Jehova tuppallersaatissarsiorfigiuk

’Guutip erinitsannaveersaasup tuppallersaasullu tunilisi ataasiusumik isumaliorfigeqatigeeqqullusi Kristus Jesus malillugu.’ — RÛMAMIUT 15:5.

1. Sooq tuppallersarneqarnissamik pisariaqartitsisut ullut tamaasa amerliartuinnarpat?

TUPPALLERSARNEQARNISSAMINNIK pisariaqartitsisut ullut tamaasa amerliartuinnarput. Soorlu Biibilimik allaqataasut ilaata ukiut 1900-t matuma siorna malugisimagaa ’pinngortitat tamarmik suli tamassa anersaameqatigiillutik erloqeqatigiipput’. (Rûmamiut 8:22) ’Anersaamineq erloqinerlu’ tamanna uagut nalitsinni aatsaat taama ingasatsigilersimavoq. Sorsunnersuaq siulleq aallarnerfigalugu inuiaat erloqinartorpassuarnit eqqorneqartualersimapput, sorsunnernit, pinerlunnernit pinngortitamilu ajunaarnersuarnit inuit nunarsuarmik paarinerluinerannik pissuteqartunik. — sarĸúmersitat 11:18.

2. (a) Ullumikkut inuit erloqinartorsiuterpassuinut kina pisuunerpaava? (b) Suna nalunagu tuppallernarpa?

² Sooruna nalitsinni taama naalliunnartoqartigisoq? Tamatumunga Biibilip akissutissaqartippaatigut oqaluttuullutalu Guutip naalagaaffiata 1914-imi pilersinneqarnerani Satan qilammit anisitaasimasoq. Ima allassimavoq: ’Eqqanaq nuna imarlu, Diaavulu ilissinnut aqqarmat kamattorsuulluni, piffissakissutsi nalunnginnamiuk.’ (sarĸúmersitat 12:12) Siulittuutip tamatuma eqquussimaneranut takussutissat ersarissut ersersippaat Satanip aqutsinerata ajortup naggatissaa tikileripput. Taamaattumik tuppallernarpoq nalunagu pissutsit eqqissisimanartut, Satanip siuaasavut siulliit pikitsitsisinngikkallarmagit atuussimasut, nunarsuarmi atuutilerseqqinneqangajalersut.

3. Qanga inuit tuppallersarneqarnissartik pisariaqartissimanngilaat?

³ Aallaqqaataani inuup Pinngortitsisaata inuit aappariit siulliit naatsiivissuarmi alianaatsumi inuusinnaanissaat isumagaa. Naatsiivissuaq Edenimik taaguuteqarpoq, isumaqartoq „nuannaarneq“ imalunniit „kajumissuseq“. (1 Moses 2:8) Aamma Adam Evalu peqqilluinnarput toqunngisaannarlutillu inuusinnaanissartik qilanaarisinnaassallugu. Takorlooriaruk piginnaanitik qanoq ineriartortissinnaassagaat, soorlu naatsiivilerinerup, eqqumiitsuliornerup, illuliornermik titartaanerup nipilersornerullu iluini. Aammattaaq nunarsuarmik naalatsigititsinermik tamatuminngalu paratiisinngortitsiartuaarnermik saniatigut pinngortitarsuaq misissuiffigisarsinnaassavaat. (1 Moses 1:28) Adamip Evallu inuunerat ’anersaaminernik erloqinernillu’ ulikkaarnavianngilaq, nuannaarnermilli qiimasunnermillu ulikkaassalluni, taamaattumillu tuppallersarneqarnissamik pisariaqartitsissanatik.

4, 5. (a) Sooq Adamip Evallu naalannissamik misilinneqarnertik angusiffiginngitsoorpaat? (b) Qanoq ilillutik inuit tuppallersarneqarnissamik pisariaqartitsilerpat?

⁴ Adamilli Evallu pisariaqartitaat tassaavoq Ataataminnut qilammiusumut asannittumut asanninnermik itisuumik pingaartitsinermillu ineriartortitsinissaq. Asanninnerup taama ittup pissutsini qanorluunniit ittuni Guutimut naalattuarnissaannut killissavai. (Naleqqiuguk Juánase 14:31.) Ajoraluartumilli siuaasavut siulliit kisimi Naalagaasussavimmut, Jehovamut, naalanngipput. Taarsiullugulu inngilimut ajortuliortunngorsimasumut, Satan Diaavulumut, naalatsigitilerput. Satanip Eva ajortuliornissaanut usserpaa paarnamik nereqqusaanngitsumik nerisillugu. Aammattaaq Adam ajortuliorpoq orpimmit Guutip ima oqarluni paatsuugassaanngitsumik neriffigeqqunngisaanit nerinermigut: „Neriffigigaluarukku toqussaatit.“ — 1 Moses 2:17.

⁵ Tamanna pillugu aappariit ajortuliortut toqujartulerput. Guuti toqumik eqqartuussut nalunaarutigigamiuk Adamimut ima oqarportaaq: „Narsaat perloqqunarsili illit pisuullutit; erloqillutit inuutissarsiorfigissavat inuunerit naatserlugu. Kapinartulinnik naasupilunnillu naatitaqassaaq ilinnut, narsaammilu naatitat nerisarissavatit.“ (1 Moses 3:17, 18) Maanna Adam Evalu nunarsuup naggorissarneqarsimanngitsup paratiisinngortinnissaanik qilanaarisaqarsinnaajunnaarput. Edenimit anisitaapput issumillu perloqqusaasumit nerisassarsiornissaminnut nukitik atortariaqalerlugit. Ajortilinngornerat toqusussanngornerallu kinguaavisa kingornuppaat, taamaattumillu taakkua tuppallersarneqarnissartik pisariaqartittorujussuuaat. — Rûmamiut 5:12.

Neriorsuut tuppallernartoq piviusunngorpoq

6. (a) Inuit ajortilinngoreermata Guuti qanoq tuppallernartumik neriorsuiva? (b) Tuppallersaatissaq pillugu siulittuut suna Lemekip oqaatigaa?

⁶ Jehovap inunnik pikitsitsisitsisumik eqqartuussinini ilutigalugu takutippaa ’Guutiulluni erinitsannaveersaasoq tuppallersaasorlu’. (Rûmamiut 15:5) Taamaaliorpoq ’kinguaassamik’ Adamip pikitsitsinerata kingunipiluinit taassuma kinguaavinik aniguisitsisussamik pilersitsigami. (1 Moses 3:15) Aniguisitsinissap tamatuma qanoq ililluni pinissaa Guutip saqqummersikkiartuaarsimavaa. Assersuutigalugu, Lemek, Adamip Set aqqutigalugu ungasissumik kinguaava, isumassarsisillugu siulittuisissimavaa Lemekip ernerata sujumaarneranik: „Taassuma erloqilluta nunaammi [Jehovap] perloqqusaani suleruloornitsinni oqilisaakkumaarpaatigut.“ (1 Moses 5:29) Neriorsuut tamanna naapertorlugu Lemekip ernera Noamik atserneqarpoq, qularnanngitsumik isumaqartoq „qasuersaarneq“ imaluunniit „tuppallersaat“.

7, 8. (a) Sooq Jehovap inunnik pinngortitsisimanini peqqissimissutigaa, tamatumalu kingunerisaanik qanoq aalajangerpa? (b) Noap atini qanoq ililluni eqqortippaa?

⁷ Piffissap ingerlanerani Satan inngilit qilammiittut ilaannik ilassarsiortorpoq. Taakkua inuttut timeqalerlutik Adamip kinguaavisa akornanni arnanik ajuutiginartunik nuliarput. Pissusissamisuunngitsumik attaveqatigiinnerit tamakkua inunnik kinguaariinnik ajortunngortitsipput, meeqqiorpullu guutiitsunik nefiliminik imaluunniit „killuisut“-nik taaguutilinnik, nunarsuarmi nakuusernersuaqalersitsisunik. (1 Moses 6:1, 2, 4, 11; Jûtarse 6) „[Jehovalli] paasigamiuk nunami inuit ajussusiat annertusiartuinnartoq . . . inunnik pinngortitsisimanini peqqissimissutigilerpaa uummammigullu anniaatigilerlugu.“ — 1 Moses 6:5, 6.

⁸ Jehova aalajangerpoq silarsuaq ajortoq suujunnaarsinniarlugu nunarsuaq tamakkerlugu ulersuaqartitsinermigut. Siullermilli Noa umiarsualiortippaa inuit uumasullu annattoqaqqullugit. Taamaalilluni inuit kinguaariit uumasullu assigiinngitsut annaanneqarput. Noa ilaquttanilu ulersuaqareernerani umiarsuaq qimakkamikku nunarsuarmullu minguiarneqarsimasumut pigamik eqqissiallassimassaqaat. Tuppalliallassimassapputtaaq paasigamikku nunamut perloqqussut peersimasoq, nunalerinerlu oqinnerujussuanngorsimasoq. Taamaalilluni Lemekip siulittuutaa eqquuppoq, Noallu atermi isumaa eqqortippaa. (1 Moses 8:21) Guutip kiffaasa aalajaatsut ilaattut Noa inuiannut ’tuppallersaammik’ ilaatigut aatseqataavoq. Satanilli inngilipiluillu sunniipilunnerat ulersuup kingorna taamaatinngilaq, inuillu ajortip, nappaatit toqullu ataanni anersaaruluttuarsinnarput.

Noamit annerusoq

9. Jesus Kristus qanoq ililluni inunnik peqqissimisunik ikiuillunilu tuppallersaasarsimava?

⁹ Inuup pinngortitaaneranit ukiut 4000-it qaangiuttut kinguaassaq neriorsuutigisaasoq takkuppoq. Inunnut asanningaarsutsimini Jehova Guutip ernituani nunarsuarmut aallartippaa toqunermigut inunnut ajortilinnut utertitsitsissummik akiliuteqarsinnaaqqullugu. (Juánase 3:16) Jesus Kristus ajortuliortunut peqqissimisunut pilliutitut toqunerminut uppertunut annertuumik ilorraallatsitsivoq. Inuunerminnik Jehovamut tunniussilluinnartut taassumalu erneranut ajoqersukkatut kuisittut nutaamik nukissaqalerput ataavartumillu tuppallersaatissaqalerlutik. (Matîuse 11:28-30; 16:24) Naammalluinnanngitsuugaluarlutik ilerasuuteqaratik Jehovamut kiffartornerminni annertuumik nuannaarutissarsisarput. Taamaattumik taakkununnga tuppallernartorujussuuvoq nalunagu Jesusimut uppertuaannarunik inuunermik naassaanngitsumik akissarsissallutik. (Juánase 3:36; Eprîarit 5:9) Sanngiissutertik pissutigalugu ingasattumik ajortuliortooraluarunik ikiortissaqarput, imaluunniit tuppallersaasussaqarput, tassa Jesus Kristusimik. (1 Juánase 2:1, 2) Ajortuliartik anngiiaatigigunikku ajortulioqattaalinnginnissartillu pillugu Biibilimi ilitsersuussutigineqartut maleruarunikkik, ilorraallassapput nalunagu ’Guuti ilumoorlunilu iluartuusoq, ajortitsinnik isumakkeerfiginnittartoq’. — 1 Juánase 1:9; 3:6; Ussatit 28:13.

10. Jesusip nunarsuarmiikkallarami tupinnartuliaasigut suna ilikkarparput?

¹⁰ Jesusip nunarsuarmiikkallarami aamma inoqatini nutaamik nukissaqalersittarpai anersaapiluit anisinnerisigut, nappaatit suulluunniit ajorunnaarsinnerisigut toqusullu makitinnerisigut. Tupinnartuliornerit tamakkua iluaqutissartaat ataavartuunngillat, tassami tupinnartuliorfigineqartut naggataatigut utoqqalillutillu toqupput. Kisianni Jesusip taamatut tupinnartuliortarnermigut pilluaqqussutissat ataavartut siunissami inunnut tunniukkumaakkani siumut tikkuarniarpai. Massakkut qilammi kunngersuugami pissarsuaq ungasinngitsukkut anersaapiluit anisiinnassanngilai, aammali siulersortaat, Satan, ilanngullugu itinersuarmut igissavai, tassa susinnaajunnaarsissavai. Taava Kristusip ukiuni tuusintini naalakkersuinissaa nuanningaartoq aallartissaaq. — Lúkarse 8:30, 31; sarĸúmersitat 20:1, 2, 6.

11. Sooq Jesus imminut ’sabbatip Naalagaanik’ taava?

¹¹ Jesus oqarsimavoq ’sabbatip Naalagarigaani’, ajorunnaarsitsinerisalu ilarpassui sabbatimi pisimapput. (Matîuse 12:8-13; Lúkarse 13:14-17; Juánase 5:15, 16; 9:14) Sooruna taamaattoq? Sabbatimik aaqqissuussaq Guutip Israelikkunnut inatsisaanut ilaavoq taamaattumillu ’ajunngitsuutinut nalliuttussanut tarraannaalluni’. (Eprîarit 10:1) Sapaatip-akunnerata ulluisa arfinillit eqqaasippaatigut inuit ukiuni 6000-ini Satanip naqisimannilluni naalakkersuinerata ataani inussiaasimasut. Sapaatip-akunnerata naanerani ulloq sabbat eqqissisimaarnermik tuppallernartumik, Noap annerup, Jesus Kristusip, ukiuni tuusintini naalakkersuinerani inuit atugassaannik, eqqaasitsivoq. — Naleqqiuguk Pîtrusip agdlagaisa áipait 3:8.

12. Suut tuppallernartut qilanaarisinnaavavut?

¹² Kristusip naalagaaffiata nunarsuarmi innuttai eqqissiallassaqaat kiisami Satanip sunniipilunneranit aniguisitaagunik. Sulilu tuppallernerussapput timikkut, misigissutsikkut isumakkullu nappaatitik ajorunnaarsinneqarpata. (Jesaja 65:17) Takorlooriassagit asasatik toqusunit makippata nuannaarnerat! Taamaalilluni Guutip ’qulliit tamaasa isaannit allartissavai’. (sarĸúmersitat 21:4) Guutip naalagaaffiata ataani innuttaasut naalattut Jesusip pilliutaata utertitsissutaasup iluaqutissartaanik iluaqutiginnikkiartuaartillutik naggataatigut naammalluinnartunngussapput Adamillu ajortuliaata sunniutipiluinit aniguisinneqarluinnassallutik. (sarĸúmersitat 22:1-5) Taava Satan ’sivikitsumik’ iperagaassaaq. (sarĸúmersitat 20:3, 7) Inuit aalajaallutik Jehovap kisimi oqartussaassusianik qutsissisitsisut tamarmik inuunermik naassaanngitsumik akissarsisinneqassapput. Takorlooruk ’aserujasumut kiffaasut kiffaajunnaarsinneqarunik’ nuannaarnerat eqqissiallannerallu taassaanngitsoq! Inuiaat naalattut taakkua ’Guutip qitornaasa kiffaanngissusiat naalannartoq’ nuannaarutigisinnaassavaat. — Rûmamiut 8:21.

13. Sooq kristumiut tamarmik Guutimeersumik tuppallersarneqarnissartik pisariaqartippaat?

¹³ Tamannali pitinnagu ’erloqinartut’ Satanip aaqqissuussaata ajortup ataani inuusut tamarmik anersaaruluutigisaat atortuarallassavavut. Inuit amerliartuinnartut, ilaatigut kristumiut aalajaatsut, timikkut tarnikkullu nappaatinik eqqorneqartarput. (Filípimiut 2:25-27; 1 Tásalûníkamiut 5:14) Kiisalu uagut kristumiutut Satanip silarsuaanit naapertuilluanngitsumik illaruaatigineqartarlutalu qinugineqartarpugut ’Guuti inunnit naalannerugatsigu’. (apustilit suliait 5:29) Satanip silarsuaata suujunnaarsinneqarnissaa tikillugu Guutip piumasaatut iliortuaannarsinnaassagutta Jehovamit tuppallersarneqartarlutalu, ikiorneqartarlutalu nakussatsinneqartarnissarput pisariaqartipparput.

Sumi tuppallersaatissaqarpa?

14. (a) Jesus toqunissani aqaguttoq unnukkut qanoq neriorsuiva? (b) Tuppallersaat Guutip anersaava illernartoq aqqutigalugu pisagarput tamakkiisumik iluaqutigissagutsigu suna pisariaqarpa?

¹⁴ Toqunissani aqaguttoq unnukkut Jesusip apustilini qimangajalernerannik Ataataminullu utingajalernerminik erseqqissaaffigai. Tamanna apustiliisa eqqissiunnaarutigaat aliatsaatigalugulu. (Juánase 13:33, 36; 14:27-31) Jesusip nalunnginnamiuk tuppallersarneqartarnissartik pisariaqartittuassagaat, ima neriorsorpai: ’Ataataq qinnuigiumaarpara, taassumalu tunissavaasi illersuisumik allamik, naassaanngitsumik ilissinniittuaqqullugu.’ (Juánase 14:16) Jesusip tassani pivaa Guutip anersaava illernartoq, makinnermi kingorna ullut 50-it qaangiuttut ajoqersukkaminut kuineqartoq.a Guutip anersaavata illernartup sunniutaasa ilagaat misilinneqarneranni tuppallersartaramigit Guutillu piumasaatut iliortuarnissaannut nakussatsittaramigit. (apustilit suliait 4:31) Taamatulli ikiorneqarnertik isumaminik takkuttutut igissanngilaat. Taamatut tamakkiisumik ikiorneqarumagunik kristumiut Guutip anersaani illernartoq aqqutigalugu tuppallersaanissaa qinnutigiuartariaqarpaat. — Lúkarse 11:13.

15. Sutigut allatigut Jehova tuppallersaasarpa?

¹⁵ Aammattaaq Guutip oqaatsini, Biibili, aqqutigalugu tuppallersartarpaatigut. Paulus ima allassimavoq: ’Siornagummi allassimasut tamarmik allassimapput uatsinnut ilinniutissaallutik nerioqqulluta erinitsannata allakkallu tuppallersaatigalugit.’ (Rûmamiut 15:4) Tamatuma ersersippaa Biibilimik atuagassianillu Biibililersaarutinik aalajangersimasumik atuaqqissaartarnissarput atuakkatsinnillu isumaliutiginneqqissaartarnissarput pisariaqartoq. Aamma kristumiut ataatsimiinnerinut najuuttuartariaqarpugut, Guutip oqaasianit tuppallernartunik tassani tusarsinnaagatta. Taamatummi ataatsimiittoqartarneranut siunertaasut pingaarnerit ilagaat qiimmassaqatigiinnissarput. — Eprîarit 10:25.

16. Guutimit tuppallersarneqartarnerput sumut kajumississutigisariaqarparput?

¹⁶ Paulusip Romamiunut allagaani atuarnerugutta takusinnaassavarput Guutip aaqqissuussaanik tuppallernartunik atorluaaneq qanoq pitsaasunik kinguneqartartoq. Paulus allappoq: ’Guutip erinitsannaveersaasup tuppallersaasullu tunilisi ataasiusumik isumaliorfigeqatigeeqqullusi Kristus Jesus malillugu, isumaqatigiillusi qanermik ataatsimillusooq Guuti Naalakkatta Jesus Kristusip Ataataa unnersiutigeqqullusiuk.’ (Rûmamiut 15:5, 6) Guutip tuppallersaatissiai tamakkiisumik atorutsigik Naalagarput sapiitsoq, Jesus Kristus, assiginerulissavarput. Tamanna oqaluussinermi, ataatsimiinnerni, uppeqatitsinnik oqaloqateqartarnitsinni qinnutitsinnilu Guutimik unnersiutiginninnermut qanitta atortuarnissaanut kajumississutigissavarput.

Annertuumik misilinneqarnerni

17. Jehovap ernini qanoq tuppallersarsimavaa, qanorlu kingunilimmik?

¹⁷ Naalliunnartumik toqutaanissani aqaguttoq unnukkut Jesus ernumalerpoq ’aliasungaalerlunilu’. (Matîuse 26:37, 38) Taamaattumik ajoqersukkani nigulaarlugit Ataataminut qinuvoq ikioqqulluni, Guutimillu mianerinninnini pillugu ’tusarneqarpoq’. (Eprîarit 5:7) Biibilimi oqaluttuarineqarpoq Jesus ’inngilip qilammit saqqummerfigigaa nakussatsillugulu’. (Lúkarse 22:43) Jesusip akerlilersortiminut sapiitsumik angutivittullu kiinnerneratigut erserpoq Guutip ernerminik tuppallersaariaasia sunniuteqarnikkaarujussuusoq. — Juánase 18:3-8, 33-38.

18. (a) Apustili Paulus inuunermi ilaani qaqugukkut annertuumik misilinneqarsimava? (b) Utoqqaanertanut suliniarluartunut misiginneqataasunullu qanoq ililluta tuppalliutaasarsinnaavugut?

¹⁸ Aammattaaq apustili Paulus annertuumik misilinneqartarsimavoq. Assersuutigalugu, Efesusimi ’qullilisarlunilu usserneqartarsimavoq juutit qinuginninneri pissutigalugit’. (apustilit suliait 20:17-20) Naggataatigut, oqaluussinini pissutigalugu guutip arnap Artemisip malittai illoqarfimmi eqqissiviilliortitsereersullu, Paulusip Efesus qimappaa. (apustilit suliait 19:23-29; 20:1) Paulus illoqarfimmut Troasimukarluni avannamut ingerlaartilluni allamik ernumassuteqarpoq. Efesusimi eqqissiviilliorneqanngitsiartoq Paulus aarleritsannartunik nalunaarfigineqarsimavoq. Korinthimigooq ilagiinni pilersinneqaqqammersuni avissaartuunneqarlunilu kanngunartuliorneq ilaginnaannarneqarpoq. Taamaattumik Efesusimit Paulusip Korinthimi ilagiit allaffigisimavai ilungersortumik oqaallugit, pissutsinik iluarsiinissaat neriuutigalugu. Taamaaliorneq taassumunnga oqitsuunngilaq, allakkamimi aappaanni ima allappoq: ’Uummatikkut annikilliungaarlunga qussalangaarlungalu taamani qullilingaarlunga allaffigaassi.’ (2 Korintumiut 2:4) Soorlu Paulus taamatut misigisimasoq utoqqaanertattaaq misiginneqataasut unnersuussinissartik ilungersortumillu oqaassinissartik ajornakusoortittarpaat, ilaatigut namminneq aamma sanngiissuteqarnertik nalunngilluinnaramikku. (Galâsiamiut 6:1) Taamaattumik Biibili tunngavigalugu asannittumik unnersuunneqarnitsinnik ilassinnikkumassuseqarnitsigut akornatsinni siuttuusunut tuppalliutaasarsinnaavugut. — Eprîarit 13:17.

19. Sooq Paulus Troasimit Makedonialiarpa, naggataatigullu qanoq qiimmaallaatissinneqarpa?

¹⁹ Paulus Efesusimiitilluni Korinthimiunut allaannanngilaq, aammali ikiorneqarsinnaaqqullugit Titus taakkunnga aallartissimavaa. Paulusip Titus qinnuigisimavaa Korinthimiut allakkaminut qanoq qisuariarnerannik paasiteqqulluni. Neriussimagaluarpoq Titus Troasimi, ajoqersuganngortitsinissamut periarfissagissaarpasissumi, naapissallugu. Titusili suli tikissimanngilaq, taamaammat Paulus suli ernumavoq. (2 Korintumiut 2:12, 13) Taamaattumik Makedoniamut ingerlaqqippoq tamaani Titusip naapinnissaa neriuutigalugu. Oqaluussinermini sakkortuumik akerlilersorneqarneranit ernumanera minnerulinngilaq. Ima oqaluttuarpoq: ’Taamani Makedoniamut pigatta uinipput eqqissinngilaq, tamatigullu annikillisarpugut, qaatsigut assortorneqarluta ilutsigullu ersilluta. Nikallortunilli tuppallersitsisup Guutip Titusip tikiunneragut tuppallersarpaatigut.’ (2 Korintumiut 7:5, 6) Paulus eqqissiallaqaaq kiisami Titus tikimmat oqaluttuarlunilu Korinthimiut allakkaminut ajunngitsumik qisuariarsimasut.

20. (a) Jehovap qanoq tuppallersartarpaatigut, soorlu Paulusimik pisimasukkut ersertoq? (b) Ilanngutassiami tulliuttumi suut sammineqassappat?

²⁰ Paulusip misigisimasai ullumikkut Guutip kiffaanut tuppallernaqaat, ilarpassuimi taassumatulli misilinneqartarmata ’nikallussutigisaminnik’ imaluunniit ’isumatsassutigisaminnik’. (Phillips) Aap, ’Guutip tuppallersaasup’ tamatta immikkut pisariaqartitavut nalunngilai immitsinnullu tuppallersaqatigiississinnaavaatigut, soorlu Paulusip Korinthimiut allamik isumataarsimanerannik Titusimit tusarlerneqarnini tuppalliutigisimagaa. (2 Korintumiut 7:11-13) Korinthimiut akillugit Paulusip allagai asannippaluttut, ullumikkullu qanoq ililluta allakkat taakku tuppallersaammik Guutimeersumik allanut aveqateqartarnitsinni iluaqutigisinnaanerivut ilanngutassiami tulliuttumi sammineqassapput. (wE 1/11 96)

[Quppernerup ataani ilanngussaq]

Akisinnaaviuk?

□ Sooq inuit tuppallersarneqarnissamik pisariaqartitsilersimappat?

□ Qanoq ililluni paasinarsisimava Jesus Noamit annerusoq?

□ Sooq Jesus ’sabbatip Naalagaanik’ imminut taava

□ Ullumikkut Guuti qanoq ililluni tuppallersaasarpa?

[Qupp. 16-mi nunap assinga]

(Allassimasut qanoq inissisimanersut naqitami takuneqarsinnaavoq)

Paulus tuppalliallaqaaq Titus aqqutigalugu Korinthimiut qanoq innerat tusaramiuk

MAKEDONIA

Filippi

GRÆKENLAND

Korinth

ASIAARAQ

Troas

Efesus