Pilluarneq piviusoq sumi nanineqarsinnaava?
INUPPASSUIT isumaqarput nunap piinik ajunngitsuuteqarnikkut pilluarneq piviusoq anguneqarsinnaasoq. Illit qanoq isumaqarfigaajuk? Naak pigisat nuannaalersitsisinnaagaluarlutik pilluarnissamut qulakkeerutaanngillat. Pigisat tungaasigut ilorrisimaarneq uppernermik pissatsitsisinnaanngilaq imaluunniit anersaakkut pisariaqartitsinitsinnik matusisinnaanani.
Jesusip qaqqami oqaluutsimini oqarpoq: „Pilluarput anersaakkut pisariaqartitaqarnerminnik miserratiginninngitsut.“ (Matîuse 5:3, NV) Aammattaaq oqarpoq: ’Mianersoritsi piumatuuleqqunasi, peqangaaraluarluni pigisani inuup inuussutigisarinngimmagit.’ — Lúkarse 12:15.
Inuppassuit pilluarneq anguniartarpaat kinguaassiuutitigut eqqunngitsumik atoqateqartarnikkut ’uinngullu suliaasigut’ allatigut. (Galâsiamiut 5:19-21) Illigussusipilunnut tunniutiinnarneq piviusumik ataavartumillu pillualersitsineq ajorpoq. Piviusumik oqaatigissagaanni taamaaliortut Guutip naalagaaffia kingornutissanngilaat. — 1 Korintumiut 6:9, 10.
Allat imminut ataqqinerulernikkut pilluarnermik angusiniarnerminni imminnuinnaq eqqarsaatigisunngortarput. Atuakkanik atorniartarfiit atuagaarniarfiillu inuttut nammineq qanoq ineriartortissinnaanerluni ilitsersuutinik ulikkaarluinnarput, kisiannili atuagassiat taama ittut inuit pilluarnermik ataavartumik tunisinnaasimanngilaat. Sumimi taava pilluarneq piviusoq nanineqarsinnaava?
Pilluarneq piviusoq angussagutsigu paasisariaqarparput anersaakkut pisariaqartitsineq inunnguuseralutigu. Jesus oqarpoq: „Pilluarput anersaakkut pisariaqartitaqarnerminnik miserratiginninngitsut.“ Soorunami naammanngilaq tamatuminnga pisariaqartitsinerput ilisimaannassallugu, aammattaaq qanoq iliuuseqarfigisariaqarparput. Assersuutigalugu takorloorneqarsinnaavoq marathonimik arpattartoq arpareerluni timip pisariaqartitaanik imermik pinngitsooruni qanoq pisoqassanersoq. Erniinnaq imermik amigaateqarluni tamatumalu kingunerisaasa ilungersunartut ilaannik malussassannginnerpa? Anersaakkut nerisassat pisariaqartitavut pinngitsoorutsigik tamatumunnga assingusumik anersaakkut sanngiilliartuinnarsinnaavugut tamatumalu kingunerissavaa nuannaarnitta pilluarnittalu annikillinerat.
Jesusip anersaakkut pisariaqartitaqarnini paasilluinnarsimavaa akuttunngitsumillu Guutip oqaasia atuaqqissaartarsimavaa eqqarsaatigeqqissaartarlugillu. Allakkani Illernartuni immikkoortut naniuminartittarsimavai atuaruminartittarsimallugillu allallu taamaaliornissaannik ilinniartittarsimallugit. (Lúkarse 4:16-21; naleqqiuguk Evfisumiut 4:20, 21.) Aamma Jesusip Guutip piumasaanik iliorneq neqissatut assersuutigisimavaa. Guutip piumasaanik iliornini nuannaarutigingaarsimavaa. — Juánase 4:34.
Pilluarneq piviusoq anguneqarsinnaanngilaq nunap piinik ajunngitsuutinik pissarsinikkut, aammattaaq pillualersoqarsinnaanngilaq uinngup pilerissusiinik naammassinninnikkut. Pilluarneq piviusoq uummammik pivoq uppernermik ilumoortumik Jehova Guutimullu ajunngitsumik attaveqarnermik tunngavilik. Tussiaasiortoq David naleqqulluartumik ima ersersippaa: „Pilluarput inuiaat [Jehovamik] Guuteqartut!“ — Tussiaat 144:15b. (wE 15/3 97)
[Qupp. 29-mi assiliartaq]
Upperneq Guutimullu ajunngitsumik attaveqarneq piviusumik pillualersitsisarput