’Toqu suujunnaarsitaassaaq’
’Qinngarsuisut suujunnaarsitassat nunngutissaat tassa toqu.’ — 1 KORINTUMIUT 15:26.
1, 2. (a) Toqusimasunut neriuutissaq suna apustili Paulusip eqqartorpaa? (b) Makinnissaq pillugu Paulus qanoq aperiva?
„UPPERPUNGA . . . uinngup makinnissaanut inuunermullu naassaanngitsumut.“ Apustilitut nassuerutigisap ilaa taama nipeqarpoq. Katuullit naaggaartullu tamarmik pisussaassusertik malillugu tamanna nassuerutigisarpaat nalullugu upperisartik griikeritoqqat isumaliutersuutaannut eqqaanarnerusoq apustilit upperisaannut pinnani. Apustililli Paulusip griikerit isumaliutersuutaat ajattorpai tarnillu toqujuissusia upperinagu. Inuunerli piumaartussaq upperilluinnarpaa isumassarsisitaallunilu allassimalluni: ’Qinngarsuisut suujunnaarsitassat nungutissaat tassa toqu.’ (1 Korintumiut 15:26) Inuiannut toqujartortunut tamanna sumik nassataqassava?
2 Apeqqut tamanna akiniarlugu Korintumiunut agdlagkat sujugdlît-ni kapitali 15-imi Paulusip makinnissamik nassuiaanera uterfigeriartigu. Soorlu siuliani eqqaaneqareersoq Paulusip versini siullerni erseqqissarpaa makinnissaq kristumiut ajoqersuutaannut ilaalluinnartoq. Taava Paulus ima aperivoq: ’Imali oqartoqassanerpoq: „Qanoq illutik toqusut makissappat? Qanorlu ittumik timeqarlutik saqqummissappat?“’ — 1 Korintumiut 15:35.
Qanoq ittumik timeqassappat?
3. Sooq ilaasa makinnissamik eqqarsaat ajattorpaat?
3 Paulus taama aperisimasinnaavoq Platonip isumaliutersuutaasa sunniuteqarnerat akiorniarlugu. Platon ajoqersuisimavoq inuk toqujuitsumik tarneqartoq timip toqunerata kingorna inooqqittartumik. Inuit alliartornermi eqqarsaammik tamatuminnga ilinniartinneqarsimasut qularnanngitsumik kristumiut ajoqersuutaat asuliinnaasutut isigisimassavaat. Tarnermi toqup kingorna inooqqittarpat sooq makittoqartariaqassava? Aamma ilaasa immaqa makinnissamik eqqarsaat tunngaveqarluanngitsutut isigisimassavaat. Timimi issunngoreersimaguni qanoq ililluni makissinnaassava? Biibilimik nassuiaasoq Heinrich Meyer oqarsimavoq Korinthimiut ilaat akaarinninngitsumik isumaat immaqa „timip sananeqaatiminit pinngoqqissinnaannginneranik isumaliutersuummik tunngaveqartoq“.
4, 5. (a) Uppinngitsut akerliliineri sooq tunngavissaqarluanngillat? (b) Paulusip ’naatsiiassaannaq’ pillugu assersuutaa nassuiaruk. (c) Tanitat makittut Guutip qanoq ittumik timeqalersittarpai?
4 Eqqarsaataasa amigaateqarnerat Paulusip tikkuarpaa: ’Uumaa siuneqanngitsutit, naatsiiassaq issumut ilisat uummassanngilaq, kisianni toqugallaruni. Sunalu naatsiiassaq issumut ilisaraangakku timi pinngortussaq ilisarinngilat, naatsiiassaannarli qajuusiassaanersorluunniit arlaasaluunniit ilagineraat. Guutilli timissaanik piumasaminik tunisarpaa, naatsiiassallu immikkut pissusillit nungullugit immikkut timissaqartittarpai.’ (1 Korintumiut 15:36-38) Guutip inuit nunarsuarmi inuugallaramik timigisimasaasa makitinnissaat siunertarinngilaa. Allanngortinneqassapput.
5 Paulusip makinnissaq naatsiiassamut naalersumut assersuuppaa. Qajuusiassap karria qajuusiassatut naajumaartutut isikkoqanngivittarpoq. The World Book Encyclopedia-mi allassimavoq: „Naatsiiassap naaleraangami imeq milluarluartarpaa. Imeq pissutigalugu naatsiiassap iluani kemiikkut amerlasuunik allanngortoqartarpoq. Naatsiiassap ilua pullalersarpoq qalipamminillu qartorartarluni.“ Naatsiiassaq toqusarporlusooq naasunngortarlunilu. ’Guutip timissaanik tunisarpaa’, tassa naalernissaanut ilisimatuussutsikkut inatsisit aalajangersimavai, naatsiiassallu assigiinngitsut tamarmik immikkut timeqalersinneqartarput. (1 Moses 1:11) Tamatumunnga assingusumik kristumiut tanitat siullermik inuttut toqusarput. Kingornalu, piffissaq Guutip aalajangersimasaa nalliuppat, inuunermut utertissavai nutaanik timeqalersillugit. Soorlu Paulusip Filippimiut allaffigisimagai: ’Jesus Kristusip . . . timivut nikanarsagaasut allanngortissavai timini naalannassutsimi pia assigitillugu.’ (Filípimiut 3:20, 21; 2 Korintumiut 5:1, 2) Anersaakkut ittumik timeqarlutik makissapput inuunermut anersaakkut ittumut. — 1 Juánase 3:2.
6. Sooq tunngavissaqarluassava isumaqassalluni Guutip tanitat makittut naleqqulluartumik timeqalersissinnaagai?
6 Tamanna upperiuminaappa? Naamik. Paulusip eqqaavaa uumasut assigiinngitsunik timeqartartut. Aamma inngilit qilammiittut inuillu uinillit aallillu assigiinngitsutut eqqaavai oqarami: ’Aamma timeqarpoq qilammiusunik timeqarlunilu nunamiusunik.’ Pinngortitat uumassuseqanngitsut aamma assigiinngitsorpassuupput. ’Ullorissat qaamanermikkut taamaaqatigiinngillat,’ Paulus taama allassimavoq ilisimatuut ullorissat assigiinngitsut suli paaseqqajanngikkallarmatigik, soorlu ullorissat tungujortut, ulloriarsuit aappaluttut ulloriarsuaaqqallu qaqortut. Tamanna eqqarsaatigalugu pissutissaqarluannginnerpa isumaqassalluni Guutip tanitat makittut naleqqulluartumik anersaakkut ittumik timeqalersissinnaagai? — 1 Korintumiut 15:39-41.
7. Aserujuissuseq toqujuissuserlu qanoq paasisariaqarpat?
7 Paulus nangilluni allassimavoq: ’Taamattaaq toqusut makiffissaat ippoq: ilisaavoq aserujasoq, makissavoq aserujuitsoq.’ (1 Korintumiut 15:42) Inuup timaa, allaat naammalluinnartuugaluarluni, aserujasuusarpoq. Toqunneqarsinnaavoq. Assersuutigalugu, Paulus oqarsimavoq Jesus makissimasoq ’aserornermut utertussaajunnaarsinneqartoq’. (apustilit suliait 13:34) Inuttut naammalluinnartumik aserujasumilli timeqarluni inuunermut uternavianngilaq. Guutip tanitanut makittunut timigilersitai aserujuitsuussapput — toqusinnaanatillu aserorsinnaanngillat. Paulus allassimavoq: ’Ilisaavoq kanngusuutilik, makissavoq naalannassusilik; ilisaavoq sanngiitsoq, makissavoq pissaasoq; ilisaavoq timi tarnip pia, makissavoq timi anersaap pia.’ (1 Korintumiut 15:43, 44) Aamma ima allassimavoq: ’Toqujasoq manna toqusuissummik atitittariaqarpoq.’ Toqujuitsuuneq isumaqarpoq naassaanngitsumik, aserorneqarsinnaanngitsumik inuuneq. (1 Korintumiut 15:53; Eprîarit 7:16) Taamaalillutik makittussat Jesusip, ’qilammiup assinga atisariumaarpaat’, taassumami makinnissaat ajornarunnaarsissimavaa. — 1 Korintumiut 15:45-49.
8. (a) Qanoq nalunngissinnaavarput makittut nunarsuarmi inuugallarnermissut kinaassuseqassasut? (b) Siulittuutit suut makinnissami eqquutissappat?
8 Naak taamaalillutik allanngortinneqaraluarlutik makittut suli toqunngikkallarnermissut kinaassuseqassapput. Makitinneqarunik eqqaamasatik kristumiutullu pissuserisatik nuannersut suli pigissavaat. (Malaki 3:3; sarĸúmersitat 21:10, 18) Tamatumuuna Jesus Kristus assigissavaat. Taanna anersaajunerminit allanngortinneqarsimavoq inunngorluni. Kingorna toquvoq anersaatullu makitinneqarluni. Taamaattoq Jesus Kristus ’ippassarlu ullumilu naassaanngitsumillu taannaavoq’. (Eprîarit 13:8) Taamaalillutik tanitat immikkut ittumik alutornangaartumillu pisinnaatitaaffeqarput. Paulus allassimavoq: ’Aserujasup matuma aserujuissut atippagu, toqujasullu matuma toqusuissut atippagu, taava eqquukkumaarpoq oqaaseq allassimasoq: „Toqu ajugaanermut nungutitaavoq.“ „Toqu-aa, ajugaanerit naak? Toqu-aa, iguutit naak?“’ — 1 Korintumiut 15:54, 55; Jesaja 25:8; Húsia 13:14.
Nunarsuarmi inuunermut makinnissaq?
9, 10. (a) Korintumiunut agdlagkat sujugdlît 15:24-p ataqatigisaasa qanoq takutippaat ’naggatissaq’ sunaasoq, taamanikkussamullu qanoq pisoqassava? (b) Toqu suujunnaarsinneqassappat aamma suna pisariaqarpa?
9 Inuit millionilikkuutaat qilammi anersaatut inuunissamik toqujuitsumik neriuuteqanngitsut siunissaqarpat? Aap! Nassuiareeramiuk qilammi inuunermut makinnissaq Kristusip najuunnerani pissasoq Paulusip eqqaavaa kingorna qanoq pisoqassasoq: ’Tullissaavoq naggatissaq, naalagaaffik Guutimut Ataatamut pisippagu, siulersuisut tamaasa naalakkersuisullu pissaasullu tamaasa soraarsippagit.’ — 1 Korintumiut 15:23, 24.
10 ’Naggatissaq’ tassani eqqaaneqartoq tassaavoq Kristusip ukiuni tuusintini naalakkersuinissaata naggataa, Jesusip maniguulluni ilumoorlunilu Naalagaaffik Guutiminut Ataataminullu tunniuppagu. (sarĸúmersitat 20:4) Taamanikkussaq Guutip ’tamaasa Kristusimi ataasinngortinniarlugit’ siunertaa naammassineqassaaq. (Evfisumiut 1:9, 10) Tamanna pitinnagu Kristusip ’siulersuisut tamaasa naalakkersuisullu pissaasullu tamaasa’ Guutip piumasaanut assortuisut suujunnaarsissavai. Tamanna tassaaginnanngilaq Harmagedonimi suujunnaarsitsinissaq. (sarĸúmersitat 16:16; 19:11-21) Paulus allassimavoq: ’[Kristus] kunngiussagami qinngarsuisut tamaasa isikkami ataannut ilitserlugit. Qinngarsuisut suujunnaarsitassat nunngutissaat tassa toqu.’ (1 Korintumiut 15:25, 26) Aap, ajortip toqullu Adamimit kingornussimasatta kinguneri tamarmik peerneqarluinnassapput. Tamanna aamma isumaqarpoq Guutip ’iliverniittut’ tamaasa inuunermut makitikkumaarai. — Juánase 5:28.
11. (a) Qanoq nalunngissinnaavarput Guutip tarnit toqusimasut pinngorteqqissinnaagai? (b) Nunarsuarmi inuunermut makittut qanoq ittumik timeqassappat?
11 Tassa inuit tarniusut pinngorteqqinneqassapput. Tamanna ajornanngila? Aap. Tussiaat 104:29, 30-mi neriorsoqqissaarneqarpugut Guuti taamaaliorsinnaasoq: ’Anernerannik arsaarutsik toqussapput pujualaanerminnullu utersaarlutik. Anersaat aallartikkaangakku pinngortarpoq inuuneq, nunalu taava nutaanngortittarpat.’ Makittut toqunngikkallarnermissut inuttut kinaassuseqassapput, timigisimasaminnilli timeqartariaqaratik. Soorluttaaq qilammi inuunermut makittut taama pineqartut, Guutip nunarsuarmi inuusussat piumasaminik timeqartissavai. Qularnanngitsumik peqqilluinnartumik timeqassapput timigisimasaminnut ima assingutigisunik ilaquttaminnit ikinngutimminnillu ilisarineqarsinnaallutik.
12. Qaqugu nunarsuarmi inuunermut makittoqassava?
12 Qaqugu nunarsuarmi inuunermut makittoqassava? Marta qatanngunni toqusoq Lazarus pillugu oqarsimavoq: ’Nalunngikkaluarpara ullut naggatissaanni makiffissami makikkumaartoq.’ (Juánase 11:24) Qanoq ililluni tamanna nalunngissinnaasimavaa? Taamani makinnissaq assut isumaqatigiinngissutigineqartarpoq, farisiiarit upperimmassuk saddukiiarilli upperinagu. (apustilit suliait 23:8) Martap nalusimanngilaa nalunaajaasut kristumiut nalaat sioqqullugu inuusut ilaat makinnissamik neriuuteqarsimasut. (Eprîarit 11:35) Aamma Daniel 12:13 tunngavigalugu paasisimasinnaavaa ullut naggatissaanni makittoqarumaartoq. Immaqalu allaat Jesusimit paasisimavaa. (Juánase 6:39) ’Ullut naggatissaat’ Kristusip ukiuni tuusintini naalakkersuinerani pissapput. (sarĸúmersitat 20:6) Takorlooriaruk taamanikkussaq makinneq pilerpat qanoq qiimanersuaqartigissasoq! — Naleqqiuguk Lúkarse 24:41.
Kikkut makissappat?
13. sarĸúmersitat 20:12-14-imi makinnissaq qanoq allaatigineqarpa?
13 sarĸúmersitat 20:12-14-imi Johannesip nunarsuarmi inuunermut makinnissamik takorruugaa allaatigineqarpoq: ’Toqusullu mikisut angisuullu issiavissaarsuup saani qeqartut takuakka, mappersakkallu qassiit mapperneqarput, mappersakkallu allat ataatsit mapperneqarput, tassa mappersakkat inuunerup pii; toqusullu eqqartuunneqarput mappersakkani allassimasut malillugit, suliatik naapertorlugit. Immallu toqusut imminiittut tunniuppai, toqullu toqusullu inaata toqusut imminniittut tunniuppaat; eqqartuunneqarpullu nungullutik suliatik naapertorlugit. Toqulu toqusullu inaat tatsimut innerusumut igitaapput. Tassa toqup aappaa, taseq innerusoq.’
14. Ilaatigut kikkut makittunut ilaassappat?
14 Makittussat akornanniissapput ’mikisut angisuullu’, tassa inuusimasut toqusimasullu akornanni inuit nuimanngitsut nuimanerusullu. Allaat inoorlaanik makitoqassaaq. (Jeremia 31:15, 16) apustilit suliait 24:15-imi alla pingaartoq eqqaaneqarpoq: ’Toqusut makikkumaarput, iluartullu iluaatsullu.’ ’Iluartut’ akornanni malunnarnerusut ilaat tassaassapput angutit arnallu aalajaatsut itsaq inuusimasut, soorlu Abel, Enok, Noa, Abraham, Sara Rahabilu. (Eprîarit 11:1-40) Takorlooruk taakku oqaloqatigisinnaassagitit Biibilimilu oqaluttuarineqartunik itsaq pisimasunik takunnittutut oqaluttuarisinnaasaat tusarnaarlugit! ’Iluartut’ aamma ilagissavaat Guutimik mianerinnittut tuusintilippassuit ukiuni nutaanerusuni qilammi inuunissamik neriuuteqaratik toqusimasut. Tamatta qularnanngitsumik taakku ilaannik eqqarleqarlutalu ikinnguteqarpugut. Tuppallernartorujussuuvoq nalunnginnatsigu takoqqikkumaarlugit. Taavali ’iluaatsut’ makittussat kikkuuppat? Tassaapput inuit millionilikkuutaat, immaqa milliardilikkuutaat, sallusuissutip Biibilimeersup ilikkarnissaanut maleruarnissaanullu periarfissaqarsimanatik toqusimasut.
15. Makittut ’mappersakkani allassimasut malillugit’ eqqartuunneqarnissaat qanoq paasisariaqarpa?
15 Makittut taakku qanoq ilillutik ’mappersakkani allassimasut malillugit, suliatik naapertorlugit’ eqqartuunneqassappat? Mappersakkat taakkua siornatigut suliarisimasaannik imaqanngillat; toqugamik inuugallaramik ajortuliarisimasaminnit isumakkeerfigineqarput. (Rûmamiut 6:7, 23) Makittulli suli ajortip Adamimit kingornussaasup ataaniissapput. Taamaattumik mappersakkat tamakku imarisimassavaat ilitsersuutit Guutimeersut inuit tamarmik Jesus Kristusip pilliutaa tamakkiisumik iluaqutigiumallugu maleruartariaqagaat. Ajorti Adamimit kingornussimasaq tamakkerlugu peerneqarpat toqu suujunnaarsinneqarluinnassaaq. Ukiut tuusintit naalerpata Guuti ’tamani tamarsuussaaq’. (1 Korintumiut 15:28) Taava inuiaat palasiunerup utertitsisulluunniit saammaannartitsinera pisariaqartikkunnaassavaat. Inuiaat tamarmik naammalluinnartunngussapput Adamip aallaqqaammut naammalluinnartuusimaneratut.
Makititsineq aaqqissugaalluartumik ingerlanneqassaaq
16. (a) Sooq ilimagisinnaavarput makinnissaq aaqqissugaalluartumik ingerlanneqassasoq? (b) Toqusimasut makittut siulliit qularnanngitsumik kikkuussappat?
16 Qilammi inuunermut aaqqissugaalluartumik, ’tulleriissuseq missiliorlugu’, makittoqassammat soorunami nunarsuarmi inuunermut makititsinissaq inuit amerliartupallalernersuannik uivissutaasumik kinguneqassanngilaq. (1 Korintumiut 15:23) Makerlaat soorunami isumagineqartariaqassapput. (Naleqqiuguk Lúkarse 8:55.) Nunap piisigut tapersersorneqartariaqassapput, pingaarnerusumillu, anersaakkut ikiorneqartariaqassapput Jehova Guuti Jesus Kristusilu pillugit inuunartumik ilisarseqqullugit. (Juánase 17:3) Tamarmik ataatsikkut inuunermut makitinneqassagaluarunik naammattumik isumassorneqarsinnaanavianngillat. Taamaattumik tunngavissaqarluarpoq isumaqassalluni ataatsikkut makititsineqarnavianngitsoq. Kristumiut aalajaatsut Satanip aaqqissuussaanerata naggatissaata siuninnguani toqusut qularnanngitsumik makittut siulliit akornanniissapput. Aamma ilimagisinnaavarput aalajaatsut itsaq inuusimasut piaartumik makitinneqassasut ’naalagarsuartut’ kiffartussammata. — Tussiaat 45:17.
17. Makinnissaq pillugu annikitsualuit suut Biibilimi eqqaaneqanngillat, kristumiullu sooq apeqqutit taamaattut sammivallaartariaqanngilaat?
17 Annikitsualuilli tamakku pillugit aalajangiussilluinnartariaqanngilagut. Apeqqutigineqarsinnaasut amerlasuut Biibilimi akineqanngillat. Tassani sukumiisumik nassuiarneqanngilaq qanoq ilillutik, qaqugu imaluunniit sumi inuit makitinneqarumaarnersut. Ilisimatinneqanngilagut makittussat qanoq nerisassanik, atisassanik illussanillu pilersorneqassasut. Naluarputtaaq meeqqat makittussat pisariaqartitaminnik isumagineqarlutillu perorsarneqarnissaat, imaluunniit ikinngutitsinnut eqqarlitsinnullu tunngatillugit ajornartorsiutaasinnaasut aaqqinneqarnissaat Jehovap qanoq ililluni isumagiumaarai. Pissusissamisooraluarpoq tamakku eqqarsaatigissagutsigik, kisianni silatusaarnerunngilaq apeqqutit maannakkut akineqarsinnaanngitsut akiniarlugit ilungersussalluni. Jehovamut aalajaalluni kiffartorneq naassaanngitsumillu inuunermik angusiniarneq pingaarnerutillugit aalluttariaqarpavut. Kristumiut tanitat qilammi inuunermut makinnissaq nuannersoq qilanaarisinnaavaat. (2 Pîtruse 1:10, 11) ’Savat allat’ nunarsuarmi Guutip naalagaaffiata ataani naassaanngitsumik kingornussinissartik qilanaaraat. (Juánase 10:16; Matîuse 25:33, 34) Makinnissaq pillugu annikitsualuit amerlasuut nalusavut eqqarsaatigalugit Jehova tatigiinnartariaqarparput. Taassuma ’pinngortitat tamaasa ajunngitsuutiminik qaarsillartittaramigit’ naassaanngitsumik pilluarnissarput isumagilluarsinnaavaa. — Tussiaat 145:16; Jeremia 17:7.
18. (a) Ajugaanissaq suna Paulusip eqqaavaa? (b) Sooq makinnissaq upperilluinnarsinnaavarput?
18 Paulusip nassuiaanini ima naggaserpaa: ’Guutili qujanarsili ajugaatikkamisigut Naalakkatsigut Jesus Kristusikkut.’ (1 Korintumiut 15:57) Aap, toqu Adamimit kingornussimasaq Jesus Kristusip utertitsissutitut pilliutaa aqqutigalugu ajugaaffigineqarpoq, tanitallu ’savallu allat’ tamarmik ajugaanermut tamatumunnga peqataapput. ’Savat allat’ ullumikkut inuusut immikkorluinnaq ittumik neriuutissaqarput. ’Amerlangaartunut’ amerliartuinnartunut ilaagamik ’annikilliornartussamit angisuumit’ aniguinissaminnut toqunngisaannarnissaminnullu periarfissaqarput. (sarĸúmersitat 7:9, 14) ’Piffissakkut nalaatsornertigullu pisutigut’ toqusut imaluunniit Satanip ikiortaanit toqunneqartut makinnissamik neriuutissaqarput. — Nalunaajaasup oqaasii 9:11, NV.
19. Kajumissaarut suna kristumiut tamarmik ullumikkut maleruartariaqarpaat?
19 Taamaattumik qilanaarluta ullussaq nuannersoq toqup suujunnaarsitaaffissaa qilanaaraarput. Jehovap makinnissamik neriorsuutaa tatigilluinnaratsigu inuuneq piviusorsiortumik isigisinnaavarput. Inuunermi matumani sumit eqqorneqassagaluaruttaluunniit — allaat toqugaluaruttaluunniit — akissarsiassamik Jehovap neriorsuutigisaanik piiaaffigineqarsinnaanngilagut. Paulusip Korinthimiunut naggataarutaasumik kajumissaarutaa ukiut 2000-t matuma siorna allanneqarsimanermisulli ullumikkut suli pingaaruteqartigaaq: ’Tamanna pillugu, asasakka qatanngutikka, aalajangeritsi saqinnaveerlusilu Naalakkallu suliaanik naammassisaqangaartuinnarlusi, suliniarnisi Naalakkami asuliinnaanngitsut ilisimagassigik.’ — 1 Korintumiut 15:58. (wE 1/7 98)
Makku nassuiarsinnaavigit?
□ Tanitat makitinneqarunik qanoq ittumik timeqassanersut pillugu apeqqut Paulusip qanoq akisimavaa?
□ Qanoq ililluni qaqugulu toqu suujunnaarsinneqarluinnassava?
□ Kikkut nunami inuunermut makissappat?
□ Annikitsualuit Biibilimi eqqaaneqanngitsut qanoq isumaqarfigisariaqarpavut?
[Qupp. 21-mi assiliartaq]
Naatsiiassaq ’toqusarpoq’ tupinnartumik allanngorluni
[Qupp. 23-mi assiliartaq]
Angutit arnallu aalajaatsut itsaq inuusimasut, soorlu Noa, Abraham, Sara Rahabilu makittut akornanniissapput
[Qupp. 24-mi assiliartaq]
Makinnissaq nuannaangaarnermik kinguneqassaaq!