’Jehova ataqqinaaseruk pigisannik’ — Qanoq ilillutit?

’JEHOVA ataqqinaaseruk pigisannik, naatitavit tamarmik inereqqaataannik.’ Jehovap pilluaqqusineranik angingaartumik misigisaqarnissamut matuersaat oqaatsini ilisimatuuni isumassarsiarititaasuni taakkunani ukiut 2600-t missaanniittut matuma siorna allanneqarsimasuniippoq, allattormi ima nangippoq: „Taava quitit imaqalerumaarput naammattorsuarnik, tunguiaaffitillu utsersorumaarput paarnat isserannik.“ — Ussatit 3:9, 10.

Guutimilli ataqqinaasiineq, imaluunniit ataqqinartitsineq, qanoq paasisariaqarpa? Pigisatsinninguna sunik Jehova ataqqinartissinnaagipput? Qanoq taamaaliorsinnaavugut?

’Jehova ataqqinaaseruk’

Biibilimi oqaaseq hebriiarisooq ataqqinassusermut atorneqartoq pingaarnerpaaq, kavōdhʹ, isumaqavippoq „oqimaatsuuneq“. Taamaattumik kinaassusilimmik ataqqinartitsineq tassaavoq taassuminnga pingaarutilittut isiginninneq, malunnaatilittut nalilittullu isigalugu. Hebriiarit ataqqinassusermut oqaasiat alla, jeqarʹ, nutserneqarsimavoq „erlinnartuut(it)“ aamma „erlinnartoq“, imaluunniit „akisooq“. Oqaaseq griikerisooq, timēʹ, Biibilimi ’ataqqinaaserpaamik’ nutserneqartoq aamma isumaqarsinnaavoq „naleqarpoq“, „akisuujuvoq“. Tassa kinaassusilik ataqqinartitaq assut pingaartinneqartarpoq.

Ataqqinartitsineq aamma allanik imaqarpoq. Assersuutigalugu, eqqarsaatigeriaruk juuti aalajaatsoq Mordokaj, itsaq Persiami kunngimut Ahasverusimut perlulioqatigiinnianik qulaarisimasoq, pillugu oqaluttuaq. Kingorna kunngip paasigamiuk Mordokaj iliuuserisimasaa pillugu ataqqiniarneqarsimanngitsoq, atorfilittami qullersaat, Haman, aperaa kunngip ataqqinaaserumasaa qanoq pitsaanerpaamik ataqqiniarneqarsinnaanersoq. Haman isumaqarpoq nammineq ataqqinaaserneqartussaalluni, sunaaffa kukkorujussuarluni! Haman oqarpoq kunngip ataqqinaaserumasani ’kunngip atisaanik’ atisitissagaa ’hestimillu kunngip nammineq hesterfigisimasaanik’ hestertillugu. Taava naggataatigut ima oqarpoq: „Hestimullu qaqitillugu illoqarfimmi inuit eqiteruffigisartagaanni ingerlatissavaa nammineq sioraaniilluni imalu suaartarluni: ’Taama iliorfigineqartarpoq angut kunngip ataqqinaaserumasaa!’“ (Ester 6:1-9) Ataqqinartitsineq tamatumani nassataqarpoq kikkut tamarmik isigernanni qutsissisitsinermik, kikkunnit tamanit ataqqineqaqqullugu.

Jehovamittaaq ataqqinartitsineq marlunnik nassataqarpoq, tassa nammineq ataqqingaarlugu taassumalu aqqanik sumi tamaani oqaluussissutiginninnermut peqataanikkut tapersersuinikkullu kikkut tamarmik isigernanni qutsissisillugu.

’Pigisatit’ suuppat?

’Pigisavut’, imaluunniit kalaallisuunngortitaq pisoqaq naapertussagaanni ’pisuussutivut’, tassaapput inuunerput, piffissarput, piginnaanivut nukivullu. Timikkummi pigisavut? Jesusip uillarneq piitsoq naalaffimmi tunissutinik nakkaatitsivimmut aningaasaaqqanik naleqanngingajattunik ilisisoq takugamiuk oqaasii eqqarsaatigikkit. Ima oqarsimavoq: ’Uillarneq una piitsoq tamanik annermik ilisivoq. Taakku [tunissuteqartut allat] tamarmik sinnerutitamik ilaannik tunissutinut ilisimmata, uumali ajorsartuulluni inuutissarsiutissaraluani pigisani tamaasa ilivai.’ (Lúkarse 21:1-4) Jesusip uillarneq taanna nersualaarpaa timikkut pigisani Jehovamik pallorfiginninnermik siuarsaanissamut tapersiissutigimmagit.

Tassa ersarippoq pisuussutit Salomonip eqqartugai aamma timikkut pigisatsinnik ilaqartut. „Naatitat tamarmik inereqqaataat“-ni pineqarpoq pigisatta pitsaanersaannik Jehovamut tunisineq.

Timikkulli pigisanik tunissuteqarneq qanoq ililluni Guutimik ataqqinartitsisinnaagami? Suut tamaasa taassuma pigeriinnginnamigit? (Tussiaat 50:10; 95:3-5) „Suut tamarmik ilinnit pipput,“ kunngi David qamannga pisumik Jehovamut qinunermini taama oqarsimavoq. Naalaffimmillu nappaanermut innuttanilu tunissutitik annertuut pillugit David ima oqarsimavoq: „Makkuttaaq tunniussavut tassaapput ilinnit pisarisimasavut.“ (1 Israelikkut 29:14) Taamaattumik Jehovamut tunisigaangatta ajunngissutsimigut uagutsinnut tunniussimasaanik utertitsiinnartarpugut. (1 Korintumiut 4:7) Soorluli siusinnerusukkut erseqqissarneqareersoq Jehovamik ataqqinartitsineq aamma allat isigernanni taassuminnga qutsissisitsinermik ilaqarpoq. Timikkullu tunissutit pallorfiginninneq ilumoortoq tapersersorniarlugu tunissutigineqartut Guutimik ataqqinartitsisarput. Taamatut Jehovamik ataqqinartitsinermik maligassarpassuit pitsaasut Biibilimi eqqartorneqarput.

Itsaq maligassat

Ukiut 3500-it matuma siorna Israelikkut pallorfiginnittarfissaannik puilasuitsumi illernartuutiliortitsinissamut Jehovap piffissanngorsorimmagu atortussanik akisuunik assigiinngitsunik Guutip sananissamut ilitsersuussutai malillugit pisariaqartunik atorfissaqartitsineqalerpoq. Jehovap Moses inappaa ’kikkulluunniit tunniussinissamut kajumittut Jehovamut pigititassanik aggiussitissagai’. (2 Moses 35:5) Oqaluttuaq ima nangippoq: „Uummatimikkullu kajumissisinneqartut tamarmik aggiussipput toqqup naapeqatigiittarfiup sananeqarnissaanut sanaassartaanullu tamanut atisanullu illernartunut atugassanik [Jehovamut] pigititassanik.“ (2 Moses 35:21) Kajumissutsiminnik tunissutaat ima amerlatigipput suliassamut pisariaqartut sinnerujussuarlugit, tamaattumik inuit ilisimatinneqarput ’tunisisariaaruttut’. — 2 Moses 36:5, 6.

Assersuutissaq alla eqqarsaatigeriaruk. Illernartuut atorneqarfissaminut atorneqareermat naalaffiliornissamullu piareersartoqalermat David naalaffimmut ernermi Salomonip sanasassaanut annertuumik tunissuteqarpoq. Aamma allat maligassiaminik malinninnissaannik kajumissaarpai, inuillu tamatumunnga qisuariarlutik naleqaqisunik Jehovamut tunissuteqarput. Tunissutigineqartut siilvitaannaat guultitaannaallu ullumikkut koruuninik 300 milliardinik naleqassagaluarput. Kajumissutsiminnit tunissuteqarnertik inuit nuannaarutigeqaat. — 1 Israelikkut 29:3-9; 2 Israelikkut 5:1.

Ullumikkut ’kajumissutsimit tunissutit’

Ullumikkut qanoq ililluta nuannaarneq kajumissutsimit tunissuteqarnikkut misigineqartartoq uaguttaaq misigisinnaavarput? Ullumikkut nunarsuarmi maani suliarineqartut pingaarnerpaartaat tassaavoq Guutip naalagaaffianik oqaluussissutiginninneq ajoqersuganngortitsiortornerlu. (Matîuse 24:14; 28:19, 20; apustilit suliait 1:8) Jehovap naleqquttuutissimavaa naalagaaffimmi soqutigisai nalunaajaasuminut isumagisassanngortissallugit. — Jesaja 43:10.

Jehovap Nalunaajaasuisa ullumikkut suliaat soorunami aningaasanik aamma pisariaqartitsiffiusarpoq. Naalagaaffilersaartarfiliorneq, ataatsimeersuartarfiliorneq, immikkoortortaqarfiliorneq, naqiteriveqarfiliorneq Beteliliornerlu tamakkuninngalu aserfallatsaaliineq aningaasanik naleqarput. Aamma Biibilinik atuagassianillu Biibililersaarutinik oqaatsinut assigiinngitsunut naqiterineq siaruarterinerlu aningaasartuuteqarfiusarput. Peqatigiiffiup aningaasartuutai qanoq matussutissinneqartarpat? Kajumissutsimit tunissutinik!

Tunissutigineqartartut amerlanersaat inunnit ataasiakkaanit pissakitsuneersuupput — uillarnertut Jesusip maluginiarsimasaatut. Jehovamik ataqqinartitsinissamut periarfissaq tamanna annaarusunngilaat, taamaattumillu ’sapinngisaminnik’, immaqalu ilaannikkut allaat ’sapinngisartik akimorlugu’, annikitsunnguamik tunissuteqartarput. — 2 Korintumiut 8:3, 4.

’Nungullutik uummatimik pilersaarutigisaannik tunisigilit uumitsannatik ajornartoortitaanatillu, kajumittumik tunisisoq Guutip asammagu,’ apustili Paulus Korinthimi ilagiinnut taama allassimavoq. (2 Korintumiut 9:7) Kajumittumik tunisisarniaraanni pilersaarusiorluartariaqarpoq. Paulusip Korinthimiut ima kajumissaarsimavai: ’Sapaatip-akunnerisa ulluisa siullianni kinaluunniit ilarsi immini iluanaarnini missiliorlugu toqqorsilluni ilisisarili, tunioraatissat aatsaat tikiukkuma katersortariaqaqqunagit.’ (1 Korintumiut 16:2) Ullumikkuttaaq Guutip naalagaaffiata suliaanut tapersiissutinik tunissuteqartarusuttut namminneq kajumissutsiminnik allallu ilisimanngisaannik isertitamik ilaannik tunissutissaminnik immikkoortitsisarsinnaapput.

Jehovap imminik ataqqinartitsisut pilluaqqusarpai

Timikkut pigissaarutit imminni anersaakkut pigissaarnermik kinguneqarneq ajoraluartut pigissaarutivut — piffissarput, nukivut timikkullu pigisavut — Jehovamik ataqqinartitsinermut atorutsigik pilluaqqusaangaarnermik kinguneqassaaq. Taamaanneranik Guutip sunik tamanik piginnittup uppernarsaaffigaatigut: „Pilluaqqussummik tunioraasup [tunisiumatuup, NV] tamanna immini pilluaatigaa; allanik imeruersaasoq nammineq imeruersarneqarumaarpoq.“ — Ussatit 11:25.

Kunngip Davidip toqunerata kingorna ernerata Salomonip kajumissutsimik tunissutit ataatami katersortissimasai Jehovap ilitsersuussutai malillugit naalaffissuarmik kusanarluinnartumik sananermut atorpai. Salomonilu aalajaalluni Guutimut pallorfiginnittuartillugu „Judakkut Israelikkullu aarleqquteqaratik nuna Danimiit Be’ersjebamut najugaraat“. (1 Kunngit 5:5) Peqqumaasiviit ulikkaarsimapput, tunguiaaffiit utsersorput — Israelikkut ’pigisaminnik Jehovamik ataqqinaasiiuartillugit’.

Kingorna pruffiiti Malakias aqqutigalugu Jehova ima nalunaarpoq: „’Taamaalillusi misilinniarsinga,’ oqarpoq katersaarsuit [Jehovaat]. ’Taava qilaap suppivii ammassavakka pilluaatissiissutinillu killiligaanngitsunik kueraaffigissallusi.’“ (Malaki 3:10) Anersaakkut pigissaarneq Jehovap kiffaasa ullumikkut atugaat Guutip neriorsuutiminik eqqortitsineranut takussutissaavoq.

Guutip naalagaaffiata soqutigisai siuarsarniarlugit suliniuteqaraangatta Jehovamut nuannaarutaalluinnartarpoq. (Eprîarit 13:15, 16) Neriorsorpaatigullu annertoqqusersussalluta ’naalagaaffini iluarnerlu pini’ salliutittuarutsigik. (Matîuse 6:33) Qanortoq nuannaangaarluta ’Jehova pigisatsinnik ataqqinaasertuartigu’. (wE 1/11 97)

[Qupp. 26, 27-mi ungalusaq]

Nunarsuaq tamakkerlugu suliamut qanoq ililluni kajumissutsimit tunissuteqartoqartartoq

Amerlasuut aningaasanik naatsorsuutiminni nakkaatitsivimmut „Tunissutit Naalagaaffiup sulineranut — Matîuse 24:14”-imik allagartalimmut nakkartitassaminnik immikkoortitsisarput. Tunissutigineqarsimasut qaammatip naanerani ilagiinnit Napasuliaq Alapernaarsuiffiup Peqatigiiffianut nassiunneqartarput.

TUNISSUTIT: Aningaasat kajumissutsimit tunissutit toqqaannartumik nassiunneqarsinnaapput uunga: Vagttårnet, Stenhusvej 28, 4300 Holbæk, giro 640-3468. Pinnersaatit nalillillu allat aamma tunissutigineqarsinnaapput. Allagarsertariaqarpulli tunissutaanerannik nalunaartumik.

SILLIMMASIISSUTIT: ’Inuunermut sillimmasiissutit’ utoqqalinersiutissatulluunniit nammineq katersukkat Napasuliaq Alapernaarsuiffiup Peqatigiiffianut pisassanngortinneqarsinnaapput. Taamaalisoqarniartillugu tamatigut Peqatigiiffik ilisimateqqaarneqartariaqarpoq.

BANKKONTOT, PAPPIALAT NALILLIT PIGISALLU AALAAKKAASUT: Bankkontomi uninngatitat, pappialat nalillit pigisallu aalaakkaasut tuniuminartut Napasuliaq Alapernaarsuiffiup Peqatigiiffianut tunniunneqarsinnaapput. Taamaalisoqarniaruni aamma Peqatigiiffik ilisimatinneqaqqaassaaq.

KINGORNUSSASSAT: Aningaasaatit inatsisitigut atuuttumik testamentiliornikkut Napasuliaq Alapernaarsuiffiup Peqatigiiffianut kingornussassanngortinneqarsinnaapput. Pitsaassaaq Peqatigiiffik immaqalu ilagiit tamatuma kopiianik tunissallugit. Ilisimatitsissutigisinnaavarput Vagttårnets Bibel- og Traktatselskabi kingornussassat akileraarutitaannut akiliineq ajormat.

PERIARFISSAT ALLAT (pisussaasutut nalunaarutit allallu): Ilagiinni ilaaffigisanni utoqqaanertat tunissuteqarnissamut periarfissanik allanik paasiniaaffigisinnaavatit.

KAJUMISSUTSIMIT TUNISSUTAAPPUT: „[Tamakku] . . . tamarmik kajumissutsiminnit sulisunit akissarsiaqarneq ajortunit suliarineqartarput, taamaalilluni aningaasartuutit sapinngisamik appasitsinneqarlutik. Illumit illumut angalaarluni oqaluussisarneq atuagassianillu agguaassineq Jehovap Nalunaajaasuisa akissarsiaqaratik suliarisarpaat. Tamarmik [aningaasartuutitik] namminneq akilertarpaat. Utoqqaanertat ilagiinnik nakkutilliisut ilagiinnilu kiffartortut akissarsiaqaratik kiffartuussisarput. Kiffartuussinerminni aningaasaajaatit tamaasa namminneq akilertarpaat.

Siulersuisoqatigiinni ilaasut allallu biibilinik atuakkanillu Biibilimut ilinniutaasunik piareersaanermik naqiterinermillu taamaaqataannillu suliaqartut tamarmik allanik akissarsiaqanngillat kisianni akeqanngitsumik nerisaqarlutillu inigisaqarput namminerisaminnillu pisariaqartitaminnut anginngitsumik [ajunngitsorsiassaqartitaallutik]. Aammattaaq allamik atorfeqaratik nakkutilliillutik angalasartut taama ittumik isumagineqartarput. . . .

Jehovap Nalunaajaasuisa ataatsimiititsinerini tamani, ilagiissiminni aammattaaq ataatsimeersuarnerni, aningaasanut nakkaatitsiveqartarpoq tunisiumasut nakkartitsiffigisinnaasaannik. Aningaasanik katersuisitsineqarneq ajorpoq. Pissarsiamik qulerarterutaannik akileraartaqqusaanngillat ilagiinnullu ilaasortatut akiliummik akileeqqusaanatik.“ — atuagassiaaqqamit Jehovap Nalunaajaasui — Ataasiussuseqarlutik Guutip peqqusaanik silarsuarmi tamarmi naammassinnittut-mit, quppernermi 28-mit, issuagaq.