Jehova malitsigu iluartumik naapertuilluartumillu iliorluta

’Uanga Jehova tassaavunga nunami unneqqarissoq innarluitsorlu naapertuilluartumillu iliortoq, tamakku iluarigakkit.’ — JEREMIA 9:23.

1. Jehova nuannersumik sumik neriorsuisimava?

JEHOVA neriorsuivoq ullut arlaanni kikkut tamarmik ilisarilerumaaraanni. Pruffiitini Esajas aqqutigalugu ima nalunaarpoq: „Ajortumik iliortoqarnanilu ajoqusiisoqassanngilaq qaqqanni illernartumi, [Jehovamik] ilisarsinerup nuna tamakkerumaarmagu soorlu ermit matoqqagaat immap naqqa.“ (Jesaja 11:9) Siunissaq nuannerunaq, ilaa!

2. Jehovamik ilisarsineq qanoq paasisariaqarpa? Sooq?

² Jehovamik ilisarsineq qanoq paasisariaqarpa? Jehovap Jeremias paasitissimavaa suna pingaaruteqarnerpaasoq: „Kisianni usorsitsaarumasup usorsitsaatigiliuk ima silaqassuseqarami uanga ilisarisinnaallunga, uanga [Jehova] tassaasunga nunamilu unneqqarissoq innarluitsorlu naapertuilluartumillu iliortoq, tamakku iluarigakkit.“ (Jeremia 9:23) Tassa Jehova ilisarigutsigu aamma qanoq iluartumik naapertuilluartumillu iliortarnera paasissavarput. Pissutsit tamakku ilaarlugit iliortarutta Jehovap iluarissavaatigut. Qanoq ililluta taamaaliorsinnaavugut? Oqaatsimini Biibilimi Jehovap ukiut ingerlaneranni inunnut naammalluinnanngitsunut iliorfiginnittarsimanini allatsissimavai. Tamanna atuaqqissaartarutsigu Jehovap iluartumik naapertuilluartumillu iliortarnera paasissavarput taamaalillutalu malinniarsinnaallugu. — Rûmamiut 15:4.

Naapertuilluartoq taamaattorli misiginneqataasoq

3, 4. Jehova Sodoma Gomorralu aseroramigit sooq eqqortumik iliorpa?

³ Guutip Sodomamut Gomorramullu eqqartuussutaa assersuutissaalluarpoq Jehovap naapertuilluassusiata immikkoortuinut arlalinnut. Jehova pisariaqartumik pillaaginnarnani aamma annannissamik pissassaqartut aniguisippai. Illoqarfiit tamakkua aserorneqarnerat naapertuilluartuliornerua? Abraham Sodomamiut ajussusiat ilisimarpiannginnamiuk siullermik taama isumaqanngilaq. Jehovap Abraham neriorsoqqissaarpaa tassani qulinik naapertuilluartunik inoqaraluarpat illoqarfik aserornavianngikkini. Ersarippoq Jehovap naapertuilluassutsi tuaviortumik naakkinninngitsumillu naammassineq ajoraa. — 1 Moses 18:20-32.

⁴ Inngilit marluk Sodoma misissormassuk illoqarfiup ileqqussatigut ajortunngorsimanera ersarippoq. Illoqarfiup angutitaasa ’inuusuttut utoqqaallu tamakkerluinnarlutik’ paasigamikku angutit marluk Lotip illuanut unnuisut illu avatangerpaat pinngitsaaliillutik anguteqatinoorfiginnikkumallutik. Ajortunngorsimanerat taama ingasatsigaaq! Qularnanngivissumik Jehovap illoqarfimmut eqqartuussinera naapertuilluartuuvoq. — 1 Moses 19:1-5, 24, 25.

5. Guutip qanoq ililluni Lot ilaqutaalu Sodomamit aniguisippai?

⁵ Sodomap Gomorrallu aserorneqarsimanerat mianersoqqussutitut eqqartoreerlugu apustili Peter allassimavoq: ’Jehovap mianerinnitsini ussernartumit annaanneq nalussanngilai.’ (2 Pîtruse 2:6-9) Lot iluartoq ilaqutaalu Sodomamiut guutiitsut ilagalugit nungutinneqarsimagaluarpata naapertuilluarnerussanngikkaluarpoq. Taamaattumik Jehovap inngiliisa Lot mianersoqquaat aseruinissaq pillugu. Lot nangaammat inngilit Lot, nulia paniilu tasissiullugit illoqarfiup avataanukaappaat ’Jehovap asattuukkumammagit’. (1 Moses 19:12-16) Qularinngissinnaavarput Jehovap aaqqissuussaanerup matuma ajortup qanittukkut aserorneqarnissaani tamatumunnga assingusumik inuit iluartut isumagissagai.

6. Sooq aaqqissuussaanerup matuma ajortup qanittukkut aserorneqarnissaa pillugu annertuumik isumakuluuteqartariaqanngilagut?

⁶ Naak aaqqissuussaanerup matuma naggatissaata ullui tassaajumaartut ’ullut akiniaaffiit’ annertuumik isumakuluuteqartariaqanngilagut. (Lúkarse 21:22) Guutip Harmagedonimi eqqartuussinera ’naapertuilluarnerussaaq’. (Tussiaat 19:10) Soorlu Abrahamip misigisimagaa, Jehovap naapertuilluassusia tatigilluinnarsinnaavarput, uagut inuit naapertuilluassutsitsinnit qutsinnerungaarmat. Abraham ima aperivoq: „Nunarsuarmik tamarmik eqqartuussisuusoq naapertuilluartumik iliussannginnerpa?“ (1 Moses 18:25; naleqqiuguk Job 34:10.) Imaluunniit Esajasip oqarneratut: „Kia [Jehova] ingerlavimmik eqqortumik ajoqersuuttarpaa?“ — Jesaja 40:14.

Inuiaat annaanniarlugit naapertuilluartuliorneq

7. Guutip naapertuilluassusia naakkinninneralu qanoq imminnut attuumassuteqarpat?

⁷ Guutip naapertuilluassusia eqqunngitsuliortunik eqqartuussinerinnaaniunngitsoq ersersinneqartarpoq. Jehova oqarsimavoq nammineq Guutiulluni ’iluartoq annaassisartorlu’. (Jesaja 45:21) Ersarippoq Guutip naapertuilluassusia inuiaallu ajortip kingunerisaanit aniguisinnissaannik kissaateqarnera imminnut attuumassuteqarluinnartut. Allassimaffik tamanna oqaaseqarfigalugu The International Standard Bible Encyclopedia-mi, 1982-imoortumi allassimavoq ’Guutip naapertuilluassusia naakkinnittuliornissaanik annaassiniarlunilu iliuuseqarnissaanik ujartuisartoq’. Ima paasisariaqanngilaq Guutip naapertuilluassuia naakkinninnermit sakkukillisinneqartariaqartoq, kisianni naakkinninneq Guutip naapertuilluassusianut ersiutaasoq. Guutip inuiaat annaanneqarnissaannut utertitsissutissatut periarfissiaa tassaavoq naapertuilluassusiata ilaanut tamatumunnga immikkut ersiutaalluartoq.

8, 9. (a) Sooq pilliut utertitsissutaasoq Ny Verden-nutsikkami taaneqarpa ’iluartuliorneq ataaseq’? (b) Jehovap sumik piumaffigaatigut?

⁸ Utertitsissut tamanna — Guutip ernituata Jesus Kristusip inuunera naleqangaartoq — akisoorujussuuvoq, Jehovap najoqqutassiai atortuujuaannarmata namminerlu malimmagit. (Matîuse 20:28) Inuuneq naammalluinnartoq Adamip pigisimasaa maangaannarsimavoq, taamaattumik Adamip kinguaaviisa inuunermut utertinneqarnissaannut inuuneq naammalluinnartoq pisariaqarpoq. (Rûmamiut 5:19-21) Jesusip assuarnaatsumik inuunera, ilaatigut pilliutaa utertitsissutaasoq, apustili Paulusip ’iluartuliornertut ataatsitut’ allaatigaa. (Rûmamiut 5:18, Ny Verden-nutsikkami quppernerup ataani ilanngussaq) Sooq taamaappa? Jehovap isaani inuiaat utertinneqarnissaat naapertuilluartuliornerummat, naak taamaaliorneq taassumunnga akisoorujussuugaluartoq. Adamip kinguaavi ’sullortuutut naffalittut’ Guutip napivikkumanngisaatut ipput, imaluunniit ’ipeqqatut qamilersutut’ Guutip qamivikkumanngisaatut illutik. (Matîuse 12:20) Guutip qularutigisimanngilaa Adamip kinguaassaasa akornanni angutit arnallu aalajaatsut amerlasuut takkukkumaartut. — Naleqqiuguk Matîuse 25:34.

⁹ Asannittuliorneq naapertuilluartuliornerlu angingaartoq tamanna qanoq qisuariarfigisariaqarparput? Jehovap ilaatigut peqquaatigut ’iluartumik iliussasugut’. (Mika 6:8) Qanoq ililluta taamaaliorsinnaavugut?

Innarluissut iluarnerlu noqqaassutigisigik

10. (a) Pingaartumik qanoq ililluta naapertuilluartuliorsinnaavugut? (b) Qanoq ililluta Guutip naapertuilluassusia piniaqqaarsinnaavarput?

¹⁰ Siullermik Guutip ileqqussatigut najoqqutassiai maleruartariaqarpavut. Guutip najoqqutassiai iluarlutillu naapertuilluartuummata tamakkua maleruarneratigut naapertuilluartuliussaagut. Taamaattumik Jehovap innuttami taamaaliornissaat piumasaraa. „Iluartumik iliorneq ilinniarniarsiuk, innarluissut noqqaassutigisiuk,“ Jehovap Israelikkut taama peqqusimavai. (Jesaja 1:17) Qaqqami oqaluutsimini Jesusip tusarnaartini tamatumunnga assingusumik unnersuuppai, peqqugamigit ’Guutip naalagaaffia iluarnerlu taassuma pia piniaqqaaqqullugit’. (Matîuse 6:33) Paulusip Timoteus kajumissaarpaa ’iluarneq noqqaassutigeqqullugu’. (1 Timûtiuse 6:11) Guutip ileqqoreqqusai maleruarutsigik inuttaarlu atillugu, iluarneq naapertuilluassuserlu noqqaassutigissavavut. (Evfisumiut 4:23, 24) Allatut oqaatigissagaanni iluarneq noqqaassutigisarparput Guuti malillugu ilioraangatta.

11. Sooq aamma qanoq ililluta ajortip naalagaassusia akiortariaqarparput?

¹¹ Soorlu nalunngikkipput iluartumik iliorneq inunnut naammalluinnanngitsunut oqitsuinnaanngilaq. (Rûmamiut 7:14-20) Paulusip kristumiut Romamiittut kajumissaarsimavai ajortip naalakkersuineranut akiueqqullugit, taamaalillutik timitik Guutimut tunniulluinnarsimasut ’iluarnermut sakkugisinnaagamikkik’ Guutip piumasani naammassiniarlugu atorsinnaasaanik. (Rûmamiut 6:12-14) Uaguttaaq Guutip oqaasianik atuaqqissaartarnitsigut maleruaanitsigullu ’Jehovamit perorsarneqarsinnaavugut’ ’iluarnermut perorsarneqarluta’. — Evfisumiut 6:4; 2 Timûtiuse 3:16, 17.

12. Nammineq Jehovamit iliorfigineqarusunnitsitut allat iliorfigissagutsigik qanoq iliussanngilagut?

¹² Aappassaanik iluartuliortarpugut allat iliorfigigaangatsigik nammineq Jehovamit iliorfigineqarusunnitsitut. Marlunnik assigiinngitsunik ilioriartarneq nalinginnaagaluarpoq — imminut maleruutiasumik allanullu sukannersumik. Nammineq unioqqutitsinivut pillugit patsisissarsiorajuppugut, allalli kukkuneri pillugit ingerlaannaq isornartorsiuisarluta, naak kukkunitsinnut naleqqiullugit immaqa anginngikkaluartut. Jesus tulluartumik ima aperivoq: ’Sullutit qatannguppit issiutaa isiginiarpiuk, paakkarut isinniittoq maluginagu?’ (Matiuse 7:1-3) Puigussanngilarput Jehovap unioqqutitsinivut misissuiffigeqqissaaraluarpagit arlaannarpulluunniit atasinnaanngitsoq. (Tussiaat 130:3, 4) Jehovap naapertuilluarluni qatanngutitta sanngiissutaat isumakkeersinnaappagit, taava sooq uagut kukkuneri pillugit eqqartuunniassavarput? — Rûmamiut 14:4, 10.

13. Inuk naapertuilluartuuguni sooq Guutip naalagaaffianik nutaarsiassaq nuannersoq oqaluussissutigissallugu akisussaaffeqartutut misigissava?

¹³ Pingajussaanik Guutip naapertuilluassusiatut iliortarpugut oqaluussinermi eqiasuitsumik peqataagaangatta. „Ajorsartut ajunngitsuliorfigikkit, sapinngikkuit ikiuiumanngitsooqinak!“ Jehovap taama oqaluffigaatigut. (Ussatit 3:27) Ilisarsineq Guutip tunisiumatuulluni uatsinnut tunniussimasaa nammineq pigiinnarutsigu eqqortuliornerunngilaq. Inuppassuit tusarliussarput tusarumanngikkaluarpaat, Guutili taakkuninnga naakkinnittumik periarfissiiuartillugu uagut ’allamik isumataarnissaannut’ periarfissaqartittariaqarpavut. (2 Pîtruse 3:9) Jesusitullu nuannaarutigisarparput alla iluarnermut naapertuilluassutsimullu saannissaanut ikiorsinnaagaangatsigu. (Lúkarse 15:7) Maanna periarfissaqarpugut ’iluartuulluta siaruarterinissatsinnut’. — Hosea 10:12.

„Naalagaasut naalakkersuiumaarput innarluitsumik“

14. Naapertuilluassuseq eqqarsaatigalugu utoqqaanertat sumik akisussaaffeqarpat?

¹⁴ Tamatta naapertuilluarnerup aqqutaa ingerlavigisariaqarparput, kristumiulli ilagiissaanni utoqqaanertat taamaaliornissaminnut immikkut akisussaaffeqarput. Jesusip naalagaassusia ’iluassutsikkut naapertuilluarnikkullu aalajangersarneqarpoq’. Tamatumunnga assingusumik utoqqaanertat Guutip naapertuilluassusia malittariaqarpaat. (Jesaja 9:7) Eqqaamavaat Jesaja 32:1-imi siulittuutigineqartoq: „Kunngiusoq naalagaajumaarpoq iluartuulluni, naalagaasullu naalakkersuiumaarput innarluitsumik.“ Nakkutilliisuugamik anersaamit toqqarneqartut, ’Guutip piinik pilittaallutik’, utoqqaanertat Guutip piumasaatut iliortariaqarput. — Títuse 1:7.

15, 16. (a) Utoqqaanertat qanoq ilillutik savanik paarsisoq aalajaatsoq Jesusip assersuusiaani eqqaaneqartoq ilaarniarpaat? (b) Anersaakkut tammarsimasut eqqarsaatigalugit utoqqaanertat qanoq misigippat?

¹⁵ Jesusip takutissimavaa Jehovap naapertuilluassusia misiginneqataallunilu, naakkinnittuullunilu ingasaassinianngitsuusoq. Pingaartumik ajornartorsiutillit ikiorusuppai ’tammartut ujassallugit annaassallugillu’. (Lúkarse 19:10) Savanik paarsisutut qasusuilluni savamik tammarsimasumik ujaasisutut Jesusip assersuutimini eqqartugaatut, utoqqaanertat anersaakkut ittumik tammarsimasut ujartarpaat savaatinut utertinniarlugit. — Matîuse 18:12, 13.

¹⁶ Sualuttumik ajortuliortut assuarinagit utoqqaanertat ajornanngikkaangat ajorunnaarsitsiniarlutik isumataarnissamut siulersuiniartarput. Tammarsimagaluartoq ikiorsinnaagaangamikku tipaatsuutigisarpaat. Unioqqutitsisorli peqqissimiumanngippat aliasuutigisarpaat. Taamaakkaangat Guutip naapertuilluartumik najoqqutassiai malillugit peqqissimiumanngitsoq ilagiinnit anisitaasariaqartarpoq. Taamaattorli, ernerup tammarsimasup ataataa assigalugu, neriuutigiuarpaat unioqqutitsisoq arlaanni ’ilitsorilissasoq’. (Lúkarse 15:17, 18) Taamaattumik utoqqaanertat anisitaasimasut ilaat pulaarsinnaavaat paasitinniarlugit qanoq ilillutik Jehovap peqatigiissortaanut utersinnaasut.a

17. Eqqunngitsuliornermik suliassaqaraangamik utoqqaanertat suna anguniartarpaat, pissutsillu suup tamatumani ikiussavai?

¹⁷ Ingammik eqqunngitsuliornermik suliassaqaraangamik utoqqaanertat Jehovap naapertuilluassusia malinniartariaqarpaat. Ajortuliortut Jesusimut ’palliguttarsimapput’ misigisimagaangamikku paasisinnaagaatik ikiorumagaatillu. (Lúkarse 15:1; Matîuse 9:12, 13) Soorunami Jesusip ajortuliorneq akueriinnanngilaa. Zakæusip ingasaassinikkut iluanaarniuteqartartutut ilisimaneqartup ataasiaannarluni Jesus nereqatigigamiuk erloqisissimasaminut tamanut taarsiissuteqarnissamut killinneqarpoq. (Lúkarse 19:8-10) Ullumikkut utoqqaanertat naliliisitat suliassaqaraangamik tamatumunnga assingusumik anguniagaqartarput — eqqunngitsuliortut peqqissiminissamut kajumissaarneqarnissaat. Utoqqaanertat Jesusitut inussiarnertigippata eqqunngitsuliortut amerlasuut taakkununnga ikiortissarsiorusunnerussapput.

18. Suna iluaqutigalugu utoqqaanertat tassaasinnaappat ’anorersuarmut oqquiffiit’?

¹⁸ Asanninnerup utoqqaanertat ikiussavai Guutip naapertuilluassusianik misigittaatsuunngitsumik malinninnissaannik. Soqutiginarpoq Ezra uummatikkut, isumakkut piinnarnani, piarersarsimammat Israelikkut inatsisinik ajoqersornissaannut. (Esra 7:10, NV) Paasinnittumik uummateqarunik utoqqaanertat najoqqutassiat tulluartut Biibilimeersut atorsinnaassavaat pineqartut atugaat eqqarsaatigalugit. Jesusip arnaq aaqartuarsimasoq ajorunnaarsikkamiuk takutippaa Jehovap naapertuilluassusia malissagaanni anersaaq inatsisinut tunngaviusoq aamma allassimasut paasisariaqartut. (Lúkarse 8:43-48) Utoqqaanertat naapertuilluassutsimik aamma misiginneqataanermik takutitsisartut tassaapput ’anorersuarmut oqquiffiit’ namminneq sanngiissutit pissutigalugit imaluunniit aaqqissuussaaneq manna ajortoq inuuffigisarput pissutigalugu misilinneqartunut tamanut. — Jesaja 32:2.

19. Qatanngut arnaq utoqqaanertanit Guutip naapertuilluassusianik perorsarneqarami qanoq qisuariarpa?

¹⁹ Qatanngutip arnap sualuttumik ajortuliorsimasup naapertuilluassuseq Guutip pia pingaartissallugu ilikkarsimavaa. „Ilumoorlunga oqassaguma utoqqaanertat saaffigissallugit sioorasimavunga,“ nassuerpoq. „Misiginneqataasumilli ataqqinnittumillu iliorfigaannga. Utoqqaanertat ataatatut ipput, eqqartuussisutut sukannersutut innatik. Paasilersippaannga iliuutsikka allanngortikkukkit Jehovap ajattornavianngikkaanga. Ilikkarpara ataatatut asannittutut perorsartaraatigut. Uummatiga Jehovamut ammarsinnaalerpara tatigalugu qinnutikka tusassagai. Ilumut oqarsinnaavunga ukiut arfineq-marluk matuma siorna utoqqaanertanik oqaloqateqarnera tassaasoq Jehovamit pilluaqqussut. Taamanerniilli qaninnerungaartumik attaveqarfigilersimavara.“

Eqqortuliornissaq sianiginiarsiuk naapertuilluartumillu iliorlusi

20. Iluarneq naapertuilluassuserlu paasigutsigik maleruarutsigillu qanoq iluaqutigissavarput?

²⁰ Qujanartumik, Guutip naapertuilluassusia tassaaginnanngilaq inuit pisassaannik pinissaat. Jehova naapertuilluassutsiminit killinneqarsimavoq uppernermik iliortut tamaasa inuunermik naassaanngitsumik tunissallugit. (Tussiaat 103:10; Rûmamiut 5:15, 18) Guutip taamaaliorfigaatigut naapertuilluarluni pissutsit atukkavut eqqumaffigigamigit, assuarinatalu annaakkusukkamisigut. Aap, Jehovap naapertuilluassusiata angissusia paasinerugutsigu taassumunnga qanillinerussaagut. Pissuserisaalu tamanna ilaarniarutsigu inuunitsinnut allallu inuunerannut pilluaqqussutaassaqaaq. Naapertuilluassuseq noqqaassutigigutsigu Ataatatta qilammiusup maluginngitsuussanngilaa. Jehovap ima neriorsorpaatigut: „Eqqartuussinermi eqqortuliornissaq sianiginiarsiuk naapertuilluartumillu iliorlusi, annaassinissara qanillimmat iluassuseralu erniinnaq saqqummiunneqassalluni. Pilluarpoq inuk ima iliortoq.“ — Jesaja 56:1, 2. (wE 1/8 98)

[Quppernerup ataani ilanngussaq]

Eqqaamavigit?

□ Sodomap Gomorrallu aserorneqarsimanerat Jehovap naapertuilluassusia pillugu sumik ilinniutigisinnaavarput?

□ Utertitsissut sooq Guutip naapertuilluassusianut asanninneranullu immikkut ersiutaalluarpa?

□ Periaatsit pingasut assigiinngitsut suut atorlugit naapertuilluartumik iliorsinnaavugut?

□ Ingammik sukkut utoqqaanertat Guutip naapertuilluassusia ilaarsinnaavaat?

[Qupp. 15-mi assiliartaq]

Oqaluussinitsinni Guutip naapertuilluassusia ersersinneqartarpoq

[Qupp. 16-mi assiliartaq]

Utoqqaanertat Guutip naapertuilluassusia maleruaraangassuk ajornartorsiutillit taakkununnga ikiortissarsiornissartik piuminarnerutittarpaat