Ningarneq inuuninnik aseruingajappoq

NINGARNEQ aappassaanik katillunga Markimik uininnerma kingorna uannut assut ajortumik sunniuteqarsimavoq.a Tamatta immikkut meerassavut arlallit isumagisassaraavut aapparisimasatinnullu aveqatigiissutigisassaralugit. Pissutsit ilaannikkut artornarluinnartarput. Ilaqutariinni ajornartorsiuteqalernerit tamaasa soorlumi tassa Markip tapersersorneq ajoraanga. Isumaqalerpunga nuliakuni suli asanniffigigaa. Ningarnera naqisimaniarnissaanut taarsiullugu inuuninnik aqutsisilerpara. Markip nuliakua eqqatsinniikkaangat tamatigut misigisarpunga ulorianartorsiorlunga.

Mark nakkutigeqqissaartarpara, allaat sumut isiginersoq alapernaaseqqissaartarlugu. Isigineri piumasannik nassuiaatissinniartarpakka. Ilaannikkooriarlunga ammasumik pasillertarpara nuliakuminik suli asanniffiginninnerarlugu. Ilaanni taamaaliornera nuanniilliuutigingaaramiuk nikuippoq kristumiullu ataatsimeersuarnerannit qimagulluni. Pisuusutut Jehova misigiffigaara. Ilaqutariittut inuunerput avanngunarsarpara, naggataatigummi aamma meeqqat tamatumannga attorneqarmata. Iliuutsikka pillugit imminut uumissoqaanga, qanorluunniilli ilungersortigigaluaraangama ningarnera nunusinnaanngilluinnarpara.

Ikiorniarnanga Markip akiniartalerpaanga. Pasillileraanganni nilliaffigisarpaanga: „Ningartutinuna, ningartutinuna.“ Soorlumi piaaraluni ningartinniartaraanga. Immaqa eqqarsarpoq tamanna ningartarunnaassutigissagiga, taamaanngillunnarporli. Arnat allat isiginiartalerpai, pinnernerartarlugit. Tamatuma naleqanngitsutut piumaneqanngitsullu misiginerujartuinnartippaanga. Tamanna misigissutsimik suli ajornerusumik pilersitsivoq — uumissuinermik. Misigissutsikkut ima paatsiveerutsigilerpunga Mark ilaqutaalu qimakkusuinnalerlugit.

Biibilimi allassimasoq ’sinngatuuneq saarnit aseruuttoornerattut ittoq’ ilumoorluinnarpoq. (Ussatit 14:30) Peqqissusera sunnerneqarpoq. Aqajaqqukkut ikeqalerpunga imaaliallaannaq ajorunnaarsitassaanngitsunik. Markimik pasilliiuarnikkut inuunera avaanngunarsartuarpara. Kaasarfissiortarpara, telefonillu normuanik allassimasumik nassaaraangama sianertarpunga paasiniarlugu kinaanersoq. Qamuuna ilukkut imminut kanngusuutigingaarama qiasarpunga, Jehovamut kanngusullunga. Taamaakkaluartorli imminut naalakkersinnaanngilluinnarpunga. Imminut akeravissuarilerpunga.

Anersaakkut ima sanngiilliortigaanga allaat qinusinnaajunnaarlunga. Jehova asavara eqqortumillu iliorusulluinnaraluarlunga. Allassimaffiit uiusunut nuliaasunullu tunngasut tamaasa nalunngilakka, eqqortissinnaanngilakkali. Inuuninni aatsaat siullermeerlunga inoorusukkunnaarpunga, uffa asanarluinnartunik meeraqarlunga.

Ilagiinni kristumiuni utoqqaanertat qiimmassaataaqaat sapinngisaminnillu ikiorniarpaannga. Ningarnerali eqqartornialeraangassuk kanngusunnermik assortortarpakka, tamatuminnga ajornartorsiuteqarnera nassuerutigiumanagu.

Ima peqqiilliortigilerpunga napparsimmavimmut unillunga suliaritittariaqalerlunga. Tassaniitillunga paasivara inuuneq taama ittoq ingerlaannarsinnaanngitsoq. Markilu aalajangerpugut qaammatini pingasuni averuserniarluta, misigissutsikkut sunnerneqarpallaarata pissutsit isumaliutigisinnaajumallugit. Taamaannerani nuannersumik pisoqarpoq. Atuagassiami Iteritsi!-mi ilanngutassiaq „Imerajuttut meeraannut inersimasunut ikiuut“-mik qulequtaqartoq saqqummerpoq.b

Anaanaga imerajuttuusimavoq. Naak timikkut pinerlineqartarsimanngikkaluarlunga angajoqqaakka imminnut uannulluunniit timikkut qanissimanngisaannarput. Anaanama uannik pakkusimanninneranik imaluunniit uannik asanninnerarneranik eqqaamasaqanngilanga. Taamaammat alliartorsimavunga qanoq asanninnissara, tamatumalu pingaaqataa, qanoq ilillunga asaneqarnissara, nalullugu.

Ataatama allasiortarneranik taassuminngalu tatiginnissinnaannginnerminik anaanama oqaluttuuttarpaanga. Taamaattumik isumaqarpunga alliartorsimallunga angutinik tatiginnissinnaananga. Perorsarneqarsimanera pissutaalluni allanit, ingammik arnanit allanit, nikanarnerusutut misigiuaannarsimavunga. Iteritsi!-mi ilanngutassiaq iluaqutigalugu paasivara tamakku qanoq pingaaruteqartigisut. Ningartarninnik ajornartorsiutima sorlai aatsaat paasilerpakka.

Iteritsi!-mi ilanngutassiaq uinnut, Markimut, takutippara, uannillu paasinninnerunissaminut iluaqutigaa. Sivitsunngitsoq marluulluta Biibilip avinniarlutik eqqarsartunut unnersuussutai malissinnaalerpavut. Saammaateqatigiippugut. (1 Korintumiut 7:10, 11) Maannakkut aappariinnerput aatsaat taama ingerlalluartigilersimavoq. Amerlanertigut iliuuseqaqatigiittarpugut, ingammik kristumiutut suliassatigut. Mark paasinninnerulersimavoq. Ullut tamangajaasa oqarfigisarpaanga asallunga, tamannalu upperilluinnarpara.

Nalunngikkaangakku Markip nuliakua naapittussaallutigu Jehovamut qinusarpunga nakussatseqqullunga, kristumiutut inersimasutut pissusilersornissannik ikioqqullunga. Tamannalu iluaqutaasarpoq. Allaat Markip nuliakuanik uumissuinera qaangiussimavoq. Eqqarsaatit ajortut uannik aqutsisittarunnaarpakka.

Misigissutsinik ajortunik ningarnermut attuumassuteqartunik suli nalaanneqarsinnaasarpunga. Aatsaat Guutip silarsuassaani nutaami inuunermi naammalluinnartumi tamakku peerneqarluinnassapput. Maannakkulli ningarneq naalakkersorsinnaalersimavara, tamatumannga naalakkersortinnissannut taarsiullugu. Aap, ningarnerup inuunera aserungajassimavaa, qujanartumilli Jehova taassumalu peqatigiissortai ikiortigalugit ullumikkut pilluarnerujussuanngorsimavunga peqqisseqqissimallungalu. Guutinnullu — Jehovamut — aalajaatsumik attaveqaleqqissimavunga. — Nassiussaq.

[Quppernerup ataani ilanngussat]