Naalliunnartueruppat

NAALLIUUTIT Guutip inunnut siunertaqqaavanut ilaasimanngillat. Pilersissimanngilai kissaatigisimanagilluunniit. „Taavami,“ aperiumasinnaavutit, „qanoq aallartissimappat maannalu tikillugu atuunnissaat sooq Guutip akuerisimavai?“ — Naleqqiuguk Jâko 1:13.

Inuup oqaluttuarisaanerata allattorsimaffiani pisoqaanerpaami, Biibilimi, ingammik Mosesimik allakkat siulliit-ni, apeqqut akissutissaqarpoq. Allassimavoq siuaasatta siulliit, Adamip Evallu, Satan Diaavulu Guutimut pikitsitsinerani malissimagaat. Silarsuarmi avataaniittunilu inatsisit aaqqissuussinerullu tunngaviat akerleriissutaasoq tunngaviusoq iliuusaannik pilersinneqarpoq. Suna ajunngitsuunersoq sunalu ajortuunersoq namminneq aalajangersinnaajumallugu piumasaqaramik Guutip kisimi oqartussaanera unammillerpaat. Naalakkersuinera suullu ’ajunngitsuuneranik ajortuuneranillu’ kisimi eqqartuussisuunera apeqquserpaat. — 1 Moses 2:15-17; 3:1-5.

Sooq piumasani ingerlaannaq pinngitsaaliissutiginngilaa?

’Taavami sooq Guutip piumasani ingerlaannaq pinngitsaaliissutiginngilaa?’ aperiumasinnaavutit. Amerlasuut ajornarpasinngitseqaat. ’Guuti pissaaneqarpoq. Pikitsitsisunut piuneerutsitsinermini atorsinnaavaa,’ oqartarput. (Tussiaat 147:5) Imminulli imatut apereriarit: ’Pissaaneqartumik qutsinnerusumik piumasaminnik pinngitsaaliissuteqartunik nangaanngivillunga akuersissagaluarpunga? Kisermaassilluni naalakkersuisoq akeqqaminik toqutsisoq kusanaagingaassannginnerpara? Inuit silassorissut amerlanerit taamaattunut tunuarsimaartarput.

’Naamik’, oqarsinnaavutit, ’Guuti taamaaliussagalluarpat iliuusia apeqquserneqarnavianngilaq. ’Ilumut? Guutip pissaanerminik atuisarnera apeqquserneqartannginnami? Aperisarput sooq ilaannikkut atorneq ajoraa, soorlu ajortup pineqarnerani. Aamma aperisarput piffissakkut allakkut sooq atortarneraa. Allaat Abrahamip Guutip akeqqaminut pissaanerminik atuinera nalunartissimavaa. Guutip Sodoma suujunnaarsinniarlugu aalajangermat eqqaamajuk. Abrahamip kukkulluni sioorassutigaa inuit ajunngitsut ajortunut ilanngullutik toqunissaat. Oqarpoq: „Qanoq ilillutit iluartut iluaatsullu ilanngullugit toqorarsinnaavigit iluartut iluaatsunut assigiissillugit?“ (1 Moses 18:25) Allaat Abrahamitut eqqortumik isumallit pissaanermik tamakkiisumik tamatuminnga atornerluisoqannginnissaanik qulakkeerisoqarnissaanik pisariaqartitsipput.

Soorunami Guutip Adam, Eva Satanilu ingerlaannaq piuneerussinnaagaluarpai. Inngilinulli allanut siunissamiluunniit pingortitanut iliuusianik kingusinnerusukkut paasinnilersinnaasunut qanoq sunniuteqarsinnaanera eqqarsaatigeriaruk. Guutip naalakkersuisussaanera pillugu apeqqummik eqqissiunnaarutaasumik pilersitsisinnaanngila? Nietzschep allaatigisaatut kisermaassilluni naalakkersuisutut Guutitut imminut akerliusunik naakkittaatsumik toqutsisartutut Guuti unnerluutigineqarsinnaassanngikkaluarpa?

Sooq inuit eqqortuliortinniarlugit pinngitsaaliinnarsinnaanngilai?

’Guutip inuit eqqortuliortinniarlugit pinngitsaaliinnarsinnaasimanngilai?’ aperisinnaavutit. Manna eqqarsaatigeriaruk. Oqaluttuarisaanerup ingerlanerani naalakkersuisut eqqarsartaatsitik inunnut maleruartinniartarsimagaluarpaat. Naalakkersuisut ilaat eqqarsartaatsit aqunniarlugit assigiinngitsunik iliuuseqartarsimapput, immaqa nakorsaatit pilattaanerilluunniit atorlugit, nammineq aalajangiisinnaanermik tunissummik nuanningaartumik arsaarillutik. Nammineq aalajangiisinnaanerput pingaartinngilarput naak allaat atornerlunneqarajukkaluartoq? Naalakkersuisut naalagaasulluunniit tamatuminnga arsaarinninniartut naammagiinnartarpavut?

Guutip inatsisiminik maleruaatitsiniarluni ingerlaannaq pissaanerminik atuinani allatut qanoq iliorsinnaava? Jehova Guuti aalajangerpoq inatsisiminik ajattuisut aqutsinerminik oqartussaaffigineqanngikkallarunik pitsaanerusoq. Tamatuma inuiaat, Adamip Evallu kinguaavi, piffissami killilimmi Guutip inatsisaasa ataanniinnatik nammineersinnaatissavai. Sooq taamaaliorpa? Nalunnginnamiuk piffissap ingerlanerani nalunaajaat akerlilerneqarsinnaanngitsoq pinngorumaartoq, tamatuma uppernarsassavaa naalakkersuinera eqqortuujuaannartuusoq naapertuilluinnartuujuaannartuusorlu, allaat pissaanini killeqanngitsoq atorlugu piumasaminik naammassinnikkaangami aamma taassumunnga pikitsitsinerit tamarmik siusinnerusukkut kingusinnerusukkulluunniit ajunaarnersuarmik kinguneqarumaartut. — 5 Moses 32:4; Job 34:10-12; Jeremia 10:23.

Eqqugaasummi pissuussuteqanngitsut?

’Piffissamimi tamatumani pisuussuteqaratik eqqugaasut?’ aperiumasinnaavutit. ’Inatsisip ilaanik uppernarsaaniaannarluni tamanna ilumut iluatinnaateqarpa?’ Inatsisip ilaa ersernerluttoq uppernarsarniaannarlugu Guutip ajortoq atagallartinngilaa. Akerlianilli inaarutaasumik uppernarsisittariaqarpai pinngortitani eqqissisimaartuassappata nuannaartuassappatalu ilumoortoq tunngaviusoq tassa kisimi oqartussaalluni inatsisimilu pinngitsooratik naalanneqarluinnartariaqarneri.

Eqqaamasariaqakkat ilagaat Guutip nalunngikkaa inuiannut ajoqusiinerup tamatuma qanoq atorunnaarluinnarsinnissaa. Nalunngilaa sivisunerusoq eqqarsaatigalugu anniaatit naalliuutillu atuukkallartinneqarneri ajunngitsumik sunniuteqassasut. Anaanaq qitornaminik nappaammut toqussutigisinnaasaanut akiuussutissaannik nakorsamik kapitinneranat aalajangerlugu tigumminnittoq eqqarsaatigeriaruk. Anaanap kialuunniit qitornami annersinneqarnissaa kissaatiginngilaa. Nakorsap kialuunniit passutani naalliutsikkusunngilaa. Piffissami tassani meeqqap annersinneqarnini pingaartinnavianngilaa kingusinnerusukkulli paasissavaa sooq akuerineqarsimanersoq.

Naalliuttunut tuppallersaataava piviusoq?

Isumaqartoqarsinnaavoq tamakkuninnga ilisimasaqarneq naalliuttunut tuppallersaataavallaanngitsoq. Hans Küng oqarsimavoq naalliuutit atugaanerannik silatusaartumik nassuiaat „perlilersumut nerisassat kemiiat pillugu oqalugiaatitulli naalliuttumut iluaqutaatigisoq“. Aperivoq: „Eqqarsaatersuutit silatuut tamakku naalliunnermik artorsinneqaqqajaasunut ilumut isumallualersitsisinnaappat?“ Inuit Guutip oqaasianik, Biibilimik, sumiginnaasut „eqqarsaatersuutaat silatuut“ tamarmik naalliuttunik isumallualersitsinngillat. Inuit taamattut eqqarsaatersortarneri ajornartorsiummut ilasaataaginnartarput oqaatiginiartaramikku piffissap ingerlanerani qilaliartussat naallinnissaat Guutip piumasarigaa nunarsuarlu qulliliffissatut misilinneqarfissatulluunniit pinngortitaasimasoq. Guutimik mitaatiginninneruvoq!

Biibilip tuppallersaammik piviusumik tunivaatigut. Naalliunnerup atuunnerata nassuiaataanik akerlilerneqarsinnaanngitsumik tuniinnanngilaatigut aammattaarli naalliuutit atuukkallarnerini ajorqusiinerinik iluarseeqqittoqarnissaanik Guutip neriorsuutaanik tatiginnilersippaatigut.

’Suut tamarmik kingumut iluarsivissaat’

Inuit siulliit pikitsitsinngikkallarneratut Guutip pissutsit piumasani malillugu iluarseqqissavai. Inuit attaviitsuullutik aqutsinerinut killiliussaa qanillivoq. Piffissami Jesusimik aallartitsinissaata nalaani inuuvugut ’taassuma qilak inigissagaa ullut suut tamarmik kingumut iluarsivissaat nalliutserlugit, tamakku Guutip itsarsuarmit pruffiitimi iluartut qarnisigut oqaatigai’. — apustilit suliait 3:20, 21.

Jesus Kristus qanoq iliussava? Guutip akerai tamaasa nunamit piissavai. (2 Tásalûníkamiut 1:6-10) Tassaassanngilaq inuup kisermaassilluni naalakkersuisup pillaasarneratut naapertuilluartuliunnginneq. Inuit aqutsinerlunnerisa kingunipiluppassuisa uppernarsarpaat Guuti pissaanini killeqanngitsoq atorlugu qanittukkut piumasani atuutitilerpagu naapertuilluartuliussasoq. (sarĸúmersitat 11:.17, 18) Siornatigut misigineqarsimanngitsumik nunamut ’annikilliornartuussaaq’ Noap nalaani ulersuarmut assingusumik annertunerujussuarmilli. (Matîuse 24:21, 29-31, 36-39) ’Annikilliornartumit angisuumit’ annattut ’inuummarississapput’ Guutip neriorsuutai ’pruffiitit iluartut qarnisigut oqaatigineqartut’ eqquuttut takugunikkik. (apustilit suliait 3:19; sarĸúmersitat 7:14-17) Guutip neriorsuutai suuppat?

Itsaq Guutip pruffiitiisa oqaatigisimavaat sorsunnerup aammillu kuisinerup kingunerisaanik naalliunnerit atuukkunnaassasut. Assersuutigalugu Tussiaat 46:10-mi ima allassimavoq: „Nunarsuarmi tamarmi sorsunnerit soraarsikkumaarpai.“ Pisuussuteqanngitsunik eqqugaasoqarunnaassaaq, alianartumik qimaasoqarunnaarluni sorunnermilu pinngitsaalineqartoqarunnaarluni, aqqunartoqarunnaarluni toqutaasoqarunnaarlunilu. Pruffiiti Esajas ima allassimavoq: „Inuiaat panamik imminnut silugutissaassapput, sakkunik atuinissamut sungiusarunnaassallutik.“ — Jesaja 2:4.

Pruffiitip aamma siulittuutigaa pinerluttuliorneq naapertuilluanngitsuliornerlu pissutigalugit naalliunnerit atorunnaassasut. Ussatit 2:21, 22-mi neriorsuuteqarpoq ’peqqusersuitsut nunami najugaqartuassasut’ anniartitsisullu naalliutsitsisullu ’piiagaassasut’. ’Inuk inoqatiminut ajoqutaasumik pissaaneqarunnaassaaq’. (Nalunaajaasup oqaasii 8:9) Guutiitsut tamarmik naassaanngitsumik piiagaassapput. (Tussiaat 37:10, 38) Kinaluunniit eqqissilluni isumannanngitsumillu naalliuuteqarani inuulissaaq. — Mika 4:4.

Aammattaaq pruffiitit neriorsuipput timikkut misigissutsikkullu nappaatinik pissuteqartut atorunnaassasut. (Jesaja 33:24) Esajas neriorsuivoq tappiitsut, tusilartut, innarluutillit nappaatinillu naalliuutinillu eqqugaasut tamarmik peqqissiumaartut. (Jesaja 35:5, 6) Guutip allaat toqup sunniutai piissavai. Jesus siulittuisimavoq ’iliverniittut tamarmik taassuma nipaa tusarumaaraat anillutillu makikkumaartut’. (Juánase 5:28, 29) ’Qilak nutaaq nunalu nutaaq’ pillugit takorruukkamini apustili Johannes ima oqarfigineqarpoq: ’Guutip nammineq . . . qulliit tamaasa isaannit allarterumaarpai, toqulu peqarunnaassavoq aliasuttoqarunnaarlunilu nilliasoqarunnaarlunilu anniartoqarunnaasavoq.’ (sarĸúmersitat 21:1-4) Eqqarsaatigeriaruk! Anniartoqassanngitsoq, qullilisoqassanngitsoq, nilliasoqassanngitsoq, toqusoqassanngitsoq naalliuttoqassanngitsorlu!

Ajortup atagallartinneqarneranik pissuteqartumik alianartut tamarmik iluarsaanneqassapput. Allaat inuup anniarnermik naalliunnermillu — Guutip siunertarinngisaannagai — eqqaamasinnaasai piivinneqassapput. „Itsaq erloqinerit puigugaassammata . . . pereersut eqqaamaneerutissapput,“ Esajas siulittuivoq. (Jesaja 65:16, 17) Guutip allaqqaammut siunertaatut inuit tamakkiisumik eqqissillutik nuannaarlutillu nunami paratiisiusumi inuunissaat piviusunngussaaq. (Jesaja 45:18) Kisimi oqartussaaneranut tatiginninneq tamakkiisunngussaaq. Inuit naalliuutaat Guutip atuukkunnaarsippagit Nietzschep oqaatiginninneratut ’kisermaassilluni naalagaanngitsutut, sallutuujunngitsutut, peqquserluttuunngitsutut toqutsisartuunngitsutullu’ pissaanerminilli atuigaangami asannittuujuaannartutut, ilisimatuutut naapertuilluartuujuaannartutullu imminut takutippat inuunissaq immikkut pisinnaatitaaffiussaaq. (wE 15/2 97)

[Qupp. 5-imi assiliartaq]

Naalakkersuisut ilaat eqqarsaatinik aqutsiniartarsimapput, aqunniakkamik nammineersinnaatitaanerannik arsaarinnillutik

[Suminngaanneernera]

UPI/​Bettmann

[Qupp. 7-imi assiliartaq]

Naalliuutit atuukkunnaarpata tamarmik inuuneq nuannaarutigilissavaat