Atuartartut apeqqutaat

Oqartoqarsinnaava oqaatsimik eqqarleriit-mik Matîuse 24:34-mi atorneqartumik paasinninnitta ilimanarnerulersikkaa naggatissaq aatsaat siunissami ungasissumi pisussaasoq?

Naamerluinnaq. Akerlianilli tamanna ilimasunnerulissutigiinnartariaqarparput. Sooq?

Soorlu Vagttårnet-imi 1. novembari 1995-imoortumi ersarissumik nassuiarneqareersoq Jesusip oqaaseq ’eqqarleriit uku’ taamanikkut inuit ajortut, nalimini inuusut, pillugit atorpaa. (Matîuse 11:7, 16-19; 12:39, 45; 17:14-17; apustilit suliait 2:5, 6, 14, 40) Tassa piffissaq aalajangersimasoq piffissarluunniit aalajangersimasumik sivisussusilik pillugu atunngilaa.

Vagttårnet-imi normumi tassani „Atuartartut apeqqutaat“ oqaaseq ’eqqarleriit’ piffissarlu pillugit pingaartut marluk sammineqarput: „Oqartoqarsinnaanngilaq eqqarleriit, imaluunniit kinguaariit, tassaasut ukiut aalajangersimasumik amerlassusillit“, aamma „kinguaariinnut ilaasut piffissami sivisoorujussuunngitsumi inuusarput“.

Eqqarsaatiginerulaarutsigu paasissavarput oqaaseq ’kinguaariit’ taamatut isumaqartillugu atortaripput. Assersuutigalugu ima oqartoqarsinnaavoq: ’Sakkutuut kinguaariinnut Napoleonip nalaani inuusunut ilaasut timmisartunik atombombinillu ilisimasaqanngillat.’ Taamatut oqaraangatta eqqarsaatigisarpavut sakkutuut ukiumi Napoleonip inuuviani inunngortut? Imaluunniit sakkutuut Napoleon sioqqullugu toqusut kisiisa eqqarsaatigisarpavut? Naamik, ilaa? Tamatumunngalu atatillugu oqaaseq ’kinguaariit’ atorneqaraangami ukiut aalajangersimasumik amerlassusillit aalajangersimasut eqqarsaatigineqarneq ajorput. Taamaattorli oqaaseq taanna atorparput Napoleonip nalaani ukiut amerlasoorsuunngitsut, hundredelikkuutaajunngitsut, pillugit.

Taamatuttaaq ippoq Jesusip Uuliap qaqqaaniitilluni siulittuummini oqaasiinik paasinninnerput. Pissutissaqarluarpugut isumaqassalluta pissutsit aaqqissuussaanerata matuma naggatissaa qanillisoq. (Matîuse 24:32, 33) Eqqaamajuk sarĸúmersitat 12:9, 10 naapertorlugu Satan nunarsuup qanittuanut iginneqarsimasoq Guutip naalagaaffia qilammi 1914-imi pilersinneqarmat. Allassimavoq ’kamattorsuusoq’. Sooq kamattorsuua? ’Piffissakissutsi nalunnginnamiuk’. — sarĸúmersitat 12:12.

Taamaattumik naleqquttorujussuuvoq Vagttårnet-imi 1. novemberimoortumi qulequtaaraqarmat ima: ’Eqqumagitsi!’ Immikkoortumi tamatuma kingulianiittumi naleqquttorujussuarmik allassimasoqarpoq ima kalaallisuunngortillugu nipeqartumik: „Pisussat qaqugorpiaq pinissaat ilisimasariaqanngilarput. Akerlianilli eqqumaniarluta iliuuseqartariaqarpugut, aalajaatsumik uppissuseqalerniartariaqarluta, Jehovamullu kiffartornitsinni ulapputeqartuarluta, ullormik aalajangersimasumik tikkuaaniarsareqinata.“ Taava Jesusip oqaasii issuarneqarput: ’Misissoritsi, eqqumaniarlusilu qinugitsi, taamaaffissaa qaqugu nalliussasoq nalugassiuk. . . . Taamaattumik eqqumagitsi, . . . Ilissinnulli oqaaserisara tamanut oqaaseraara: eqqumagitsi.’ — Mákorse 13:33, 37. (wE 1/5 97)