’Takunngikkaluarlugu asavarsi’
’Taanna takunngikkaluarlugu asagassiuk, isiginngikkaluarlugu maanna upperfigigassiuk, qiimmattassaasilu.’ — 1 PÎTRUSE 1:8.
1. Naak ullumikkut nunarsuarmiut arlaannaataluunniit Jesus takusimanngikkaluaraa, upperisarsiortut ilaasa qanoq ilillutik ilungersorlutik taassumunnga tunniusimanertik takutinniartarpaat?
KIALUUNNIIT ullumi nunarsuarmi inuusup Jesus Kristus takusinnaanngilaa. Taamaattoq inuit millionilippassuit asanerarpaat. Ukiut tamaasa, januaarip ulluisa 9-anni, Manilami Filippineriniittumi, Jesus Kristus assilillugu inuusaliaq inuttut angitigisoq aqqusinerni angallanneqartarpoq. Ingerlaartarneq tamanna tassaanerarneqarpoq nunami tamatumani upperisarsiornikkut takutitsinerit ornigineqartartut maluginiarnarnerpaartaat. Inuppassuit pissangallutik ajattaallutillu qerlertoruuttarput; ilaasalu allaat silaarullutik allat tullaarallugit inuusaliaq attorniartarpaat. Takunnittut ilarpassuisa ingerlaarnerat nalliuttorsiorpaluttut takuniaannarlugit najuuttarput. Qularnanngitsumilli ilaasa ilumoorlutik Jesus kajungerivaat. Taamaattumik ulluinnarni sanningasumik nassataqartarput imaluunniit naalagiartarlutik. Inuusaliamulli guutisiorneq taama ittoq tassaanerpa ilumoortumik pallorfiginninneq?
2, 3. (a) Jesusip malinnittaasa ilaasa kikkut takusimallugulu tusarsimavaat? (b) Ukiuni hundredelinni siullerni inuusimasut allat kikkut Jesus asallugulu upperfigisimavaat takusimanngikkaluarlugu?
2 Ukiuni hundredelinni siullerni Romamiut naalagaaffiata ilaani, Judæami, Samariami, Peræami Galilæamilu inuit tuusintilippassuit ilumut Jesus Kristus takusimavaat tusarnaarsimallugulu. Tusarnaarpaat Guutip naalagaaffia pillugu ilumoortortat kajumissinartut oqaluttuarigai. Tupinnartuliornerinut takunnittuupput. Ilaat taassumunnga ajoqersuganngorput tunniulluinnarsimasut, qularinngivillugu taanna tassaasoq ’Kristus, Guutip uumasup ernera’. (Matîuse 16:16) Kisianni taakku Peterip allakkaminik siullermik isumassarsiarititaasumik allaffigisaasa ilaginngilaat.
3 Peterip allaffigisai tamarmik Romamiut naalagaaffiata ilaani, Pontusimi, Galatiami, Kappadokiami, Asiami Bityniamilu — ullumikkut Tyrkiamik taaneqartumi — najugaqarput. Taakku Peterip ima allaffigai: ’Taanna takunngikkaluarlugu asagassiuk, isiginngikkaluarlugu maanna upperfigigassiuk, qiimmattassaasilu tipaatsunnermik taassaanngitsumik usornartitaasumik.’ (1 Pîtruse 1:1, 8) Qanoq ilillutik Jesus Kristus ima ilisarilertigisimavaat allaat asasinnaallugu upperfigisinnaallugulu?
4, 5. Inuit taakku Jesusimik takunnissimanngitsut qanoq ilillutik taanna pillugu ima ilikkartigisinnaapppat asasinnaallugu upperfigisinnaallugulu?
4 Qularnanngitsumik ilaat Jerusalemimiissimapput Piinsip ulluani ukiumi 33-mi u.n.k. apustili Peterip inuppassuit nalliuttorsiortut nalunaajaaffigimmagit. Nalliuttorsiornerup kingorna ajoqersukkat amerlasuut Jerusalemimiiginnarput apustilinit ajoqersorneqarnerujumallutik. (apustilit suliait 2:9, 41, 42; naleqqiuguk 1 Pîtruse 1:1.) Arlaleriarluni ajoqersuiartortitatut angalalluni apustili Paulus ilungersorluni oqaluussisimavoq nunami Peterip kingusinnerusukkut allakkaminik siullermik Biibilimiittumik allaffigisaasa najugaqarfianni. — apustilit suliait 18:23; 19:10; Galâsiamiut 1:1, 2.
5 Suna pillugu inuit taakkua Jesus takunngikkaluarlugu taama kajungeritigaat? Ullumikkullu nunarsuaq tamakkerlugu suna pillugu allat millionilikkuutaat asangaarpaat?
Tusarsimasaat
6. (a) Ukiumi 33-mi u.n.k. piinsip ulluani Peter Jesus pillugu nalunaajaasoq tusarnaarsimagukku suna ilikkarsimassagaluarpiuk? (b) Nalunaajaaneratigut najuuttut ilaat 3000-it qanoq sunnerneqarpat?
6 Illit ukiumi 33-mi u.n.k. Jerusalemimiissimaguit Peterip nalliuttorsiortorpassuit oqaluffigimmagit, Jesus pillugu sumik ilikkagaqassagaluarpit? Qularnanngivissumik paasisimassagaluarpat tupinnartuliornerisa takutikkaat Guutimit aallartitaasoq. Paasisimassagaluarpattaaq naak Jesus inunnit ajortiliusunit toqutaagaluartoq, maanna ilivermiikkunnaarsimasoq makititaasimallunili qilaliartinneqarsimallunilu Guutip talerpiatigut qutsissisitaalluni. Jesus ilumut tassaavoq Kristus, Messias, pruffiitit qangali siulittuutigisaat. Paasitinneqarsimassaatit Jesus Kristus aqqutigalugu malinnittai anersaamik illernartumik kuineqartut, taamaattumik taakkua ingerlaannaq inuit inuiaqatigiinnit amerlasuunit nalunaajaaffigilersinnaavaat Guutip ernini ikiortigalugu tupinnartumik iliuuserisai pillugit. Peterip tusarnaartaasa ilarpassui uummatikkut killinneqarput, 3000-illu ajoqersukkatut kristumiutut kuisipput. (apustilit suliait 2:14-42) Taamani najuussimagaluaruit illittaaq taama aalajangersimatigisumik iliuuseqassagaluarpit?
7. (a) Paulus Antiokiami oqaluussimmat najuussimagaluaruit sumik ilikkarsinnaasimassagaluarpit? (b) Suna pillugu tusarnaartut ilaat uppertunngorpat nutaarsiassarlu nuannersoq allanut oqaluussissutigilerlugu?
7 Illit najuussimagaluaruit apustili Paulus Antiokiami Galatiamiittumi ajoqersuimmat, Jesus pillugu sumik ilikkagaqassagaluarpit? Tusarsimassavat Paulusip nassuiaraa Jesusip Jerusalemimi siulersuisunit toqumut eqqartuunneqarnera pruffiitinit siulittuutigineqarsimasoq. Aamma tusarsimassavat Jesusip makinneranik takunnittoqartoq. Qularnanngitsumik tupigusuutigisimassavat tusarlugu Paulus nassuiaammat Jehovap Jesus toqusunit makitillugu uppernarsaraa taanna tassaasoq Guutip ernera. Uummatikkullu attorneqarsimassannginnerpit paasilerlugu Jesusimut upperneq tunngavigalugu ajortulianik isumakkeerfiginninneq inuunissamik naassaanngitsumik kinguneqarsinnaasoq? (apustilit suliait 13:16-41, 46, 47; Rûmamiut 1:4) Tusakkamik pingaaruteqarnerat paasillugu Antiokiamiut ilaat ajoqersuganngorput, namminneq nutaarsiassaq nuannersoq allanut oqaluussissutigilerlugu, naak taamaaliorneq ingasattumik malersorneqarnermik nassataqarsinnaasoq. — apustilit suliait 13:42, 43, 48-52; 14:1-7, 21-23.
8. Ilagiinni Efesusimiittunut ilaasimagaluaruit Paulusimit allagarsimmata suut ilinniarsimassagaluarpigit?
8 Takorlooriaruk illit kristumiut ilagiissaannut Efesusimiittunut ilaasimagaluaruit ajoqersukkat tassaniittut Paulusip allagai isumassarsiarititaasut tigummatigik. Jesusip Guutip siunertaani inissisimaffia pillugu sumik paasisaqarsinnaasimassavit? Allakkamini Paulusip nassuiarpaa Kristus aqqutigalugu qilammiittut nunamiittullu tamarmik Guutimut ataqatigiilluarumaartut, Guutip tunissutaa Kristusikkut inuit inuiaqatigiinnit tamaneersut pisinnaassagaat, inuit pinerlunnerminni Guutip isaani toqungagaluartut Kristus upperfigalugu uummartinneqartut, aaqqissugaq taanna pissutigalugu inuit tassaaleqqissinnaapput Guutip erneri asasai. — Evfisumiut 1:1, 5-10; 2:4, 5, 11-13.
9. (a) Qanoq ilillutit nalunngissinnaaviuk Paulusip Efesusimiunut allassimasaasa pingaaruteqarnerat ilumut paasisimanerlugu? (b) Qatanngutit Romamiut naalagaaffiata ilaani inuusut Peterip eqqartugai qanoq ilillutik Jesus pillugu tusakkaminnit sunnerneqarsimappat?
9 Tamakkuninnga tamanik pingaartitsinerpit Guutip erneranut asanninnerit allisissimassagaluarpaa? Asanninneq tamanna ulluinnarni inuuninnut sunniuteqarsimassava, soorlu Paulus Evfisumiunut agdlagkat-ni kapitali 4-6-imi kajumissaarisoq? Pingaartitsineq tamanna killissutigalugu inuuninni suna salliutinneqarnerit peqqissaartumik misissussagaluarpigit? Guutimut asanninnermit erneranullu qujamasunnermit killinneqarlutit inuunerit allanngortikkumasimassaviuk Guutip piumasaanik iliorneq inuuninni pingaarnerpaatillugu? (Evfisumiut 5:15-17) Kristumiut Asiami, Galatiami Romamiullu naalagaaffiata ilaani allani inuusut ilinniarsimasaminnit qanoq sunnerneqarsimasut eqqarsaatigalugu apustili Peterip ima allaffigai: ’Taanna [Jesus Kristus] takunngikkaluarlugu asagassiuk, . . . upperfigigassiuk, qiimmattassaasilu tipaatsunnermik taassaanngitsumik usornartitaasumik.’ — 1 Pîtruse 1:8.
10. (a) Qularnanngitsumik suna pissutigalugu kristumiut siulliit Jesus asavaat? (b) Uaguttaaq tamanna qanoq iluaqutigisinnaavarput?
10 Peterip allaffigisaasa qularnanngitsumik aamma alla pissutigalugu Guutip ernera asavaat. Suna pissutigalugu? Peterip allakkami siulliit allakkamigit iivangkiiliut ilaat marluk atuarneqarsinnaareerput. Kristumiut ukiuni hundredelinni siullerni inuusut namminneq Jesusimik takunnissimanngitsut iivangiikiliuni oqaluttuat tamakku atuarsinnaavaat. Uaguttaaq atuarsinnaavavut. Iivangkiiliut tassaanngillat oqaluttualiaannat; oqaluttuarisaanerup tatiginartup ilisarnaatai tamaasa pigai. Oqaluttuat taakkua Guutimit isumassarsiarititaasut Guutip erneranut asanninnitta allisinneqarnissaanut imaqarput.
Anersaaq Jesusip ersersitaa
11, 12. Anersaap Jesusip inunnut allanut ersersitaata qanoq taassumunnga asannilersippaatit?
11 Jesusip inuuneranik allakkat atuarlugit ilikkarsinnaavarput taassuma inuit allat qanoq iliorfigisarai. Maannakkut allaat, ukiut 1960-it sinnerlugit toqunerata kingorna, anersaaq ersersitaa inuit uummataannut sunniuteqarpoq. Inuusut tamarmik ajortip kinguneranik erloqisitaapput. Inuit millionilikkuutaat naapertuilluanngitsuliorfigineqartarput, nappaateqartarput allalluunniit pissutigalugit pakatsisinneqangaartarput. Taamaattut tamaasa Jesusip ima qaaqquai: ’Ornissinga tamassi erloqisusi nanertugaasusilu, qasuersissavassi. Nammaatara ilissinnut pisissiuk ilinniarfigalungalu, qanilaarama uummatikkullu makitajuikkama; taava tarnissinnut qasuerfissarsiumaarpusi. Nammaatarami iluaqaaq, nammakkiussaralu oqeqaluni.’ — Matiuse 11:28-30.
12 Jesusip piitsut, kaattut aliasuttullu misiginneqataalluni soqutigai. Pisariaqarpat allaat inuppassuit tupinnartuliornikkut nerisittarpai. (Lúkarse 9:12-17) Ileqqutoqqanit erloqinartunit kiffaajunnaarsippai. Aamma Guutip naalakkersuinikkut aningaasatigullu naqisimaneqarnermut akuliuffissaanik neriorsuutinik Jesusip inuit uppernerat nakusatsippaa. Inuit naqisimaneqareersimasut nikallortinngilai. Piginnaassuseqarluarluni asannittumik naakkinnittumillu maniguuttut isumalluartittarpai. Inuit sivissuartut napisimasutut ittut iparartullu qamilersutut ittut nukissaqarteqqilertarpai. Ulloq manna tikillugu aqqa neriuuteqalersitsisarpoq, allaat inuit taassuminnga takunnissimanngitsut uummataanni. — Matîuse 12:15-21; 15:3-10.
13. Jesusip ajortuliortunut iliorfigineriaasia sooq inunnut kajumissinartorujussuua?
13 Jesusip ajortuliorneq akuerinngilaa, kisianni inuit inuunerminni eqqunngitsuliorsimasut peqqissimillutik ikioqqullutillu imminut saaffinnittut paasisinnaavai. (Lúkarse 7:36-50) Inuit inuiaqatigiinni nikagineqartut anersaakkut ikiornissaannik periarfissaqarsinnaaguni nereqatigisinnaavai. (Matîuse 9:9-13) Anersaaq ersersitaa pissutigalugu inuit millionilikkuutaat taakkununnga assingusumik atugallit Jesus takusimanngikkaluarlugu ilisarilernissaanut upperfiginissaanullu killinneqarsimapput.
14. Jesusip napparsimasunut, iloqiaasunut aliasuttunulluunniit iliorfiginninneranit illit qanoq sunnerneqarpit?
14 Jesusip inunnik napparsimasunik innarluutilinnillu iliorfiginneriaasiata takutippaa qanoq asannitsigisoq misiginneqataatigisorlu, aammalu takutippaa ikiornissaannik piginnaassuseqartoq. Assersuutigalugu angutip pupissup ikioqqulluni ornimmani takuleramiuk Jesus tunuarsimanngilaq. Oqarfiginngilaa naak nalligigaluarlugu nappaataa ingasappallaarmat ikiorsinnaanagu. Angutip qinnuigaa: ’Naalagaq, piumaguit pupeerutissinnaavarma.’ Nangaanngivilluni Jesusip pupissoq attorpaa oqarfigalugulu: ’Piumavunga, pupeerugit.’ (Matîuse 8:2, 3) Ilaanni arnap ajorunnaarusulluni malunnanngitsumik annoraata nivingataa attorsimavaa. Jesusip inussiarnersumik kajumissinartumillu iliorfigaa. (Lúkarse 8:43-48) Ilaanni toqungasumik akiartut naammattooramigit uillarneq aliasoqisoq ernituaminik annaasaqarsimasoq nalligeqalugu attorpaa. Naak Jesusip piginnaassutsini Guutimeersoq imminut nerisassaqarniarluni tupinnartuliornikkut atorsimanngikkaluarlugu, nangaanani toqungasup anaanaanut makitinnerani atorpaa. — Lúkarse 4:2-4; 7:11-16.
15. Jesus pillugu oqaluttuat atuarlugit eqqarsaatigeqqissaarlugillu qanoq sunnerneqartarpit?
15 Oqaluttuat tamakku atuaraangatsigik anersaarlu Jesusip ersersitaa eqqarsaatigalugu, taassumunnga naassaanngitsumik inuusinnaanissatsinnut inuttut inuunerminik pilliuteqarsimasumut asanninnerput allisinneqartarpoq. Takusimanngikkaluarlugu taassumunnga kajungilersinneqarpugut taannalu tumissiorlugu malinniarusupparput. — 1 Pîtruse 2:21.
Maniguulluni Guutimut tatiginninnera
16. Jesusip suna pingaarpaatillugu soqutigaa, qanorlu iliornissamut kajumissaarpaatigut?
16 Pingaarnerpaatillugu Jesusip Ataataminut Jehova Guutimut nammineq uagullu attaveqarnerput soqutigisarpaa. Inatsisit pingaarnerpaartaat tikkuarpaa ima oqarluni: ’Jehova Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.’ (Matiuse 22:36, 37) Ajoqersukkani ima kajumissaarpai: ’Guutimut uppersuseqaritsi.’ (Mákorse 11:22) Uppernikkut misilinneqangaalermata ima oqarfigai: „Qinujuaritsi.“ — Matîuse 26:41, NV.
17, 18. (a) Jesusip qanoq ililluni takutippaa maniguulluni Ataatani tatigilluinnarlugu? (b) Suna pillugu taamaaliornera uatsinnut pingaaruteqaqaa?
17 Jesus nammineq tamatumani maligassaalluarsimavoq. Qinuneq inuunerani immikkut pingaaruteqarpoq. (Matîuse 14:23; Lúkarse 9:28; 18:1) Apustilissami qinernissaannut piffissanngormat Jesusip nammineq naliliisinnaassutsi tatiginngilaa, naak siornatigut inngilinut tamanut nakkutilliisuusimagaluarluni. Maniguulluni unnuaq naallugu Ataatani qinnuigaa. (Lúkarse 6:12, 13) Tigusaagami naalliunnartumillu toqutaasussanngorami Jesusip ilungersorluni Ataatani qinnuigeqqippaa. Isumaqaannanngilaq Satan ilisarereersimallugu ajortullu taassuma iliuuseriumaagaa qanoq qisuariarfigissallugu nalunngilluarlugu. Jesusip paasivaa nakkaannannginnissani qanoq pingaaruteqarluinnartigisoq. Nakkaannarsimagaluarpat Ataataanut qanoq assuarlernerutigissagaluarpa? Inuiannullu annaasaqaataassagaluaqaaq, Jesusip pilliutissaa taakkua inuusinnaanissaannut aalajangiisuulluinnassammat!
18 Jesus qinujuartarpoq — Jerusalemimi inimi qullermi apustilini ilagalugit naatsiivimmilu Getsemanimiikkami suli ilungersornerusumik. (Matîuse 26:36-44; Juánase 17:1-26; Eprîarit 5:7) Nappakkami anniartitaaffimmi kikiattugaagami mitallersini assortunngilai. Akerlianik sianiginagu imminut iliorfiginnittut ima qinnuppai: ’Ataataq, isumakkeerfigikkit suliartik nalummassuk.’ (Lúkarse 23:34) Ataatani eqqarsaatigiuarpaa, ’eqqartuussilluartumut peqqusilluni’. Nappakkami anniartitaaffimmi oqaaserisai kingulliit tassaapput Ataataanut qinnut. (1 Pîtruse 2:23; Lúkarse 23:46) Qujamasuutigaarput Jesusip Jehova tatigilluinnarlugu suliassani aalajaalluni naammassisimammagu! Jesus takusimanngikkaluarlugu iliorsimanera pillugu asangaarparput!
Taassumunnga asanninnerput takutipparput
19. Jesus asagutsigu iliuutsit suut ingalassimalluinnartariaqarpavut?
19 Qanoq illuta takutissinnaavarput asanninnerput oqaatsikkuinnaanngitsoq? Ataatap, Jesusip asasaata, assilissanik pallorfiginninneq inerteqqutigimmagu, soorunami Jesus ataqqiumallugu assilissat ilisarnaatillu taamaattut ujammitut atorusunngilavut imaluunniit aqqusinerni angallakkusunnagit. (2 Moses 20:4, 5; Juánase 4:24) Naalagiartarneq, allaat sapaatip-akunnerinut arlaleriarluni naalagiartarneq, Jesusimut ataqqinaataassanngilaq piffissap sinnerani Jesusip ajoqersuutigisai naapertorlugit inuunngikkaanni. Jesus ima oqarsimavoq: ’Inassutinnik piginnittoq maleruarlugillu tassaavoq uannik asannittoq; uannillu asannittoq Ataatama asajumaarpaa.’ — Juánase 14:21, 23; 15:10.
20. Ilaatigut qanoq ililluta takutissinnaavarput ilumut Jesus asallugu?
20 Suut inassutigai? Pingaartumik Guuti ilumoortoq Jehova kisimi pallorfigineqartariaqartoq. (Matîuse 4:10; Juánase 17:3) Guutip siunertaani immikkut pingaarutilimmik inissisimaffeqarami Jesus ajoqersuivoq Guutip erneratut upperfigisariaqaripput tamannalu takutittariaqaripput ajortuliornerit ingalassimanerisigut qaamasumi ingerlalluta. (Juánase 3:16-21) Ajoqersorpaatigut Guutip naalagaaffia taassumalu naapertuilluassusia piniaqqaaqqullugit, tamakku timikkut pisariaqartitatsinnit soqutiginerusaqqullugit. (Matîuse 6:31-33) Peqquaatigut soorlu uagut asagaatigut uaguttaaq asaqatigeeqqulluta. (Juánase 13:34; 1 Pîtruse 1:22) Guutillu siunertaa nalunaajaassutigeqqullugu suliassaqartippaatigut, soorlu nammineq taamaaliortarsimasoq. (Matîuse 24:14; 28:19, 20; sarĸúmersitat 3:14) Jesus takusimanngikkaluarlugu Jehovap nalunaajaasuisa 5 millionit sinnerlugit ullumikkut taassumunnga asanninnermit killinneqarlutik peqqussutit tamakku maleruartarpaat. Naak namminneq Jesus takusimanngikkaluarlugu aalajangerluinnarsimapput taassumunnga naalattuarumallutik. Eqqaamavaat Naalakkamik apustilimut Thomasimut oqaasii: ’Takugamma upperputit, Thomas, pilluarput takunninnatik uppertut.’ — Juánase 20:29.
21. Ukioq manna sapaammi marsip ulluisa 23-anni Kristusip toquneranik eqqaaniaalluni nalliuttorsiorneq najuuffigigutsigu qanoq iluaqutigissavarput?
21 Ukioq manna 1997-imi, sapaammi marsip ulluisa 23-anni Jehovap nalunaajaasui nunarsuaq tamakkerlugu Naalagaaffilersaartarfimminni Guutip inuiannut asannittuliornerisa annerpaartaanik aammalu ernerata aalajaatsup, Jesus Kristusip, toquneranik eqqaaniaallutik katersuuppata neriuppugut ilaassasutit. Taamanikkussamut oqaatigineqartussat iliuuserineqartussallu Jehovamut erneranullu asanninnerput aammalu Guutip peqqusaanik iliorusunnerput allisittariaqarpaat. — 1 Juánase 5:3. (wE 1/2 97)
Qanoq akissavigit?
□ Peterip allakkaminik siullermik allaffigisaasa qanoq ilillutik Jesus ilisarilersimavaat aamma sooq asavaat?
□ Kristumiut siulliit tusarsimasaat ilaat suut ilinnut sunniuteqarluarpat?
□ Jesusip inuttut pissuserisaasa taassumunnga asanninnerput qanoq allissisinnaavaat?
□ Jesusip maniguulluni Guutimut tatiginninnera sooq uatsinnut pingaaruteqarpa?
□ Jesus Kristusimut asanninnerput qanoq ililluta takutissinnaavarput?
[Qupp. 16, 17-imi assiliartat]
Jesus kajumigaarput pissuserisai pissutigalugit