Eqqissineq piviusoq — kia pilersissavaa?
„Nunarsuarmi tamarmi [Jehovap] sorsunnerit soraarsikkumaarpai.“ — TUSSIAAT 46:10.
1. Esajasip siulittuutaani eqqissinissamik neriorsuut tupinnartoq suna nanineqarsinnaava?
„ILUARNERUP inerititarissavaa eqqissineq, innarluissutsillu pissarsiaritissavai isumakuluuteqannginneq tatiginninnerlu soraarfeqanngitsut. Taava inuiaqatikka najugaqalissapput najukkami eqqissinartumi, inigisani isumannaatsuni ineqarfinnilu alianaatsuni isumakuluuteqarfiunngitsuni.“ (Jesaja 32:17, 18) Neriorsuut nuanningaartoq! Eqqissinerup piviusup atuutilernissaa Guutip neriorsuutigaa!
2, 3. Eqqissineq piviusoq nassuiaruk.
2 Eqqissineq piviusoq suugami? Sorsuttoqanngiinnaraangat eqqissineq atuuttarpa? Eqqissineq tassaannaava piffissaq tullianik sorsoqqinnissamut piareersarfik? Imaluunniit eqqissineq piviusoq takorluuinerinnaava? Apeqqutit tamakku tatiginartumik akineqartariaqarput. Siullermik, eqqissineq piviusoq takorluuinerinnaanngilaq. Eqqissinerup Guutip neriorsuutigisaata silarsuarmi maani inuit takorloorsinnaasaat akimorujussuarpaa. (Jesaja 64:4) Tassaavoq eqqissineq kipitinneqartussaanngitsoq; atuuttuartussaq! Inunnut immikkut pisinnaatitaasunuinnaanngitsoq, aammali qilammi nunarsuarmilu, inngilinut inunnullu, atuutissaaq. Inunnut inuiannit tamaneersunut, assigiinngitsunik qalipaatilinnut nagguilinnullu tamanut, atuutissaaq. Killeqarfinnit, akornutissanit ajorsartitaanermilluunniit sunilluunniit unitsinneqarsinnaanngilaq. — Tussiaat 72:7, 8; Jesaja 48:18.
3 Eqqissineq piviusoq ullut tamaasa atuutissaaq. Eqqissineq taama ittoq atuutilerpat ullaat tamaasa itertassaagut nakuuserfigineqarnissamik sorsuttoqarnissaanilluunniit annilaangassuteqarnata. Nammineq, meeqqatta ernuttattaluunniit siunissaannik isumakuluuteqarnata. Isumakkut eqqissineqarluinnarneq pineqarpoq. (Kulorsamiut 3:15) Pinerluttoqaqqinngisaannassaaq. Nakuusertoqaqqinngisaannassaaq. Ilaqutariit avissaartuukkunnaassapput. Inuit inissaaleqiunnaassapput. Qimaasoqaqqinngisaannassaaq. Kaanneq qiianerlu naalliuutaajunnaassapput. Pakatsineq ernumanerlu atuukkunnaassapput. Aap, eqqissineq Guutimeersoq silarsuarmik nappaateqarfiunngitsumik, anniaateqarfiunngitsumik, aliasuffiunngitsumik toqullu atuuffiginngisaanik nassataqassaaq. (sarĸúmersitat 21:4) Neriuuterput asseqanngilluinnarpoq — eqqissinerup piviusup naassaanngitsumik nuannaarutigisinnaalernissaa! Eqqissineq pilluarnerlu taama ittut kipisaffiginnginnerpavut? Tamakku qinnutigalugillu sulissutigissannginnerpavut?
Inuiaat asuliinnaq eqqissinermik pilersitsisimapput
4. Eqqissineq anguniarlugu inuiaqatigiit qanoq iliorsimappat, sunillu kinguneqartumik?
4 Ukiut hundredelikkuutaat ingerlaneranni inuit ataasiakkaat naalagaaffiillu tamarmiusut eqqissinissaq oqallisigisimavaat eqqissinissamillu isumaqatigiissutinik atsiugaqartarsimallutik. Tamanna kinguneqarluarsimava? Ukiuni kingullerni 80-ini naalagaaffinnik immikkooqatigiinnilluunniit sorsuuttoqartuaannarsimavoq. Oqaatigilluaannarlugu, eqqissineq inunnit qimaasimavoq. Sooruna naalagaaffiit akornanni eqqissinissamik pilersitsiniaraluarnerit tamarmik iluatsinngitsoortuaannartut? Sooruna nammineerluta eqqissineq — eqqissineq piviusoq ataavartorlu — atuutilersissinnaanngikkipput?
5. Sooq inuiaat eqqissineq atuutilersissinnaasimanngilaat?
5 Naatsumik oqaatigalugu, inuit eqqissineq piviusoq eqqortumut ujarsimanngimmassuk. Satan Diaavulumit sunnerneqarlutik peqatigiiffiit, inuit namminneq kukkussutiminnik sanngiissutiminnillu — ataqqinaateqarumatussutsiminnik, piumatussutsiminnik pissaaneqarumatussutsiminnillu — ingerlanerliortittakkatik, pilersissimavaat. Ilinniagartuunik siunersiuisoqartarsimavoq, ataatsimiititaliarsuarnik pilersitsisoqartarsimalluni immikkullu ilisimasalinnik isumalioqatigiisitsisoqartarsimalluni. Misiliinerigaluilli tamarmik naqisimanninnermik aseruinermillu suli annerusunik kinguneqaannartarsimapput. Sunut inuit eqqissinissamik ujartuisimappat?
6, 7. (a) Folkeforbundi sunik angusaqarsimava? (b) FN sunik angusaqarsimava?
6 1919-imi inuit isumalluaatigilersimagaluarpaat Folkeforbund-ip eqqissineq ataavartoq pilersikkumaaraa. Isumalluarnerli tamanna 1935-mi aserorneqarpoq, Mussolinip sakkutuui Etiopiamut isaammata, 1936-milu Spaniami innuttaasut imminnut sorsuutilermata. 1939-mi sorsunnersuup aappaa aallartippoq, Folkeforbund-ilu puiorneqarpoq. Eqqissinermik taaneqartoq ukiunik 20-unngitsunilluunniit sivisussuseqarpoq.
7 Taavami FN eqqissineqartitsisimava? Taamatut oqartoqarsinnaanngilaq. 1945-mi FN-ip pilersinneqarneraniilli sorsunnerit sakkuaannerillu 150-it ingerlanneqarsimapput! Tupinnanngilaq Gwynne Dyer, Canadamiu sorsunnernik pissutaasunillu misissuisimasoq allassimammat FN tassaasoq ’peqquneqanngitsumik aallaaniartartut uumasunik paarsisunngortitat peqatigiiffiat, tassaananilu peqatigiiffik iluartoq’, aamma ’oqqarissaarfik pissaaneqanngitsoq’. — Naleqqiuguk Jeremia 6:14; 8:15.
8. Naak eqqissinissaq oqallisigigaluarlugu naalagaaffiit qanoq iliorsimappat? (Jesaja 59:8)
8 Naalagaaffiit eqqissinissamik oqalunniannguarlutik sakkussianik nutaanik nassaartortuarlutillu sanaartortuarsinnarput. Nunat eqqissinermik ataatsimeersuartitsisartut aamma sakkussianik niuernikkut siulliunerusarput. Nunani tamakkunani sakkussialiorneq inuit toqutaanerannik kinguneqartumik siuarsarneqartarpoq — ilaatigut qaartartut nunaannarmi atorneqartartut, qaartartut ukiut tamaasa meeqqanik inersimasunillu sakkutuujunngitsunik 26.000-nik toqutsisartut. Piumatussutsip peqquserlunnerullu sakkussialiorneq ingerlaavartippaat. Akiliilluni peqquserluttussanngortitsineq ilaavoq. Politikerit ilaat tassuunakkut imminnut pisuunngortissimapput.
9, 10. Silarsuarmi immikkut ilisimasallit sorsunnerit inuiaallu ilungersorneri eqqarsaatigalugit suna malugisimavaat?
9 1995-imi decembarimi fysikerip Nobelillu eqqissinermik nersornaasiuttagaanik nersornaasigaasimasup Joseph Rotblatip inuiaqatigiit kajumissaarpai sakkussialiornikkut qaangerniunnertik unitseqqullugu. Ima oqarpoq: „[Sakkussialiornikkut qaangerniunneq nutaaq] pinngitsoortinneqarsinnaavoq aatsaat sorsunnerit atorunnaarsinneqarpata.“ Inuiaqatigiit taamaaliornissaat ilimanarsoraajuk? Ukiuni 1928-p kingornani nunat 62-it isumaqatigiissut Kellogg-Briand-mik taaneqartoq atsiorsimavaat, taamaalillutik nalunaarput isumaqatigiinngissutsit aaqqinniarlugit sorsukkumanatik. Sorsunnersuup aappaata takutilluarpaa isumaqatigiissut tamanna naleqanngivissoq.
10 Aap, inuiaat oqaluttuarisaaneranni sorsunnerit tamatigut akornutaasimapput. Gwynne Dyerip allassimanera naapertorlugu „inuiaat atugartuussusianni sorsunnerit tunngaviusumik inissisimaffeqarput, oqaluttuarisaanerallu atugartuussutsip oqaluttuarisaaneratulli sivisutigaluni“. Aap, atugartuussutsit naalagaaffissuillu tamarmik sakkutooqarnikkut pingaarnersaasoqartarsimapput, sakkutoorpassuaqartarsimallutik, tusaamasaassutigisaminnik sorsuuteqartarsimallutik, sakkutuunut ilinniarfissuaqartarsimallutik ataqqineqartunik aamma sakkussiarpassuaqartarsimallutik. Ukiulli hundredelikkuutaat inuuffigisavut sorsunnernik, aseruinikkut aamma toqoraanikkut, ilisarnaateqarnerpaajupput.
11. Pingaartoq suna silarsuarmi siuttuusut eqqissinissamik noqqaassuteqarnerminni sumiginnarsimavaat?
11 Nalunanngeqaaq silarsuarmi siuttuusut oqaatsit Jeremia 10:23-mi allassimasut taama ilumoortigisut sumiginnarsimagaat: „[Jehova], nalunngilara inuup ingerlavissani nammineq aalajangigassarinngikkaa, angutillu aalajangigassarinngikkai qanoq ingerlanissani alloriartarnissanilu.“ Aap, silarsuarmi siuttut Guutimik sumiginnaajuartillutik eqqissinermik piviusumik pilersitsinavianngillat. Tamannali ima paasisariaqarpa innuttaaqatigiit sorsunneq pinngitsoortissinnaanngikkaat? Eqqissineq — eqqissineq piviusoq — tassaannaava takorluugaq piviusunngortinneqarsinnaangitsoq?
Sorsunnernut pissutivik
12, 13. (a) Sorsunnernut pissutiviusoq takussaanngitsoq suna Biibilimi ersersinneqarpa? (b) Satanip qanoq ililluni inuiaat silarsuup ajornartorsiutaanut aaqqissutissatuamit allamut saatsittarpai?
12 Apeqqutit tamakku akissagutsigik sorsunnernut pissutaasut paasisariaqarpavut. Biibilimi ersarissumik takutinneqarpoq inngili pikitsitsisoq Satan pileqqaarnerminit ’inunnik toqutsisuusoq’ ’sallutuusorlu’ aamma ’silarsuaq tamaat ajortup pissaaneqarfigigaa’. (Juánase 8:44; 1 Juánase 5:19, NV) Anguniakkani anguniarlugit qanoq iliorsimava? 2 Korintumiut 4:3, 4-mi ima allassimavoq: ’Iivangkiiliuli oqaluutigisarput taalutsersimaguni tammariartortunut taalutsersimassavoq; taakkunani uppinngitsut isumaat silap matuma guutiata tappiillisippai, Kristusip tassa Guutip assingata naalannassusianik iivangkiiliup qaamangaarnera taakkununnga qaamaqqunagu.’ Satanip sapinngisani tamaasa iliuuserisarpai inuiaat Guutip naalagaaffianit, silarsuup matuma ajornartorsiutaanut tamanut aaqqiissuutissatuamit, allamut saatsinniarlugit. Inuit tappiillisittarpai allamullu saatsittarlugit innuttaaqatigiissutsikkut, naalakkersuinikkut upperisarsiornikkullu isummat avissaartuutaasut Guutip naalagaassusianit pingaarnerusutut isikkoqalersillugit. Assersuutigalugu ukiuni makkunani nunarsuaq tamakkerlugu inuiaqatigiissutsimik pingaartitsivallaarneq eqqaaneqarsinnaavoq.
13 Satan Diaavulup inuiaassutsimik naggueqatigiissutsimillu pingaartitsivallaarneq, tassa inuiaqatigiit ataatsit allanit pingaarnerunerannik isuma, siuarsarpaa. Uumissuineq ukiuni hundredelippassuarni naqisimaneqarsimagaluartoq maanna uumaqqippoq sorsunnernik nutaanik kingunilimmik. Federico Mayor, UNESCO-mi generaldirektøriusoq tamanna pillugu mianersoqqusilluni oqarsimavoq: „Allaat nunani akaarinniffiugaluartuni takornartanut qununeq ersarinnerulersimavoq, assigiinngisitsisoqarunnaarsimagaluartorlu maanna malunnarseqqipput.“ Sunik kinguneqarpa? Jugoslaviaasimasumi naakkittaatsumik toqoraanerit Rwandamilu naggueqatiginngisanik toqoraannersuit tamatumunnga ersiutaapput marluk nutaarsiassani eqqaaneqartartut.
14. sarĸúmersitat 6:4-mi sorsunnerit tamakkualu ullutsinni sunniuteqarneri qanoq allaatigineqarpat?
14 Biibilimi siulittuutigineqarpoq pissutsit aaqqissuussaanerata matuma naggatissaa qanillippat, hesti aappaluttoq sorsunnermut assersuutaasoq nunarsuarmi angalajumaartoq. sarĸúmersitat 6:4-mi allassimavoq: ’Taavalu qimuttuarsuk [hesti] aappaluttoq saqqummerpoq; qaanilu issiasoq tunineqarpoq nunamiut eqqissivissaaruteqqullugit toqoraateqatigiissaqqullugillu; panamillu angisuumik tunineqarpoq.’ Aap, 1914-miilli takusimavarput hestersup assersuutaasup taassuma eqqissineq peersimagaa, inuiaqatigiillu sorsuttuarsimapput.
15, 16. (a) Upperisarsiornerit qanoq ilillutik sorsunnernut toqoraanernullu akuliuttarsimappat? (b) Jehovap upperisarsiornerit iliuuserisimasaat qanoq isumaqarfigai?
15 Sorsunnernut toqoraanernullu tamakkununnga upperisarsiornerit peqataanerat sumiginnarneqartariaqanngilaq. Inuiaat oqaluttuarisaanerat aammik kuisinertalik pingaartumik upperisarsiornerup ilumuunngitsup tammartitsineranik pissuteqarsimavoq. Upperisarsiornermik ilisimatooq katuuliusoq Hans Küng allassimavoq: „Miserratigineqarsinnaanngilaq [upperisarsiornerit] ajortumik aserornartumillu sunniuteqartarsimammata sulilu annertuumik sunniuteqartuarlutik. Taakku pissuullutik akiuunnerit, sorsunnerit, aap, ’upperisarsiornikkut sorsunnerit’ aallartittarput; . . . aamma sorsunnersuit marluk pillugit taama oqartoqarsinnaavoq.“
16 Aammik kuisinerni tamakkunani upperisarsiornerup ilumuunngitsup peqataanera Jehova Guutip qanoq isumaqarfigaa? Upperisarsiornermut ilumuunngitsumut atatillugu Guutip eqqartuussutaa sarĸúmersitat 18:5-imi atuarneqarsinnaavoq, oqaluttuarisaanerullu ersersippaa eqqartuussut tamanna patsisissaqarluartoq. ’Ajortaami qilammut apissipput, iluaatsuliornerilu Guutip eqqaavai,’ taama allassimavoq. Aap, upperisarsiornerup ilumuunngitsup ima naalakkersuinikkut pissaanillit akisussaaqatigilersimatigai allaat aammik kuisinera ’qilammut apississimalluni’. Ajortai ima amerlitigilersimapput tamanna Guutip ilaginnaannarsinnaajunnaarlugu. Erniinnaq eqqissinissamut piviusumut akornutaasoq tamanna Guutip peerluinnassavaa. — sarĸúmersitat 18:21.
Eqqissinissamut aqqut
17, 18. (a) Sooq eqqissineq ataavartoq takorluuinerinnaanngila? (b) Jehovap eqqissineq piviusoq atuutilersinniarlugu qanoq ilioreersimava?
17 Taamaattumik manna apeqqutaalerpoq: Peqatigiiffiit FN-itut ittut ikiortigalugit eqqissinermik piviusumik ataavartumillu pilersitsisoqarsinnaanngippat, taava qanoq ililluni eqqissineq piviusoq pilersinnaassava, kialu pilersissavaa? Eqqissinerup naassaanngitsup piviusunngornissaanik upperinninneq sianiitsuliornerinnaava? Naamik, kina eqqissinermik ilumut pilersitsisinnaanersoq paasigutsigu tamanna upperissallugu sianiitsuliornerunavianngilaq. Taavami kina taamaaliorsinnaava? Tamanna Tussiaat 46:10-mi akineqarpoq: „[Jehovap] nunarsuarmi tamarmi sorsunnerit soraarsikkumaarpai, pisissit nallorumaarpai qalugiusallu aserorterlugit, qamussuit sorsuutit ikikkarumaarpai.“ Jehovap qanoq ililluni sorsunnerit soraarsissavai eqqissinerlu piviusoq pilersillugu? Pisoq aallarteriikkani aqqutigalugu! Qanoq ililluni aallartitani? Pisoq tamanna aallartippaa 1914-imi Kristus Jesus naalagaaffimmini kunngiusussavittut ivertikkamiuk, oqaluttuarisaanermilu eqqissinermut perorsaaniarluni suliniarnersuit annersaat aallartikkamiuk. Jesajap allagai, kapitali 54-imi, versi 13-imi, ima siulittuuteqarpoq: „Qitornatit tamarmik uannit, [Jehovamit] ajoqersorneqassapput, eqqissisimangaarlutillu inuussapput.“
18 Siulittuummi tassani sunniisoq sunniutaasorlu pillugit najoqqutaq saqqummiunneqarpoq. Allatut oqaatigalugu: Sunniutit tamarmik sunniisoqarput. Tassani Jehovamit ajoqersorneqarneq sunniisuuvoq. Sunniutaasoq tassa inuit, qanorluunniit sorsukkumatutigisimagaluartut, eqqissinermik nuannarisaqalernerat Guutimillu eqqisseqateqarnermik nuannaarutiginnilernerat. Eqqissinermik nuannarisaqalissutigisaannik uummataanni allanngortoqarpoq. Ajoqersuineq tamanna, inuit isumaannik uummataannillu allanngortitsisartoq, ullumikkut siaruariartorpoq, inuit millionilikkuutaat „Naalagaq eqqissisitsisoq“ Jesus Kristus maligassamittut malilermassuk. — Jesaja 9:6.
19. Jesusip eqqissinermik piviusumik sumik ilinniartissimavaatigut?
19 Eqqissineq piviusoq pillugu Jesusimit suna ilikkarparput? Naalagaaffiit akornanni eqqissinissaq piinnarnagu, aammali inuit akornanni eqqissineq ilinniartitsissutigaa, aammalu ilukkut eqqissineq ilerasuuteqannginnermit pisoq ilinniartitsissutigalugu. Juánase 14:27-mi Jesusip ajoqersukkani ima oqarfigai: ’Eqqississummik qimatsivigaassi; eqqississummik uanga pinnik tunivassi; silamiut ileqquattut pinngilassi. Uummatisi annilaanngikkilit naasaangalernatillu.’ ’Eqqissinermik silamiut ileqquattut’ inngitsumik Jesusip tunisinera qanoq paasisariaqarpa?
20. Qanoq ililluni Jesusip eqqissineq piviusoq pilersissavaa?
20 Aap, siullermik, eqqissineq Jesusimeersoq Guutip naalagaaffia pillugu taassuma tusarliussaanut qanimut attuumassuteqarpoq. Nalunngilaa naalagaaffiup qilammiittup naapertuilluartup tamatuma, Jesusimik namminermik naalakkersueqataasunillu 144.000-inik siuttoqartup, sorsunnerit sorsunnissamillu kajumissaarisut tamaasa peersikkumaarai. (sarĸúmersitat 14:1, 3) Nalunngilaa Guutip naalagaaffiata pissutsit eqqissinartut paratiiserpalaartullu, kingorna pinerluttumut sanimini toqunneqartumut eqqaasani, atuutilersikkumaarai. Soorlu eqqaamagipput Jesusip angut taanna naalagaaffimmi qilammiittumi inissaanik neqeroorfiginngilaa, imali oqarfigalugu: „Ilumut, ullumi oqarfigaakkit: Paratiisimeeqatigiumaarparma.“ — Lúkarse 23:43, NV.
21, 22. (a) Neriuut tuppallernangaartoq suna eqqissinerup piviusup ilagaa? (b) Pilluaqqussutissaq tamanna misigiumallugu qanoq iliortariaqarpugut?
21 Aammattaaq Jesusip nalunngilaa naalagaaffini aliasuttunut tuppallersaatissiissasoq, upperippanni. Eqqissinerup taassumanngaanneersup ilagaa makititaanissamik neriuut, neriuut uagutsinnik isumalluartitsinissamut tupinnaqisumik kimilik. Juánase 5:28, 29-mi oqaasii qiimmaallannartut eqqaamakkit: ’Tamanna tupigusuutigissanngilarsi, ullut nalliukkumaarmata, taava iliverniittut tamarmik taassuma nipaa tusarumaarpaat; anillutillu makissapput ajunngitsuliorsimasut inuunermut pisussaallutik, ajortuliorsimasulli eqqartuussivimmut pisussaallutik.’
22 Taamanikkornissaanut qilanaarpit? Qanigisavit ilaannik toqukkut annaasaqarnikuuit? Takoqqikkusukkaluarpigit? Taamaappat eqqissineq Jesusip tunniussaa tiguniaruk. Lazarusip qatanngutaatut Martatut uppissuseqarit, taanna Jesusimut ima oqarpoq: ’Nalunngikkaluarpara ullut naggatissaanni makiffissami [Lazarus] makikkumaartoq.’ Eqqaamaviuk taamatut oqareermat Jesus Martamut qanoq oqartoq? ’Uanga makissutaallungalu inuussutaavunga; uannut uppertoq naak toqugaluaruni inuussavoq; inuusorlu uannut uppertoq kinaluunniit toqunaviassanngilaq, tamanna uperaajuk? ’ — Juánase 11:24-26.
23. Suna pillugu Guutip oqaasianik ilisarsineq immikkut pingaaruteqarpa eqqissineq piviusoq anguniassagaanni?
23 Illittaaq tamanna upperisinnaavat. Qanoq ilillutit? Upperineqarsinnaavoq upperneq Guutip oqaasii pillugit eqqorluartumik ilisimasaqarnermik tunngaveqarpat. Malugiuk eqqorluartumik ilisimasaqarnissap, tassa eqqorluartumik ilisarsinissap, pingaaruteqassusia Paulusip qanoq erseqqissaraa: ’Tamanna pillugu uaguttaaq taamanili tusaqqaaratta soraanngilagut qinnuttarlusi qinusarlutalu [piumasaanik] ilisarsisorsuanngoqqullusi tamanik ilisimalersillusi anersaallu piinik sianilersillusi, tassa [Jehovami] ileqqorisariaqartoq naapertorlugu tamatigut iluarisassaanik saqilluaqqullusi, ajunngitsulianillu tamanik kingunissioqqullusi Guutimillu ilisarsiartoqqullusi.’ (Kulorsamiut 1:9, 10) Eqqorluartumik ilisarsinerup tamatuma qularunnaarsissavaatit eqqissinermik piviusumik pilersitsisussaq tassaasoq Jehova Guuti. Aamma paasitissavaatit maannakkut qanoq iliortariaqartutit tussiaasiortutut ima oqarsinnaajumallutit: „Eqqissillunga innassaanga sinilerlungalu, illit [Jehova] kisivit eqqissinartumik qasuersaartikkamma.“ — Tussiaat 4:9. (wE 15/4 97)
Nassuiarsinnaavigit?
□ Sooq inuiaat eqqissinermik atuutilersitsisinnaasimanngillat?
□ Sorsunnerit sunarpiaq pissutigaat?
□ Eqqissineq ataavartoq sooq takorluuinerinnaanngila?
□ Eqqissineq piviusoq sumik pilerfeqarpa?
[Qupp. 8-mi assiliartaq]
Eqqissineq piviusoq takorluuinerinnaanngilaq. Guuti tamatuminnga neriorsuivoq
[Qupp. 10-mi assiliartaq]
1914-miilli hiistimi aappaluttumi assersuutaasumi issiasoq nunarsuarmi eqqissineerutsitsisimava?
[Qupp. 11-mi assiliartaq]
Upperisarsiornerit FN-ilu eqqissinermik pilersitsisinnaappat?
[Suminngaanneernera]
FN-imit assiliaq