Uppernerput erlinnartoq aalajangiutsigu!
’Uatsitut qujanartumik uppersuseqalersitanut.’ — 2 PÎTRUSE 1:1.
1. Jesusip apustilini qanoq mianersoqquai, Peterili qanoq oqarpa?
TOQUNISSI aqaguttoq unnukkut Jesus oqarpoq apustilimi tamarmik qimakkumaaraanni. Ilaalli, tassa Peter, imminut tatigerpaloqaluni akerliliivoq: ’Tamakkerlutik mamiatsaatigigaluarpatsit, uanga mamiatsaatiginngisaannassavakkit!’ (Matîuse 26:33) Jesusilli nalunngilaa pissutsit qanoq ittorpiaasut. Tamannalu pissutigalugu pisumi tassani Peterimut ima oqarpoq: ’Uangali qinnuppakkit uppersutsit soraaqqunagu; qaqugulu saakkuit qatanngutitit nakussatsikkit.’ — Lúkarse 22:32.
2. Suup takutippaa naak Peter imminut tatigerpalukkaluarluni uppernermigut sanngiitsoq?
2 Peterip uppersutsini eqqarsaatigalugu imminut tatigigaluaqisup unnummi tamatumanerpiaq Jesus miserratigaa. Allaat pingasoriarluni misiarluinnarpoq Jesus ilisarisimannginnerarlugu. (Matîuse 26:69-75) ’Qatanngutiminik nakussatsitseqqulluni’ Naalakkami oqaasii ’saakkami’ eqqaallattaajuarsimassavai. Taamatut kajumissaarneqarnini Peterip inuunermi sinnerani malippaa, tamannalu allagaani marlunni Biibilimiittuni takuneqarsinnaavoq.
Sooq Peter allassimasoq
3. Sooq Peterip allakkani siulliit allassimavai?
3 Peterip allakkani siulliit Jesusip toquneranit ukiut 30-t missaat qaangiuttut allappai. Qatanngutinut Pontusimi, Galatiami, Kappadokiami, Asiami Bityniamilu, ullumikkut Tyrkiap avannaata kitaatalu tungaaniittuni, nunalinnut allagarai. (1 Pîtruse 1:1) Peterip allaffigisai qularnanngivissumik juutinik ukiumi 33-mi piinsip ulluani kristumiunngorsimasunik ilaqarput. (apustilit suliait 2:1, 7-9) Ilaat amerlasuut tassaapput juutiunngitsut akerlilersuisunit ’innikkut misilinneqartartut’. (1 Pîtruse 1:6, 7; 2:12, 19, 20; 3:13-17; 4:12-14) Tassa Peterip qatanngutit taakku allaffigai qiimmassarniarlugit. Siunertaraa ’uppernikkut anguniakkaminnik angusinissaannik, tarnaatalu annannissaannik’ ikiornissaat. Taamaattumik naggataatigut ima kajumissaarpai: ’Diaavulu assortorsiuk uppernikkut aalajangerlusi.’ — 1 Pîtruse 1:9; 5:8-10.
4. Sooq Peterip allakkami aappaat allassimavai?
4 Kingorna Peterip kristumiut taakku allaffigeqqippai. (2 Pîtruse 3:1) Sooq? Suli annerusumik ulorianartorsiortinneqalersimammata. Inuit kanngunartumik ileqqullit ileqqupilutik minguttuut uppertut akornanni siaruarterniarsaraat tammartitsiniaallutillu. (2 Pîtruse 2:1-3) Kristumiunillu illaruaatissanngortitsiniartoqarnissaa Peterip mianersoqqussutigaa. Allakkamini siullermi allassimavoq ’suut tamarmik naggatissaat qallilersoq’, maannalu tamanna mitallersumik assortorneqalersimagunarpoq. (1 Pîtruse 4:7; 2 Pîtruse 3:3, 4) Peterip allagaasa aappaat misissorutsigik paasissavarput qanoq allakkat qatanngutit uppernikkut aalajaattuaannarnissaminnut nakussatsissutigisimagaat. Allaaserisami siullermi matumani Pîtrusip agdlagaisa áipait-a kapitaliisa siullersaat sammissavarput.
Kapitalimik siullermik siunertaasoq
5. Peterip qanoq ililluni allaffigisani ajornartorsiutinut samminiakkaminut piareersarpai?
5 Peterip ingerlaannaq ajornartorsiutit annertuut eqqartulinngilai. Aallaqqaasiutigaluguli atuartussat kristumiunngoramik pigilersimasaminnik pingaartitsinerulersinniarlugit kajumissaarpai. Guutip neriorsuutaanik nuanningaartunik Biibilimilu siulittuutit tatiginassusiannik eqqaasippai qaqqami Jesusip allatut isikkoqalersitaaneranik, Kristusimik Naalagaaffiup pissaanerani tikiuttumik nammineq takorruuisitaasimanerminik, oqaluttuunneratigut. — Matîuse 17:1-8; 2 Pîtruse 1:3, 4, 11, 16-21.
6, 7. (a) Peterip allagaani aallaqqaasiut sumik ilinniarfigisinnaavarput? (b) Unnersuussinialernermi suna iluaqutaasinnaasarpa?
6 Peterip aallarniutaa arlaatigut ilinniutigisinnaavarput? Unnersuussiniartup aallarniilluni Guutip naalagaaffianik ataatsimut neriuutitsinnik nuanningaartumik innersuuppatigut unnersuussutiginiagaa ilassiuminartinnerussannginnerparput? Imaluunniit nammineq misigisimasani oqaluttuarippagit? Jesusip toqunerata kingorna Peterip qularnanngitsumik Kristusimik Naalagaaffiup naalannassusiani tikiuttumik takorruuisitaasimanini oqaluttuarikulasarsimassavaa. — Matîuse 17:9.
7 Eqqaamasariaqarportaaq Peterip aappassaanik allannerata nalaani Mattæusip iivangkiiliua apustilillu Paulusip Galatiamiunut allagai qularnanngitsumik kristumiut akornanni annertuumik siammarsimareerput. Peterip naammalluinnanngissutai kiisalu uppernermigut suliai qularnanngitsumik taassuma nalaani inuusunit ilisimaneqarluarput. (Matîuse 16:21-23; Galâsiamiut 2:11-14) Tamannali nakimanngilluinnarluni oqalunnissaminut akornutiginngilaa. Immaqa allaat ingammik sanngiissutiminnut akiuuttunut allagai kajumississutaasimassapput. Taamaattumik ajornartorsiutilinnik ikiuigaangatta aamma uagut kukkusarnitta miserratiginnginnissaa pitsaasuussaaq. — Rûmamiut 3:23; Galâsiamiut 6:1.
Inuulluaqqussut qiimmaallannartoq
8. Peterip oqaaseq ’upperneq’ qanoq isumaqartillugu atorsimagunarpaa?
8 Maanna Peterip inuulluaqqussutaa sammeriartigu. Upperneq ingerlaannaq tikippaa allaffigisani ’uatsitut qujanartumik uppersuseqalersitatut’ eqqartorlugit. (2 Pîtruse 1:1) Tassani ’uppersuseq’ eqqaaneqarmat pineqarunarpoq aalajaatsumik qularunnaarneq. Kristumiut upperisamik ajoqersuutaat tamarmi pineqarpoq, Biibilimi ilaatigut ’sallusuissummik’ taaneqartoq. (Galâsiamiut 5:7; 2 Pîtruse 2:2; 2 Juánase 1) Oqaaseq „uppersuseq“ taamatut isumaqartillugu atorneqarajuppoq, isumaanut nalinginnaasumut kimut sumulluunniit tatiginninnermut taarsiullugu. — apustilit suliait 6:7; 2 Korintumiut 13:5; Galâsiamiut 6:10; Evfisumiut 4:5; Jûtarse 3.
9. Sooq Peterip inuulluaqqussutaa ingammik juutiunngitsunut qiimmaallaataasimassava?
9 Peterip inuulluaqqussutaa ingammik juutiunngitsunut killitsinnarsimassaaq. Juutit inuiattut juutiunngitsunik peqateqarneq ajorsimapput taakkuninngalu iluaaginnittuullutik, juutillu kristumiunngorsimasut ilaat suli juutiunngitsunut paqumisoqqajaasarput. (Lúkarse 10:29-37; Juánase 4:9; apustilit suliait 10:28) Peterili, inunnguutsiminik juutiusoq Jesus Kristusillu apustiliinut ilaasoq, oqarpoq allaffigisani — juutit juutiunngitsullu — immisulli uppernermik immikkut pisinnaatitaaffeqartut.
10. Peterip inuulluaqqussutaa qanoq ilinniarfigisinnaavarput?
10 Peterip inuulluaqqussutaa assut ilinniarfigisinnaavarput. Guuti nakerisarsiortuunngilaq; naggueqatigiinnik inuiannilluunniit aalajangersimasunik iluarinerusaqanngilaq. (apustilit suliait 10:34, 35; 11:1, 17; 15:3-9) Jesusip ajoqersukkani ajoqersorsimavai kristumiut tamarmik qatanngutigiiusut, arlaannarpulluunniit allanit pitsaanerusutut misigisussaanngitsoq. Peterip inuulluaqqussutimini erseqqissarpaattaaq nunarsuaq tamakkerlugu qatanngutigiissuusugut immisulli apustileqatimisullu ’qujanartumik uppersuseqalersitaasimasugut’, tassa uppernermik immikkut pisinnaatitaaffeqartugut. — Matîuse 23:8; 1 Pîtruse 5:9.
Ilisarsineq Guutillu neriorsuutai
11. Pissutsit pingaartut suut Peterip inuulluaqqussuteqareerami erseqqissarpai?
11 Inuulluaqqussummik aallarneereerami Peter ima allappoq: ’Saammaannarsingaarlusilu eqqissingaaritsi Guutimik Naalakkatsinnillu Jesusimik ilisarsinikkut.’ Saammaannarsingaarneq eqqissingaarnerlu uagutsinni qanoq ilillutik alliartorsinnaappat? Peter ima akivoq: ’Guutimik Naalakkatsinnillu Jesusimik ilisarsinikkut.’ Taava ima nangippoq: ’Taassuma Guutiusup pissarsuup inuussutissanillu mianerinnissutissanillu tamanik tunimmatigut.’ Pingaartut tamakku qanoq ililluta ilangeeqataaffigisinnaagatsigik? ’Naalannassutsimigut ajunngingaarsutsimigullu qaaqqusisitsinnik ilisarsinikkut.’ Taamaalilluni Peterip marloriarluni erseqqissarpaa Guutimik taassumalu erneranik ilisarsineq tamanit pingaarnerpaasoq. — 2 Pîtruse 1:2, 3; Juánase 17:3.
12. (a) Sooq eqqorluartumik ilisarsinerup pingaaruteqassusia Peterip erseqqissarpaa? (b) Guutip neriorsuutai nuannaarutigilersinnaassagutsigik soqqaartariaqarpugut?
12 ’Ajoqersuisooqqusersut Peterip kapitali 2-mi mianersoqqussutigisai ’oqaatsit salloqittaaniutit’ atorlugit kristumiunik tammartitsiniartarput. Taamaalillutik kanngunartuliorteqqinniartarpaat, uffa tamakkunannga aniguereersimagaluartut. Ajortorujussuarmik kinguneqassaaq ’Naalakkamik Annaassisumik Jesus Kristusimik ilisarsinikkut’ annareeraluarluni kingorna tammartitaagaanni. (2 Pîtruse 2:1-3, 20) Nalunanngitsumik ajornartorsiutip tamatuma kingusinnerusukkut samminissaa kissaatigigamiuk aallarniinermini erseqqissareerpaa Guutimut minguitsumik attaveqartuassagaanni eqqorluartumik ilisarsinissaq pisariaqartoq. Peterip innersuussutigaa Guutip ’unnersuutinik qujanartunik annernillu tunisimagaatigut, taakku pigalugit Guuti qanoq-issusiagut peqatigileqqullugu’. Oqarporli ’unnersuutit’, tassa neriorsuutit, uppernitsinnut atalluinnartut, tamakku pigisinnaassagutsigik ’aserornartut silarsuup pii pileritsannartut nigoqqaartariaqarivut’. — 2 Pîtruse 1:4.
13. Kristumiut tanitat ’savallu allat’ suna aalajangiusimavaat?
13 Guutip neriorsuutai qanoq isigaagit? Kristumiut tanitat tamakkuninnga isiginninnerattut isigaagit? 1991-imi Napasuliaq Alapernaarsuiffiup peqatigiiffiata præsidentiata, Frederick Franzip, ukiut 75-it sinnerlugit piffissaq tamaat kiffartoreersimalluni, Kristusimik naalakkersueqateqalernissaminnik neriugisaqartut misigissusii ima oqaatigai: „Manna tikillugu aalajaassimavugut, aalajaattuassaagullu Guutip neriorsuutiminik ’qujanartunik annernillu’ eqquutitsitsinissaa tikillugu.“ Qatanngut Franz Guutip qilammut makititsinissamik neriorsuutaanut sakkortuumik uppersuseqarsimavoq, 99-inillu ukioqarluni toqussi tikillugu uppernini aalajangiusimajuarsimallugu. (1 Korintumiut 15:42-44; Filípimiut 3:13, 14; 2 Timûtiuse 2:10-12) Millionilikkuutaat taassumatut uppernertik aalajangiusimajuarpaat Guutillu nunarsuarmik paratiisiusumik inuit pilluarlutik naassaanngitsumik inuuffigisassaannik neriorsuutaa siunnerfigiuarlugu. Illit taakkununnga ilaavit? — Lúkarse 23:43; 2 Pîtruse 3:13; Åbenbaringen 21:3, 4.
Guutip neriorsuutaanut qanoq qisuariarpugut?
14. Sooq ileqqorinneq pissutsini uppernermut ilaatinneqartariaqartuni siullertut Peterip taavaa?
14 Guutip neriorsuutigisimasai qujamasuutigaavut? Taamaappat Peterip oqarneratut tamanna takutittariaqarparput. ’Tamannami’ (Guutip erlinnangaartunik uagutsinnut neriorsuisimanera) pissutigalugu ilungersorluta iliuuseqarniartariaqarpugut. Uppernermiiginnarnerput imaluunniit sallusuissummik Biibilimiittumik ilikkarsimanerput naammagiinnartariaqanngilarput. Tamannami naammanngilaq! Immaqa Peterip nalaani ilagiinniittut ilaat upperneq oqallisigisaraluaqalugu kanngunartuliornermut akuliusimasimapput. Ileqqorissuusariaqarpulli, taamaattumillu Peterip ima kajumissaarpai: ’Uppersutsissigut ileqqorissiartorniaritsi.’ — 2 Pîtruse 1:5; Jâko 2:14-17.
15. (a) Sooq ilisarsineq uppernermut ilaatinneqartariaqartutut tulliullugu taaneqarpa? (b) Pissutsit allat suut uppernikkut aalajaannissatsinnut ikiussavaatigut?
15 Ileqqorissuseq eqqaareeramiuk pissutsit suli allat arfinillit uppernitsinnut ilaatittariaqakkavut taagorpai. ’Aalajaatsumik uppersuseqassagutta’ pissutsit tamakku tamaviisa pisariaqartippavut. (1 Korintumiut 16:13) Tunussisut ’Allakkanik mumitsisarmata’ aammalu ’sallusumik ajoqersuisarlutik’ Peterip tulliullugu ilisarsinerup pingaaruteqassusia eqqaavaa oqarluni: ’Ileqqorillusilu ilisarsiartorniaritsi.’ Taava ima nangippoq: ’Ilisarsillusilu [imminut naalakkersinnaaniaritsi, NV], illigutsannaveerlusilu nikallujuigitsi, nikallujuillusilu [Guutimut tunniusimaniaritsi, NV], [Guutimullu tunniusimallusi, NV] qatanngutisi asaniarsigik, qatanngutisilu asallugit tamanik asanninniaritsi.’ — 2 Pîtruse 1:5-7; 2:12, 13; 3:16.
16. Pissutsit Peterip taagugai uppernermut ilaliunneqarpata qanoq kinguneqassava, taamatullu pisoqanngippat qanoq pisoqassava?
16 Pissutsit arfineq-marluk taakku uppernitsinnut ilaatikkutsigik qanoq kinguneqassava? ’Tamakkumi ilissinniippata,’ Peter akivoq, ’alliartorlutillu Naalakkatsinnik Jesus Kristusimik [eqqorluartumik] ilisarsinissigut eqiattarniassanngilasi pilussinnarnaviassanasilu.’ (2 Pîtruse 1:8) Akerlianillu Peter ima oparpoq: ’Massami tamakkuninnga peqanngitsoq tappiippoq sequnngerluni ajortuliarigaluaminik piiaaffigineqarsutsi isumakkeeramiuk.’ (2 Pîtruse 1:9) Malugisariaqarpoq Peterip ’ilissi’ aamma ’uagut’ atorsimagaluarlugit maanna atulermagu ’taanna’. Ajoraluartumik ilaat tappiillutillu, puigutullutillu minguttuujusimapput, Peterilli ersersinngilaa allaffigisani taakkununnga ilaasut. — 2 Pîtruse 2:2.
Peterip qatanngutini nakussatsippai
17. Peterip kristumiut ’taamaaliornissaannik’ ilungersorluni kajumissaarmagit suna pissutaasimasinnaava?
17 Peterip qularnanngitsumik arajutsisimanngilaa ingammik nutaat nakutitaaqqajaasinnaasartut, taamaattumik asannittumik ima qiimmassaavoq: ’Taamaammat, qatanngutikka, annerusumik ilungersorniaritsi qaaqqusimassusersi qinigaassusersilu aalajangersarlugit; taamaalillusimi naakkiunnaviassanngilasi.’ (2 Pîtruse 1:10; 2:18) Kristumiut tanitat pissutsinik arfineq-marlunnik tamakkuninnga uppernerminnut ilaliussisut angingaartumik akissarsissapput, Peterimi ima oqarpoq: ’Taamami Naalakkatta Annaassisitta Jesus Kristusip naalagaaffianut naassaanngitsumik iserfissarsisinneqangaarumaarpusi.’ (2 Pîtruse 1:11) ’Savat allat’ nunarsuarmi Guutip naalagaaffiata aqutaani kingornussassartik naassaanngitsoq pissavaat. — Juánase 10:16; Matîuse 25:33, 34.
18. Sooq Peterip ’tamakkuninnga eqqaasitsiuartarnissani’ siunniusimavaa?
18 Peterip kissaatigilluinnarpaa qatanngutini tamarmik akissarsiassamik tupinnangaartumik tamatuminnga ilangeeqataassasut. ’Tamanna pillugu,’ allappoq, ’pinngitsoornanga tamakkuninnga eqqaasinniartaannassavassi, naak ilisimagaluarisi sallusuissullu uatsinniittoq aalajangerfigigaluarlugu.’ (2 Pîtruse 1:12) Peterip tassani atorpaa oqaaseq griikerisooq stērizō, allassimaffimmi tassani ’aalajangerfigaa’-mik nutserneqartoq. Siusinnerusukkut Jesusip Peter oqaaqqissaaramiuk oqarluni: ’Qatanngutitit nakussatsikkit,’ oqaaseq griikerisooq taannarpiaq atorpaa, allassimaffimmili tassani ’nakussatsippaa’-mik nutserneqarluni. (Lúkarse 22:32) Oqaatsimik tamatuminnga Peterip atuinerata immaqa takutippaa Naalakkami oqaaqqissaarinera kimittooq eqqaamagaa. Maanna Peter ima oqarpoq: ’Iluarsoraarali matumani tupermiikkallartillunga [uinikkut timini pigigallartillugu] eqqaasitsisarnermik eqeersarniarlusi, nalunnginnama tupera tassanngaannaq qimassagiga.’ — 2 Pîtruse 1:13, 14.
19. Ullumikkut qanoq ikiorneqarnissarput pisariaqartipparput?
19 Peter inussiarnerluni oqarpoq allaffigisani ’sallusuissummut aalajangersimasut’, miserratiginngilaali ’uppersutsikkut umiiarsinnaanerat’. (1 Timûtiuse 1:19) Ungasinngitsukkut toqusussaanini nalunnginnamiuk, qatanngutini anersaakkut nukittujuassagunik kingorna eqqarsaatigisinnasaannik eqqartuiffigineratigut nakussatsinniarpai. (2 Pîtruse 1:15; 3:12, 13) Ullumikkuttaaq uagut uppernikkut aalajaattuassagutta eqqaasinneqartuartarnissarput pisariaqartipparput. Kinaagaluaruttaluunniit, imaluunniit qanorluunniit sivisutigisumik sallusuissummiissimagaluarutta, aalajangersimasumik Bibilimik atuartarneq, atuaqqissaartarneq ilagiillu ataatsimiinnerinut orniguttarneq pinngitsoorsinnaanngilavut. Ilaasa ataatsimiigianngitsoornerminnut patsisiginiartarpaat qasuallaarnertik, imaluunniit sammineqartussanik tusareersimanertik, sammineqartulluunniit ajortumik saqqummiunneqartarnerarlugit. Peterilli nalunngilaa imminut tatigivallaaleraanni qanoq sukkatigisumik upperneq katanneqarsinnaasoq. — Mákorse 14:66-72; 1 Korintumiut 10:12; Eprîarit 10:25.
Uppernitsinnut tunngavik aalajaatsoq
20, 21. Jesusip allatut isikkoqalersitaaneranik takorruuisitaaneq Peterip taassumalu allagaanik atuartut, ilaatigut uagut ullumikkut inuusugut, qanoq ilillutik uppernikkut nakussatsissutigaat?
20 Uppernerput oqaluttualianik silatorpalaartunik taamaallaat tunngaveqarpa? Naamik, Peterimi ima erseqqissaavoq: ’Uagummi Naalakkatta Jesus Kristusip pissaaneranik tikiunnissaanillu nalunaarfigigassi, oqaluttuapalaat eqqumiitsuliat malillugit pinngilagut, kisianni angingaarsusianik isiginnaartuutitaalluta pivugut.’ Peterip, Jakobip Johannesillu Naalagaaffiup pissaaneranik takorruuisitaagamik Jesus ilagaat. Peter nassuiaavoq: ’Tassa Guutip Ataatap ataqqinartillugu naalannartimmagu, taassumunnga pimmat naalannangaartorsuarmit nipi imaattoq: „Tassa ernera asanartoq nuannarisara.“ Nipilu tamanna qilammit pisoq uagut qaqqami illernartumi ilagigatsigu tusarparput.’ — 2 Pîtruse 1:16-18.
21 Peterip, Jakobip Johannesillu taamatut takorruuisitaagamik Guutip naalagaaffia piviulluinnartutut isigilerpaat. Taamaammat Peter ima oqarpoq: ’Pruffiitillu oqaasiat aalajaallivarput; iluartumillu piumaarpusi, tamanna naneruutitut taartumi qaamasutut itillugu sianiginiarussiuk, ulloq qaalerserlugu qaasiullu uummatissinni nuilerserlugu.’ Aap, Peterip allagaanik atuartut, ilaatigut uagut ullumikkut inuusugut, Guutip naalagaaffia pillugu siulittuutit arajutsinaveersaarnissaannut pissutissaqarluarput. — 2 Pîtruse 1:19; Daniel 7:13, 14; Jesaja 9:6, 7.
22. (a) Uummatitsigut suut arajutsinaveersaartariaqarpavut? (b) Qanoq ililluta oqaatsit siulittuutaasut arajutsinaveersaarsinnaavavut?
22 Kristumiut uummataat oqaatsinit siulittuutaasunit qaammarsarneqanngikkunik taarmiussapput. Oqaatsilli tamakku arajutsinaveersaarneratigut uummataat ullormi ’qaasiutip’, Jesus Kristusip, Guutip naalagaaffiata naalannassusiani nuiffigisassaani eqqumasinnaassapput. (sarĸúmersitat 22:16) Uagut ullumikkut inuusugut qanoq ililluta oqaatsit siulittuutaasut arajutsinaveersaarsinnaavavut? Biibilimik atuaqqissaartarnitsigut, ataatsimiinnernut piareersartarnitsigut peqataasarnitsigullu, kiisalu ’tamakku isumaliutigisarlugillu ileqqorineratigut’. (1 Timûtiuse 4:15) Oqaatsit siulittuutaasut ’taartumi’ (uummatitsinni) qullertut issappata itisuumik sunnertissutigisariaqarpavut. Kissaatitsigut, misigissutsitsigut, pissutiginiakkatsigut anguniakkatsigullu sunnertissutigisariaqarpavut. Biibili paasiniaaffigilluartariaqarparput, Peterimmi kapitali 1 ima naggaserpaa: ’Pruffiitip oqaaserisaa Allakkaniittoq imminit nassuiaatissaqarnavianngilaq. Inuummi piumasaagut pruffiitip oqaaserisaa pinngisaannarpoq, anersaalli illernartup pisimmatik inuit Guutimit oqalupput.’ — 2 Pîtruse 1:20, 21.
23. Peterip allagaasa aappaata kapitaliisa siullersaanni atuartussat sumut piareersarneqarpat?
23 Allakkami aappaata kapitaliisa siullersaanni Peterip ilungersortumik kajumissaareerpaatigut uppernerput erlinnangaartoq aalajangiusimaniaqqullugu. Maanna pissutsit ilungersornartut tulliullugit samminissaannut piareerpugut. Allaaserisami tulliuttumi Pîtrusip agdlagaisa áipait-ni kapitali 2 sammissavarput. Tassani apustilip eqqartorpaa kanngunartuliorneq ilagiinni sunniiartuaarsimasoq qanoq ililluni akiorneqarsinnaasoq. (wE 1/9 97)
Apeqqutit uteqqiissutissat
□ Sooq eqqorluartumik ilisarsinerup pingaaruteqassusia Peterip erseqqissarpaa?
□ Ileqqorissutsip uppernermut ilaatinneqartariaqartuni siullertut taaneqarneranut suna pissutaasinnaava?
□ Sooq qatanngutiminik eqqaasitsiuarnissani Peterip siunniusimavaa?
□ Sumik aalajaatsumik Peterip uppernitsigut tunngavissippaatigut?