Siuneqassutsimik annerusumik ineriartortitsisinnaavit?
SIUNEQASSUSEQ oqaatsinik ujarlerfissiaq, Webster’s Universal Dictionary, naapertussagaanni tassaavoq „isumakkut immikkoortitsisinnaassuseq“. Tassaasinnaavortaaq „isumatussuseq, paasilertuisassuseq“ imaluunniit „suliassap isumassarsialluunniit immikkoortuinik assigiinngitsunik paasisaqarsinnaassuseq“. Taamaattumik siuneqassuseq pissusiuvoq nalilerujussuaq pigerusunnartoq. Tamanna Salomonip oqaasiisigut erserpoq: „Tassa ilisimassut uummatinni pigilissagakku ilisimasaqarnerullu nuannaalersissammatit. Isumatusaarnerup paarissavaatit, siuneqarnerullu sernigissavaatit.“ — Ussatit 2:10-12.
Siuneqassutsip aqqutikkut ajortukkut, ullumikkut sumiikkaluaraanniluunniit ingerlavigineqarsinnaasukkut, ingerlalinnginnissatsinnik ikiussavaatigut. Pissuseq tamanna aamma allarpassuartigut iluaqutaasinnaavoq. Assersuutigalugu, angajoqqaat meeqqatik ima oqartut tusarsinnaasarpaat: „Paasinngivipparsi!“ Angajoqqaat siuneqassuseqartut apeqqutit eqqarsalersitsisut amerlanngitsut atorlugit misigissutsit ajornartorsiutillu meeqqamik isumakuluutigisaat qaffakaatinniarsinnaavaat. (Ussatit 20:5) Uiusoq paasinnissinnaasoq tuaviupiluttumik aalajangiineq ajorpoq, nuliaminullu tusarnaartarpoq eqqarsaatai misigissusiilu paasiniarlugit. Nuliaasoq aamma uiminut taamaaliortassaaq. Tassami „ilisimassut atorlugu illu sananeqartarpoq, siuneqarneq atorlugu tunngavilerneqartarpoq“. — Ussatit 24:3.
Pissutsit ajornakusoortut aaqqinniarnissaannut siuneqassuseq iluaqutaasarpoq. Ussatit 17:27-mi allassimavoq: „Silatuuvoq oqalunnerminik ingasaassinaveersaartoq, imminut naalakkersinnaasoq [siuneqassuseqartoq, NV] angutaavoq silassorissoq.“ Siuneqassusilik narrajasuunngilaq, suullu tamaasa tuaviupiluttumik iliuuseqarfiginiassanagit. Iliuuseqalinnginnermini iliuutsimi qanoq kinguneqarumaarnissaat isumaliutigeqqissaartarpaa. (Lúkarse 14:28, 29) Eqqarsaqqaarluni oqaaseqartarami ’oqqaminik naalakkiisinnaassutsi’ iluaqutigalugu inoqatiminut eqqissinartumik attaveqarpoq. (Ussatit 10:19; 12:8) Tamanilli pingaarnerpaamik, siuneqassuseqartup piginnaasami killeqarnerat maniguulluni nassuerutigisarpaa, inunnullu taarsiullugu Guutimit unnersuunneqarnissani ujartortarlugu. Tamanna Jehovap iluaraa, tamannattaarlu siuneqassutsimik ineriartortitsiniarnissamut pissutissat ilagaat. — Ussatit 2:1-9; Jâko 4:6.
Israelip siuneqassuseqannginnera
Siuneqassutsimik ersersitsinissamik sumiginnaanerup navianaateqarnera Israelip oqaluttuarisaanerani siusissumi pisimasukkut erseqqissarneqarpoq. Piffissaq tamanna eqqarsaatigalugu tussiaasiortoq isumassarsisitaasoq ima oqarsimavoq: „Siuaasatta Egyptenimi tupinnartuliatit sumiginnarpaat; ajunngitsuliarpassuatit eqqaamanngilaat, Guutili qutsinnerussaartoq naalasseriiffigaat Immami Aappalaartumi.“ — Tussiaat 106:7.
Mosesip Israelikkunnik Egyptenimit aallarneranni siulersuinerani Jehova silarsuarmi pissaanilissuarmut tamatumunnga perlunnik qulinik nalliutititsereersimavoq, taamaalillunilu innuttaminik aniguisitsinissaminut pissaaneqarnini aalajangeriataallaqqissuseqarninilu takutereersimallugit. Israelikkut aallarnissaminnut Faraomit akuerisaareermata Mosesip Immap Aappalaartup sineriaanut ingerlappai. Egyptenilli sakkutoorpassuisa malersulerpaat. Israelikkut qimaariarfissaarussorinarput kiffaanngissuseriligaraluallu sivisussangatinnarunnaarpoq. Biibilimi ima oqaluttuarineqarpoq: „Israelikkullu . . . ersingaalerput, [Jehovalu] torlorfigaat ikioqqullutik.“ Mosesimullu oqarput: „Suniarlutaana Egyptenimit anisikkitsigut? . . . Egyptenimiut inussiatut kiffartuutiinnartigit taakkununnga inussiaataaginnarnissaq toqunissatsinnit ajunnginnerutikkatsigu.“ — 2 Moses 14:10-12.
Immaqa ersinerat pissutissaqarsorinaraluarpoq, Jehovalli pissaanneranut takussutissat maluginiarnartut qulit takoriinnginnerpaat? Ukiut 40-t qaangiuttut sumut takunnissimanerannik Mosesip eqqaasippai: „[Jehovap] Egyptenimit aniguisippaatigut atorlugit assani pissaasoq talinilu isaassimasoq, malunnangaartuliani amiilaarutaasut, nalunaaqutit tupinnartuliallu.“ (5 Moses 26:8) Taamaattumik tussiaasiortoq allassimavoq Israelikkut pisimasut ilinniutigisimanngikkaat Mosesip siulersuineranik tunussigamik. Jehovalli neriorsuisimanermisut Egyptenimiut sakkutuui ajorsarterujussuarpai. — 2 Moses 14:19-31.
Uaguttaaq uppernikkut sanngiilliulersinnaavugut misilinneqaativut qulartumik nalornisumilluunniit qisuariarfigisarutsigik. Siuneqassuseq iluaqutigalugu pissutsit ’ungasinnerusumit’ isigisinnaavavut, eqqaamallugu Jehova akerlilersortitsinnit annerujussuusoq. Siuneqassuseq iluaqutigalugu Jehovap uagutsinnut iliuuserereersimasai eqqaasinnaavavut. Ilaatigut pissuseq tamanna iluaqutigalugu puiunngisaannarsinnaavarput Jehovap ’pigaattarai asasini tamaasa’. — Tussiaat 145:18-20.
Qanoq anersaakkut siuneqassuseqalersinnaasugut
Siuneqassuseq ukiut ingerlaneranni imminik takkukkiartuaarneq ajorpoq. Ineriartortinneqartussaavoq. Kunngi ilisimasoq Salomon, siuneqassutsimigut nunarpassuarni tusaamasaasoq, ima oqarsimavoq: „Pilluarpoq ilisimassummik nassaartoq, inuk siuneqarluarnermik pissarsiaqartoq. Ilisimassutsip pissarsiarinissaa sølvip pissarsiarinissaanit pingaarneruvoq, iluanaarutissartaalu kuultimit anneruvoq.“ (Ussatit 3:13, 14) Siuneqassutsini Salomonip sumit pissarsiarisimavaa? Jehovamit. Sunik pilluaqqusaajumanerminik Jehovap aperimmani Salomon ima akisimavoq: „Qinnuigaakkit uummateqarteqqullunga malussarissumik illit innuttannik eqqartuussisinnaatillunga eqqortut eqqunngitsullu immikkoortissinnaatillugit.“ (1 Kunngit 3:9) Aap, Salomonip Jehova ikiortissamisut tunaartaraa. Pissutsinik immikkoortitsisinnaassutsimik qinnuigaa, Jehovallu annertulluinnartumik tunivaa. Qanoq kingunilimmik? Salomonip ’ilisimassutsimigut akimorsimavai Kangiamiut ilisimassusiat tamaat Egyptenimiullu ilisimassusiat tamaat.“ — 1 Kunngit 5:10.
Salomonip misigisimasaata takutippaatigut siuneqassuseq sumi ujartariaqaripput. Qanoq iliorluta Salomonitut Jehova ikiortissatsitut tunaartarisinnaavarput? Jehovap oqaatsini, Biibili, nammineq eqqarsaatiminik uagutsinnik paasititsisoq tunniussimavaa. Biibilimi atuaraangatta ilisimassutsip qaqqaanillusooq ikuttaalluta piiaasarpugut — annerusumik siuneqassuseqalernissatsinnut tunngavissatsinnik. Paasissutissat Biibilimik atuaqqissaarnitsinni pissarsiarisavut isumaliutigeqqissaartariaqarpavut. Taava paasissutissat tamakku silatuumik aalajangiinissatsinnut tunngavigisinnaavavut. Taava paasinnissinnaassuserput piffissap ingerlanerani ima ineriartorsimatigissaaq ’silaqarsutsitsigut inersimasunngussalluta’, ’ajunngitsorlu ajortorlu immikkoorsusiisigut ilisarisinnaalerlugit’. — 1 Korintumiut 14:20; Eprîarit 5:14; naleqqiuguk Korintumiunut agdlagakat sujugdlit 2:10.
Soqutiginarpoq siuneqassuseq Jehovap Salomonimut tunissutigisimasaa suli iluaqutigisinnaagatsigu. Qanoq ililluta? Salomon ilisimassutsimi ussatinngorlugu oqaatiginissaanut pikkorissorujussuanngorsimavoq. Ussatit tamakku iluamik oqaatigalugit ataatsimut tassaapput ilisimassut kimittooq Guutimeersoq isumassarsiarititaasoq. Oqaatsit tamakkua ilarpassui Biibilimi Ussatit-ni allattorneqarsimapput. Ussatinik tamakkuninnga atuartarutta Salomonip siuneqassusia iluaqutigisinnaassavarput pissuserlu tamanna immitsinni ineriartortissinnaassallugu.
Biibilimik atuaqqissaaraangatta iluaqutissat, soorlu Napasuliaq Alapernaarsuiffik aamma Iteritsi!, atorsinnaavavut. Ukiuni 116-init amerlanerusuni Napasuliaq Alapernaarsuiffik-p Jehovap naalagaaffia atuartartuminut peqqusersuitsunut oqaluussissutigisimavaa. Atuagassiap Iteritsi!-p tamatumalu siuliisa 1919-imiilli silarsuarmi pissutsit sammisarsimavaat. Atuagassiat taakkua marluk sallusuissutsit Biibilimiittut misissortarpaat anersaakkullu qaamanermik alliartuinnartumik, paasinnittaatsimik kukkusumik kristumiuunerartunit namminerluunniit eqqarsartaatsitsinnit aallaaveqartumik naliliiniarnitsinni iluaqutaasartumik, pilersuisarlutik. — Ussatit 4:18.
Siuneqassutsimik ineriartortitsiniarnitsinni iluaqutaasinnaasoq alla tassa eqqortunik ilagisartagaqarneq. Kunngi Salomon ima ussateqarpoq: „Sianisuunik peqateqartoq ilisimassuseqalersarpoq, silaatsulli ikinngutaa ajortumeertussaasarpoq.“ (Ussatit 13:20) Ajoraluaqaaq kunngip Salomonip ernerata, Rehabeamip, inuunermini piffissami pingaaruteqaqisumi ussat tamanna eqqarsaatigisimanngimmagu. Ataatami toqunerata kingorna Israelip naggueqatigiissortaasa qinnuigaat nammakkaminnik oqilisaateqqullutik. Rehabeam siullermik angutinik utoqqarnik siunersiuivoq, taakkualu siuneqassutsimik ersersitsipput innuttaminut tusarnaarnissaanik kajumissaaramikku. Taava angutinut inuusunnerusunut orniguppoq. Taakkua misilittagakinnertik siuneqassusikinnertillu ersersippaat Rehabeam kajumissaaramikku Israelikkut sioorasaaqqullugit. Rehabeamip angutit inuusunnerusut tusarnaarpai. Tamanna qanoq kinguneqarpa? Israelikkut pikitsitsipput, Rehabeamillu naalagaaffimmi ilarajussua annaavaa. — 1 Kunngit 12:1-17.
Siuneqassuserput ineriartortikkumagutsigu anersaamik illernartumik ikioqqusarnissarput pisariaqarpoq. Innuttami Egyptenimi tigusaaqqanerminnit aniguisitaanerata kingorna Jehovap taakkuninnga qanoq iliuuseqarfiginnittarsimanera kingumut qiviaramiuk Nehemias ima oqarpoq: „Anersaat ajunngitsoq taakkununnga ilitsersuisuutippat.“ (Nehemja 9:20) Jehovap anersaavata aamma uagut ilitsersorsinnaavaatigut. Tatiginnillutit qinnutigisaruk Jehovap anersaavata siuneqassuseqalersissagaatit, Jehovami ’appisaluussinani tunisisaannarmat’. — Jâko 1:5; Matîuse 7:7-11; 21:22.
Siuneqassuseq paasisimasaqassuserlu
Apustili Paulus inuiannut juutiunngitsunut sallusuissummik oqaluussissutiginnikkami siuneqassutsimik ersersitsisimavoq. Assersuutigalugu, ilaanni Athenimiitilluni inuit guutisiorfigisaat qimerlooqqissaarsimavai. Guutipilunnik ulikkaarpoq, taamaammallu ’anersaamigut narrutsappoq’. Maanna qinigassaqalerpoq. Isumannaannerussammat nipangersimaannassanerpa? Imaluunniit guutipilussiornersuarmik narrutsaatigilluinnakkaminik tamatuminnga qanoq isumaqarfiginninnini ammasumik oqaatigissanerpaa, ulorianartorsiulernerminik kinguneqassagaluarpalluunniit?
Paulus siuneqassuseqartumik iliorpoq. Tunisivik ima allannilik takusimavaa: ’Guutip nalusap pia.’ Guutipilunnut tunniusimanerannik Paulusip pissuserissumik nersualaarpai tunisivillu tamanna atorlugu ’Guuti silarsuarmik taassumaniittunillu tamanik pinngortitsisoq’ ilisaritillugu. Aap, Jehova tassaavoq Guuti taakkua nalusaat! Taamaalilluni Paulusip oqaluuserissallugu mianersornartoq ataqqinnittumik eqqartoramiuk nalunaajaateqarluarsinnaasimavoq. Tamanna qanoq kinguneqarpa? Inuppassuit sallusuissummik ilassinnipput, ilaatigut ’Dionysius eqqartuussisut annerit ilaat, arnarlu Damarisimik atilik, allallu’. (apustilit suliait 17:16-34) Paulus ilumut siuneqassutsimik ersersitsinikkut maligassiuilluarsimavoq!
Siuneqassutsimik ineriartortitsiniarneq oqitsuunngilaq. Kisianni naammagittassuseq, qinuneq, suliniaqqissaarneq, eqqortunik ilagisartagaqarneq, Biibilimik atuaqqissaarneq, isumatusaarneq Jehovallu anersaavanut illernartumut tatiginninneq ikiortigalugit siuneqassuseq annerusoq ineriartortissinnaavat.