Qanikkut nassuerneq annakkumaarnarpoq
’Kinaluunniit Jehovap aqqanik torlorfiginnittoq annakkumaarpoq.’ — RÛMAMIUT 10:13.
1. Oqaluttuarisaanermi mianersoqqussutit suut tutsiuttarsimappat?
OQALUTTUARISAANERMI ’Jehovap ullui’ arlallit eqqartorneqarput. Noap nalaani ulersuaq, Sodomap Gomorrallu aserornerat, Jerusalemillu ukiumi 607-imi u.n.s. aamma 70-imi u.n.k. aserorneri tamarmik tassaapput Jehovap ullui siooranangaartut. Ulluni tamakkunani Jehovamut pikitsitsisut eqqartuunneqarput. (Malaki 3:23; Lúkarse 21:22) Taamani inuppassuit ajussusertik pissutigalugu toqutaapput. Ilaalli aniguipput. Jehovap iliuuseqannginnermini mianersoqquseqqaartarpoq, taamaalilluni ajortut aserornissamik nalunaarfigalugit inuillu peqqusersuitsumik uummatillit annannissamut periarfissaqartillugit.
2, 3. (a) Siulittuut suna ukiumi 33-mi ullormi piinsimi saqqummiunneqarpa? (b) Ulloq piinsi ukiumi 33-mi u.n.k. aallarnerfigalugu suna piumasarineqarpa Jehovap aqqani torlorfiginnissagaanni?
2 Ukiumi 70-imi u.n.k. Jerusalemip aserornera tamatumunnga assersuutissaalluarpoq. Ukiunik 900-ngajaannik sioqqullugu pisoq tamanna siulittuutigalugu pruffiiti Joel ima allappoq: „Seqineq allanngussaaq taarnerinnaalerluni, qaammallu aanngorluni, Jehovap ullussaa pingaaqisoq siooranangaaqisorlu nalliutinngikkallartillugu.“ Qanoq ililluni tamatumani annattoqarsinnaava? Joel Guutimit isumassarsisitaalluni allappoq: „Kinaluunniit [Jehovap] aqqanik torlorfiginnittoq annaanneqassaaq. [Jehovap] oqaasia naapertorlugu qaqqami Sionimi Jerusalaamilu annaffissaqassaaq aniguisunut [Jehovap] qaaqqusaanut.“ — Joel 3:3-5.
3 Ukiumi 33-mi u.n.k. piinsip ulluani Jerusalemimi apustili Peterip juutit ilasiaasullu katersuuttut oqaluffigitillugit Joelip siulittuutaa issuarpaa, takutinniarlugu naliminni eqquunnissaa tusarnaartut ilimagisinnaagaat: ’Tupinnartulianik nalliutitsiumaarpunga qilammi pavani nalunaaqutinillu nunami samani, aammillu innermillu putsumillu isortortalimmik. Seqineq taartunngussaaq, qaammallu aanngorluni, Jehovap ullua angeqisoq ersingaarumaartoq nalliunngikkallartillugu. Piumaarporlu, kinaluunniit Jehovap aqqanik torlorfiginnittoq annakkumaarpoq.’ (apustilit suliait 2:16-21) Inuppassuit Peterimut tusarnaartut tamarmik Mosesip inatsisaasa ataanniipput, taamaattumillu Jehovap aqqa nalunagu. Peterip nassuiarpaa Jehovap aqqa torlorfigissagaanni allattaaq piumasarineqartoq. Pingaartumik Jesusip, toqutaasimasup qilammilu toqusuitsumik inuunermut makititaasimasup, aqqani kuisinneq piumasarineqarpoq. — apustilit suliait 2:37, 38.
4. Kristumiut suna sumi tamaani tusarliutilerpaat?
4 Piinsip ulluaniit kristumiut Jesus makissimasoq pillugu tusarliussaq oqaluussissutigilerpaat. (1 Korintumiut 1:23) Nalunaarutigaat inuit Jehova Guutip anersaakkut ernerisut akuerineqarsinnaasut taamaalillutillu ’Israelimut Guutip pigisaanut’ nutaamut, inuiaqatigiinnut anersaakkut ittunut Jehovap ’ajunngingaarutaanik nalunaarutiginnittunut’, ilaalerlutik. (Galâsiamiut 6:16; 1 Pîtruse 2:9) Toqu tikillugu aalajaakkunik qilammi Jesusip naalagaaffiani kingornusseqataallutik toqusuitsumik inuuneq angussavaat. (Matîuse 24:13; Rûmamiut 8:15, 16; 1 Korintumiut 15:50-54) Kristumiut taakkua aamma Jehovap ullussaata pingaaqisup siooranangaaqisullu nalliunnissaa nalunaarutigissavaat. Juutit sumi tamaaniittut mianersoqqusariaqarpaat Jerusalem juutillu, Guutimut innuttaanerartut, naalliunnartorsuarmit aatsaat taama sakkortutigisumit eqqorneqassammata. Aammali annattoqassaaq. Kikkut? Jehovap aqqanik torlorfiginnittut.
’Ullussani kingullerni’
5. Siulittuutit suut tamakkiisumik eqquunnerat ullumikkut piva?
5 Pissutsit maanna atuuttut assigiinngitsutigut pissutsinut taamani ittunut assingupput. 1914-imiilli inuiaat piffissami immikkut ittumi, Biibilimi ’naggatissamik’, ’pissutsit aaqqissuussaanerata naggatissaanik’ aammalu ’ullussanik kingullernik’ taaneqartumi, inuupput. (Daniel 12:1, 4; Matiuse 24:3-8, NV; 2 Timûtiuse 3:1-5, 13) Ukiuni hundredelinni makkunani naakkittaatsumik sorsunnerit, peqqarniitsumik nakuusernerup innuttaaqatigiillu pinngortitallu aseroriartornerata tamarmik takutippaat Biibilimi siulittuutigineqartut eqquukkiartortut. Tamakku tamaasa nalunaaqutip Jesusip siulittuutigisaata ilagai, takutippaalu inuiaat qanittukkut Jehovap inaarutaasumik ullussaa siooranangaaqisoq misigiumaaraat. Ullussaq tamanna sorsunnissami Harmagedonimik taaneqartumi, ’naalliunnartussamik silarsuaqaleqqaarneranit mannalu tikillugu naleqanngisaannartumik kingornalu naleqassanngitsumik’ sakkortunerpaaffeqassaaq. — Matiuse 24:21; sarĸúmersitat 16:16.
6. (a) Jehova qanoq iliortarsimava qanilaartut annaanniarlugit? (b) Paulusip annannissamut siunnersuutaa sumi nassaarisinnaavarput?
6 Ulloq aseruiffissaq tamanna qanilliartortillugu Jehova inuit qanilaartut annaanniarlugit iliuuseqartarpoq. Maanna ’naggatissap nalaani’ Jehovap ’Israelip Guutip pigisaanut’ anersaakkut ittumut ilaasut kingulliit katersorsimavai, 1930-kkunniillu kiffani nunamiusut soqutigalugit ’amerlangaartut kisinneqarsinnaanngitsut, inuiaqatigiit immikkullu naggueqatigiissut immikkullu inuiaasut immikkullu oqaasillit tamarmik ilaat’ katersulersimallugit. Taakku ataatsitut isigalugit ’annikilliornartussamit angisuumit’ aniguiumaarput. (sarĸúmersitat 7:9, 14) Qanorli ililluta tamatta immikkut aniguinissarput qulakkeersinnaavarput? Apustili Paulus tamatumunnga akivoq. Romamiunut allakkamini kapitali 10-mi annannissamut pitsaasumik siunnersuivoq — siunnersuutillu tamakku taamanikkut ullumikkullu naleqqulluartuupput.
Annannissamik qinnut
7. (a) Neriuut suna Rûmamiut 10:1, 2-mi eqqaaneqarpa? (b) Sooq taamani Jehovap ’nutaarsiassaq’ annerungaartumik saqqummiuppaa?
7 Paulusip Rûmamiunut agdlagkat allammagit Israelikkut inuiaqatigiittut Jehovamit ajattorneqareersimapput. Taamaattorli apustili neriorsueqqissaarpoq: ’Qatanngutikka, uummamma taakku pillugit Guutimut kissaatigisaa qinnutigalu tassa annaanneqaqqullugit.’ Neriuutigaa juutit ataasiakkaat Guutip piumasaanik eqqorluartumik ilisimasaqalissasut, taamaalillutik annaanneqaqqullutik. (Rûmamiut 10:1, 2) Jehovattaaq inuianni tamani uppertut tamaasa annaanneqarnissaat kissaatigaa, soorlu Juánase 3:16-imi eqqaaneqartoq: ’Guutip silamiut ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ (Juánase 3:16) Jesusip pilliutaa utertitsissutaasoq annannissamik taama angingaartigisumik periarfissiivoq. Soorlu Noap nalaani ullunilu allani eqqartuussiffiusuni pisimasoq Jehovap tamatigut ’nutaarsiassamik nuannersumik’ oqaluussinissaq isumagisarpaa, taamaalilluni annannissamut aqqut tikkuarlugu. — Mákorse 13:10, 19, 20.
8. Kristumiut ilumoortut kikkut ullumikkut ajunngitsumik kissaateqarfigaat, soorlu qanga Paulus taama iliorsimasoq, aamma qanoq?
8 Juutit juutiunngitsullu tamaasa ajunngitsumik kissaateqarfigalugit Paulus periarfissat tamaasa atorlugit oqaluussiuartarpoq. ’Juutit griikerillu nakimajunnaarsillugit oqaluttarpoq.’ Utoqqaanertat Efesusimeersut ima oqarfigai: ’Qanorlu sumik iluaqutaasumik nipangiussaqanngitsunga, tamaasali ilissinnut oqaatigigikka ajoqersorlusilu inuit tutsaanni illunilu. Juutillu griikerillu nalunaajaaffigalugit Guutimut allamik isumataarnissamik uppernissamillu naalakkatsinnut Jesus Kristusimut.’ (apustilit suliait 18:4; 20:20, 21) Taassumatut Jehovap nalunaajaasui ullumikkut ilungersorlutik oqaluussisarput, inunnut kristumiuunerartunuinnaanngitsoq aammali inunnut tamanut, allaat ’nunap isua’ tikillugu. — apustilit suliait 1:8; 18:5.
’Oqaaseq uperisassaq oqaluussissutigisaq’
9. (a) Rûmamiut 10:8, 9-mi uppernerup qanoq ittup piginissaanut kajumissaarneqarpugut? (b) Qaqugukkut aamma qanoq ililluta uppernerput nassuerutigisariaqarparput?
9 Annassagaanni aalajaatsumik uppissuseqarneq pisariaqarpoq. Mosesimik allakkat tallimaat 30:14 issuarlugu Paulus nalunaarpoq: ’„Oqaaseq ilinnut qanittunnguuvoq, qaninni uummatinnilu ippoq“; tassa „oqaaseq“ uperisassaq oqaluussissutigisarput.’ (Rûmamiut 10:8) ’Oqaaseq upperisassaq’ oqaluussissutigigaangatsigu uummatitsinni sorlaqarnerulersarpoq. Paulus taamaaliorsimavoq, oqaasiisalu tulliuttut kajumissaarsinnaavaatigut taassumatut allanut upperisamik aveqatiginneqqulluta: ’Qaninnimmi Jesus nassuerutigigukku naalagaasoq, uummatikkullu upperuit Guutip toqusunit makitikkaa, taava annakkumaarputit.’ (Rûmamiut 10:9) Kuisinnermi allanut taama nassuerutiginninneq kisimi pineqanngilaq, aammali kingorna tamatigut taama nassuerutiginnittuartariaqarpugut, ilungersuussilluta sallusuissutip immikkoortui tamaasa allanut oqaluussissutigalugit. Assersuutigalugu Naalakkatta kisimi oqartussaasup Jehovap aqqa angingaartoq, kunngerput Messiasiusoq utertitsiserpullu naalagaq Jesus Kristus aamma Guutip naalagaaffianik neriorsuutit nuanningaartut pillugit sallusuissut oqaluussissutigisariaqarpavut.
10. Rûmamiut 10:10, 11 naapertorlugu ’oqaaseq upperisassaq’ qanoq maleruarneqartariaqarpa?
10 ’Oqaatsimik upperisassamik’ tamatuminnga akuersiumanngitsut maleruaajumanngitsullu annaanneqarsinnaanngillat, soorlu apustilip nangilluni nassuiaraa: ’Uummatikkummi upperluni iluartuutitaajumaarnarpoq, qanikkullu nassuerluni annakkumaarnarpoq, allakkat ima oqaaseqarmata: „Kinaluunniit taassumunnga uppertoq pakatsisarneqassanngilaq.“’ (Rûmamiut 10:10, 11) ’Oqaatsimik upperisassamik’ tamatuminnga eqqorluartumik paasisaqartariaqarpugut uummatitsinnilu ineriartortittuarlugulu allanut oqaluussissutiginissaanut kajumissuseqarluta. Jesusip nammineq ima eqqaasippaatigut: ’Uannimmi oqaatsinnillu ittoorutiginnittoq eqqarleriinni ukunani uersartuni ajortuliortuni inuup ernerata ittoorutigiumaarpaattaaq tikiukkuni Ataatami naalannassusia pigalugu inngilillu iluartut ilagalugit.’ — Mákorse 8:38.
11. Nutaarsiassaq nuannersoq qanoq annertutigisumik oqaluussissutigineqassava, aamma sooq?
11 Pruffiitimit Danielimit siulittuutigineqartutut ulluni kingullerni nunarsuup isui tikillugit Guutip naalagaaffia pillugu nalunaajaasoqartillugu ’sianisuut qaammarikkumaarput qilaap qaammarissusiatut’. ’Amerlasuuninngooq unnersuussissapput iluarnermut’, ilumoortumillu ilisarsineq annertuseqaaq Jehova naggatissaq pillugu siulittuutinik paasinarsaajuarmat. (Daniel 12:3, 4) Tusarliussaq tamanna sallusuissummik naapertuilluarnermillu nuannarisallit annaanneqarnissaannut aalajangiisuuvoq.
12. Rûmamiut 10:12 qanoq ililluni inngilip oqariartuutaanut sarĸúmersitat 14:6-mi eqqaaneqartumut atassuteqarpa?
12 Apustili Paulus ima nangippoq: ’Naligiippummi juutit griikerillu ataaseq tamarmik naalagarimmassuk torlorfigisiminut tamanut pisoorsuusoq.’ (Rûmamiut 10:12) Iivangkiiliu imaluunniit nutaarsiassaq nuannersoq ullumikkut nunarsuaq tamakkerlugu oqaluussissutigineqartariaqarpoq — inuiannut tamanut. Inngili sarĸúmersitat 14:6-imi eqqaaneqartoq suli qilaap missaagut timmivoq ’iivangkiiliumik ittuinnartumik oqaatigisassaqarluni nunamiusunut tamanullu inuiaqatigiissunut immikkullu naggueqatigiissunut immikkullu oqaasilinnut immikkullu inuiaasunut’. Tusarliussamik tamatuminnga ilassinnittut qanoq iluaqutigissavaat?
Jehovap aqqanik torlorfiginninneq
13. (a) Ukiormanna 1998-imi allassimaffik qulequtassarput sunaava? (b) Sooq allassimaffik tamanna ullumikkumut tulluarpa?
13 Joel 3:5 issuarlugu Paulus ima allappoq: ’Kinaluunniit Jehovap aqqanik torlorfiginnittoq annakkumaarpoq.’ (Rûmamiut 10:13) Tulluartorujussuuvoq Jehovap Nalunaajaasuisa 1998-imi oqaatsit tamakku ukiumut allassimaffittut toqqarsimammatigik! Jehova tatigalugu siumukarnissaq aqqanillu siunertaanillu nuanningaartunik aqqanut attuumassutilinnik nalujunnaarsitsinissaq maanna aatsaat taama pingaaruteqartigaaq! Ukiuni hundredelinni siullerni pisoqarsimaneratut pissutsit aaqqissuussaanerata ajortunngorsimasup matuma ulluini kingullerni mianersoqqussut manna tusarliunneqartarpoq: ’Eqqarleriinnit ukunannga killormoortunit annatsinniaritsi!’ (apustilit suliait 2:40) Taamaalillutik nunarsuaq tamakkerlugu inuit Guutimik mianerinnittut kajumissaarneqarput Jehova torlorfigeqqullugu nammineq annaanneqarnissartik aammalu taakkua nutaarsiassamik nuannersumik oqaluussinerannut tusarnaartut annaanneqarnissaat qinnutigalugu. — 1 Timûtiuse 4:16.
14. ’Qaarsumi’ sumi annannissarput ujartorsinnaavarput?
14 Jehovap ullussarsua nunarsuarmut nalliuppat qanoq pisoqassava? Amerlanersaasa annanniarlutik Jehova saaffiginavianngilaat. Inuit amerlanersaat ’qaqqanut qaarsunullu oqassapput: „Nakkarfigitigut isertorlutalu issiavissaarsuarmi issiasup kiinaanit savaaqqallu kamanneranit“’. (sarĸúmersitat 6:15, 16) Pissutsit aaqqissuussaaneranni matumani peqatigiiffissuit suliniaqatigiiffiillu qaqqatut ittut neriuffigissavaat. Pitsaanerussagaluarporli Qaarsuusoq angisooq, Jehova Guuti, neriuffigippassuk! (5 Moses 32:3, 4) Taanna pillugu kunngi David oqarsimavoq: „Jehova, qaarsora, pallittaalisara, aniguisitsisiga.“ Jehova tassaavoq „Qaarsoq annaffipput“. (Tussiaat 18:3; 95:1) Aqqa „pallittaalisatut ippoq“, pisussat aarlerinarseruttorfianni taassuma kisimi „pallittaalisatut“ illersorsinnaavaatigut. (Ussatit 18:10) Taamaattumik immikkut pingaaruteqarpoq inunnit 6 milliardinit maanna inuusunit sapinngisamik amerlasuut ilumoortumik ilungersuussisumillu Jehovap aqqanik torlorfiginninnermik ilinniarnissaat.
15. Rûmamiut 10:14-mi suna takutinneqarpa upperneq pillugu?
15 Tulluartumik Paulus nangilluni ima aperivoq: ’Qanorli ilillutik upperfiginngisartik torlorfigissavaat?’ (Rûmamiut 10:14) Inuppassuit suli ikiorneqarsinnaapput ’oqaatsimik upperisassamik’ pigiliussinissaminnik, Jehova torlorfigileqqullugu annaqqullutillu. Upperneq pingaartorujussuuvoq. Allakkamini allani Paulus ima allappoq: ’Kisianni uppersuseqarnani Guutimut iluaritinneq ajornaqaaq, Guutimut orniguttup upperisassarimmagu tassaasoq, ujarlersinilu akilerumaarai.’ (Eprîarit 11:6) Qanorli ilillutik inuit millionillit suli allat Guuti upperfigilissavaat? Romamiunut allakkamini Paulus aperivoq: ’Qanoq ilillutik tusaamanngisartik upperfigissavaat?’ (Rûmamiut 10:14) Jehovap periarfissippai tusarnissaannik? Aap, taamaaliorpoq! Paulus nangippoq: ’Qanoq ilillutik oqaluussisoqanngippat tusassappat?’
16. Guutip aaqqissuussaani sooq oqaluussisartut pingaaruteqarpat?
16 Paulusip tunngavilersuutaata takutilluarpaa oqaluussisoqartariaqartoq. Jesusip eqqartorpaa taamaaliortoqassasoq, ’pissutsit aaqqissuussaanerata naggatissaa’ tikivillugu. (Matiuse 24:14; 28:18-20, NV) Oqaluussineq tassaavoq Jehovap inuit annakkumallutik atermi torlorfiginnilernissaannik ikiorneqarnissaat pillugu aaqqissuussaasa ilaat pingaartoq. Allaat kristumiuuneraqatigiit akornanni amerlanerit Guutip aqqa angingaartoq ataqqiniarlugu iliuuseqarneq ajorput. Amerlasuut Guutip ataasiullunilu pingasuussusianik ajoqersuummi paasiuminaatsumi ’kinaassusilinnit’ marlunnit allanit Jehova immikkoortissinnaanngilaat. Aamma amerlasuut Tussiaat 14:1-imi 53:2-milu eqqaaneqartutut ipput: „Silaatsut uummatimikkut oqartarput: ’Guuteqanngilaq!’“ Annikilliornartussami qanilliartortumi aniguissagunik taakkua ilisimasariaqarpaat Jehova tassaasoq Guuti uumasoq, paasillugulu aqqa qanoq pingaaruteqartigisoq.
’Oqaluutiginnittut isigaasa ila sakimminassusii’
17. (a) Sooq pissusissamisoorpa Paulusip pilersitseqqinnissamik siulittuut issuarmagu? (b) Sooq oqaluussisartut isigiuminartuuppat?
17 Apustili Paulus suli pingaartumik apeqquteqarpoq: ’Qanorlu ilillutik aallartinneqanngikkunik oqaluussissappat? Soorlu allassimasoq: „Eqqissinermik nalunaarummik ajunngitsumik oqaluutiginnittut isigaasa ila sakimminassusii.“’ (Rûmamiut 10:15) Paulusip Jesaja 52:7, pilersitseqqinnissamik siulittuut 1919-imiilli eqquussimasoq, issuarpaa. Ullumikkuttaaq Jehova ’nuannersumik oqariartuuteqartunik, eqqissinermik tusarliisunik, tusagassanik nuannersunik aatsisunik, annaanneqarnermik tusarliisunik’ aallartitsivoq. Guutip ’paarsisitai’ tanitaasut suleqataallu naalallutik qiimmattarlutillu suaartarput. (Jesaja 52:7, 8) Ullumikkut annassutissamik tusarliisut illumiit illumut angalaarnerminni isigaat immaqa qasusinnaapput pujoralassinnaallutillu, kiinaatigulli nuannaarnerat takuneqarsinnaavoq! Nalunngilaat Jehovamit pisinnaatitaaffeqarlutik eqqissinermik nutaarsiassaq nuannersoq oqaluussissutigeqqullugu inuillu aliasuttut tuppallersaqqullugit, taakku ikioqqullugit Jehovap aqqanik torlorfiginninnissaannut annaanneqarnissaannullu.
18. Rûmamiut 10:16-18-mi qanoq eqqaaneqarpa nutaarsiassamik nuannersumik oqaluussissutiginninnerup naggataarutaasumik inernera?
18 Inuit ’tusakkaminnit uppertunngoraluarpata’ naalakkumanngikkaluarpataluunniit Paulusip oqaasii makku ilumoorput: ’Tusannginnerpat? Naaggali, „nipaat nunarsuarmut tamarmut oqaasiilu inuit najugaata isuinut tutsiupput“.’ (Rûmamiut 10:16-18) Soorlu ’qilaap oqaluttuarigaa Guutip naalannassusia’, pinngortitani takuneqarsinnaammat, nalunaajaasuisa nunamiittut aamma oqaluussissutigisariaqarpaat „[Jehovap] ukiua saammassivik ullorlu Guutitta akiniaaffia, aliasuttut tamaasa tuppallersaqqullugit“. — Tussiaat 19:2-5; Jesaja 61:2.
19. Ullumikkut ’Jehovap aqqanik torlorfiginnittut’ suna misigiumaarpat?
19 Jehovap ullussaa pingaaqisoq siooranangaaqisorlu qanilliartorpoq. „Eqqanaq ullussaq inna! [Jehovap] ullussaa qanillivoq, nalliukkumaarpoq nungutitsineq [Jehovamit] pisoq nassataralugu.“ (Joel 1:15; 3:4) Qinnutigaarput inuppassuit amerlanerusut nutaarsiassaq nuannersoq piaartumik qisuariarfigiumaaraat Jehovallu peqatigiissortaanut ornigullutik. (Jesaja 60:8; Habakkuk 2:3) Eqqaamasigik Jehovap ullui allat ajortunik nungutitsiffiusut — Noap nalaani, Lotip nalaani aamma Israelikkut Judakkullu tunussisut nalaanni. Maanna annikilliornartut annerpaartaat nalliutilerpoq, Jehovallu anorersuata ajussuseq nunarsuarmit peerluinnassavaa taamaalillunilu paratiisissaq naassaanngitsumik eqqissineqarfiusoq aqqutissiorlugu. Illit aalajaallutik ’Jehovap aqqanik torlorfiginnittut’ akornanniissavit? Taamaappat tipaatsugit! Guutip neriorsorsimavaatit annaatissallutit. — Rûmamiut 10:13. (wE 15/12 97)
Qanoq akissavit?
□ Ukiumi 33-mi u.n.k. piinsimi nutaat suut oqaluussissutigineqarpat?
□ Qanoq ilillutik kristumiut sianigisinnaavaat ’oqaaseq upperisassaq’?
□ ’Jehovap aqqanik torlorfiginninneq’ qanoq paasisariaqarpa?
□ Guutip naalagaaffianik oqaluussisartut ’isigaat sakimminartuusut’ qanoq paasisariaqarpa?
[Qupp. 15-imi assiliartaq]
Guutip innuttaasa taassuma ajunngingaarutai oqaluussissutigisarpaat Puerto Ricomi, Senegalimi, Perumi, Papua Ny Guineamilu, aap, nunarsuarmi tamarmi