’Upperisaq assoruutiginiarsiuk’!

’Upperisassaq iluartunut tunniussaareersoq assoruutiginiarsiuk.’ — JÛTARSE 3.

1. Kristumiut ilumoortut ullumikkut qanoq ittumik sorsuttariaqarpat?

SORSUNNERMI sakkutuujuneq artornartuaannarsimavoq. Takorlooriaruk sila qanoq ikkaluarpalluunniit sakkussamaatit tamaasa nassarlugit kilometererpassuit pisuttariaqartutit, sakkut assigiinngitsut atornissaat ilungersunartumik sungiusarlugit, imaluunniit timinnut inuuninnullu navianartunut sunulluunniit illersortariaqarlutit. Kristumiulli ilumoortut inuiaqatigiit sorsuunnerinut peqataaneq ajorput. (Jesaja 2:4; Juánase 17:14) Taamaattorli puigunngisaannartariaqarparput immikkut ittumik sorsulluta. Satanip Jesus Kristus taassumalu nunarsuarmi malittai uumissortorujussuuai. (sarĸúmersitat 12:17) Tassami Jehovamut kiffartorniarlutik aalajangersimasut tamarmik sorsunnermi anersaakkut ittumi sakkutuutut ipput. — 2 Korintumiut 10:4.

2. Judasip kristumiut sorsunnerat qanoq allaatigaa, allagaasalu qanoq aalajaattuarnissatsinnut ikiorsinnaavaatigut?

² Taamaattumik naleqqulluartumik Jesusip affarmik qatanngutaa Judas ima allassimavoq: ’Asanartusi ukorsii, annaqatigiissimassutsitsinnik ilungersungaarlunga allaffiginialerassi, oqaaqqissaarumallusi allaffigisariaqartippassi upperisassaq iluartunut tunniussaareersoq assoruutigeqqullusiuk.’ (Jûtarse 3) Judasip kristumiut kajumissaaramigit ’assorooqqullugit’ griikerit oqaasiat atugaa oqaatsimut ’toqumut siooraneq’-mut attuumassuteqarpoq. Aap, assoroorneq tamanna artornartorujussuusinnaavoq, allaat annikilliornartuusinnaalluni! Illit ilaannikkut sorsunnermi tamatumani aalajaannissat sapernartittarpiuk? Judasip allagai naatsut kimittuulli iluaqutigisinnaavavut. Allakkani tamakkunani kajumissaarneqarpugut kanngunartuliorneq assortoqqullugu, Guutip oqartussaassuseqartitai ataqqeqqullugit aamma Guutimut asanartittuinnaqqulluta. Misissoriartigu unnersuussutit tamakku qanoq maleruarsinnaagivut.

Kanngunartuliorneq assortoruk

3. Kristumiut ilagiissaat Judasip nalaaniittut qanoq navianartorsiorpat?

³ Judasip paasisimavaa kristumioqatini tamarmiunngitsut Satanimut sorsunnermi ingerlalluartut. Ilagiit navianartorsiorput. Inuit ajortunngorsimasut ’ilaliunniarsimapput’, Judas taama allassimavoq. Angutit taakkua isertortukkut kanngunartuliorneq siuarsarniarpaat. Iliuutsitik peqqusersiortutut nassuiarpaat ’Guutitta saammaanneranik kanngunartuliornermut atornerluillutik’. (Jûtarse 4) Immaqa itsaq gnostikerit ilaattut isumaqarsimapput ajortuliornerusaraanni Guutip saammaanneranik pissarsinerusoqarsinnaasoq — tassa ajortuliornerusaraanni pitsaanerussasoq! Immaqaluunniit isumaqarput Guutip ajunngitsup pillarnavianngikkaatik. Qanorluunniit isumaqaluarunik kukkulluinnarput. — 1 Korintumiut 3:19.

4. Jehovap itsaq eqqartuussutaasa Biibilimi allaatigineqartut ilaat pingasut suut Judasip eqqaavai?

⁴ Judasip eqqarsaataat ajortut naqqissorpai itsaq Jehovap eqqartuussutigisimasaasa ilaat pingasut innersuussutigalugit: Israelikkut ’uppinngitsuummata’; ’inngilit . . . inigisartik qimammassuk’ arnat kanngunartuliorfigiumallugit; aamma Sodomamiut Gomorramiullu ’uersaasorsuullutik allanertanillu uinissiormata’. (Jûtarse 5-7; 1 Moses 6:2-4; 19:4-25; 4 Moses 14:35) Pisimasuni tamakkunani tamani Jehovap eqqartuussutit erseqqissut ajortuliortunut naammassivai.

5. Pruffiitip itsaq inuusup kia oqaasii Judasip issuarpai, siulittuutaanillu qanoq erserpa pinngitsoorani eqquukkumaartoq?

⁵ Nangilluni Judasip eqqartuussinissaq annerungaartoq eqqaavaa. Enokip siulittuutaa issuarpaa — siulittuut allakkani isumassarsiarititaasuni allami allanneqarsimanngitsoq.a (Jûtarse 14, 15) Enokip siumut eqqartorsimavaa Jehovap guutiitsunut guutiitsuliornernullu tamanut eqqartuussinissaa. Soqutiginartumik Enokip pereersimasutut eqqartorpaa, tassami Guutip eqqartuussutai qularisariaqanngivissumik naammassineqarumaarmata. Inuit immaqa Enok kingornalu Noa mitaatigisimavaat, asissuisulli tamarmik nunarsuaq tamakkerlugu ulersuarnermi ipipput.

6. (a) Kristumiut Judasip nalaani inuusut sumik eqqaasinneqartariaqarpat? (b) Sooq Judasip oqaaqqissaarineri akuerisariaqarpavut?

⁶ Sooq Judasip Guutip eqqartuussutai tamakku eqqartorpai? Taamaaliorpoq nalunnginnamiuk nalimini ilagiinnut kristumiunut ilaasut ilaat itsaq eqqartuunneqarsimasut ajortuliorsimanerisulli mingutsigisumik assuarnartigisumillu ajortuliortartut. Taamaattumik Judas allappoq ilagiit ilumoortunik tunngaviusunik eqqaasinneqartariaqartut. (Jûtarse 5) Ersarippoq puigorsimagaat Jehovap iliuutsitik isigigai. Aap, kiffani piaaralutik inatsisini unioqqutikkaangatigik, imminnut allanullu mingutsitsillutik, isigisarpai. (Ussatit 15:3) Taamaaliornerisa Jehova aliasungaartippaat. (1 Moses 6:6; Tussiaat 78:40) Uagut inukulunnguit nunarsuarmi avataaniittunilu Naalakkap kisimi oqartussaasup misigissusiinut sunniuteqarsinnaanitsinnik eqqarsaat mianernaqaaq. Ullut tamaasa Jehovap isigisarpaatigut, sapinngisamillu ernerata Jesus Kristusip tumai malinniaraangatsigik uummataa nuannaartittarparput. Taamaattumik Judasip allassimasaatut eqqaasinneqaraangatta sumiginnarnagu ilassisarniartigu maleruarlugulu. — Ussatit 27:11; 1 Pîtruse 2:21.

7. (a) Sooq ingasattumik eqqunngitsuliortut ingerlaannaq ikiortissarsiortariaqarpat? (b) Tamatta qanoq ililluta kanngunartuliorneq ingalassimasariaqarparput?

⁷ Jehova isiginniinnarnani iliuuseqartarpoq. Guutiugami naapertuilluartoq ajortuliortut pillarumaarpai — siusinnerusukkut kingusinnerusukkulluunniit. (1 Timûtiuse 5:24) Ilaat isumaqarunik eqqartuussisarsimaneri qanganngoreersut namminnerlu ajortuliornitik soqutiginngikkai, imminnut salloqittassapput. Ullumikkut kanngunartuliortoqaruni taakku ingerlaannaq utoqqaanertanut kristumiunut ikiortissarsiortariaqarput! (Jâko 5:14, 15) Tamatta anersaakkut sorsunnitsinni kanngunartuliornerup navianaataa eqqumaffigisariaqarparput. Ukiut tamaasa nakkartoqartarpoq — tassa ilagiinnit anisitaasoqartarpoq, amerlanerit peqqissiminatik kanngunartuliortalernertik pillugu. Aalajangertariaqarpugut taamaaliornissatsinnut usserniarneqarnerit tamaasa akueriumanagit. — Naleqqiuguk Matîuse 26:41.

Guutip oqartussaassuseqartitai ataqqikkit

8. ’Naalannartut’ Jûtarse 8-mi eqqaaneqartut kikkuuppat?

⁸ Ajornartorsiut alla Judasimit eqqartorneqartoq tassa Guutip oqartussaassuseqartitaanik ataqqinninnginneq. Assersuutigalugu versi 8-mi angutit ajortut taakku avoqqaarai ’naalannartut mitammatigik’. ’Nalannartut’ taakku kikkuuppat? Tassaapput inuit naammalluinnanngitsut, kisianni Jehovap anersaavanit illernartumit akisussaaffimmik tunineqarsimasut. Assersuutigalugu, ilagiinni utoqqaanertaqarpoq Guutip savaataanik paarsisunngortitaasunik. (1 Pîtruse 5:2) Aamma nakkutilliisoqarpoq angalasartunik, soorlu apustili Paulus. Jerusalemimilu utoqqaanertaqatigiit siulersuisoqatigiittut kiffartorput, kristumiut ilagiissaannut tamanut attuumassuteqartunik aalajangiisarlutik. (apustilit suliait 15:6) Judasip isumakuluutigeqaa ilagiinniittut ilaasa angutinik taamaattunik mitaatiginnittarnerat.

9. Oqartussaassutsimut ataqqinnikkumanngitsut kikkut Judasip eqqaavai?

⁹ Ataqqinninngitsumik oqalunneq tamanna avoqqaariniarlugu Judasip versi 11-mi assersuutit mianersoqqussutit pingasut eqqaavai: Kain, Bileam Koralu. Kainip Jehovap asannittumik siunnersuutaa sumiginnarsimavaa piaaralunilu toqutsissutaasumik uumissuinini naammassillugu. (1 Moses 4:4-8) Bileam arlaleriarluni ersarissumillu Guutimit mianersoqquneqarpoq — allaat siutituujutiminit oqaluffigineqarluni! Bileamili namminissarsiorluni Guutip innuttaasa ajoqutissaannut pilersaarusiorpoq. (4 Moses 22:28, 32-34; 5 Moses 23:5) Kora annertuumik akisussaaffeqaraluarpoq naammaginaguli. Mosesimut, nunarsuarmi inunnit tamanit anneruniajuinnerpaasumut, pikitsitsivoq. — 4 Moses 12:3; 16:1-3, 32.

10. Ullumikkut ’naalannartut mitallugit’ qanoq oqaluttoqarsinnaava, taamalu oqalunneq sooq ingalassimasariaqarparput?

¹⁰ Mianersoqqussutit tamakku ilinniutigilluarsinnaavavut inuit Jehovap akisussaassuseqartitamisut atugai ataqqillugit siunnersuutaallu tusarnaaqqissaarlugit! (Eprîarit 13:17) Utoqqaanertat toqqakkat kukkuneri naniuminartuusinnaapput, taakku naammalluinnanngitsuummata, soorlu tamatta naammalluinnanngitsuusugut. Kukkuneri amigaataallu eqqarsaatigiuarutsigik ataqqiumanagillu imaassinnaava uagut ’naalannartut mitakkivut’? Versi 10-mi Judasip eqqaavaa ilaat ’nalusaminnik mitallersut’. Ilaannikkut ilaasa utoqqaanertaqatigiit imaluunniit eqqartuussisutut naliliisitat aalajangernerat isornartorsiortarpaat. Kisianni taakkua annikitsualuit utoqqaanertat aalajangerniarnerminni eqqarsaatigeqqissaartariaqagaat tamaasa naluaat. Sooq nalusatik pillugit ajortumik oqalussappat? (Ussatit 18:13) Ajortumik oqaluttuarunik ilagiinni avissaartuunnerit pilersissinnaavaat allaallu uppeqatimik akornanni ’innarloqutaasutut’ issinnaallutik. (Jûtarse 12, 16, 19) Anersaakkut ittumik allanut navianaataarusunngilagut. Akerlianik aalajangerniarta angutit akisussaassusillit pingaartinniarlugit suleruloortarmata Guutillu savaatai asannittumik isumagisarmatigik. — 1 Timûtiuse 5:17.

11. Sooq Mikaelip Satan assuaralugu eqqartuukkumanngilaa?

¹¹ Eqqortumik oqartussaassuseqarnermut ataqqinninnermigut maligassaalluartoq Judasip eqqartorpaa. Ima allassimavoq: ’Inngiliunerup Mikaelip Mosesip timaa pillugu Diaavulu saqitsaakkamiuk mitalliutaasumik pineq saperpaa, oqarlunili: „Jehovap appisaluullisit.“’ (Jûtarse 9) Oqaluttuaq soqutiginartoq tamanna Biibilimi Jûtarsip agdlagai-niinnaq eqqartorneqartoq marlutsigut ilinniutigisinnaavarput. Siullermik ilinniarpugut eqqartuussinissaq Jehovamut isumagitissagipput. Satanip qularnannngitsumik eqqunngitsumik guutisiorneq siuarsarniarlugu angutip ilumoortup Mosesip timaa atorusuppaa. Ajorluinnassusia! Taamaattoq Mikael maniguulluni nammineq eqqartuussilluni oqaaseqarumanngilaq, Jehovami kisimi taamaaliortussaammat. Uagut taava angutit ilumoortut Jehovamut kiffartorniartut eqqartuukkumassanngilavut.

12. Kristumiut ilagiissaanni oqartussaassusillit qanoq Mikaelip maligassiaa ilinniutigisinnaavaat?

¹² Aamma ilagiinni oqartussaassuseqartitaasut Mikael ilinniarfigisinnaavaat. Mikael naak ’inngiliunerugaluarluni’, tassa inngilinit tamanit qutsinnerpaajugaluarluni, kamassaarneqaraluarluni pissaanilittut atorfini atornerlussimanngilaa. Utoqqaanertat aalajaatsut taassuma maligassiaa malinniartarpaat, nalunnginnamikku oqartussaassusertik atornerlukkaluarunikku Jehovap oqartussaassusianut ataqqinninngitsuliornerussasoq. Jûtarsip agdlagai-ni assut eqqartorneqarput angutit ilagiinni ataqqinartumik akisussaassusillit pissaanerminnik atornerluisut. Assersuutigalugu versi 12-imit 14 ilanngullugu Ny Verden nutsigaq naapertorlugu ’ittuujuitsumik imminnuinnaq paaqqisut’ assut avoqqaarai. (Naleqqiuguk Hesekiel 34:7-10.) Allatut oqaatigissagaanni namminneq iluaqutissartik kisiat, Jehovap savaataasa iluaqutissaat pinnagu, pingaartinneruaat. Assersuutit mianersoqqussutaasut tamakku ullumikkut utoqqaanertat ilinniutigilluarsinnaavaat. Aap, Judasip ersarissumik allaatigisaatut ilerusunngilagut. Namminissarsiorluta iliuuseqarutta Kristusimut sakkutuujusinnaanngilagut; taamaakkutta imminuinnaq pilluta sorsunneq ulapputigissavarput. Akerlianik, tamatta Jesusip oqaasii maleruarniartigik: ’Tunisineq tigusinermit pilluarnarneruvoq.’ — apustilit suliait 20:35.

’Guutimut asanartittuinnaritsi’

13. Sooq tamatta ilumoorluta kissaatigisariaqarparput Guutimut asanartittuarnissarput?

¹³ Allakkami naalernerani Judas ima kajumissaarivoq: ’Guutimut asanartittuinnaritsi.’ (Jûtarse 21) Jehova Guutimut asanartittuarutta tamatuma allanit tamanit kristumiutut sorsunniarnitsinni ikiussavaatigut. Asanninneq Jehovap pissusiisa ersarinnersaraat. (1 Juánase 4:8) Paulusip kristumiut Romamiittut ima allaffigisimavai: ’Nakimanaveerpungami toqulluunniit inuunerulluunniit, inngililluunniit naalagaanerilluunniit, maannakkut ittulluunniit piumaartussalluunniit, pissaanerilluunniit, qutsissulluunniit atsissulluunniit, suulluunniit pinngortitap allaasup avissaartinnaviassanngikkaatigut Guutip asannissusianit Kristus Jesusimi Naalakkatsinni.’ (Rûmamiut 8:38, 39) Qanorli ililluta taassumunnga asanartittuarsinnaavugut? Judasip oqaasii naapertorlugit pingasunik iliuuseqarsinnaavugut.

14, 15. (a) ’Upperisatsigut illernangaartukkut ineriartorneq’ qanoq paasisariaqarpa? (b) Qanoq ililluta anersaakkut sakkutuussutivut misissorsinnaavavut?

¹⁴ Siullermik Judasip peqquaatigut ’upperisatsigut illernangaartukkut ineriartorteqatigeeqqulluta’. (Jûtarse 20) Soorlu allaaserisami siulianiittumi nassuiarneqartoq uninnata taamaaliortuartariaqarpugut. Illutut silarlukkiartuinnarmat isumannaallisarneqarnerujartuin-nartariaqartutut ippugut. (Naleqqiuguk Matîuse 7:24, 25.) Taamaattumik imminut tatigivallaarnaveersaartariaqarpugut. Akerlianik eqqumaffigisariaqarparput uppernitta tunngaviani ineriartornerunissarput, nakkusatsinnerunissarput Kristusillu sakkutuuisut aalajaannerulernissarput. Assersuutigalugu sakkutuussutit anersaakkut ittut assigiinngitsut Evfisumiut 6:11-18-imi allaatigineqartut eqqarsaatigisinnaavavut.

¹⁵ Sakkutuussutit anersaakkut ittut nammineq pigisavut qanoq ittuuppat? ’Uppernerput eqqornaveeqqutigisarput’ pisariaqartinneqartutut nukittutiginerpa? Ukiut kingulliit eqqarsaatigigutsigik qasukkalersimanerpugut, assersuutigalugu ataatsimiigianngitsoortarluta, oqaluussinermi ilungersuussiunnaarluta imaluunniit nammineq atuaqqissaarnissarput soqutigiunnaarlugu? Tamakkunatigut amigaateqalerneq ulorianarpoq! Maannakkut iliuuseqartariaqarpugut nammineq sallusuissummi ineriartorniarluta nakkussatsinniarlutalu. — 1 Timûtiuse 4:15; 2 Timûtiuse 4:2; Eprîarit 10:24, 25.

16. Anersaakkut illernartukkut qinuneq qanoq paasisariaqarpa, aalajangersimasumillu Jehova sumik qinnuigisariaqarparput?

¹⁶ Aappassaanik Guutimut asanartittuinnarniarluta ’qinusariaqarpugut anersaakkut illernartukkut’. (Jûtarse 20) Tassa Jehovap anersaavanit siulersorneqarluta oqaasianullu anersaamit isumassarsiarititaasumut naapertuuttumik qinusariaqarpugut. Jehovamut qanittumik attaveqassagutta taassumunngalu asanninnerput ersersinniarutsigu qinuneq pingaaruteqarluinnarpoq. Immikkut pisinnaatitaaffissuaq tamanna sumiginnarnaveertigu! Qinugaangattalu anersaaq illernartoq qinnutigisariaqarparput — aap, qinnutigiuartariaqarlugu. (Lúkarse 11:13) Tamanna tassaavoq nukiit pisinnaasatta nukittunerpaartaat. Tamanna ikiortigalugu Guutimut asanartittuarsinnaavugut Kristusillu sakkutuuisut aalajaattuarsinnaalluta.

17. (a) Sooq nallittuineq eqqarsaatigalugu Judasip maligassiaa taama maluginiarnartigaa? (b) Tamatta qanoq ililluta nallittuinerput takutittuarsinnaavarput?

¹⁷ Pingajussaanik, Judasip nallittuiuaqqulluta kajumissaarpaatigut. (Jûtarse 22, NV) Taanna nammineq tamatumani maligassaalluarpoq. Tassami, kristumiut ilagiissaanni ajortunngoriartorsimaneq, kanngunartuliortoqartarnera tunussisoqalerneralu eqqortumik isumakuluutigai. Kisianni ingasappallaartumik qisuarianngilaq, isumaqarnani naakkinnittumik pissuseqassalluni piffissami tamatumani naleqquttuunngitsoq. Aap, qatanngutini kajumissaarpai ajornanngikkaanngat nallittuisaqqullugit, qulalersunik inussiarnersumik oqaloqatiginnittaqqullugit allaallu sualuttumik ajortulioriataarsinnaasut ’innermit nutsullugit’. (Jûtarse 23; Galâsiamiut 6:1) Unnersuussut tamanna ullutsinni ajornartorsiorfiusuni utoqqaanertat iluaqutigissavaat! Taakkuattaaq pissutissaqaraangat nallittuisariaqarput, aammali pisariaqaraangat aalajangersimassutsimik ersersitsisariaqarlutik. Tamatta nallittoqatigiittariaqarpugut. Assersuutigalugu, pingaaruteqanngitsut maalaarutiginagit isumakkeerfiginnittuartariaqarpugut. — Kulorsamiut 3:13.

18. Sorsunnermi anersaakkut ittumi qanoq ililluta ajugaanissarput qulakkeersinnaavarput?

¹⁸ Sorsunneq anersaakkut ittoq peqataaffigisarput oqitsuunngilaq. Soorlu Judas allassimasoq ’assoroortariaqarpugut’. (Jûtarse 3) Akeqqavut pissaanilissuupput. Sataniinnaanngitsoq aammali taassuma silarsuaa ajortoq naammalluinnanngissutsivullu tamaasa akiortariaqarpavut. Ajugaanissarpulli qularinngilluinnarsinnaavarput! Sooq? Jehovap iligimmatigut. Judasip allakkani naavai allalluni Jehovap ’naalannassuseq angingaassuserlu pissaanerlu piginnaanerlu pigigai isuanit maannalu naassaanngilluinnartumillu’. (Jûtarse 25) Tamanna eqqarsaatigalugu ataqqinangaannginnerpa? Taamaattumik qularisariaqanngilarput Guuti taanna ’uatsinnik naakkiunnaveersitsisinnaasoq’. (Jûtarse 24) Tamatta aalajangerniarta kanngunartuliorneq ingalassimaniarlugu, Guutimit oqartussaassuseqartitaasut ataqqillugit Guutimullu asanartittuarluta. Taamaalilluta tamatta ajugaaqatigiissaagut. (wE 1/6 98)

[Quppernerup ataani ilanngussaq]

Uteqqiinissamut apeqqutit

□ Kanngunartuliornermik ingalassimanninnissatsinnik Jûtarsip agdlagai-ni qanoq ilinniartinneqarpugut?

□ Sooq Guutimit oqartussaassuseqartitaasut ataqqissallugit pingaaruteqarluinnarpa?

□ Sooq ilagiinni oqartussaassutsimik atornerluineq navianarpa?

□ Qanoq ililluta Guutimut asanartittuinnarsinnaavugut?

[Qupp. 15-imi assiliartaq]

Romamiut sakkutuui assiginagit, kristumiut anersaakkut ittumik sorsuttariaqarput

[Qupp. 18-imi assiliartaq]

Kristumiut paarsisut namminissarsiorneq pinnagu asanninnerli killissutigalugu kiffartorput