Guutip oqaasianut uppernerput nakussatsineqarpoq
ATUAKKANIT allanit tamanit Biibili atuarneqarnerpaasimavoq. Kisianni qassit takutissimavaat oqariartuutaanut upperlutik? Biibilimi nassuiarneqarpoq ’upperneq tassaanngitsoq tamarmik pigisaat’. (2 Tásalûníkamiut 3:2) Ersarippoq upperneq inunnguuserisimanngikkipput. Ineriartortinneqartariaqarpoq. Aamma uppersuseqaraluartut taamaattussaannartut isigisariaqanngilaat. Uppernikillisoqarsinnaavoq upperunnaartoqarsinnaalluniluunniit. Tamaattumik ’uppernikkut peqqissuussagutta’ ilunngersuussisariaqarpugut. — Títuse 2:2
Tamaattumik Jehovap Nalunaajaasuisa Siulersuisoqatigiivisa pissutissaqarluarlutik 1997/98-imi ataatsimeersuarnernut „Guutip oqaasianut upperneq“ qulequtassatut toqqarsimavaat. Jehovap nalunaajaasui allallu milionilikkuutaat ataatsimeersuariarlutik katersuussimapput Guutip oqaasianut uppernertik nakussatsinniarlugu.
Guutip oqaasia sallusuissutaavoq — uppernitsinnut tunngaviulluni
Ataatsimeersuarnerup ullua siulleq taama qulequtaqarpoq. Najuunnertik pillugu tamarmik nersorneqarput, najuunneq Biibilimut ataqqinninnermik ersiutaalluarmat. Uppernerput ilumoornersoq pillugu apeqqutit eqqarsalernartut saqqummiunneqarputtaaq: ’Uppernerput illersorsinnaavarput, Guutip oqaasia uppernarsaatitut atorlugu? Anersaakkut nerisassat qujamasuutigisarpavut, Biibili, ataatsimiinnerit Biibililersaarutillu taamaattussaannartut isiginagit? Asanninnerput, ilisarsinerput immikkoortitsisinnaanerpullu ineriartortittarpavut?’ Oqalugiartup najuuttut tamaasa kajumissaarpai tusarnaarluarnissaannut, eqqartorlugulu ataatsimeersuarnerup tamatuma ’Guutip oqaasianik upperneq’-mik qulequtallip ikiussagaatigut immitsinnik, uppernittalu qanoq ittuuneranik misissuinissatsinnut.
Ataatsimeersuarnerup qulequtaa tunngavigalugu oqalugiaat qulequtsiunneqarsimavoq „Upperluta saqivugut takunninnata“. (2 Korintumiut 5:7) ’Jehovap nalunaajaasuisa uppernerat tassaanngilaq uppiassuseq,’ taama oqalugiartoq saqqummiussivoq. Tamanna ilumuungaarami! Upperneq ilumoortoq tappiitsuunngilaq. Piviusumik tunngaveqarpoq. Eprîarit 11:1-mi allaqqasoqarpoq: ’Uppernerli tassa neriugisani nakimassutiginaveerlugit takunngisanilu nalorninarinagit’. Oqalugiartoq oqarpoq: „Uppernerput malillugu saqissagutta tunngaveqarluartariaqarpoq.“ Uppernerput malillugu, takunnissinnaanerput pinnagu, saqigatta sukumiisumik nalunngittariaqanngilarput Jehovap siunertani qaqugu qanorlu ililluni eqquuttikkumaaraa. Taanna pillugu nalungeriikkatta tatigilersippaatigut asannittumik naapertuilluartumillu neriorsuutigisani eqquutsisikkumaarai.
Oqalugiaammi „Kristumiut inuusuttut — ilagiit pinngitsoorsinnaanngisaat“-mi inuusuttut eqqaasinneqarput Jehovap isaani qanoq erlinnartigisut. Anguniagaqarnikkut anersaakkut ineriartornissaannut kaammattorneqarput assersuutigalugu Biibili naallugu atuarneratigut tunniulluinnarnissamullu kuisinnissamullu piumasarineqartut naammassinerisigut. Ilinniagaqarnissamut pilersaaruteqarneq nammineq aalajangerneqartussaavoq angajoqqaat peqatigalugit, kisianni ilinniagaqarnerup Guutimut kiffartornermi iluaqutaanissaa pingaaruteqarpoq. Silamiutut ilinniagaqarneq iluaqutaasinnaavoq, tamanna ilutigalugu uppernitsinnut atatillugu ’sorliit iluarnerunersut misilikkutsigik’. — Filípimiut 1:9, 10
Tulliullugit saqqummiunneqarput oqalugiaatit ataqatigiit pingasut ima qulequtallit: „Kikkut najoqqutassiaat maleruarpigit?“ Guutip oqaasianut uppernitta Biibilimi najoqqutassianik maleruaanissatsinnut killippaatigut. Kristumiut Jehovap inatsisaanut maleruaqqusaanullu qutsissunut naalapput. Assersuutigalugu mianersoqquneqarpugut oqaatsit piunngitsut quiasaarnipalaallu atoqqunagit. (Evfisumiut 4:31, 32) Oqalugiartoq ima aperivoq: „Isumaloqqajaagaangavit aappat meeqqatilluunniit nilliaffigisarpigit?“ Soorunami tamanna kristumiunut naleqqutinngilaq. Guutip maleruagassaqartippaatigut inuttut qanoq isikkoqassanersugut. Kristumiut ’annoraassanik ipinnanngitsunik’ atisaqartariaqarput. (1 Timûtiuse 2:9, 10) Oqaaseq ’ippinnanngitsoq’ inuup imminut ataqqinnissusianut, ileqqorissusianut ingasaassinaveersaarneranullu tunngasinnaavoq. Allanut asanninnitta kajumissisippaatigut Biibilimilu najoqqutassianit suullu iluartuuneranik sianissuseqarnermit siulersorneqarluta.
Oqalugiaatini tulliuttuni marlunni Eprîarit 3:7-15, aamma 4:1-16-versikkuutaarlugit sammineqarput. Biibilimi allassimasut taakkua mianersoqquaatigut ’ajortip salloqittaaneragut manngerseqqunata’. (Eprîarit 3:13) Qanoq ililluta ajorti assortorsinnaavarput? Jehovap oqaatsini aqqutigalugit ikiortarpaatigut, ’Guutip oqaasia uumavoq killinnartorsuullunilu . . . uummatillu eqqarsaatai isumaalu killisiorsinnaammagit’. — Eprîarit 4:12.
Ullormi ataatsimeersuarfimmi siullermi oqalugiaat kingulleq tassaavoq „Inunnut tamanut atuagaq“. Biibilip ilumoornera, eqqorluarnera atorluarsinnaaneralu sammineqarnerupput. Nuanneqaaq tusaallugu oqalugiartup atuagassiaaraq 32-nik quppernilik qulequtaqartoq Inunnut tamanut atuagaq saqqummersimmagu! Atuagassiaaqqap siunertaraa inuit naak ilinniarnertuujugaluarlutik Biibilimik ilisimasakitsut ikiornissaat. Oqalugiartup naggataatigut eqqaavaa: ’Inuit nammineerlutik Guutip oqaasia misissortariaqarpaat. Qularinngilarput Biibili misissorunikku paasissagaat tassaasoq atuagaq immikkut ittoq inunnut tamanut atuagaq!’
’Uppernitsinnik inerititsisoq’ maliguk
Ataatsimeersuanerup ulluata aappaani qulequtap tamatuma tikkuuppaatigut Jesus Kristusimut, ’uppernitta inerititsisuanut’. Taassuma ’tumai atuaqqissaartariaqarpavut’. (Eprîarit 12:2; 1 Pîtruse 1:21) Kristumiuunerartut amerlasuut oqarfigineqartarput: ’Naalakkatsinnut Jesus Kristusimut upperuit annakkumaarputit!’ Tamannali upperigaanni naammappa? Biibilimi allaqqasoqarpoq ’upperneq sulianik ilaqanngitsoq toqugasoq’. (Jâko 2:26) Jesusimut uppertariaqarpugut aammali suliarisimasai ilaarlugit iliuuseqartariaqarpugut, pingaartumik Guutip naalagaaffianik nutaarsiassaq nuannersoq pillugu oqaluussilluta.
Ullaap tungaani oqaluussinerput sammineqarneruvoq. Paulusitut, annannissamik nutaarsiassap nuannersup tusarliunnissaa kajumilluarluta oqaluussissutigisariaqarparput. (Rûmamiut 1:14-16) Jesusip inuit sumiluunniit naapitani oqaluussiffigisarpai. Naak illumiit illumut angalaartarnerput kinguneqarluartaraluartoq, inuit amerlasuut kasuttorfigigaangatsigik angerlarsimaneq ajorput. (apustilit suliait 20:20) Amerlasuut atuartuupput, sulisarput, pisiniarput, imaluunniit angalapput. Tamaattumik inuit sumiluunniit naapitakkavut oqaluussiffigisariaqarpavut.
Oqalugiaatip „Sallusuissut aalajangiusimallugulu sorlaqarfigiuk“-ip eqqaasippaatigut ullut tamaasa ajoqersukkat nutaat qassit kuisittarnersut — agguaqatigiisillugit ullormut 1000-t! Nutaat taakkua uppernikkut aalajaatsumik sorlaninnissaat pisariaqarpoq. (Kulorsamiut 2:6, 7) Oqalugiartup nassuiarpaa naasup sorlai imermik inuussutissanillu milluaasut saniatigullu naasoq napatillugu. Taamatuttaaq ajoqersuganngortut sallusuissummi sorlaqarluarsinnaapput atuaqqissaartarnikkut ineriartornartumillu ilagisaqartarnikkut.
Siunnersuutit tamakku ingammik kuisittussanut naleqqupput. Ataatsimeersuarnerup ulluata aappaani ajoqersuganngortut Jesusip maligassiaa malillugu kuisipput. Oqalugiaat „Guutip oqaasianut upperneq kuisinnermik kinguneqartarpoq“ kuisittussanut eqqaasitsivoq imermut morsunneq assersuutaasoq inuk inooriaaserisimasaminut atatillugu ’toqusoq’ tassa namminissarsiortumik kissaatit soraarulluinnarlugit. Imermit qaqinera assersuutaavoq soorlulusooq inuk Guutip piumasaanik iliorniarluni uummaqqittoq.
Oqalugiaat „Upperneq assoruutigiuk“ Jûtarsip agdlagai tungavigalugit oqalugiaataavoq. Uppernitta aserornartunut illersornissaanut kajumissaarneqarpugut, soorlu kanngunartuliornermut, pikititsiumatuussusermut tunussinermullu. Tulliullugu angajoqqaat — ingammik ataataasut — saaffigineqarput oqalugiaammi „Inoqutinik isumaginninneq qanoq paasisariaqartoq“-mi. Ilaqutariit anersaakkut, timikkut misigissutsikkullu pisariaqartitaasa matussuserneqarnissaat Biibilimi peqqussutigineqarpoq. (1 Timûtiuse 5:8) Tamaaliussagaanni attaveqatigiinneq piffissaqaqatigiinnerlu pisariaqarpoq. Jehova Guutip nuannaarutigisaqaa angajoqqaat kristumiut meeqqatik sallusuissummi peroriartortinniarlugit ilungersoraangata.
Oqalugiaatit tulliuttut ataqatigiit, „Guutip illuanukarta“, kristumiut ataatsimiinnerinut qujamasunnissatsinnut eqqaasippaatigut. Ataatsimiinnerni silarsuarmi ajornartorsiutit qimakkallarnissaannut, qiimmassaqatigiinnissatsinnut uppeqatitsinnullu asanninnermik ersersitsinissatsinnut periarfissaqartarpugut. (Eprîarit 10:24, 25) Ataatsimiinnerni ilinniartitsisutut pikkorissartarpugut, Jehovallu siunertaanik paasisaqarnerulersilluta. (Ussatit 27:17) Qanortoq ilagiinnit avissaanngisaannarta, taamalu Jesusip oqaasii eqqaamallugit: ’Marlummi pingasulluunniit atera tunaaralugu katisimasaraangata akornanniittaraanga.’ — Matîuse 18:20.
Ullormi naggataarutaasumik oqalugiaatigineqartoq tassaavoq „Maannakkut uppernerit misilinneqarpoq“. Uppernerup misilinneqarsimanngitsup qanoq ittuunera, tassa qanoq ilumoortiginera nalunarpoq. Checkimut suli aningaasanngortinneqarsimangitsumut assersuunneqarsinnaavoq. Ilumoorpasikkaluarpoq, kisianni ilumoortuua? Upperneq aatsaat misilinneqarsimappat, uppernarsisimassaaq ilumoortuunersoq. (1 Pîtruse 1:6, 7) Oqalugiartoq oqarpoq: „Ilaannikkooriarluni nutaarsiassalerisut naalakkersuisullu palasinit tunussisunillu sunnerneqarlutik eqqunngitsumik unnerluutit kristumiutullu uppernitsinnik inooriaasitsinnillu salluliuutit saqqummiuttarpaat. . . . Akueriinnassanerpavut Satanimit tappiillisinneqarsimasut siorasaarineri sanngiillisitsiniarnerilu nutaarsiassarlu nuannersoq kanngusuutigilerlugu? Sallusuissut pillugu salluliornerit ataatsimiigiartarnitsinnut, oqaluussinitsinnullu annikillisitsissappat? Imaluunniit aalajaalluta sapiillutalu nutaarsiassaq nuannersoq Guutip nalagaaffia pillugu oqaluussissutigiuaannarusupparput?“
Uppernikkut inuuneq
Ataatsimeersuarnerup ulluata pingajuanut Paulusip oqaasii makku qulequtaapput: ’Nalunanngilarli inatsisitigut Guutimi iluartuutinneqartoqanngitsoq, iluartormi uppernikkut inuussavoq.’ (Galâsiamiut 3:11) Oqalugiaatit ataqatigiaat „Joelip allagai ullutsinnut siulittuutaasut“ ullaap tungaani immikkut pingaaruteqarput. Joelip allagai ullutsinnut tikkuussipput piffissallu ilungersunarnera eqqarsaatigalugu ima allassimasoqarpoq: „Eqqanaq ullussaq inna! [Jehovap] ullussaa qanillivoq, nalliukkumaarpoq nungutitsineq [Jehovamit] pisoq nassataralugu.“ (Joel 1:15) Soorlu pillertat qasujuitsut, taamattaaq kristumiut tanitat sunaluunniit akornutigisimanngilaat naggatissap nalaani matumani nutaarsiassap nuannersup oqaluussissutiginerani.
Joelip allagaasa aamma neriuuteqalersippaatigut, allaqqasoqarami: „Kinaluunniit [Jehovap] aqqanik torlorfiginnittoq annaanneqassaaq.“ (Joel 3:5) Tamanna isumaqanngilaq Jehovap aqqanik atuineq naammattoq. Allamik isumataarnissaq uummammit pisumik pisariaqarpoq. Tamatuma nassatarivaa eqqunngitsuliornermik soraarussilluinnarneq. (Joel 2:12, 13) Nangaanissamut piffissaanngilaq, tassami Jehovap qanittukkut inuiaat eqqartuussammagit, soorlu qanga Judami kunngip Josafatip nalaani Moabikkunnut, Ammonnikkunnut qaqqanilu Se’irimiunut tamaaliorsimasoq. — 2 Israelikkut 20:1-30; Joel 3:2, 12.
Najuuttut tamarmik qiimmassarneqarput oqalugiaammi: „Uppersuseqarnerit takutiguk Jehova utaqqillugu“. Ullumikkut naggatissap nalaani inuunitsinni kingumut qiviaraangatta qiimmatsaatigisarpavut Jehovap neriorsuutaasa amerlanerit eqquutereersimaneri. Suli aamma allat eqquuttussat qilanaarisinnaavavut. Jehovap innuttaasa utaqqikatannatik eqqaamasariaqarpaat Jehovap neriorsuutini tamaasa eqquutitikkumaarai. — Títuse 2:13; 2 Pîtruse 3:9,10.
Ullaap tungaani saqqummiussanut naggataarutigineqarpoq isiginnaagassiaq ima qulequtalik: „Kristumiut qanoq ilillutik annilaanganeq isumakulunnerlu anigorsinnaagaat“. Isiginnaagassiami piviusorsiorpaluttumi kajumissaarneqarpugut imminut misissussasugut nunap piisigut anguniakkanut qanoq isiginnittaaseqarnerluta. Inuunermi isumakuluutit pinngitsuussagutsigik pisariaqanngitsut — sumiluunniit nunarsuarmi najugaqaraluarutta — isitta tappissuutinnissaanut Guutillu nalagaaffiata toraarnissaanut Jesusip ilitsersuutaa malittariaqarparput. — Matîuse 6:22.
Tamanut ammasumik oqalugiaat soqutiginartumik qulequtaqarpoq: „Uppernerit siunissallu“. Silarsuarmi ajornartorsiutit politikkikkut siulersuisunit aaqqinneqarsinnaannginneri uppernarsarneqarpoq. (Jeremia 10:23) Inuiaat oqaluttuarisaanerat uteqattaarlunilusooq pisarpoq, ajutoornerit annertusineruinnartarsimallutik. Jehovap nalunaajaasuisa siunissaq qanoq isigaat? Qularutiginngilluinnarparput inuit aalajaatsut siunissaat Guutip naalagaaffiata ataani pitsaanerpaajumaartoq. (Matîuse 5:5) Guutip oqaasianik uppertunut tamanut neriorsuutini eqquutitikkumaarpai. Biibilimimi allaqqasoqarpoq: „Jehova ujarsiuk nanisassaatillugu, torlorfigisiuk qanitsillugu.“ — Jesaja 55:6.
Jesus pingaaruteqartumik ullutsinnut tungasumik aperisimavoq: ’Inuup ernera tikiukkuni uppernermik nunami nassaarumaarnerpa?’ (Lúkarse 18:8) Ataatsimeersuarnermi oqalugiaammi kingullermi oqalugiaatigineqarsimasut uteqqiiffigineqarput aammalu ullutsinni Guutip oqaasianut uppertunik nassaassaqartoq uppernarsarneqarpoq, naak nunarsuaq inuuffigisarput silamiorpalukkaluaqisoq uppernermillu amigaateqaraluaqisoq.
Tamaakkaluartoq immitsinnut aperisinnaavugut: ’Guutimut oqaasianullu uppernera aalajaalluinnarpa?’ Ataatsimeersuarnerup „Guutip oqaasianut upperneq“-rup apeqqutip tamatuma akissutissarsiornerani ikiorsinnaasimavaatigut. Jehova qutsavigaarput taassumunnga oqaasianullu Biibilimut uppernerput, nakussatsinneqarsimammat. (wE 15/1 98)
[Qupp. 24-mi assiliartaq]
Nammineq piumassutsiminnik ikiuisut nuannaarutigaat ataatsimeersuarianut tuusintilikkuutaanut ikiuisinnaanertik.
[Qupp. 25-mi assiliartaq]
Nunarsuarmi sumi tamaani arsaattarfissuit imaattut ataatsimeersuarfigineqarput
[Qupp. 25-mi assiliartaq]
L. A. Swinglep Siulersueqatigiinninngaanneersup atuagassiaaraq nutaaq saqqummersippaa
[Qupp. 26-mi assiliartaq]
Amerlasuut Jehovamut tunniulluinnarsimasut kuisipput
[Qupp. 27-mi assiliartaq]
Ataatsimeersuarnermi najuuttut nuannaarlutik erinarsorsimapput. Asseq ikkuneqartoq: Isiginnaagassiaq „Kristumiut qanoq ilillutik annilaanganeq isumakulunnerlu anigorsinnaagaat“