerlareersimatigaa, naqissusersuinerlu naammassineqarpat qanoq pisoqassava?
8 Savarpannguit 144.000-iusut ataatsimut tassaapput ’Israel Guutip pigisaa’, Guutip siunertaani timikkut Isaraelikkunnut kingoraartaasoq. (Galâsiamiut 6:16) Anersaakkut inuiaat taakku sinneri suli nunarsuarmiipput. Sinneruttut taakku Jehovap iluarinninneranik naqissuserneqassapput. Tamanna pisoq apustilip Johannesip takorruukkami takusani ima allaatigaa: ’Inngililu alla seqernup nuisarfianit nuisoq takuara, Guutip uumasup naqitsisaanik pilik; taassuma inngilit taakku sisamat nunamillu immamillu ajoqusiisinnaatitaasut nipituumik torlulaffigai oqarluni: „Nunaluunniit imarluunniit orpiilluunniit ajoqusinngikkallarsigik, Guutitta kiffai qaavisigut naqissuserallassagatsigik.“ Naqissuserneqartullu amerlassusiat tusarpara: Hundredelinnik sisamanillu qulilinnik sisamanillu tuusintillit [anersaakkut] Israelip kinguaasa naggueqatigiissortaasa tamarmik ilaat naqissuserneqartut.’ (sarĸúmersitat 7:2-4) Anersaakkut Israelikkunnik naqissusersuineq tamanna imaalereeqimmat pisussat pissanganartut ilimanarsilerput. Tassa ’annikilliornartoq angisooq’, aseruinerup anoraasa sisamat nunarsuarmut pitoraaffissaat, qanittuararsuusimassaaq. — sarĸúmersitat 7:14.
9. Amerlangaartut amerliartuinnarnerat savarpannguit qanoq isigaat?
9 Amerlangaartunut ilaasut katersorneqareersut millionilikkuutaajupput. Sinneruttut tamanna nuannaarutigeqaat! Naak savarpannguit nunarsuarmi sinneruttut ikiliartuinnaraluarlutik angutinik piginnaassusilinnik Guutip nunarsuarmi peqatigiissortaani amerliartuinnartuni akisussaaffinnik tigusinissamut ilinniartitsillutillu sungiusaasimapput. (Jesaja 61:5) Soorlu Jesusip ersersikkaa annikilliornartumi angisuumi aniguisoqarumaarpoq. — Matîuse 24:22.
’Siooraqinasi’
10. (a) Guutip innuttai qanoq saassunneqassappat, tamannalu sumik malitseqassava? (b) Apeqqutit suut tamatta immikkut akiniagassaraavut?
10 Satan inngilipiluilu nunarsuup eqqaanut igitaasimapput. Taassuma malittaasalu Jehovap innuttai tamakkiisumik saassutissallugit piareersimapput. Saassussineq tamanna Biibilimi siulittuutigineqartutut Gogip Magogimeersup saassussineratut eqqartorneqarpoq. Ingammik kikkut Diaavulup persarissavai? Persarinerpaasassai tassaannginnerpat savarpannguanut ilaasut, anersaakkut Israel Guutip pigisaa, eqqissinermik pingaartitsillutik „nunarsuup qeqqani“ inuusut? (Hesekiel 38:1-12) Aap, taakkuussapput, tanitalli aalajaatsut sinneruttut, suleqatitik ilumoortut, savat allat, peqatigalugit takussavaat Satanip saassussinera qanoq ililluni Jehovamit sakkortuumik qisuariarfigineqarumaartoq. Innuttani illersorlugit iliuuseqassaaq, tamannalu ’Jehovap ullussarsuanik pingaaqisumik siooranaqisumillu’ malitseqassaaq. (Joel 3:4) Ullumikkut inussiaq aalajaallunilu silatooq inuunermik annaassiniarnermik pingaartorujussuarmik suliaqarpoq, Jehovap akuliunnissaa qaqutigoortoq tamanna mianersoqqussutigalugu. (Malaki 3:23; 1 Timûtiuse 4:16) Suliami tamatumani suliniaqataavit, Jehovap naalagaaffia pillugu nutaarsiassamik nuannersumik oqaluussissutiginneqataallutit? Naalagaaffimmik oqaluussissutiginnittartutut qunusuitsutut suliaq tamanna ingerlattuaannassaviuk?
11. Sooq sapiissuseqarnissaq ullumikkut taama pingaartigaa?
11 Silarsuarmi pissutsit eqqarsaatigissagaanni savarpannguit Jesusip imminnut mianersoqqussutaanik maleruaanissaat pingaartorujussuuvoq: ’Siooraqinasi, savarpannguususi ukorsii’! Taamatut sapiitsumik isumaqarnissaq pingaartorujussuuvoq eqqarsaatigissagaanni tamakku tamarmik Jehovap siunertaa naapertorlugu pisut. Savarpannguit tamarmik immikkut paasivaat naggatissaq tikillugu nikallujuittuarnissaq qanoq pisariaqartigisoq. (Lúkarse 21:19) Soorlu Jesus Kristus, savarpannguit Naalagaat, nunami inuunini naallugu nikallujuittuarlunilu aalajaattuarsimasoq, taamatut sinneruttut tamarmik immikkut nikallujuillutillu aalajaattuartariaqarput. — Eprîarit 12:1, 2.
12. Paulusip Jesusitut iliorluni qanoq kristumiut tanitat sioorannginnissaannik kajumissaarpai?
12 Tanitat tamarmik apustili Paulusitut pissutsinut isiginnittaaseqartariaqarput. Malugiuk makititaaffissaq pillugu tamanut oqaluussissutiginnittartutut tanitaasutut taassuma oqaasii Jesusip sioorannginnissamik kajumissaarutaanut qanoq naapertuuttut. Paulus ima oqarpoq: ’Jesus Kristus eqqaaniaruk toqusunit makittoq, Davidip kinguaanit pisoq, iivangkiiliu oqaluutigisara missiliorlugu; tamanna pillugu naalliuppunga pinerluttutullu allaat parnaarussaallunga; kisianni Guutip oqaasia parnaarussaanngilaq. Taamaattumik qinikkat pissutigalugit suut tamaasa naammagiuarsinnarpakka, taakkuttaaq annaqqullugit Kristus Jesusimi naassaanngitsumillu naalannarseqqullugit. Oqaaseq tamanna ilumoorpoq; toqoqatigigutsigumi inooqatigissavarputtaaq; nikallujuikkutta kunngioqatigiumaarparputtaaq; miserratiginnikkutta taassumattaaq miserratigissavaatigut; ilumuunngikkaluarutta taanna ilumoorsinnarpoq, imminik miserratigisinnaannginnami. — 2 Timûtiuse 2:8-13.
13. Savarpannguit suna qularinngilluinnarpaat, tamannalu qanoq iliornissaminnut killinneqaatigaat?
13 Apustili Paulusitut savarpannguit tanitat sinneri tusarliussamik kimittuumik Guutip oqaasiani saqqummersinneqartumik oqaluussissutiginninnerminni naalliunnartut nikallujuillutik atornissaannut piumassuseqarput. Guutip annaannissaminnik toqussartillu tikillugu aalajaattuaannarunik ’niaqorummik inuussutaasumik’ akissarsisinnissaminnik neriorsuutai tatigiuaannaramikkik qulannginnerat itinerujartuinnarsimavoq. (sarĸúmersitat 2:10) Uisoriinnaq makititaallutillu allanngortitaanermikkut Kristusimik peqateqalersinneqassapput, taassumunnga kunngioqataassallutik. Assuarnaassutsiminnik attassiuaannarnertik pissutigalugu silarsuarmut ajugaanissaat angissamaaq! — 1 Juánase 5:3, 4.
Neriuut asseqanngitsoq
14, 15. Savarpannguit makititaanissaat qanoq ililluni asseqanngitsuua?
14 Savarpannguit makititaanissamik neriugisaat asseqanngilluinnartuuvoq. Sutigut? Siullermik ’iluartunik iluaatsunillu makititsinissamit’ siulliugami. (apustilit suliait 24:15) Tanitammi makititaanissaat pingaassuseq naapertorlugu tulleriiaarinermut aalajangersimasumut ilaavoq, tulleriiaarinermut Korintumiunut agdlagkat sujugdlît 15:20, 23-mi eqqartorneqartumut: ’Kristus toqusunit makissimavoq sinippaartunut naaqqaataalerluni. Nungullutilli tulleriissusertik missiliorlugu: naaqqaataasoq tassa Kristus; tulliussapput Kristusip pigisai, tikiuppat.’ Jesusitut nikallujuinnermikkut uppissuseqarnermikkullu savarpannguit nalunngilaat suna imminnut pissamaartitaasoq nunami inuunertik naagunikku, ingammik Naalakkap ilumoortup 1918-imi eqqartuussiartorluni tikiunnerata kingorna. — Malaki 3:1.
15 Makititaanerup tamatuma asseqanngitsutut isiginissaanut Paulusip aamma allamik pissutissippaatigut. Korintumiunut agdlagkat sujugdlît 15:51-53-imi ima allappoq: ’Ata, anngigisamik oqarfigissavassi: Tamatta sinippaassanngikkaluarpugut, kisianni tamatta allanngortinneqassaagut, tassanngaannaq, uisoriinnaq, qarlortaat kingullissaq pilerpat, . . . aserujasoq manna aserujuissummik atitittariaqarmat, toqujasorlu manna toqusuissummik atitittariaqarmat.’ Oqaatsit taakku savarpannguit ilaannut Kristusip najuunnerani toqusunut atuupput. Piffissami sivisuumi toqungasariaqaratik toqusuissuseqartitaalissapput, ’tassanngaannaq, uisoriinnaq’.
16, 17. Makititaanissamik neriuutertik eqqarsaatigalugu kristumiut tanitaasut ullumikkut inuusut qanoq immikkut pilluaqqusaappat?
16 Paasisaq tamanna iluaqutigalugu apustilip Johannesip sarĸúmersitat 14:12, 13-imi oqaasiisa isumaat paasisinnaanerulerparput. Ima allassimagami: ’„Aatsaat iluartut nikallujuinnerat, aatsaat Guutip inassutaanik Jesusimullu uppernermik aalajangiussisut pisariaqarput.“ Nipilu qilammit tusarpara oqartoq: „Allagit: Pilluarput toqusut, matuma kingornagut Naalakkami toqusut. Massami, oqarpoq anersaaq, assorornerminnit uninngassapput; suliaasami malippaat.“’
17 Savarpannguit sinnerisa akissarsiassaat ilumut asseqanngivippoq! Toqugunik ingerlaannaq makititaassapput. Qilammi suliassaminnut pigunik allanngornersuaq misigisaat angissaqaaq. Savarpannguit taamatut naalannarsisitaajortortillugit Biibilimilu siulittuutit pingaarnerusut eqquussortillugit savarpannguit sinnerisa ’sioorannginnissartik’ ilumut pisariaqartippaat. Siooranngissusiallu qiimmassaataavoq amerlangaartunut, nunarsuarmi aatsaat taama ajornartorsiortoqartiginerani aniguisinneqarnissartik utaqqitillugu taamatut siooranngissutsimik ineriartortitsisariaqartunut.
18, 19. (a) Piffissaq inuuffigisarput sooq taama pingaartigaa? (b) Sooq tanitat savallu allat tamarmik siooranngissuseqartariaqarpat?
18 Savarpannguit naammassisimasaannik pingaaruteqartunik qimerluuineq savarpannguit amerlangaartullu Guutimik mianerinnittuarnissaminnut piginnaaneqalissutigaat. Guutip eqqartuussiffissaa nalliussimavoq, piffissarlu sinneruttoq erlinnaqaaq. Allammi iliuuseqarnissaannut piffissaarutilerpoq. Uagut Guutip siunertaata qatangiinnarnissaa sioorassutiginngilarput. Pinngitsoorani piviusunngussaaq!
19 Nipituumik qilammit ima oqartoqarnera tusarsaalereerpoq: ’Silamiut naalagaaffiat Naalakkatta tanitaatalu pigilerpaat, taannalu kunngiussavoq naassaanngilluinnartumik.’ (sarĸúmersitat 11:15) Paarsisup Angisuup, Jehovap, savaatini ’aqqutaalluartukkut aqqi pillugu siulersorpai’. (Tussiaat 23:3) Savarpannguit qilammi akissarsiassaminnut qularnaatsumik siulersorneqarput. Savallu allat annikilliornartukkut angisuukkut isumannaatsumik aniguisinneqassapput nunarsuarmi Guutip naalagaaffiata naalannartup Kristus Jesusimit aqunneqartup ataani naassaanngitsumik inuulerumaarlutik. Taamaattumik Jesusip oqaasii savarpannguanut sammititaagaluartut taamaattoq Guutip nunarsuarmi kiffai tamarmik kajumissaarutaanut matumunnga tusarnaarnissaminnut pissutissaqarput: ’Siooraqinasi.’ (wD 15/2 95)
Nassuiarsinnaaviuk?
□ Sooq savarpannguit ikiliartuinnarnissaat ilimagisariaqarparput?
□ Ullumikkut tanitanut sinneruttunut pissutsit qanoq ittuuppat?
□ Sooq kristumiut Gogimit Magogimeersumit saassunneqassamaaraluarlutik siooranissamut pissutissaqanngillat?
□ Sooq 144.000-inik makititsineq asseqanngitsuua, ingammik ullumikkut?