Guutip qitornaasa erniinnaq kiffaanngissuseq naalannartoq pigilissavaat
’Pinngortitammi naalatsigititaapput piunngitsumut . . . neriugalugu pinngortitattaaq aserujasumut kiffaasut kiffaajunnaarsinneqarumaartut Guutip qitornaasa kiffaanngissusiata naalannaataat pigilerlugu.’ — RÛMAMIUT 8:20, 21.
1. Jesusip pilliutaa ullormi saammaannartitsivimmi qanoq siumut assersuutigineqarsimava?
JEHOVAP ernitui pilliutitut utertitsissutitut tunniussimavaa taamaalillunilu 144.000-it qilammi inuunissamik inuiaallu sinneri nunarsuarmi naassaanngitsumik inuunissamik periarfissillugit. (1 Juánase 2:1, 2) Soorlu allaaserisami siulianiittumi eqqaaneqartoq Jesusip kristumiunut anersaamik kinguaassiarineqartunut pilliutaa siumut assersuutigineqarsimavoq Israelitoqqami palasiunerup ukiut tamaasa ullormi saammaannartitsivimmi nammineq, inoqutini naggueqatigiillu Levikkut pillugit ussimmik ajortaaruteqqussutitut pilliuteqartarsimaneratigut. Ullormi tamatumani aamma savaasaq ajortaaruteqqussutitut pilliutigisarpaa Israelikkut allat tamarmik iluaqutissaannut, soorluttaaq Kristusip pilliutaa inuiaat tamarmik iluaqutigisinnaagaat. Savaasap uumasup Israelikkut ukiumi qaangiuttumi ajortuliorsimaneri assersuutitut inoqajuitsumut aallaruttarpai.a — 3 Moses 16:7-15, 20-22, 26.
2, 3. Paulusip Rûmamiut 8:20, 21-mi oqaaserisimasai qanoq paasisariaqarpat?
2 Inuit Guutip qilammi qitornarisassaasa neriuutaat allaatigereeramiuk apustili Paulus nangippoq: ’Pinngortitammi kipisallutik neriuttut Guutip qitornaasa saqqummersitaanissaat utaqqivaat; pinngortitammi naalatsigititaapput piunngitsumut, massali piaarinatik naalatsigititsisorli pissutigalugu, neriugalugu pinngortitattaaq aserujasumut kiffaasut kiffaajunnaarsinneqarumaartut Guutip qitornaasa kiffaanngissusiata naalannaataat pigilerlugu.’ (Rûmamiut 8:14, 17, 19-21) Tamanna qanoq paasisariaqarpa?
3 Siuaasarput Adam inuttut naammalluinnartutut pinngortinneqarami tassaalerpoq „Guutip erneraa [imaluunniit qitornaa]“ (Lúkarse 3:38, NV) Ajortulioramili ’aserujasumut kiffaalerpoq’ tamannalu kinguaaminut kingornussatut tunniullugu. (Rûmamiut 5:12) Guutip inuit ’piunngitsumut’ inunngornissaat akueraa naammalluinnanngissuseq kingornummassuk, aammali ’kinguaassaq’ Jesus Kristus tunngavigalugu neriuutissaqartippai. (1 Moses 3:15; 22:18; Galâsiamiut 3:16) sarĸúmersitat 21:1-4-mi eqqaaneqarpoq siunissami ’toqu peqarunnaassasoq, aliasuttoqarunnaarlunilu nilliasoqarunnaarlunilu anniartoqarunnaassasoq’. Neriuut tamanna inuiannut saqqummersinneqarmat qulakkeersinnaavarput innuttaaqatigiit nutaat nunarsuarmi Guutip naalagaaffiata ataani inuusussat isumakkut timikkullu katsorsarneqarluinnassasut ’Guutillu qitornaasut’ nunamiusutut naassaanngitsumik inuulerlutik. Kristusip ukiuni tuusintini naalakkersiunerata ataani inuit naalattut ’aserujasumut kiffaasut kiffaajunnaarsinneqarumaarput’. Naggataarutaasumik misilinneqarnikkut Jehovamut ilumoorunik naassaanngitsumik ajortimit toqumillu kingornukkaminnit aniguisinneqassapput. (sarĸúmersitat 20:7-10) Taava nunarsuarmiut ’Guutip qitornaasa kiffaanngissusiata naalannaataat pigilissavaat’.
Oqarput: ’Aggerna!’
4. ’Imermik inuunartumik akeqanngitsumik pineq’ qanoq isumaqarpa?
4 Tamanna tassaavoq inuiannut neriuut nuannerluinnartoq! Tupinnanngilaq kristumiut anersaamik kinguaassiarineqartut suli nunamiitillutik ilungersuussillutik neriuutip tamatuma allanut oqaluussissutigineqarneranik siulersuisarmata. Jesus Kristusip ’nuliassaanut’ naalannarsisitaasumut ilaagamik tanitat sinneruttut siulittuutip matuma eqquunneranut peqataasarput: ’Anersaaq nuliassarlu oqarput: „Aggerna!“ Tusartorlu oqarli: „Aggerna!“ Imerusuttorlu aggerli; piumasullu imeq inuunartoq akeqanngitsumik piliuk.’ (sarĸúmersitat 21:2, 9; 22:1, 2, 17) Aap, 144.000-it tanitat kisimiunngitsut Jesusip utertitsissummik pilliutaa iluaqutigissavaat. Guutip anersaava katersat ’nuliassat’ nunamiittut aqqutigalugit oqartarpoq: ’Aggerna!’ Aggeqqussummik tusartut naapertuilluassutsimillu erinigisaqartut kajumissaarneqarput ima oqaqqullutik: ’Aggerna!’ namminneq Jehovap asannittumik annaassissutissatut aaqqissussaa iluaqutigiitigalugu.
5. Jehovap nalunaajaasuisa kikkunnut ilaanertik nuannaarutigaat?
5 Jehovap nalunaajaasuisa Guutip Jesus Kristusikkut inuunissamut aaqqissussaa upperaat. (apustilit suliait 4:12) Nuannaarutigaat inuit peqqusersuitsut ilaaqquffigisimammatik Guutip siunertaanik ilisarsiumallutik piumasaatullu iliorumallutik. Maanna ’naggatissap nalaani’ ’imeq inuunartoq akeqanngitsumik piumallugu’ ’aggerusuttut’ tamarmik naalagaaffilersaartarfiinut tikilluaqqusaapput. — Daniel 12:4.
Ukiut ingerlaneranni allanngortitsinerit
6. Piffissani assigiingitsuni Guutip anersaava qanoq Jehovap kiffaanut sunniuteqartarsimava?
6 Guutip siunertami naammassineqarnissaannut piffissaq aalajangersarsimavaa, tamannalu inunnut iliorfiginninneranut attuumassuteqarpoq. (Nalunaajaasup oqaasii 3:1; apustilit suliait 1:7) Aamma Jesusip nunami inuunera sioqqullugu Guutip anersaani kiffaminut kuisarpaa, anersaakkulli qitornamisut kinguaassiarisimanagit. Jesusip nalaani angutit arnallu tunniulluinnartut Jehovap anersaavanit kinguaassiarineqarnissaannut qilammilu kingornussaqarnissaannut piffissanngorpoq. Ullumikkummi? Anersaaq tamanna aamma Jesusip ’savaataanut allanut’ sunniuteqartarpoq, qilammili inuunissamik kissaateqartinnagillu neriuuteqartinngilai. (Juánase 10:16) Taakku Guutip nunarsuarmi paratiisiusumi naassaanngitsumik inuunissamik neriuutissaqartippai, ’savallu allat’ nuannaarlutik tanitat sinneri tapersersortarpaat maanna silarsuup pisoqqap naalernerani Guutillu silarsuassaata naapertuilluartup atuutilinngikkallarnerani nalunaajaanermut peqataasarlutik. — 2 Pîtruse 3:5-13.
7. Katersuinermik suliaq suna Biibilimik Atuaqqissaartartut ulapputigisimavaat, paaratiisili pillugu sumik paasisaqarsimappat?
7 Ukiumi 33-mi ullormi piinsimi anersaaq illernartoq kuineqarmat Guutip ’qitornat amerlasuut naalannarsisissimavai’, nalunanngitsumillu Israelikkut anersaakkut ittut ’Guutip pigisaasa’ 144.000-iusut katersorneqarnissaannut piffissaq aalajangersarlugu. (Eprîarit 2:10; Galâsiamiut 6:16; sarĸúmersitat 7:1-8) 1879-imiilli kristumiunik tanitaasunik katersuineq atuagassiami matumani eqqartorneqartalerpoq. Biibilimilli Atuaqqissaartartut (ullumikkut Jehovap Nalunaajaasuinik taaneqartut) nalusimanngilaattaaq Biibilimi nunarsuarmi paratiisiusumi naassaanngitsumik inuunissaq neriorsuutigineqartoq. Assersuutigalugu Watch Tower juuli 1883-imoortumi ima allassimavoq: „Jesusip naalagaaffini pilersereerpagu, ajussuserlu suujunnaarsereerpagu il. il. nunarsuaq manna paratiisinngorumaarpoq, . . . iliverniittullu tamarmik tassani inuulissapput. Inatsisaanut naalakkunik tassani naassaanngitsumik inuusinnaassapput.“ Ukiut ingerlaneranni tanitanik katersuineq naammassineqariartorpoq, qilammilu inuunissamik neriuuteqanngitsut Jehovap peqatigiissortaanut katersorneqartalerput. Tamanna ilutigalugu Guutip kiffani tanitat kristumiut ernioqqissut malugisarialimmik ilisimasaqartippai. — Daniel 12:3; Filípimiut 2:15; sarĸúmersitat 14:15, 16.
8. 1930-kkut aallartilaarneranni qanoq nunami inuunissamik neriuut pillugu paasisaqarnerulertoqarpa?
8 Ingammik 1931-mit nunami inuunissamik neriugisallit kristumiut ilagiissaannut ilaalerput. Ukiumi tamatumani Jehovap kristumiut tanitat anersaamit kinguaassiarineqartut paasitippai Hesekielip allagai kapitali 9-mi tikkuarneqartut tassaasut katersat taakku Guutip silarsuassaani nunami inuunissamut aniguisussatut nalunaaqutserneqartut. 1932-mi paasivaat ullumikkut assersuutaasumik savat Jehup suleqataa, Jonadab, atorlugu siumut allaatigineqarsimasut. (2 Kunngit 10:15-17) 1934-mi paasinarsivoq ’Jonadabikkut’ taakku aamma Guutimut tunniulluinnartariaqartut. Siornatigut ’amerlangaartut’ tassaasorineqarsimapput katersat pingaannginnerusut anersaakkut ittut, ’niviarsiartatut’ Kristusip nuliassaa ilagalugu qilaliartussat, 1935-miilli paasivaat tassaasut savat allat nunami inuunissamik neriuutissallit. (sarĸúmersitat 7:4-15; 21:2, 9; Tussiaat 45:14, 15) Ingammillu 1935-miit tanitat inunnik peqqusersuitsunik nunarsuarmi paratiisiusumi naassaanngitsumik inoorusuttunik ujarlerluni sulinermi siuttuusimapput.
9. 1935-p kingorna sooq kristumiut ilaasa Naalakkap unnukkorsiortitsinerani assersuutit ilangiiffigisarunnaarsimavaat?
9 1935-p kingorna kristumiut ilaasa Naalakkap unnukkorsiortitsinerani timiusaq viinnilu ilangiiffigisarunnaarpaat. Sooq? Paasigamikku nunami inuunissamik neriuuteqarlutik. Arnaq 1930-mi kuisissimasoq ima oqarpoq: „Naak isumaqaraluarluta [assersuutinik ilangiisarneq] eqqortuusoq, pingaartumik ilungersuussilluni piffissaq tamaat oqaluussisartuugaanni, qilammi inuunissamik neriugisaqarnerlunga qulakkiinngisaannarsimavara. 1935-mi erseqqissarneqarpoq amerlangaartut nunami naassaanngitsumik inuusussat katersorneqalersut. Amerlangaartunut taakkununnga ilaalluta paasigatsigu amerlanersavut nuannaarput, taamaattumillu assersuutit ilangiiffigisarunnaarlugit.“ Kristumiut atuagassiaataat aamma allamik imaqartalerput. Siornatigut ingammik Jesusip ajoqersugai anersaamit kinguaassiarineqartut eqqarsaatigalugit allanneqartarsimapput, 1935-miilli Napasuliaq Alapernaarsuiffik-mi naqitikkanilu allani ’kiffap ilumoorlunilu silatuup’ pilersitaani inuussutissat anersaakkut ittut maanna tanitat amma suleqataasa nunarsuarmi inuunissamik neriugisallit pisariaqartitaat allaaserineqartalerput. — Matîuse 24:45-47.
10. Tanitat ilaat ilumoorunnaaruni qularnanngitsumik qanoq taarserneqassava?
10 Taavami tanitat ilaat ilumoorunnaarpat? Taanna taava taarserneqassanngila? Taarserneqassaaq, Paulus taama paasinarsisitsivoq uuliaqummik assersuusiorami. (Rûmamiut 11:11-32) Anersaamit kinguaassiarineqartut ilaat taarserneqartariaqarpat, Guutip qularnanngitsumik qilammi inuunissamut qaaqqussavaa inuk uppernikkut maligassaalluartoq ukiorpassuarnilu illernartumik kiffartorsimasoq. — Naleqqiuguk Lúkarse 22:28, 29; 1 Pîtruse 1:6, 7.
Qujamasunnissamut pissutissaqarluarpoq
11. Jâko 1:17-imi sumik neriorsoqqissaarneqarpugut, qanorluunniit neriuuteqaraluarutta?
11 Sumiikkaluaruttaluunniit Jehova ilumoorluta kiffartorfigigutsigu pisariaqartitatsinnik tunissavaatigut kissaatigisavullu eqqortut naammassissallugit. (Tussiaat 145:16; Lúkarse 1:67-74) Qilammi nunamiluunniit inuunissamik neriuuteqaraluarutta Guutimut qujamasunnissatsinnut pissutissaqarluarpugut. Tamatigut imminut asannittut iluaqutissaannut iliortarpoq. Ajoqersugaq Jakob allassimavoq ’tunissutit tamarmik ajunngitsut tunniussallu tamarmik naammalluartut pavannga qaamasut Ataataannit’, Jehova Guutimit, pisartut. (Jâko 1:17) Tunissutit pilluaqqussutillu tamakkua ilaat misissorneroriartigik.
12. Sooq oqarsinnaavugut Jehovap kiffani aalajaatsut tamaasa nuannersumik neriuuteqartilersimagai?
12 Jehovap kiffani aalajaatsut tamaasa nuannersumik neriuuteqartilersimavai. Ilaat qilammi inuunissamut qaaqqusimavai. Nalunaajaasuni Kristus sioqqullugu inuusimasut nunami naassaanngitsumik inuunissamut makinnissamik neriuuteqartippai. Assersuutigalugu Abraham makinnissamik upperisaqarpoq ’illoqarfik tunngavilersugaq’ — tassa naalagaaffik qilammiusoq imminik nunami inuunissamut makititsinissamik pilersitsisussaq — ilimagalugu. (Eprîarit 11:10, 17-19) Maanna naggatissap nalaani Guutip aamma inuit millionilikkuutaat nunarsuarmi paratiisiusumi naassaanngitsumik inuunissamik neriuuteqartilersimavai. (Lúkarse 23:43; Juánase 17:3) Kialuunniit Jehovamit taama nuannertigisumik neriuuteqartinneqartup qujamasuutigingaartariaqarpaa.
13. Guutip anersaava illernartoq innuttaanut qanoq sunniuteqartarsimava?
13 Jehovap innuttani anersaamik illernartumik tunisarpai. Kristumiut qilammi inuunissamik neriuutillit anersaamik illernartumik taninneqarput. (1 Juánase 2:20; 5:1-4, 18) Guutilli kiffai nunami inuunissamik neriuutillit anersaamit ikiorneqarlutillu siulersorneqartarput. Assersuutigalugu Mosesip angutillu 70-it taassuma ikiortissaatut toqqarneqartut Guutip anersaava pigisimavaat. (4 Moses 11:24, 25) Israelittoqami illernartuut sananeqarmat Bezalel anersaamit illernartumit sunnerneqarluni eqqumiitsuliullaqqissutut sulisimavoq. (2 Moses 31:1-11) Aamma Gideon, Jefta, Samson, David, Elias, Elisa allallu Guutip anersaavanik tunineqarsimapput. Itsaq inuusimasut taakku qilammi naalannartitaanavianngillat, kisianni anersaamit illernartumit ikiorneqarlutillu siulersorneqartarsimapput, soorluttaaq ullumikkut Jesusip savaatai allat taamaattartut. Taamaattumik anersaamik illernartumik pigisaqarneq tassaasariaqanngilaq qilammi inuunissamut qaaqquneqarneq. Jehovalli anersaavata siulersortarpaatigut, oqaluussinissamut Guutimillu suliassiissutinut allanut ikiortarluta. Pissaanermik immikkut ittumik tunisarpaatigut anersaallu inerititaanik — asanninnermik, tipaatsunnermik, eqqissinermik, kamaginninnermik, avaaginninnermik, ajunngissutsimik, uppernermik, saamanermik imminullu naalakkersinnaanermik — ineriartortitsinissatsinnut ikiortarluta. (Juánase 16:13; apustilit suliait 1:8; 2 Korintumiut 4:7-10; Galâsiamiut 5:22, 23, NV) Tunissut alutornangaartoq tamanna Guutimeersoq qujamasuutigisariaqannginnerparput?
14. Guutip ilisarsinermik ilisimassutsimillu tunissutai qanoq iluaqutigaavut?
14 Qilammi nunamiluunniit inuunissamik neriuuteqaraluarutta ilisarsineq ilisimassuserlu tunissutaapput Guutimit tunniunneqartut qujamasuutigisariaqakkavut. Jehova pillugu eqqortumik ilisimasaqarneq ikiortigalugu ’sorliit iluarnersut misilittarsinnaavavut’ Jehovamilu ’ileqqorisariaqartoq naapertorlugu tamatigut iluarisassaanik saqisinnaalluta’. (Filípimiut 1:9-11; Kulorsamiut 1:9, 10) Ilisimassutsip Guutimeersup inuunitsinni illersorsinnaallutalu siulersorsinnaavaatigut. (Ussatit 4:5-7; Nalunaajaasup oqaasii 7:12) Ilumoortumik ilisarsineq ilisimassuserlu Guutip oqaasianik tunngaveqarput, tanitallu ikittut suli nunami inuusut pingaartumik qilammi inuunissamik neriuut pillugu allassimasut kajungeraat. Taamaattorli Guutip oqaasianik nuannarisaqarneq Biibilimillu paasisaqarluarneq tassaanngillat Guutimit qilammi inuunissamut qaaqquneqarsimanermut uppernarsaatit. Angutit soorlu Moses Danielilu Biibilip ilaata allanneqarneranut atorneqarsimagaluarput, taakkuli nunarsuarmi inuunermut makikkumaarput. Qilammi nunamiluunniit inuunissamik neriuuteqaraluarutta tamatta ’kiffaq ilumoorlunilu silatooq’ Jehovamit iluarisaasoq aqqutigalugu anersaakkut inuussutissanik tunineqartarpugut. (Matîuse 24:45-47) Tamatta tamatumuuna ilisarsisimanerput qujamasuutigeqaarput.
15. Guutip tunissutaasa pingaarnerit ilaat sunaava, illillu tamanna qanoq isigaajuk?
15 Guutip tunissutaasa pingaarnerit ilagaat Jesusip utertitsissutitut pilliutaa, asannittumik pilersitaq tamatta iluaqutigisarput, qilammi nunamiluunniit inuunissamik neriuuteqaraluarutta. Guutip inuiaat ima asatigai ’ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu’. (Juánase 3:16) Jesusillu asanninneq killissutigalugu ’inuunini akissatut tunniuppaa amerlasuut utertinneqaatissaannik’. (Matiuse 20:28) Apustili Johannesip nassuiaaneratut Jesus Kristus ’ajortitta [tanitat ajortaasa] matoorneqaatigaat, uaguinnaanngitsummi silarsuarmiuttaaq tamarmik’. (1 Juánase 2:1, 2) Taamaattumik tamatta annannissatsinnut naassaanngitsumillu inuunissatsinnut asannittumik pilersitaq tamanna qujamasuutigingaartariaqarparput.b
Illit najuutissavit?
16. 1998-imi apriilip ulluisa 11-ianni seqernup tarrinnerata kingorna pisimasoq pingaartoq suna eqqaaniarneqassava, kikkullu najuuffigisariaqarpaat?
16 Utertitsissut Guutip ernermigut pilersitaa qujamasuutigalugu najuuttariaqarpugut 1998-imi apriilip ulluisa 11-ianni seqernup tarrinnerata kingorna Jehovap nalunaajaasui naalagaaffilersaartarfinni Jesusip toqunera eqqaaniarlugu naapeqatigiippata. Jesusip toqunissi sioqqullugu unnuk kingulleq apustilini aalajaatsut ilagalugit nalliuttorsiorfik tamanna atulersikkamiuk ima oqarpoq: ’Taamaaliortaritsi eqqaallunga.’ (Lúkarse 22:19, 20; Matîuse 26:26-30) Tanitat ikittut sinneruttut timiusaq seernarsaateqanngitsoq, Jesusip inuttut timaanut ajorteqanngitsumut assersuutaasoq, nerissavaat viinnilu aappaluttoq allamik akoqanngitsoq, aavanut pilliutitut kuisamut assersuutaasoq, imissallugu. Kristumiut anersaamit kinguaassiarineqartut kisimik assersuutit ilangiiffigisussaavaat, taakkuinnaat angerusisaamut Naalagaaffillu pillugu angerutsimut peqataagamik. Taakkuinnaat Guutip anersaavata illernartup aalajangersimalluinnartumik nalunaajaaffigisimavai qilammi inuunissamik neriuutissaqartut. Allat millionilikuutaat ataqqinnillutik isiginnaartutut najuutissapput Guutip Kristusillu asanninnerat, Jesusip pilliutaanut inuunermik naassaanngitsumik periarfissiisumut atatillugu ersersissimasaat, qujamasuutigalugu. — Rûmamiut 6:23.
17. Anersaamik illernartumik taninneqarneq eqqarsaatigalugu suna eqqaamasariaqarparput?
17 Upperisarsiornikkut isummat pigisimagaluakkat, toqukkut annaasaqarnermit misigissutsikkut tatineqarneq, ullumikkut nunarsuarmi inuunermi annikilliuutit imaluunnit Jehovamit immikkut ittumik pilluaqqusaasutut misigineq pissutigalugit ilaat immaqa kukkusumik isumaqalersinnaapput qilaliarumaarlutik. Tamattali eqqaamasariaqarparput Biibilimi peqqussutigineqanngimmat Kristusip utertitsissutitut pilliutaanik qujamasunnerput takutissagipput assersuutinik ilangiiffiginninnikkut. Anersaamik illernartumik kinguaassiarineqarnermut ’inuup piumassusialuunniit arpanneraluunniit pissutaanngillat, kisianni Guuti’ pissutaavoq, taassumami Jesus anersaakkut ernermisut kinguaassiarisimavaa, qitornallu allat 144.000-iinnaat naalannarsissallugit. — Rûmamiut 9:16; Jesaja 64:8.
18. Ullumikkut Jehovamut kiffaasut amerlanerpaartaasa pilluaqqussutissat suut misigiumaarpaat?
18 Ulluni makkunani kingullerni Jehova Guutip imminut kiffaasut amerlanerpaartaat nunarsuarmi paratiisiusumi naassaanngitsumik inuunissamik neriuutissaqartippai. (2 Timûtiuse 3:1-5) Ungasinngitsukkut paratiisi alutornangaartoq tamanna nuannaarutigisinnaassavaat. Taamanikkussaq ’naalagarsuit’ Guutip naalagaaffiata qilammiittup ataani nunarsuarmi suliassat aqussavaat. (Tussiaat 45:17) Eqqissineqassaaq, nunarsuarmiut Guutip inatsisai maleruassammatigik Jehovallu aqqutigeqqusaanik ajoqersorneqarlutik. (Jesaja 9:6, 7; sarĸúmersitat 20:12) Sanaartorlutik nunarsuarlu imminnut naalatsigitillugu ulapputissapput. (Jesaja 65:17-25) Takorlooriaruk toqusimasut inuunermut makitinneqalerpata ilaqutariit kattuteqqittut qanoq pilluartigissasut! (Juánase 5:28, 29) Naggataarutaasumik misilinneqarnerup kingorna ajussuseq tamarmi peerneqarluinnassaaq. (sarĸúmersitat 20:7-10) Taava nunarsuaq naassaanngitsumik inuuffigineqassaaq inunnik naammalluinnartunik ’aserujasumit kiffaajunnaarsitaasunik Guutillu qitornaasa kiffaanngissusiata naalannaataanik piginnittunik’. (wE 15/2 98)
[Quppernerup ataani ilanngussaq]
a Takuuk Hjælp til forståelse af Bibelen, qupperneq 105 (Azazel).
b Takuuk Vagttårnet 15. marsi 1991-imoortoq, qupperneq 19-22.
Qanoq akissavit?
□ ’Imermik inuunartumik akeqanngitsumik pineq’ qanoq paasisariaqarpa?
□ Qilammi nunamiluunniit inuunissamik neriuuteqaraluarutta sooq Guuti qujamasuffigisinnaavarput?
□ Nalliuttorsiorneq ukiumoortoq suna tamatta najuuffigisariaqarparput?
□ Jehovap innuttaasa amerlanerpaartaasa suna qilanaarisinnaavaat?
[Qupp. 18-imi assiliartaq]
Inuit millionilikkuutaat ’imeq inuunartoq akeqanngitsumik pigilerpaat’. Illit taakkua ilagaatsit?