Poorski imaluunniit eqqaaniaalluni nalliuttorsiorneq — sorleq nalliuttorsiutigisassavarput?

APRIILIP ulluisa 7-anni seqineq nuippat inuit millionilikkuutaat ulloq taanna — poorski — ukiup ingerlanerani ullortut illernarnerpaatut nalliussissavaat. Siornatigut poorski tassaasimavoq ullut 120-t ullunik nalliuttorsiorfiusunik iisinnginniarfiusunillu ilallit, nalliuttorsiornermiit Septuagesimamik taaneqartumit ullormut Trinitatisimut. Ullumikkulli poorski tassaavoq ulloq ataasiinnaq — poorski sapaat, Jesusip makissimaneranik nalliuttorsiorfik.

Ullualuilli tamatuma siorna allat millionilikkuutaat Kristusip toquneranik eqqaaniaallutik nalliuttorsiorniarlutik katersuutissapput. Nalliuttorsiorneq tamanna aamma Naalakkap unnukkorsiortitsineranik taaneqartarpoq. Jesusip nammineq nunamiinnermini unnuk kingulleq tamanna pilersissimavaa. Ajoqersukkani ima peqqusimavai: ’Taamaaliortaritsi eqqaallunga.’ — Lúkarse 22:19.

Illit sorleq nalliuttorsiutigisariaqarpiuk?

Poorskip pilerfia

Nunani amerlasuuni oqaaseq ’easter’ poorskimut taaguutigineqarpoq, oqaaserli tamanna Biibilimi nanineqarsinnaanngilaq. Atuakkami Medieval Holidays and Festivals-imi eqqaaneqarpoq ’Guutimik nalusut qaammariartulernermut upernaamullu guutiat arnaq Eostre nalliuttorsiorfimmut tamatumunnga atsiunneqarsimasoq’. Guutigisaq arnaq taanna kinaava? „Oqaluttualiat naapertorlugit Valhallap isaaffii Eostrep ammarsimavai Balder, minguitsuunini pissutigalugu Guutimik Qaqortumik aammalu qaamigut inuiannut qaammaqqusersuinini pissutigalugu Seqernup Guutianik taaneqartoq, isertinniarlugu,“ atuakkami The American Book of Days-mi allassimavoq. Imalu nangippoq: „Nalunanngitsumik oqaluffeqarfiit Guutimik nalusut ileqqutoqaat atortalersimavaat kristumiussutsimullu ilanngullugit. Eostremut nalliuttorsiorneq upernaakkut inuunerup nutaanngoqqittarneranut nalliuttorsiornerummat Jesus pillugu oqaluussisut ajornanngitsumik ullormut taassuma toqusunit makissimaneranik nalliussivinngortissinnaasimavaat.“

Guutimik nalusut ileqquinik atuilersimaneq eqqarsaatigigaanni paasinarsivoq nunat ilaanni poorskimut atatillugu ileqqut assigiinngitsut, soorlu poorskip mannii, ukallit poor’lut assigisaallu sumit pisut. Nunat ilaanni poor’lut sanningasulimmik nalunaaqutserneqartarput, ileqqorlu tamanna pillugu atuakkami Easter and Its Customs-imi ima allassimavoq: „Sanningasulik tallimanngortumi tannaartumi siullermi pisimasut pillugit ataavartumik pingaaruteqartitaalinngikkallarmalli Guutimik nalusut sivisuumik ilisarnaatitut atorsimavaat, taakkualu kristumiussuseq sioqqullugu timiusat kaagillu sanningasuulersortarsimavaat.“

Biibilimi ileqqut taamaattut eqqaaneqanngivipput, Jesusillu ajoqersugaasa siulliit tamakkuninnga atuisarnerannik takussutissaqanngilaq. Tassami, apustili Peterip kajumissaarpaatigut ’inoorlaannguatut immuk piviusoq oqaasiusoq kajungereqqullugu, tamatumuuna annannissamut alliartoqqulluta’. (1 Pîtruse 2:2) Soormi taava oqaluffeqarfiit kristumiuunerartut ilisarnaatit Guutimik nalusut atortagaat upperisaminnut ilanngussimavaat?

Atuakkami Curiosities of Popular Customs-imi ima akissuteqarpoq: „Oqaluffeqarfiup aallaqqaataani Guutimik nalusut ileqqulersuutaat peerneqarsinnaanngikkaangata tamatigut kristumiussutsimut atatillugu pingaaruteqartilertarsimavai. Poorski eqqarsaatigalugu taamaaliornissaq ingammik piuminarsimaqaaq. Seqernup nuisarneranik pinngortitarsuillu ukiup kingorna uummaqqilertarnerannik nuannaarutiginninneq tassaalersimavoq naapertuilluassutsip seqernanik, tassa Kristusip ilivermit makissimaneranik, nuannaarutiginninneq. Aamma Guutimik nalusut nalliuttorsiorneri maajip aallaqqaataani pisartut poorskisiornermut naleqquttunngorsarneqarsimapput.“ Guutimik nalusut ileqqulersuutaat angakkuarnittarnerallu inunnit iluarisaasut pinaveersimatinnissaannut taarsiullugu upperisarsiornikkut siuttut akueriinnarsimavaat ’kristumiunngortillugillu’.

Immaqa aperiumassaatit: ’Tamanna ajorami?’ Ilaat isumaqarput ajortuunngitsoq. „Upperisarsiornerup, soorlu kristumiussutsip, inuiaat avataaneersut tikikkaangamigit taakkua ileqquisa ilaat upperisarsiornernit pisoqaanerusunit pisut akueralugit ilassisarpai,“ Alan W. Watts, palasi episkopaleriusoq, atuakkiamini Easter — Its Story and Meaning-mi taama allassimavoq. „Inuit isumaat najoqqutassianut ataavartunut oqaluffeqarfiup ajoqersuutigisaanut assingusut toqqarneqartarput naalagiartitsinermullu ilanngunneqartarlutik.“ Oqaluffeqarfiup ileqqut tamakku akuerimmagit illernartutullu isigilerlugit, inuppassuit aamma isummertarput akueriinnarnissaannut pissutissaqarluarlutik. Apeqqutilli pingaaruteqaqisut sumiginnarneqarput. Guutip ileqqut tamakku qanoq isumaqarfigai? Tamakku pillugit najoqqutassianik tunisimavaatigut?

Guutip isumaa maliguk

„Poorski, Naalakkatta makissimaneranik nalliuttorsiutiginninneq tassaavoq kristumiut ilagiissaanni nalliuttorsiornerit annerpaartaat,“ Christina Hole atuakkiamini Easter and Its Customs-mi allassimavoq. Atuakkiortut allat taanna isumaqatigaat. „Ukiup ingerlanerani kristumiut poorskimit pingaarnerusumik nalliuttorsiorfeqanngillat,“ Robert J. Myers atuakkami Celebrations-mi allassimavoq. Taamaappalli apeqqutissaqalerpoq. Poorskimik nalliuttorsiutiginninneq taama pingaartigippat soormi nalliuttorsiorfigineqartarnissaa Biibilimi erseqqissumik peqqussutigineqanngila? Jesusip ajoqersugaasa siulliit poorskisiortarsimanerannik oqaluttuaqarpa?

Biibilimi eqqaaneqanngitsoorsimanngilaq suut nalliuttorsiorfigineqartussaasut. Guutip Israelikkut tamakkuninnga peqqissaartumik ilitsersuussimavai, aamma soorlu eqqaaneqareersoq, kristumiut Kristusip toquneranik eqqaaniaalluni nalliuttorsiortarneq pillugu sukumiisumik maligassaqartinneqarput. (1 Korintumiut 11:23-26; Kulorsamiut 2:16, 17) The Encyclopædia Britannica-mi allassimavoq: „Testamentitaami imaluunniit ilagiinni ajoqersuisuunerni poorskisiortarneq eqqaaneqanngivippoq. Ullunik nalliuttorsiorfiusunik eqqarsaat kristumiunut siullernut takornartaavoq. . . . Naalakkap apustiliisaluunniit ullormik tamatuminnga allamilluunniit nalliuttorsiutiginnittarnissaq peqqussutiginngilaat.“

Ilaat isumaqarput nalliuttorsiornernut taamaattunut atatillugu nuannaartarnerup tamakkua nalliuttorsiorfiginissaannut pissutissaqarluartikkaatigut. Kisianni Egyptenimiut upperisarsiornikkut ileqqorisaasa ilaat ’ullormik Jehovamut nalliussivimmik’ taallugu Israelikkut atulermassuk pisimasut ilinniutigisinnaavavut. Taakkuttaaq ’issaallutik neripput erngullutillu, taavalu nikuipput qittanniarlutik’. Iliuusiili Jehova Guutip kamaatigisorujussuuai, annertuumillu pillarpai. — 2 Moses 32:1-10, 25-28, 35.

Guutip oqaasii erseqqissorujussuupput. Ajoqersuutit ilumoortut ’qaamanerat’ Satanillu silarsuaani ’taaq’ kattunneqarsinnaanngillat; Kristus Guutimillu nalusut pallorfiginninnerat imminnut naleqqussarneqarsinnaanngillat. Ima oqarfigineqarpugut: ’Taamaattumik akornannit anigitsi avissaarlugillu, oqarpoq Jehova; mingunnartorlu attoqinasiuk; taava ilassiumaarpassi.’ — 2 Korintumiut 6:14-18.

Biibilimi eqqaaniaalluni nalliuttorsiortarneq kisimi kristumiunut peqqussutigineqarmat tamanna nalliuttorsiorfigisariaqarparput. Qanoq ililluta qinngaqqunnanngitsumik nalliuttorsiutigisinnaavarput?

[Qupp. 5-mi assiliartaq]

Israelikkut ’Jehovamut nalliuttorsiornerat’ Guutip kamaatigeqaa