Oqaatiginerlugaaneq kristumiut qanoq qisuariarfigissagaat

OQAATIGINERLUNNEQARAANGAVIT imaluunniit salluliuutigineqaraangavit qanoq misigisarpit? Soorunami aliasuttarputit. Jehovap nalunaajaasui assingusumik misigisarput tusagassiuutitigut eqqunngitsumik oqaatiginerlunneqaraangamik. Jesusilli Matîuse 5:11, 12-imi oqarneratut nuannaarnissaminnut suli pissutissaqarput.

Assersuutigalugu Tysklandimi katuullit atuagassiaanni allassimavoq ’nalunaajaasut tamarmik isertitamik 17 procentiisa 28 procentiisalu akornannik immikkut upperusiortut qullersaqarfiannut pinngitsooratik akiliuteqartartussaasut’. Jehovalli nalunaajaasui immikkut upperusiortuunngillat, suliaallu kajumissutsimik tunissutaannarnik aningaasalersorneqarpoq. Atuartartorpassuit salluliuummit tamatumannga uppilersinneqarsimapput, tamannalu Jehovap nalunaajaasuisa ajuusaarnartuutippaat. Tusagassiuutitigulli oqaatiginerlunneqarnitik kristumiut qanoq qisuariarfigisassavaat?

Kristumiut maligassaat

Matîuse kapitali 23-mi takorlooruminartumik oqaluttuarineqarpoq qanoq ililluni Jesusip upperisarsiornikkut akerlilersortini ilumoortuusaarniarnerat pillugu avoqqaarisimagai. Tassa imaappa ullumikkut kristumiut isornartorsiorneqaraangamik taamatoqqissaaq iliortassasut? Taamaavinngilaq. Guutip Ernera immikkut ittumik oqartussaassuseqarnini ilisimassuseqarninilu tunngavigalugit upperisarsiornikkut akerlilersortini eqqortumik iliorluni avoqqarisarsimavai, inuit oqaatiginerlunneqarnerminik tusarsimasut iluaqutissaannut.

Matîuse 15:1-11-mi oqaluttuarineqarpoq Jesus isornartorsiorneqarsimasoq ajoqersukkami juutit ileqqulersuutaannik unioqqutitsinerarneqarnerat pissutigalugu. Jesus qanoq qisuariarsimava? Maleruutiinnarsimanngilaq. Arlalitsigut Jesusip isornartorsiortini qunusuilluni oqaluffigisarpai, kukkunerat naqqillugu. Nalinginnaasumik oqaatigalugu ullumikkut kristumiut eqqunngitsuliornavianngillat suliartik ajoqersuutitillu pillugit eqqunngitsumik oqaatigisaanerminnik naqqiiniassagunik, pissutsit piviusorsiortumik silatusaartumillu erseqqissarniarlugit. Immaqa taamaalillutik inuit unneqqarissut paasitissinnaassavaat Jehovap Nalunaajaasuinik isortartorsiuineq patsisissaqanngitsuusoq ajortitsiniutaannaasorlu.

Malugiulli Jesus qanoq qisuariarsimasoq ajoqersukkami ima oqarfigimmanni: ’Ilisimavigit farisiiarit oqaaseq tamanna tusaramikku mamiatsattut?’ Farisiiarit taakku isumatsaannanngillat, aap, Jesusip oqaasii ’mamiatsaatigaat’, Jesusillu akerlilersuisutut iluarsivissaqanngitsutut ajattorpai. Taamaattumik Jesus akivoq: ’Alarsigik; tappiillutik tappiitsoqatitik tasiorpaat.’ Assortuisunik akeqqersimaartunik taama ittunik sivisuumik oqaloqateqarneq siunissaqanngilaq, kimulluunniit iluaqutaanani, oqqannermillu isumaqanngitsumik kinguneqaannarsinnaalluni. (Matîuse 7:6; 15:12-14; naleqqiuguk 27:11-14.) Jesusip akissutaasigut erserpoq ’nipangerfissaqarlunilu oqaluffissaqartoq’. — Nalunaajaasup oqaasii 3:7.

Jehovap nalunaajaasuisa kikkunnit tamanit ajunngitsumik oqaluuserineqarnissartik naatsorsuutiginngilaat. Jesusip oqaasii uku eqqaamavaat: ’Eqqanaq ilissi inuit tamarmik nersorpasi; taamattaaq siuaasaasa pruffiitioqqusersut iliorfigaat.’ (Lúkarse 6:26) C. T. Russell, Napasuliaq Alapernaarsuiffiup Peqatigiiffiata præsidentia siulleq, ilaanni aperineqarami sooq oqaatiginerlunneqarnerminut imminut illersorneq ajornersoq ima akisimavoq: „Qimmit ilinnut qiluttut tamaasa ungoorniarlugit uniffigisassagaluarukkit ingerlaqqassagaluarputit.“

Tassa akerlilersuiniarajuut oqaasii Guutimut kiffartornitsinni allamut saaqqajaassutigisariaqanngilavut. (Tussiaat 119:69) Kristumiut ilumoortut suliassaat, nutaarsiassamik nuannersumik oqaluussissutiginninneq, ulapputiginiartigu. Tamatuma nassatarisaanik periarfissarsisassaagut apeqqutissalinnut akissuteqartarnissatsinnut suliatsinnillu nassuiaatiginnittarnissatsinnut, inuit Guutip oqaasianik ilinniartinnissaannik neqeroorfigisarlugit allatullu inooriaaseqalernissaannik ikiorlugit. — Matîuse 24:14; 28:19, 20.

Isornartorsiuineq akisariaqarpa?

Jesus malitsiminut ima oqarsimavoq: ’Silamiut . . . ilaginnginnamisi . . . taamaattumik silamiut uumissorpaasi.’ (Juánase 15:19) Tusagassiuutitigut Jehovap nalunaajaasuinik oqaatiginerluinerit uumissuinermut tamatumunnga takussutissaapput, taamaattumillu sumiginnartariaqarlutik. Ilaannikkut tusagassiuutitigut saqqummiussat nalunaajaasut pillugit ilisimasakinnermik ersersitsisarput, imaluunniit pissutsinik piviusunik sangutitsisuullutik eqqunngitsumilluunniit nassuiaanerullutik. Tusagassiortut ilaat paqumisuttunit paasissutissinneqarsimasinnaasarput. Tusagassiuutitigut saqqummiussat sumiginnaannarnissaannut imaluunniit naleqquttumik periaaseqarluta sallusuissutip illersornissaanut pissutsit, isornartorsiuinermik pilersitsisoq taassumalu anguniagaa aalajangiisuusarput.

Ilaannikkut atuartartutut allagaqarluni nassuiaateqarneq iluaqutaasinnaavoq, allagaq tamaat ilannguneqarpat. Taamatulli allagarneq akerlerluinnaanik sunniuteqarsinnaavoq. Qanoq? Ilumuunngitsoq eqqartoqqinneqalertarpoq, akerlilersuisullu salluliuutiminnik nikanarsaanerminnillu saqqummiusseqqinnissaminnut periarfissaqaleqqittarput. Tusagassiuutitigut allagaqarnissamik apeqqut utoqqaanertanut aalajangigassanngortissallugu amerlanertigut silatusaarnerpaasarpoq. Tusagassiuutitigut nuanniitsumik saqqummiineq paqumisunnermik annertuumik pilersitsippat Napasuliaq Alapernaarsuiffiup Peqatigiiffiata immikkoortortaqarfianit nunami pineqartumi ilagiinnut pissusiviusut nassuiaatigineqarsinnaapput, oqaluussisartut tamaasa oqaluussinerminni naapitaminnut apeqquteqartunut naammaginartumik akissuteqarsinnaaqqullugit.

Ataasiakkaat unnerluutiginninnernik eqqunngitsunik sammisaqarnissaat pisariaqarpa? ’Alarnissaannik’, sumiginnarnissaannik, Jesusip kajumissaarutaa tamatumani atortussaalluarpoq. Kristumiut ilumoortuartut tunussisunik isumaannillu nigorsimanninnissaminnut Biibilimi tunngavissaqarput. (1 Korintumiut 5:11-13; Títuse 3:10, 11; 1 Juánase 2:19; 2 Juánase 10, 11) Tunussisut Jehovap Nalunaajaasuinik oqaatiginerluineri ilumoornersut ilumuunnginnersulluunniit arlaata ilumuuilluni paaserusuppagu akissuteqarnissannut illit nammineq ilisimanninnerit tunngaveqarluartoq naammassaaq. — Takuuk Vagttårnet-imi 15. marsi 1986-imoortumi, qupperneq 13.

Tusagassiuutini ilumuunngitsumik naammattuugaqaraanni Ussatit 14:15-imi allassimasoq eqqaamassallugu pitsaassaaq: „Nakutikkuminartup upperisarpai oqaaserineqartut suut tamaasa, silatuulli alloriarnini sianigeqqissaartarpai.“ Schweizimi inuppassuit aalassassimapput tusagassiuutitigut attortinnartumik nalunaarutigineqarmat nalunaajaasoq arnaq inuusuttoq toqusimasoq aalersortinnissaanik qanigisaasa nakorsanut akuersiumasimannginnerat pisuulluni. Tamanna ilumoorpa? Naamik. Arnaq inuusuttoq upperisani pissutigalugu aalersortikkumasimanngilaq, nakorsaariaatsilli allat aattaqanngitsut atorlugit suliarineqarnissani akuersissutigisimallugu. Tamanna qassiiliornertaqanngitsumik pisimasinnaagaluarpoq inuuneralu annaassimasinnaagaluarlugu. Nakorsalli pisariaqanngitsumik kinguartiterinerat inuuneranik akeqarpoq. Tamakku tusagassiuutitigut ataasinnguamilluunniit eqqaaneqanngillat.

Taamaammat tusarliussat taama ittut upperipallannaveersaartariaqarput. Apeqquteqartut nassuiaassinnaavavut pisut taama ittut utoqqaanertat peqqissaartumik Biibilimilu najoqqutassiat naapertorlugit isumagisaraat. Aperisunut akissuteqarnermi Biibilimi najoqqutassiat tamatigut aallaavigisaraanni tuaviupiluttumik isummernissaq pinngitsoorneqarsinnaasarpoq. — Ussatit 18:13.

Nammineerluni paasiniaanissaq pisariaqarpoq

Ukiuni hundredelinni siullerni inuit Jesus Kristus salluliuutigisarsimavaat tusaamanerlugaalersinniarlugu, allaallu ilaasa killuussisuunerarlugu pasillersimavaat. (Lúkarse 7:34; 23:2; naleqqiuguk Matîuse 22:21.) Kingorna kristumiut nutaraasut upperisarsiortunit silamiunillu annertuumik akerlilersorneqalersimapput. ’Silamiuni sianiitsorpallattut Guutip kiffassamisut qinersimammagit’ kiffai amerlasuunit nikagineqartarsimapput. (1 Korintumiut 1:22-29) Ullumikkuttaaq kristumiut ilumoortut qinugisaanerup ilaatut oqaatiginerlugaasarnissartik naatsorsuutigisariaqarpaat. — Juánase 15:20.

Jehovalli nalunaajaasuisa nuannaarutigisarpaat inuit oqaloqatigisatik eqqortuliorusuttuugaangata itsarlu Paulusip Romami pulaartuisut isumamik imaattumik ersersitsigaangata: ’Qanoq isumaqartutit ilinnit tusarumagaluarpugut, immikkoorniaqatigiit taakku tamaginni assortorneqartut ilisimagatsigik.’ — apustilit suliait 28:22.

Inuit paasinerluisimasut nassuiaannissaannik neqeroorfigisartigik, saamasumillu pissuseqarluta taamaaliortassaagut. (Rûmamiut 12:14; naleqqiuguk 2 Timûtiuse 2:25.) Jehovap nalunaajaasui tikillugit namminneq paasiniaanissaannik kajumissaartartigik, unnerluutigineqarnitta eqqunngissusii namminneerlutik paasiniassammatigik. Aamma Napasuliaq Alapernaarsuiffiup Peqatigiiffiata naqitigai peqatigiiffik, oqaluttuarisaanera ajoqersuutaalu pillugit sukumiisumik nassuiaatitallit atorsinnaavavut.a Itsaq Filipip Nathanael aperimmat ima akiinnarsimavaa: ’Ata, takujartoruk.’ (Juánase 1:47) Uaguttaaq taamaaliorsinnaavugut. Piumasut tamaasa Naalagaaffilersaartarfitsinnut tikilluaqquavut namminneq isiminnik paasisinnaaniassammassuk Jehovap nalunaajaasui inuttut qanorpiaq ittuusut sunillu upperisaqartut.

Akerlilersuisunit siooralersitaaqinak

Nuanneqaaq nalunagu oqaatiginerluineq inuit Jehovamut nalunaajaasunngornissaannut akornutaaneq ajortoq! Tysklandimi tunussisut nalunaajaasunik tv-kkut salluliuutiginnissimapput. Tunussisut salluliuutaat isiginnaartut ilaata paasisinnaasimavai nalunaajaasullu ilagalugit Biibilimik atuaqqissaartarnermi nangeqqinnissaanut kajumississutigisimallugu. Aap, kikkut tamarmik tutsaanni oqaatiginerluineq ilaannikkut ajunngitsumik kinguneqartarpoq! — Naleqqiuguk Filípimiut 1:12, 13.

Apustilip Paulusip nalusimanngilaa inuit ilaasa ’oqaluttuapalaat’ sallusuissummit tusarnaarumanerussagaat. Taamaattumik ima allassimavoq: ’Illilli tamatigut putumatsaaliniarit, naalliussinnarit, iivangkiiliulersaartup suliassaa suliariniaruk, kiffartuutigisat naammatsillugu kiffartuutiguuk.’ (2 Timûtiuse 4:3-5) Taamaattumik allamut saasarneqarteqinak akerlilersuinillu ’annilaartinneqanngilluinnarit’. (Filípimiut 1:28) Eqqissisimaannaruit nuannaarlutillu nutaarsiassaq nuannersoq oqaluussissutigiuaannarukku, taava kikkut tamarmik tutsaanni oqaatiginerlugaaneq aalajaallutit atorsinnaassavat. Aap, Jesusip neriorsuutaa eqqaamajuk: ’Pilluarpusi uanga pillunga mitaatigippasi qinugalusilu, nalinginnarnillu oqaatiginerluppasi sallullutik. Tipaatsullusi qiimmattaritsi, akissarsiassarsi angeqimmat qilammi. Pruffiitimmi siulisi taamatut qinugisarpaat.’ — Matîuse 5:11, 12. (wE 1/4 95)

[Quppernerup ataani ilanngussaq]

[Qupp. 25-mi issuagaq]

Akerlilersuisoqarmat Jesusip ajoqersukkani ima oqarfigisimavai: ’Alarsigik.’ Qanoq isumaqarpa?

[Qupp. 27-mi issuagaq]

’Pilluarpusi uanga pillunga mitaatigippasi qinugalusilu, nalinginnarnillu oqaatiginerluppasi sallullutik.’ — Matîuse 5:11