Upperisarsiornikkut kiffaanngissuseqarneq qanoq paasiviuk?
Naak USA-mi upperisarsiornikkut kiffaanngissuseqarneq tunngaviusumik pisinnaatitaaffittut isigineqaraluartoq 1940-kkunni nuna tamakkerlugu Jehovap nalunaajaasui inupalaanit saassunneqartarput.
MILLIONILIPPASSUIT sorsuutigisimavaat. Allaat tamanna pillugu ilaat toqusimapput. Inuup pigisinnaasaata pingaarnerit ilagaat. Sunaana? Kiffaanngissuseqarneq! The World Book Encyclopedia-p kiffaanngissuseq ima nassuiarpaa „qinersisinnaaneq tamatuminngalu piviusunngortitsisinnaaneq“. Nangipporlu: „Inatsisit tungaanniit isigalugu inuit kiffaanngissuseqarput innuttaaqatigiinnit naapertuilluanngitsumik, pisariaqanngitsumik ingasaassinngitsumillu killilersugaanngikkunik. Pisinnaatitaaffii — tunngaviusumik kiffaanngissusiat, oqartussaanerat immikkullu pisinnaatitaaffii — innuttaaqatigiinnit aamma illersorneqartariaqarput.“
Ajornarpasinngippaaq. Piviusorsioraannili kiffaanngisutsip killii inuit isumaqatigiissutigisinnaagunanngilaat. Assersuutigalugu isumaqartoqarpoq innuttaasut kiffaanngissusiat illersorniarlugu naalakkersuisut inatsisiliortariaqartut. Allalli isumaqarput inatsisit taamattut innuttaasut kiffaanngissusiannut ajoqutaaginnartut! Ersarippoq kiffaanngissuseq assigiinngitsumik isumaqarfigineqarmat.
Upperisarsiornikkummi kiffaanngissuseq?
Kiffaanngissutsinik oqallisaanerpaasimasoq tassaagunarpoq upperisarsiornikkut kiffaanngissuseqarneq, tamanna ima nassuiarneqarsimavoq „nammineq qinikkamik upperisaqarsinnaaneq upperisarsiorsinnaanerlu“. FN-ip inuit pisinnaatitaaffii pillugit nalunaarutaa naapertorlugu „kialuunniit eqqarsarsinnaanikkut, tarnip nalunngeqatiginnissusiagut upperisarsiornikkullu kiffaanngissuseqarneq pisinnaatitaaffigaa“. Tamatumunnga ilaavoq inuup „upperisarsiornerminik upperisaminilluunniit allannguisinnaanera“ aamma „upperisarsiornerminik upperisaminilluunniit ajoqersorneqarnikkut, guutisiornikkut maleruaanikkullu ersersitsisinnaaneranut kiffaanngissuseqarnera“. — Immikkoortoq 18.
Soorunami ilimagaarput naalagaaffiup suulluunniit kiffaangissutsimik taama ittumik innuttaminut ilumoorluni tunisinissaa. Ajoraluartumik tamatigut taamaattoqarneq ajorpoq. „Upperisarsiornerup inuit ilorlikkut misigissusaat atortarpaat,“ The World Book Encyclopedia-mi allassimavoq. „Naalakkersuisut ilaat upperisarsiornermut aalajangersimasumut sakkortuumik atassuteqarput allanillu upperisallit politikkikkut oqartussaanerminnut aarlerinartorsiortitsisutut isigalugit. Naalakkersuisut aamma upperisarsioqatigiit aalajangersimasut politikkikkut navianartutut isigisinnaavaat upperisarsiortut Guutimut ilumoorneq naalagaaffimmut naalannermit immaqa salliutimmassuk.“
Tamanna pissutigalugu naalakkersuisut ilaasa upperisarsiornermi iliuutsinik killilersuisarput. Ilaat ikittut upperisarsiornerit tamaasa akerleraat. Allat naak guutisiornermi kiffaanngissuseqarneq tapersersoraluarlugu upperisarsiornikkut iliuutsit tamaasa immaqa alaatsinaaqqissaartarpaat.
Assersuutigeriartigu ukiorpaaluit matuma siorna Mexicomi nalinginnaasimasoq. Naak naalakkersuisutigut inatsisitigullu upperisarsiornikkut kiffaanngissuseqarneq qulakkeerneqaraluartoq aamma ima inatsiseqarpoq: „Oqaluffiit guutisiornermut atorneqartut naalakkersuisut, inuiaqatigiinnut sinniisut, pigaat taakkualu aalajangissavaat oqaluffiit sorliit taamatut atorneqassanersut.“ 1991-imi inatsit taanna atorunnaarsinneqarpoq. Assersuutip tamatuma takutippaa upperisarsiornikkut kiffaanngissuseq nunani assigiinngitsuni assigiinngitsunik isumaqartinneqartoq.
Upperisarsiornikkut kiffaanngissuseqarneq alla
Upperisarsiornikkut kiffaanngissuseq illit nunanni atugaava? Taamaappat qanoq isumaqartinneqarpa? Illit qinersimasannik guutisiorsinnaavit, upperisarsiortunulluunniit naalagaaffiup aalajangigaanut ilaasortaasariaqarpit? Upperisarsiornikkut atuagassianik atuarsinnaatitaavit agguaassisinnaatitaallutillu, atuagassialluunniit taamaattut naalakkersuisunit inerteqqutigineqarpat? Upperisat pillugu allat oqaloqatigisinnaavigit upperisarsiornikkulluunniit pisinnaatitaaffiinut ajoqusiinertut isigineqarpa?
Apeqqutit tamakkua akissutissaat sumi najugaqarnerpit aalajangerpaa. Soqutiginarporli sumiiffinnut sunulluunniit apeqqutaanngitsumik upperisarsiornikkut kiffaanngissuseqarmat. Ukiumi 32-imi Jerusalemimi Jesus malitsiminut ima oqarsimavoq: ’Oqaatsikka attavigiuarussigik ilumut ajoqersugarissavassi; sallusuissullu ilisarissavarsi, sallusuissutillu inussiaajunnaarsissavaasi.’ — Juánase 8:31, 32.
Jesus taama oqarnermini qanoq isumaqarpa? Tusarnaartui juutiusut Romamiut naalakkersuinerannit aniguisinneqarnissartik erinigaat. Jesusilli politikkikkut naqisimaneqarnermit kiffaanngissuseqarneq eqqartunngilaa. Naagga, pitsaanerungaartumik ajoqersukkani neriorsorpai, ilanngutassiamilu tulliuttumi tamanna sammissavarput.