Uppernerup iliuuseqalersittarpaatigut!
’Takuat [Abrahamip] suliai uppernerup peqatigigai suliaanillu upperneq naammatsitaasoq.’ — JÂKO 2:22.
1, 2. Upperutta qanoq iliussaagut?
INUPPASSUIT oqartarput Guutimut uppertuullutik. Upperneraannarnerli timitut toqungasutulli uumassuseqanngitsigaaq. Ajoqersugaq Jakob allassimavoq ’upperneq sulianik ilaqanngitsoq taamaannermini toqungasoq’. Nangilluni allassimavoq Abraham uppissuseqarsimasoq ’sulianik peqatilimmik’. (Jâko 2:17, 22) Oqaatsit tamakkua uagutsinnut qanoq pingaaruteqarpat?
2 Uppernerput piviusuuppat kristumiut ataatsimiittarnerini tusartakkavut iliuuseqarnata upperiinnassanngilavut. Suliniuteqarluta Jehovamut nalunaajaasuunitsigut uppernerput ersersissavarput. Uppernitta Guutip oqaasianik inuunitsinni atuisissavaatigut, uppernerpullu iliuutsitsigut takuneqarsinnaassaaq.
Kinaassusersiorneq uppernermut kattunneqarsinnaanngilaq
3, 4. Uppernitta allanut qanoq iliorfiginninnissatsinnut killittariaqarpaatigut?
3 Guutimut Kristusimullu uppernerput piviusuuppat kinaassusersiortuunavianngilagut. (Jâko 2:1-4) Jakobip allaffigisaasa ilaat kinaassusersiunngissutsimik, kristumiunut ilumoortunut piumasaqaataasumik, ersersitsineq ajorput. (Rûmamiut 2:11) Taamaattumik Jakob ima oqarpoq: ’Qatanngutikka, Naalakkamut Jesus Kristusimut naalannangaartumut uppersuseqaritsi kinaassusersiornasi.’ Uppinngitsorooq pisooq guultimik assammiulik atisarissaartorlu ataatsimiinnermut takkuppat, uppinngitsorlu ’piitsoq ipertuumik atisalik’ aamma ataatsimiinnermut takkuppat, tamarmik tikilluaqquneqassapput. Taamanikkulli pisuut ilassiorneqarnerusarsimapput. ’Pitsaasumut ingeqquneqartarsimapput’, piitsulli oqarfigineqartarsimallutik nikorfaannassasut imaluunniit natermut arlaata isigaasa eqqaannut ingissasut.
4 Jesus Kristusip pilliutaa utertitsissutaasoq pisuunut piitsunullu atuuttussatut Jehovap pilersissimavaa. (2 Korintumiut 5:14) Pisuut ilassiornerusarutsigik Kristusimut uppernitsinnit nigorsimassaagut. Taannami ’pilluta piitsunngorsimavoq piitsuunermigut pisuunngoqqulluta’. (2 Korintumiut 8:9) Taamatut inuit nalilersunngisaannartigik — eqqunngitsumik pissutiginiagaqarluta inuit ataqqinngisaannartigik. Guuti kinaassusersiortuunngilaq, taamaattumik uagut kinaassusersiortuugutta tassaassaagut ’eqqartuussisut isumapiloqartut’. (Job 34:19) Guutip iluarisaanik iliornissarput kissaatigaarput taamaattumillu nakerisarsiornaveersaassalluta imaluunniit ’inuit iluaqutissarsiffiginiarlugit nersortuusaassanagit’. — Jûtarse 4, 16.
5. Kikkut ’uppernikkut pisuujusussatut’ Guutip qinersimavai, timikkullu pisuut qanoq iliorajuppat?
5 Taava Jakobip ersersippaa kikkut ilumut pisuujusut, kajumissaarillunilu kinaassusersiornani kikkunnik tamanik asanninnissamik. (Jâko 2:5-9) ’Guutip piitsut qinerpai uppernikkut pisuunngortillugit naalagaaffimmillu kingornussisussanngortillugit.’ Taamaappoq piitsut nutaarsiassamut nuannersumut tusaajumanerusarmata. (1 Korintumiut 1:26-29) Pigissaartut ataatsimut isigalugit akiitsunut akissarsianullu tunngasutigut kiisalu eqqartuussinerni amerlasuutigut allanik naqisimannittarput. Kristus ajortumik eqqartortarpaat qinugisarlutalu taassuma aqqanik atuinerput pillugu. Taamaakkaluartorli aalajangiusimaniartigu ’inatsisit akimanertaasa’, tullermik asanninnissamik pisuunillu piitsunillu assigiimmik asanninnissamik piumasaqartut, naalannissaat. (3 Moses 19:18; Matîuse 22:37-40) Tamanna Guutimit piumasaqaataammat, kinaassusersiortuuneq ’ajortulinerussaaq’.
’Naakkinnittoq siooranani eqqartuutitikkiartoraraaq’
6. Allat naakkinnittumik iliorfiginngikkutsigik qanoq ililluta inatsisinik unioqqutitsisunngorsinnaavugut?
6 Naakkittaalluta kinaassusersiortuugutta inatsisinik unioqqutitsisuussaasut. (Jâko 2:10-13) Tamatumani kukkuluttorutta oqartoqarsinnaavoq Guutip inatsisaanik tamanik unioqqutitsisugut. Israelikkut immaqa allasiunngikkaluarlutik tillittartut Mosesip inatsisaanik unioqqutitsisarput. Uagut kristumiutut ’inatsisitigut kiffaanngissutsip piisigut’ eqqartuunneqartarpugut. Inuit ’kiffaanngissuseqartut’ tassaapput anersaakkut Israelikkut, angerusisaamut ilaasut tamatumalu inatsisaanik uummammioqartut. — Jeremia 31:31-33.
7. Sooq kinaassusersiortuaannartut naatsorsuutigisinnaanngilaat Guutip naakkinninnermik ersersitsivigissagaatik?
7 Uppernerarutta kinaassusersiortuujuarlutali, navianartorsiussaagut. Asanninngitsut naakkittaatsullu naakkittaatsumik eqqartuunneqassapput. (Matîuse 7:1, 2) Jakob oqarpoq: ’Naakkinnittoq siooranani eqqartuutitikkiartoraraaq.’ Iliuutsitsigut tamatigut naakkinninnermik ersersitsisarnitsigut Jehovap anersaavata siulersuinera akuerigutsigu ajortumik eqqartuunneqarnavianngilagut. Naakkinninnermik ersersitsivigineqassaagut, taamaattumik siooranata eqqartuutitikkiartorsinnaassagut.
Upperneq ajunngitsunik inerititaqartarpoq
8. Uppernerartoq iliuuseqarnanili qanoq oqaatigisariaqarpa?
8 Upperneq uagutsinnik asannittunngortitsillunilu naakkinnittunngortitsiinnarani aamma allanik ajunngitsunik inerititaqartitsisarpoq. (Jâko 2:14-26) Oqarutta upperluta, suliaqarnatali, soorunami uppernitta annaannavianngilaatigut. Inatsisinik maleruaanerinnakkut Guutimit naapertuilluartutut isigineqalernavianngilagut. (Rûmamiut 4:2-5) Tassani Jakobip inatsisinik katersukkanik maleruaaneq pinnagu suliat uppernermit asanninnermillu pisut eqqartorpai. Upperneq asanninnerlu iliuutsitsinnut tunuliaqutaappata oqaannarnavianngilagut uppeqativut atugaliortut ajunnginnerpaamik kissaallugit. Qatanngut angut arnarluunniit kaattoq atisassaaleqisorluunniit ikiorumassavarput. Jakob aperivoq: ’Arlassilu oqarfigippagit: „Eqqissillusi aallaritsi, kissassarlusilu qaarsillassarniaritsi,“ timaasalu iluaqutissaannik tuninagit, sumut iluaqutaava?’ Iluaqutaanngilaq. (Job 31:16-22) ’Upperneq’ taama ittoq toqungavoq!
9. Sukkut ersertarpa uppissuseqartugut?
9 Immaqa Guutip innuttai annertungaatsiartumik ilagisarpavut, uppernerarnerpulli aatsaat iliuutsinit uummammit pisunit uppernarsarneqarsinnaavoq. Ajunngeqaaq ataasiullunilu pingasuusumik ajoqersuut tunuartissimagutsigu ataasiinnarmillu Guuteqarnera upperalugu. Uppernerinnarli naammanngilaq. ’Anersaapiluittaaq Guuti upperaat,’ nungutitaanissartillu siooragalugu ’uulipput’. Ilumut uppissuseqarutta uppernitta iliuuseqartissavaatigut, soorlu nutaarsiassaq nuannersoq oqaluussissutigalugu uppeqativullu pisariaqartitsilluinnartut nerisassanik atisanillu tunisarlugit. Jakob oqarpoq: ’Nalussanngilatimmi, inuk isumaatsutit-aa [Guutimik ilisarsinermik ulikkaarsimanngitsoq], upperneq sulianik ilaqanngitsoq suunngitsuusoq.’ Aap, upperneq sulianik ilaqartariaqarpoq.
10. Sooq Abraham ’uppertunut tamanut ataataasutut’ taaneqarsimava?
10 Ataataalluartoq Abraham Guutimik mianerinnittuusimavoq uppissuseqarsimallunilu suliaasigut ersertumik. ’Uppertunut tamanut ataataasutut’ Abraham ’erni Isak tunisivimmut aakkamiuk suliamigut iluartuutitaasimavoq’. (Rûmamiut 4:11, 12; 1 Moses 22:1-14) Qanoq pisoqarsimassagaluarpa Guutip Isakimik makititsisinnaanera aqqutigalunilu kinguaassamik neriorsuutiminik eqqortitsinissaa Abrahamip upperisimanngitsuuppagu? Taava Abrahamip ernini pilliutiginiarsimanavianngikkaluarpaa. (Eprîarit 11:19) Naalalluni suliaasigut Abrahamip ’uppernera naammatsitaavoq’. Taamaalillutik ’allakkat [1 Moses 15:6] ima oqaaseqartut eqquupput: „Abrahamip Guuti upperigamiuk iluarsuseqartitaavoq.“’ Abrahamip Isakimik pilliiniarnerigalua siusinnerusukkut Guutip Abrahamimik iluartuuneraasimaneranik uppernarsaavoq. Guutimut asanninnini uppernikkut suliamigut ersersippaa ’Guutillu asasaanik’ taaneqarluni.
11. Rahabip qanoq ililluni ersersippaa uppissuseqarluni?
11 Abrahamip uppernarsarpaa ’inuk sulianit iluartitaasartoq uppernerinnarmillu pinnani’. Rahab, arnaq atortittartoq Jerikomiu, eqqarsaatigalugu aamma taamaappoq. Taanna ’sulianit iluartuutitaasimavoq [Israelikkut aallartitaat] ilassigamigit aqqutikkullu allakkut aniguisillugit’, akeraannit Kana’animiunit aniguisillugit. Rahabip Israelikkut alapernaarsuisui naapinngikkallaramigilli paasereersimavaa Jehova Guutiusoq ilumoortoq, oqaatsimigullu aammalu atortittartuujunnaarnermigut uppernini nalunaajaatigaa. (Josva 2:9-11; Eprîarit 11:31) Uppernermut suliakkut ersersitamut assersuummik taamatut saqqummeeqqereerluni Jakob oqarpoq: ’Soorlumi timi anersaaqanngitsoq toqungasoq, taamattaaq upperneq sulianik ilaqanngitsoq toqungavoq.’ Inuk toqugaangami uumassutaaruttarpoq imaluunniit ’anersaaveruttarpoq’, susinnaajunnaarluinnarluni. Upperneq oqaasiinnakkut nassuerutigisaq timitulli toqungasutut uumassuseqanngitsigalunilu atorsinnaanngitsigaaq. Uppernitta piviusuuguni eqqortunik kristumiutut iliuuseqartissavaatigut.
Oqqat paariuk!
12. Ilagiinni utoqqaanertat qanoq iliortariaqarpat?
12 Inuup uppernera aamma oqaasiisigut ilinniartitsineratigullu ersertarpoq. Kisianni aamma oqqap paarinissaa pisariaqarpoq. (Jâko 3:1-4) Utoqqaanertat ilagiinni ilinniartitsisutut oqimaatsumik akisussaaffeqarput annerusumillu Guutimut nassuertussaassuseqarlutik. Taamaattumik maniguullutik pissutiginiakkatik piginnaaffitillu isumaliutigeqqissaartariaqarpaat. Angutit taakkua ilisimasassat piginnaanerillu saniatigut Guutimut uppeqatiminnullu asannilluinnassuseqartariaqarput. (Rûmamiut 12:3, 16; 1 Korintumiut 13:3, 4) Utoqqaanertat unnersuussisarnerminni Biibili tunngavigeqqissaarniartariaqarpaat. Utoqqaanertaq eqqunngitsumik ilinniartitsisaruni tamannalu allat ajornartorsiulernerannik kinguneqarpat, Guutimit Kristus aqqutigalugu pitsaanngitsumik eqqartuunneqassaaq. Taamaattumik utoqqaanertat maniguuttuullutillu ilinniartinneqarusussuseqartariaqarput Guutillu oqaasia najoqqutarilluinnartariaqarlugu.
13. Sooq oqaatsikkut kukkusarpugut?
13 Kikkut tamarmik, allaat ilinniartitsisut pikkorissut, ’naakkiuttarput’, imaluunniit kukkujuartarput, naammalluinnanngitsuunerput pissutigalugu. Oqaatsikkut kukkuneq kukkuluttuutigisartakkatta akulikinnerit ilagaat, allanullu ajoqusiisinnaavoq. Jakob oqarpoq: ’Oqalunnikkut naakkiunnaveersoqarpat, taanna angutaavoq iluarluinnartoq timini iluunngarlugu allaat naalakkersorsinnaallugu.’ Jesus Kristusip akerlianik uagut oqarput tamakkiisumik naalakkersorsinnaanngilarput. Taamatut pissaaneqarfigitigisuugutsigu aamma timitta sinnera tamaat naalakkersorsinnaassagaluarparput — soorlu supissaat kimmiarlu ikiortigalugit hesti piumasamut ingerlatinneqarsinnaasoq, aammalu aquuteerannguaq ikiortigalugu allaat umiarsuit malissiortut piumasamut aqunneqarsinnaasartut.
14. Jakobip qanoq ililluni ersersippaa oqarput aqunniarlugu ilungersortariaqartugut?
14 Tamatta nassuerutigisariaqarparput oqqap aqunnissaa ilungersunartorujussuusoq. (Jâko 3:5-12) Kimmiaq hestimut naleqqiullugu mikisuararsuuvoq, taamatuttaaq ippoq aquut umiarsuarmut naleqqiullugu. Aammattaaq oqaq timip sinneranut naleqqiugullugu mikeqaaq taamaattorli ’oqallortoqaluni’, imaluunniit Ny Verden-nutsigaq naapertussagaanni ’usorsitsaartaqaluni’. Biibilimi erseqqissarneqarpoq usorsitsaarneq Guutip iluarinngikkaa. Taamaattumik usorsitsaarnaveersaartarnissatsinnik ikioqqulluta Guuti qinnuigisassavarput. (Tussiaat 12:4, 5; 1 Korintumiut 4:7) Aamma kamassaarneqaraangatta oqarput naalakkersortariaqarparput, eqqaamallugulu innaallannimininnguup allaat orpippassuit ikuallatsilersinnaammagit. Soorlu Jakobip ersersikkaa ’oqaq tassaavoq inneq’ annertuumik ajoqusiisinnaasoq. (Ussatit 18:21) Tassami oqaq aqukkuminaatsoq ’timip pisataasa iluaatsorpassualittaraat’! Silarsuarmi guutiitsumi maani iluaatsut tamavimmik oqqap aqunneqarsinnaannginneranik ilaatigut pissuteqarput. Pissutsinut ajoqusiisunut, soorlu mamarliinermut ajoqersuutinullu ilumuunngitsunut, pisuuvoq. (3 Moses 19:16; 2 Pîtruse 2:1) Taamaattumik oqarput ilungersorluta aqunniarsarisariaqannginnerparput?
15. Oqaq paarineqanngitsoq qanoq ajoqusiisinnaava?
15 Oqaq aqunneqanngitsoq mingutsilluinnarneqarnitsinnut pisooqataasarpoq. Assersuutigalugu, sallusaqattaarutta sallutuutut ilisimaneqalissaagut. Qanorli ililluni oqqap aqukkuminaatsup ’inuunitta ingerlanera ikuallatsittarpaa’? Inuunermi ajortunik atuiualersinnermisigut. Oqaq aqukkuminaatsoq ataasiinnaq pisuulluni ilagiinniittut tamarmik eqqissiviilliulersinnaapput. Jakobip eqqaavaa ’anniarfik’, imaluunniit Ny Verden-nutsikkami taaneqartutut „Gehenna“, Hinnomip Qoorua. Itsaq qooroq tamanna meeqqanik pilliisarfiusimavoq, kingornalu Jerusalemimi eqqakkanik ikuallaaviulersimalluni. (Jeremia 7:31) Taamaattumik Gehenna, imaluunniit ’anniarfik’, suujunnaarsitaanermut assersuutaavoq. Oqartoqarsinnaavoq Gehennap aseruisinnaassutsi oqqamut aqunneqanngitsumut atuutitereeraa, tassami oqarput paarinngikkutsigu ’innermit ikitatsinnit’ nammineq eqqugaasinnaavugut. (Matîuse 5:22) Allanik asissuigutta allaat ilagiinnit kristumiunit anisitaasinnaavugut. — 1 Korintumiut 5:11-13.
16. Oqqap aqukkuminaatsup ajoqusiisinnaanera eqqarsaatigalugu qanoq iliortariaqarpugut?
16 Biibilimi allassimavoq Jehova oqarsimasoq inuk uumasunut naalagaassasoq. (1 Moses 1:28) Uumasunik assigiinngitsunik tamanik nujuillisaasoqartarsimavoq. Assersuutigalugu, kissaviarsuit aallaaniarnermi atugassatut sungiusarneqartarsimapput. ’Paarmortut’ Jakobip eqqaasai ilaatigut tassaasinnaapput pulateriaarsuit tamakkuninnga nujuillisaasartunit aqunneqartartut. (Tussiaat 58:5, 6) Allaat arferit nujuillisarneqarsinnaapput, kisianni inuttut naammalluinnanngitsutut oqarput tamakkiisumik ’nujuillisillugu’ aqulersinnaanngilarput. Taamaakkaluartorli allanik mamarliinaveersaartariaqarpugut imaluunniit sakkortuunik annernartunillu oqaaseqarnaveersaarluta. Oqaq aqukkuminaatsoq tassaasinnaavoq atortoq toqunarluinnartumik toqunartortalik. (Rûmamiut 3:13) Ajoraluartumik eqqunngitsumik ajoqersuisut oqaasa ukiuni hundredelinni siullerni kristumiut ilaat Guutimit avissaartissimavaat. Uagut ullutsinni tunussisut oqaasii toqunartut, oqaatsitigut allakkatigulluunniit saqqummiunneqartut, nakkaannarfiginaveersaaqqissaartariaqarpavut. — 1 Timûtiuse 1:18-20; 2 Pîtruse 2:1-3.
17, 18. Killormoorneq suna Jâko 3:9-12-imi erseqqissarneqarpa, tamatumunngalu atatillugu qanoq iliortariaqarpugut?
17 Guutimut uppernitta taassumalu iluarisaanik iliorusunnitta tunussinermut sernissorsinnaavaatigut oqqattalu killormoortumik atunnginnissaanut ikiorluta. Jakobip tikkuarpaa qanoq killormoornerutigissagaluartoq ’oqqamik ataatsimik Jehova Ataatarput pilluaqqusarutsigu inuillu Guuti assilillugu pinngortitat perloqqusarlugit’. (1 Moses 1:26) Jehova Ataatagaarput ’inuunermik, anersaarnermik sunillu tamanik tunimmatigut’. (apustilit suliait 17:24, 25) Aamma kristumiut tanitat anersaakkut Ataatagaat. Inuit tamarmik ’Guuti assigaat’, tassa uumasut assiginagit sianissutsikkut ileqqussatigullu piginnaaneqaramik, ilaatigut asanninnermik, naapertuilluassutsimik ilisimassutsimillu. Taava Jehovamut upperutta qanoq pissusilersortariaqarpugut?
18 Arlaannik perloqqusineq tassaavoq taakkuninnga ajortumik taaguineq, imaluunniit ajortumut peqqusineq. Tassaannginnatta pruffiitit Guutimit isumassarsisitaasut arlaannik ajortumut peqqusinissamut pisinnaatitaasut, allanik perloqqusigutta uumissuinermut, Guutimik pilluaqqusinitsinnik naleerutsitsisussamut, ersiutaassaaq. ’Qanermit ataatsimit pilluaqqusinermik perloqqusinermillu anitsineq’ eqqortuliornerunngilaq. (Lúkarse 6:27, 28; Rûmamiut 12:14, 17-21; Jûtarse 9) Ajorluinnassaaq ataatsimiinnerni Guuti unnersiutigalugu erinarsukutsooriarluni kingorna uppeqatit ajortumik eqqartussallugit. Puilasumit ataatsimit imeq minguitsoq imerlu minguttooq puilasinnaanngillat. Soorlu ’fiigequt uuliaqutip paarnaanik, viinnequlluunniit fiiginik inerititaqarsinnaanngitsoq’, imeq tarajuusoq imiinnarmik pilersitsisinnaanngilaq. Anersaakkut arlaannik ajortoqarsimassaaq uagut ajunngitsunik oqalunniartussaagaluartugut oqaatsinik nuanniitsunik aniatitsiuaannarutta. Taamatut ileqqoqalersimagutta qaangernissaanut ikioqqulluta Jehova qinnuigisariaqarparput. — Tussiaat 39:2.
Ilisimassut pavannga pisoq malillugu inuusa
19. Ilisimassummit qilammeersumit siulersortinnerput inunnik allanik qanoq attuisarpa?
19 Uppertut ileqqussaattut oqaaseqartassagutta iliortassaguttalu tamatta ilisimassut pisariaqartipparput. (Jâko 3:13-18) Guutimik ataqqinnittumik mianerinnikkutta ilisimassummik qilammeersumik, ilisimasanik eqqortumik atuisinnaassutsimik, tunissavaatigut. (Ussatit 9:10; Eprîarit 5:14) Saamanermik ilisimassummut atasumik ersersitsinissatsinnut Taassuma oqaasiani ilinniartinneqarpugut. Saamasuunerpullu ilagiinni eqqissinermik siuarsaasarpoq. (1 Korintumiut 8:1, 2) Uppeqatiminnut ajoqersuisorsuunerarlutik usorsitsaartut tamarmik ’sallusuissut uniorlugu sallupput’, ’sallusuissullu’ tamanna taakkua namminissarsiussusiannik avoqqaarinnippoq. (Galâsiamiut 5:26) ’Ilisimassutaat’ ’nunap pigaa’, tassa inuup ajortillip Guutimit nigorsimasup ilisarnaataanik ilisarnaatilik. ’Tarnip pigaa’ uinilittut ilioriartaatsinit pilerfeqarami. Allaammi ’anersaapiluup pigaa’, anersaammi ajortut pingaarniartuupput! (1 Timûtiuse 3:6) Taamaattumik ilisimassusilittut iliortarniarta maniguullutalu, ajortunut soorlu mamarliinermut kinaassusersiornermullu tunngavissiisumik iliortaqqunata.
20. Ilisimassut qilammeersoq qanoq nassuiassaviuk?
20 ’Ilisimassut pavannga pisoq siullermik minguitsuuvoq.’ Anersaakkut ileqqussatigullu minguillisittarpaatigut. (2 Korintumiut 7:11) ’Eqqissisitsiniartuuvoq’, eqqissinermik ujartuilersittaramisigut. (Eprîarit 12:14) Ilisimassut qilammit pisoq ’ingasaassinianngitsuuvoq’, isummaminik ingasattumik aalajangiussisuunngilaq piuminaatsuunanilu. (Filípimiut 4:5) Ilisimassut pavannga pisoq ’naalattuuvoq’, ajoqersuummut Guutimeersumut naalanneq Jehovallu peqatigiissortaanik suleqateqarneq siuarsartarlugit. (Rûmamiut 6:17) Ilisimassutip pavannga pisup aammattaaq naakkinnittunngortillutalu misiginneqataasunngortittarpaatigut. (Jûtarse 22, 23) Ilisimassut ’ajungitsulianik sunilluunniit’ ulikkaarami inunnik allanik soqutiginnilersittarpaatigut ajunngissusermullu, naapertuilluassutsimut sallusuissummullu naapertuuttunik suliaqalersittarluta. (Evfisumiut 5:9) Eqqissisitsiniartuugatta ’iluarnerup inerititai’, pissutsini eqqissinartuni alliartortartut, nuannaarutigisinnaavavut.
21. Jâko 2:1–3:18 naapertussagaanni Guutimut uppernerput sulianik sunik nassataqartariaqarpa?
21 Taamaalilluni ersarippoq upperneq iliuuseqalersitsisartoq. Kinaassusersiunngitsunngortillutalu naakkinnittunngortittarpaatigut ajunngitsunillu suliaqalersittarluta. Upperneruttaaq oqqatsinnik aqutsilersittarpaatigut qilammillu pisumik ilisimassuseqartumik iliulersittarluta. Tamakkuli kisiisa pinnagit allakkat taakku ilinniarfigisinnaavavut. Jehovamut uppertut ileqqussaattut pissusilersortarnissatsinnut iluaqutigisinnaasatsinnik suli aamma allanik Jakobip unnersuuppaatigut. (wE 15/11 97)
Apeqqutit uteqqiissutissat
□ Sooq kinaassusersiorneq eqqunngitsuliornerua?
□ Upperneq suliallu qanoq imminnut atassuteqarpat?
□ Sooq oqqap aqunnissaa taama pingaartigaa?
□ Ilisimassut qilammeersoq sunik ilisarnaateqarpa?