Aqqut amitsoq kiffaanngissutsimut sammisoq
INUIT silassorissut ikittuinnaat silarsuaq avataaniittullu inatsisinit aqunneqarnerat miserratigiumassavaat. Atominit mikeqisunit ulloriaqatigiippassuit ataatsimoortut tikillugit suut tamarmik inatsisinit aqunneqarput. Taamaanngippat pilersaarusiortoqarsinnaananilu paasisaqartoqarsinnaassanngikkaluarpoq; inuuneq aamma piusinnaassanngikkaluarpoq. Pinngortitami inatsisit paasigamikkik maleruarlugillu inuit tupinnarluinnartunik angusaqarsimapput, soorlu qaammammi pisussinnaallutik nunarsuarmilu sumilluunniit imaluunniit allaat nunarsuup avataanit angerlarsimaffitsinnut tv-kkut assilissat aallakaatissinnaallugit.
Ileqqussatigummi inatsisit? Tamakku maleruarneqarunik taamatulli iluaqutaatigalutillu kinguneqarluartigissappat? Amerlasuut isumaqarunarput ileqqussatigut najoqqutassiaqanngitsoq, taamaattumillu upperisarsiornermik eqqarsariaatsimillu iluarisaminnik qinersiinnartarlutik.
Ilaasali aqqut alla qinertarpaat, tassa ’aqqut amitsoq inuunartumut sammisoq’ Biibilimi allaatigineqartoq. Tupaallaatigisariaqanngilarput ikittuinnaat tamatuminnga qinersisarmata, Jesusimi aqqut amitsoq pillugu ima oqarpoq: ’Taassuminngalu nanisisut ikeqaat.’ (Matîuse 7:14) Sooq ikeqaat?
Ikipput aqqummi amitsumi inuuneq Guutip inatsisaanik najoqqutassiaanillu killilersorneqarmat. Inuk ilumut Guutip najoqqutassiai naapertorlugit inoorusukkuni aatsaat aqqut tamanna iluarissavaa. Aqqutip sileqisup kiffaanngissuseqarfiusorinaraluartup taamaattoq inussianngortitsisuusup akerlianik, aqqutip amitsup killiliisorinaraluartup ilumut inuk kiffaanngissuseqalersissavaa. ’Inatsisinit naammalluartunit kiffaanngissutsip piinit’ killiligaavoq. — Jâko 1:25.
Aqqut amitsoq qanoq ililluni kiffaanngissuseqalersitsisoq
Aqqummi amitsumi ingerlajuarniarneq artornarsinnaavoq. Tamatta naammalluinnanngitsuuvugut kukkugajuttarlutalu. Tammalersinnaasarpugut. Kisianni ’aqqummi amitsumi’ ingerlaneq aalajangiukkutsigu pilluaqquneqassaagut; imminut naalakkersortariaqarlutalu allanngortariaqaraluaruttaluunniit imminut akilersinnaalluarpoq, Guuti ’iluaqutaasunik uatsinnik ajoqersuisuummat’. — Jesaja 48:17; Rûmamiut 3:23.
Assersuutigeriartigu: Angajoqqaat isumaginnilluartut nerisassat eqqarsaatigalugit meeqqatik ’aqqummi amitsumi’ ingerlatittarpaat. Ilaannikkut ilaqutariit neritillutik aalajangersimalluinnartariaqartarput. Meeqqalli inersimasunngulerunik angajoqqaamik asannittumik perorsaanerat pingaartissavaat. Inersimasutut nerisassat peqqinnartut pingaartillugit iluarinerussavaat. Assigiinngitsorpassuarnik pikkunnartunik nerisassaqarmat killilersorneqartutut misigissanngillat.
Anersaakkut ittumik Guutip aqqummi amitsumi inuunartumut sammisumi ingerlasut taama iliorfigisarpai. Inuit qanilaartut ikiortarpai peqqinnartunik kissaateqalernissaannut pilluarnermik kiffaanngissutsimillu kinguneqartumik. Oqaatsini, Biibili, ikiortigalugu taamaaliortarpoq. Aammalu ikiorneqarnissatsinnut anersaaminik qinoqqulluta kajumissaarpaatigut. Kristumioqativut aqqummi amitsumi ingerlajuarnissatsinnik kajumissaarisinnaasut ilagisaqqullugit peqquaatiguttaaq. (Eprîarit 10:24, 25) Aap, Guuti asannittuuvoq, pissuserlu tamanna pitsaasoq siunertaanut iliuusiinullu tamanut pissutaavoq. — 1 Juánase 4:8.
Asanninneq, eqqissineq, ajunngissuseq, imminut naalakkersinnaaneq Guutillu anersaavata inerititai allat atoraangatsigik aqqut amitsoq killiligaasutut isigisanngilarput. Allassimavoq: ’Taamaattunut inatsisit assortuinngillat.’ (Galâsiamiut 5:22, 23) ’Sumiittaraangat Jehovap anersaava tassaniippoq kiffaajunnaarneq.’ (2 Korintumiut 3:17) Maannangaaq kristumiut ilumoortut kiffaanngissuseq tamanna misilereersimavaat. Inuit ullumikkut ersigisartagaasa ilarpassui, soorlu siunissaq imaluunniit toqu, ersigisariaqanngilaat. ’Jehovamik ilisarsinerup nuna tamakkerumaarpaa soorlu ermit matoqqagaat immap naqqa’ — siunissaq taama ittoq eqqarsaatigissallugu ila pissanganassusia! (Jesaja 11:9) Taamanikkussaq pinerluttuliornermut ersineq allaat pisariaqarunnaassaaq. Parnaarsaatit assiaqutsersuutillu atorunnaavissapput. Inuit tamarmik kiffaanngissuseqarlutik isumannaatsumiissapput — ullukkut unnuakkullu, angerlarsimagaangamik silamiikkaangamillu. Tassaajumaarpoq kiffaanngissuseq piviusoq!
Guutip ikiuinera qularinngissinnaavarput
Guutip najoqqutassiai naapertorlugit inuussagaanni ilungersortariaqarpoq, kisianni ’inassutai artornanngillat’, allaat inunnut naammalluinnanngitsunut. (1 Juánase 5:3) Aqqut amitsoq sungiukkiartortillugu tassuunakkullu ingerlanerup iluaqutaassusia misigiartortillugu, iliuutsit eqqarsariaaserlu aqqummi sileqisumi ingerlasut ilisarnaatigisaat ajorineruleriartuinnassavavut. (Tussiaat 97:10) Guutip inatsisai maleruaraangatsigik inuttut pissutsitta pitsaanersaat ineriartortinneqartarput. Inuppassuit ’uummatimikkut aliatsallutik’ ’isumatsassimapput’, Guutili ima neriorsuivoq: „Kiffakka uummammik iluunngaannit qiimmattassapput.“ Aap, uummat Jehovamit ajoqersorneqartoq qiimmattarlunilu kiffaanngissuseqarpoq. — Jesaja 65:14.
Jesus kiffaanngissutsimik piviusumik tuniniarluta toqusimavoq. Biibilimi ima allassimavoq: ’Guutip silamiut ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ (Juánase 3:16) Maannakkut Guutip naalagaaffiani qilammiittumi kunngiulluni Jesusip inuunerminik pilliut iluaqutissatsinnut atorpaa. Erniinnaq, ’annikilliornartussap angisuup’ kingorna, aqqummi sileqisumi ingerlasut aserorsimaffimmut ingerlatinneqareerpata, Jesusip naammagittarluni inuiaat naalattut aqqutip amitsup isuanut, inuttut naammalluinnartunngornissamut, ingerlatissavai. (sarĸúmersitat 7:14-17; Matîuse 24:21, 29-31) Kiisami neriorsuutip matuma pivisunngornissaa misigiumaarparput: ’Pinngortitattaaq aserujasumut kiffaasut kiffaajunnaarsinneqarumaartut Guutip qitornaasa kiffaanngissusiata naalannaataat pigilerlugu.’ Kiffaanngissutsimit Guutimeersumit tamatumannga pitsaanerusoqarsinnaanngilaq. Allaat toqu peerneqarumaarpoq. — Rûmamiut 8:21; sarĸúmersitat 21:3, 4.
Paasilluaruniuk aqqut amitsoq sumut sammisoq inuup aamma aqqut tamanna qinersinnaavaa ingerlavigiuarsinnaallugulu. Ingammik inuusuttut ikiorneqarput paasisakeqqunatik Guutillu najoqqutassiaanit killiligaasutut misigeqqunatik. Paasissavaat najoqqutassiat tamakku Guutip asanninneranut ersiutaasut aqqummilu sileqisumi ajornartorsiutinut illersuutaasut. (Eprîarit 12:5, 6) Soorunami naammagittartariaqarpugut eqqaamallugu Guutimut tunniusimanermut tunngatillugu pissutsit kissaatillu ineriartortissagaanni piffissaqartariaqartoq, soorluttaaq orpiup inerititaqarluarnissaanut piffissaq pisariaqartoq. Orpilli inerititaqassaaq paarineqarlunilu imerterneqartaruni.
Taamaattumik Guutip oqaasia atuaqqissaartaruk, kristumiut allat ilagisarlugit anersaamillu illernartumik ’kipisuitsumik qinusarit’. (1 Tásalûníkamiut 5:17) Tatigissavat Guutip ikiussagaatit ’ingerlavissatillu nalimmatsissallugit’. (Ussatit 3:5, 6) Tamakkuali tamarmik isumaliutersuutaannaappat? Ilumut inuunermi atorluarsinnaappat? Aap, Tomip Maryllu ilanngutassiami siullermi eqqaaneqartut iluaqutigisimavaat.
Aqqut sileqisoq ingerlavigiunnaarsimavaat
Tom ima allassimavoq: „70-kkut qeqqata missaani Jehovap nalunaajaasuinit pulaarneqarpugut. Oqaloqatigiinnerput Biibilimik atuaqqissaaqatigiinnermik kinguneqarpoq. Arriitsumik inuunera aaqqikkiartulerpara. 1982-imi kuisippunga maannalu ilagiinni najugarisatsinniittuni kiffartorlunga. Ernerputtaaq maanna kuisippoq. Nuliara qutsavigaara ukiorpassuarni sallusuissut nalugallarakku naammagittarfigiuarsimammanga. Pingaartumillu Jehova erneralu Jesus Kristus qutsavigaakka siunissamut neriuutissaqartimmatigut.“
Marymi? Isumaqaraluarpoq Guutip isumakkeerfigisinnaanngikkaani, meeqqani pissutigalugit taanna ilinniarusuppaa. Paasigamiuk sanilerisani Jehovap nalunaajaasuinik Biibilimik atuaqqissaaqateqartartoq namminertaaq ikioqquvoq. Ileqqupiloqaramili soraarukkuminaatsunik siumukarnissaa artornarpoq. Atuaqqissaarnera ajunnginnerulerlunilu ajornerulersarsimavoq. Paniatali arfineq-marlunnik ukiullip kaammattortarpaa. „Anaana, taamaatissanngilat. Sapinngilat!“ taama kajumissaarisarpoq. Marylu tamaviaarnerulerpoq.
Angut inooqatigisaa, aamma ikiaroornartunik atornerluisartoq, uterami taannattaaq atuaqqissaaqatigiinnermut peqataasalerpoq. Kiisamilu tamarmik ileqqupilutik ajugaaffigaat. Katereeramik kuisillutillu tunniulluinnareeramik pilluangaarlutik aatsaat ilaqutariittut piviusutut misigilerput. Ajoraluartumik Mary naggataatigut AIDS-imit toquvoq, toqugamili Biibilip makinnissamik nunarsuarmilu paratiisiusumi, aqqummut sileqisumut ajortumut ilisarnaateqarfiunngitsumi, inuunissamik neriorsuutaanut uppersuseqarluarpoq.
Aap, aqqut sileqisoq aserorsimaffimmut sammisoq ingerlavigiunnaarsinnaavat. Jesus Kristus ima oqarsimavoq: ’Tassaavorli inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu.’ (Juánase 17:3) Aalajangerniarit aqqut amitsoq inuunartumut sammisoq ingerlavigilissallugu. Guutip oqaasianit ilikkakkatit malerualerukkit nammineq neriorsuutip nuannersup Biibilimeersup matuma eqquunnissaa misigiumaarpat: ’Sallusuissut ilisarissavarsi, sallusuissutillu inussiaajunnaarsissavaasi.’ — Juánase 8:32. (wE 1/9 95)