Kristumiut ataatsimiittarneri pingaartikkit
’Misissoqatigiinniarta asanninnermut ajunngitsuliornermullu kajumissaaqatigiilluta, katisimasarfippullu qimannaveertigu.’ — EPRÎARIT 10:24, 25.
1, 2. (a) Sooq kristumiut ilumoortut ataatsimiinnerinut najuunneq immikkut pisinnaatitaaffiua? (b) Jesus ajoqersukkami ataatsimiinnerinut qanoq ililluni najuuttarpa?
KRISTUMIUT katisimanerannut najuunneq immikkut pisinnaatitaaffissuuvoq, Jehovamik pallorfiginnittut katersuuttut ikittunnguugaluarpata tuusintilikkuutaajugaluarpataluunniit, Jesusimi ima oqarsimavoq: ’Marlummi pingasulluunniit atera tunaaralugu katisimasaraangata akornanniittaraanga.’ (Matîuse 18:20) Jesus taamatut oqarsimavoq aalajangiiffigisassat ilagiinni siuttuusunit eqqortumik suliarineqartariaqartut eqqartortillugit. (Matîuse 18:15-19) Oqaasiili kristumiut katersuunnerinut taassuma aqqani qinnummik aallarnerneqarlutillu naggaserneqartunut tamanut atorneqarsinnaappat? Aap, Jesusimmi ajoqersukkani ajoqersuganngortitsiortornissaannik peqqugamigit ima neriorsorsimavai: ’Atalu, ullut tamaasa najorpassi silarsuup naggatissaanut allaat.’ — Matîuse 28:20.
2 Qularutissaanngitsumik ilagiinnut niaquusup, Naalakkap Jesus Kristusip, ajoqersukkami aalajaatsut katersuunneri tamaasa soqutigilluinnarpai. Qularutigissanngilarputtaaq najortarai Guutip anersaava illernartoq ikiortigalugu. (apustilit suliait 2:33; sarĸúmersitat 5:6) Jehova Guutittaaq ataatsimiittarnivut soqutigai. Taamatut ataatsimiittarnernut siunertaasoq pingaarneq tassaavoq ’katisimasuni Jehovap unnersiutiginissaa’. (Tussiaat 26:12) Ilagiit ataatsimiittarnerinut najuuttarnivut taassumunnga asanninnitsinnut ersiutaapput.
3. Suut pingaartut pissutigalugit kristumiutut ataatsimiittarnivut pingaartippavut?
3 Kristumiut ataatsimiittarnerinik pingaartitsinerput allanittaaq pitsaasunik pissuteqarpoq. Jesus Kristusip qilaliannginnermini ajoqersukkani tanitat uppertunut piffissaq eqqorlugu anersaakkut inuussutissalersuinermikkut ’kiffatut ilumoorlunilu silatuutut’ sulisussatut toqqarsimavai. (Matîuse 24:45) Taamatut anersaakkut inuussutissalersuineq annerusutigut pisarpoq ilagiit ataatsimiittarnerini kiisalu ataatsimeersuaararnerni ataatsimeersuarnernilu. Pissutsit aaqqissuussaanerata ajortup matuma naggatissaani aniguinissaminnik Guutillu silarsuassaani nutaami inuulernissaminnik kissaateqartunut tamanut katersuunnerni taama ittuni paasissutissanik pingaarluinnartunik pilersuisarnerani kiffaq ilumoortoq taanna Naalakkap Jesus Kristusip siulersortarpaa.
4. Ileqqoq navianartoq suna Biibilimi eqqaaneqarpa, sunalu iluaqutigalugu tamanna pinngitsoorsinnaavarput?
4 Taamaattumik kristumiup kialuunniit ileqqoq navianartoq Paulusip allakkamini eqqaasaa ileqquliunnaveersaartariaqarpaa: ’Misissoqatigiinniarta asanninnermut ajunngitsuliornermullu kajumissaaqatigiilluta, katisimasarfippullu qimannaveertigu ilaat taamaattarmata; kisianni oqaaqqissaaqatigiilluta pisa; annerusumilli taamaassaagut ullussaq qanillilersoq malugilerassiuk.’ (Eprîarit 10:24, 25) Kristumiutut ataatsimiinnernut najuussinnaanerup immikkut pisinnaatitaaffiunera iluaqutissartaalu isumaliutigeqqissaartarutsigik ilumoorfiginnilluta uummatikkullu iluunngarluta tapersersornissaannut iluaqutigissavarput.
Ataatsimiinnerit ineriartornartut
5. (a) Ataatsimiinnerni qanoq sunniutilinnik oqaaseqartassaagut? (b) Sooq soqutiginnittut ataatsimiigiartarnissaannik kajumissaarnissaannut tunuarsimaartariaqanngilagut?
5 Jehovap anersaavata illernartup kristumiut ataatsimiinnerini najuunnissaa qinnutigineqartarmat najuuttut tamarmik immikkut sapinngisartik tamaat iliorniartariaqarput anersaaq suleqatigiumallugu ’Guutillu anersaava illernartoq aliasutseqqunagu’. (Evfisumiut 4:30) Oqqap eqqortumik atornissaa eqqartortillugu apustilip Paulusip oqaatsit isumassarsiarititaasut taakku allassimavai. Tamatigunngooq ’ineriartornissamut pisariaqartumut ajunngitsut oqaaserisassavavut tusartut saammaannermik pineqaqqullugit’. (Evfisumiut 4:29) Ingammik tamanna pingaaruteqarpoq kristumiut ataatsimiinnerini. Korinthimiunut allakkamini Paulusip erseqqissarpaa ataatsimiinnerit ineriartornartumik, ilikkagaqarnartumik kajumissinartumillu ingerlanneqartassasut. (1 Korintumiut 14:5, 12, 19, 26, 31) Ataatsimiinnerit taamaattut najuuttunut tamanut iluaqutaasarput, aamma nutaanut, ima oqarumasinnaasunut: ’Guuti ilumut ilussinniippoq.’ (1 Korintumiut 14:25) Taamaammat soqutiginnilerlaat ataatsimiigiarnissaannik kajumissaarnissaannut tunuarsimaartariaqanngilagut, ataatsimiinnermummi najuuttarnerat anersaakkut ineriartornerannut siuarsaataassaaq.
6. Suut ataatsimiinnermik ineriartornartuutitseqataasarpat?
6 Kristumiut ataatsimiinnerini oqalugiartut, apersorneqartut saqqummiussisullu ineriartornartumik Guutillu oqaasianut allassimasumut, Biibilimut, naapertuuttumik oqaaseqarnissartik qulakkeertariaqarpaat. Eqqortumik oqaaseqarnissamut ilanngullugu misigissutsit Guutip Kristusillu pissusiinut asannittunut naapertuuttut aamma ersersissinnaavavut. Ataatsimiinnerni saqqummiussaqartut tamarmik ’Guutip anersaavata inerititaanik’, soorlu nuannaarnermik, kamajuinnermik uppernermillu ersersitsinissartik eqqumaffigisarpassuk najuuttunut tamanut ineriartuutaalluassaaq. — Galâsiamiut 5:22, 23.
7. Ataatsimiinnermut najuuttut tamarmik qanoq ilillutik ataatsimiinnerup ineriartornartuutinnissaanut peqataasinnaappat?
7 Ilagiit ataatsimiinneranni ikittuinnaat saqqummiussisinnaagaluartut najuuttut tamarmik ataatsimiinnerup ineriartornartuutinnissaanut peqataasinnaapput. Apeqqutinik akisarnikkut taamaaliornissamut periarfissaqartarpoq. Tamanna uppernitta tamanut nalunaarutiginissaanut periarfissaavoq. (Rûmamiut 10:9) Periarfissarli tamanna nammineq isumatta siuarsarnissaannut, nammineq naammassisatta kakkanniutiginissaannut imaluunniit uppeqatitta isornartorsiornissaannut atorneqanngisaannassaaq. Taamaaliornermi Guutip anersaavanik aliasutsitsissannginnerpa? Uppeqativullu isumaqatigiinngissutivut kisimiilluni asannittumik oqaloqatigiissutiginerisut ajunnginnerpaamik aaqqinneqarsinnaapput. Biibilimi allassimavoq: ’Ajunngitsumik iliorfigeqatigiigitsi isumassuigajullusilu isumakkeerfigeqatigiillusilu, soorlu Guutip isumakkeerfigigaasi Kristusimi.’ (Evfisumiut 4:32) Unnersuussutip pitsaasup tamatuma atornissaanut kristumiutut ataatsimiittarnivut periarfissaalluarput. Ilarpassuavut taamaaliorniarlutik siusinaarlutik ataatsimiigiartarput kingusinaarlutillu anisarlutik. Tamanna soqutiginnilerlaanuttaaq, tikilluaqqusaasutut misiginissaminnik immikkut pisariaqartitsisunut, iluaqutaasarpoq. Taamaalillutik kristumiut tunniulluinnarsimasut tamarmik ’misissoqatigiinnikkut asanninnermut ajunngitsuliornermullu kajumissaaqatigiinnikkut’ ataatsimiinnerit ineriartornartuutinnissaannut peqataasinnaapput.
Piareersarluarneq
8. (a) Ilaat ataatsimiinnernut najuussinnaajumallutik qanoq nersortarialimmik pilliuteqartarpat? (b) Jehova paarsisutut qanoq maligassaalluarpa?
8 Ataatsimiigiarnissaq kristumiut ilaannut pisariuallaarneq ajortoq ilaannut pilliuteqartuarnissamik pisariaqartitsiffiusarpoq. Assersuutigalugu, anaanaq kristumiu ilaqutariinnik pilersueqataaniarluni suliffeqartariaqartoq sulereerluni angerlaraangami qasusarpoq. Taava immaqa nerisassiortariaqartarpoq meeqqanilu ataatsimiigiarnissamut pikineranni ikiortariaqarlugit. Kristumiut ilaasa ataatsimiigiarnerminni aqqut takisooq ingerlavigeqqaartariaqartarpaat, imaluunniit ilaat innarluuteqarnertik utoqqaanertilluunniit pissutigalugu akimmiffissaqartarlutik. Pissutsit aalajaallutik ataatsimiigiartartut tamarmik immikkut atugaat Jehova Guutip nalunngilaa, soorlu savanik paarsisup asannittup savaatimi ataasiakkaat pisariaqartitaat immikkut ittut nalunngikkai. Biibilimi allassimavoq: „Savaatini paarsisutut paarai, savaaqqat talerminik katersorpai pakkullugillu, savallu miluttunik piarallit siulersorlugit.“ — Jesaja 40:11.
9, 10. Qanoq ililluta ataatsimiinnerit sapinngisamik annerpaamik pissarsiaqarfigisinnaavavut?
9 Tamatigut ataatsimiigiartarumallutik annertuumik pilliuteqartariaqartartut ataatsimiinnerni sammineqartussanut piareersarnissaminnut immaqa piffissaqarpallaartanngillat. Sapaatip-akunneranulli Biibilimit atuagassamik atuarsimagaanni Teokratiimik Atuarfimmi sammineqartunik pissarsiaqarnarnerusarpoq. Taamatuttaaq ataatsimiinnernut allanut, soorlu Napasuliaq Alapernaarsuiffik-mik atuaqqissaaqatigiinnermut ilagiillu atuakkamik atuaqqissaaqatigiinnerannut, siumut piareersarsimagaanni pissarsiaqarnarnerusarpoq. Ilaqutariit piffissaqarpallaanngitsut ataatsimiinnerni sammineqartussat siumoortumik atuarnerisigut allassimaffiillu issuarneqartut ilaannaalluunniit isumaliutigeqqissaarnerisigut Biibilimut tunngasunik oqaluusserisaqarnerni tamakkunani tunngavissaqarnerusumik peqataasinnaapput.
10 Allat pisussaaffikinnerusut piffissaq annerusoq ataatsimiinnissanut piareersarnermut atorsinnaavaat. Assersuutigalugu, allassimaffiit innersuussutigineqarsimasut issuarneqarsimanngitsulli qupperlugit misissortarsinnaavaat. Taamaattorli tamatta ataatsimiinneq sapinngisamik pissarsiaqarfigisinnaajumallugu piareersarsinnaavugut oqalugiaatitigullu akisarnitsigullu ilagiinnik ineriartortitseqataasinnaalluta. Utoqqaanertat ilagiinnilu kiffartortut piareersarluartarnermikkut naatsumillu ersarissumillu akisarnikkut maligassiuisinnaapput. Jehovap pilersuutaanut ataqqinninnerminnit killinneqarlutik ataatsimiinnernut najuuttut ataatsimiinnerup nalaani akornusersuutaasumik iliuuseqarniarnavianngillat. — 1 Pîtruse 5:3.
11. Sooq ataatsimiinnernut piareersarnissaq imminut sukannerfiginermik pisariaqartitsiffiusinnaasarpa?
11 Sammisassat aliikkutassallu anersaakkut peqqissutsitsinnut pingaaruteqanngitsut annertuumik piffissaajaataasinnaapput. Taamaappat imminut misissortariaqarpugut piffissamik atuineq eqqarsaatigalugu ’siuneqanngitsunngornaveersaarniarluta’. (Evfisumiut 5:17) Pingaaruteqarpianngitsunit ’piffissamik pisinissarput’ anguniartariaqarparput Biibilimik atuaqqissaarnermut ataatsimiinnernullu piareersarnermut, kiisalu oqaluussinermut, piffissaqarnerusinnaajumalluta. (Evfisumiut 5:16, NV) Nassuerutigisariaqarpoq tamanna oqitsuinnaasanngimmat imminullu sukannerfiginissamik pisariaqartitsiffiusinnaalluni. Inuusuttut piffissamik silatuumik atuisut siunissami ineriartornissaminnut ajunngitsumik tunngavissiorput. Paulus suleqatiminut inuusuttumut, Timoteusimut, ima allassimavoq: ’Tamakku [Timoteusimut unnersuussutini] isumaliutigikkit ileqqoralugillu alliartussutsit tamanut malunnarseqqullugu.’ — 1 Timûtiuse 4:15.
Maligassat Guutip oqaasianiittut
12. Samuelip ilaqutai qanoq maligassiulluarsimappat?
12 Samuelip ilaqutaasa maligassiaat eqqarsaatigeriaruk. Taakkua Guutip naalaffia Silomiikkallarmat uppeqatitik ilagalugit katersuuttunut peqataajuartarsimapput. Angutit kisimik ukiumoortumik nalliuttorsiornermut peqataasussaatitaasimapput. Samuelilli ataataa, Elkana, ilaquttani tamaasa ilagalugit, nuliani marluk paninilu ilanngullugit, „ukiut tamaasa Silomukartarpoq katersaarsuit [Jehovaat] guutisiorfigiartorlugu pilliivigiartorlugulu.“ (1 Samuel 1:3-5) Samuelikkut nunaat, Ramatajim-Zofim, ’Efraimikkut qaqqalittaasa’ ataanni, ullumikkut Rentisip sineriaaniittumi, inissisimasimagunarpoq. (1 Samuel 1:1) Taamaappat Silomukarnerminni kilometerit 30-t ingerlasarsimassavaat. Taamanikkut taamatut isorartutigisukkut angalaneq ilungersuanartorsuuvoq, taamaakkaluartorli Elkana ilaquttanilu aalajaallutik ’ukiorpassuit ingerlaneranni Jehovap illuanut majuartarsimapput’. — 1 Samuel 1:7.
13. Jesusip nunarsuarmiinnerata nalaani juutit aalajaatsut qanoq maligassiuilluarsimappat?
13 Aammattaaq Jesus ilaqutariissuarni peroriartorsimavoq. Ilaqutariit ukiut tamaasa Nazaretimit 100 kilometerit atorlugit Jerusalemimukartarput poorskisioriartorlutik. Aqqutigisinnaasaat marluupput. Aqqut toqqaannarnerusoq atussagaanni Megiddop Qooruatigoorluni ammukartariaqarpoq, taavalu Samaria aqqusaarlugu qummukajaaq 600 meterisut qatsissusilik ingerlavigisariaqarluni, tassanngaanniillu taava Jerusalemimut. Aqqutip aappaa tassaavoq Jesusip ukiumi 33-mi naggammik Jerusalemimukarnermini aqqutigisimasaa. Tassuunakkuussagaanni Jordanip qooruatigoortariaqarpoq immallu qaavanit atsinnerusukkoorluni, ’Judæap ilaanut Jordanip ungataanut pinissaq’ tikillugu. (Mákorse 10:1) Tamaanngaanniit Jerusalemimut 30 kilometeriupput, aqqutaalu 1100 meterit sinnerlugit qatsissusilik tikillugu qummukajaajulluni. (Mákorse 10:32) Aalajaallutik nalliuttorsioriartortartut Galilæamit aqqut ilungersunartoq atorlugu Jerusalemimukaarrattartorsuusimapput. (Lúkarse 2:44) Tamassa ullumikkut Jehovap kiffaanut nunani atugarissaarfiusuni najugaqartunut angallatissarissaarlutillu aqqutissarissaartunut, ilungersorpallaaratillu kristumiut ataatsimiittarnerinut ornigussinnaasunut, maligassat pitsaasut!
14, 15. (a) Anna qanoq maligassiuisimava? (b) Ataatsimiigiartalerlaat isumaat kusanartoq suna ilinniarfigisinnaavarput?
14 Maligassaq alla tassa uillarneq 84-inik ukiulik, Anna. Biibilimi oqaluttuarineqarpoq taassuma ’naalaffik qimanneq ajoraa’. (Lúkarse 2:37) Anna aamma inoqatiminik asannittumik isumassuisuusimavoq. Naalungiarsuk Jesus takugamiuk paasigamiullu tassaasoq Messias neriorsuutigisaasoq, qanoq iliorsimava? Guuti unnersiutigisimavaa meerarlu ’tamanut Jerusalemip utertitaanissaanik utaqqisunut oqaluttuaralugu’. (Lúkarse 2:38) Taamaaliornera ullumikkut kristumiunut maligassaavoq pitsaasoq!
15 Aap, ataatsimiinnernut najuuttarneq peqataasarnerlu Anna assigalugu ima nuannaritigisariaqarpavut tamatigorluinnaq najuuffiginiartarlugit. Nutaat ataatsimiigiarnissartik taama pingaartitsigisarpaat. Taarsuarmit aniguillutik Guutip qaammarsaaneranut nuanningaartumut pigaangamik ilinniarususseqartorujussuusarput, kristumiullu ataatsimiinnerinut orniguttarnertik pingaartittaqalugu. Sivisuumilli sallusuissummeereersimasut ’asannissusertik siulleq soraarunnaveersaarniarlugu’ mianersortariaqarput. (sarĸúmersitat 2:4) Sualuttumik nappaateqarneq pissutsilluunniit allat qanoq iliuuseqarfigineqarsinnaanngitsut pissutigalugit ataatsimiigianngitsoortoqarsinnaasarpoq. Pigisaleritunerli, aliikkutassat imaluunniit soqutigisaqanngissuseq pissutigalugit ataatsimiigiarnissamut piareersartannginneq, ataatsimiinnermut peqataasannginneq najuuttannginnerluunniit ileqquliutinngisaannartigik! — Lúkarse 8:14.
Maligassaalluarnerpaaq
16, 17. (a) Anersaamut tunngasut pillugit katersuunnerit Jesusip qanoq isigisimavai? (b) Ileqqoq pitsaasoq suna kristumiut tamarmik malinniartariaqarpaat?
16 Jesus anersaamut tunngasut pillugit katersuunnernut soqutiginninnermik ersersitsisarnikkut nalissaqanngitsumik maligassiusimavoq. Aqqaneq-marlunnik ukioqarluni Guutip illuanut Jerusalemimiittumut asanninnermik ersersitsisalereersimavoq. Ilaanni angajoqqaavisa tammaasimavaat, naggataatigullu nassaaralugu naalaffimmi ajoqersuisut Guutip oqaasii pillugit oqaloqatigigai. Angajoqqaani isumaalussimanerat pillugu Jesusip ataqqinnilluni ima oqarfigai: ’Nalugassinga Ataatama pii najussagikka?’ (Lúkarse 2:49) Taava naalalluni angajoqqaani Nazaretimut uteqatigai. Tassani naalaffimmukartuartarnermigut Guutimut pallorfiginninniarluni katersuuttarnernut asanninnini ersersittarpaa. Kiffartornernini aallartereeraa Biibilimi ima oqaatigineqarpoq: ’Nazaretimullu perorsagaaffimminut pivoq, ileqqunilu atorlugu sapaammi naalagiartarfimmut iserpoq, nikuipporlu atuaajumalluni.’ Jesaja, kapitali 61, versi 1 aamma 2 atuarlugillu nassuiareeraalu tusarnaartut ’oqaatsit alianaatsut qarnanit anisut tupigusuutigisimavaat’. — Lúkarse 4:16, 22.
17 Ullumikkut kristumiut ataatsimiittarnerini ileqqoq tunngaviusoq tamanna malinneqartarpoq. Ataatsimiinneq erinarsorluni unnersiutiginninnermik qinnummillu aallarnerneqareeraangat versit Biibilimeersut (imalunniit versit atuagassiami Biibilimi atuaqqissaarnermut iluaqutissaasumi issuarneqartut) atuarneqarlutillu nassuiarneqartarput. Kristumiut ilumoortut Jesus Kristusip ileqquanik pitsaasumik malinninnissaminnut pisussaapput. Pissutsit atukkatik periarfissaqartitsiuartillugit kristumiut ataatsimiinnerinut orniguttarnertik nuannaarutigisarpaat.
Nalitsinni maligassaalluartut
18, 19. Qatanngutit nunani atugarissaarfiunnginerusuniittut ataatsimiinnernik, ataatsimeersuaararnernik ataatsimeersuarnernillu ataqqinninneq eqqarsaatigalugu qanoq maligassiuilluarsimappat?
18 Qatanngutit angutit arnallu nunarsuup ilaani atugarissaarfiunnginnerusuniittut kristumiut ataatsimiittarnerinik pingaartitsinikkut maligassaalluartuupput. Mozambiquemi ilagiinnik nakkutilliisoq Orlando nulialu Amélia ataatsimeersuartut kiffartuukkiartorlugit nalunaaquttap-akunnerini 45-ni qaqqarsuaq itivillugu 90 kilometerit pisullutik angalasarput. Taava tamatuma kingorna ataatsimeersuartut allat kiffartuukkiartorlugit aqqussua tamanna tamaat atorlugu utertarput. Orlandoli maniguulluni oqarpoq: „Qatanngutitsinnit Bawami ilagiinniittunit ilungersunannginnerujussuarmik angalasarpugut. Taakkua ataatsimeersuariarlutik ulluni arfinilinni 400 kilometerisut isorartutigisoq pisuinnarlutik ingerlavigisariaqartarpaat, taakkununngalu ilaavoq qatanngut angut 60-inik ukiulik!“
19 Sapaatip-akunneranummi ilagiit ataatsimiittarneri eqqarsaatigalugit? Kashwashwa Njamba tassaavoq qatanngut arnaq tuattoq 70-it sinnerlugit ukiulik. Kaisososimi, Namibiami nunaannarmi illoqarfeeqqami, Rundumi naalagaaffilersaartarfimmit 5 kilometerisut ungasitsigisumiittumi, najugaqarpoq. Ataatsimiigiaraangami siumut utimullu orpippassuakkoorluni 10 kilometerit ingerlavigisarpai. Allat tassuunakkoornerminni saassunneqartarsimapput, Kashwashwalli ataatsimiigiarluni aqqutigiuartarpaa. Ataatsimiinnerit ilarujussui oqaatsinik paasinngisaanik ingerlanneqartarput. Taamaattumik najuuttarnini qanoq ililluni pissarsiaqarfigisarpai? „Allassimaffinnik malinnaanikkut,“ Kashwashwa oqarpoq, „oqalugiaat sumut tunnganersoq paasikannerniartarpara.“ Kisianni atuarsinnaananilu allassinnaanngilaq, taamaattumik qanoq ililluni allassimaffiit malinnaaffigisarpai? „Allassimaffiit alanngaarsinnaasakka oqalugiartup issuarnerai tusaaniarsarisarpara,“ akivoq. Ukiullu ingerlaneranni allassimaffippassuit eqqaamasinnaalersimavai. Biibilimik atuisinnaanini pitsanngorsarniarlugu atuarnermik allannermillu ilagiit ilinniartitsisarnerannut najuuttarpoq. „Ataatsimiinnernut najuunneq nuannareqaara,“ oqarpoq. „Nutaanik ilikkagassaqartuaannartarpoq. Qatanngutit angutit arnallu ilagissallugit nuannareqaara. Naak tamaasa oqaloqatigisinnaanngikkaluarlugit ornittarpaannga ilassillungalu. Tamanillu pingaarnerpaamik, nalunngilara ataatsimiinnermut najuunnikkut Jehovap uummataa nuannaartittarlugu.“
20. Sooq kristumiutut ataatsimiittarnivut sumiginnarnaveersaartariaqarpavut?
20 Jehovamik pallorfiginnittut millionilikkuutaat nunarsuarmi sumi tamaaniittut Kashwashwatut kristumiutut ataatsimiittarnerminnik pingaartitsinermik nersortarialimmik ersersitsisarput. Satanip silarsuaata aserorneqarnissaa qanilliartortillugu ataatsimiittarnivut tamaasa pinngitsoorsinnaanngilluinnarpavut. Anersaakkut eqqumajuarniarta ataatsimiittarnernullu, ataatsimeersuaarartarnernut ataatsimeersuartarnernullu pingaartitsinermik itisuumik ersersitsisarluta. Tamanna Jehovap uummataanik nuannaartitsiinnarani aamma uagutsinnut iluaqutaassaqaaq, tamakkunanimi Guutimit ilinniartinneqartarpugut inuunermut naassaanngitsumut sammisumik. — Ussatit 27:11; Jesaja 48:17, 18; Mákorse 13:35-37. (wE 1/3 98)
Apeqqutit uteqqiissutissat
□ Sooq kristumiut ataatsimiinnerinut najuussinnaaneq immikkut pisinnaatitaaffiua?
□ Ataatsimeeqataasut tamarmik qanoq ilillutik ataatsimiinnerup ineriartornartuutinnissaanut peqataasinnaappat?
□ Jesus Kristus qanoq maligassiuilluarsimava?
□ Qatanngutit nunani atugarissaarfiuallaanngitsuniittut qanoq ilinniarfigisinnaavavut?
[Qupp. 25-mi ungalusaq]
Sapaatip-akunnerani ataatsimiinnernik pingaartitsisut
Inuit millionilikkuutaat illoqarfissuarni piitsoqarfioqisuni pinerluttoqarfioqisunilu najugaqarput. Kristumiulli ilumoortut tamakkunani najugaqartut kristumiut katerisimaartarnerinik nersortarialimmik pingaartitsisuupput. Sowetomi, Afrikami kujallermi nunap ilaani Gautengimiittumi, ilagiit ilaanni utoqqaanertaq ima oqarsimavoq: „Ilagiinnut ilaaffigisatsinniipput oqaluussisartut kuisimasut kuisimanngitsullu 60-it, kisianni 70-it 80-illu akornanniittut, ilaannilu amerlanerusut, ataatsimiinnernut najuuttarput. Qatanngutit angutit arnallu ataatsimiigiarniarlutik sivisuumik angalasariaqanngillat, Sowetolli ilaani tamaani pissutsit ingasattorujussuupput. Qatanngut angut ataatsimiigiartilluni savimmik kapitissimavoq. Qatanngutit arnat minnerpaamik marluk ujajaanianit saassunneqarsimapput. Tamannali ataatsimiigiartarunnaassutiginngilaat. Sapaatikkut ataatsimiinneq qinnummik naggaserneqareeraangat erinarsormut sungiusalaartarpugut. Minnerpaamik 95 procentit naalagaaffilersaartarfimmi uninngaannartarput sapaatillu akunnerani tulliuttumi ataatsimiinnerni erinarsuutigineqartussat sungiusaqataaffigalugit. Taamaalillutik soqutiginnilerlaat erinarsuutivut erinarsoqataanissartillu ilinniartarpaat.“
Nunaannarmi najugaqartut allanik akimmiffissaqartarput. Immaqa sapaatip-akunneranut pingasoriarlutik ataatsimiigiarlutik sivisuumik angalasariaqartarput. Aappariit soqutiginnittut Lobatsemi Botswanamiittumi naalagaaffilersaartarfimmit 15 kilometerisut ungasitsigisumi najugaqarput. Siorna meeqqatik marluk ilagalugit ataatsimiigiartuaannalersimapput. Uia kamippaliortuuvoq, ataatsimiigiarlutillu angalasarnerminni aningaasartuutitik matussutissaqartinniarlugit nulia assigiinngitsunik tuniniaasarpoq.
Siorna aasakkut nakkutilliisoq angalasartoq tikeraarpoq, ataatsimiinnerullu kingorna unnukkut qulingiluanut ilaqutariit bussit unittarfianni ingerlariaqqissinnaajunnaarput. Silap ajornera pissutigalugu bussit ingerlaarunnaarsimapput. Politiip biilimini unilluni aperai ikiortariaqarnersut. Paasigamiuk susoqarnersoq nalligilerpai 15 kilometerinilu angerlamut ingerlallugit. Nulia, oqaluussisartuusoq kuisimanngitsoq, uiminut oqarsimavoq: „Takuat, ataatsimiinnerit salliutittarutsigik Jehovap isumassortuaannassavaatigut! “ Uia nutaarsiassamik nuannersumik oqaluussisartunngorusutsappoq.
[Qupp. 26-mi assiliartaq]
Jehovap nalunaajaasuisa ilarpassui, soorlu maani Rumæniamiittut, kristumiut ataatsimiittarnerinik pingaartitsinermikkut maligassaalluarput